مشاركة: كل وحده تدش وتسولفلنا عن تجربتها مع الولاده
يا بنات شخباركم؟
طبعاً كل وحدة مثل ما تعرفون يختلف حملها عن الثانية
فينا الي تتوحم وفينا الي ما تتوحم
وفينا الي تولد طبيعي وفينا الي تولد قيصرية
المهم انا الحين راح احكي لكم حكايتي مع الحمل واتمنى منكم ان كل وحدة تعطيني رايها في حمليوولادتي.
قصتي طويلة وتحملوها
المهم يا حلوات انا انخطبت وبعد شهر صار لي حمل وبعدها سرعنا في الزواج تزوجت وانا توني مكملة الشهر الثاني من الحمل.
المهم بصراحة الله ستر علي وما صادني وحم الا شيء خفيف دوار ولوعة ونوم، لاكن الألتهابات ما وقفت من بداية الحمل لي النهاية.
عدت الأشهر على خير، وجا الأسبوع الأخير من الحمل ورحت للطبيبه للمتابعة الا وتقول لي عندج فكرة انج تولدين قيصرية ليش؟؟؟ قالت لي ان البيبي معترض الراس فوق والمقعد تحت وانتي بجر ( يعني اول ولادة) ولازم ترقدين الحين ولأنج فيج ولادة ومنفتحة 3 سانتي (سبحان الله بدون الم) المهم طلعت برة لزوجي وقعدت ابكي وقال لي خير وقلت له بالموضوع يقول لي انزين يمكن فيج ولادة صج قلت له شلون وبدون ألم ما يصير
والله يا بنات ما كنت احس بأي شيء
المهم اتصلت في امي وقالت لي اوكي رقدي بس لا يولدونج قيصرية وانا الحين جاية لج
المهم ما في الم لي الليل ولا في اي شي من اعراض الولادة
والقهر ان دكتورة داخلة ودكتورة طالعة : سوي عملية - شفيها يعني -تبين تموتين انتي ولا البيبي-مستحيل تولدين طبيعي -البيبي بيطلع معاق-لازم تسوين -او توقعين ما تبين عملية وتتحملين المسئولية
المهم حسيت راسي بينفجر من الكلام الي قالوه لي ووجع الراس لا وما يتكلمون جذي بهواش
وبعدها قلت آنا شلي قاعدة خل اقوم اطلع من المستشفى
ناديت الدكتورة وقلت لها بطلع شيلي السيلان المغذي قالت ما يصير
انا اصريت ووافقت اطلع بشرط توقيع بتحمل المسئولية ووقعت انا وزوجي وطلعت
المهم رحت لمراختين ويقولون لي ما عليج منهم البيبي وضعه اوكي الراس تحت
وبعد ثلاثة ايام باليل قعدت الم فضيع كنت ابكي قعد زوجي - شفيج -قلت له ألم فضيع في بطني
قال بتولدين قومي المستشفى
رحنا انا نزلني اول وخذيت معاي الأوراق المطلوبه
المهم من شافوا التقرير وقرأوه قالوا لي تولدين قيصري قلت لهم لا وناحستهم وهم وقعنا انا وزوجي
الله كاتب هالولادة كلها تواقيع هههههه
الحمد لله كلها خمس ساعات نزاع وقربت الولادة
جات القابلة تفحص الا تقول الحين بتولدين ، لا وبتجيبن ولد عرفتي قبل لا يطلع لأن خصيتينه اول شيء طله منه ونادت الدكتورة بسرعه وجاو مع الممرضات والله مجموعهم يمكن سبع
وقعدوني نصف جلوس
المهم يقولون لي البيبي موصخ يعني خرج فقعدوا يطهرونه بالسافلون
وبعدها الدكتورة طقتني ابرتين بنج في الرحم وجهزت المقص والموس
وبعدها قالوا لي عصري عصري عصري
وطلعت خلفية البيبي والظهر وانا اشوف ( لأني كنت نصف جلوس
وبعدين تقول لي يالله بسرعة لا يموت البيبي عصري عصري
وشوي الا والبيبي يدخل مرة ثانيه وتمسكه الدكتورة وهي تسمي بالرحمن
وقالت لي يالله البيبي بيموت عصري
عصرت وعصرت وعصرت
وطلع آه ه ه ه ه ه ه ه ه ه ه
وشالته وتقطة على بطني بقوة قلبته وحبيته وبعدها استلقيت ونبطحت
طبعا البيبي ما صاح
وخذوه عندهم
بعدها جذي دقيقتين جاتني حواس ان البيبي ما صاح
قلت للدكتورة وهي تخيط وينه ابي اشوفه ماااات قالت لا
بينظفونه وبيبونه
وبعد 45 دقيقة تقريبا جابوه لي بعد ما كملت الدكتورة خياطها
وطلع بالسلامة ( علاوي )
صح انه تم فترة يمكن لي الشهر الخامس واهو ما ينام الا على صوب راسه صار طويلي لوره
الحمد لله قمت بالسلامة
صدني بواسير وتميت فترة اعاني منه ومن لخياط حتى قمت امشي واعرج الحمد لله
الحين ماذا عن الولادة الثانية ؟؟؟
الله يستر يا رب
مللتكم صح بنات وطولت عليكم
سمعوا قصتي هذي مالت هذا الحمل انا الحين بنهاية الثامن يعني قريب بولد
هذي من الحمل ما ترقعت
بنات كل وحده خاطرها تروح العمرة
انا خاطري اروح من كنت بالمدرسة بس ضروفي ما تناسبني المادة موجودة بس الضروف وكتبت الله
عاد الله كتب اروح وانا حامل بالشهر السابع
رحت انا وثنتين من خواتي وبصراحة الله يعودنا وايد حلوة العمرة بس يا فرحة ما تمت
يوم الرابع لي واحنا بمكة كنا بنطلع بنروح عند النبي المدينه
كنت رايحة الحرم اصلي الفجر بيت الله فجأة ريلي انلوت وطحت عليها
آه ه ه ه ه ه ه ه
ما صادني الا الم خفيف ، قمت وواصلت ورحت الحرم وصليت وهي بدت تنتفخ
وصلنا الفندق نزلنا اغراضنا وركبنا الباص ورحنا المدينه
المهم في الباص كان النفخ يزيد يزيد
من وصلنا مكة رحت المستشفى قالوا لي كسر
حملوثقل + كسر؟؟؟؟؟؟!!!!!!!!!
وطبعاً جبسوها
رجعت البلد ورحت لي خاص عظام ( القدم ) ومثل الشيء قال لي كسر وجبسها وتمت علي شهر
وبعد الشهر يعني قبل اسبوعين شال الجبس وقال لي غسلي ريلج وتعالي غرفة الفحص ورحت بمساعدة الممرضة
وبعدها قعد يفحصها طلع بيها طقة ( صوت )
قال لي هذا الكسر لحين ما التأم
وبتحتاجين جراحة
والحين ما اقدر اسويج لأنج حامل لاكن بعد الولادة بأسبوعين بسوي لج العملية
قلت له والحين يا دكتور ما اريد الجبس ولبي على الثقل
قال وانا بعد من رايي ما بحط لج لأنج معرضة لجلطة بالرجل بالجبس في هذي الأشهر من الحمل
بس حاسبي لها ولا تمشين عليها وتعالي لي قبل الولادة باسبوع وبعدها مباشرة عشان نحدد العملية متى .
هذي قصتي مع الحمل الثاني
والحين انا خايفة من الولادة
والله يستر كلش مو مترقعة حظي جذي
هذي الحمله شوي اثقل من الأولى
أقول انشاء الله على هذا الي صادني تكون الولادة سهله والله كريم
ونسألكم الدعاء يا بنات
--------------------------------------------------------------------------------
