متزوجه من برا و بعدني أحب ولد خالتي

[6ooo6a]

السلام عليكم....

قصتي بإختصار كنت أحب ولد خالتي و أهو يحبني من كنا صغار.... أنا ما كنت أكلمه ولا كنت أطلع معاه...

كبرنا و صارت سالفه بيننا و تهاوشنا و إفترقنا... صار كل شي بسرعة البرق...

مرت سنتين تقريبا و أنا ناسيته... كلش ما كان يمر على بالي,,, مع إني قبل كنت أبكي بس عشان أشوفه...

و ملج ولد خالتي و كان شي عادي بالنسبه لي.. لا بكيت و لا فكرت بالموضوع ولا شي... كأنه أي واحد عادي يتزوج....
بعد مرور سنه على ملكته تقريبا.... بديت أشتاق له و أحبه مثل قبل... لدرجة إني فجأه قعدت بروحي أبكي عليه.. مو عشانه تزوج.. عشاني مشتاقتله موووت.... و قمت أفكر فيه, و صار فبالي بكل لحظه تمر....

انخطبت و ملكت الحمدلله.... لـــــكــــن لما الحين أفكر بحبيبي و لاني قادره أنساه...

مع العلم إني أنا ما صار عرسي و أهو لما الحين ما سوا عرسه....

شسوي؟؟؟
كل شي يذكرني فيه... وين ما أروح...
مشتاقتله موت يا بنات....
مادري شسوي؟؟؟ كيف أنساه؟
بعده يحبني أو لا؟؟؟
أبي إجابه تثبت لي إذا كان بعده يحبني أو نساني.....


يا رب تشفيـــني من حبه...

اللي جربت مثل هذي الحاله شصار بعد عرسج؟ بعدج تحبين الأولاني؟
شلون نسيتيه؟

صدقوني يا بنات والله لو يقولون تتزوجينه أقول لأ بكل ثقه.... بس أحبه و أعشقه مـــــــــــــــــــــــــوت

 

[الهما]

لا حول و لا قوة الا بالله
لا تدمرين حياتج
اذا كنت بتقدرين تسمعين للنصايح ... ترا هاذي تعتبر خيانه انج تفكرين بواحد و الله رازقج بواحد...
خلالاص انت ملجتي و محد جابرج على الموافقة ...
يمكن يكون هذا اخير و احسن من ولد خالتج .... انسي
عليج بالذكر و الدين اهو اللي بنسيج اياه
شغلي نفسج بحبيبج زوجج بالحلال احسن من التفكير بغيره
بعدين لو يحبج جان اخطبج مو علبو تهاوشتو و افترقتو ... خلا يقطع خاصة انه ولد خالتج يعني قريب
و الاخ تزوج قبلج مو ان مثلا ينتقم عشان انت تزوجتي اهوا يتزوج ... ما اظنه يحبج و لا يفكر فيه لو يحب جان خطب... صدقيني الريال اللي يحب ينهبل اذا ما اخذ اللي يحبها
توكلي على الله و شغلي نفسج بحبيبج اللي تعنا و راح لأبوج و خطبج جدام الله و خلقة ...و اللي بيتكلف عشانج انت
لا تظيعين الفرص من ايدينج

 

[( مي )]

لو كان ناوي ياخذج
جان اخطبج
او لمح لج انه يحبج ويبيج من قبل لا تتزوجون انتوا ال2​

 

[Anteeka]

ترا الحب مو نظرات و اعجاب ...الحب اكبر من جذي و انا ما اظن انج حبيتي ولد خالتج ...هذا اعجاب لا اكثر ولا اقل و يمكن متعلقه فيه لان هو الاعجاب الاولي ...لكن الحب اعمــــــــــــــــــــــق من جذي بدبلااااات ! الحب مواقف وعشرة وما راح اقدر اوصفلج الا لما تجربين وترا تعرفين ان الحالة الي انتي عايشه فيها اوهام في اوهام .

وقالولج البنات الريال خطب و ملج قبــــلج !!يعني لا تعيشين بعالم الافلام الرومانسيه ....الحين الله رزقج بريال و ملجتي استغفري ربج ولا تفكرين بولد خالتج و فكري بمستقبلج وريلج الي ان شاء الله راح تحبينه وتعشقينه مع الايام .

 

[^^نـــواره^^]

حبيبتي انزين تاكدتي انه يحبج وبعدين؟ تطلقين من زوجج؟ واهوا يطلق زوجته يعني؟ انزين كل واحد فيكم تطلق وبعدين؟ امج بتكون راضية؟ وخالتج بتكون راضية؟ تتوقعين خالتج بترضى ان ولدها يتطلق وعقب يتزوج البنت اللي كانت سبب في طلاقه؟؟

حبيبتي حمدي ربج ان الله رزقج ريال ان شاء الله بتعيشين العمر كله وياه،ن وترى هذا من الشيطان يبي لج المشاكل، وترى احب شي للشيطان ان يفرق بين زوجين

تعوذي من ابليس وادعي ربج يوفقج بحياتج مع ريلج

 

[كويتيه وافتخر]

حبيبتي بس تتزوجين بتنسينه


اللي بينج وبينه حب مراهقه بتنسينه وتضحكين عليه بعدين لي شفتي عيالج حوالينج

افرحي بملكتج وعيشي فتره الملكه هذي وخططي تكونين احلى عروس وافضل زوجه وفكري اشلون زوجج يعشقج وانسي كل شيء مضى

 

[مزيونه وشقره]

الحب شنو في نظرج انتي ماشفتي منه شي بالعكس تهاوشتوا وراح ولاهميتيه سوري على هالكلمه بس هذا الصج خليج واقعيه وتزوجي وبتعريف الحب الحقيقي

الحب تضحيه وحياة وتعاون وتفاهم

اهوا تزوج وراااح ولا سال ولا اهتم وانتي بتدمرين حياتج


اهم نصيحه كثري استغفار كل ما طرا عليج وتعوذي من الشيطان ترا والله الشيطان يفرق بين الزوج وزوجته والا مرت عليج سنتين ناسيته اشذكرج فيه غير الشيطان والله صدقيني


ولاتسمعين اغاني عاطفيه ولا تشوفين هالافلام اللي غيرت عقول البنات وتفكيرهم

البنت تدور الستر والزواج والعيال

ان شاءالله تتزوجين وتحميل وتييبين عيال ومشاعرج وحنانج تصير لعيالج وزوجج وتنسينه وجنه العيد


حياتي


الله يوفقج وكثري استغفار وتعوذي من الشيطان كل ما طرا عليج هالطاري







مع تحياتي ياحياتي

مزيونه وشقره​

 

[اطياب طيبه.أم عبدالله]

الله يعينج حبيبتي
تجربتج صعبه انا مريت بتجربه مشابهه لتجربتج

 

[عرموشة]

الحب شنو في نظرج انتي ماشفتي منه شي بالعكس تهاوشتوا وراح ولاهميتيه سوري على هالكلمه بس هذا الصج خليج واقعيه وتزوجي وبتعريف الحب الحقيقي

الحب تضحيه وحياة وتعاون وتفاهم

اهوا تزوج وراااح ولا سال ولا اهتم وانتي بتدمرين حياتج


اهم نصيحه كثري استغفار كل ما طرا عليج وتعوذي من الشيطان ترا والله الشيطان يفرق بين الزوج وزوجته والا مرت عليج سنتين ناسيته اشذكرج فيه غير الشيطان والله صدقيني


ولاتسمعين اغاني عاطفيه ولا تشوفين هالافلام اللي غيرت عقول البنات وتفكيرهم

البنت تدور الستر والزواج والعيال

ان شاءالله تتزوجين وتحميل وتييبين عيال ومشاعرج وحنانج تصير لعيالج وزوجج وتنسينه وجنه العيد


حياتي


الله يوفقج وكثري استغفار وتعوذي من الشيطان كل ما طرا عليج هالطاري







مع تحياتي ياحياتي

مزيونه وشقره​

خووووووووووووووووووش كلام

 

[HASB_83]

مزيونه وشقرة 100%


حبيبتي تعوذي من ابليس حرام تظلمين الريال اللي شاريج وتركضين ورا اللي باعج



صج لي قالوا اللي يبينا عيت النفس تبغيه واللي نبيه عيا البخت لايجيبه!!!!!!!!!!!

 

[بتبوتااا]

حبيبتي الله يوفقج ان شاء الله اهوه مو من نصيبج وكل ما فكرتي فيه قولي يالله يوفقه بحياته وشغلي روحج بأي شي ثاني

 

[عدسات ملونة]

اول شي اهو لما خطب ما فكر فيج ولا طريتي على باله فاحسن لج انج ما تفكرين فيه وبعدين حرام انتي الحين بتتزوجين فعيشي حياتج بسعادة مع اللي اختارج والله يسعدج ويرزقج العيال الصالحين

 

[أوكسجين]

تعوذي من ابليس
لو اهو يبيج او كان يفكر فيج جان يي خطبج
بس الحين كل واحد فيكم متزوج
اذا فكرتي فيه حاولي تشغلين نفسج بامور ثانيه
واذا اذا عرستي ورحتي بيت ريلج بتنسينه نهائيا
اذا بترتاحين صج شيليه من بالج

 

[توته كيوته]

تعوذي من ابليس
الله عطانا نعمة النسيان عشان ننسى .. ماله داعي تفكرين فيه اللي راح راح

 

[هوفه]

تعوذي من الشيطان

الريال لو يبيج اخطبج

ما يبيج وحتى لو حاولتي انج اتلمحين له انج تبينه

ما راح يثق فيج

لانج مو مخلصة

 

[nice-girl]

لاحول لله انا اقول يمكن قارنتي ريلج ج اب ولد خالتج عشان جذي قمت تشتاقيله
حبيتبي خلي عنج اهوه شاف حياته وانتي بعد وكانت قصه حب وانتهت مثل كل قصص الحب

 

[ورق عنب]

ترا الحب مو نظرات و اعجاب ...الحب اكبر من جذي و انا ما اظن انج حبيتي ولد خالتج ...هذا اعجاب لا اكثر ولا اقل و يمكن متعلقه فيه لان هو الاعجاب الاولي ...لكن الحب اعمــــــــــــــــــــــق من جذي بدبلااااات ! الحب مواقف وعشرة وما راح اقدر اوصفلج الا لما تجربين وترا تعرفين ان الحالة الي انتي عايشه فيها اوهام في اوهام .

وقالولج البنات الريال خطب و ملج قبــــلج !!يعني لا تعيشين بعالم الافلام الرومانسيه ....الحين الله رزقج بريال و ملجتي استغفري ربج ولا تفكرين بولد خالتج و فكري بمستقبلج وريلج الي ان شاء الله راح تحبينه وتعشقينه مع الايام .

صاجة ... هذا كله اعجاب يمكن انتي تقولين لا حب .. بس صدقيني اعجاب

ولو يحبج جان خطبج صح ولا لا ؟؟؟؟؟

 

[عاشقة الرشاقة]

تعوذي من إبليس هذه من مداخل الشيطان.....

 

[6ooo6a]

يعطيكم العافيه و ما قصرتوا.....

أنا متأكده إنه كان يحبني
بس أخته و أمه غيروه علي و زوجوه وحده ما يعرف عنها شي....

الحين إذا شافني كأنه شايف عدو له
مدري ليش غيروه

 

[شخبوطة]

الأيام كفيلة تنسي ..... ميخالف تحملي بس عرفي اني الحياة ماشية .. لا تتعمقين وايد بالحزن ..