مراحب كويتيات
تعبانه حيييييييل وودي افضفض
يمكن ماعندكم حل لمشكلتي بس على الاقل راح احس انه في ناس تسمعني
الحالة الاجتماعية: متزوجة
العمر :29 سنة
سنوات الزواج : 9سنوات
عدد الاطفال: ولد عمره 10 شهور وحامل بالشهر الثاني
خريجة تربية وعاطلة عن العمل من 4 سنوات
اكتشفت من اول يوم ارتباط انه جاهل بمعنى الكلمة...وربي انه حتى ماتعلم يفرش اسنانة او يحط عطر او حتى يحلق..اتذكر اشتري له الامواس مايعرف شلون يستخدمها حتى اني قمت احلق له ..عقله صغير جدا مع انه مكمل ثانوي بس شلون مدري..اسمه يادوب يعرف يكتبه
مايعرف باي امور دينية من غسل وطهارة
24 ساعه يطالع سبيس تون
شغلته على قده عامل يشيل الاغراض بالسيارة الصغيرة ماعرف شيسمونها
حريص على فلوسه جدا يعطيني 50 دينار شهريا لكل امور الحياة من مصروف بيت وغدى وعشى وبترول وتلفون وحتى الثياب للعيد وغيره مطلوب مني اوفر منها
مع انه يستلم 400 دينار غير عن علاوة السكن والغلاء واحنا ساكنين ببيت عمي يعني ماورانا كهربا ولا اجار
كلامه يفشل ودوم يحرجني قدام الناس ..واستحي وانزل راسي اذا تكلم حتى اني صرت اعتذر عن اي عزومة او اجتماع عائلي لانهم اول ما يطلع يتطنزون وشنو ماخده والله يعينج والجهال تضحك عليه
ابتعدت عن اهلي واهله وصديقاتي وصرت عايشة بروحي المكان الوحيد اللي اروحه بيت ابوي ..كرهت البيت وكرهت اسوي اي شي فيه ..مواعين ثياب تتكدس بالشهر مايهمني كل اللي يهمني اني انام واطلع اروح بيت ابوي عشان انسى هالحياة
لا اطبخ ولا اسوي شي لانه اصلا ماجلة ماعندنا ناكل اي شي من السوبرماركت
زين اق
في اول شهور زواجنا حاولت اتأقلم بس ماقدرت ..حاولت الانتحار ويوم طلعت من المستشفى طلبت الطلاق وتدخلوا العائلتين وهدأوا الوضع وامي رفضت طلاقي ولليوم ترفضة ومن اتكلم قالت انها مريضة وبفشلها وبنزل راسها قدام الناس وبتسبب في موتها
غير انه عقليته الصغيرة تخليني كل مرة افكر بالطلاق يكسر خاطري وارد ارجع بقراري
صادتنا مشاكل واااااايد لين تمرد وبدأ يمد ايده مثل الاطفال لما تعاندينيهم يضرب يضرب واخر شي يجي يعتذر ويصيح واسامح
شفت خيانته بعيوني طلع يعرف وحده فلبينيه ويكلمها لين طحت على صور له وهو بدون شي مطرشنهم لها بالتلفون
قامت القيامة ورحت المحكمة وطلبت الطلاق وطلقني بنفس اليوم بدون حتى مايتكلم للقاضي
تميت فترة في بيت ابويي وحطيتهم امام الامر الواقع ولا حتى فتحت السبب اللي خلاني اطلب الطلاق هالمرة
ضغطت علي امي بمشاكلها وكل يوم تطيح وكل يوم تقول مرضتها ورجعت له قبل ماتكمل العده بعد ما ابوه قال انه فاتحه بالموضوع وهو نادم وهو مايدري شلون سوه جدي
صبرت كل السنوات وحتى بدون اطفال والكل يدعي لي اجيب طفل وانا داخلي اتمنى مايصير لين حملت ب2009 وقلت يمكن الله عطاني هالطفل عشان يشغل حياتي وخبرته بالموضوع ماحرك ساكن عقبها بشهر اكتشف من جديد انه رجع للفلبينينه وانه يكلمها ماقدرت اتحمل وهني صارحت الكل وقلت لهم انه يخوني
طبعا الكل كان يفكر في البيبي شلون ينولد وابوه بعيد ومن هالاشياء اللي ضيعتني وضيعت ولدي وياي الكل كان يقول سامحي واغفري وجابو لي امثلة من الحياة وفلانه خانها وفلانه صار لها وسامحت
عطاني 90 دينار وقال لي روحي العمره رحت اربع ايام مع خواتي عشان اغير نفستيي واشكي لربي ورجعت ما بقول نسيت بس الله مسح على قلبي
اتذكر يوم ولدت يقولون له اذن في اذون ولدك يقول ماعرف بتصل لابوي يجي يأذن بأذونه..تصوروا لهالدرجة مسلم وعمره 35 سنة يقولو ماعرف الاذان
استمرت علاقتنا مثل ماهي تقشف يوم نتعدى ويم لا يوم عندنا ناكل واحيانا لا تمر المناسبابت واقعد احاتي شنو البس ولدي وشلون؟؟تارك المسؤلية كلها علي لانه اصلا مو قادر يتحمل مسؤلية روحه
لين بنص رمضان حللت وطلعت حامل للأسف..حسيت الدنيا تفتر فيني ومن يومها ونفسيتي زفت كل ساعه اقول شلون بعيش وشنو راح اسوي مع طفلين..
الاخ يوم قلت له ما اهتم ولا بين لافرح ولاحزن هو شنو راه لا راح يربي ولا راح يصرف شي من جيبه
اخر يوم برمضان صادني اغماء والم بالمعده قعدته يوديني المستشفى مارضى رحت بروحي وعشان سيارته ورى سيارتي طلعت فيها وبالطريق شفت تلفون بخط ثاني وعليه باسوورد ولاني اعرف انه عقله صغير فاول تخمين لرقم الباسوورد طلع صح
فيه رقمين التلفون بس وصور اباحية تستهوي المراهقين اتصلت على الرقم محد رد
وصلت المستشفى وركبوا علي سيلان بس ماقدرت اصبر شلته وطلعت ورجعت البيت رايوته التلفون وقلت له شنو هذا
قال خط وانا راح اتزوج خلاص وابغي ارتاح ...
شنو صدمة؟؟؟ شنو موت شنو قهر؟؟؟
صحت بدال الدموع دم
الحين بعد كل هذا انا اللي مو عاجبتنك وكل يوم تدور غيري؟؟
ما انكر اني عصبية. مع اني قبل الزواج ماعمري عصبت بيوم ..بس الضغوط اللي سببها لي خلتني اعصب واقول كل شي بس ابيه يحس وللأسف مايحس الا اذا طلعت كل اللي بخاطري واخرتها يمد يده
ماتكلمت لاحد وقلت خله اللي بيسويه يسويه تصوروا يوميا يدخل البيت ويحرني يقول بتزوج خلاص يقولها لي مثل الاطفال يعني بيحرني قلت له اتركني اربي اولادي وانت بكيفك قال بجيبها البيت هني وانتي كيفش تبين تتطلقين من روحي المحكمة وتنازلي عن الولد وانا بطلقش من اليوم
قلت لاختي الكبيرة وانفتح الموضوع بالبيت..وللأسف امي قالت لي اذا بتتطلقين روحي اشتغلي وافتحي لج شقة لاتجين عندي البيت ..ابوي متوفي من زمان فامي هي صاحبة البيت حاليا
طلعت من بيت امي وكلي انكسار..اقول الله يا الدنيا لا الزوج يبيني ولا اهلي يبغوني ..وطبعا من يومها الحين 12 يوم لاحد سأل عني من خواتي واخواني وهذا كل يوم يحرني ويقول لي روحي اطلبي الطلاق
مصدوووووومة من العالم...انا ماغلطت بشي وحاولت اتعايش قد ما اقدر بس ليش الزمن ضدي
تعبانه تعبانه تعبانه...... ادري مافي حل الا الصبر ..وانا صابره ولله الحمد
في اخطاء واجد بالكتابة بس لاني اكتب واصيح ما ركزت سامحوني
