(( مذكرات مريم .. مذكرات في طي النسيان ))

[so_what]

waiting

 

[MaFaZ]

مشكورين خواتي ما قصرتوا نورتواالقصة

وسامحوني عالتأخير بس المنتدى كله ايرور احاول كثر ما اقدر اشبك كل وقت وكله ايرور

ان شاء الله الحين بنزل بارت


واي اخت fe6amos صح كلامج تخربطت السموحة

 

[MaFaZ]

مرت الايام على وليد ومريم مثل الحلم عليهم .. يطلعون ويستانسون .. كانت وناسة وليد الوحيدة ان يشوف مريم ويحط عينه بعينها .. واهي وناستها علاقتها اليديدة .. مع ريلها اللي بدت يوم عن يوم تفسر دقات قلبها لما تشوفه .. كانت الامور تمشي مية مية معاهم .. بالرغم من ان ام غانم كانت نسرة مع جنتها اليديدة .. لكن طيبة سهيلة وسارة مرت بدر .. تطغي على الوضع المليق اللي كان يصير .. مرت غانم كانت مسافرة علاج مع امها وبترد بعد جم يوم .. مرت غانم نسرة وشخصيتها قوية ومتسلطة جدا جدا جدا لدرجة ان ام غانم تطلع جدامها تلميذة ..

تاريخ : 15-6-2005
الوقت : 7:20 العشا
المكان : بيت ام غانم

نوال : السلام عليكم
ام غانم : هلا بنيتي الحمدلله عالسلامة
نوال: يسلمج خالتي شلونج شخبارج وشلون البنات ..
ام غانم : بخير الحمدلله.. انتي شلونج ؟؟ شلونكم مع السفر عسى ما تعبتوا ؟؟
نوال : اي اكيد تعب مثل ما انتي عارفة يا خالتي هذي امريكا .. يعني اكثر من نص يوم سفر امي وايد تعبت بس بعد شنسوي
ام غانم : لا سلامتها ما تشوف شر
نوال :ا لشر ما اييج .. ومبروكين على وليد خالتي .. بس شدعوة ما نطرتوني ايي انا مرت اخوه العود وكنت لازم اكون موجودة .. ولا انتو ما صدقتوا اسافر ركضتوا ملجتو له
ام غانم : لا وي شالكلام يا نوال انتي تدرين ان معزتج عندي من معزة ولدي بس شنسوي ابوه اصر .. ومساعد استعجل بالملجة
نوال : ليش طايحة بجبدهم اللي اخوها يستعيل ؟؟
ام غانم : (( سكتت ))
نوال : عالعموم الله يهنيه (( لاويه بوزها )) وين بيسكنون ؟؟
ام غانم : بداره .. ومادري عنهم بعد
نوال : بتسوون عرس ؟؟
ام غانم : اي .. اهما يبون عاد قلت لهم اذا انتو تبون انتو سوو احنا ما نبي
نوال : وين بيسوونه ؟؟ لا يكون بيسوونه بصالة اي شي .. مثل ما انتي عارفة خالتي احنا معارفنا مو اي ناس
ام غانم : مادري عنهم ..


التاريخ : 16-6-2005
الوقت : 9:44 بالليل
المكان : جدام بيت ام راشد

مريم: كانت خووووش طلعة .. مشكور
وليد : حبيبتي انتي تستاهلين
مريم: ولييييييييد ؟؟
وليد : شنو ؟؟ شفيج
مريم: استحي لا تقول جذي
وليد: انتي مو بس حبيبتي .. انتي حياتي وعمري (( مسك ايدها ))
مريم: (( تلت ايدها ))
وليد: مريم .. مو كافي حارمتني من ايدج هم بتحرميني من اني اقولج حبيبتي .. اصلا انتي فجيتي عقدة لساني
مريم: اوكي خل انزل
وليد: (( مسك ايدها حيل .. وطالعها )) مريم
مريم: (( جسمها قام يرجف وقلبها يدق حيل وحست انها قاعده تذوب مثل الايسكريم )) نعم .. واي وليد لا تطالعني جذي والله ارتبك
وليد : ابيج
مريم: ((نزلت راسها )) وليييييد
وليد: مريم انتي مرتي ؟؟ شفيج ؟؟ وبصراحة خلاص احس قلبي ما يتحمل اكثر .. يعني بهالاسبوعين حسيت اني بالجنة كملي معروفج معاي وخليني استقر فيها .. خلاص مانبي عرس .. تعالي عندي .. انتي حلالي ولي حق اي وقت اخذج
مريم: وليد انته شنو قاعد تقول انا ما خلصت جهازي وبعدين احنا بعدنا تونا اسبوعين
وليد : اي اسبوعين .. بس ماني قادر اقعد معاج .. كل ما ايي بيتكم اهلج قاعدين وبصراحة استحي اقولج خل نقعد بروحنا ونطلع يا مطعم يا سينما واحنا اللي رادين عشان وراي دوام ولا مساعد يدقدق وينج ما وينج ما يصير انا ريلج وانتي على ذمتي الحين
مريم: يعني شسوي ..
وليد : اقولج حطي اغراضج بجنطة وتعالي معاي غرفتي
مريم: ((دمعت عينها ))
وليد: لا حبيبتي انتي لا تبجين الله يخليج انا شنو قلت ؟؟ زعلتي عشان ابيج ؟؟
مريم: ((ساكتة وعيونها تدمع))
وليد ( يرفع راسها )) لا تبجين خلاص .. يبا انا اسف زين خلاص انا مابيج
مريم: ((قامت تبجي ))
وليد: اخيه اخيه لا لا لا تبجين والله ابيج واحبج وصابر يا يبه اصبر خلاص مابيج تييني الحين لما تخلصين ووقت ما تبين لا هالعيون الحلوة لا تبجي يا يبه شفيج (( يطلع لها كلينكس ويمسح عيونها )) واي لا تطالعيني ونتي تبجين ما اتحمل
مريم: يالله مع السلامة
وليد: بتخليني ؟؟ خلج شوي بعد ما شبعت
مريم: تنزل ؟؟
وليد: اقعد بدارج ؟؟
مريم: (( بققت عيونها وبغت تدمع عينها مرة ثانية ))
وليد: ههههههههههههههههه اتغشمر يا يبه اتغشمر مع ان ودي لا لا لا اتغشمر
مريم: ههههههههه
وليد: اي جذي ضحكي وخلي دنيتي وردية ..
مريم: ان شاء الله
وليد: مريومة .. عمتي حجزت الصالة ؟
مريم: خالتي اللي حجزت
وليد: صج اي خالة
مريم: خالتي ام اسامة
وليد: حلو اي صالة ؟؟
مريم: ممممم مادري جني سمعتهم يقولون هيا مشاري الزبن جنه
وليد: مممممممممممممم
مريم: ليش ؟؟
وليد: مادري خواتي يسالون
مريم: اي مادري انا قلت بقولهم بس خل اتأكد لا تقولهم خل اتأكد
وليد: اوكي





التاريخ : 17-6-2005
الوقت : 3:40 العصر
المكان : بيت ام راشد

ام راشد : انوار .. وين فاطمة ..؟
انوار: تتسبح
ام راشد: وين مريم؟
انوار: مريمووووووووووووو مريمووووووووووووو امي تبيج
مريم: هلا يمه (( ماسكة توستة فيها جبن ))
ام راشد: اليوم بتطلعين مع وليد؟؟
مريم: مادري يمه ليش امري ؟؟
ام راشد: يمه ما خلصنا شغلج ورانا سوالف وايد .. ما تبين تروحين السوق ؟؟
مريم: اي عادي مو مشكلة اليوم نروح ؟؟
ام راشد : اي خل نروح عللى الاقل نخلص لنا جم شغيلة
مريم: ان شاء الله
انوار: بروح وياكم ؟؟ يمه الله يخليج
ام راشد: شتسوين تيين ويانا ؟؟ انثبري
انوار: يمه الله يخليج .. بعدين احنا م وورانا عرس ؟؟ ما شريت شي على الاقل اروح اشوف
مريم: اي يمه خل ايون معانا البنات عشان يلحقون يخلصون شغلهم
ام راشد : والله مادري عنكم .. خل ادق على خالتج ام اسامة

ام راشد تتصل
ام راشد : الو
ام اسامة : الو
ام راشد : السلام عليكم ..
ام اسامة : هلا اختي شلونج ؟؟
ام راشد : بخير يطول بعمرج انتي شلونج ؟؟ شلون الصبيان ؟؟ شلون بو اسامة
ام اسامة : بخير يا قلبي .. شلون رشود ؟؟ وشلون البنات ؟؟
ام راشد : يسلمون عليج .. اقولج ام اسامة وينج ؟؟
ام اسامة : والله عند امي .. سيرت عليها بدل ما هي قاعدة بريحاتها
ام راشد: ليش وين ابوي ؟؟
ام اسامة : طالع رايح ديوانية المنطقة
ام رشد: ايييييييي
ام اسامة : امري شبغيتي انا بو نص ساعة وبطلع من عندها رادة البيت
ام راشد : لا سلامتج اختي بس كنت بودي مريومة السوق اهي والبنات قلت تيين معانا تدرين فيني ماعرف بهالسوقة ولا المحلات .. وبصراحة بغيت اجهز مريوم تجهيز سنع عاد قلت مالي الا خواتي
ام اسامة : ماطلبتي شي يا ام رشود انتو بدلوا وانا كاني ساعة الا ربع بالكثير وعندكم بس على ما اروح البيت اغير عباتي واقط عيال اسامة يايبتهم وياي يزورون
ام راشد : يالله على خير مع السلامة وسلمي على امي
ام اسامة : يسلمج مع السلامة



مريم: ها يمه خالتي بتيي معانا ؟؟
ام راشد : اي قومي دقي على ريلج استأذني ونتي انوارو قومي فزي بدلي لا تأخرينا نفس كل مرة وقولو حق فطوم بطريجكم يالله قوموا اهو


مريم تتصل من موبايلها واهي قاعده تصعد الدري
مريم: الو
وليد : هلا والله
مريم: ((تبتسم )) هلا فيك شلونك ؟؟
وليد: بخير الحمدلله انتي شلونج ؟؟
مريم: تمام .. اقولك .. اليوم ما راح اقدر اطلع وياك
وليد: لييييييييييش ؟؟؟؟؟؟؟؟؟؟؟؟؟؟؟؟؟؟؟؟؟؟
مريم: بروح ويا امي وخواتي وخالتي السوق .. لازم اجهز
وليد: واي مريمو وتحرميني من شوفتج ؟؟ حرام عليج ترا انتي وايد ظالمتني وتعذبيني
مريم (( تضحك )) ههههههههههههه امبيه وليد حرام عليك والله ما سويت شي بس لازم ابدي اجهز
وليد: لا مالي شغل ماكو روحة انتي حقي بروحي فهمتي .. حارمتني امسك ايدج قلنا اوكي هالمرة ماشوفج
مريم: ولييييييييييييييد ؟؟
وليد: لا ماكو
مريم: بليييييييييييييييييز
وليد: انسي
مريم: وليييدان
وليد: شنو ؟؟ شقلتي ؟؟
مريم: ولييييييييييييد
وليد: لا قولي شقلتي
مرريم: ((مستحية )) وليدان
وليد: شنو ؟
مريم: امبيه سوري مادري انك ما ترضى
وليد: اقولج قولي شقلتي
مريم: وليدان
وليد: واي يا ناس يا عالم هالبنية بتذبحني .. مريمووووووووووووو لا تيننيني انا مو حمل دلع
مريم: والله ما تدلعت لا وليد لا تبدي ترا والله استحي حرام عليك
وليد:شوفي عشان وليدان بخليج تروحين اوكي
مريم: اويك مشكور مشكور
وليد: حبيبتي انتي واوص لا تقولين لا تقول لانج حبيبتي يا ناس والله حبيبتي
مريم: ((ساكتة))
وليد : انزين اي سوق بتروحين ؟
مريم: مادري امي ما قالت .. خالتي ام اسامة بتودينا
وليد: اها اوكي انزين ليه وصلتي دزيلي مسج وقوليلي اي سوق اوكي ؟؟
مريم: ان شاء الله
وليد: حبيبتي ديري بالج على نفسج .. وسلمي على عمتي
مريم: يوصل ان شاء الله مع السلامة
وليد: مع السلامة (( باس التلفون ))



بدت مريم شوية شوية تجهز حق عرسها وكان موعده بعد فترة قصيرة .. والكل بدا معاها يتشرى ويحجز صالون .. وعشان الفترة ما كانت طويلة خالاتها ساعدوا امها .. وكل مجموعة كانت تسوي شغلة .ز بدرية وخالتها ام علي بدوا يشترون لها الكفرات واكسسوارت الغرفة والحمام .. وامها وخالتها ام اسامة ومريم وفاطمة كانوا يتشرون الملابس والعبي والدراريع .. واحيانا بدرية كانت تاخذ مريم وتوديها تشتري لها قمصان النوم والملابس الداخلية وملابس البيت .. واحيانا اهي وخالتها ام علي وبنت خالتها منار يروحون يتشرون المكياج والعطورات .. وجذي شوي شوي بدت مريم تقرب تخلص تجهيزها ..
الكل كان يحاول ينقي حق مريم احلى الاشياء واكشخها .. وخاصة خالاتها وامها لنهم كانوا يبونها تطلع باحلى شكل جدام حمولتها اللي مو شايفين خير نوعا ما ويدققون على اشياء اهم مالهم شغل فيها .. ويتناسون ان الانسان مو بلبسه او من وين شاري هالملابس او هالمكياج .. لا الانسان باخلاقه واسلوبه وطريقة تعامله .. ونظافة قلبه يعني شفايدة الماركات والانسان اللي لابسها حقود ولعين .. او خبيث واخلاقه سيئة ؟؟

وليد كان مستانس بمريم .. بالرغم من اشتياقه لها .. طلعاتهم بدت تقل .. وتمت مريم مانعته انها يمسكها .. لأنها كانت خايفة وهالشغلة توترها .. وبطلب منها راعى وليد مشاعرها وماحب يضغط عليها .. من كثر ما كان يحبها كان يبيها تتفاعل معاه برغبتها وبارادتها ماكن يبي يغصبها عشان لا يخوفها .. ويا حرام على وليد شوقه كان يكفي ديرة بحالها .. بس الحلو بالموضوع ان كان يمني نفسه ويتصبر بحلم بالعرس ..


وبهالوقت .. كانو بيت ام غانم يتجهزون حق هالمناسبة .. مرت غانم خابة عمرها على بو انها مرت الولد العود .. راحت مشغل و صممت لها نفنوف خبة بطريقة مالها داعي وكانت قيمته خيالية .. وحجزت بصالون فندق الشيراتون .. كانت نوال في صراع مع نفسها تبي تطلع احلى وحدة .. تبي تكون المميزة عن الكل .. الكل يطالعها اهي .. لآن اهي وظفت نفسها انها تكون من المهنئين عالباب .. مادري منو قالها ان الناس بتخلي العروس وبتطالعها اهي ؟؟؟

اما سارة .. كان ستايلها ناعم وراقي بنفس الوقت .. بنية شايفة خير بكل شي حتى بستايلها .. شرت لها نفنوف سواريه راقي وناعم وبسيط بموديله من مجمع زهرة ... وحجزت لها مكياج وشعر بصالون بربل ديزاين

اما سهيلة وتهاني وفرح شرو لهم نفانيف جاهزة من مجمع المهلب
وكلهم حجزوا مكياج وشعر بصالون حنان دشتي

ووليد كان مشغول بدوره .. كان يراكض على غرفة النوم .. والقياسات وشنو ناقصها من سيراميك وصبغ .. وستارة .. وثلاجة صغيرة .. وغير التلفزيون .. وحط تلفزيون بلازما كبير ... وشراله غنفة صغيرة حق الغرفة وشوية اضافات حق عروسته ..

لما قرر وليد ان يتزوج .. ولما ابوه عرض عليه فكرة الزواج ببنت عمه .. وافق وليد لمجرد الفكرة وكان الوضع اوكي وعادي بالنسبة له .. ما كان يدري ان راح يحب مريم للهالدرجة .. فلما اقترحوا عليه ان يسكن بداره كان كل شي اوكي .. بس بعدين لما عاشر مريم وعرفها .. تمنى ان يطلع من بيت اهله ويستقر بروحه في بيت يجمعه بمريم بروحهم ومحد غيرهم .. محد يتدخل فيه وفيها .. يتحركون على راحتهم وعندهم مساحة اكبر وحرية اكبر .. فقرربينه وبين نفسه ان قعدته في الغرفة مؤقتة .. وان لازم يطلع في الفترة الياية

 

[Danya =)]

البارت رووووووعة
تسلميين حيااتي
يعطيج العااافيه
ناطريين

 

[MaFaZ]

الايام تمشي وتمر يوم بعد يوم والكل مشغول باليوم المعهود .. ومريم تزور بيت اهل ريلها كل يمعه مع وليد .. لكنها ما تسلم من نغزات ام وليد وتهاني .. واللي زاد الطين بلة ان نوال ردت من السفر يعني الشغط صار دبل على مريم لكنها ما كانت فاهمة او مستوعبة الوضع .. وتمت سهيلة تخفف عن مريم اللي يصير ..

التاريخ 30-6 -2005
الوقت : 4:10 العصر
المكان : بيت ام غانم وبالصالة تحديدا

وليد: يالله مريم مشينا
مريم: يالله اوكي
ام غانم: ها وين رايحين ؟؟
وليد: عندنا شغل تبين شي يمه
ام غانم : لا مابي بس انت مادري شفيك .. من ملجت ماندري عنك .. انحرمنا منك مانشوفك ولا اخوانك يشوفونك
سهيلة : يمه وليد من عمر مانشوفه بالزوارة .. لازم يخلصون شغلهم
وليد: على قولتج سهيلة .. يمه انا من عمر ماحب اقعد بالزوارة تبيني الحين وانا مشغول
ام غانم (( عافسة النونة)) ايييييييييييييه على راحتك محد يغصب احد على اهله
مريم مرتبكة ومنحرجة من هالحوار
نوال : (( على غشمرة بس بخباثة وحقارة )) ها مريم من الحين خذيتي وليد منا ؟؟؟ ترا وليدان حبيب خالتي وتم عندها فترة طويلة من غير شريكة
سارة : شدعوة نوال خو مريومة مرت وليد وخالتي امه وان شاء الله محد ياخذ احد من احد .. لا تحاتين خالتي
ام غانم:اييييييييييي انتي ادرى
وليد:يالله مريم
مريم: مع السلامة خالتي ..مع السلامة



خافت مريم هالمرة .. كل مرة تتحرش ام غانم لمريم كانت تطوف وتقول عادي وصج ما تهتم بس هالمرة لا .. لانها حست بغيرة ام غانم منها .. ياربي شتسوي ؟.؟؟؟؟ شلون تخلي ام غانم تحبها وتفكها من هالضغط

وليد:وين حابة تروحين ؟؟
مريم :مادري .. احنا مو طالعين نخلص شغل
وليد: لا من صجج انتي ؟؟ اليوم اخر يوم اشوفج وتبيني اضيعه عشان نخلص شغل ؟؟ لا خل نطلع نستانس
مريم: اوكي على راحتك
وليد: شفيج مريومة مو على بعضج ؟؟
مريم: لا ماكو شي
وليد: قولي شفيج احد ضايقج داخل ؟؟ البنات ؟؟ فروس ؟؟ احد ضايقج من اليهال ؟؟
مريم: لا ماكو شي
وليد: قولي لا تخشين عني .. من الحين بتخشين علي .ز قولي مريومة لان اذا شي جايد اعرف شلون اتصرف قولي
مريم: لا ماكو شي ..
وليد: اقولج قولي
مريم: لا بس
وليد: شنو ؟؟؟؟؟؟؟؟؟؟؟؟؟ قولي مريومة شفيج
مريم: (( سكتت))
وليد: حبيبتي مريم
مريم: اوكي .. انا بس بغيت اسأل ليش نوال تقولك وليدان
وليد: اهي مرت اخوي من عمر .. يعني اهي دخلت علينا كان عمري 16 سنة .. فاهي ماخذة علينا ومطيحة الميانة تغارين ؟؟ فديت حبيبتي تغار
مريم: (( ساكتة))
وليد: شفيج يا قلبي لا تزعلين .. خلاص ما تقوللي بعد
مريم: ((ساكتة))
وليد:مريم شفيج ؟؟
مريم: مافيني شي ردني البيت وليد انا تعبانة من الزوارة مافيني شدة اطلع
وليد: مريم انتي من صجج ؟؟ عرسنا بعد اسبوع ونتي زعلانة علي عشان مرت اخوي قالتلي وليدان ؟؟
مريم: (( طالعت وليد )) بليز وليد .. ردني البيت
وليد ما قاوم نظرتها ..شتبيني اقولج يعني
مريم: ابيك توديني البيت وتقوللي مع السلامة
وليد: اوكي على راحتج


وليد قط مريم البيت وكل واحد زعلان من الثاني اهي زعلانة من سالفة نوال معاه وردة فعله .. واهو زعلان ان زعل حبيبته مريومة وما كمل اليوم معاها

ترقبوا البارت الياي بارت العرس

 

[عالمي مدهش]

بليييييييييييييز كملي

 

[MISS ZOZO]

كمليييييييي قلبوووووووووو


الله يستر من ام غانم

 

[MaFaZ]

اي والله ام غانم نسرة وجنتها نوال انسر الله يعين مريم على هالاشكال ويعينا احنا لآنهم موجودين بكثرة بالواقع

يالله ان شاء الله الحين انزل بارت ومشكورين عالمتابعة

 

[MaFaZ]

لاول مرة مريم ووليد يتهاوشون ويتناشبون او يطيحون بنفس هالموقف .. لان علاقة وليد بمريم ما تتعدى الطلعات البسيطة اللي كانوا يطلعونها او قعداته في بيتهم بينها وبين اهلها ..
عشان جذي لحد الحين ما تعرفوا على بعض عدل .. وما عرفوا اطباع بعض .. وقدروا انهم يتشربون بعض
وهذا شي غلط لأنهم راح يعيشون باجر مع بعض واهما لحد الحين ما تعرفوا على بعض عدل .. مريم بنية عمرها 18 سنة وماعندها خبرة بالحياة مثل البنات اللي بعمرها وبنات هالايام ما شاء الله عليهم خبرة بالعلاقات العاطفية .. كانت حافظة نفسها من اي اذى نفسي وماتبي تطيح في تجربة تتعرض فيها للاستنزاف العاطفي .. كانت خاشة كل احاسيسها وعاطفتها حق زوج المستقبل .. اللي بنطرها اهو الوحيد اللي يستحق منها الحب
والعاطفة والشوق .. وبنظر مريم ان نوال تقول حق وليد وليدان مثل صدمة .. شنو هالجراة اللي فيها شلون تجرأت وقالت حق حماها وليدان ؟؟ شلون تدلع حماها ؟؟ عيب ..
واكبر عيب بنظر مريم .. مريم تربت في بيئة محافظة نظيفة مافيها اي تجاوزات شلون هذي تيي تقول حق ريلي وليدان وحتى لو كان حماها ؟؟

وليد وايد زعل ان مريم شالت بخاطرها بس اهو مثل ما ذكرت من قبل ما تعرف على مريم عدل وماعرف شنو اطباعها وشنو نوعية البيئة اللي عاشت فيها .. يعني اهو يعرف ان عمه الله يرحمه حجر وماعنده طلعات وروحات واختلاط بس ما توقع ان هالامور اللي مو بالعين بتأثر في مريم حبيبته
حاول وليد يبرر حق نفسه وحق نوال ما قدر كل اللي كان يهمه ان مريم ما تزعل .. وخاصة ان اسبوع كامل ما راح يشوفها شلون راح يصبر كل هالوقت واهي زعلانة
ظل يفكر واهو محتار لدرجة ان رد بيتهم واهو مطنقر وما كلم احد .. حتى ان نفس على نوال وكان وحده يقولها لا تتميليحين جدام مرتي


مريم: يمه انا وبدرية بنروح الصالون ..اوكي
ام راشد : اي اوكي مو مشكلة عندج فلوس ولا اطلع لج
مريم: لا يمه عندي وبعدين انا حاجزة ويوم حجزت دفعت لهم عربون
ام راشد: شنو بتسوين اليوم ؟
مريم: حمام مغربي وخلطات .. ومساج حق راسي ومممممم نسيت بعد شنو والله يمه
ام راشد: شفيج .. احسج مو على بعضج ؟؟
مريم: مافيني شي يمه ليش ؟
ام راشد : مادري بس مو انتي مريومة اللي خبري فيج ويهج ذبلان
فاطمة : انا ييييييييييييت قاعدين تحشون بمنو يا حلوين ؟
مريم: فيج امي تقول لازم تتزوجين
فاطمة : صج يمه واخيرا راح تزوجيني وتطلقين سراحي
ام راشد: هاو ؟؟ يعني الحين انا اللي رادة نصيبج ؟؟ صج تبين تتزوجين ؟؟؟ من باجر الله وكيلج وافتك من همكم
فاطمة : اولله اولله يمه شدعوة حرام عليج انا مسويتلج هم ؟؟ هذا وانا قاعدة مع يدي ويدتي حتى لقمتي مفتكين منها
مريم: وشدعوة كل يوم غداج خروف
فاطمة : اي والله بعدين انا حلفت ما اتزوج قبل رشود انا وياه بيوم واحد
مريم: ههههههههه وايد مصدقة سالفة انكم توائم
ام راشد : قومي روحي لا تتأخرين عالصالون
مريم: بعدها ما يت بدرية
((قامت ام راشد راحت المطبخ ))
فاطمة : شفيج ؟؟

مريم:مافيني
فاطمة : علينا ؟؟؟؟؟؟؟؟؟؟؟؟؟؟؟؟؟؟؟؟؟؟؟ قولي قولي مشتاقة وليد
مريم: مادري
فاطمة : حسرتي بليز لا تقلبينها فيلم هندي شفيج صاير شي ؟؟ مرت عمي ملعوزتج ؟؟ وليد غاثج ؟؟
مريم: لا ماكو شي
فاطمة : عيل شفيج ويهج تعبان
مريم: خايفة فطوم
فاطمة : من ؟
مريم: من اللي ياي .. مرت غانم شكلها مو هينة تخيلي كل ما اسوي شي تعلق احس جنه احد مراقبني
فاطمة : اهي من ناحية مو هينة مو هينة بس انتي حقريها والله يعينج بصراحة ومادري شقولج بعد لآني ما تزوجت من قبل خل بدرو تقولج شتسوين
انا حدي حدي انصحج بالكيميا ولا الفيزيا ..
مريم: على قولتج بس ماني قايلة حق بدرو ونتي لا تقولين حق احد شي
فاطمة : اي صح لا تطلعين سوالفج برة ههههههههههه كلمة خالتي ام علي كله اسمعها تنصح الاوادم
مريم: على طاري خالتي ام علي .. جنج وايد متعلقة فيها
فاطمة : امبيه خالتي ام علي حبيبتي احبها احبها واحب عيالها
مريم: فطوم ليش ما تاخذين عامر
فاطمة(( ارتبكت)) اخذه ؟؟ اهو كان يبيج انتي اخذه انا ؟؟ وشلون اخذه اروح اقوله تعالي اخذني
مريم: واي جان زين تاخذينه عامر وايد خوووووش ريال وكافي ان امه خالتي ام علي واهي صج وايد تحبج فطوم وتحبنا
فاطمة : اي اقول دقي على اختج لا تتاخرين
مريم: اوكي ضيعي الموضوع بس اللي له نصيب بياخذه
فاطمة : على طاري النصيب مريمو ما حقدتي على انوارو لآن مساعد جكها وتالي انتي اللي تزوجتي ؟؟
مريم: ممممممممممم ما اقدر اقول حاقدة عليها اهي اختي شلون احقد على اختي بس زعلت وايد والحين عادي لأن وليد الحمدلله طلع زين معاي ومعاكم
فاطمة : اييي يصير خير ان شاء الله




************************************
التاريخ 7-7-2005
الوقت : 12:00 الظهر
المكان : بيت ام راشد

ام راشد : بناااااااااااااااااااااااااااات يالله خلصوني تأخرنا
انوار: لحظة يمه كوماري قاعده تكوي ملفعي
فاطمة : اي يمه نطري الله يهداج تو الناس
ام راشد : تو الناس ها ؟؟ امشي واخليكم ؟؟؟؟؟؟؟؟؟؟ احنا لازم نخلص من الصالون مبجر عشان نروح الصالة ؟؟
انوار: اي امبيه مو جنه مبجر ؟
ام راشد: انا رايحة .. خلصوني انا بالسيارة انطركم هديتو حيلي
انوار: هههههههههههههه امي حدها متوترة
فاطمة : حدها
انوار: واي الفال لي يوم عرسي ان شاء الله .. يارب يخطبوني اليوم يارب
فاطمة : فاضية .. كوماري خلصتي ؟؟
كوماري : سوية ماما فاتمة
فاطمة : اذا خلصتي اخذي النفانيف للسيارة
راشد: (( يدخل الصالة )) ها حجيات ما رحتو امي برة تنطركم بالسيارة
فاطمة : اي كانا بنودي نفانيفنا ويانا
راشد: يعني ما بتردون ؟؟
انوار: لا ما بنرد
راشد: شنو الغدا ؟؟
فاطمة : ماكو غدا اطلب لك وجبة فاضي رشود ؟؟ منو بيطبخ بهاليوم ؟؟
راشد: وليه ماعندي فلوس
فاطمة : روح دار انوارو بتلاقي جنطتي سودة وعليها ويه اصفر داخلها بوكي اخذ اللي تبيه
انوار: حدج كريمة ويا هالويه اقولج ابي دينار ونص سلف تقولين ما عندي
فاطمة : اي والله ما كان عندي اليوم الصبح ماجد مر ياخذ الفواتير من امي عطاني عشرين
انوار: مصيبة وليش ما يعطيني
فاطمة : لانج خامدة
راشد: انزين فطوم اي شي تبون دقي علي ترا انا ماعندي شي مساعد وماجد ما يبون مني شي والساعة سبع بس بروح الصالة قبلها اي شي تبون دقي
فاطمة : اوكي .. كوماري وين ؟؟ خلصتي ؟
كوماري :يالله انا يودي الحين
فاطمة : باي
انوار: (( تلبس ملفعها )) : يالله باي



التاريخ 7-7-2005
الوقت : 3:51 العصر
المكان : صالون رشا شيك

بدرية : مريمووووووووووووو تهبليييييييين
مريم (منسدحة ععلى كرسي المكياج )) صج ؟؟ ما شفت نفسي مو راضية تعطيني منظرة
بدرية : لا يهبل ما شاء الله يا بخته بو خلود
مريم: بدروووو
بدرية: بنات عمي توهم دقوا علي يسألون
مريم: صج ؟؟ اهما في حنان دشتي صح ؟؟
بدرية : اي هناك .. تصدقين فرحو بعدها ما راحت الصالون ؟؟
مريم: وي شلون اخاف تتأخر
بدرية: انتي ما عليج بحد كيفهم
مريم: لا بس حرام يطوفهم شي .. ومنار وينها
بدرية: برة اهي ومرت علي قاعدين يسوون شعرهم
مريم: حلو .. وخالتي ام علي
بدرية: مع امي تحت
مريم: امي اهني ؟؟
بدرية: اي راحوا قول ديور لقوه زحمة تخيلي رايحين الظهر ما سوو الا شعر انوار تقول زحمة موووت
مريم: وبعدين ؟؟ خل يسوون شعرهم اهني
بدرية: اي كا امي وفطوم بيسوون شعرهم اهني و انوارو قاعدين يحطون لها مكياج .. بالغصب استقبلوهم لان لازم حجز بس منار تعرف رشا الحفاظ دقت عليها وضبطت الموضوع
مريم: اشوه .. كلكم يمي الحمدلله
بدرية : اي انا م ناول قلت لهم بس امي قالت ما عندي فلوس
مريم: وانا قايلة حق امي اي شي تبون
منال : بليز مدام لا تتحركي بدي حط الحمرة
بدرية: ههههههههههه يالله اوص سكتي لا يخترب مكياجج انا طالعتلهم

************************************

بدرية: هاج الطرحة حبيبتي
اللي تسوي شعر مريم: اوكي جيبيها لركبها
ام راشد: اسمالله عليج الله يحرسج .. (( تدمع عيونها )) .. قول اعوذ برب الفلق
اللي تسوي شعر مريم: هيدي امك ؟؟ يا حرام شو متأثرة
مريم: اي امي ..
اللي تسوي شعرها : الله يخليها الك
مريم: مشكورة
ام راشد: يالله يمه احنا رايحين الصالة قبلكم
مريم: مع السلامة اشوفكم هناك



طالعت مريم نفسها واهي مذهولة بشكلها اول مرة تشوف شكلها جذي .. من صج هذي انا ؟؟ هذي انا مريم ماغيري ؟؟؟ شكلي وايد متغير
صايرة اميرة .. انا اميرة الليلة .. ياترى وليد شنو بيقول ليه شافني .. امبيه اليوم شنو بيصير ؟؟ انا مادري شنو بيصير ؟؟ .. وصج مريم ما كانت تدري شنو بيصير
لا امها ولا احد قالها شنو بيصير لها .. امها كانت مستحية وراح عن بالها انها تفتح هالموضوع مع بنتها .. والكل كان لاهي ومستعيل ويحاتي فتمت مريم بروحها ما تدري شلون تتصرف والكل كان عباله ان وليد مختلي فيها لكن وليد ما قدر الا ان يبوق لحظات واهو ماسك ايدها يعني مريم ما تدري عن اي شي من المداعبات الزوجية ولا التقرب ولا شي الا طراطيش الحجي اللي تسمع مني ومناك من رفيجات المعهد ومن خواتها او من بنات خالتها واللي تسمعه شي لا يذكر وما يتقارن باللي راح تمر فيه اليوم مع زوجها باول ليلة من حياتها الزوجية

 

[A7la Jekra]

[el 89aa 7dhaa Tynnnn
please Kmlehaaaa ]

 

[The purple]

وناسه كملتي ~


وااااااااااااااااااي

يالله ابي بارت العرس < فيها طرب


إن شاءالله ماتتووهق

ناطرين .,

 

[zooz92]

لله يعين مريم على ام غاانم ونوااال

يعطييج العاافية على البااارت

ناااطرينج ..~

 

[عالمي مدهش]

بليز كملي

 

[انين الانتظار]

ناااااااااااااطرين حبي

وبس

وثاااااااااااااااااااااااااااانكس^_*

 

[Danya =)]

يحلييييها مريم حياتي والله
الله يستر من عمتها
تسلمين حبي
ناطريين البارت الياي

 

[انين الانتظار]

اب

اب

اب

وبس

وثاااااااااااااانكس^_^

 

[so_what]

بلييييييز كملي

 

[MaFaZ]

تسلمون فردا فردا ونكا نكا

خوووووش متابعين تستاهلون نفيش وبيبسي على حسابي

يالله الحين انزل بارت لعيونكم فديت عيونكم وعدساتكم بعد :eh_s(15):

 

[so_what]

ناااطرينج

 

[fe7awya]

مشكووووووووووورة على هالبارت
واتمنى اتمنى من كل قلبي
اني ينزل البارت الياي اليوم
ان شاءالله
و تسلمين مره ثانيه