نصايح + واجبات للي بتسكن عند حمولة ؟!

[بنفسج ..~]

السلام عليكم ورحمة الله

شلونكم كويتيات شخباركم ؟؟ :eh_s(17):

بدخل بالموضوع دوغري :eh_s(22):

أنا بعد جم شهر بتزوج وبسكن عند حمولتي ولي بس غرفة وحمام أعزكم الله

ظامهم الخدامة تطبخ وكل شيء عليها وبحكم ان ما عندي مطبخ فأكيد مطبخه مطبخي أكلنا واحد

الموضوع ومافيه شنو واجباتي تجاههم وتجاه خالتي ؟
من ناحية الطباخ والبيت والضيوف وألخ ....

ويا ليت نصايحكم بشكل عام على كل شيء يخص الحمولة وبيت الحمولة وخصوصاً أن ودي أكسبهم :eh_s(7):




​

 

[بنفسج ..~]

يالله نزل الموضوع

 

[al-musk]

خلج سنعه ونظيفه وخفيفة .. غرفتج مسؤوليتج انتي بتنظيفها وكل شي .. كل جم يوم ( لو مرة بالأسبوع)دشي المطبخ سوي حلو وسنعي وأشرفي عالجاي والقهوة .. ولي جوكم ضيوف ارتزي وشيلي وحطي وأشرفي وقدمي.. شغل ريلج وأغراضه إنتي تشرفين عليها ولي بغى وطلب اكل بغير وقت الوجبات الرئيسية فهالشي مسؤوليتج إنتي مو الخدامه وخواته .. وخلج دايم هادية وصوتج لايعلى ..


وكل شي يصير فبيتهم مايطلع بره .. وسمفونية أمك وخواتك حاولي ماتنقال الا بالشديد القوي لما يصير في ضرر مباشر لج ولا الأشيا التافهه طنشيها عشان لايقول انا ماخذ وحده نكدية وماتحب أهلي ومتحقطه لهم..

ودايم بدي النية الزينة وكل شي تسوينه اول شي يكون لوجه الله مو عشان يقولون فلانه سوت وحطت ..

الله يوفقج ويتمم عليج كل خير

 

[الغضى]

الله يوفقج حبيبتي

1) زوجج رقم واحد اهتمي فيه من أكل من لبس من نظافة
2) خالتج عامليها مثل أمج واحسني الظن فيها
3) لاتدخلين بخصوصيتهم وخلي حياتج خاصة فيج
4) أي مناسبه في البيت خل يكون لج دور مميز فيها كونج عروس
5) لا تخلين مسؤليات الحمولة تاخذ من حياتج الشخصية يعني أول شي زوجج وبعدين الحمولة.
6) أي سالفة تصير بالبيت حاولي ماتدخلين أو تسألين ريلج بيقول عنج حشرية.

 

[امـ خــزامـى]

^^^
معاها
انت متزوجه ولدهم لاتنسين هالنقطه

خليهم يعيشون براحتهم وبخصوصيتهم وانت بعد

 

[بنفسج ..~]

>>>> جابت ورقة وقلم وتكتب توصيات خخخ
الله يجزاكم خير انا نزلت هالموضوع عشان أستفيد وغيري بعد يستفيد
أستانس كثير بمشاركاتكم ونصايحكم وخبراتكم بالحياة وأنتظر الباقي ^^

 

[popa]

الله يعينج راح يتدخلون بكل كبيره وصغيره وراح تتصنعين شخصه موشخصيتج وماراح تاخذين راحتج
كنت مجربه لي غرفتين وحمام
ظيم ظيم
عشان تتحاشين المشاكل لاتسولفين وايد وكل سئال له جواب
ومالج شغل بالظيوف امتى ماقالولج تعالي روحي ولاتبسطين وايد
لان راحو ولا ردو بيضلون حموله ولازم يصير تج
اذا صرتي حبوبه وكله معاهم قالو عنج لزقه ومرتزه مو قادرين نتنفس وملقوفه
وان خيرج شرج قالو مايقه وشايفه نفسها ومو اجتماعيه وتعار منا الخ.....
اعتدلي

 

[Patcholli]

راح تتعبين يمكن تتحملين وتجاملين اول شهر او شهرين بس اذا بتلتزمين معاهم بالطباخ وجذي راح تتعبين
ان شاء الله يطلعون من النوع الهادي المسالم اللي مانتقدون اذا مانزلتي معاهم وعاونتيهم بالمطبخ لان ماراح ترتاحين خصوصا اذا معاج حموان بالبيت
لا بلبس ولا بحركه وبتظلين رسميه طول الوقت طبعا اكبر غلط تطيحين معاهم الميانه
خلج رسميه وحبوبه ومبتسمه وياهم لاتكثرين السوالف
اذا عزموج وجبي واذا مانادوج لاتنزلين كلشوي عندهم
ونصيحه اذا صالتج كبيره حطيلج مبطخ تحضيري انا مسويه جذي
لان ما ارتحت كلساعه نازله وساعات كنت استحي وافتشل لما عندهم ظبوف وانا يوعانه مثلا ابي اطبخ شغله
اظطر اطلب مطعم او انطر الناس لما يروحون
وماحب كل مادشيت المطبخ احد يشوف شنو قاعده اسوي وشلون اطبخ وشنو باكل مادري انا طبيعتي احب الاستقلاليه
ماودي اظيق خلقج ومادري شنو طبيعتج يمكن تكونين احسن مني وترتاحين ويمكن اهله يريحونج ويراعونج بس انا اتكلم بشكل عام

 

[M!SS.LOBY]

الله يوفقج

 

[Jolyan]

اب اب اب
انا نفسج بسكن في بيت حمولتي
و الله يعينا و يعينج و يحبب أهاليهم فينا
ان شاء الله انا و انتي قدها

 

[وش الدنيا بدونك]

الله يوفقكم

 

[umm-7asson]

انا ساكنة في بيت حمولة والحمدالله خالتي زينة وطيبة بس وايد متعلقة بولدها اللي اهو زوجي وهذي نقطة مو حلوة لان مالي خصوصية مع زوجي فمثلا لو بنطلع تبي تطلع معانا ولو بنسافر تبي تسافر معانا وهالشي مو حلو لان مالي خصوصية مع زوجي مابي أخرعج بس خلي خصوصية بينج وبين زوجج لان هذي حياتكم ساعات تقولين لو بشقة اجار أحسن لي لان الأجار فيه استقلالية وخصوصية
ولا تنزلين تحت وايد خلج عزيزة نفس انا كنت كله اقعد تحت وهذا غلط توني اكتشفه فمتى ما أبي أقعد تحت قعدت مابيغيت مولزوم حتى لو ريلي قالي نزلي اقوله سوري تعبانة ولا بغسل وعندي شغل حتى لو قالي انا بنزل اقوله انزل اقعد عند امك
لا تقولين ولا تيبين طاري خواته حتى لو اهم غلطوا عليج خل يشوف بعينه لان بيظلون اهله واخواته وامه لكن اذا شاف بعينه يغلطون عليج راح يدافع عنج

 

[فارسة]

انا اقول الله يعييينج
ويارب يقدرج على هالمسؤوليه

بس نصيحه ريلج اهم شي دربالج عليه اكله ملابسه نظافة الغرفه
وانتي بعد اهتمي بنفسج
لايكون كل وقتج قاعدة معاهم

انتي مو ملزومه فيهم
الله ماراح يحاسبج عليهم

اهم شي ريلج
وعامليهم باحترام وخلج رسميه افضل
واول اسبوع لا تكلمين وايد راقبيهم قصدي شوفي طبعهم وشخصياتهم

انا مع حمولتي وكلش ما احس ماخذة راحتي لان طبعي احب الاستقلاليه وللحين متحسفه ليش ما شرطت عليهم شقه بروحي

الله يوفقج

 

[شطانه طفله]

الله يعيينج انا نفس الحال
شوفي على حسب تربيتهم وبيتهم اذا من اهل السنع وسمعتهم واصله فلج درب الخير يارب
واذا صيتهم مو ذاك الزود هم اتمنالج درب الخير

انا عبالي جذي سويت وشلت وحطيت وقمت وقعدت اخر شي شحصلت غير غيره وحسد والله كريم


نصيحه عامه ومهمه

لا تقولين كل صغيره وكبيره لاهل زوجج سواء حدث صارلج ويخصج او يخص اهلج
لاتقعدين تجابلينهم 24 ساعه لان اذا صارتلج ظروف ولهيتي راح يقولون وينج وما وينج ويتشرهون فخلج بالسليم دايما
سلام وقعه خفيفه وصعدي غرفتج وسنعيها
خلج ثقيله ورزينه مو قرقه وسوالف

وبس والله يهنيج ويوفقج يااارب

 

[بنفسج ..~]

أب


أب



خوش نصايح والله قعدت أفكر بتفاصيل كثيرة



الله يستر

 

[هدوووشه]

مشكورة بنفسج ع الموضووع الحلو


آآآآآب


ومنكم نستفيد

 

[دلوعت عيود]

تبين اصدمج بشغله


انا تزوجت و كنت بشقه بروحي

وكانت علاقتي فيهم تمام التمام


صار عندهم بنيان يو اسكنو عندي ياصدمتني بس



انصدمت بتدخلاتهم بكل شي

وانا ساكته


احلى شي فيني اهلي ماربوني علي التحلطم اعطيه ابتسامه و ضحك عمري ماقشرت بوجيهم

وخاله عن خاله تختلف

خالتي عاملتها مثل امي و ليمن افتح لها قلبي و اقولها عن اشياء امي ماتعرفها علي عموم اني. وحده من بناتها انصدم ان تقول لامي كل شي و تهول بالموضوع و تزيد من عندها وااايد


بعدها خلاص حطيت حدود و هالشي شافه زوجي صارت لي مشاكل بيني و بين امي بسبه خالتي و خالتي تضحك بريئه


بعدها خلاص ماعدت اسولف وايد اساعدها اي ووقت ماتكون محتاجتني

اعاملها بطيب و اعزها بس حطيت حدود لحياتي و لكلامي معاها



الموت ولدها اللي يغلط وانا انزف منها و اسكت

واشوه زوجي عارف و حاس

وليمن اطلعو ارتحت بس الحين قاعده اسوي شقتي عندهم و طريقتي تغيرت لان قبل كنت على البساط الاحمدي اللي بقلبي علي لساني ماكنت احط حدود و اسولف علي نيتي و كل شي يكوون ضدي بس الحين خلاص حطيت حدود بلشو يحترموني

بقولج نقاط حطيهم ابالج


1- انتي ماخذه ولدهم و راح تغار منج و هالشي طبيعي
2- اي شي يصير بينج و بين زوجج يتم بالغرفه مايطلع
3- عامليها باحترام و ادب و لا تطيح الميانه وايد
4- اي شي بيت اهلج مايطلع برا

5- طلعاتكم وروحاتكم لا تعطينيها بالتفصيل قبل لا تطلعين مري عليها و قولي لها خالتي بنطلع حياج شي طبيعي ماراح ترز وجهها معاكم بس اسمج انج قدرتيها

6- خالتج و عمج مسافرين طلبي ريوم و حطيه علي سلامتهم
7- لا تقعدين 24 ساعه مجابلتهم نزلي الضحى بعدها صعدي بعدها نزلي للغدا و صعدي ونزلي المغرب
8- مهما كانت خالتج كانت تبيج و زوجج طالب شغله نفذي شغل زوجج بعدها نزلي لخالتج
9- اذا زوجج بالبيت لا تتكلمين بالتليفون ابد و. لا تلهين عنه
10- لا تكلمين مثلا تقولين له خواتك و امك و اخوك و كذا سكتي مهما ياج مضره منهم لان بتكبرين بعينه وايد
11- انصحيه يمر علي امه و ابوه لا تبعدينه عنهم ابد
12-حبي اهله عشان يحبج






ومهما حطيتي حدود لا تحسسينهم بهالحدود ققللي كلامج لا تكون وايد قرقه وسوري بس لاني كنت جذي و تبت

ووو بس

 

[بنفسج ..~]

^


واو نصايحج على العين والرأس
صراحة والله أنكم خوش بنات احسكم صج صج تنصحون من قلب
أنا طمعانه بنصايح الكل يا ريت الكل يشارك
جزاكم الله خير والله يوفقنا وأياكم

 

[أسرار الجمال]

اهم مثل اهلج صح ولازم تحترمينهم صح بس ظلي تذكري انهم مثل اهلج بس موووووو اهلج لا تحاولين ترضينهم على حسابج واعصابج ما حد مضطر يرضي احد واهو مؤ رضيان ولو كانوا زينين لا تقعدين كل النهار عندهم ومو ضروري تقولين وين بتروحيت ووين تجين تعرفين ليش لان مع العشرة الا تصير مشاكل وحجي وقال وقلنا ساعتها يحسسونج انج مضطرة تعطينهم تفاصيل حياتج وماراح يعتبرونها طيبة منج لااااااا واجب عليج من الاخر عامايهم عاااااادي ولا تدورين بس رضاهم

 

[همي رضى خالقي]

الله يعينج غرفة وحمام بس

انا ساكنه بغرفة وصالة وحمام واحس ضيج ومو ماخذة راحتي ولا عندي مطبخ عشان اسوي الي اشتهيه

شوفي من هالناحية لازم تفكرين عدل في اسالة لازم تلقين اها اجوبة وحل

بتسكنين بغرفة بس صح؟ باجر لي بغيتي تشوفين تلفزيون ولا تغيرين جو ولا بتاخذبن راحتج باي شي شخصي شلون

وملابسج لي غسليتهم وين تشرينهم واذا يعتي بنص الليل شلون بتاكلين

ولي حملتي ان شاء الله و ولدتي ان شاء الله ال بيبي واغراضة ولويته كلها بغرفتكم؟