معاناتي آنا و.. ولد خالتي..

[GueSS.q8]

قـــــــووهــ كويتياتــــ..

فديتكمــ شخباركمــ..

آنا مسجله بالمنتدى من زمااااان وشاركـتــ جم مره بس لوية الجامعهـ والامتحانات >>يعني ماكوو فجهــ
بس الحمدلله تو عطلت قلت آخذ شوركمــ بمشكلتي

آنا أحب ولد خالتي من خمس سنين بيني وبين نفسي
انسان محترم وخلوق وطيبــ ومعاملته لأهله وايد راقيه واسلوبه يجبر اللي جدامه يحبه
قبل كنت اقول يمكن حب يهال ولا مراهقه مثل مايقولون فتميت ساكته وآنا طبعي مااقول اي شي لي احد..

قبل سنه بالضبط خالتي خطبتني حق ولدها " اللي احبه" بس ماما ماوافقت ..
قالتلي ان خالتي كلمتها ورفضت قلتلها ليش قالت شنو ليش
جوفي الفرق
انتي سنه ثالثه جامعه وابوج مو مخلي عليج قاصر كل مناسبه تبين شي يديد ومميز
ولد خالتج "بدوون]>هالكلمه تكسر ظهري واذا كان بدون والله ريال وعن ألف ريال بعد

وتقول معاشه 200 دينار ونص المعاش يدفعه ايجار بيت اهله
مايقدر يلبي طلباتج وانتي اذا احد ردج تبجين
مع الايام .. مرت سنه .. ويت هالسنه
بنفس التاريج بشهر مارس
اتصلت اخته وقالت يا "....." ابي تطرشين ايميلات الدكتور الفلاني حقي بطرشله تقاريري
قلتلها اوك بس انتي ماعندج ايميل قالت اعطيج ايميل اخوي الصغير فجأه واهيا تكلمني سمعت صوت ولد خالتي" اللي احبه" يقول خليها تطرشهم ع ايميلي انا بطرش تقاريرج
وفعلا طرشتله ايميلات الدكتور
فجيت ايميلي بعدين حصلت اضافه منه
مادري ليش استقبلتها وضفته عندي
صار يسلم علي بشكل رسمي وكنت ارد عليه بنفس الاسلوب وقررت اعطيه بلوك لني مااقدر اتحمل
ليما سألته بعدين "...." ممكن سؤال
قال سألي آمريني
تميت ساكته.. قال "...." سأل ليش ساكته قلتله لا ولا شي قال قولي ترى انتي بالذات وايد غاليه عندي
خفت وفرحت بنفس الوقت
قلتله "...." ترى آنا احبك>>لاتعصبون بليييز ولا تقولون ماتستحي انا ابيه بالحلال والله يشهد علي مابي شي غلط

قال وآنا والله احبج وابيج زوجه لي بس يقولون انت وين وايها وين لاتطالع فوق تنكسر رقبتك
قلتله ماهمني اي شي وتم يحس بالنقص حتى ليما يكلمني يردد آنا فقير وع قد حالي مستعده تتحملين معاي الحلوه والمره واقوله اي آنا معاك وبتخرج وبتوظف ان شالله ..
يقول خلي عنج هالتفكير انتي تبين تتوظفين لنفسج مو لي آنا
راضيه بوضعي وقلتله راضيه وليما الحين خالتي كل يوم تتصل وتكلم ماما عشان تقنعها توافق
ماما الحين تقول اذا بوافق لازم شقه ويخليج تسوقين سياره وتكملين دراسه وتشتغلين
قلتلها يقدر ويوافق بس الشقه صعبه اهوا معاشه مو مكفيه
تقول عيل تردين عيال الخير وتاخذين اللي مايقدر يوفر لج ابسط شي
يمكن ماما معاها حق بس ليش هالتفكير المادي
ليش الفلوس كل شي يفكرون فيه؟؟
بنات نصحوني..
قولولي شسوي
ماما تقول هاللي آنا فيه مراهقه وباجر عقب شهر شهرين بمل وبكره الوضع اللي اهما عايشين فيهِِ
وتقول بعد "...." مايعيبه شي والكل يشهد انه ريال واخلاقه عاليه ومحترم
بنات اهوا عمره 25 سنه وشهادته 2 ثانوي..
وآنا تو دخلت العشرين والحين بسنه ثالثه جامعه..

شسوي بنات سامحوني ع الكلام الوايد بس محتاجه نصيحتكم
بلييييز لاتكسرون فيني ..

احبكمــ واللهــ..
فديتكمــ

 

[ام جبولي]

انا اقوولج فكري بعقلج مو بقلبج وهذا مستقبلج وانا مع امج

 

[جميله وجذابه]

حبيبتي امج قاعده تشوف شي انتي مو شايفته

امج اكبر منج و افهم منج و ادرى ابمصلحتج منج و ما في ام ما تتمنى السعاده لبنتها و امج تبيلج السعاده و العيشه الكريمه

و امج صاجه بكل كلمه قالتها و كلامها عين العقل والي انتي فيه كله اوهام المراهقه و اذا تركتي التفكير فيه و تزوجتي بتعرفين معنى الحب الحقيقي بعد الزواج

و الحب مو كل شي يا اختي و الحب ما يأكل عيش و الحياة الحين صعبه و اليوم الي تتزوج شخص شهادته اقل من جامعيه يعني معاشه اقل من 800 دينار حالتها كسيفه و متشحتفه اهي وزوجها فمابالج بواحد معاشه 200 دينار شنو 200 دينار ترى اتطير ابطلعه وحده والايجارات بروحها مو اقل من 300 فكري ابعقلج مو بقلبج فكري اشلون بتعيشين ابهالطريقه بتطرين آخر الشهر تحت المسجد؟!!!!!!!!!!!

 

[الدلوعة أمون]

هلا حبيبتي
بصراحة انا مع امج ...........عمر الحب مايوكل عيش نصيحة اتركي الموضوع للايام
وتوك ملتهفه حقك الحب طيب مافكرتي بعد الحب شنو .........واخراتها
بالتوفيق

 

[الحياة 93]

أهلا كلام ماما صح أنا بالنسبه لي اي شي يكون من غير رضى الأهل الله مايوفق الإنسان ومدام انت ما تطورت العلاقه بينكم تقدرين تستحملين ومع الكبر راح تقولين الحمدلله ان سمعت كلام امي لأن مشكلته موبس بالماده انت فكري بمستقبل أعيالج شلون تعلمينهم وتخلينهم أحسن ناس لاتصيرين أنانيه وباجر يكون كل همومج شلون تعيشين ومن وين توفرين الماده اتمنى لكل البنات اللي مقبلين على الزواج ان يحكون عقلهم وقلبهم وهذا عن تجارب شخصيه والله يوفقج وبرزقك باللي يستاهلج

 

[pure.soul]

صعبة وايد فكري بالبعيدة فكري بعيالج ؟؟ تبينهم يتبهذلون ويعيشون نفس معاناة ابوهم ؟؟راضية انهم يكونون بدون جنسية ؟!
و امج معاها حق تبيلج الاحسن اهما مو حالتهم عادية و امج تقولج تبي غني اهما على قد حالهم و اهيا خايفة على مستقبلج و مستقبل عيالج ..

 

[Qumaar]

حبيبتي أنا مع خواتي الي سبقوني

فكري بعقلج مو بقلبج , هذا زواج

أنتي تقولين بدون يعني ما عنده جنسية !!!

فكري بعيالج بالمستقبل شلون بيكون وضعهم

ووفكري براتبه شلون بتعيشون , وحتى لو تخرجتي واشتغلتي لمتى حبيبتي بتصرفين على مصاريف البيت الي ما تخلص
الزواج قسمة ونصيب .. نصيبج ان شاء الله بييج لا تستعيلين

الله يوفقج

 

[GueSS.q8]

فديتــ كل اللي ردوا علي
نكــ نكــ
ادري كلام ماما صح
بس بنات آنا احبه ومتعلقه فيهــ وايد
واهو بعد يحبني ويموت فيني
ليش نقول ان الحب بينتهي؟؟
ليش نقول ان الحب مجرد فتره بتخلص؟؟
ليش ماتقولون ان آنا واهوا نقدر نبني حياتنا دام نحب بعض ونبي نعيش الحياة اللي نتمناها مع بعض..
ولو كان بدون
في رياييل ممكن يغمرون الزوجه بفلوسهم بس مايحسون فيها ولا يجابلونها
ولا يقدرونها
شنو الفايده
بليــــــــز بنات حسوا فيني
احترم رايكم واقدّر مواقفكم بس بليز ااذا العقل بيلغي القلب عيل ليش الله اعطانا القلب من الاساس
مو عشان نحب.. نحب بقلبنا ونحكم ع الامور ونسيطر عليها بعقلنا
عشان جذي لاتكونون ضدي
ادري تبون تفيدوني بس والله اموت قهر جذي
مااقدر اتخيل انه يتزوج غيري
واهوا بعد يقول مااتخيل احد ياخذج مني
وبعدين اهوا ناوي يغيّر شغله وماما والله تحبه وتموت فيه بس لي كلمتها خالتي عني وعنه ماتتقبل الوضع وتقول حبي له مو يعني ازوجه بنتي ..

 

[a7la MUM]

لاتفكرين بنفسج بس فكري بعيالج شلون بيعيشون!!فكري شلون بتزوجينهم باجر فكري فبناتج منو بياخذهم كا اذا امج نفسها مارظت تبين باجي الناس ترذى فبناتج!
فكري بعقلج صدقيني ممكن الحب ينمحي وينهدم بلحظه صدقيني الحب مو كل شي
وسبحان الله محد كامل

 

[كويتيه مذهله 87]

كبري خطج موقادره اقري عيوني تعورني

 

[زامليه وافتخر]

حبيبتى فكرى الف مره قبل لاتقدمين على اى خطوه
انا معاج انه انتى تحبينه ومو قادره تستغنين عنه بس يمكن علشان انتى حاطته فى بالج ومن جذى متعلقه فيه
فكرى بمستقبلج وعيالج بعدين والله راح تشوفين المعاناة بعينها لادراسه ولا وظايف وراح تشيلن هم من الحين..

استخرى ربج وفكرى

والله يكتب اللى فيه الخير

 

[Miss.6Mo7]

أنآ مع أمج , كلآمهـآ صح ونظرتهــآآ للبعيد ولآ تلومينهـآ على أي شي .. والقلب قلآب يعني مثل مآ قلبج تعلق فيه بيتعلق بـ غيرهـ ونفس الشي ينعكس عليه , ..

إنتي ممكن تقنعين أمج إذآ توفرت هآلحآلآت :
1- إذآ كآن إنسـآن طموح من نآحية الدرآسـة
2- إذآ كآن عنده استعداد للهجرة , يهآجر أي دولة أجنبية ولمآ يستقر يآخذج ويآه
3- والاهم إن يكون عندج استعداد والقدرة إنج تفآرقين أهلج !

لان بآلحآلة هذي ممكن تضمنين مستقبل عيآلج وبنفس الوقت يكون وضعه أحسن من إهني .. وإذآ أهو صج شآريج ويبيج بيسوي كل شي عشآن عيونج ..

وبآلنهآيـة محد يدري وين نصيبــه , والله يكتب اللي فيه الخير له ولج إن شـآءالله ​

 

[الحــور]

اقنعيه يكمل دراسته ويلاقي وظيفه احسن


استخيري اكثر من مررره

اللي فيه خير الله ييبه

 

[شووكولاته]

سالفايده كويتي ومابتفاهمين معاه ؟؟

انا عندي ان زين وانتي بتشتغلين

عادي وبعدين عيالج يعاملون معاملة الكويتي لأن الام كويتيه

انزين مافي أمل يتجنسون ؟؟

 

[عين عذاري @@]

حبيبتي أقول فكري عدل باجر وراج مستقبل وعمر جدامج تبين الوناسه والسفر كله بالفلوس

 

[م.بدوره]

فكري بالموضوع عدل اخذي وقتج وتوج صغيره انتي ترى الموضوع موهين اذا مستعده تتحملين هالوضع الله يوفقج بس لا تيين باجر تقولين خق امج انتي ظلمتيني .. استخيري واجلي الموضوع على ماتخلصين دراستج

 

[GueSS.q8]

[[/size]

أنآ مع أمج , كلآمهـآ صح ونظرتهــآآ للبعيد ولآ تلومينهـآ على أي شي .. والقلب قلآب يعني مثل مآ قلبج تعلق فيه بيتعلق بـ غيرهـ ونفس الشي ينعكس عليه , ..

إنتي ممكن تقنعين أمج إذآ توفرت هآلحآلآت :
1- إذآ كآن إنسـآن طموح من نآحية الدرآسـة
2- إذآ كآن عنده استعداد للهجرة , يهآجر أي دولة أجنبية ولمآ يستقر يآخذج ويآه
3- والاهم إن يكون عندج استعداد والقدرة إنج تفآرقين أهلج !

لان بآلحآلة هذي ممكن تضمنين مستقبل عيآلج وبنفس الوقت يكون وضعه أحسن من إهني .. وإذآ أهو صج شآريج ويبيج بيسوي كل شي عشآن عيونج ..

وبآلنهآيـة محد يدري وين نصيبــه , والله يكتب اللي فيه الخير له ولج إن شـآءالله ​

هلا ياقلبي
صج آنا كلمته وقلتله يكمل دراسته قال الحين صعبه عشان ظروف شغله دوامين صبح وعصر
بس اكيد ان شالله بيدرس آنا قلت يكمل مسائي اسهل ومافيها تعب والتزام
والهجره والله اهوا مفكر فيها ومقرر ان شالله يهاجر وآنا مستعده اتم معاه وين ما كان

بناااات ماما تحبه والله حتى تتمناه حقي لأن اخلاقه وايد تخلي الناس يحبونه
بس اللي مخليها تتردد انه وضعه المادي صعب وهذا الكلام قالته لي بنت خالتي مو امه خالتي الثانيه لأن ماما مكلمتها وماخذه رايها وقالتلها فلان ماكو منه بس الصعب انه بدون وهالشي بيهون اذا حصل وظيفه واهوا مقرر يغير شغله
والله لأنه شاريني قاعد يسوي المستحيل عشاني
وقال بالبدايه بنسكن مع اهله ليما كل الامور تترتب وبعدين بيكون عندي بيتي الخاص>>يعني بيأجر لنا شقه مانشتري بيت اكيد

كل اللي ردوا علي
الله لايحرمني منكم
وابيكم معاااي نصحوني
ترى والله استخرت 4 مرات وكل مره تكون حلوه وزينه
حتى اهوا نفس الحال


اشراااايكم

 

[**روان**]

بالنسبه لرأيي الخاص فيني ، اولا ً الحب شيء و العقل شيء
اذا مصره عليه اهم شيء هالاشياء
يكمل دراسته اولا ً
يتجنس بديره ثانيه
يشتغل بمكان معاه يقدر يلبي طلبات الاسره .
هذا والله اعلم

 

[نور كوليكشن]

وانتي حبيبتي تاخذين وتجيبين عيال بدون تبتلشين فيهم
اهو بروحه مبتلش بنفسه وهالحال ما يخفى على احد
شوفي وضع البدون بالديره
امج كلامها صح
والحب تلقين حب غيره

وصدقيني راح تنسينه

والزواج مو بس حب

الزواج بيت وعيال

 

['Basma']

الحب شي والواقع شي ثاني
امج لو ما تبي مصلحتج جان ما رفضت

تخيلي نفسج الحين متزوجته اوكي.. مع يهال بدون شهادة ميلاد.. لا صحة ولا تعليم ولا شي.. وحتى يمكن كلكم بغرفة وحدة.. هذا غير انج يمكن تنحرمين من احتياجاتج الشخصية البسيطة لان شي طبيعي انتي اللي راح تصرفين على البيت كله.. هل تقدرين تتقبلين هالوضع؟ وبشنو راح يفيدج الحب حزتها؟

والله انا ما اقصد اني اعيب في الريال شي.. بس هذا الواقع.. هذي حياة البدون الله يعينهم ان شاءالله