قصة كويتية اتحداكم ماتندمجون معاها...

[كوووكه]

روعه القصه حبيبتي
ياريت تكملين القصه الحين كلها بليز ابي اعرف النهايه
بطت جبدي مناير اشلون ترضى واهي تدري ان مايبيها
ما اقدر انام قبل لا اعرف شنو صار -انا ناطره الحين بليز كووكه كمليييييييي

حاضر عشانج بنزل بارت والله تستاهلين ... وبعد ماتقرينه تروحين تنامين وراج دوام,,فاهمه..:rerrerek:<<هههههههه

 

[كوووكه]

الجزء الثاني عشر,,,​

جراح: يمه صبري نص ساعه...رفيجي ملج خليني ابارك له و اطلع..
ام جراح: انزين انزين..لاتبطي(لاتتأخر) ناطرينك

وسكرت ام جراح التليفوون..

مها: شقال جرااح...

ام جراح: يقول رفيجه ملج يبارك له وياي مهو مطول

مها ( بدت شفايفها ترجف):شقال يمه شقال!

ام جراح: ياي يمه ياي مهو طول

مها: جراح شقال يمه

ام جراح: يمه مها شفيييج قال انه ياي
مها: يبارك لرفيجه
ام جراح: اي يقول جذي وبعدها بيي ياخذج ماراح يطول...
مها( بعيونها دمعه ترجف حطت راسها بين ريووولها وفجأه طلع منها صووت نحيب من اعماااقهااا)...

=========================================

جراح: بالمبارك يابو ناصر بالمبارك
بدر: يبارك فييك
جراح: ليش ياي الدوانيه في اكووو واحد غبي يهد مرته بيوم الملجه ؟؟
بدر: ناطرها تبدل باخذها المطعم
جراح ( حس برفيجه متضاايق وحب يختصر الحجي بدون لقافه): يلا يابوناصر الله يوفقك انشالله ..انا ماشي الحين

بدر: وين جراح ووين؟؟.خلك اقعد شوي

جراح: لا داقين علي الاهل يبوني اخذهم المستشفى

بدر ( فز قلبه): ليش..منو من اهلك تعبان

جراح: مهووو وعيارة تالي الليل ..

بدر(وصوته يرجف): نخيتك طمني عليها

جراح: اي انشالله اطمنك..يلا بو ناصر نشوفك على خير ولاتقطع مانبي الزواج ياخذك منا

بدر: على خير يالغالي....

سرح بدر ...وكااان خالد يقرق على راسه بس بدر مو معاه
روحه وقلبه مع مها...روحه تبي مهااا...ورافضه غيرها...بس اللي صار يجبره يتنساها ..روحه تحــبها..روحه ماتبي غير وحده وبس.....مها...

ان كـــان ربي ماكتب لي معك نصيب..
أفترقنا و صرت بحياتك شخصٍِ غريب..
ياللـــه توفقها في كل الدروب..
ويسعدج في كل شروق و كل غــــروب..

بدر حط راسه بين كفوفه ...
خالد: بدر!!!..شفيك ياريال ؟..ارفع راسك...شيقوولون الريااايييل عنك الحين

بدر( رفع راسه وبانت دمعه بعينه..وبصوت مخنوق ):ما اقدر يابدر ما اقدر..

خالد: شنو ما تقدرررر تعوذ من ابليس يااارياااال..في معرس بيوم ملجته هاذي حالته

بدر(نزلت دمعته على خده): مقهور ياخالد مقهووور..احس اني مخنووق مو قادر ياخالد

خالد: مو قادر شنووو انت شفييييك

بدر: ما ابيها ياخالد..ما ابلعهاا..قلبي مايبيها ياخالد..مايبيهااا

خالد: يرحملي وااااالديك ارحم حالك ياريال ..شذنبها البنت شذنبها...صدقني بعد الزواج كل شي بيتغيررر

بدر: ما اتخيل روحي معاها ..مادري شلون بنجتمع انا واهي بسكن واحد

خالد: ياريااااال خاف ربك انت شقاعد تقوووول اسكت بس وارفع رااسك لحد يحس بشي
بدر: ياخالد حس فيني آنا...
خالد( يقطع كلامه): بس اسكت...حاس فيييك ..خلاص اسكت...الحين المره بتاخذها تعشيهااا..لاتحسسها بشي ...الله يخلييييك..وانشالله لي صرتوا مع بعض بسكن واحد كل شي يتغير صدقني

بدر( رفع ايده فوق): مو فاهمني ...ياريال ما أبيها

خالد: الكلمه يت متأخره..عمك بيناديك الحين و يقولك المره جهزت..لاتحسسه بشي...تعوذ من ابليس ياريال وانشالله بتكون خيره لك..."وعسى ان تكرهوا شي وهو خيرا لكم"

بدر ( نزل رااااسه)...
خالد: كاهو عمك يناديك ...قوم فز مثل الريااييل..ولا تحسسه ان فييك شي...وانشالله مع العشره بتحبها...صدقني الحب اييي بعد الزواج ياريال

بدر( طالع خالد بنظره حسسه فيها ان مو فاهم شي ولا قادر يفهم احساس بدر...وقام وقف يم عمه مبارك...)

========================================

جراح بالسيااره..رن تليفونه
جراح: يمه ياي كاني بالطرييييج
ام جراح: انزل يمه شيلها معااي البنت تعبانه مو قادره تمشي
جراح: مو قادره تمشي؟...يلا يمه ياي كاني داش المنطقه
ام جراح: بسرعه ياريال تراني خايفه ..قلبي قارصني حاسه ان فيها شي
جراح: انشالله ماشر يا ام جراح ..وكاني ياي..

==========================================

بالدوانيه...

مبارك: العروس جهزت تعال خذها من داخل..ما اوصيك على بنتي..عطيتك اغلى ماعندي
بدر(نزل راسه): بعيوني
مبارك: تسلم ياولد اخوي..

دخل بدر عليها لقاها بالصاااله جاهزه ومنغثه لأن ماخل معاها داخل واهي تبدل حاله حال اي معرس..وامها قنعتها بأن الريال مستحي وباجر يتعوود....

عمه وقف يمه...
مبارك: يلا مناير قومي مع ريلج
فوزيه: كلولولووولولولوولولوش..ألف الصلاة والسلام عليك ياحبيب الله محمد
ام بدر: كلولولولوولولوولولولولوش
مناير رفعت راسها ويت عينها بعييين بدر..حسته ما يبيها بكل مافيه..باين بعيونه و واضح وضووووح الشمس....بس حاولت تخدع روحهااا قامت وقفت ....

( كان لبسها عباره عن تنووره رااقيه حييييل لونها بيج وقميص تحته بدي وشيله شوارفيسكي بيج و جنطتها كانت شانيل ..كعب عااالي...وكل مافيها كشخه وذرررررررررررررب وراقي حيل)

ام بدر: شفيك بدر مستحي خلاص المره وصارت مرتك على سنة الله ورسوله قرب يود(امسك) ايدهااا
بدر عفس ملامحه وقرب من مناير و مسك ايدها..

فوزيه: كلولولوولولولوولوولش...مشالله لا اله الا الله ...الله يحفظكم ياعيالي ويحرسكم من العين

ام بدر: مشالله شحلاتكم مع بعض الله لا يفرق شملكم و منك المال يابدر و منها العياااال
بدر ( ابتسم ابتسامه ماكان فيها نوع من الأرتيااح..مجرد انه حرك شفاه...لا اكثر ولا اقل..
وقلبه كان مع مهاا...شصار عليها الحين....حبيبتي تعبانه...تعبانه مها...)

===============================================
ام جراح : شوي شوي عليهااا يمه..
جراح: يلا كا...حطي ريلج مهااا..

مها حطت ريلها داخل السياره وانسدحت دااخلهاا...واول ماحطت راسها على الكشن...بدت تقمت حرقتهااا...

بس بان صوتها واهي تبجي وتحاول تقمت صوووتها وحاطه شفايفها ع الكشن ودموعها كانت حاااااره تنزل بكل ببطىء..وتعفس ملامحهاا ...وتحس بخنقه مو طبيعيه بصدرهاا...

ام جراح: استعيل ياااريااال البنت مادري شفييها..يمه بنيتي..من انقبلت بالجامعه واهي مو مترقعه..يالله انك تحفظها لي..يارب

جراح: لا ماشر انشالله ...مهااا حبيبتي بسج دلع خرعتي الوالده

مها( كانت ترجف رفعت راسها شوي...وردت حطته ع الكشن...خصلاتها تبللت دموووع).....وذاكرتها كانت تعيد عليها صور واحاديث


...من الماااضــــــي...

[[[[[[[[مها: اكلم شوق
بدر: بليييييييييه بعد شوق
مها: حبيبي شوق نصي الثاني
بدر: وآنا؟
مها: انته انا
بدر: انا شنو؟
مها: إنته آآنا..وآنا إنته
بدر: يابعد طوايفي وهلي وكل ناسي احبج يامها احبج
مها: اموووووووت فيك
بدر: ماراح اخليج مها
مها: فال الله ولا فالك شياب طاري الفراق الحين
بدر: كلمه كنت بقولها..والحين قلتها وانا مرتااح
مها: عسى دوم مرتااح حبيبي
بدر: وعسى الله لايحرمني من وجودج بحياتي
مها: وعسى الله لايغير علينا حبيبي
بدر:آآمين ياقلبي]]]]]]]]]]]]]


صوت نحيبها كان يزداد......وبدت تبجي بحسرررره....بس تحاول تكتم صوووتها كثر ماتقدررر...بس للأسف خانتها مشاعرهاا..اللي كانت باينه بكل وضووح..مقهوره.....مختنقه...والطريج...لأول مره تحسه طووووويل..

============================================

شوق حطت راسها ع السرير و نثرت خصلآآآآتها ع الوساده(المخده)...وسرحت تطالع سقف الغرفه......
شوق (تكلم نفسها)..بعد اسبوعين من اليوم..راح ابدى حياة يديده...
راح اربط روحي بإنسان ما اعرف عنه شي....اللهم اسمه و شهادته...
راح اعيش معاااه..وانام ليلتي يمه...
سرير واااحد..
وانا ماعندي فكره عن اطباعه..ولا حتى قعدت معاااه ...
كل شي صار بسرعه ...استعيلتي يايمه....
انشالله يارب يكون مثل ماتمنيته
ينسيني حمد..واللي خلفوه..
وابدى معااااه حياه يديده..
واطوي صفحة شغب الماضي
بما فيها من طفوله..ومراهقه...
وابدا حيـــاة يديده..
=========================================
بدر ركب مع مناير السياااره.....

والحريم لاحقينهم لي باب السياره
فوزيه: ديربالك على بنتي يابدر...تراهي عيوني هاذي
بدر (( ابتسم...ماكان قادر يتقبل ولا كلمه من خالته مرت عمه))
ام بدر ( حاولت ترقع الموقف): بعيوونه يافوزيه وان ماكفتها عيووونه اشيلها بعيوني

فوزيه: تسلملي عويناتج..( جمع عيون بالكويتي)
مناير كانت تبتسم ابتسامه باررررده...

وبعد دقااايق..
فوزيه: في حفظ الرحمن
ام بدر: الله معااااكم

حرررك بدر......

=========================================

جراح نزل بسرعه للطوارىء...

جراح: لو سمحت...محتاجييين وول جير ( كرسي متحرك)

شالوا مها وقعدت على الكرسي...ودزوها لي غرفة الدكتوووور...
الدكتور: عسى ماشرر
جراح: تعبت شوي و يبناها طمنا دكتور
الدكتور قاس ضغطها وشاف حرارتهااا ...وطلب منها تنسدح ع السرير ...
الدكتور: مها تسمعيني


مها تفتح عينها بصعوووبه...

الدكتور: تنفسي...
مها تحاول تتنفس .....
الدكتور...طلب من السستر الاكسجين ...وحط الاكسجين لهاا...

مها كانت عيونها تدمع ...بس كانت هاديه والاكسجييين يغطي نص ويهها وتتنفس....بس بصعوووبه..

=================================================


السياره...
بدر كااان هااااااادي بس بنفس الوقت متوترررر...كل تفكيره كان بمهاا..آآخ يمها آآآآخ
شصار عليج ياقلبي الحين.....

مناير كانت رافعه حاااجب..ومنغثه لأنه ماكان امعبرهااا..
اخيرا" قررت تنطق..
مناير: حبيبي
بدر كان سارح وما انتبه لها لما نادته
مناير: بدر
اخيرا" سمعهاا
بدر( جنه توه صاحي من حلم طوووووويل و ويهه كان امتنح حيل): ها..هلا..هلا مناير..

مناير: عسى ماشرر بدر
بدر: لا..شنو..ماشر..شنو ..ِشفيج
مناير: طول الطريج سارررح وتقول لي شفيج
بدر: لا عادي...مو سارح
مناير: بدر
بدر: نعم
مناير: انته...ماتحبني صح
بدر: لو ما احبج جان ماخطبتج
===========================================

تنفسي مها تنفسييي...
حالة مها كل مالها و تزداد سوووووء..

ام جراح: دكتور طمني...شفيها بنتي...
تنفسي مها تنفسي...

انتظروا الجزء الثالث عشر​

 

[MaRoRa]

wee abii b3ad yala mtaa 7adha 3ajeeba el q9aa

 

[دلوعه نفسي]

شنو مناير ماعندها كرامه

راح تعيش بشك طول عمرها

كملي حبيبتي

 

[Q8.Bee]

امبيه من صجج يلااا نبي بعد بارتات يا معوده لعبتي بعصابنا :krkrkr:

 

[مـ سهله ـو]

اوووووووووف مناير لزقه اعوووووذ بالله هاذي اخر العنوسه تينن الواحد لووول وعليه على مها

 

[كوووكه]

الجزء الثالث عشر,,,​

ام جراح: دكتور طمني...شفيها بنتي؟؟

الدكتور: الحمدلله مافيها شي..مجرد سخونه داخليه و ضيق تنفس...خليها تاخذ اكسجين خمس دقايق.وبعدها تقدر ترجع البيت..بس لازم تاكل الحبوب اللي بكتبهم لها اول بأول..

ام جراح: الحمدلله ..والله خرعتني...

الدكتور: واهم شي راحتهاا..لازم ترتااااح..ولحد يضايقهاا..

ام جراح: والله يادكتور محد ضايقها ابد..بس يومين صارلها ماتقوم من فراشهااا

الدكتور: لازم تتحرك مايصير تتكيسل..والراحه النفسيه اهم شي

ام جراح: انشالله يادكتور....(( وتحط ايدها على راس مها))..ها يمه مها احسن؟؟
مها (تحرك راسهاا)
ام جراح: الحمدلله..الحمد والشكر لك

=============================================

بدر دخل المطعم مع مناير..ماكان في ناس واايد الوقت متأخر (( برج الحمام))
مطعم راقي يتعشون فيه اغلب المعاريس...كونه راقي و فخم نوعا" ما..

قعدوا على الطاوله.....

مناير: حبيبي شكلك تعبان
بدر كان سارح مو معاها
مناير عفست ملامحها ..وماعادت كلامها..لأنها تدري لو شنو تسوي..ماراح تقدر تكسب اهتمامه..

طلبوا العشااا...

==========================================

ام جراح ردت مع جراح و مها البيت في وقت متأخر....

انسدحت مها ع السرير...وتلحفت كانت حاسه ببرد مو طبيعي......وكان جسمها يعرق اكثر من المعتاااد...

ام جراح: تبين ايييبلج شي تشربينه

مها( رفعت ايدها رافضه تشرب اي شي)

ام جراح: لا يمه خليني اسويلج عصير ليمون يسحب هالسخونه منج
مها ماكانت قادره تتكلم..حاسه بتعب ووبإرهاق مو طبيعي......
سحبت موبايلهااا من تحت المخده...
وبدون تفكير..
[ذلته عيوني....إتصـــال]


بس الصدمه انها لقت الخط مفصــــول...
دموعها نزلوا وحده وره الثااانيه بدون لاتحس وبدون لاتعفس ملامحها....خدودها كانت باارزه...ودموعها حاره تنذرف بكل هدوووووء.....دقت علىى شوق اللي كانت توها غاافيه..

شوق: ألو...ألوووو...مها شفييييج ..ردي
مها: شوق ..شوق(صوتها يبجي) شوق تحبيني ؟
شوق: شنو هالحجي مها قوليلي شفيج شصارلج
مها: تكفين قولي حق بدر يكلمني تكفين شوووق
شوق: مهاااا انا باجر من الصبح عندج هدي حبيبتي وحاولي تنااامين
مها: ابي بدر شوق....شوق ابيه....أبيه الحين ..ابيه يكلمني....شوق شو ش


بدت ترجف بقوووووه شفايفها كانت متشققه و ناااشفه...


نسآآني...!!
ضــآع كل شي ورآآآآح؟؟
محتـــآجه امووت..
يمكن في موتي ..ارتــآآح ويرتــآآآح...
محتــــآجــه امووت..
بعد ماكل شي قدامي طآآآآآآآآآآآح...
محتآآجه اندفن
ألفين مره...
محتاجه انكفن..
وآآآآرتــــــــــآآآح...


============================================

اخيرا رد بدر مع مناير من المطعم و الطريج اهو اهوو..هادي طول الطريج....محد نطق بكلمه.....محاوله آخرى من مناير..عشان تكسب اهتمامه...
مناير (بدلع): حبيبي
بدر: هلا
مناير:وين فكرت نقضي شهر العسل
بدر: بالكويت(بنفسيه وجفاف)


مناير(تبتسم): لا حبيبي خلنا نسافر..ودي انا وياك نكون بروحنا
بدر: وانا عندي كليتي ما اقدر اسافر

مناير اخيرررا" عفست ملامحهاااا وسلمت قالت ماكووو فايده بس بينها وبين نفسهاا....[[[ بعد العرس ...وبعد مايجمعنا سرير واااحد...مناير بتنسيك االدنيا ومافيهااا]]]....

وصلها بدر لبيتهم بالنزهه....ونزلت ( ماراح تسكن معااه قبل العرس...عشان جذي ردها البيت)
مناير: حبيبي ))قبل لاتنزل))


بدر: نعم
مناير: تصبح على خيـــر
بدر: وانتي من اهله..

واول مانزلت مناير حررررك على طوووول..مانطرها حتى تدخل البيت..

واهيا تمت ثواني واقفه جدام بيتهم....سارحه.....بعدين قلبت بإيدها بحركة استهزائيه من نوعها...وكأنها متأكده بأنها قادره تنسيه حبه..ودنيته...مها....

آآآآآآآآخ يامها...بدر كان يسووووق ويفكر بمهاا...

حبيبي تعبان منهد حيــــلّه
ليتني مثل التعب..اطرحـه لأيـــــــام
ارفعه وفوق صدري اشيـــــــله..
وان تعافى..اتعبه واتعبه...
لجل يرجع ينااااااااااااااام...

صوتها المبحوح ماكان يغيب ثواني عن ذاكرته..

[بدر: لااا مها مافيني شي شوي متضايق
مها: اي باين ..يلا حبيبي قول لي شفييك عن الدلع
بدر: مشتاقلج
مها: اووله اووله يالجذاب ..قول شفيك خلصني لا تقص علي]

غمض بدر عيووونه وبداا يبجي...
خلاص يابدر....حاول تنسىى...
حااول تنساها بس خلاص..الدموع ماراح تقدم ولا تأخر...ولا راح ترجع المااضي..
انساها يابدر انسااهاا..

انا مدري ليــــه لدمعتي اسولف فيها و اطريهـــا؟!
بدري على الراحه..وصبري بين كفوفي ذآآب..
فمآآن التذكار اللي يذكرني آنا فيهاااا..
تكفين اذرفيهااا ياعيوني انا رمشي شـــــــآب
أنا بنسى ماضيها..يلا عيوني إذرفيهـــــــا..

وتنزل دمعه حاره على خد بدر......


ليله صعبه.......

نام بدر..
نامت مـهـا..


===========================================

شوق من الصبح كانت ببيت بو جراح بالمنصوريه....
الساعه 10 الصبح

ام جراح: هلا بنيتي شواقه...حياج حبيبتي
شوق: يحيييج خالتي...
وبعد ماقعدت شوووق
شوق: بعد أذنج خالتي...باخذ مها معاي السوق
ام جراح: لا ياشوق فكينا من سيرة السوق امس من ردت من السوق واهيا طايحه بالفراش.,.صبري عليها جم يوم

شوق: خالتي مها محتاجه تغير جوو صدقيني هالشي راح يحسن حالتها

ام جراح: لا ياشوق تكفين لاتحرجيني..خطوه وحده بره البيت ماراح اخليها تطلع

شوق: خالتي.لاتنسين ان الحركه زينه لهااا..وقعدة السرير ماراح تفيدها بشي..تكفين خليني آآخذها و صدقيني قبل الغدا اردها لكم البيت


ام جراح: والله ياشوووق...( تسكت فجأه) شرايج لو تمرينا باجر..يمكن تكون احسن

شوق( مسكت ايد خالتها):لا ياخالتي اليوم...طيعيني ..وصدقيني اوعدج...انشالله تتحسن..اهي بحاجه لتغيير جوو..

ام جراح: امري لله يابنيتي ...بس ليتها ترضى...صعدي شوفيها فوووق...

شوق قربت من خالتها..وباست خدها...واستأذنتها عشان تصعد فوووق..

ام جراح: منتي غريبه صعدي يمه صعدي جراح مو بالبيت
شوق : تسلمين خالتي...


صعدت شوووق غرفة مهاا.....

بس مالقتهاا بسريرهااا...

شوق: مهااااااا...!!!...

طلعت شوق مره ثانيه من الغرفه وراحت لأم جراااح......

شوق: خالتي ( بقلق)..انتي متأكده..ان مها...بغرفتها؟!!

انتظروا الجزء الرابع عشر​

 

[وردة^الكويت]

الله يعطيج العافية ...
بس كملي يالغالية مو تقطعين ....

 

[marshmallow]

كوكه كملي

 

[مناااوي2006]

يعطيج العااافيه كوكه شالقصه الروووعه عفيه يالغاليه كمليهااااا لانى من اليووم انطرر:lkmnkl:

 

[كوووكه]

حاضر من عيوني ...

 

[كوووكه]

الجزء الرابع عشر,,,​

شوق:خالتي(بقلق)..إنتي..متأكده..ان مها بغرفتها؟..

ام جراح كااانت ماسكه فنيان(فنجان) القهوه ...طاح من ايدهاا....وبحركه سريعه...
صعدت فوووق ...غرفـــــة مها.....وشوووق كانت وراها.....

ام جراح واهي تصعد الدري: انا توني طاله عليها كانت على السرير...
..

شوق: خالتي مالقيتها..والله مالقيتهااا...
ام جراح: انا توني ماخذتلها كوب الحليب...انا توني لحفتها بفرااشها

..
خطوه..بعدها خطووووه..
ويفتحووون باب غرفــــة مهــا...

مها كانت لافه فوطه على جسمها و فوطه ثااانيه ماسكتها بيدها و تنشف فيهااا شعرهااا...وأول ما شافت شووووق.إبتسمت...

ام جراح( حطت ايدها على قلبها و خذت نفس طوووووووووويل...)
مها قامت و قربت من شووووق وباستهااا: هلا والله حيالله من يانا ( مع ابتسااامه كبيره...)

شوق كانت علامات الاستفاهم تارسه مخهااا...وامتنحه...

ام جراح: يمه خرعتينااا ماقلتيلي انج داشه تتسبحين
مها: تضااايقت من نفسي قلت اقووم آآخذ شاور حااااااار..عشان احس اني آدميه (( وتضحك بصوت عالي..))

شوق [ ساكته ولا كلمه]

ام جراح ( تطالع شوووق)
شوق كانت تطالع ام جرااااح...

اخيرا"
ام جراح: يمه مها شوق يايه تاخذج السوق

مها: اي تووني يايه بقولج بطلع...زهقت من قعدة البيت...واللي يسلمج يمه طاوليني البودر اللي صوب ايييدج...
[ ام جراح كانت واقفه يم التسريحه (( المايستواليت)) مدت ايدها وطاولت بنتها البودر]..

مها بدت ترش من البودر على جسمها..وشوق مازالت سايلنت بدون اي تعليق....

فتحت مها الكبت(خزانة الملابس)...وسحبت بلوزه سوده طويله شووي...مع جينز سكني...وبعدما ماخلوها و طلعوا...بدلت ...كان لبسها عاادي ....لبست كعب عالي....ماحطت ميك أب...رشت عطر على رقبتهاا.....

دخلت عليها شووق..لقت مها تلف الشيله على شعرهااا...
مها: تعالي شوق...تعالي حياتي ساعديني..دخت مادري شلون يلفونها....
شوق: مها!!!...شصارلج انتي؟؟..مو قادره استوعب شي
مها( ابتسمت): مو صاير شي
شوق: مو طبيعيه
مها: مو طبيعيه لأني قاعده احاول انسى ( وبدت تلمع دمعه بعينها بس كانت مبتسمه)..مو طبيعيه لأني قررت انسى الأنسان اللي باعني؟؟؟
شوق: لا مها ...تكفين لاتفهميني غلط...بس والله تفاجأت
مها( نزلت راسهااا)
شوق قربت من مها و حظنتهاااااا حييييييييييييييييل.....


مها: بس عاد بس شووواق ..ابيج تفرين فيني الكويت كلهاااااا احس صارلي فتره مو طالعه...ابي اروح كل مكااااااااان
شوق: لا ياحبيبتي قبل كل شي لازم آآخذج مكان مهم حيييييل

مها: مهم حيل؟؟؟...وين شوق
شوق: امشي معاي وراح تشوووفين وين باخذج ( مع ابتسامه كبيره)..
مها تمت امتنحه بدون تعليق....

=================================================

بدر نزل من غرفته تعب من القعده بروحه و من التفكيررررر...لقى داانه قاعده تحت تلعب بالبي اس بي...

بدر: صباح الخير
دانه( ترفع راسها و تبتسم): صباح النور..حيالله المعرس المغصووب( وتضحك بصوت عالي)
بدر (يعفس ملامحه): الشرهه مو عليج تدرين...[ قام وقف]..

دانه: لالالا آآسفه بس خلاص..اقعد اقعد...والله ما اتحجى
بدر( رد قعد..مو عشانها..لأن مايدري وين يروح و محتاج يفضفض).: دانه...تهقين راح احبها بعد الزواج

دانه( تعفس حواجبها و ترفع عيونها فوق يعني تفكر): والله يابدر آسفه ..بس مناير وحده ماتنبلع..الله يعييينك عليها

بدر: شلون يعني ماتنبلع ..كلميني عنها عشان اعرف شنو اطباعها

دانه: مليقه تحب النكد...ما اقولك ان لسانها طويل..لأأ..بس البنت مليقه...من واحنا صغار وانا احاول ابلعها..بس ياخوي واقفتليييييييي هني هني مو قادره ابلعها

بدر: ماكو امل احبها؟
دانه: شدراني انا..يمكن انت تقدر تبلعها...اما بالنسبه لي...فـ إنسى..
بدر: انزين يعني كلش مافي لها حسنات...قصدي ايجابيات
دانه: بصراحه اهي ذربه و تحب الكشخه ...انيقه المره...انشالله تقدر تحبهااا
بدر: واللي قلتلج عنها
دانه: قصدك مها؟؟ انت وبعدين وياااك..خلاص يبه انسااااااااااااها انساها
بدر: خلاص انزززين ..دانوو
دانه( تفتح البي اس بي و تكمل لعب): نعم
بدر: بطلع معااج قومي لبسي..
دانه: مالي خلق اتحرك من مكاااني...انا زين وصلت لي هالمرحله
بدر: آآخذج اشتريلج كل شي تبينه بس قومي ..ودي اطلع معاااج
دانه: كل اللي ابيه؟
بدر: كل اللي تبينه
دانه: تاخذني النصر الرياضي ابي طاولة تنس
بدر: آآخذلج طاولة تنس..بس قوووومي
دانه: ايوووآآ..اي الحين خوش ريال...وصدقني ترا مناير زينه ..حاول تبلعهاا...زين يبه..يلا اا نا لابسه
بدر: بتروحين معاي جذي؟
دانه: اي شفيه لبسي...تي شيرت مال اوادم...وجينززز..
بدر: وهالكشه .؟؟.قومي يلا قومي غيري لبسي و تعدلي
دانه: يلا زين يبه انا ساعتين انقزه وارفعه فوق سبريه واستشوار..تبيني الحين اقوم امشطه يلا مناك..بتاخذني ولا روح بروحك
بدر: لا خلاص خلاص..يلا قوووومي...

واهما طالعين عند الباب...طلعت بويههم اختهم ساااره....يايه تزورهم ...يوم اليمعه بعد..لازم يتزاورون الأهل...
ساره: كلولولولولوش...شفيه المعرس طاالع..وين رااايح

بدر: اي معرس ززين...بروح مشوار يحسسني اني آدمي
ساره: اخذوني معاااكم عفيه عفيه امواح امواح( تحرك شفايفها يعني تبووس)
بدر: لا يبه قعدي انتي واللي ببطنج شيشيلج...انا ما راح اطول راد ع الغدا...يلا دووينه....


وركبوا السيــــــــآآره...

================================================== =

شوق ماصارلها شهر من قصت الليسن..متهوررررررره حيل..كانت داااااايسه حييل...وحاااطه أليسأأ ((( حبيت أياامي بيك و بعشيهاا ليك...ولا عمري حبيت من ابليك....))

مها كانت سااااارحــــه طووول الطريج....وشواقه تحاول تفصل على مها وتلطف الجووو..تضحك مها بس ضحكااات بعيده كل البعد عن قلبهاااا...واخيرا سفطت شوق جدام "" ليـــلى جالليلــــــري ""

مها: شحقه يايبتني هني خلينا نروح الفناار
شوق: لأ لأ انا امجهزتلج سبرااااااااايز
مها: سبراايز !!..ماشي نشووووف..

نزلوا مها وشوووق ودخلوا واحد من المحلااات...
نزلت شووق النظاره:صباح الخير...مدام هيام موجوده

.......

وبعد دقايق طلعت لها مدام هيااام صاحبة المحل ومصممة ازياء ...
هيام: اهلين وسهلييين
شوق: هاذي مها اللي قلتلج عنها
هيام: مشالله يخزي العين...جسمه كتير حلوو..حيلبأله الفستان اللي اخترناه...
وتروح تييب النفنوف...
مها: واااااااااو...
كان لوونــه احمر لون الدم.....راقي بشكل مو طبيعي....عاري يكشف مفاتنهااا...من جهة الصدر عااري بطريقه مبالغ فيها....ومن الظهرر.......قصير من جدام و طويل من وراا....ذيل على قولتهم...

شوق: شراايج فيني بس؟
مها: ذوووووووق...عطيني ودي ألبسه
هيام: لا تنزعيه أبل ما اشووفوو..من شان حط الدبابيس ازا بدك..
مها ( حركت راسها مبتسمه..)

بعد خمس دقااايق....

طلعت مها من غرفة التبديل...

================================================

بدر و دانه بالسياره رايحين النصر الرياضي..
بدر: دانه طالبج
دانه: آمر بوناصر
بدر: بغييت جهازج شوي
دانه: لاللالالاا لا حبيبي..عشان تدق عليهااا ..لا يبه لااا...خلاص يبه ابتعد انت ليش لزقه؟
بدر: تكفين بس اسمع ألو واسكره..عن النحاسه دوينه..انا اخوج
دانه: لا حبيبي لااا ..تكفه اعفيني..خلاص انت الحين متزوج مالك شغل بالبنت
بدر: دانه حبيبتي شرايج تكلمينها و تقولينلها عن موقفي
دانه: لا حبيبي اذا درت راح تعذرك ..خلها جذي ماتدري يمكن تكرهك عشان تقدر تنساك
بدر: بس الله مايرضى@ لازم تدري
دانه: لاتحمق ززين...ادق اكلمها اذا شفت النفسيه حلوه سولفت معاها واذا لأ قلت لها انا غلطااانه وسكرته
بدر: اي بس قطيه سبيكر عشان اسمع صووتها
دانه: إنا لله...خلاص زززين لا تحن ..اوف قطييعه...


==================================================
شوق: عجييييييييييييييييييب والله لو اني ريال..جان مادري شنو صار فيني
مها : ههههههههههههههههههههههه ( ضحكت من قلب هالمره... وماسكه ذيل النفنوف..وشعرها كان مرتفع فووق...)...

ورن موبايلهااا....

وترفعه مها تطالع ....
شوق: منو؟
مها: رقم غريب !!!
شوق: لاتردين
مها: اوكي...( بس قلبها بدا يعورها فجأه...حست ان المتصل بدر او من طرف بدر..بس تجاهلت احساسها....وحاولت تتظاهر انها مو مهتمه و ماسكه ذيل النفنوف ...)
مها: شرااايج لو ترفعه لي شوووي من هني؟

================================================== ====

شوق: شفت شلون...ماترد
بدر: تكفين حااولي بعد مره عشاني دانه..عشاني...
شوق: انززززززززين....
.......
[ المشترك لايرد...]..

شوق: سمعت؟؟
بدر: دزي لها مسج
شوق: انت ينييت ..شكتب فيه
بدر: انتي وبعدين معاج سوي الللي اقوله وبس...
شوق: مااشي..

========================================

هيام: لو بدنا نرفعوو شوي...ايوا...ارفعي ايدك من شان الدبوس..ايوا..بس
وصوت المسج..
فتحت مها المسج..

[ ردي انا دانــه..ابيــج ضروري..]
شوق: منوو؟؟؟
مها ( ابتسمت ): يحليييييييييييلها داانه...والله غبااار..
شوق: اي داانه
مها: دانه يبه دانه والله عبالي انقرضت ...
شوق: دانه السمره اللي كانت معانا بالانقليزي قبل
مها: اي اعتقد اهي..لحظه..كاهي دقت....

وترد مهـــا...

===========================================

بدر: ردت ردت..
دانه: ألوو ( قطته سبيكر)
مها: اهليييين...هلا والله....انتي وييينج
دانه: ها !!!!!!
مها: لا حس ولا خبر ..لا تسألين ولا شي
دانه: شنو؟
مها: وين رحتي يالخايسه اي كليه سجلتي؟
دانه: لا مها انا مو دانه اللي تقصدينها
مها: ها عيل؟؟؟!!!!!
دانه: آآنـــا...دانه ...دانه من طرف بدر..انا اخته الصغير
مها( قلبها بده يدق بقوووه): بدر!!
دانه: سمعيني بكلمج شوي...انتي فاضيه الحين
مها: انا مو بالبيت...بس عادي ..آمري شبغيتي؟
دانه: مها حبيت اقولج ان بــدر انغصب ياخذ مناير بنت عمي
مها: الله يوفقه...وغير هالحجي؟
دانه( رفعت راسها فوق تطالع اخوها ماكانت عارفه شتقول...اخيرا"...بدر قرر ياخذ الموبايل من اخته....)
بدر: ألوو
مها: ها؟...بدر!!!!
بدر: شلونج مها
مها: بخير ..نعم خير؟
بدر: مها انا آسف على اتصالي
مها: وغير هالحجي؟
بدر: مها انا آسف اذا غلطت بحقج
مها: لا تعتذر ....اذا عندك شي غير الاعتذار قوله..ماعندك قول باي وسكره
بدر: انتي ليش تكلميني جني مرتكب جريمه بحقج
مها: لا ابد..ما ارتكبت جريمه بحقي...بس انا اكبر الأمور وايد...صح بدر؟
بدر: مهاا..
مها: لا مها ولا شي..انت الحين واحد متزوج..واعتقد طريجك غير طريجي..مو هاذا كلامك؟
بدر: انا بوضح لج شغله بس
مها: لا توضح لي ولا اوضح لك وياليت ماتدق مره ثانيه
بدر: مها سمعيني
مها: باي بدر باي...

حذف بدر الموبايل بحظن اخته...وطق بأيده على السكان بقووووه...
بدر: هااذا حجي ينقال...بدر مغصووب
دانه: وانا شدراني
بدر: جب ولا كلمه
دانه: اهيا تجعمك انا شنو ذنبي تجببني؟
بدر( صرخ بقوه): بس خلاص سكتي ما ابي اسمع صووتج
============================================

مها تمت فتره ماسكه جهازها وسارحه
شوق: منو كنتي تكلمين ....
مها: بدر
شوق: بدر!!!!....شيبي داق هالتعبان
مها: بعدين اقولج ....شوق خلينا نطلع حاسه اني مختنقه
شوق: اسمالله عليج بدلي وانا ناطره بره...

=================================================


فيصـــــــل ..... اخو مناير .......في مرينا شرق ...رسى طراده اخيرا".....

عبدالعزيز: وش علااامك من الاسمرانيه..من الاسمرانيه....( بنبرة واحد فاصل)
فيصل: يلا حجي شيل السمج حطه بالثلاجه ذبحتنا الشمس....
عبدالعزيز: ياااااااااااااحبيبي...
فيصل: اشفيها فيروز
عبدالعزيز: اسكت المزاااااااااااج عالي
فيصل: ايواااااا...عطني عطني الصبوره بشيلها بيدي..تعالي حبيبتي تعالي ...(( ويلم الصبوره..))

[ فيصل متولع بالحداق...حياته كلها بحــر ببحــــــر...ويموت بالسمج...ويحب الغوووض....لبسه كان عباره عن شووورت جينز...وتي شيرت احمر..ولابس كاااب ]
يوسف كان يلف الميدار و يلم عدة الحداق و يحطهم بصندوق الطراد......

فيصل: يلا شباب نزلوا من الطراد خل نروح نشرب لنا شي
يوسف: بهالزفر...لا حبيبي نخيس الأوادم..حلايه صبورتك...خذلك بيبسي من الثلاجه و فكنا جانك بتشرب يعني
فيصل: لا بغيييت ستار بكس
يوسف: بعدددددددددددد
عبداللعزيز: لا حبيبي لا...شناوي عليه...تبي البنوتات الناعمات هذيل اللي جنهم مرشوشين سبريه على كشختهم تلووع جبودهم لا يبه خلنا جذي احسن
( هالشله بالذااات موو سوالفهم بناات بس يحبوون يعبطوون....لا اكثر)

فيصل ( يطالع ريوله ..كان لابس نعال): اوف اوف يالجلحه..طالع يويسف طالع
عبدالعزيز: اهي جلحه اهي الطحالب اللي تارسه ريلك
يوسف: شدعوه انت امقصررر ولد الالمانيه
فيصل: خخخخخخخخخ حلو حلو حلوو ...شفت شلون ...قلنالك خلك سااااكت .....

نزلوا من الطرااااد...ومشوا على خط البحر رادين للباركينغ......

بالوقت اللي كانت فيه مها مع شووووق يتمشوون ع البحــر..

شوق: بس هاذا اللي قاله؟
مها: اصلا" انا ماعطيته فرصه...شوق لا تشوفين شصار فيني لما سمعت صوته..خقيـــــــــت..
شوق: مالت عليج والله..بس هم ماتنلاميين...

فيصل و ربعه كانوا ماريـــــن...
ويقرب فيصل ويحط الصبوره بويه مها....
فيصل: بذمتكم شباب ماتشبهها؟

يوسف و عبدالعزيز بطوها ضحكــــ
مها: عن الغلط و وخر يلا مناك
فيصل: نفس الحلج...كا شووفوا ( ويحرك حلج الصبوووره)
مها: بتووخر ولا شلون
فيصل: وي حمقت صبورتي ..حمقت
مها: اذلف زززين...قذر قطيعه...وخر ذبحتنا ريحتك
فيصل يحط الصبوره على الارض..ويرفع تي شيرته و يشم نفسه.:: مافيني ريحه....بس شوي زفر بيدي...
ويمش ايده بملابس مها
مها: يااااقذرررر...( بصوت عاااااااااالي)
فيصل: هاج هاج تبيج تحبج ( ويقرب الصبوره من مها)
مها: وخر والله ان ماوخرت الحين لاتلوم الا نفسك ويييييييييييييييييييع شنو هاذا ارف

فيصل ( يكلم الصبوره): تعالي حبيبتي تعالي...تعورتي؟؟؟ ( ويبوس الصبوره)..اموااح حبيبتي انتي بس...فصول معاج لاتخاافين
شوق: قطييييييييييعه..امشي امشي...
الشباب يضحكوووووون...

ردوا شوق ومها السياره.....
مها: جبح ويهه قليل ادب لوع جبدي..جبدي قامت تقولب
شوق: هههههههههههههههههه بس شفتيه شسوه والله كنت بضحك بس ماسكه رووحي
شوي ولا يطق الجامه فيصل...( عيونه كاانت عسليه وبالشمس شكله اينن...)

فيصل : تبونها؟؟؟
شوق: لا خلها حقك يالخايس ( يتكلمون عن الصبوره)
فيصل ( يكلم السمجه): خلاص عمري لاتبجين انا ابيج ..

مها: وييييييييييييييع صج لوعه
شوق: ههههههههههههههههههههههههههههههههههههههههه

ساقت شوووق..عشان توووصل مها بيتهم.....

ولما وصلوا....

نزلت مهااا...
مها: يلا حبيبتي مشكوره ويعطيج ألف عفيه
شوق: ولو حبيبتي..بس روحي تغدي و ديري بالج على نفسج
مها ( تبتسم...)

وقفت مها بالحديقه....رن موبايلها

جراح: مها وينج
مها: كاني عند الباب
جراح: يلا امي تحاتيج
مها: يلا كاني الحين بدخل...

وقبل لاتدخل...شافت سيارة فيصل جدام بيتهم...!!!!!!! والصبوره معااااه !!!!
مها ( تكلم روحها): شووف الخاايس...
فيصل: انتي؟ !!!!!
مها: انتي شيايبك هني والله بايعها..
فيصل: شتبين انتي....ياي حق عبدالرحمن انا
مها: نعم؟؟ ! عبدالرحمن ريل منال اختي؟
فيصل: خخخخخخخخخخخخ ياحلو الصدفه بس
مها ( نزلت راسها ):شتبي فيه اهوا ساكن بدور بروحه..تقدر تصعده من الدري هناك ( وتأشر)
فيصل: ليلحين ماتبين الصبوره؟؟

انتظروا الجزء الخامس عشرر..​

 

[]دنيا الوله]

مشكوووووره ياعمري على التكمله والله صارلي ساعه ودموعي ماوقفت
شنو هذي مناير اشتبي خل تذلف بطت جبدي والله حرام عليهم ليش جذي
بس تكفين كملي بس اندمجت موقادره انطر

 

[مناااوي2006]

لاتوقفيييييييييييين كملى مااقدر انااام ابي اكمل القصه يعافيج ربي

 

[دلع بنت راك]

يلا شوقتينا وين التكملة .... اندمجنا نبا نهاية الاحداث...

 

[دلوعه نفسي]

امبيه فيصل ضحكني سوالفه تونس

كملي كملي كملي

 

[دلوعه زوجها]

كملي تكفييييييييييييييييييييييييييين حدي مندمجه

 

[ماسيتي]

وااي عفيه بسرعه

 

[lojel]

حلوه حلوه كمليها بليز

 

[فتاة الجبل]

يالله لا يوقف نزلي جزئين مع بعض ولا عليج أمر حدي اندمجت

بس مو جنه في مقطع تخربطتي بين اسم دانة وشوق المقطع اللي دانة مع بدر بالسيارة ويحاولون يدقون على مها مرة ثانية