هذا حظي ونصيبي .....

[north star]

جاسم ابدا مو صاحي
صج تفكير ياهل غبي جدا
و انشاء الله ما يتهنى ابدا

ناطرين البارت اليديد

 

[kity]

امبيه ماشفت انذل من جااسم شفيه هاذا !! مينون ولا مينون


____


مسمووحه حبيبتي وننطرج باااجر ببارت احلى واحلى

 

[عــاشــقــه]

أمبييييييييييه جآسم هذآ يبيله كف على عينه صج مو صآحي << بآط جبدي :eh_s(14):

و هآذي جنآ أي شي علطول مآ صدقت قآلهآ منفصل لزقت

عآد لآ تخلين جآسم يآخذ جنه لأن صج صج صج مآآآآآآآآ يستآهل أنآني ومآيفكر إلآ بنفسه جنه يآهل إذآ يبي آلشي خلآص

و إنشالله ينفضح جدآم أهله عشآن يعرف إن الله حق

وتآخذ شيخه فوآز :ggdw:

 

[~pYaar~]

واااااي جسووم يبط الجبد :eh_s(14):

مشكووووره روابي عالبارت

 

[P!NKia]

انا اتوقع جاسم يتزوج وحده وتخونه زوجته ويحس بالحره اللى حستها شيخه

 

[miss limoona]

ويعا انشالله تويعك ياجاسم
وااااي يغث شنو هذا عمابعينه
طلقها خل تتزوج فواز ابرك من ويهك

 

[rawabi]

هااااي بنات عساكم بخير .... كلش مو حابين جاسم مع انه احس انه مو شين للهدرجه بالعكس احسه يكسر الخاطر ... احس انه متناقض طيب وحبيب بس تصرفاته خايسه هو غلطته انه تزوج شيخه وخانها بس احس انه لوكان ماخذ وحده ثانيه جان ماسوا جذي اكبر دليل انه مو بطبعه خوان ان تم مع ريم 3 سنين ولامرا خانها بالعكس حبها من كل قلبه وكان يبيها زواج انا ماادافع عنه ... بس اشوفكم كلكم شابين عليه وناسين انه فيه صفات زينه .... ( احس انكم بطقوني :eh_s(6): )

احتمال كبير ان بارت باجر ماينزل الظهر غالبا بنزله بالليل ... يس مادري اي حزه بالضبط ماودي اسوي نفس البارت اللي طاف اكتبه على عيله ابي اخذ وقتي لان اكو جم شغله ببالي ... تدرون الكتابه مزاج ويبيلها تمخمخ :eh_s(6):
مشكورين

 

[ShEmOkH]

مشكوره روابي صج تسلم ايديج
وهذا الجاسم يحر صج عين عنجوه
فوق شينه قوات عينه

 

[LOO-LOO]

البااااارت حده حده عجيييييييب :ggdw: :ggdw: :ggdw:

حتى لو كان قصير كافي إنج إنتي إللي كاتبته روابي ....!

تسلم إيدج ياحلوة

أنا ما كرهت جاسم وااااجد بس صرت أخاااف من هالإسم لأن كل جاسم وراه مصيبة

الله يستر من ريلي لوووووووووول

ناطريييييييييييييييييييييييج حبيبتي .........!!​

 

[kity]

^^^^

عادي الظهر الصبح باليل لو الفير نقراه يعني راح نقرااه

وجااسم مثل ماقلتي له الصفاات الطيبه بس احسه مينون شبهاً ما

وننطرج حياتي

 

[رفيف الورد]

جاسم هذا يابلنا عوار الراس من غروره مادري شنو ناوي عليه يبا البنت ما تبيك خلاص وخر عنها ومو كل خطوه تفوز فيها ترا

جاسم صج إنه فيه صفات طيبه بس قهرني باللي سواه بشيخه حبيبتي بعد عمري

وما ننلام يا روابتي لي صرنا ضد جاسم هالدلوع حده يقهر ولا امسوي روحه ذرب مع ارفيجه مشاري وأثاريه يبي يخطف قلب يدش قلبه بس مو عارف إشلون

 

[النظره الصعبه]

حبيبتي مشكوره على التكمله
ننتظر التكمله

 

[UNiQe^PRiNceSs]

ma fi ay ,shkila 9b7 '6her 3a9r el.mhum yanzel
waiting 7abibtiiiiii:ada:

 

[حبي الاول]

نبي بعد يالله وقوليلها لاتكثر اجتماعات لوووووووووووووول

 

[Atooshaa]

الــــســــلام
انا من متابعين القصه بصمت .. وحدهاااا عجيييييييييبه
والأحداااث حدها واقعييه لانه اكو بالصج جذي
يالله عفيييه بسرعه كمليهاا
ناطرييينج

 

[rawabi]

البارت ال 21 :

جاسم تنرفز من شيخه حده وماله خلق يرد البيت يلقى امه وابوه يكلمونه عن شيخه وانه لازم يراضيها ويقعدون يحنون ... قال ان يرد شقته ينام هناك احسن له ... وصل شقته وطلب له عشا ... حاول ينام ماقدر كان ماسكه صداع قام يدور على بندول قلب الشقه مالقى ... دخل غرفة النوم يدور بالادراج ... وهو يدور بادراج شيخه والا يلقى حرف صغير بس ماكان حرفه او حرف شيخه كان حرف r حرف ريم استغرب جاسم شسوي حرف ال r بين اغراض شيخه ذكر الاسواره اللي يابتها شيخه له هديه بسرعه نزل سيارته ونزل الاسوارة من على المنظره والاي يلقى ان الحرف يناسب الاسواره ولما دقق عدل انتبه ان حرف ال r جنه مقطوع من السلسله ... صعد فوق دق على شيخه
شيخه : نعم ؟
جاسم : نايمه ؟
شيخه : لا
جاسم : شيوخ بسالج سؤال بس امنتج ابيج تجاوبيني بصراحه
شيخه : نعم
جاسم : شسالفة الاسواره ؟
شيخه : اي اسواره ؟
جاسم : اللي يبتيها لي وعلقتيها بسيارتي
شيخه : اشمعنه ؟
جاسم : قولي شسالفتها ... امنتج قولي سالفتها هي مالتج ؟
شيخه : لا
جاسم : عيل ؟
شيخه : اظن مالت ريم
جاسم : واشايبها لج ؟
شيخه : مره ركبت معاك السياره ولقيتها مكان يدة الباب
جاسم : تالي خذيتيها وشلتي حرف ريم وحطتي حرفي وحرفج ؟
شيخه : وعلقتها بالممظره عشان اعلمها اذا هي تشوفك من وراي وتبوقك مني بوق انا جدام الله وخلقه خذيتك وانك حلالي مو لها
جاسم : يعني من زمان تدرين عنها ؟ عيل ليش ماييتي قلتي لي ؟ ليش سكتي ؟
شيخه : لو اني قلت لك جان تركتك لاني ماراح ارضاها على نفسي .... قلت اطلع جدامك مدمقه ومقصوص علي اهون الف مره علي من اني اكون ادري عن خيانتك ومستمره معاك
جاسم : لهدرجه تحبيني
شيخه : لا .. انا احبك اكثر من جذي ب وايد ... كنت احبك لدرجه اني عمري ماكنت احس ان في بهالدنيا احد غيرك ولا كنت ابي من الدنيا غيرك
جاسم : كنتي ؟... والحين ؟
شيخه : الحين تعبت ومافيني احبك كثر اول .. مافي شي تعبني كثر حبك حتى خيانتك ماتعبتني كثره ... خيانتك تعبتني اسابيع او شهور بس حبك خذا مني عمر كامل .... الحين صج احس ان الحب اللي بقلبي لك خلص ..... جاسم الله يشهد اني عمري ماقصرت معاك ولافكرت بيوم اني اقصر تكفى يا جاسم اذا لي خاطر عندك مو لاني زوجتك لاني بنت عمك طلقني ... صج تعبانه ابي ارتاح
جاسم : تهقين اذا طلقتج بترتاحين .
شيخه : لو ماارتحت مااهقى اني بتعب كثر ماتعبت
جاسم : انتي طالق ... باجر بروح المحكمه اسوي اوراق طلاقج .

على كثر ماكانت تبي الطلاق الا انها ماهقت اتها بتنهار حييل لما تسمعها .. ماهقت انها بتكون شي صعب عليها حيييل .
سكر جاسم التلفون وغصب عنه نزلت دموعه هذه ثاني مره تنزل دمعة جاسم .. اول مره لما درا ان ريم متزوجه وهالمره لما طلق شيخه ..

الصبح جاسم نفذ كلامه حق شيخه وراح المحكمه بس قبل لايروح رفع السماعه على ابوه : صبحك الله بالخير يبا
ابو جاسم : صبحك الله بالنور ... داق مبجر مو عوايدك ؟ خيير
جاسم : خيير بويهك يبا ... يبا انا حبيت ابلغك اني رايح المحكمه اطلق شيخه بنت عمي انا مابغيت اسوي هالشي دون علمك
بو جاسم : تتحداني ياجسوم ... انا مو قايلك شيل هالسالفه من بالك
جاسم : حشى يبا لا اتحداك ولا شي ... انا عارف انك تتمنى لي ول شيخه الخير بس صدقني يبا الطلاق احسن لي ولها ... البنت من خذتني ماشافت يوم راحه حرام اظلمها معاي ويضيع منها عمرها على واحد مايحبها ... يبا انا يهمني رضاك وصدقني ماودي اطلع من شورك بس هالشي بيريحني انا ويا شيخه

ابوي جاسم شاف ان جاسم ماباذنه ماي وانه خلاص خذا قراره عن اقتناع ... راح حق اخوه ابو خالد يتسامح منه ويطيب خاطره :
والله مادري شقول مافي كلام ينقال بهذلنا بنتك معانا ولا عزيناها والله اني مفتشل منك ولاادري شقول وشسوي
بوخالد : متى بطلقها ؟
بو جاسم : هو قبل شوي كان رايح المحكمه اهقى انه طلقها ..
بوخالد ( مكسور الخاطر على بنته ) : الله يعوض عليهم باللي يسعدهم
شوي والا يدخل جاسم .. ابو جاسم وابو خالد استغربوا جيت جاسم .. جاسم اول مادخل راح عند عمه وباس راسه : سامحني عمي ادري اني ماطلعت قد ثقتك فيني ... امنت بنتك عندي ولاحفظتها .. عمي كل شي نصيب .. تكفى عمي لاتحمل ابوي ثمن غلطتي وتشيل بخاطرك عليه ترا والله انه ماكان راضي عاللي سويته بس انا طلعت عن شوره مو عندا له ولا كسر بكلمته بس لاني ادري ان هذا احسن لبنتك ولي .... وانشالله ان الله يرزق شيخه باللي احسن مني ويقدر يسعدها
بوخالد مع انه متكدر ومتضايق بس مايقدر يزعل : كل شي نصيب ومهما كان الظفر مايطلع من اللحم ) : الله كريم

خبر طلاق شيخه انتشر بسرعه اسرع من شب النار بالحطب ... القريب والغريب درا وكل واحد الف له سبب حق طلاقهم ... ناس وايد تنسى ان الطلاق حلال هو صح انه ابغض الحلال بس يظل حلال ... ودايم يشوفون انه مشكله وينسون انه مرات يكون حل .
طاف شهرين على طلاق شيخه وجاسم.... شيخه كانت حاسه ان حياتها مالها معنى كل رفيجاتها والبنات اللي حولها صار لهم حياة شاغلتهم يازواج او وظيفه الاهي مثل ماهي ... كان بوخالد قاعد بالصاله يشرب شاي العصر مع ام خالد .. دشت شيخه الصاله وراحت قعدت يم ابوها : يبا بطلب منك طلب بس الله يخليك لا تردني
ابو خالد : امري
شيخه : ابي اتوظف ؟
بوخالد: ليش يبا ناقصج شي ؟
شيخه : لا يبا مو ناقصني شي بس مليت كل بروحي وماعندي شي اسويه ... الله يخليك يبا شوفي لي وظيفه احس اني بين من قعدت البيت
ام خالد : انتي اللي حابسه نفسج جم مره اقولج تعالي زوراي معاي انتي اللي ماترضين
شيخه : يما مليت من الزوارات ... واصلا اللي تروحين لهم مااعرفهم واغلب الوقت يكونون حريم كبار ... يبا عفيا لاتردني
بوخالد(كسرت خاطره بنته .. هي من اطلقت طلعاتها خفت وعلاقتها مع ساره تغيرت اول كانوا دايم مع بعض الحين من وين لوين ساره تمرها ) : مايصير خاطرج الا طيب ... تبين خاص والا حكومه ؟
شيخه : اي شي بس المهم اتوظف
بوخالد: خلاص باجر اكلم لج واحد من الربع يشوف لج وظيفه
شيخه : صج يبا ... عيل خلاص باجر بدق عليك مبجر اذكرك اخاف تنسى
بو خالد: تدرين شلون ... الحين ادق عليه جم شيوخه عندي
وصج دق بوخالد على واحد من ربعه ماسك منصب مدير بشركه من الشركات الكبيره وبسهالات من الله تم موضوع شيخه بسرعه ... شيخه حيل استانست ... ذكرت ساره وايامهم كانت كل ماتستانس ادق على ساره .. كانت تحس ان مافي احد يستانس لها كثر ساره ... كانوا اكثر من خوات ... دقت شيخه على ساره : شلونج سارونه ؟
ساره ( اللي حيل فرحت لما شافت رقم شيخه ) : هلا وغلا .. تو مانور تلفوني
شيخه : تسلمين ... سوير شعندج ياجر العصر ؟
ساره : امري لو عندي اشغال الدنيا اكنسلهم لج
شيخه : لا والله جد شعندج
ساره : ماكو بس دازه فاكس للبيت الابيض انطر الرد منهم وعندي غدا بفيينا ... شعندي يعني ولاشي ... شفيج ؟
شيخه : ساروه بتوظف .. الاسبوع الياي بداوم وابي اتسوق تروحين معاي
ساره : من صجج اكيد اروح معاج ... واذا تبين اشتري لج على حسابي تامرين امر
شيخه : خلاص افنيوز
ساره : اكيد افنيوز ... لا يكون عبالج ان بنروح مكان ثاني ... تمريني والا امرج
شيخه ( ماتبي تشوف جاسم ) : لا انتي مريني

اليوم الثاني شيخه حييل اكشخت من زمان ماكانت طالعه وحدها مستانسه انها بتطلع مع ساره ... وصلت ساره ودقت على شيخه تنزل لها والا تشوف صقر قاعد برا اول ماشافها يالها : هلا هلا
ساره : هلا فيك
صقر : شلونج ؟
ساره : تمام
صقر : حتى انا تمام
ساره : انا ماقلت شلونك
صقر : بس حسيت انج بتقولينها
ساره : صج ثقه
صقر : اكيد ثقه ... بيتنا نور الا الفريج كله نور
ساره : باصحابه
صقر : تاخرتي انتي مو قايله حق شيوخ بتيين 5 الحين 5: 30
ساره: شدراك ؟
صقر : عيل تهقين ليش واقف برا ... من زين الجو
ساره : شالله حادك ؟
صقر: قلت اكحل عيوني بشوفة الزين
ساره : ----------------------
صقر : الاخت طرمه
ساره : شقول ؟
صقر: مادري يعني ... قولي الزين زينك ... اي شي
ساره : شيخه وينها
صقر : ماكان قصدي تقولين شيخه وينها لما قلت قولي اي شي
ساره : صقر خلاص عاد
صقر : ترا مو لايق عليج الحيا
ساره : ليش شنو شايفني
صقر : شايفج قمر
ساره : وخر عن سيارتي والا ترا بسكر الدريشه
صقر : بروح اصلا مليت منج ... بس بقولج ترا تخرجت
ساره : مبروك
صقر : ميروك عليج انتي
ساره : مبروك علي شنو
صقر : انا


ماقطع كلام ساره وصقر الا ييت شيخه ... ساره طول الطريج بس تتبوسم وهي تفكر بصقر بس ماقالت ولاكلمه حق شيخه ... وصلوا شيخه وساره الافنيوز ونزلوا تسوقاو بالمحلات .... ساره : شيوخ شوفي فواز ويوسف
شيخه : وينهم ؟
ساره : كاهم اللي عند غاب
شيخه : اي والله ... شنسوي ؟
ساره : بشنو ؟
شيخه : نسلم او شنو ؟
ساره : شكو انسلم ؟ مالنا شغل فيهم .. اذا هم شافونا هم يسلمون

يوسف هو اللي شافهم : فواز طالع منو هناك
فواز : منو ؟
يوسف : المكفخه وبنت عمها
فواز : شنو .......... شيخه ؟
يوسف : اي
فواز : لاتقول مكفخه لا والله اراويك التكفخ العدل شلون
يوسف : امش واللي يعافيك
فواز :وين ؟
يوسف : نسلم
فواز : انا اسلم معقوله انت شكو ؟
يوسف : شنو شكو ... والله ماتسلم الا انا معاك

راح فواز ويوسف حق شيخه وساره ... فواز : شلونكم ؟
البنات : بخير
يوسف ( نقز ) : شلونج ساره ؟
ساره (استغربت ان يعرف اسمها ) : بخير
يوسف : عسى دوم ..... (تالي استوعب شلونج اخت شيخه )
شيخه : الحمدالله
فواز : انتي شنو كل ماشفتج ... شفتج خامه السوق
شيخه : مادري شالسالفه ... مااصادفك الا لما اتسوق
فواز : الحين تقولين من زمان مو طالعه وناقصتني وايد اغراض
شيخه : هذا الصج
ساره تنرفزت من خز يوسف لها : شيخه يلا نمشي جنا تاخرنا
شيخه : اي يلا ...
سلموا شيخه وساره على فواز ويوسف ومشوا ... فواز : ويعه يسوف
يوسف : ويعه تويعك ... شفيك ؟
فواز : اكو احد يخز جذي ... البنت خاست بهدومها
يوسف : شكو ... ماكنت اخز كنت عادي
فواز : قول والله انا مت من الفشله من خزك هي شلون
يوسف : انجعم واللي يعافيك .... ترا خلاص انا قررت
فواز : شنو ؟
يوسف : بخطبها
فواز : من صجك ؟
يوسف : اي والله

يوسف دشت ساره خاطره حييل وكلم امه عنها ... اسالوا عنها وماسمعوا الا كل خير
ساره كانت راده من طلعه مع رفيجاتها اول مادخلت والا امها تيبب....... ساره : شعندج يما تيببين ؟
ام جاسم : من فرحتي .... اليوم دقوا ناس خطبوج
ساره : مو اول مره انخطب ..... حسستيني جنه طايح بجبدكم
ام جاسم : اسم الله عليج ... اصلا انتي مافي منج ... بس كل مره شي وهالمره غير .. هالمره اللي يايلج ما ينرد كامل والكامل الله ...
ساره ( على طول يه على بالها صقر ) : متى دقوا ؟
ام جاسم : اليوم العصر ... قلت لهم خلونا انشاور ابوها ونرد لكم خبر
ساره : تشاورين ابوي ... ليش هو يمكن مايوافق ؟
ام جاسم : انشالله يوافق بس هم لازم يسال عن الولد وعن اخلاقه عن نسايبهم جماعتهم ..
ساره ( شكت ) : يما منو اللي خاطبني ؟
ام جاسم : يوسف ال ..... , دكتور بالاميري
ساره : يوسف ؟
ام جاسم : تعرفينه ؟
ساره : اي هذا دكتور شيخه لما كانت بالاميري ورفيج فواز خطيب شيوخ الاولي
ام جاسم : لايكون يدري ان اخوج طاق مرته
ساره : اكيد يدري .... بس شكو يخطبني ؟
ام جاسم : شنو شكو .... شافج سنعه وحلوه وبنت اصل فصل ... شلون مايخطبج


ساره صعدت دارها على طول دقت على شيخه : شيوخ سمعتي اخر خبر
شيخه : شنو ؟
ساره : يوسف خطبني !!!
شيخه : اي يوسف ؟
ساره : رفيج فواز ... دكتورج
شيخه ( حييييييل تضايقت وانقمت قلبها .. ماتدري ليش!!!! مع انها تحب ساره بس حست بغيره ) : مبروك
ساره : شنو مبروك
شيخه : موتقولين انخطبتي مبروك
ساره : وصقر ؟
شيخه : شفيه صقر ؟
ساره ( استغربت حيل من شيخه هي تدري ان شيخه تعرف انها تحب صقر وصقر يحبها ) : انتي مو مره قلتي ان صقر يبيني
شيخه : اي من زمان
ساره : شنو يعني من زمان ... غير رايه ؟
شيخه : مادري
ساره : بس هو يحبني
شيخه : واذا
ساره : اقولج يحبني تقولين لي واذا ... شيوخ انتي تدرين ان حتى انا احبه
شيخه : هم اقول واذا
ساره : شيوخ كلميني عدل ... شنو يعني واذا ؟
شيخه : يعني واذا هو يحبج وانتي تحبينه ... كا انا قعدت احب باخوج ايام وسنين واخر شي خاني وطلقني ... لاحبي له فادني ولا شي بالعكس مابهذلني الا حبه .... ساره اذا انتي مرتاحه حق يوسف وعاجبج وافقي لان مااهقى ان صقر بياخذج
ساره : انتي ماتبين صقر ياخذني صح ؟
شيخه : -----------------------
ساره : خلاص ياشيخه الحين انا صرت اخو اللي طلقج بس
شيخه : ----------------------------
ساره : انا اكلمج ردي علي
شيخه : ساره اللي سواه اخوج موشوي وعمري ماراح انسى اللي سواه وانا ماابيج تاخذين صقر لان مابي ارتبط فيكم
ساره : بس انا بنت عمج غصب عنج ترتبطين فيني
شيخه : بنت عمي غير لما تكونين مرت اخوي

ساره سكرت التلفون من شيخه وحدها ماتت حره من شيخه ... شلون الحين توصل حق صقر خبر خطبتها كلش مو حلوه ادق على صقر تقوله شبقول عنها ... تذكرت انها الاسبوع اللي فات ماخذة بلوزه من شيخه فكرت انها تروح بيت عمها جنها بترد البلوزه وتوصل الخبر حق صقر ... اليوم الثاني الضحى ساره لبست وراحت لانها تدري ان صقر اكيد موجود لان للحين ماتوظف والصبح نادر ما يطلع والاهم ان عمها وشيخه بالدوام لبست لبس اي شي على عيله وراحت بيت عمها ....
دقت الجرس اطلعت لها الخدامه .... ساره : اكو مدام ام خالد ؟
لجمي : لا موموجود
ساره (ارتاحت ) : شلونج لجمي ... انتي زين .... سمعي مسكي هذا دينار وردي داخل انا يطقي جرس انتي ماكو يفتح وهذا دينار ثاني حق خدامه ثانيه لايجي بطل باب
لجمي : ليش ؟
ساره : بس كيفي انا يبي يخيس برا ... ابي اسوي عرق يلا روحي
اول ماراحت لجمي شكلت ساره عالجرس عشان يقعد صقر وينزل لها .... نزل صقر معصب حده يصرخ : ويعههههههههههههه ... منو ؟
ساره : امبي اسفه قعدتك من النوم
صقر : لا انا للحين نايم ... اصلا انا قاعد احلم انا اصبح بويه ساره يا بختي
ساره ( انحرجت ) : شلونك صقر ؟
صقر : بخير ..... عاش من شافج
ساره : عاش غاليك
صقر : غاليي مايدري عني كل ماشافني قالي عاش غاليك ... مادرا ان هو الغالي وكل ناسي
ساره ( حيييييييييل انحرجت من جرأة صقر وصقر ماخذ راحته وايد لان كل مسالة وقت قصير ويخطبها ) : شيخه هني
صقر : بالدوام
ساره : اي صح نسيت ان عندها دوام ..... عاد ييبه لها بلوزتها ويايه اسالها سؤال ضروري حييييييييييييييل
صقر: شهالسؤال الضروري حيييييييييييل ؟
ساره : كنت بسالها عن دكتورها اللي عالجها بالاميري ... يوسف
صقر : منو يوسف ؟
ساره : دكتورها
صقر : وشكو تقولين يوسف حاف ... بعدين شكو تسالين عنه ؟
ساره : امس اهله دقوا خطبوني
صقر : نعممممم يمااااااا .... ويايه تسالين بعد تبين ازنطج بالبلوزه اللي يايبتها
ساره : امي قالت لي
صقر : وانتي جنج هبله ماصدقتي خبر على طول يايه
ساره : امي قالت لي
صقر : ذلفي بيتكم قولي حق خالتي ... محد بياخذج الا صقر .... بلا يوسف بلا نيله ... اليوم العشا امي ادق على امج ... لاتشغلون الخط ترا بس بندق مره وحده

ساره حادها طارت من الفرحه يومها ماطلعت من البيت ويابت كل قشها واقعدت يم التلفون مع انها تدري انه ماراح يدقون الا العشا

صقر العصر راح حق امه الدار
صقر : ماما ماماتي
ام خالد :خير
صقر : ماما شلونج ؟
ام خالد : شتبي ؟
صقر : شلونج يما ؟
ام خالد : بخير ... شفيك؟
صقر : يما انا تخرجت
ام خالد : ادري
صقر /: يما اقولك انا تخرجت
ام خالد : الف مبروك حبيبي
صقر : ابي هديتي
ام خالد : تستاهل امر ... شنو تبي ؟
صقر : ابي ساره
ام خالد ( انقلب ويها ) : شنو يعني ؟
صقر : ابي اخطب ساره
ام خالد : صقور اقعد بكلمك .... انا ادري انك تحب ساره وتبيها بس هم ادري انك تحب شيخه وماتحب تغثها اللي صار باختك من ريلها مو شوي ولاشي يتنسي .... وانا مابيك تاخذ ساره
صقر : ساره مالها شغل
ام خالد : ادري ان مالها شغل وانها خوش بنت .... بس ياصقر الباب اللي ايي منه الريح سده واستريح ... لا انييب عوار الراس لنا ... انت مو ياهل اغصبك على شي بس اذا صج تحبني وتبي رضاي شيل ساره من بالك
صقر : بس انا احبها
ام خالد : باجر تحب غيرها
صقر : مااهقى
ام خالد : صدقني باجر تنسى .... صقر انت اذا خذيت ساره اختك وايد بتتضايق انت شايف شلون العلاقه بين ساره وشيخه توترت وصعبه يردون مثل قبل .. وغير ان شيخه بتتضايق انا مابي شي يربطنا باهل جاسم كافي علينا ان هم بيت عمك وهالشي مانقدر نغيره بس ماله داعي ندش معاهم بسالفة زواج ثانيه
كلام ام خالد حيييل ضيق خلق صقر وهو حس صج انه امه ماتبي ساره ... طلع من امه راح حق شيخه : شيوخه شلونج ؟
شيخه : بخير
صقر : شيوخ انا اخوج ماابيج تخشين عني شي ولاتخلين شي بخاطرج
شيخه : صقر شفيك ؟
صقر : شيخه انتي يضايقج لو اني اخذ ساره
شيخه : كيفك ... سو اللي تبي
صقر : مالج شغل انا شنو ابي ... انا ياي اسالج
شيخه : صقر الموضوع يخصك ... بس انا مابي تاخذ ساره انا احبها بس مابيها تصير مرت اخوي ... قول اني حقيره قول اني حقوده بس صج صج مابيك تاخذها ... صقور انا جسوم ينني كرهني بالدنيا مابي شي من صوبهم ... مابي عيالك يكون خالهم جاسم

صقر فيه شي حلو وهو بنفس الوقت شي موحلو ... صقر دايم يحكم عقله حييل بكل شي صج انه غشمري وونيس بس عقله دايم يوزن الامور .. لما حسب السالفه صح لقى ان امه وشيخه صعب يتقبلون ساره تصير زوجته ساره الحين مو مثل ساره قبل ... قرر انه يشيل الموضوع من باله يتعب هو ولايتعب معاه ناس وايد

ساره تمت يم التلفون لينا الساعه 1 الفجر .... عرفت ان اهل صقر خلاص ماراح يدقون ... عرفت انه خلاص صعب حييل ينسون اللي صار بين شيخه وجاسم ... لو ان الغلط بس غلط جاسم الا انها هي لازم هم تتدفع الثمن لانها اخته

 

[مرامي]

nice 7daaaa albart

 

[rose red]

ياا حياتي يا سارة و الله حبيبتي بس أحسن عشان ما تصير مشاكل!
و الأخ فواز مو ناوي يخطب شيخة؟؟؟ شنااطر يعني!!

 

[dreamy_83]

خوووش بارت حبيبتي يعطيييييج العافية

 

[Sara.M]

يعطيج العافيه شكله فواز عباله ان جاسم وشيخه ردو حق بعض يعني شكله ماراح يخطبها
ناااطرينج