** هــديــــل ** روايـــه كويتيــــه حقيقيــــه ..

[بيوتي]

عفيه بنااات سامحوني ان البارت صغير ...

علشان تونا واصلين الوفره على ما احط اغراضي ان شاء الله اكملها لكمم ...


صدقوني ماراح انساكم ...

 

[بيوتي]

رجعوني الزنزانة وما كانت موجودة كنت اسمع صوت صراخها بس ما كنت ادري وينها كانت طول الليل تبكي وتصرخ ، رجعوها اليوم الثاني وكانت تخرع من الدم اللي غطـى وجهها بكيت لما لقيتها بهالحالـه ، قالت لي: أمانه مآبي أدخلج بالسالفة أنت] صغيره تكفيـن ترى أنا قلت لهم انج مالج دخل بالموضوع ولاتقولين أي شئ ، خذوني من عندها وودوني غرفه مادري شلون صايره قعدوني بكرسي سألوني بعلاقتي بعبدالله وحسين وإيمان ومنو معانا بالمقاومة ، قلتلهم مااعرف شئ حطولي ماي على وجهي وجابو كهربـا وحطوها على مادري ليـش تذكرت وليـد حبيبي بهاللحظه ، يمكن لأني أبي قوة تمدني فصـار على بالي ، ماحسيت إلا إنـي فقدت الوعي وردوني الزنزانة مرة ثانـيه وفتحت عيوني على وحده تصحيني وتقولي قومـي قومي وعطتني ماي طبعا ماي وسخ المهم إن اسمه ماي ، وسألتها منو أنتي قالت لي أنا (مريم) وأنا معاكم بالزنزانة، وكـل قصتي أني حاطه صورة الأمير بالسيارة واحسبوني مع المقاومة ، وسألتها عن إيمان قالت لما ردوني خذوها وما تدري عنها شئ إلا إن إيمان وصتها تبلغني أن أصر على موقفي وإن دم الكويت برقبتي ، ومر علينا يوم من غير ما أشوف إيمان أو أعرف عنها شئ ، دخل علينـا الضابط ونادى على اسم وحده اسمها(ليلى)
وقالها أنتي الظاهر داعيلج أهلج ياللـه روحي بيتكم ، قلت له انزين وأنا متـى اطلع ؟ ووين إيمان ؟ رد علي وقال الظاهر إيمان راح تلحق حسين وعبدالله ، خفت من كلامه وما كنت اعرف شنو يقصد ... بس مريم قالت لي إن عبدالله وحسين استشهدوا من قوة التعذيب والحلو أنهم مافتنوا على ربعهم ، والله كفو ياشبابنا ..
قلت بنفسي ألحين اهم ماتوا وما قالوا اسمي وبيصير علي الدور ولازم أصير قوية مثلهم ,
استقويت ومر الليل الثقيل فتح باب الزنزانة ورموا علينـا أحد ، وطلعت إيمان الغالية أللي جسمها مابان فيـه مكان فاضي من التعذيب ، استصعبت الكلام وحكت لي أللي صار معاها بالتعذيب وآخر شئ أتوقعه طرق التعذيب إللي سووها معاها ، مابقى تعذيب انساني ولا حيواني ما اتبعوه ، المهم بلغتني إنها ماقالت عني ولاشـئ ولاراح تقول وإنها تبيني أرد بيتنا ، وطلبت منـي بمجرد ما أرد الديره أعطي أمها وصيتها وإنها تطلب أن يتعمل باسمها ماي سبيل ، مرت الأيام والأسابيع وإحنا نترحل من زنزانة إلى زنزانة وما كان في أمل أطلع أبدا ، وصار يوم طلبوا إيمان ومريم وخلوني مع الباقين ننتظر مصيرنا وردوا لما مريم وإيمان بس ردوهم جسد بلا روح,,, كانت مريم وإيمان مستشهدين استشهاد الكل يتمناه ومنظرهم أبد مايغيب عن عيني ...


حاولت أنسى شكل إيمان البشع من الموت وحاولت أستجمع قواي عشان أرد ديرتي وأهلي و وليد ، وعرفت إنـي أنا موجودة ألحين بسجن البصرة وإن ماكو فايده من رجعتي الديره باشروا معانا جميع التعذيبات النفسية والجسدية ويوم ورا يوم كنـت أستجمع قواي من هالتعذيب لأنهم ضانين إنـا راح نضعف ، وبعد هذا كلـه رحلونـا على سجن تحت الأنفاق اسمه السجن الأسود من الظلام إللي كنا فيـه سموه أسود ، صرت أكثر قوة مـع الأيام وصرت أعرف إشلون أداوي المرضى إللي بالزنزانة معاي وعرفت بعض الرموز اللي يتداولونها الحرس بينهم، كنـا مجموعه كبيره من الكويتيين وبعض الجنسيات الأخرى إللي كنـا نخاف نتكلم جدامهم بآي شئ لأنا خايفين لايكونون جواسيس للعراقيين ، كان في وحده ساحبينها من ليلة عرسها بالفندق واعدموا زوجها قدامها وموجودة بالزنزانة بفستانها مال العرس بعد ماصار لونه أسود ، كنـا نخيط لنـا ملابـس من الخيش ، وكنا نتلحف بالحصير ، وكنا نأكل فضلات العراقيين وبكـل هذا كنت أتذكر طباخ أمي وقعدات أهلي وأتخيل شنو يسوون ألحين ..

الأيام تمر والتعذيب الجسدي والنفسي مستمر ويانا،أتذكر أهلي ويطيب لي ذكراهم ، ولكن ويـن أنا وويـن أهما ، إصراري وعزيمتي على ديرتي وصلتني للي أنا فيـه ، وماهو بمعروف حقنا متى نطلع ومتى نشوف النور وإحنا محبوسين بهذا المكان..

صـار شهـر فبراير ولي ألحين ماندري شنو نسوي بأعمارنـا نشوف بعض الوجوه والشخصيات المعروفه بين المأسورين بس مانقدر نتكلم نخاف يتعرفون عليهم ، عرفت أمور وايد بالحبس وتعلمت التمريض واشلون أسوي من أي شـئ شغله نافعه ، ألحين باقـي يومين على العيد الوطني وكلنا شوق على ان تتحرر ديرتنا قبلها ، ولكن مافي فايده .

صار 25 / فبراير 1990 وكل الكويتيين بالزنزانات يكبرون ويهللون وهذا الشئ خلا الحرس والجنود يصبون جام غضبهم علينا ومو عاجبهم الحال ، فرشوا علينـا مادة منومه ومالقينا روحنـا إلا صاحيين على صوت الرشاشات ومدافع وكان هذا فجر 26/فبراير1990 عرفنا إن الكويت تحررت وما صدقنا من فرحتنا وكانوا العراقيين يصرخون بوجيهنا استهزاءاً وإن الكويت لهم مهما يصير وراح يجي يوم يأخذونها لهم أكيد ، قعدنا نغني الأغاني الوطنية والنشيد الوطني ولكن ماكو فايده الحقد معمي عيونهم ، خذونا كلنا ورحلونا مكان ثاني بعيد عشان لمـا الأمريكان يفتشون مايلقونا ولا يلقون أسرى..

خذونا دفعات كبيره بسيارات ضخمه وكنا نصفق ونغني من فرحة التحرير وهذا إللي خلا الجنود يضربونا كل شوي عشان نسكت ، وصلنا لمكان وأتوقع انه الحدود السورية العراقية لأنه وايد بعيد عن المكان إللي احنا فيه ودخلنا بين الجبال والدروب الوعرة وأجبرونا أنا ننزل تحت خندق درجه طويل ، وكان محفور تحت الأرض بعمق كبير ، جرونا واحد ورا الثاني ، وطبعا كانت غرف التعذيب أكثر من الغرف اللي ننام فيها حطونا كل 7 * 3 نساء بزنزانة قياسها 4 وكنا نتناوب على النومه عشان نتمدد على الأرض ، وكان معانا بنات أصغر مني وحريم عجائز وأذكر وحده منهم كان اسمها بيبي صباح وكنا شاكين أنها بنت الصباح وخذوها ومو راضيين يفهمون أن اسم أبوها صباح مو عايلتها ، بس وين اللي يفهم ؟ يجرون القوي والضعيف ، حتى نسمع صوت حرمة بالزنزانة أللي يمنا قاعدة تولد يااحرام ولافي احد معبرها ،، تصرخ وتصرخ ويقول لها الضابط إذا ما سكتي راح أعرف اشلون أسكتك ...

وكانت فقيرة تحاول تكتم صرختها ، ترجيت الضابط ينقلني زنزانتها وما بقى آية ماقريتها عشان يوافق علي وبالأخير يالله يالله رضى ،، ورحت لها وكانت يااحرام شكلها يعور القلب وقعدت أساعدها وتعلمت من الدكتورة اللي كانت أسيرة معانا اشلون أولد كانت الدكتورة تدور شئ نظيف تحط فيه الياهل بس ماكان فيه ،، وكان شكله يهبل ، وكانت بنت وسمتها (تحرير ) ...



تاابعووني ...

 

[so_what]

حسبي الله و نعم الوكيل عليهم , ما شاء الله عليج كنتي قويه والله يرحم وفاء العامر و جميع الشهداء

 

[فزالخفوق]

ماشاءالله عليج اهنيج على قوة ايمانك والله لايعود ذيك الايام ... خالي شهيد الله يرحمه ويرحم شهداء الكويت

 

[قلب وردي]

كملي حبيبتي ... وااااي ذكرتينا بالمأسااااااة الله لا يعودها من اياااااااااام

 

[@@jwan@@]

كملي حبيبتي حدي انشديت
حسبي الله عليهم عاد انا مواليد 90 ماشفت شي عورتي قلبي والله
كملي بليييييز

 

[بيوتي]

ان شاءالله حبيبااتـي ..ررااح أكملـهـا ...

بس عطوونـي ساعه >> عشاان بس اكتب الاحداث وبالتفصيـل >> مابي أنسى شــئ ....

 

[بيوتي]

وبعد شهر على الموضوع يانـا مجموعه كبيره من الحراس وقالوا لنـا : انتوا الحيـن عارفين إن الجيش الأمريكي دخل علينا وطالبنا برد مجموعه منكم لمنظمة الأسرى والمفقودين وعشان نحاول نسكت هذا الجيش الأمريكي الغبي لازم نرد جم واحد منكم ، وكنت ادعي ربي أكون منهم ، ونادوا على الاسامي واحد ورى الثاني وكانت أم تحرير بينهم وكانت الفرحة مو شايلتها ، وخذوا تقريبا 45 شخص ماكنت منهم ومر علينـا أشهـر وإحنا على هالحال لاحس ولاخبر وكل يوم يتبعون تعذيب على أشكال على بالهم هالشئ راح يفيدهم ، منعوا عنا الأكل وكنا نسمع عن أموات ماتوا من الجوع وكل اللي يسون العراقيين أنهم يأخذونهم ويقطونهم بره يأكلونهم الحيوانات ، صج كانوا مايعرفون ربهم ..

صارت سنة على وجودنا بالزنزانات وهما على نفس المنوال ، ومن وقت والثاني يبدلونا بالزنزانات بين بعض وماكنا نعرف شنو الحكمة ، وكانت ريحة السرداب عفنة لعدم وجود شبابيك فيها ، كنا نستغرب الأمريكان مايعرفون مكانا لين ألحين ؟ وإن هيئة الأسرى والمفقودين ماسو شـئ ؟ طبعا هذا لنكران العراق على وجود أسرى كويتيين لديها ، طبعا الوضع تأزم لقلت الأكل ومرات وايد مافي أكل ، طلعوا قرار العراقيين أن يصعدون جم وحده فينا تنظف مكاتبهم فوق والحوض الساقط مال الخندق كل يومين يطلعون 3 حريم وطبعا ماكنا نسلم من تحرشاتهم لنـا ، حتى أذكر إن وحده ياحرام خذوها واعتدوا عليها بالمكتب وردوها لنا مرة ثانيه تحت قلوبهم أبد مافيها رحمة ....


ومرت الأيام والسنين علينا والدنيا ماتدري أن في ناس محبوسة تحت الأرض ماكنا نعرف ليش ما يسألون عنا يمكن لأنهم ينكرون العراقيين وجود أسرى عندهم أو إن الكويت على بالها إن إحنا متنا لأن جثمان الأسرى الكويتيين وصلو الديره ، وكل يوم نفقد أحد بالزنزانة وكل يوم نسمع نفس الصراخ والتعذيب وماكنا ندري ليش بعدهم يعذبونا شنو بيعرفون بعد ماتحررت الديره ، حاولنا اثنين من الأسرى الهروب عن طريق أنهم يرمون الزبالة بره الخندق وينحاشون بس ماكو فايده لأن الموضوع محاصر وردوا واحد مصاب برجله وواحد بكتفه من الرصاص يعني أي واحد يفكر ينحاش ماله إلا الموت أو الرجعة مجروح ..


صارت آخر سنة 1998 وصار عمري 28 سنة بس اللي يشوفني يقول يـوصل الثلاثينات ، يطريلي قبل النوم صورة أهلي وصورة الحبيب وليد وأقول شمسوين من بعدي ، كان ويانا وحده بالزنزانة اسمها (أروى)أمها سورية وأبوها كويتي ، كان سبب حبسهم لها أنها ماشيه بمسيرة نسائيه وكانت احد إفراد مقاومة 25 فبراير ، بس محد علم عليها وكانوا يبون يمسكون عليها شئ ، قالتلي أنها ممكن تدبر لي طلعة عشان ننحاش بس لازم نفكر عدل وبعد تفكير لمدة أسبوع لقينا طريقة ننحاش فيها ، حاولنا ننوهم الحراس إن إحنا نبي نزرع الأرض عشان نأكل منها وصدقوا الموضوع وبعد مرور أسبوعين على خطتنا كنا نطلع يوميا نسقي الأرض ونحفر فيها وكان يساعدنا جم أسير بالحفر والري، صار يوم تطبيق الخطة وكانت إن نحفر روحنا ببراميل الزبالة وكان طبعا الوضع جدا مزري وتطوع الأسيرين (خالد وناصر ) أنهم ماينحاشون ويانا عشان يموهون الحراس إن في احد موجود وما يصير فقدان للعدد ، صار وقت وصول الشاحنة اللي تأخذ البراميل وشالونا ورمونا بدبة الشاحنة ، وكانت الريحة أبشع ريحه شميتها بحياتي بس المفروض نستحمل ، وضغطنا على روحنا ليمن عدت أميال وأميال من موقع الحبس وما ان شفنا قرية صغيرة جدامنا رمينا روحنا بالأرض وكانت أروى ترجع من لوعة الجبد اللي حاشتها ، محنا مصدقين عيونا إن الخطة انجحت والحمد الله الله عمى بعيونهم وإن إحنا قاعدين نمشي بحرية ، بس لاننسى إن لي ألحين إحنا بالعراق يعني هم ماكو فايدة من اكتمال الفرحة ، حاولنا نختفي عن الأنظار وأول شـئ حبينا نسويه تغيير أشكالنا عشان محد يتعرف علينا ومن عشرتنا مع الكلاب العراقيين عرفنا نتكلم مثلهم وأحسن بعد ..


لقينا بيت صغير حاولنا نطل من الدر يشه فيه لقينا عجوز قاعدة تطبخ حاولنا ندخل عشان نرتاح شوي دقينا الباب عليها وسلمنا عليها وطبعا تكلمنا معاها عراقي عشان ماتعرف ولاتشك فينا والمفروض محد يعرف أنا كويتيين ، قلت لها : خالة إحنا تعبانين هوايا على مود سيارتنا اختربت هناك بالطريق وإحنا مع المطر والتعب ملابسنا توسخت وتعابا ، اقتنعت العجوز بكلامنا وقالت لنـا : شوفوا بناتي آني مره كبيرة ماعندي من العيال شي هذا وقتي كله قاعدة بالبيت وما أسوي شئ، حياكم إذا تريدون ملابس أو آكل أكلوا وارتاحوا عندي وكملوا طريجكم بالسلامة .


قعدنا وبدلنا ملابسنا عندها وخذينا ملابسنا القديمة اللي يليق لنا وكلينا ودخلنا الحمام أنا وأروى عشان نقص شعورنا ونغير من شكلنا لأن شعرنا كان وايد طويل وإحنا بنسوي تغيير كامل لنا ، قصيت شعري بوي وأروى قصته كاريه وحاولنا نحط لنا حبات خاله على وجهنا لتغيير الشكل وطلبنا من الخالة ملافع لنا لأنا ماكنا متحجبين وقتها وإذا لبسنا الحجاب راح يتغير شكلنا أكثر .


طلعنا وقلنا لها نبي سيارة توصلنا للنجف ، قالت في محطة باص ممكن توصلنا لأخر الشارع ، وبعد ماتشكرناها خذينا ملابسنا ودفناها بالأرض بعد ما قطعناها قطع قطع ، لحقتنا العجوز وعطتنا ثلاث دنانير وقالت لي : أنا اعرف إنكم ماتملكون فلوس أخذوها والله يرزقكم من بعدي ،، استغربنا إن بالعراق في ناس قلبها أبيض أول مرة أحد فيهم يعاملنا زين ، كملنا دربنا أنا وأروى وركبنا الباص ، قالتلي أروى أنها بتتصل على خالها بسوريا عشان يدخل العراق ويطلعنا ، وصلنا النجف وقعدنا نحوس فيها طبعا السفارات الخليجية مسكرة بالعراق كلها ، أروى راحت تدور تلفون بدق على سوريا ، بس كان في مشكلة أنها ناسيه الرقم والحين شنسوي؟ ..
كان ودي أدق على الكويت بس الخطوط مقطوعة بينا وإذا دقيت راح يصيدونا فنسيت الموضوع ، ظلينـا نفكـر شنسوي قالت لي أروى: أنا ياهديـل أعرف العنوان عدل لأن إحنا وايد نروح لأهل أمي بسوريا بس الرقم والله نسيته ، قلت لها ماكو إلا ندش سوريا عيل ...

 

[بيوتي]

اشلووووووون ندش سوريا وماعندنا هويات بهذا الرد ردت علي أروى ،قلت لها كل شـئ وله حـل ، قعدنا نفكر والدينارين إللي بقى لنا شرينا لنا غدا وعشا ، ألحين أنا وياج نعرف نطلع من الأسر وماعرفنا نطلع من العراق لازم في شئ يساعدنا ، حضرتني أفكار جهنمية قلت لها اشرايج نتعرف على شباب حوالينا ونوهمهم ان حنا عراقيات منحاشين من أهلنا ونبي ندش سوريا نسترزق منهـا ، ويمكن يفكرون لنـا بطريقة ، طبعا استغربت الفكرة وقالت منو بيصدقنا ، صح مايصير نمسك احد ونقوله جذي وخلاص راح يطلعنا ، لازم نفكر بعد أكثر إحنا ألحـين بوقت مانبي نغلط فيه ولا غلطه تودينا ورا الشمس ، قعدنا نفكر ونفكر جانا شابين يتحرشون فينا ويسمعونا كلام غزل المهم قلت بصوت واطي اشرايج نقولهم دخولنا سوريا ونصير صديقاتكم، قالت ما اعتقد يدور عليهم هالكلام ، المهم بديت أنا وتشجعت ودار بينا هالحوار ....

قلت لواحد منهم : اشرايكم نسافر مع بعض سوريا ونبسط عمرنا ونستانس هناك ؟ أهما ماصدقوا خبر إن إحنا نطلب منهم هالطلب ووافقوا على طول !

ورد علي واحد: والله إحنا ودنا وآني عندي تجارة هناك أجيب من عندهم الفاكهة وأبيعها ببغداد..

قلت له: إي بس اكوا مشكله نحنا هاربانين من بيتنا على مود أهلي مايبونا نسافر ونشتغل بسوريا وعشان هجي نحنا هربنا وما معانا أي شئ عن هوياتنا ..

قالي: ماهي مشكله حبوبه نطلع لكم بطاقة .
قلت له: أي مو نحنا مانبي اسمنا على المنافذ على مو أبويا ما يلحقنا لي هناك .

قالي : ماعدنا مشكله أي شئ اثبا نزوره لج ..

ونجحت الخطة ونطرونا يومين عشان يطلعون لنا هويات باسمين مختلفين أنا صار اسمـي ( عهود قاسم ) وأروى اسمها (ماجدة علي ) المهم رحنا وياهم منافذ سوريا ودخلونا بعد مازخوهم فلوس وتعذروا لعدم استخراجنا جوازات سفر لأنها المرة الأولى اللي نطلع فيها من العراق .

المهم مشينا وياهم بالدرب وقالوا إن راح نسكن معاهم بشقة ، وأنا بصراحة خفت من الموضوع وحاولنا نفكر شنسوي عشان نهرب منهم ، طلبنا نوقف عشان نتغدى بمكان وشفنا لنا مطعم متواضع على الشارع ووقفنا نأكل فيه أحنا وياهم .
كلينا و شبعنا وقلنا نبي نروح الحمام نغسل ايدنا وانحشنا من الباب الوراني للمطعم ووقفنا تاكسي كان قاط ناس ع المطعم وماصدقنا ان بالأخير قدرنا نفلت منهم ، عطت أروى صاحب التاكسي العنوان وودانا لـه وكان معانا شوية خردة عراقيه عطيناه اياه وقلنا ماعندنا ليرات سوريه .

ووقفنا بعمارة بمنطقة المرجة بالشام قالت ان هاذي عمارة اهل امها ، صعدنا للدور الرابع دقينا الجرس ، وافتحت الباب جدتها ام امهـا وعرفتها بنفسها ومن قوة الصدمة أغمى على جدتها وماصدقت إللي تشوفه ، حكينا لها اللي صار معانا وكل السالفه وكان شكل جدتها مبهور من الصدمة ، وقلنا لها مانبي احد يدري عنا ،لأن الكل نظنهم جواسيس ، إسألت عن خالها وقالت انه خالها بالخدمة عندهم يعني محبوس بالجيش وإن جدهـا مات من سنة 1995 ، طلبت أروى من جدتها تكلم أمها وماتقولها شئ عنها وتمثل عليها انهـا مريضة وتبي تشوفها ، صار الموضوع وصدقت ام اروى ان الجدة مريضة وقالت لها يومين وتوصل سوريا .

رحت مع أروى السوق اللي تحت عمارتهم وشرينا لنا ملابس وأغراض لنا لأن حالتنا كانت كسيفه ، ومروا هاليومين على أروى مثل السنتين ولما دق الباب ق قلب أروى معاه وراحت الجدة أفتحت الباب وطلعت أم أروى وأخوها الكبير حمد ، سلمت الأم على الجدة وقالت : شو ماما منك تعبانه ولا شي شو بكي كأنوا عندك شي بدك تأوليـه إلي ... !!!




ان شاء الله اكمـل لكم بالليـــل ,,,,

:33_1185028183: في وداعــة الرحمــن :33_1185028183:

 

[@@jwan@@]

وااااااااي
الفصه اتشد حيييييييييييل
والحمدالله على سلامتج
وابي اعرف متى رديتي الكويت وشلون
وشصار على وليد
ناطرتج ومتابعتج

 

[so_what]

ما فهمت ، يعني انتي كنتي محبوسه بالعراق من الغزو لي 1998؟؟

 

[@@jwan@@]

متابعــــــــــــــــــــــــــــــــــــــــــــــــــــــــــــــــــــــــــــــــــــــــــــــــه

 

[مجروح ياقلبى]

يلا كملى معنه انا تصير فينى حاله نفسيه واخااف حييل والله اذا قريت شى عن الغزوز والعراقين الكلاااااااااااب بس ودى اعرف اشصار معاااج وادرى ماراح انام بس يلا ميخالف

 

[^ليلاس^]

قصتج تحبس الانفاااس وايد شدتني

ناطره التكملة حبيبتي

 

[بيوتي]

أهلا حبيبتـــــــــاتـي ...

هااذي قصـة وحده من أهلـــي ...

وأي سؤال انــا حااضرة لعيوونكم ...


وألف شكـر للــي تابعووني ...


:33_1185028183:

 

[بيوتي]

دخلوا الصـالون ، وتنحت أم أروى جدامهـا وماعرفتها لأن صج ملامحنـا واايد تغيرت ووجه أروى صار فيـه دقـه على خشمها والسـبب إن أحد الجنود كان يطفـي سيجارته على وجهها ، دققت الأم بأروى عدل ومن تكلمت أروى إلا انهارت الأم تبجي وتنوح واحضنت أروى حيييل كأن قلبها يحضنها قبل جسمهـا ، لدرجـة إن خلت أروى تقعد على حضنها ويييييه تسع سنين ماشافوا ولا كلموا بعض ، وقالت الأم إنها طنت إن أروى ماتت وكانوا كـل مرة ينكرون وجود أحد عندهم ، وبعد مرور سويعات من استيعاب الأم لبنتهـا ، عرفت أروى أمها علي وقالـت : يمه هاذي صاحبتي هديل ومن غيرها لا قدرت انحاش ولا شـئ واهيا مثلي أسيرة كانت وياي عند العراقيين ، أحضنتني أم أروى وحسيت بدموعي تذرف لأني حسيت معاها بحضن الأم لبنتها وتذكرت أمي معاها ، سألتني إذا حابه أكلم أمي على التلفون أو أحضرها سوريـا ، نهيتهـا عن هالشـئ وقلت لها إني ودي أروح بنفسي أفاجأهم بوجودي ..


رحنا مع أروى وأمهـا وأخوها عند السفارة الكويتية بسوريا، وقابلنا السفير وقتها السيد عبد الرزاق الحمد، وقصينا عليـه قصتنا من الألـف إلى الياء وما صدق كلامنا قال هذه حكاية ألف ليله وليله.

وشرحت أم أروى الموضوع وإنها أصلا ماكانت مصدقة نفسه ، وقال أنا لازم أتأكد بالأول ، طبعـا هالشـئ من حقه طلب أسماء كشوفات الأسرى الكويتيين والمفقودين وفعلا لقـى اسمي واسم أروى موجود باللائحة وطلب يرجعنا الكويت عشان يسوون لنا تحليل دم ويطابقونا عشان يتأكدون أكثر وطلب منا هالشئ راح يصير سر تحت دائرة (أمن الدولة ) وإن محد راح يبلغ أهلي ولاباقي أهل أروى بوجودنا بالكويت وإن الموضوع محتوم بينا إحنا الأربعة (أنـا وأروى وأمهـا وأخوها ) ، وبيوم 25 / 5 / 1999 حددوا وقت سفرتنا للكويت الغالية وركبنا أنا وأروى طيارة خاصة مملوكة للجيش الأمريكي ورجعت أم أروى وأخوها للكويت على الطيران العادي، وبلغ السفير أم أروى إن بمجرد ماتخلص الإجراءات راح ترجع أروى معززة مكرمة لبيتها ...


وصلنا نطاق دولة الكويت وشفنا فوق السما شكل الديرة الغالي، آآآآآآآآآآآآآخ ولهت علييج ياديرتي قلتها وكل حزن على فراقها ، مررونا على الأبراج وشفنا الكويت قبل لا نهبط ، وإحنـا نحضن بعض ونبكي ، نزلت مطار الكويت الدولي وسمعنا الكابتن يرحب بعودتنا ، كانت في سيارة تنطرنا ومن ركبناها على طول حركت إحنا ماهمنا وين تروح السيارة مادمنا بديرتنا وبالطريق نطل نشوف الديره ونشوف العلم يرفرف مرة ثانية فوق أرضنا الحبيبة ، وصلنا مبنى موجود بالأحمدي وكان فيه أمريكان واايد (مستشفى الشركة)قعدنا على كرسي المخصص لنا ووصل دكتور يفحصنا ويأخذ عينات دم منا وراح ، ورجع لنا الدكتور مرة ثانية وقال هاذي الأمور راح تطول ويمكن أطلب منكم عينات ثانية عشان جذيه إحنا متوفرة عندنا غرف وراح تقعدون جم يوم عندنا ، صار الليل ودخل علينا جندي كويتي ومعاه علبة كبيرة وقال : هاذي لكم وانتوا تستاهلون لأنكم بنات ورفعتوا رأسنـا ...

فتحنـا العلبـة إلا ملابس وأحذية وملابس داخليـة من أم أروى مطرشتهم لنا عشان يكون عندنا ملابس كفاية ، وصور لإخوانها وأهلهـا بعد ماكبروا ، المهم عدى الوقت المطلوب وقال لنا الدكتور نقدر نسلمكم لجنة الأسرى والمفقوديـن على أساس إنكم الأسيرتين هديـل وأروى ومبروك تطابقت العينات..


واااااااااااااااااااااااااااااااي وأخيراً وأخيراً تحررنا إحنا صج الأفكـار قاعدة تهل علينا من كل صوب اشلون أشوف أمي اشلون أقابل أهلي ، اتصل الدكتور على اللجنة وخذونا وسلمونا الأوراق وسوينا إجراءات طويلة واتصلوا على أم أروى تأخذها . أمـا أنــا ماطلبت أهلي يأخذوني وطلبت منهم مايخبرونهم برجعتي لأني بفاجأهم وقلت بروح لبيت أروى ، ورحت مع أروى بيتهم وقعدت عندهم جم يوم مادرياشلون أشوف أهلي من الخرعة اللي بقلبي من صدمة اللقاء ، قالت لي أم أروى : شوفي ياهديل اللي تأمريني فيه أنـا حاضرة شنو تبين أسويلج قولي ولأمانه ماكانوا مقصرين معااي ولا شئ ، وبعد أسبوع ذبحني الولـه وطلبت من أروى وأمها العصر يوصلوني بيت أهلي بمشرف ياحلو هالمنطقة اللي من دخلناها وأنـا طاير قلبي ، وصلنا بيتنا وكان شوي متغير ، دقيت الجرس وطلعلي صبي صغير ماعرفته وقلت له :هذا بيت محمد قال لي :لأ قلت منو أنتوا عيل أنا متأكدة إن بيت محمد ! وبعدين طلعلي ريال أبو الولد وقالي : آمري أختي في شئ ؟ قلتله: لأ بس هذا مو بيت محمد ؟ قالي :إيه هذا بيته بس اهوا مآجره علي لأن راح منطقة ثانية ، فكرت بسبب ترك أهلي بيتهم وروحتهم لبيت ثاني ، ترجيته يعرفلي عنوانهم قالي :اعطيج إياه لأني أروحلهم أقط عليه أجار البيت ،، وعطاني العنوان بورقة أهلي ساكنين بمنطقة السرة ليش اطلعوا من مشرف ما أدري ؟!!


المهم رحنـا للعنوان وكان وقت مغربية ووصلنا للبيت الموجود بالورقة وقفنا نشوفه ونتأمله البيت كان فيه زينة وأضواء كأنه حفلة ، قلت بقلبي أهما يدرون إني بوصل عشان جذيه سوولي حفلة !

دقيت الباب مع أروى وأمهـا وقفنا ننتظر فتحت لنا الخدامـة الباب سألناها إذا هذا بيت محمد ردت علينا بالإيجاب ، وسألنا عن ماما إذا في بيت قالـت: كلو كلو يروح عرس ، قلت لها أي عرس منو فيه زواج ؟ قالت : هاذي ماما هبة اليوم عرس ..انصدمت من الإجابة وفكرت بالياهل الصغيرة اللي كبرت وصارت كبيرة بتتزوج ، قلت لها : أنزين وين العرس .قالت:أنا مايعرف في هذا سايق ممكن أنتي هناك عرس !

ركبت أنـا مع أروى وأمها ومشى جدامنا السايق يوصلنا لمكان العرس ، وصلنا لفندق ريجنسي ونزلت مع اللي معاي ووقفنا الأمن على الباب وقال الدخول ببطاقات الدعوة ، قلت له آنا أخت العروس ، طبعا ماصدق أنا وين واهيا وين ، شكلي حده مبهدل ومافي ويهي ولانقطة مكياج ، عطتني رأي أم أروى إنا نرجع باجر للبيت نفسه ، وإحنا طالعين شفت موكب العروس واصل وشفت هبه بأحلى صورة لها سبحانك ربي اشلون متغيرة ومحلوة ....


ردينا بيت أروى وليلتها مانمت، أنطر باجـر يصير رحنا الضحى لبيت أهلـي حبت أم أروى تنطرني مع بنتها بالسيارة عشـان آخذ راحتي ورحت ودقيت الباب ، نفس الخدامة أفتحت لي ودخلت وراحت تقول لأمي: ماما ماما هاذي واحد نفر يجي أمس أنا يقول حق أنتي اهيا مايقول منو ! وقفت أمي تطالعني منبهرة وعلامات التعجب بوجهها ، ما ألومها من التغيير بوجهي وجسمي الهزيل وشعري المقصوص ، المهم شفت صورتي على الطاولة يمها وكانت الظاهر ماسكتها تتذكرني ،، سألتها : بعدج ولهانة علي !

طاحت أمي من طولها كأنها شايفة شبح مو بنتها وهذا كله وأنا أقول ما ألومهـا ، صرخت الخدامة علي :أنتي شنو يسوي في ماما ، ومن صراخها وقفت منبهرة نزل أبوي على صراخ الخدامة ونزل معاه أخوي هشام حاولوا يصحون أمي رشوا عليها ماي ، صحت أمي مختلعة تقول شفتها شفتها ،، سألها أبوي منو هذي ، جان تقوله هديل شفتها جدامي ، كان أبوي مو منتبه لوجودي من خرعته على أمي ، ردت أمي تتلفت وشافتني مرة ثانية قالتلي: أنتي صج ـ صج أنتي هديـل !؟

اهني أبوي وأخوي لفوا علي مو مصدقين قلت : إي أنا هديل بلحمها وعظمها ولهت عليكم ، الكل حضني مو مصدق بكوا علي لدرجة ملابسي تبللت ، قعدت أمي تيبب من الوناسة وتصرخ من الفرحة ، وآنا عيوني تحمرت من البكي ، سولفت لهم على اللي صار معاي وطلبت من الخدامة تروح تنادي أم أروى وأروى من السيارة ، ودخلوا علينـا وقعدت تقول أم أروى لأمي إن صج مو حقيقه وإنها مرت بهالموقف مع أروى لما شافتها أول مرة .

عاتبتني أمي على الأشياء اللي سويتها بالغزو وليش سويت جذي ، قلت لها : الحمد الله أنا الحين بخير وسولفت لها عن الأيام السودة والأشياء اللي صارت ويانا ، راحت أم أروى وأروى بيتهم وظليت أنا عند أهلي اسألهم لسبب تغيرهم بيتنا اللي بمشرف ، قالوا أنهم حاولوا يخلونه لأن كل زاوية فيه تذكر أمي فيني ، مايدرون إن الذكرى بالقلب مو بالحيط .....



ان شاء الله الليلة أحط لكم الجزء مااقبـل الأخير فــي وداعـة الرحمـن ،،،،

:33_1185028183:

 

[مجروح ياقلبى]

يلا كملى نااااااااطريينج بيوتى وحرام اشصار عالشباب الاسرى اللى كانوا معاهم وليش مابلغوا عن مكان اسرهم!!

 

[هي انا]

ياااااااااااااااااااااه دمعت عيوني الله يرحم شهدائنا يارب ويحفظ ديرتنا حبيبتي القصة لج !! اقصد انتي هديل ؟

 

[^ليلاس^]

ناطرينج حبيبتي :eh_s(8):

 

[مجروح ياقلبى]

وينج بيوتى ناطريج علقتيناااا