لأحلٌـــــــــــــق بحــــــــــرية ...(متجدد)

[نوره 99]

الى الامام الى الامام الى الامام

بارك الله فيج حبيبتي على هالاسلوب اللي طالع من موهبة حقيقية وانشاء الله ايي اليوم اللي تصيرين فيه

كاتبه كبيرة ومعروفة وتكتبين لنا القصص الحلوة عالقليلة ترحمينا من هالمسلسلات الظيم اللي قاعدين انشوفها

ناطرين جديدج حبيبتي

احرجتيني بردك
كاتبه كبيره مره وحده
على طاري المسلسلات .. أنا دايم أقرا قصص جميله ورائعه وفيها معاني ساميه .. صراحه مدري وين المنتجين عنها :080402ask_prv:

 

[نوره 99]

(( هل كل شيء بالهدايا يكون ؟؟ ))


أنا أدري أن الهدايا شي مهم بحياتنا .. وطبعل ما أنسى حديث حبيبنا صلى الله عليه وسلم (( تهادوا تحابوا )) ... لكن لما تكون مجرد برستيج :0bee2e8d89: .. عموما لاتاخذون بنظريتي لأني ماأؤمن بالهدايا كثير ونادرا جدا ما أهدي أو أحد يهديني .. بس أشوف هالأيام أنها مقدمه على أشياء ثانيه كثيره ... التقدير .. الأحترام .. الوفاء .. الكلمه الحلوه ... بالنسبه لي أنا الكلمه الحلوه والصادقه تعلق في بالي أكثر من مجرد هديه .. وممكن أنسى أحد أهداني ... لكن ما أنسى أن أحد قالي كلمه حلوه من قلبه .. للأسف بعض الناس الحين يهدون عشان يقولون حنا أهدينا فلان وأهدينا فلانه .. أو حتى لما تجيهم هديه يكتبون بالبيرسونال مسج اللي بالمسن (( مشكووور خالو فلان ع الهديه الحلوه )) وطبعا ترز صورة الهديه مكان الصوره الشخصيه .. علما بأن خالها هذا مايدخل المسن ... بس عشان اللي مايشتري يتفرج .. أو حتى لما يكونون خوات ووحده مهديه الثانيه وكلهم شابكين مسن .. تكتب الأولى (( ميغسي عوعو ع الهديه الحلوه فديييييييتك ))
وتكتب الثانيه ((تستاهلين طوطو .. وعليك بالعافيه )) ... فهمتوني لما أقول برستيج ؟؟ ... والا هم بالأساس ماعندهم بالبيت الا مماعط شوش (( يعني 24 ساعه هواش )) ... والا اللي تكلف نفسها مالا تطيق بس عشان تهدي هديه غاليه ... طيب اذا ماتقدرين ليش الفشخره ؟؟ ... ليش تتسلفين عشان تهدين ؟ ... وليش تقصرين على عمرك عشان تهدين أحد ثاني .. يعني أكيد هالثاني مو أغلى من نفسك .. للأسف هالأيام راح معنى الهديه الحقيقي ... صارت جزء من برستيج الأنسان لا أكثر .. وتهديني بس عشان أهديها .. يعني مثلا وحده أهدتني درع بتخرجي من الثانوي .. لاتظنون أننا حبايب .. حنا أصلا اذا جلسنا مع بعض مانسولف ... بس كذا برستيج ... أصلا لو تشوفون الهديه مغبره ومتقطعه وكل عوامل التعريه دارا عليها ... حسيت أني ما استاهلها ... والتيرم الجاي بتتخرج ..ومحتاره أهديها والا لا ... علما بأن نفسي طايبه منها .. وسببت لي مشاكل كثير الله يسامحها .. والحين لساني مايطق لسانها ... ولي شهور ماشفت وجهها .. خايفه تحط بخاطرها أنها اهدتني وأنا ماأهديتها ... وبنفس الوقت مابي أهديها وهي أصلا مو هامتني ولا طقيت لها خبر .. لأني بصراحه ماعرف اجامل ... أففف ... مدري ليش ماعرفت أنهي الموضوع .... هههه ... يله انتهى الموضوع ... أيه صح ... ابشركم اتفقت مع بنات عمي نطلع فرايديز يوم السبت .. ولأول مره بنطلع مع بعض ... ماتتخيلون شلون فرحتي .. بنات عمي احبكم :hjy5jewf: ... يله اشوفكم على خير

 

[نوره 99]

(( صـفر - صفـر ))

تصدقون أني كتبت 3 مواضيع وكل مابي أعتمدها يعلق المنتدى ... بس الحمدلله اليوم راضي علينا وأن شاء الله دوم
وصراحه ماعجبني القسم هنا حسيت أني أسولف مع نفسي ... شكلي بطلب من الأدراه يرجعونه للمكان اللي قبل ...
المهم ... سالفتي اليوم قديمه ... بس هي للحين بخاطري قلت غصب بطلعها ...
كنا مره طالعين أستراحه حنا مع خالاتي مع وحده قريبة أمي ... المهم ... موضوع الأستراحه هذا سبق وانطرح من قبل بنات خالتي العزيزات اللي لي سالفه معهم ومن سخافتها ماحب أعيدها ... الزبده أنه لما جت منهم أنا رفضت وبشده ... لأنه دايم لما تجي من عندنا يرفضون وبشده قلت وحده بوحده وخل يذوقون الكاس اللي ذوقونا أياه ... المهم نسينا السالفه .. بعدها بفتره انطرح مره ثانيه موضوع الأستراحه من قبل قريبة أمي انفة الذكر ... وتم الموضوع بسرعه وجا اليوم الموعود .. صراحه أنا كل هالأيام كنت متردده أروح والا ما أروح ... مابي أروح لأني متأكده أني بشوف بنات خالتي ... وبنفس الوقت مابي أحرم نفسي من المتعه والتغيير على حسابهم .. لأني سبق وسويتها وأنا اللي انقهرت وهم المبسوطين ... المهم أنا فيني طبع ماحب أبدا أواجه أي أنسان زعلانه منه مع أنه يكون أحيانا هو الغلطان وأنا اللي اتهرب ... الزبده هالمره قررت أتحدى نفسي وأروح ... ألى متى بجلس كذا ؟ ... قررت أروح أمتع نفسي وأعاملهم نفسهم نفس الجدار ... من كثر ما أنا متحمسه رحت السوق وشريت لبس جديد ... وقمت بدري ولبست وتزينت وسويت حلى .. قلت بثبت لهم أنهم خلاص ماعادوا يعنون لي شي ...
صراحه كنت أسوي نفسي قويه ... لكن من داخلي كنت خايفه ... وطول الطريق كنت أدعي أن الله يثبتني ولا أنهار هناك ... واتخيل شلون بسلم عليهم ... شلون بطالعهم ... مع من بسولف بحيث اتجاهلهم ... يعني عايشه الدور بالمره ...
وصلنا... وأول شي تفاجأت أنهم مو موجودين ... قلت يمكن هنا .. هناك ... صراحه ما سألت ولا تجرأت اسأل ... لحد ماسألت قريبة أمي خالتي عن بنات ... وقامت تصرف الموضوع ... حسيت أنهم ماراح يجون ... ماتتخيلون مشاعري ذيك اللحظه ... تطمنت وقلت الحمدلله بجلس بدون ضغط نفسي .. بس بنفس الوقت أنقهرت أني أول مره أتحدى نفسي بهالطريقه ... واخرتها تطلع النتيجه (صفر-صفر )..

 

[نوره 99]

(( صح؟ ... لا مو صح ))

أدري أن الثقه بالنفس شي مره حلوه ....لكن أذا هالثقه كانت مجرد قشره رقيقه لو لمستيها بس .... لقيتي من داخل أن الثقه صفر ...
طبعا كعادتي لازم أشرح بالأمثله ... مثلا عندكم عزيمه ... وطبعا بالعاده بالعزايم كل وحده ماتطالع ألا نفسها خصوصا البنات الشابات أمثالي الله يحفظني ... دخلت وحده من هالبنات الحلوات متكشخه ومتزينه وشعرها مخليته ربي كما خلقتني .... ع أساس كيرلي يعني ... المهم جالسه تطالعه بالمرايه وتكلمني ... اليوم شعري حلو صح ؟؟ ... طبعا ساعتها الجواب على حسب النفسيه .. ياأما أطالعها وابتسم ابتسامه صفراء وهذا أذا كنت مشغوله بنفسي ورايقه ... والا ألوي بوزي وأقول يعني وهذا أذا كنت مأتشه ... والأحتمال الثاني هوالوارد خصوصا أذا كان لها سوابق بهالموضوع .... المهم تبدا عاد السواليف وش شافت وش سوت وش شرت وش قالت عنها فلانه وعلانه ... فجأه تقول تصدقين اليوم يوم قمت من النوم لقيت بنطلون بجامتي طايح ... لحظه لا تفهمون غلط .... ترا البنت بريئه ... كل قصدها أنها نحفت 10 جرام ... بعدين تقوم من مكانها وتدور حوالين نفسها عارضة الأزياء وتقولي باين علي نحفت صح ؟ ..... والجواب كما ذكر أعلاه مايحتاج أكرر ... المهم ويمتد موال سواليفها ... لحظه لا تحسبون معطيتها وجه واسمع سواليفها واجيكم اتحلطم لالا ... أنا ياحبة عيني اذا جيت اسولف لازم يعطوني مايك عشان يسمعون ومايمدني ادخل بالسالفه الا والقاها تتلفت وراها ماتدري من يسولف أنا والا الجدار ... طبعا ساعتها احترم نفسي وانطم وأقول يله أعطيها جوها .... بعدين تجي سالفة هذيك الليله اللي جعلها ماتنعاد يوم رجعت من الملاهي وعيونها تتقلب وراسها يعورها وجسمها يعورها .. طبعا بتقولون عادي تعبت من اللعب والدوخه .. حتى أنا نفس الشي ... بس هي لا ... كله من المره هذيك اللي تمشي وتقول للي معها شوفوها شوفوها .... يعني صاكتك عين مثلا ؟؟؟
وألا أخوها ... واه من أخوها اللي كل صديقاتها ميتين عليه ويتمنون طلته البهيه ... بعدين تطلع لي صورة أخوها ذلك الشخص الأسمر المكور .... بعدين تغرد بكل ثقه ... مملوح صح ؟ ..... وأنا بقلبي أقول لا موصح .. عفوا أنا ماتطنز بأخوها لاسمح الله ... الله يخليه لهم بس ليش تستعرضين فيه ...الحمدلله كلنا عندنا أخوان ... وكلنا ننحف ونسمن ... وكلنا ممكن نلفت الأنظار ... بس مارحت استعرض قدام الناس ..
على طاري مو صح أنا مره وحده تجرأت وقلت لا موصح .... وكانت ردة الفعل نظرات استنكار وتعجب وتجهم ... حسيت أني سبيتها ... طيب أذا واثقه من رايك ليش تستشيريني ؟؟؟ ... ماتدري أني كل مره ودي أقولها لا مو صح ...

 

[نوره 99]

(( سنه أولى زواج ))

اليوم طلعت مع خواتي نتعشى برا ... المهم المطعم كان جوا السوق وازعاج وبزران وزحمه ... المهم من محاسن الصدف كانت جنبنا طاوله فيها طيور حب .... خخخخخ ... قصدي زوجين توهم متزوجين ... طبعا حنا بالبدايه من الجوع ما انتبهنا وحاطين حيلنا بالمنيو نختار ونتشاور .. شوي ووصل الى اسماعنا الحوار التالي ..
: حبيبي اخر قطعه اخر قطعه ...
: لا والله ياقلبي شبعان الحمدلله ...
:شلون ماتبي تاكل من يدي ..
: تسلم ايدك ياعيوني >> تخيلته وهو مسبل عيونه خخخخخ
طبعا ذيك الساعه ماتشوفون ألا أشياء سوداء تتهزز >> هذا حنا فاطسين من الضحك ...
بصراحه أول مره نسمع حوار صريح بين معاريس .. بالعاده مانشوفه الا بالمسلسلات ...جتنا صدمه نفسيه ...
وطيور الحب غرقانين لشوشتهم ويتحالفون من اللي بيدفع الحساب ... أشوى ان الزوج ماتهور وحلف بالطلاق خخخخخ ...
طبعا بعد مارجعنا حنا يالضعوف مازلنا بصدمتنا ... وأول شخص قابلناه قلناله السالفه ... ألا وهو خالتي لبى قلبها ...
اللي ردت وهي كاتمه ابتسامتها : ايه تلقونهم توهم معاريس اصبروا بعد كم سنه >> شكلها مجربه خخخخ
عاد أنا قعدت اتخيل الحوار بعد كم سنه مع أضافة بزرين ثقيلي الدم للعائله السابقه >> الطيور فرخت خخخخ
: بسم الله الرحمن الرحيم مامداني اكل لحست الصحن لحاس ... لو داريه جايبه عشرين صحن سلطه عشان تعبي كرشك ..
: أقول أنا جاي اكل مو جاي اتفرج .. وبعدين لا تنسين نصيب جراوتك من الأكل >> ملاحظه الجرو صغير الكلب خخخخخ
: دحوم حسبي الله عليك انزل فشلتنا >> دحوم هذا واحد من الجراوه متعلق بالبارتيشن خخخخ
: أقول الشرهه مب عليكم ... الشرهه على اللي يوديكم مطعم مره ثانيه ... أنا بطلع لا تنسين تدفعين الحساب ...
وين اللي قبل كم سنه يحلف عشان يدفع الحساب >> عشت جو بقوه
بس صدق صراحه أنا مو متزوجه .. بس دايم الاحظ اللي تزوجوا بسني أو اكبر مني شوي تجيك طايره طيران من الدلال اللي شافته ... سنه أو سنتين أو بعد أول طفل ماقول ساءت العلاقه لا الله لايقول ... بس تحسينها مو مثل أول .. يعني أول لما يتأخر عليها عند أهلها تقول مسكين مكروف بالداوم كيفه خلوه يستانس مع ربعه .. الحين بس يتأخر عشر دقايق ... أف هذي مو أول مره يسويها دايم يفشلني عند الناس وهلم جرا ... حتى هو أول أيام الزواج كان اربع وعشرين ساعه قاعد بالبيت .. والحين البيت فندق للنوم والأكل فقط ...
صراحه مدري الموضوع وش يبي بس حبيت افضفض عما في داخلي ...

 

[loooly love]

حيااج خيتوو احنا قلب وااحد

 

[نوره 99]

حيااج خيتوو احنا قلب وااحد

الله يحييك قلبو

 

[نوره 99]

(( أبي أحب ))

مدري ليش هالأيام جايني شعور غريب ... أبي أحب .. خخخخخ أحس اني غبيه اذا قلت كذا بس مالي شغل أبي احب يعني أبي أحب .... الظاهر مراهقه متأخره لأن طول مراهقتي مافكرت بالحب ... قبل لما اشوف مسلسل رومانسي أو فيه لقطات رومانسيه يجيني الضحك .. أحس انهم بزران وسخيفين ... والحين ودي طول الوقت اطالعهم واستمتع برومانسيتهم .. كلام علم النفس يقول هالشي طبيعي لأن البنت اذا وصلت العشرين تبدأ تهتم بنفسها وشكلها وتبدأ تستعد للزواج والأنجاب ... وكلام قلبي يقول نفس الشي ... بس فجأه يجي عقلي ويعطيني كف ويقول اعقلي يا بنت ... بس أنا قررت أتمرد على هالعقل المصدي ... مو على كيفك ياعقلي تمنعني ... أنا من حقي احب واتزوج واجيب عيال ...
تدرون اتذكر وحده من قريباتي كانت دايم تقول للبزران ادعولي اتزوج كنت احقررررهااااا ... يعني هي مو كبيره مره بس ذيك اللحظه حسيتها شفقاته ع الزواج ... بس ابشركم تزوجت الحين وانفكت عقدتها ... المهم هاللحظه حسيت بشعورها .. شعور صعب لما تسمعين طاري الزواج حولك بس ماتحسين فيه ... فلانه تزوجت .. فلانه مخطوبه .. فلانه تملكت ... قاعدين ندور لفلان >> وأنا لابسه قبعة الأخفاء مثلا ...
الحمدلله أن توني صغيره وعايلتنا مو من النوع اللي يتزوجون بدري ... بس مو هذا همي ... ابي اعيش شعور اني احب انسان وهو يحبني
يهتم فيني واهتم فيه ... يقولي كلام حلو .. وأنا اذوب من الحيا >> عايشه الدور بقوه ...
يارب ابي اتزوج

 

[كبريآء بدؤيه]

دااامج بطلتي النقااش انا بكتب بعد < كيفي منو قالج تنزليين موضوع هههه < لاا يكثر رجيتي البنت < هع

امممم

اناا عندي دووور ثاااني
اناا مسكينه امي مسكينه ابووي مسكييين < هع سرقت دوور ولد عمي خويلد هع

امممم اناا احبكم وبس مدري لاا صاارت بلووه في حيااتي وبغيت اشتكي بجيكم
هع دلييت دربكم

يسلموو ع الموضوووع

 

[نوره 99]

دااامج بطلتي النقااش انا بكتب بعد < كيفي منو قالج تنزليين موضوع هههه < لاا يكثر رجيتي البنت < هع

امممم

اناا عندي دووور ثاااني
اناا مسكينه امي مسكينه ابووي مسكييين < هع سرقت دوور ولد عمي خويلد هع

امممم اناا احبكم وبس مدري لاا صاارت بلووه في حيااتي وبغيت اشتكي بجيكم
هع دلييت دربكم

يسلموو ع الموضوووع

الله يسلمك حبيبتي ومتى ما جاء ببالك تعالي هنا وفضفضي

 

[نوره 99]

(( أكيد جاء رمضان !! ))

أول شي مبارك عليكم الشهر ... ولو أني مو حاسه بطعمه ... والله العظيم مو مصدقه أننا انهينا ثاني رمضان .. يمكن لأنه أول رمضان يدخل علينا وأكون بعذر شرعي ... والله شي يقهر الناس تصوم وتصلي وأنا اكل واشرب وأنام :eh_s(16): ... لا بس عشان أكون صادقه مع نفسي ماحس أن هذا هو السبب :080402ask_prv: ... قاعده استمر في تنميق صورتي المشوهه ... قاعده احسس العالم من حولي أن هذا رمضان ... بس أنا نفسي مو حاسه فيه ولا معطيته أي أهميه :eh_s(11): ... تصدقون أني حاذفه كل القنوات من التلفزيون حتى قنوات الأطفال حاذفتها ماخليت ألا القنوات الدينيه والأخبار والرياضه ... على بالي مانبي مانبي نجرح صيامنا ... بس مجرد ما أجلس على النت ادخل المواقع واشوف اخر المسلسلات وأوقاتها وتقييم الجمهور لها ومقرره وش بتابع بعد رمضان ... احس نفسي منافقه وكذابه ... تعبت من نفسي تعبت :eh_s(16): ... والله قاعده اكتب وفيني غصه .. ليش أنا كذا ؟ ليش ؟؟؟ ... مادري وين الخلل بصراحه ... فيني والا بالمجتمع والا بأيش بالضبط ... تعبت ياربي من الكذب تعبت ... يارب اعف عني وسامحني يالله :yaaaaaarb:

 

[نوره 99]

(( هيا الشطي .... من جديد ))

لفت انتباهي اليوم اتصال للبطله هيا الشطي على برنامج حجر الزاويه .. وأعلنت عن قافله جديده لأسطول الحريه .. ماقدر أنكر أعجابي فيها وأتمنى لو أملك نصف الشجاعه اللي تملكها ... أحسها أنسانه انولدت بزمن غلط .. زمن خنوع وضعف واضطهاد ... أنسانه مايهمها ترف الدنيا ... مايهمها ستايل حليمه بولند ... ولاأزياء ميسا مغربي ... ولاحتى مؤخرة كيم كارديشان ... ماتتكلم عن أشكال الناس ولا أجسادهم ... كل كلامها عن أحاديثهم .. أخلاقهم ... تصرفاتهم ... ابتساماتهم ودموعهم ...
ذاقت لذة البطوله .. والعزه .. بقدر ماذاقت طعم الخوف والقلق ... بس حبت تعيد التجربه من جديد ... واخمن انها راح تكررها وتكررها لحد ماتوصل لشيئين ... أما النصر أو الشهاده ... وكلاهما فخر ...
أتساءل وش اللي ممكن تملكه هيا وحنا مانملكه ... يدين ؟ ... رجلين ؟ ... عيون ؟ ... أو قوه خارقه ...
ولا شي ... بس عندها أصرار وعزيمه ... ومثل مايقول أحمد الشقيري أحسان ... تعرف ليش انخلقت .. وسعت لتحقيق هالغايه ...
ماعابها أمرأه ... ولاتخلت عن أنوثتها ورقتها ... ولا قست قلبها وتخلت عن مبادئها ... امرأه مثلها مثلي ...
لكن سعت أن تكون مميزه ... أيحق لنا أن نحلم بهيا أخرى ؟؟؟

 

[نوره 99]

(( أصعب شعور ))

انسان ماتحبه ولا تكره ... ويمكن هو يبادلك نفس الشعور ... لكن الفرق أنك تحمل في ذاكرتك مواقف عدوانيه منه تجاهك ... يمكن تكون شي من طيش المراهقه وعبث الهرمونات ... لكنها كانت جروح عميقه على جدار طفولتي عصب جدا أني امحيها ...
هالشخص خلاص كبر واستقل بحياته ... ماشوفه بالسنه الا شهر أو اسبوع أو يومين واحيانا تمر السنه مو دون ماشوفه ...
نسيته .. أو تناسيته ... وأخباره ماعادت تعنيني ...
اسمع بمصايبه واحزانه ... واكتفي بالصمت ... مالي قلب اتشمت ..ولا لي قلب اعزيه ..
فجأه بودون مقدمات اتفاجأ أنه بيجلس عندنا فتره ماعرف متى تنتهي ...
ادري اجبرته الظروف ... وبتجبرني بعد ...
اشوفه كل يوم .. واسمع صوته ... واخدمه .. واهتم فيه ..
بيشاركني لقمتي ... وبيسمعني سواليفه ... ويجبرني اجامله ..
اتنازل عن تمردي قدامه ... واتوشح بوشاح الوقار والصمت بس عشان اتحاشاه ..
بعد ماكنت اعتبر بيتنا ملاذي الامن ... والمكان الوحيد اللي مايشاركني أحد الهوا فيه ... صار بعيني سجن ... انتظر اللحظه اللي ادور فيها عذر عشان اطلع منه ...
يارب انت اعلم بحالي .... يارب الهمني الصبر ياااارب

 

[Q8yaaaa]

up up

 

[نوره 99]

(( عزيزيني الناس .... انتحر مثلا !! ))

مليون مره كتبت عزيزيني احسها غلط ... مو مشكله سلكوا ... صراحه مدري وش يبون الناس من الحياه ... غصب يخلوني انسانه حذره وما اطلع اخباري حتى لو كانت عاديه ... أساسا انا طبعي كذا ماحب اعلم احد بكل شي ... أؤمن بسالفة الأسرار وأقدرها ... وأحس شي جميل ان الأنسان اللي قدامي يكون غامض شوي ... في ناس تزعجهم هالسالفه ... بس بالنسبه لي بالعكس ... مريح نفسه ومرتاح من الناس ... في كل مره أحاول اكون عاديه واسولف عن شي يخصني أو اي خبر ينتشر عن طريقي تصير لي مشكله وتطيح فوق راسي ... وقررت ماغير عادتي واخلي بالقلب بالقلب مثل مايقولون ... وبنفس الوقت احس الناس يطالعون الشخص اللي مثلي وراه سر خطير ... مع انه بالواقع مافي شي يستاهل ... بس يمكن سكوتي يخليهم يحسون بهالشي .. وخصوصا الناس الفضوليين اللي احسهم يحترقون بس عشان يعرفون عني ... مع انه مايخصهم .. بس لقافه ... تصدقون ... انا اخترت هالمنتدى بالذات عشان اتجنب قدر الأمكان ان احد يعرفني فيه ... ومع ذلك احس ممكن احد تطيح عينه على موضوعي ويبتسم ابتسامة مكر انه كافشني .. مع اني مو كاتبه اسرار البنتاجون بس اهم شي يشفي غليله ... احس حتى لو اكتب بمنتدى بالمريخ راح يلحقوني ... وش يبون بالضبط مدري ... يبوني انتحر مثلا !!

 

[نوره 99]

(( عشرينيه ... بروح الشيخوخه ))

كثير نسمع بروح الشباب ... دايما يقولون ياما شياب وعجايز وصلوا الستين والسبعين بس مازالت فيهم روح الشباب ... أنا ظاهره فريده من نوعي .... مفتخره بعد أنا ووجهي ... المهم ... غالبيه صفات العجايز فيني ... الا عمري اللي مو راضي يتواكب مع عصر السرعه اللي حنا فيه ... ساعات احس أنا المفروض اكبر من أمي ويمكن جدتي بعد ... لما أشوف البنات واهتماماتهم ... جسمي حلو .. شعري حلو ... الموضه الأيام كذا .. الشنطه هذي ماركتها كذا ... ولما أشوفهم يتكلمون وغصب يدخلون الأنجلش بكلامهم على أساس تطور ... ساعات استحقرهم ... استحقرهم من قلب وماطالعهم الا ناس فاضين ... وساعات لما اشوفهم اعجاب الناس فيهم أقول ليش ماصير مثلهم ... وش زودهم عني ؟؟؟ ... بس عقلي المصدي عقل عجوز مايقتنع الا براي راسه مالت على راسه ... أنا أدري اني مو انسانه ملفته للأنتباه ... وماروح مناسبه الا أدخل بهدوء واطلع بهدوء ومحد يفكر يسأل عني ... مع أني مو قبيحه ولا عاديه ... الكل يقول انتي دافنه جمالك بنفسك ... شي طبيعي ... يعني بالبيت قميص بيت وكشه كبر راسي مرتين .. والجامعه تنوره سوداء وقميص واسع مثل العجايز واذا كشخت حطيت كحله وروج ..وبجمعات اهلنا مثل الجامعه تقريبا ... واذا صار فيه مناسبه ممكن ذيك الساعه اطلع حلوه وابرز جمالي مثل مايقولون ... بس برضو ما الفت الانتباه ... لازقه بكرسيي لا ارقص ولا اصفق ولا حتى اتفاعل معهم ... يعني اذا كان في أحد بسني اعرفه نجلس جلسه حش مثل العجايز ولله الحمد .. واذا مافيه انطميت واشتغلت توزيع ابتسامات والسواليف كلمه ورد غطاها على أساس مستحيه يعني .. ومازال عقلي المصدي يقولي انتي فريده من نوعك ... ومايطلعك الا الشخص الفريد من نوعه ... يعني أمي فيها من شخصيتي وتزوجت ... بس من وين الله يرزقني وحده مثل جدتي فريده من نوعها وتطالعني وتخطبني لولدها .. نعنبو داره حتى الشيب ماخلاني بحالي ... كل مافرقت شعري طلعت لي شيبه ... ومازال عقلي المصدي يقولي الشيب وقار وهالشيبات اللي كارهتهم بتكون لك نور يوم القيامه ... حتى يوم انعميت ورحت اصبغ شعري ... كل شعري انصبغ الا الشيبات صامده ومصره تكون رمز من رموز الشيخوخه .. شكلي انسانه مالي حل ... ومافي امل اتغير ولا اتعدل ... مالي الا اجلس بمصلاي مع مقطعي وشيلتي وشعري المشيب ... وامسك سبحتي بيدي المحناة وانتظر شايب الأحلام ينعمي على عيونه ويجي يخطبني ... مالت عليه وعلى عيونه

 

[نوره 99]

(( بيت العز ... يابيتنا ))

دايما نسمع عن بيت تحول مدرسه ... تحول روضه .. تحول مستشفى ... تحول دار مسنين .. تحول قاعة أفراح .. تحول فندق ... تحول صالون ... بس بيت يجمع كل هذا !! .. لا تطاليعني بنص عين وتقولين مافيه .. الا فيه .. بيت العز بيتنا ... وصاير بعد مكتب ايجار خدم وسواقين بعد .. بنت عمتي زوجها بيسافر واختباراتها قربت ماتقدر تسافر معه ... عادي .. أمها تكلم راعي بيت العز وبيوافق على طول وبيروح يشتري مرتبة سرير جديده ومفرش جديد وينقي لها أحسن مكان بالغرفه ونربط شياطينا لحد ماتروح بالسلامه .. بنت خالتي مريضه وجايه الرياض ولا يبون أحد يدري ... بسيطه .. أمها تكلم راعية بيت العز وتعطيها خبر لأنها واثقه من الموافقه وبظرف يومين تغسل الحوش وتنظفت الغرف وتجهز السرير والأثاث وحتى المجلس استعداد لاستقبالها + الضيوف اللي بيزورونها ... جناح ملكي فايف ستار .. والخدمه 24 ساعه وكل يوم فقره ترفيهيه ولها ولضيوفها ... خالتي عندهم زواج .. طبعا لازم حنا نكون محطة الأنطلاق .. تجيب أغراضها قبل بيوم ع أساس نجهز المكان يعني .. تحوس بيتنا فوق تحت .. وتطلع للعرس كاشخه مع بناتها ... عاد خالتي هذي انفة الذكر حدث ولا حرج ... لو تجي تعيش عندنا أحسن .. تلبس عندنا .. تاكل عندنا .. تنام عندنا .. مشتاقه لأحد تعزمه ببيتنا وعلى شرف ميزانية الوالد طبعا .. تبي تروح السوق تحط بزرها عندنا .. حتى اللي يجيبها ويوديها سواقنا ... والحمدلله أن عندها خدامه عشان ماتحتاج خدامه ... على طاري السواق والخدامه .. أي واحد يشتغل ببيت العز بيتنا بيدخل الجنه ... خوالي عندهم عزيمه لازم خدامتنا تحط لمساتها بالعزيمه .. أما البقيه يحتاجون خداماتهم مايقدرون ... زوجة خالي بتنقل بيت جديد ... لازم خدامتنا تساعدها ... خواتها الـ12 ماشاء الله مايقدرون .. عمتي تتوحم وعيالها صغار .. خدامتنا السوبر ومن ماتقصر .. وبالنهايه ترجع لنا بطاريتها منتهيه وبيدها خمسين ريال والا جلابيه ع أساس أجره يعني ... طيب حنا وش نستفيد ... عاد أمي انقرصت وتابت خدامتنا الجديده لم يتم تأجيرها حتى الان ولله الحمد ... نروح السواق ... سواقنا لو يشتغل على تاكسي اصرف له من أنه يكرف لناس مو محسوب عليهم ... بالدراسه يستلمه عمي مع عياله على أساس انه مدرسة ولده بالطريق .. ومو مشكله لو ولده يتأخر على أخوي ويحل المقعد الأمامي بالسياره وينام طول الطريق وينزل المرتبه وفوق هذا يتبلى على أخوي ويقول هو اللي يأخرني ... بس مشكله أن أخوه الكبير اللي دوامه الساعه 8 يتلحلح من فراشه ويوصل أخوه ... وخارج أوقات الدوام الرسمي خالتي اللي ليتها عايشه معنا تستلمه ... عندي موعد بالمستشفى ... البلوزه اللي أمس شريتها طلعت كبيره بروح أبدلها ... بنتها تحتاج ملزمه من المكتبه عادي سواقنا يطق مشوار لبيتهم ويروح يجيبها ... وبموسم الزواجات تداوم رسمي عندنا والأعياد تداوم رسمي عندنا عشان يمدي تخلص أغراضها ... طيب زوجك وولدك اللي متبطحين بالبيت وش مهنتهم ؟؟ ... والنكته الأكبر بيوم من الأيام احتجنا سواق خالتي طبعا غير المذكوره انفا ... وكان الطلب بسيط تصادفنا معهم بسوق وقلنا الله يعافيكم اذا جيتوا تروحون وصلونا معكم لبيتنا ... يعني انتم موجودين موجودين ... وطالعين طالعين ... ماراح تكلفون على نفسكم ... وكان الرد بكل بجاحه السياره ماتكفي ... مع أن هالسياره نفسها ضفتنا معهم و5 زياده معنا ... ودارت الأيام وطلبوا نفس الطلب وطبعا لو وقفت على أمي وأبوي عاادي .. بس أنا وخواتي وقفنا وقفة رجل وقلنا على جثتنا ياخذونه والحمدلله ماخذوه ... وخالتي القاطنه خارج مدينتنا مجرد ماتجي تسوي برنامج سياحي مع سواقنا ... يوم بتروح تتقضى مو السوبر ماركت ويوم بتروح السوق ويوم بتروح تزور فلانه ... وطبعا من جهتنا حنا نسوي مع بناتها برنامج سياحي فيصير دوام الفقير المسكين مضاعف .. ولا أحد يرضى يتنازل .. وعماتي مايقصرون ... وحده بتروح بيت جدتي وتبي السواق يوصلها .. طيب سواقك وينه ؟؟ ... جالس متبطح بملحقه يطالع التلفزيون هو فلافل شعره المزيته ... على أساس بيحرس البيت >> البيت الأبيض مثلا !! ... ومجرد ماتنزل فيه برنسيسه ثانيه من عماتي واقفه عند الباب خلص شفتها وبترجع بيتها ...كل هذا وحنا ننتظره يجيب طلبنا من ماك ... وتخلص الرحله المكوكيه بعمه أخرى بتروح بيتها وتتصل (( تبون أجيب طلبكم من المطعم !! ))
الساعه تسع الصبح يقوم أبوي من نص نومه مفزوع ... المتصل عمتي عندها موعد بالمستشفى ... ولدك وزوجك وينهم ؟؟؟
وطبعا كان ذاك اليوم الحافل بمشاوير عماتي حديث الساعه بين أوساط خالاتي وأن السواق في ذاك اليوم انكرف كرف الحمير ... خالاتي العزيزات ... على أساس انتم مريحينه مثلا !!
في الزمن الغابر لما ماكان عندنا بيت عز يكفيهم ... ولا كان عندنا سواق يوديهم مشاويرهم ولا خدامه يكرفونها ببيتهم ... كان بيتنا زهق .. وجلستنا ممله ... واجتماعنا يجيب الغلقه .. أصلا مجرد ماتخلص الحاجه الوجه من الوجه أبيض ... اليوم اللي ماتزورنا فيه خالتي وحده من ثنيتن ماعندها مشاوير أو معزومه عند أهل زوجها .. باليوم اللي تفكر فيه بنت خالتي تزورنا أعرف انها اتصلت على كل الأشخاص الممكن زيارتهم ومالقت غيرنا ... والبجاحه الأكبر اذا جت ومالقت أحد غيرنا أصحاب بيت العز نطقت بكل بجاحه (( كان علمتوني عشان ما أجي )) فيه ابجح من كذا !! ... اليوم اللي تجي خالتي مع بناتها عن بكرة أبيهم وحده من ثنتيهم ... ياسواقهم مسافر أو سواقهم مسافر ...
محد يبي يزورنا عشان يزورنا ... بنت خالتي اذا جوا من ديرتهم يجون عندنا بس لأن بيت جدتي ملل ... اثنين اشتاقوا لبعض يدقون على بعض ويطبون علينا ماعندهم مشكله ... بنت عمتي اذا جت الأجازه وصار مافي بخشتها غيرنا ياحبيلكم ويازينكم .. واذا جاء العيد تعايد اللي تحبهم وتستثنينا ...
على كل اللي نعطيه ... مالنا أي تقدير واحترام ... ولا حتى مكانه أتوقع ... يروحون يدورون وناستهم عند غيرنا واذا جت الحاجه مايلقون أحد فاتح بيته غيرنا .. مدري متى أبوي يمتلك الجرأه ويقول لا مثل مايقولون باقي عمامي .. ومدري متى امي تستوعب أن اللي صاير مجرد استغلال لا أكثر ...أوكي نساعد .. قرايبنا وعلى عيني وعلى راسي ... لكن وين المقابل !! ... بتقولون سو خير وقطه بحر !! ... هذا غباء .. الواحد يسوي الخير عشان يفرض حبه واحترامه ... وأنا ماشوف لا حب ولا احترام ... أحساس مقرف أنك شخص ملطشه ياخذون حقك قدام عيونك وفوق هذا يذمون ومو عاجبهم ...
أنا وخواتي صرنا نتضايق من الوضع ونتضايق كثيييير بعد ... اللي صاير فوق المعقول ... ديوان السبيل مو بيتنا ... الواحد يجامل مره ومرتين وعشر بس مب طول العمر ... اشتغلنا أنا وأختي للحد من هذه الظاهره ...أختي تخصص تدبير مكايد وشغل من تحت لتحت ... وأنا تخصص نغزات ومعاير .. ومن له حيلة فليحتال ... والحمدلله هذي الخطه في طريقها للنجاح ... مع أني أحس بدوا يكرهوني ويستثقلون نغزاتي بس أهم شي جابت نتايجها ... وأهم شي يعرفون أنهم ماياخذون كل شي مننا بالساهل ... وأن الناس اللي تعطينهم الكلام الحلو والعزايم ماراح يفيدونك بشي من غيرنا ... ويارب يتمم علينا ويجي اليوم اللي تدق فيه خالتي تبي السواق وأمي تقول لا ... يااارب

 

[نوره 99]

(( ألا يحق لي أن أكرهـه ))

كان يا مكان ... في حاضر العصر والأوان ... كان في ضيف ثقيل اقتحم حياتنا ... ورغم كرهنا لهذا الضيف تحملناه على قد مانقدر ... توفر له المكان والأمان بما يسمح بظروفه الصحيه ... ولا ضايقناه لا بكلمه ولا بنظره ... وأنا شخصينا تجنبته لعلمي المسبق بما سيحدث ... مجموع اللحظات اللي أشوفها فيه يمكن ساعه أو أقل باليوم ... ومع ذلك ماسلمت ... ضيفنا عدى الثلاث أيام وقام يتمادى ... وعطى نفسه الحق بالتدخل بشؤون بحياتنا ... وقام يوجهنا للي بنظره هو صح ... بالعربي تارك مشاكله وهمومه وحياته ومافيها من أخطاء وعين نفسه مصلح أجتماعي ببيتنا ... الغريبه أن المصلح الأجتماعي مايتدخل ألا أذا في مشكله أو أحد شكى له الحال ... لكن في حالتنا هذي غير ... لا في مشكله ولا حد شكى له الحال ...
ساعه وحده باليوم ... وفي كل مره لازم بالتلميح أو التصريح يعطينا من نصايحه الثمينه المكتوبه بماء الذهب ... ولا ينسى أن يذيل مصلحنا الأجتماعي نصيحته بالتنويه على أنه أكبر منا سنا ... وأن اللي يقوله غصب طيب هو الصح
مع أن الفرق بينا وبينه لا يتجاوز العشر سنوات ... بتقولون لي أكبر منك بيوم افهم منك بسنه !! ... بقولكم هذا الشخص ماخذ الأوسكار بالعناد وركوب الراس ... ومايسمح لكائن من كان يتدخل بحياته ... حتى لو كان هذا الشخص أمه اللي جابته ...
هذا الشخص مو عاجبه نظام نومنا ووصفنا بأننا ضيوف شرف بالبيت ... وكأنه هو اللي شايل البيت فوق راسه
مو عاجبه كثرة طلعاتنا من البيت .. وأننا لازم قبل مانطلع نشوف أمي أو خالتي أذا محتاجينه .. وبنظره طبعا هم أولى ويمكن يحتاجونه ... أمي نقول راعية البيت ... بس خالتي بأي صفه تقط معنا !!
أكثر مايغيض هذا الشخص لما يشوفنا لابسين عباياتنا وبنطلع ...ولا يدري وين بنروح ... وحتى لو عرف ... لازم يقطب حاجبيه (( ولا تعلمون ولا تستأذنون ؟؟ )) ... مادري وش يبي هذا الشخص من الحياه ... نقيم مراسم الأستئذان قدامه ... والا ناخذ الأذن من حضرة جنابه مثلا !!
هذا الشخص لطالما وصفنا بالكسل والرباده وكثرة النوم ... ولطالما أمتعنا بحديثه عن بطولاته بالسنع والذرابه ... ولطالما أصر أننا ماراح نوصل مواصيله .. وأنه مهما كان يحمل من سوء يظل أفضل مننا بكثيييير ... وكأنه يريد أن يمحي من ذاكرتنا أيامه الغابره مع السهر والتبطح أمام شاشة التلفزيون .. وكأنه يريد أن يمحي من ذاكرتنا أنه كان يحلل ذلك على نفسه ويحرمه على اللي أصغر منه ..
مازال ينظر ألينا أولئك الأطفال اللي مسيطر عليهم بلسانه وبحكم فرق العشر سنوات اللي بيننا وبينه ... الأطفال اللي في كل أجتماع يحرمهم من التلفزيون من اللعب من القهوه من الصراخ من السهر ولو بيديه لذبحهم في عيد الأضحى جميعا بدل الخرفان ... والحجه في ذلك ...(( بزران )) ...كرهت اليوم اللي كنت فيه بزر بسببه ...
رغم كل ماحدث ردة فعلنا كانت كما علمتني أمي ... ابلعيها واسكتي ... مراعاة لحالته الصحيه ... لكنه ربما ضيع الطريق ... وعلى باله البزران اللي ماتجرؤا يردون عليه وهم صغار .. أكيد ماراح يردون عليه لما كبروا ...
الفتره الطويله جدا اللي عشناها دون احتكاك مباشر عطاه نظره أننا مازلنا على طمام المرحوم ... هههه ... ياللسذاجه
هذا الشخص مازال يتمادى ... وكل يوم يزيد الجرعه حبتين ... بعضها شهدت عليها شخصيا والكثير منها كانت تصلني بالسواليف فقط ...
ومازالت ردة فعلنا هو الصمت فقط ...
هذا الشخص لم يسمع بمقولة ... اتق شر الحليم اذا غضب ... وبالأمس القريب زاد الجرعه حبتين .. بحضورنا جميعنا ... وكأنه ينتظر هالفرصه من زمان ...
كل اللي صار بيننا مجرد مناوشه بسيطه ... من جهتي كانت ردود مبطنه مغلفه بقليل من الأحترام والكثير من الغضب والجديه ... ومن جهته مجرد الرد كان جريمه وبين كل كلمه وأخرى (( انا اكبر منك ولازم تسمعيني ))
الكثير من الكلمات مابين الصريح والوقح كانت تقف في أقصى حلقي ومامنعها من الخروج ألا وصايا أمي .. الحاله الصحيه .. ضيف ولازم نحترمه .. لاتفشلوني ...
انسحبت من المكان بسرعه قبل ان انفجر وافجر جام غضبي فيه ...
المؤسف بالموضوع أن أمي ماشهدت علينا ... وأني بعد ماسردت الحادثه عليها طلعت أنا الغطانه ... وبعد دقائق معدوده جاني اتصال من الوالد شديد اللهجه بأن احفظ لساني واحترم نفسي ...
كل هذا وأنا ماتكلمت ولا طلعت اللي بخاطري مثل مايقولون ... أجل لو تكلمت أكيد بينحروني ...
أصعب شعور أنك تتهم وأنت مظلوم .. ومن أقرب الناس لك ... لو هم امتصوا غضبي بكلمتين والله العظيم بسكت ... لكن الغريب أنهم قلبوا الطاوله علي مثل مايقولون ... كأسلوب ترهيب عشان ماتكلم ...
وبمجرد ماوصل الوالد للبيت سردنا له السالفه وأصر على خطأنا بدون نقاش ... وأني لازم اسكت عشان الظروف الصحيه لهالشخص ... وأنه لو يشرشح أبو جدي يبقى له كل الأحترام والتقدير عشان ربي مايبلاني وأكون يوم من الأيام مكانه ... لدرجة شكيت بعمري اذا انا فعلا غلطت والا لا ... غصب بيحسسوني بتأنيب الضمير وأنه لو صار شي بيكون بسببي ... رغم أن هذا الشخص بهذي اللحظه كان يقهقه مع أمه وخواته تحت !! .... قلت لأمي قدامه هالمره عديتها بس والله المره الثانيه ماراح اسكت وبرد الكلمه عشر مثل مايقولون ... وأننا مانسمح لشخص كائن من كان يتدخل بحياتنا مادام أمي وأبوي عايشين ... وأساسا هذا الشخص مايسمح لأحد يتدخل بحياته ... كيف يعطي نفسه الحق بالتدخل بحياتنا !! ...
بعد كل هذا ... ألا يحق لي أن أكرهه ؟؟؟

 

[نوره 99]

(( للوراء ... در ))

كنت دايما أقول أنو أبشع مرحله بمشوار حياة الأنسان هي الأنتكاسه ... وأخذني الغرور ولا تخيلت نفسي أني بمر بهالمرحله ... كنت أمثل على نفسي القوه ... توشحت بوشاح القوه .. والنظرات الحاده .. والنفسيه الخايسه ... بس نسيت أنزع وشاح الضعف ... وشاح السلبيه ... وشاح الأستسلام من أول صدمه ... الكثير يحس أني أبالغ لما أكره أشخاص انحطيت بمواقف معهم وأنا صغيره ... حسسوني أني أنسانه حقوده وغير متسامحه ... هالكثير مايعرف ألا هالنقطه ... مايعرف أسلوب هالأشخاص بتعاملهم معي ... مايعرف نظرتهم لي ... مايعرف بالضبط المواقف اللي جمعتني فيهم ... مايعرف تأثير هالمواقف على شخصيتي وعلى تعاملي مع الناس من حولي ... مايعرف أني من ثلاث سنوات بس صحيت من الكابوس ... وقررت أطور من نفسي كأنسانه من حيث الجوهر وبغض النظر عن المظهر ... مايعرف أني لما بديت أحط أعمدة الأساس .. فجأه ... ريح الماضي اللي قررت أنساه رجعت ... واقتلعت هالأعمده من جذورها ... أنا رجعت أنا ... الأنسانه الأنطوائيه كثيرة الأنعزال ... اللي بأي اجتماع ياتدفن نفسها بالمطبخ أو تجلس مجرد مستمعه وأذا كانت مقفله معها هربت وتحججت بالنوم ... الأنسانه اللي تخاف من أي شي تسويه حتى لو كان صح ... الأنسانه اللي ماتاكل الا لما تحس أنها بتموت من الجوع ... حتى الأطباع السيئه اللي جاهدت أتركها رجعت من دون ماحس ... كرهت نفسي ... من جد أحس أني كرهت نفسي ... وكرهت كل العالم اللي حولي ... أبي ثواني من وقت هالعالم بس ... ثواني بس يوقف ... ويعطيني فرصه التفت حوالي واستوعب اللي يصير ... معقوله كل اللي بنيته ... انهد !! ... معقوله سمحت للماضي بنفخه وحده بس يطير كل الأوراق اللي تعبت بتجميعها !! ... ليش وقفت !! ... ليش سكت !! ... ليش استسلمت !! ...
لأني ضعيفه ... ضعيييييييييييييييفه ... وببقى طول عمري ضعيفه

 

[cup cake's]

صرااااااااااااااااحه اعجبتني طريقتج بالطرح ... أسلوبج روعه ما شاء الله عليج ...

<<< على فكره ترا بس قريت مقاطع صغيره من كلامج و لي رجعه إن شاء الله

واصلي حبيبتي