هذا حظي ونصيبي .....

[kity]

امبي الروااايه ابداع تينن

ماقدرت اصبر وما اكملها تينن شوي عليها

ننطرج حيااااتي بأقرب بارت

 

[ShEmOkH]

حياتي روابي تسلم اييدج
صج الروايه تحفه
ناطرين

 

[حبي الاول]

ام خالد سوت احسن شي خل تولي خربت بيت شوشو

 

[ĈŵâįŽŶâ Мŕâβā]

البارت حده عجيب يسلموووووووووووو

 

[غمـــ ^^ ـــازه]

يالله متى تصير الساعه 1 d:

 

[rawabi]

البارت ال 20 :

جاسم رجع البيت حده معصب ومترفز صعد الدار حق امه
جاسم : يما ليش قلتي حق ابوي اني بطلق شيوخ ؟
ام جاسم : لانك مو صاحي وتبي احد يعقلك ... من صجك انت تبي تطلقها لافوق هذا من غير ماتعلم ابوك ... لايكون على بالك انك اذا حطيته امام الامر الواقع بيسكت ... والله انه لايقلب الدنيا فوق راسك وبخليك تردها غصب عنك ... وانا كافي علي فشلتي يوم ماطقيت شيخه مو ناوي اتفشل زياده لما اروح اردها لك
جاسم : دامج ماتبين الفشله قنعي ابوي اني اطلقها عشان ماازيد الطين بله
ام جاسم : يعني تهدد ... شنو بتسوي اكثر من انك اطقها
جاسم : اتزوج عليها ومو بس جذي اسكنهم بنفس الشقه .... عاد شوفي فشلتج لما اتزوج عليها واحنا مامر علينا سنه ... حده بتكون السالفه سواد ويهه لكم
ام جاسم : ويعه جسوم انت شسالفتك ... والله انك ماتستحي
جاسم : مااستحي لاني مو مرتاح مع زوجتي وابي اطلقها
ام جاسم : بالطقاق انا خلاص غسلت ايدي منك ... عندك ابوك كلمه انا مالي شغل
جاسم : انتي كلميه
ام جاسم : قلت لك مالي شغل

حال شيخه ماكان احسن من حال جاسم ... ماكانت تدري شدور بباله وشاللي يبيه .. وزهقت من الوضع اللي هي فيه
شيخه : يما ابوي ماقالج شي عن جاسم ؟
ام خالد : شبقول ... انا اهقى انهم بخليج تهدين شوي وتنسين السالفه تالي ايي يراضيج
شيخه : بس انا ماابيه يراضيني انا ابيه يطلقني
ام خالد: شيوخ تعوذي من ابليس لا تخلين وحده مثل ريم تخرب عليج حياتج
شيخه : يما انا مو عشان سالفة ريم يما انا صج كرهته ... مااقدر اعيش معاه زود
ام خالد : الحين كرهتيه ... نسيتي اول لما قعدتي تبجين ماتبين غيره الحين صار كخه
شيخه : يما تعياريني فيه
ام خالد : لا ما اعايرج ... بس شنو تتطلقين وانتي عمرج 24 لا ومامر عليج سنه شبقولون الناس ... الناس ماتدري عن ريم .... لهم الظاهر ودايم يحملون المرا الغلط بقولون اكيد قصرت معاه والا شاف منها شي
شيخه : انا مالي شغل بالناس ... يقولون اللي يقولونه
ام خالد : حلوة هذي مالي شغل بالناس ... انتي موعايشه بجزيرة بروحج تقولين مالي شغل بالناس باجر لو تسمعين لج كلمه مني والا مناك تغثج تتحسفين وتقولين ياريتني مااطلقت ولا سمعت هالكلام

جاسم ماعنده سالفه بالدوام الا هالجنه ... اللي من تسوي حركه اوتقول كلمه لاحظها جاسم ... كانت حيل عاجبته كان لاقي فيها اللي عجبه ب ريم واللي يعجبه بشيخه .... جنه كانت تحس ان جاسم مهتم فيها بس كانت بسرعه توخر هالافكار عن راسها لان متزوج
جاسم بالاداره يدور على عثمان مالقاه ... راح حق جنه : قوه جنه شلونج ؟
جنه : بخير الحمدالله ... وردت تكمل شغلها اللي بيديها
جاسم : وين عثمان ؟
جنه (من غير ماترفع عينها ... بس بطريقه ذربه ردت ) : ماداوم اليوم
جاسم : افا ... عسى ماشر ؟
جنه : والله مادري ماعندي خبر كلش
جاسم : جنه انتي من اي كليه متخرجه ؟
جنه : اداريه
جاسم : صج والله .... اختي بعد اداريه هالكورس تتخرج
جنه : الله يوفقها
جاسم : اسمها ساره ماتعرفينها ؟
جنه (رفعت عينها ): لا مااذكر ان الاسم مر علي .... عن اذنك شوي
جاسم : وين ؟
جنه (مستغربه ) : بروح حق بوعبدالرحمن يوقع لي الاوراق

جاسم حس بدقره حييل على طول قام رجع مكتبه : ماني رايح الا لما يكون عثمان هناك ... حدها منفسه اليوم
جنه وقعت الاوراق ومارجعت مكتبها خافت ان جاسم يكون للحين موجود هناك وهي مو عارفه شلون تتصرف وياه هو حبيب وياها وونيس بس مو عارفه شاللي يبيه منها

جاسم حس ان جنه وايد تتصدد عنه وماتتكلم معاه الا اذا هو اللي سالها ... مع ان في بنات وايد بالاداره يتكلمون معاه الاهي تتحاشاه هو بالذات ...بس يشوفها عادي تكلم اللي معاها و هم ماتيب له الاوراق ...اذا في شي تيبه وحده ثانيه من ادارتهم مو هي
جاسم كان طالع من مكتب مسئوله والا يلقى جنه بالممر ... وهو صارله 3 ايام مامر ادارتها لما شافها ماكان ناوي يكلمها ماكان عاجبه النفسيه اللي تعامله فيها
جاسم : شلونج جنه ؟
جنه : بخير الله يسلمك ... وخرت بتمشي
جاسم : جنه .. عسى ماشر
جنه: ليش ؟ شصاير ؟
جاسم : جنه انا بكلمج بصراحه لان قبل كل شي احنا زملاء ومابي ان واحد منا يكون شايل بخاطره عالثاني
جنه ( حيل استغربت ماتدري جاسم عن شنو يتكلم ) : شنو تقصد ؟
جاسم : انا ضايقتج بشي طلع مني تصرف ماعجبج
جنه : لا والله حشى بالعكس ماشفت منك الا كل خير ... ليش تقول جذي
جاسم : مادري تكلميني دايم بنفسيه و ......
جنه (قاطعته ) : انا اكلمك بنفسيه كلامي معاك حده عادي لا نفسيه ولاشي .. انا اكلمك مثل اي زميل ثاني
جاسم : بس حيل رسميه ..
جنه : مهندس جا ..
جاسم : شفتي قلتي مهندس
جنه : ليش انت مو مهندس والا شلون لازم اناديك ... اظن ان الرسميه احسن لي واحسن لك ....
جاسم : بس رسميتج زياده معاي عن الباجي
جنه : الباجي اللي تتكلم عنهم معاي بالاداره احتكاكي فيهم يومي ... بعدين مهندس انت متزوج وتصرفاتك تتحاسب عليها اكثر من العزابي ... وصدقني انا مو قاعده اتكلم معاك او اتصرف الا طبيعي

جاسم تضايق من كلامها ونشوفيتها ... هو يدري انها تكلمه عادي بس كان خاطره لو مايصير عادي .... بنفس اليوم جاسم كان طالع من الدوام متاخر شوي و اداره الماليه كانت على درب طلعته والا يلقى جنه للحين موجوده بمكتبها.
جاسم : ماخلصتي شغل ؟
جنه (حادها متضايقه ويبين محتره ) : لا مطوله
جاسم : شفيج ؟
جنه : مافيني شي
جاسم : انتي كنتي تبجين ؟
جنه ( اسكتت شوي ... بس كان مبين انها باجيه ) : لا
جاسم : عيونج حمره ... ليش باجيه احد ضايقج بشي ؟
جنه : حرني بوعبدالرحمن .. طلب مني تقرير وقالي اسلمه قبل نهاية الاسبوع ... اليوم قال يبيه باجر الصبح واليوم الاثنين وانا اصلا ماكنت ببلش فيه الا باجر على اساس اسلمه الخميس ولما قلت له قام يصرخ
جاسم : بوعبدالرحمن صرخ عليج ؟
جنه : هو ماصرخ صرخ بس عصب حيل
جاسم : نظامج دلوعه
جنه (معصبه ) : نعم؟
جاسم : ولاشي .. لاتضقين خلقج يمديج تخلصينه تبين اساعدج ... صج اني مااعرف شغلكم بس نوعي بسرعه اتعلم
جنه : ماتقصر ... مابقى لي وايد
جاسم : عيل بقعد عندج ماخليج بروحج
جنه : ماله داعي اكو سكيورتي
جاسم : مو الخوف من السكيورتي
جنه : مايحتاج رد البيت الحين زوجتك تحاتيك
جاسم ( لقاها فرصه ) : انا مومتزوج .... متزوج بس منفصل وقريب انشالله مطلق
جنه (كانت ميته تبيه يكمل بس مابينت .. هي كانت منعجبه فيه وزايغه عليه من اول يوم بس شالته من بالها لما درت انه متزوج ) : ----------------------
جاسم : انتي .؟
جنه : انا شنو ؟
جاسم : اللي اعرفه انج مو متزوجه بس مادري مخطوبه او لا ؟
جنه : لا
جاسم حده كييف واستانس : بروح اييب لي قهوه ... تبين اييب لج ؟
جنه : انت ناوي تقعد ؟
جاسم : قلت لج ماراح اخليج ( كان كلام جاسم تلميح )
جنه : خلاص عيل انا بمشي الحين
جاسم : وشغلج اللي ماخلصتيه
جنه : باجر اخلصه
جاسم : و بوعبدالرحمن ؟
جنه : زفه وانزفيت اليوم ... ماتفرق وايد اذا انزفيت باجر
جاسم : شكلج تعودتي عالزف
وصل جاسم جنه لسيارتها واول ماركب دق على شيخه .... شيخه حيييييل استغربت من زمان جاسم مادق عليها ولا حتى دز مسج ... بالبدايه ماكانت بترد بس ردت تبي تعرف شاللي ذكره

جاسم : السلام عليكم
شيخه : وعليكم السلام
جاسم : شلونج ؟
شيخه : بخير الحمدالله
جاسم : انا بدش معاج بالموضوع سيده .. انتي صارلج قريب الشهر ببيت اهلج وشكلج مو ناوية تردين .. شيخه انتي طلبتي اني اطلقج والله يلوم اللي يلومج ... انا ماكنت الزوج المثالي لج ولاقدرتج بالعكس تعبتج واذيتج وياي وانتي ماتستاهلين المعامله اللي كنت اعاملج اياها والحق ينقال تستاهلين اللي احسن مني ... شيخه والله ان هالكلام من قلبي انتي مفروض الواحد يحطج داخل عينه ويغمض عليج

شيخه على كثر ماكانت كارهته ومعصبه منه الا انها بلحظه هدت هي مارضت بس حييل طخت ... صوت جاسم طريقته كانت حلوه وهو يتكلم ذكرت شكله لما يحن عليها ويدلع عليها جنه بيبي ... تذكرته لما يتحرش فيها ويطفرها ... كان هو يتكلم وهي محتاره تخاف ترجع ياذيها مره ثانيه ويتعبها
جاسم : شيخه انتي معاي ؟
شيخه : اي معاك
جاسم : شيوخ انا رحت المحكمه اطلقج بس ابوي ردني ... واهلي رافضين سالفة طلاقنا نهائيا
شيخه : عاد هالشي رد لعقلك ووخرك عن حبيبة القلب
جاسم : الله يشهد يا شيخه اني مادري عنها من يوم السالفه اللي صارت ... ولا اني راد لها ابد لاني صج متحسف وندمان وحسيت اني خسرت وايد اشياء .... كافي اني مديت ايدي عليج ...شيخه ادري ان الاسف ما يفيد بس صج اسف
شيخه : صج متحسف ؟
جاسم : والله اني حيل متحسف ... ولا ادري شلون ارضيج ... مسامحتني
شيخه : دامك صج متحسف خلاص مسموح
جاسم : والله انج اصيله ... عيل دام الحين تصافينا ... خل اقولج خطتي
شيخه : خطة شنو ؟
جاسم : خطة طلاقنا
شيخه ( جنها احد لاتها كف ) : طلاقنا ؟
جاسم :اي طلاقنا .... سمعي انا اليوم بيي اردج ولما ايي لاترضين تنزلين وعاندي عاد انا بعصب حييل واتهاوش واصرخ تالي بطلقج وانا معصب وقتها محد يقول شي
شيخه ( تبجي ) : يعني حتى بطلاقنا تبي اطلعني غلطانه
جاسم : والله ماودي بس ماكو حل ثاني اذا عندج طريقه ثانيه علميني ... لاني صج انا مليت وتعبت
شيخه : تعبت من شنو ؟ من اني ماحبيتك كثر ماحبيتني والا من اني ماوفيتلك ؟ يمكن لاني كنت اخونك
جاسم : خلاص شيخه انا اعتذرت لج
شيخه : وعذرك بشنو بيفيدني
جاسم : شنو تبيني اسوي
شيخه : لا تسوي شي بس عالاقل مرا وحده حسسني انك صج ريال وطلقني ... خطتك ماني مسويتها تبي عندك المحكمه طلقني فيها ... انت مو ياهل لمتى بتم اناني جذي

شيخه حييل احترت كانت تتمنى ان جاسم يتحسف عليها عالاقل يتندم عليها لو شوي
مو مايصدق انها راحت بيت اهلها ... واللي ضيق خلقها اكثر ان بدال لا تعدي عليه الايام وهو يفكر فيها عدت عليه وهو يخطط شلون يطلقها

 

[rawabi]

بنات والله اني كنت ناويه اخلي البارت اطول من جذي واقوى بس رئيسة قسمي سوت اجتماع وحدها طولت ... ولاني قلت بنزله الساعه 1 كتبته على عيله .... بس انشالله البارت الياي يكون احسن من جذي هالمره بكتبه بالبيت وماني محدده وقت عشان مااوهق عمري وافشل نفسي وياكم ....... سوري بنات :eh_s(14):

 

[م.بدوره]

يبله بارت بعد @@ هذا حيل قصير

 

[ĈŵâįŽŶâ Мŕâβā]

يسلمووووووووووو على البارت طويل ولا قصير مايفرق اهم شي انج انتي الي كاتبته
ناطرينج :*

 

[فجر العهود]

تسلم يمناج يالغالية
بس المره اليايه نبي بارت طويييلل

 

[غمـــ ^^ ـــازه]

امبي جاسم مايفكر الا بنفسه

المره اليايه نبيه طويـــــــــــــــــــــــــــــــــــل

 

[P!NKia]

جاسم يحر القلب ياربى ليته جدامى والله لطلع حرتنى فيه

 

[رفيف الورد]

واي هالجاسم حده أناني أمبيه هذا ليلحين مغرور ما دري على شنو والله عفيا عليج يا شيخه عطيتيه الرد اللي خلاه يوقف عند حده

 

[Sara.M]

واااااااااااااي شنو هاذا شنو هالجاسم @@@
مشكوره على البارت

في بارت اليوم ولا لا ؟؟

 

[كويتيه منكم وفيكم]

في انتظار البارت الأخير عفيه لا تطولين حدي متشوقه للنهايه

 

[جمال رباني]

امبيييييييييييييييي شالحقاره اللي فيه والله كرهت جاسم

يسلمووو ع البارت

 

[حرووف الشووق]

:eh_s(14): هالجاسم صج يبط الجبد :eh_s(14):
انا اتمنى ان يطلق شيخه وشيخه تتزوج فواز وجنه تنخطب لواحد ثاني وتخليه وهو يتحسف قد شعر راسه على شيخه الي ما كان يستاهلها

 

[dreamy_83]

وااااااااااااي روابي تكفين راوينا في هالجاسم نهاية سنعة تبرد قلوبنا!!!!!

 

[rose red]

أنا أتمنى أن شيخة تتطلق و ياخذها فواز و جاسم ما يتوفق مع جنى و يتوهق!! لانه مو صج!! و زواااج الأهل غلللللللللللللللللللللللللللللللللللللللللط
و تسلمين روابي مشكووورة

 

[UNiQe^PRiNceSs]

wooooi hal.jassim wla tnksr 3ina
lel7ena qalel adab :eh_s(14):
10x 7ubii o0 na6reeeeeeeeen