نداء لمراهقات الثمانينات يطري عليكم؟

[just-me]

صباح الأنوار ..... يمكن اليوم مشاركتي بتلاقي اقبال من بنات جيلي مراهقات الثمانينات ... ودنا نتذكر عمرنا و نقارن مع بنات هالوقت سواء عيالنا أو بنات خواتنا وأخواننا واذا نسيت شي ذكروني وشاركوني خل نضحك ... يالله نبتدي

:aha:​

تذكرون هبتنا بالملابس ..بلوزة شبك سوده تحتها تي شيرت و الراس مربوط بشريطة سوداء .. كنا هابين بمادونا و سيندي لوبر ....كل شي بصوب و الأساور الربل المطاط السود 15 درزن بكل ايد ... و لازم ساعة سواتس ...


تذكرون جناط المدارس ... لازم ناف ناف أو بينتون و هلو كاتي من لندن..
تذكرون الباند و اللي نفسه ربطة على الايد مالت لاعبين تنس أرضي ؟؟ شكو كنا نلبسهم ؟؟

أنزين تذكرون بوك وساعة و قلم فيراري من الصالحية ؟؟

تذكرون هبتنا بساعات فيليب شاريول ... اللي كانت فضي بذهبي و السلسة الذهبية منها و فيها ...

أمممممممممم بعد بعد بعد أي تذكرت ... عزكم الله جواتي المدرسة المقضضة اللي جنها بوت قصير و بخيوط رياضة عرفتوهم ولازم تحتهم دلاق أبيض مال المدرسة .. انزين ليش لبسيه بعد المدرسة بدون دلاق؟؟

تذكرون لما كنا انداوم بالمدراس الخميس و كل وحده فينا ابتسامتها شاقه الويه ومن يصر الجمعة غلقنا باجر مدرسة .... ما مدانا نتهنى

تذكرون التلفزيون البرنامج الأول و الثاني ؟؟؟ نادي السينما كل أثنين ؟؟؟ تذكرون اللي كان يقرأ قرأن عمي الله يرحمه تالي يطفون عليه الليتات و يحطون الترجمه بالانجليزي يقراها الهندي مال الأخبار ؟؟ اخر شي باباي و برنامج من حياة الشعوب و شعراء النبط تالي الاخبار و فلم السهرة مات صير الساعة 11 الا صك التلفزيون و ذاك من ذاك اللي يتجرأ و يسهر

بعد ذكروني ؟؟؟؟؟ أممممممممممم تذكرون المباريات و الشوارع شلون تصفر و البنك مخلص من الدواوير و الكل مشتط؟؟؟
تذكرون صالة التزلج و التشيحط اللي كنا نسويه ...؟؟؟ كل شي ولا لما كنا نصف سطر و نسوي حركات بايدنا علبو نرقص

و الترفيهية كنا متوقعينها نفس دزني لاند بس هم بلعناها و كنا نروح ... تذكرون شوبيز و اللعب و التمشي ؟؟

طبعا ألحين أكو شي اسمه أي بود و على و قتنا مسجلة هيد فون مع السماعات و البطارية و اِلأشرطة ترس الجنطة .. ما سوت علينا لا و الشاطرة اللي تقدر تجيبها المدرسة بحصة الألعاب نسمع جورج مايكل كير لس و سبر شخبارييييييييي
:dddds:

بعد بنات ذكروني شكنا هابين فيه ؟؟؟

 

[غيدآء]

هههههههههههههههههههههههههههههههههههههه


ياحلوكم....



لا يوقف يا مراهقات الثمانينات نبي نشوووف شكان عندكم بعد *_^

 

[BlackRose]

اللي اذكره قصة غرسون اللي نص المدرسة قاصين شعرهم هالقصة

فرقة الدانة وفرقة المرجانة كنا هابين فيهم هب

نظارات الريبان

منتزة الخيران بالصيف اول مافتح ولازم شلة بنات وواحدة فيهم شاية مسجله اشكبرها ونتمشى فيها

وتلقينا نفس شلة المراهقات ايام البر مع نفس المسجلة بس الفرق هبينا بالبشوت اللي كانوا اييبونهم من مصر

وكنا نمموت على بوبكر سالم وعبدالله رويشد ونبيل شعيل

والكشخة فينا سافرت تركيا بالصيف​

 

[BlackRose]

اي وتذكرت مسلسل فالكون كريست

وبرنامج صدق او لا تصدق

ودوني ماري اللي كانوا يحطونه على البرنامج الثاني

واغنية ليندا ليندا وسوزانا
وقصص احسان عبدالقدوس

والمغامرون الخمسة تختخ وربعه

وروائع القصص هم على البرنامج الثاني

وحجاب بو شراشيب اللي هبوا فيه امهاتنا:dddds:

واذا تذكرت شي هم بقولكم​

 

[just-me]

اللي اذكره قصة غرسون اللي نص المدرسة قاصين شعرهم هالقصة

فرقة الدانة وفرقة المرجانة كنا هابين فيهم هب

نظارات الريبان

منتزة الخيران بالصيف اول مافتح ولازم شلة بنات وواحدة فيهم شاية مسجله اشكبرها ونتمشى فيها

وتلقينا نفس شلة المراهقات ايام البر مع نفس المسجلة بس الفرق هبينا بالبشوت اللي كانوا اييبونهم من مصر

وكنا نمموت على بوبكر سالم وعبدالله رويشد ونبيل شعيل

والكشخة فينا سافرت تركيا بالصيف​

Black Rose هلا والله و ما قصرتي على الرد ...:dddds:.واي صج ذكرتيني بالدانه و مرجانه و أذكرج بعد هبينا بأغنية صابرين صابرين تذكرينها اللي رويشد مع رابح صقر ... لا و بعد هبينا بأغنية تلك لورا .... واي صج كان جيلنا عجيب واستانسنا بهالفترة:dddds:

 

[lala2]

اللي اذكره قصة غرسون اللي نص المدرسة قاصين شعرهم هالقصة

فرقة الدانة وفرقة المرجانة كنا هابين فيهم هب

نظارات الريبان

منتزة الخيران بالصيف اول مافتح ولازم شلة بنات وواحدة فيهم شاية مسجله اشكبرها ونتمشى فيها

وتلقينا نفس شلة المراهقات ايام البر مع نفس المسجلة بس الفرق هبينا بالبشوت اللي كانوا اييبونهم من مصر

وكنا نمموت على بوبكر سالم وعبدالله رويشد ونبيل شعيل

والكشخة فينا سافرت تركيا بالصيف​

الله ذكرتيني نفس ذكرياتي
خصوصا ابوبكر سالم
ونبيل شعيل كان ينزل شريطة بداية شهر واحد وننطرة عشان نشتريه ونسمعه في العطلة الصغيرة عاد اغانيه الحلوة ياشمس لاتغيبي -وايدي بيدك ياحبيبي- هلي ياقمرة علينا ....الله ياحلوها من ايام..
و
ويوم الخميس كنا نطلع مبكر الساعة 11 والساعة 12 يفتح التلفزيون ويطلع لولو الصغيرة كنا نرجع بسرعة عشان نلحق عليها...
ومن فقرنا للمسلسلات الكارتونية كانو الجمعة الصبح الساعة 9 يطلع مسلسل حكايات عالمية نصحي عشان نشوفة لان اذا طافنا مانشوفه اللي الجمعه اللي بعدها...االه ياحلوها
بعد اعيدوا ذكريات الماضي الجميل..

 

[BlackRose]

فترة مراهقتنا عجيييييييييييييييييييييبة

بس ايام التسعينات كانت بايييييييييييييييييييييييييييييخة

عكس الثمانينات

ككل مااذكر ايام الثمانينات احس ان قلبي يفز

آآآآآآآآآآآآآآآآآآآآآآآآخ يا ذاك الزمان لو ترجع بعد وتعود
وترد السعادة اللي راحت مني وتردها لي ردوووووود​

 

[لمسات شمووخ]

لوووووووووووووووووووووووووووووول

اشوه انا اصغر منكم

لوووووووووووووووووووووول


الله يعطيكم طولت العمر

 

[just-me]

كل شي و لا حجاب بو شراشيب و حجاب بو ربطه و را الصماخ ....وذكرتيني بالبشوت و التمشي بالشاليهات ... واي صج وقت حلو و نرز ويهنا عشان يردفونا بالسياكل شبابنا ... واي صج كان وقت عجيب .. انزين و مسلسل مورك اند مندي اللي يقول نانو نانو ( طبعا اهوه اسمه روبن وليامز بس احنا نسميه ذاك الوقت نانو نانو )
والمسلسل اللي فيه واحد عصل أسمر يقول داينومايت ... ومسلسل دالاس جي أر ... كح كح كح شهالغبار اللي طلع

 

[just-me]

LaLa 2 تذكرين
في قصص الشعوب في قصص الشعوب ... طرائف لا تنتهي ... وعالم حلو بهي ... في قصص الشعوب ..... من كل بقاع الدنيا ... من كل بلاد الأرض ... قصص شتى ... تروى حتى ..... نعرف أحوال الانسان والكل هنا ...مادري شنو

 

[يمّه مني]

لووووووووووووووووووووووووووووووووول

واااااااااااااااااااااااااااي واااااااااااااااااي
من وين طلعتو هالاياام
ياحلووها من ايام

الله يابلاك رووز سالفة المسجله العوده هههههه كل ماكبرت كل ماصرنا كول خخخخخخخخ
زين يذكر عليكم نلبس ساعتين فوق بعض ؟
وساعه سواتش اللي الكبيره سيرها اكو منه ازرق ووردي ؟
وستايل مدونا لانها مطربتي المفضله ليلحين اسمع لها كنت دايمن اقدلها وحافظه كل اغانيها ولا اغنية ترو بلو خخخخخ

زين مايذكر عليكم مسلسل بنكي بروستر ؟ وبيوتي آند ذا بيست ؟؟ وميكي كلب ؟ وفي مسلسل كان يطلع كل يمعه بال8 جنه بس ناسيه اسمه

هم اذكر هبينه بنحن والاطفال يابو السي منكيز اللي اخر شي يوم كبرنا اكتشفنه انه ربيان خخخخخخ

انزين مادري هذي اذا تذكرنوها اتعرفون جواتي الرياضه وانتو ابكرامه كنه انحط خيوط فسفوريه من نايكي بس شنو ماكنه نربطهم عادي لاء كنه انسويهم نفس السله يعني خيوط بالطول بعدين خيوط بالعرض...هذي كنه انسويها لمه انروح الخيران كنه حدددددددددددنا كوول خخخخخخخخخخخخخخخخ

الله ياحلوها من ذكريات

 

[yam_yam]

هههههههههههه

خوش موضوع

 

[fajer-85]

هههههههههههههههههههه

وااااااااااااااااو

موضوع حلو

بس حسافه انا مو كبركم

 

[DBDOB3 DES]

لوووووووووول ياحلاتكم والله انامن مواليدالثمانينات ومراهقتي بالتسعينات
بس دشيت اتطمش يااااااااااحلوكم والله

 

[BlackRose]

تذكرون الهارديز والومبي والهانغري باني

تذكرون احلى طلعة لنا كانت التمشي في السيف وي ومركز سلطان

تذكرون يوم البحار

وكنا ننطر يوم الخميس علشان نروح حديقة الشعب مع الحفلات اللي كانوا يسوونها هناك او سينما الحمرا

تذكرون كنا نشتري ملابس العيد من مجمع النقرة الشمالي اول مافتح

والكول فينا كانت تشتري من مجمع زهرة هذا كان التوب

تذكرون حفلات اليهال اللي كانوا يسوونها بالفنادق اول يوم العيد

والسكيتنغ؟؟؟؟

واحلى ايام كانت ايام الاندية الصيفية

الله كنت اموت على الاندية الصيفية ونشترك بحمام السباحة

تذكرون لمن كنا نروح المدرسة بالباص وتنهاوش على القعدة يم الدريشة

وهم اذا تذكرت شي بقولكم​

 

[just-me]

الغالية نونو وينج؟؟؟ أحس انج من جيلي ...

 

[FOZQ8]

انتي من وين طالعه امبيييييييييييه ذكرتيني بفالكون كريست كل اربعااااا
كنت اموت بالبرنامج الثاني وكانت مادوونا حبيبتي للحين عندي دفتر بصورها
ونادي السينما الل يقدم مصري كل فلم احلى من الثاني وكنت اموت باغنية مقدمة البرنامج اذا تذكروووون
وكنت احب اغاني قديمه طقة أباااا دانسيق كوين وماماميا
وفل كولينز اي شريط ينزله لازم اسمعه
وفي فرقه طلعت كلها شباب حلوين اختفوا بعد ب\فتره اسمها ستيب باي ستيب
انا مراهقتي كانت بالتسعينات بس من عمري 8 سنين وانا اسمع اجنبي واشوف افلامهم بسبت اختي الكبيره
اذكر اختي لما تحجبت ايام التسعينيات الحجااااب شطووووووله للمؤخره اخخخخخ وكل ماطال احسن والنشااا اليابس جدام ويييع
واخر حلقه من جووونقر متنا بجي
تذكرون خلدووون وبسمه ايام الطفوله ؟؟ واااي
ابي ارجع ذيج الايام

 

[just-me]

Black Rose

صج صج صج بدعتي الله يعطيج العافية و الله ذكرتيني بأيام المراهقة و الوناسة والبراءة بعد بعد

:ada:


لايوقف .... لا يوقف .... لا يوقف ....
:ada:

وين الباقين ...؟؟​

 

[مميزة خلقة]

ياحلييييييييييييييييييييييييلكم اثاريكم من جيلي وانا مدري
ذكرتوني بايام قبل ياحلوها ليتها ترد اقسم بالله انها ابرك من عيشتنا الحين
بنات تذكرون بدلت الاسترج البيزو بيزو يسمونها ههههههههه قمت العقاده مدري شلون كنت البس جذي لا وكلها لون واحد اللهم ياكافي لا ورده لا لون ثاني وكنت ما احب الا هي شاريه لون اسود واشكل عليها سديريات (كاااشخه حددددي)
ويطري عليكم المحدد العنابي اللي اي لون تحطين لازم محدد عنابي برتقالي لحمي بني لازم محدد عنابي جنا سيلانيات الحين اللي تلقينها الحمره بصوب والمحدد بصوب لا والمشكله كانو الشباب بلاحقونا هههههههههههههه على شنو لوووووووووولز اكيد عجبهم المحدد ايااااااااااااام يااااحلوهااا
وتذكرون الحجاب الكريب والقذله اللي طالعه وعلى صوب والدبوس واااصل للحنج الحمدالله والشكر للحين كل ما اشوف صوري قبل انقد على نفسي بس كنا بوقتها من قدناااا بالكشخه

 

[ريم الخبر]

انا من مراهقات الثمانينات بس في الرياض
على وقتي ماكان عندنا الا محطتين الاولى والثانيه وكنا
نحسد اللي يروح للدمام والخبر ..اول مانسأله عن التلفزيون ومحطاته هناك خخخ
كنت اموت بالرقص من اول ماادش غرفتي جايه من المدرسه وانا ردح <<< يازين ايام الرشاقه
كل شوي امي تخانقني (سمي بسم الله لايدش فيك جني ) خخخخ...
اما الموضه وماادراك ماالموضه ...الكتوف عريييضه وكل ماكبرت كل ماهو افضل
واي شي يلبسونه في داينستي او دالاس على طول نطبقه ؟؟!!

لي عوده<<< ياويلكم من ريم اذا فتحت فمها ويش يصكه خخخخخخخخ