والله الموضوع واااايد حلو
يعطيج العافية على الفكره الحلوه حبوبة
أول شي بالنسبة للروضة .. ما أذكر و لااااااا شي !!! أذكر بس اشويه من اليهالوه اللي وياي و ليلحين صورنا الجمعاية عندي
و أذكر بس أبلات الموسيقى كانوا يحبوني لأني مطربة المدرسة .. كانوا يخلوني أغني بالغرفة و يفتحون المكرفونات اللي بره .. و كل المدرسة تسمعني خخخخخخ
الابتدائي
كنت في مدرسة ريحانة بنت زيد
أبلة مرضية:
أذكر كانت أبلة الرياضيات و بنفس الوقت كانت تدرسني علوم تهبل تهبل تهبل .. كانت متوقعتلي مستقبل لكن من كثر ما حبيت العلوم و الرياضيات بسبتها صرت أبلة علوم مثلها .. حبيبة قلبي .. لما كنت في أولى ابتدائي كانت تعاير بنات ثانية فيني و تناديني من الصف تخليني أحل جدامهم مسائل .. و تقولهم يلا هذي بنت بأولى حلتها و انتوا مو عارفين .. هههههه
و أبلة جوزة:
كانت تدرسني عربي .. عجيييييبه هالأبلة .. وايد طلعت قوية بالعربي بفضل الله ثم بفضل مجهودها
الحين ما شاء الله قاعدة أألف روايه .. أسستنا و صرنا فلته بالعربي .. و كانت تستخدم معانا أساليب وايد حلوة .. تخلينا نتنافس اخر الحصة اللي تخلص أول .. تاخذ هدية .. صج الهدية رمزية بس كنا نتنافس عليها
أذكر بعد كنت في أبلة اسمها أبلة كبرى و قالوا أختها اسمها صغرى .. مدرسة رياضيات .. محد كان يحبها و كانت تطق البنات .. مره وحده من البنات أغمى عليها لأن أبلة كبرى طقت راسها بالسبورة حيل!!! الله يسامحها و الحمدلله إنها ما درستني إلا فترة بسيطه و لا جان كرهت الرياضيات!!
**********************
المتوسطة
أذكر أبلة (زهرة القبندي) بدنية .. كانت تهبل .. و حدها سبورت .. سيارتها كانت مرسيدس اس ال سودة و كانت تمووووت على مصطفى قمر
أبلة رابعة: اقتصاد منزلي .. هم تهبل و تعاملها وايد حلو معانا
باجي أبلات المتوسطة مالهم بصمة بحياتي
الثنوية:
كنت في هند المشتركة في الجابرية
أبلة منى: تدرس رياضيات .. هالأبلة عسل و تهبل و أموووووووووت عليها .. حببتني بالرياضيات أكثر و أكثر .. مع انها كانت تاخذنا من كل حصص الموسيقى و الفنية و البدنية و من الاقتصاد و بالفرص و بالاحتياط و ساعات تاخذنا من الطابور تدرسنا
بس كان على قلوبنا عسل والله عسل
أبلة زهرة الكيميا: الله يذكرها بالخير
أبلة سعاد التمار: حاسوب .. وايد كنت أحترمها ... و اهي طيوبه و أخلاقها عاليه جدا.. الله يذكرها بالخير
أبلة غنية المؤمن: اجتماعيات .. كانت تحبنا .. و كنا وايد نحبها لأنها مثل أمنا .. كذا مره كانت مشرفة إدارية على مرحلتنا .. و كانت بين الحصص اتيي و تسولف معانا .. و تكلمنا عن أشياء وايد فادتنا بحياتنا بعدين
أبلة حنان اللهو: آآآآآآآآآآه على أبله حنان و أيام أبله حنان كانت تدرسنا أحياء .. يا ربي كثر ما أقول عن هالآدمية عسل ما أخلص .. أحب حصتها و أسلوبها في الشرح .. طريقتها بالشرح كانت جدا حلوة و تعطيج المعلومة بسلاسه تخليج غصب طيب تفهمين.. الحين عقب ما صرت أبله علوم كل ما أدخل حصة من حصصي لازم تطري على بالي أبلة حنان و أقول الله يذكرها بالخير .. ياليت أقدر أوصل لي مستواها .. الحين أعتقد صارت وكيله أو ناظرة .. مادري
أبلة وفاء الحذيفي: درستنا جيولوجيا .. ما شاء الله عليها ديانه و أخلاق و طيبة و رقي في التعامل ما مروا على بشر .. كانت تحبنا و تتغشمر معانا و تصورنا .. مادري إذا ليلحين محتفظة في صورنا و لا لأ!! ما طولت معانا .. لأنها راحت تكمل دراستها عقب و أعتقد الحين صارت أستاذه تدرس في الجامعة العربية المفتوحة .. الله يوفقها و يا بخت اللي تدرسهم
الإسلامية: أذكر أبله ابتهال ، و أبلة فاطمه كانت تلبس خمار ووايد كانت تشد معانا و تشتط .. الله يذكرها بالخير .. الحين عرفنا ليش كانت تشد علينا . كبرنا و فهمنا الله يجزاها خير.
العربي: أبلة خالدة: أخذت منها موقف عنيف لأنها تغشمرت معاي بطريقة ما ريحتني .. يومها قتلها انتي أبله المفروض ما تتعاملين مع الطالبات بهالطريقة لأنه عيب ههههه .. والله زين اسكتت عني الصراحة .. المشكله قعدت ليمن تخرجت و انا أصد عنها و ما أكلمها حتى إذا نادتني .. و كانت تتعمد إذا شافتني تقول (بعض الناس مادري اشفيهم زعلانين)
وكيلتنا: الست بتوووول .. يا ربي على الست بتول .. يحلوها .. كانت قششششره .. كنا نخاف منها وااايد .. كانت امشية المدرسة على عجين .. محد كان يفج برطم عن برطم لي يابوا طاريها!! بس تصدقون الحين لي ذكرتها تكسر خاطري وايد تعبت
أبلة سهير: مصرية تدرس فيزيا: مسيكينه كانت مره كبيره و متقرفضة من الكبر.. تخيلوا قالولي انها كانت تدرس أبله حنان اللهو أيام قبل .. و بعدين أبله حنان اللهو صارت مدرسة أولى عليها
.. أبله سهير كانت تحاول تخلي البنات يقربون منها لي درجة انها باليوم المفتوح اهي اللي توزع على البنات ورد و باجي المدرسات كانوا ايمعون ورد من البنات
في الاخر
أحب أوجه كلمة حق بكل مدرساتي العزيزات
الله يجزاكم خير .. علمتونا و ما قصرتوا .. إن شاء الله يشفع لكم عملكم و تلاقونه بآخرتكم
سواء اللي انفعونا و حبونا .. أو اللي قسوا علينا و عاملونا غلط
كافي تعلمنا منكم و لو حرف
