14 سنة وتبي اي فون..صح او غلط؟؟ ردودكم اللي تحدد المصير

[ســكره ورديه]

ماايد وبعنف

البنت بعمر بالمراهقه خذي لها اي جهاز ثاني غير هذولا اذا ملزمه

خليها تنتبه على دراستها

 

[قدساويهـ]

رد : 14 سنة وتبي اي فون..صح او غلط؟؟ ردودكم اللي تحدد المصير

خالتي بنتج كبري وانا عندي فون شريته بعطلة اخر السنه يعني يوم طلعت من تاسع رحت لعاشر بس كان بشرط انه ايب اعلى نسبه بين اخواني فدرست الامتحانت مالت الفاينل يوم طلعت النتائج صرت انا الثانيه بالبيت وكانت نسبتي 87.5% تضايقت واااايد لاني مايبت 90 بس ربي مو كاتب اني ايب 90 الحمدلله ع كل حال ابوي قال مافي فون ترجيته يبه انا يبا نسبه عاليه واحن عليه بس مارضي يشتري لي جان اجوف خالتي توها داخله علينا ويايبه لبنتها فون ((بنتها كبري)) وتضايقت وزعلت وقالت لي خالتي((مو خالتي اللي يابت لبنتها فون لا خالتي الثانيه )) لا تزعلين يا توتو حبيبتي انا ايب لج اللي تبينه بس اكلم ابوج واشوف رأيه كلمته وقال اوك ((اشترت ليُ72 لانه سألت عن خدمة البيبي قال لها واحد بالمحل والله يا اختي ماانصحج تشترينه لبنت عمرها 14 سنه لانه موزين )) الحمدلله وااايد استانست وألحيييييين فوني يمي طايح لا استخدمه ولاشئ بس جذيه يعني عندي فون

 

[}_غلآتي_{]

رد : 14 سنة وتبي اي فون..صح او غلط؟؟ ردودكم اللي تحدد المصير


شووفي انا رأي أنج ماتشترين لها تلفون ألحين كلش لا ايفون ولا غيره
لأن توها صغيره خليها تدرس وتخلص وعقب تشتري
اذا كل ماشافت عند البنات شي قالت ابيه ماراح تخلص طلبات
وبنات الناس غير عن بنتج يعني تختلف التربيه والبيئه والظرووف

اذا تبي واصرت اشتري لها ايبود خل تستانس فيه
واذا تخافين من البرامج الوصخه اذا سويتي اكاونت بالايبود
راح يطرش ع ايميلج مثل فاتورة عن كل شي نزلته حتى لو نزلته وامسحته << فهمتي علي
في برامج ببلاش وفي بفلوس
بس الي بلاش واجد وحلوين ماتحتاج تحطين لها ماستر كارد
وانتي راقبي الايبود وشوفي شنو تنزل من برامج مثل الفيس بوك والسكايب ومن هالحجي

والله يخليها لج

 

[~ miss NERD ~]

مادري انا شاوفه عادي!
انا شريت الايفون لما كنت اكبر من بنتج بسنه
<< يعني اول ما طلع الايفون قبل لا يهبون فيه
و عادي اللي تقول فيه برامج وصخه .. اهي البنت تقدر تتحكم بهالشي و تقدر انها ما تنزل هالبرامج ..اهي بنت كبيره و احسها مو ياهل اسم الله عليها و تعرف ان في رب يشوفها و يحاسبها اذا استعملت هالبرامج عدل!
بس انا بقول شي الحين يناقض كلامي .. لا تشتريه الحين لان صج صج يلهي عن الدراسه .. او اذا شريتيه لها حطيه عندج و بالويك اند عطيها << امي كانت بتسوي جذي بس انا عييت
القرار الاول و الاخير لج

 

[& شرطان الذهب &]

رد : 14 سنة وتبي اي فون..صح او غلط؟؟ ردودكم اللي تحدد المصير

لا ثم لا ثم لا
انتبهي لا تشترينه بناتنا من غيره والله يستر عليهم

 

[mlakiya]

اناااااا اشوف مافيها شي كلش اذا انتي واثقه من بنت

وتستاااااااهل

 

[فقـدتـك حيــل !]

رد : 14 سنة وتبي اي فون..صح او غلط؟؟ ردودكم اللي تحدد المصير

ما أأيد ..
أحس الفون حق المراهقات ، بداية الدمار !
ديربالج عليها ،
واشتريلها نوكيا متى ما طلعت عطيها وأول ما ترد اخذيه منها ..

واذا تبي تستانس وتلعب ؟
يازين الآيبود ..
اختي بـ 3 ابتدائي وعندها واحد ،
انتي تنزلين لها الألعاب وتحت عينج عارفه شنو فيه ،
وسلمي على بنيتج ;* ..

 

[Ǥoldɛn ʝɛωɛL]

رد : 14 سنة وتبي اي فون..صح او غلط؟؟ ردودكم اللي تحدد المصير

تو الناس على سوالف بلاك بيري و ايفون

انا حتى موبايل ما عندي وانا بالثانوي

شعندي كل الوقت مع اهلي و رفيجاتي اكلمهم بالمسن وبس

 

[Wa'97a]

رد : 14 سنة وتبي اي فون..صح او غلط؟؟ ردودكم اللي تحدد المصير

أنا بتاسع وعندي آيبد تش أهو مثل الآيفون بالضبط بس الآيفون فيه خط
و الآيبد مافي خط وحلو بس أنا ما أحب سوالف التلفون
و بلاك بيري وتلفون البيت عندي كل ما أبي أحد يتصل علي
من تلفون البيت و أنا ما أحب اطلع إلا مع أمي
يعني مو لازم بنت عندها تلفون و أهو مو لازم

 

[مملوحه السهول]

رد : 14 سنة وتبي اي فون..صح او غلط؟؟ ردودكم اللي تحدد المصير

اتوقع مآآ فيها شــي شنو الفرق اذا شرت بلآك بيري او ايفون اذا عندها تلفون من قبل شــ الفرق اذا غيرت نوعيه التلفون ؟؟ ،، احس الحين ودها تغير التصويت هههههه

الله يحفظها لج

 

[classicyah]

رد : 14 سنة وتبي اي فون..صح او غلط؟؟ ردودكم اللي تحدد المصير

آلسلآم عليكمْ و رحمة آلله و بركآته ،

،


أنـآ عمري 18 سنه ، ،

و خذت لي بلآك بيري عقب مـآ اتخرجت من الثـآنويـه . .

،

و آلله حتى لو كآنت بتضيف ربيعآتهآ بس ،

شي برودكآستآت مب حلوهْ يطرشونهـآ ، !

مب منآسبة لسنهآ أبد ،

و انـآ اهنيه أتكلم عن آلـ bb ،

و آلله الوحده تستحي اتشوف أو حتى تقرآ ، !!

مآ توقعت في يوم ، بيكونون عندي بنآت في اللسته بهالوقآحه . .

بس آلحمدلله ، فكيت عمري ، و أي وحده أشوفهآ اتطرش نفس هالسوآلف ، أحذفهآ على طول ، !

،

و بنتج مرآهقهْ ، فـ أنصحج مآ تآخذين لهآ آي فون و لآ بلآك بيري ،

بس عطيهآ شي بديل أو مشآبهه مع المرآقبه . . =)

،

و آلله يخليكن لبعض يـآ رب . .

 

[shmoo5 2ntha]

رد : 14 سنة وتبي اي فون..صح او غلط؟؟ ردودكم اللي تحدد المصير

ما أيد التيلفون قبل التخرج كلش

خل تخلص مدرسه وتالي تاخذ أحسن تيلفون

آنا إختي ب 11 ادبي وماعندها ولاتفكر لأن مقتنعه الحمدلله

والله يخليها لج ياااااااااااااااارب ويجعلها من الذريه الصالحه ان شالله

 

[معكرونه أسبكتى يم يم]

رد : 14 سنة وتبي اي فون..صح او غلط؟؟ ردودكم اللي تحدد المصير

كلش انا ضد هالاشياء الزمن يخرررررررع

 

[كيكه توفي]

امبيه عادي ترا إحنا ب2010 مو 1990 الزمن تغير التكنولوجيا بكل شي علا 6 سنين اذا مو اصغر عندهم موبايلات

بعدين الايفون و البيبي مو بس حق قرقه لا في العاب برامج و شغلات وايد

أنا من رحت 4 متوسط و أنا احن ابي موبايل ما رضو ياخذونلي الا لما صار عمري 16 ب3 ثنوي و طبعا كلامهم نفس كلامج و أنا كلامي نفس كلام بنتج

انقهر أشوف كل اللي بعمري و اصغر مني عندهم و أنا ماعندي

و كل كلمه والثانيه امي تقولي أنا ماخذيت موبايل الا عقب ما تزوجت أقولها يمه مايصير تقارنين زمنج بزمنا!!

عقب ماخذولي الموبايل بسنه او سنتين عطو اخوي بو 6 سنين جهاز و لي قتلهم يقولون لي الزمن تغير بينكم و بينه لووول اقولهم الله و اكبر بيني و بينه الزمن تغير و لما اقولكم بيني و بينكم أنتو ماتغير!

المهم أنا قلت قصه حياتي بس لأني حاسه ابنتج و مثل ماقتلج الحين اللي عمره 6 سنين عنده لابتوب و ايفون و اي باد بنتج مره 14 سنه و الله لا تخلينها تتحسر علا عمرها لي شافت رفيجاتها و بنات خالاتها و عماتها كل وحده بيدها جهاز ويسولفون عن البرامج و الألعاب واهيا تطالعهم ساكته

نفسي ب3 ثنوي كان عمري 16 اهلي عطوني ابوي كان راضي بس امي لا كانت تقول نفس كلام امج لمن تزوجت صار عندي تليفون والي يحرني انها تزوجت عمرها 16 رحت انا وابوي شرينا من وراها وحطينها جدام الامر الواقع لووول :hjy5jewf:

 

[كيكه توفي]

عاد انا ذاك اليوم كتبت الرد ونسيت اصوت توني صوت وانا نعم اؤيد

 

[Mrs.Q]

رد: رد : 14 سنة وتبي اي فون..صح او غلط؟؟ ردودكم اللي تحدد المصير

امم حبيبتي خل اقول لج
انا بوجهة نظري
البلاك بيري او الايفون واااااااااااايد رااح يلهونج عن درااستج
وبالاخير منتي مستفيده منه شي
بالعكس ضيعتي دراستج و وقتج على شي ماااااااااله معنى
<<عن تجربه
انزين نصيحتي لج
اشتري ipod touch شكله يشووق ونفس الايفون
بس حزة الدراسة وخريه عنج
واذا صار عندج وقت فراغ استخدميه على كيفج
صدقيني الوالده عندها منطق
واللي تشووفه صح
ويمكن انتي الحين ماتفهمينه
بس لما تكبرين شوي راح تفهمين
وراح تبوسين راس امج على هالشي
وقولي انا ما قلت
اوكي حبيبتي
البنات اهمه اللي خسرانين موو انتي
بالعكس جذي راح تكسبين 4 اشياء!تتخيلين!
اول شي رضا امج عنج
ثاني شي رضا ربج عنج لان رضاه من رض امج
ثالث شي ان تكوونين مسايرة البنات بهالهبه ان عندج ipod
رابع شي ما تضيعين درااستج
اوكي حيااتي
الله يوفقج ياارب:**

عين العقل والسنع

 

[غرنوووقه]

مااحس للاي فون داعي

توها صغيرهااا رااح يلهيهاااا

عن الدراسه وعن حياتهااا لانه جهاااااااز فيه العاااااب وبرااامج تلهييي الواااااحد

 

[willa]

تم التصويت

صراااحة بنتج صغيرة وماله داعي الآي فون

اشتري لها آي بود توتش وفيه ألعاب و كل شي

و بعدين لا تلهى عند دراستها ببلاك بيري و إلآ آي فون

مو شرط كل شي عند رفيجاتها لازم يصير عندها حتى لو تقدرون توفرونه

إذا ما كان فيه فايدة لها وبس


و لبنتج : انطري شوي كلها سنتين و تاخذين فون

 

[so_what]

تم التصويت

 

[لؤلؤية]

رد : 14 سنة وتبي اي فون..صح او غلط؟؟ ردودكم اللي تحدد المصير

مشكورين يا بنااااااات على الردود
وللمعلومية
تراااااااااا اهيا متااااااااابعة التصويت
جنه انتخابات
تقولي انتي اكثر مني ...بصوت حزين
ههههههههههههههههه

طبعا انا ابيها تعرف انه الاغلب والاكثر يرفضووون هالشي
مو مثل ما يفهمونها البنات بالمدرسة

انا ما صوتت عشان الحيادية...

اليوم تقولي
قلت للبنات بالمدرسة ...اللي مشتركة بمنتدى كويتيات حتى لو امهاتكم قولولهم يصوتولي...والي مو مشتركة تشترك عشان التصويت
ههههههههههههههههههههههههه

وشكت لابوها...قالها ما يصير انا اشترك بمنتداهم واصوت معاج ....؟؟!!!!
:krkrkr: