قصة كويتية اتحداكم ماتندمجون معاها...

[بطوووووطه]

كمليها ومالج شغل فيهم الي بيقرا خل يقرا ولي مايبي كيفه

 

[وردة^الكويت]

كملي بلييييييييييييييييييييييييييييز

 

[روح اهـلـها]

مشكوره حبوبه ع اهتمامج والعفو ماسويت شي
وبلييييييييييز كمليييييي

 

[بطوووووطه]

افا ليش ما كملتي

 

[marshmallow]

plz kamlaaaaay

 

[دلوعه بكيفي]

ابي ارد علىcavallia ووصايف الزين

اولا ليش تجريح ثانيا محد قالكم غصب تقرون القصه ثالثا القصه واضحه ان الي كان يكلمها حبيبته مها
رابعا كافي ان كوووكه اهي الي كاتبتها
والف شكر حياتو تسلم ايدج عالنقل وانا اكثر وحده متابعتج ياعسووووووووووووووووووله انتي

 

[*سولاف*]

عاد اذا ما رااح تكملين بزعل اشفيك حلووووووووووه وانا اندمجت والي ما يبي يقرا اشحقه يدخل ؟؟؟؟؟؟

 

[حياتي معاناة]

بلـــيـــــز كــــــــملـــي....... انــدمـــجـــت مــع القـــصــــة .................

 

[ماسيتي]

لألألألألألألألألألأ عااااااااااااد مو جذذي كملي كملي ضروروي
والله القصه روعه

 

[كوووكه]

يسلمو حبايبي والله انكم شجعتوني كنت محبطة نفسياً..
وعشانكم راح انزل 3 بارتات,,,والله تستاهلون,,,:klhfl:
شــــكـــــــــــــــــــــراً؛؛؛:sfg: ​

 

[كوووكه]

الجزء الرابع,,,
******************​

بدر بعد ماسكره منها....
حس قلبه بدا ينبض..
بديت احب...بديت احب ياناس..وربي احلى شعوور انك تحب...فجأه تحس ان حياتك كانت ولا شي...وصارت تسوى انك تعيشها..فجأه حسيت روحي تنطق بأسمها...تهقى تنطرك لين تتخرج...اي تنطر ليش ماتنطر...اهي بعدها صغيره..وبعد سنتين يكون الوقت المناسب للزواج ..لي ولها....بس شلون احافظ عليها سنتين..واخليها ماتضيع من ايدي...
مها...فديت مها...احبج مها....اوويلي بس عليها.....كل مافيها يخليني اعشقها...اعشق ينونها و تطفلها..اعشق لقافتها و طولة لسانها..اعشق مشاعرها المينونه...اعشق صوتها...والله و ذلتني عيونها.....احلى شعور..لما تعشق طفله..تحس روحها وكيانها كله لك...مشاعرها عمرها ماتكون مزيفه...واللي بقلبها على راس لسانها...اقراها من عيونها..وافهمها..شفافه..واحبها بكل وضوح...ورفيجي جراح ماراح يلقى نسيب احسن مني..مو غرور..بس رفيجه من عمر ..وفاهمني و عارفني....وامي ماراح ترفض البنت اللي يختارها قلبي....آخ ياقلبي....

ينسدح و يفكر..وتاخذه الافكار بعيد بعيد..حيل حيل...مثل اي عاشق...في اول صفحه من كتاب العشق....يحس بشعور ماحسه من قبل..وبراحه.كبيره..

مها كانت تنام و تقعد من زود العوار...وكل مافتحت عين...فتحت معاها مسج بدر..
(( احبج يامها احبج..))وتضحك ..تسحب خصلاتها وتنزلهم على ويهها البريئ بحركه طفوليه و تقط راسها ع المخده ( الوساده) بقووووه...خبله بالعربي الفصيح...

الأثنين...الساعه 8 صباحا..

ام بدر: بدر شسويت على اوراق مناير..ولا انت من اللي يوعد ولا يوفي
بدر: لا يمه ولدج و تعرفينه..عطيني يومييين وانشالله كل شي خالص..
راحت امه تييب خبز حق الريوق( الفطور) ولما صار بدر بروحه..

طق على خدوده بقووه: شلون نسيت يابدر...الحب يابدر نساك ...ويرفع موبايله ويدق على رفيجه محمد...اللي كان له صوت مسموع بوزارة التربيه و واسطاته قويه...

بدر: بس احنا مانبي نطلعها من العاصمه ..بس بنغير المدرسه..

محمد: انا معاك بس النقل صار بصعوبه الحين مو مثل قبل..قولي وين اهيا بأي مدرسه
بدر: خالده بنت الاسود..وعادي انقلها حق اي مدرسه ثانيه
محمد: خلاص انا اسأل لك وما يصير خاطرك الا طيب يابوناصر
بدر: تسلم حبيبي هاذا العشم فيك ماتقصر
محمد: ولو تستاهل يالغالي
بدر: تستاهل الطيب يابوجاسم...


طلع بدر عشان يلحق على محاضرة الساعه 9...ودز مسج لمها...اكيد اهي نايمه الحين...((( صباح الحب و الشوق..فديت اللي امغمض عيونه)))

فتحت مها عيونها على صوت المسج...وقتها كان العوار خاف عن امس..ابتسمت بعد ماقرت المسج...لمت المخده حيييييييييييييييييل...وردت عليه::

(( صباح الورد ..))

بدر ماتوقع انها ترد...بس لما سمع صوت المسج...فززز قلبه..ولما شافه..قرر يسفط ع اليمين و يدق عليها...
بدر ( يكلم نفسه): وهاذي حالتك يابدير كل مابغيت تدق تسفط..متى بتشتري هاند يعني
مها: ألوو
بدر: فديت هالصوت
مها: جذاااااااب
بدر: فديت صاحبة الصووووت
مها: هم جذااااب
بدر: متى بتقتنعين اني صج احبج
مها: لما تحبني
بدر: إنا لله..يابنت الحلال احس اني عاشقج مو بس حابج
مها:لالا ..لاتحاول تقص علي..شايفني يااهل ومتهوره ..قلت خل ألعب عليها
بدر: وانا يطلع مني هالشي؟
مها( بدلع): لاااااااااااااااء
بدر: عيل جبي...يابنت احبج
مها: انزين انزين ..خلاص خلاص..لاتقول احبج بس
بدر: عمري شلون بطنج اليوم
مها: زيــن ( بدلع)
بدر:احبج
مها: انزين انا بنااام بدر بنام
بدر: نوم العوافي ياقلبي...خلاص عيل ..تلحفي زين
مها: واي لاتصير لي امي انت الثاني
بدر( يضحك) : يلا عمري رايح الكليه انا
مها: ادري
بدر(يضحك)
مها: لاتطالع يمين يسار ابط عيووووونك
بدر: بعد..!!..بدت الأوامر من الحين
مها: اي شعباااالك( بدلع)
بدر: احبج مها
مها: انزين انزين
بدر: شنو انزين احبج انا
مها: باااي بدر باااي

تم الفصل..


قعدت مها تضحك جنها خبله...وبدر داااس واهوا يغني بصوووت عاااااالي.....
((بس قول أبغى..وانا اقول حاضر...انت الوحيد اللي كلامك اوامر..وخاطرك عندي ترا مو مثل غيرك..خاطرك يسوى ترا مليوؤوؤون خاطر...
القوي الله و حبي لك قوي..شوف ايش اعمل اذا تطلبني شي..ينقلب حالي..وادورلك عليه..وعيني ماتغمض ولا حتى شوووي...
تهمني؟..طبعا حبيبي تهمني..انت اللي بس اللي بعمريى هزني..انته من حقك اذا تامر علي..وانا من حقي ابيك تحبني...وخاطرك عندي ترا مو مثل غيرك..خاطرك يسوى ترا...مليوؤووؤوؤن خاطررر...))))


مها ماقدرت تنام من الوناسه..قامت شافت شكلها كان حده معتفس ..وباين عيلها التعب...من عيونها..عيونها كانت تفضحها والكل يقدر يقراها من عيونها....

حست بثقل وانها محتاجه شاور...خذت شاور دااااافي..طولت فيه...كانت تفكر تحت الدش...بحبيب القلب طبعا....اللي عمرها مانسته....

(( ياما حاولت الفراق وماقويت..قلت ابي انساه لكن مانسيت...ماعصاني قلبي بعمره ولكن ..الأكيد اني انا اللي ما اشتهيت....))

كان بدر طول المحاضره ساهي...تقدرون تقولون ماسمع ولا كلمه قالتها الدكتوره لأنه من الاساس مو معاها .ولا مع احد,..مع حبه مها...

خلصت اول محاضره له ..وراح للثانيه...

طلعت مها ....وقررت تكلم شووق..
شوق: بسّ!! هاذا اللي قاله
مها: شتبينه يقوول بعد
شوق: المفروض يا قلبي.....(( وصوت ام شوق تناديها بصراخ يقطع حديثهم....)) بلييييييييييييه بدت الحنه بدت...انززززززين يايه...
مها: روحي روحي لاتبلشنا امج بعد
شوق: انزين اشوف شفيها و ارد اكلمج باااي يالعاشقه..
مها: باي ( واهييي تضحك بصوت عالي)..


تنزل شووق تحت ...عند امها...
اللي ورثت منها طوالة اللسان و الطفاقه....ولقتها قاعده مع اختها الصغيره ابرار ( عمرها 12 سنه )...و اختها الثالثه اسرار عمرها 10 سنوات....

متوفي ابوووهم من سنه من السرطان اللي حاشه من كثرة التدخين....والام مو مهتمه الا بنفسها و من صالون لي حفله لي عرس لي خطبة فلانه...ماتركد بالبيت...

شوق: نعمممممم شتبين صرعتينا
الام: عمى بعييييييينج يامال الويع جذي تحاجين امج
شوق: امناديتني عشان تقولينلي هالحجي خلصوا شتبووون انتي و بناتج
الام: والله ما اقول الا مالت ثم مالت على هالويه الخايس انا لو باركه عليج قبل لاتكبرين مو احسن
شوق: اكيد احسن..احسن من العيشه معااااج اللي تييب المرض
الام: مرض ياخذج مثل ماخذا ابووج يابنت ابوج
شوق: تدرين الشرهه مو عليج
الام: لما انا اكلمج توقفيين يالمو متربيه ..اي تربية ابوج..بعد شقدر اقوول اكثر...ماشفت منكم غير الفقرررر...لبسي و لبسي خواتج بنروح بيت خالتج امسويه يمعه اليوم
شوق: يمعه العصر!
الام: ايييي امسويه عشا تخرج ولدها من كلية الشررررطه ولازم اكون اول وحده هناك بيوونها وايد ناس..تسنعي جوود ( يمكن) يشوفونج ناس وياخذونج بدال ماتطيحين بجبدي عليتي جبدي الله يعل جبدج
شوق: و حمد راح يكون موجود؟؟؟؟!
الام: اي بيكون موجود بعد حفلته يالغبيه.. ..بسوي روحي مو فاهمه شي ..ميخالف..تكشخي زين انتي و هالسعالوه خواتج


تركض شوووق فووق ...واخيرا" بشوفك ياحمد ((( حمد عشق الطفوله و المراهقه و حلم المستقبل...تحبه تموت فيه من كانوا يهال .بس اهوا ساحب عليها سيفون مثل ما يقولون حده مو معطيها ويه ولا امعبرهااااا..واهي شاطه روحها عشانه....وماتتخيله زوج لغيرها..من واهيا صغيره ترسم عشان يتحقق حلمها...اخيرا" تخرج حبيبي...الحين الوقت المناسب للي راح اسووويه.....))))

صعدت شوووق غرفتهااا و اكيد بعد مااابلغت مها الخبر السعيييد بدا التحورف والشغل على شكلهااا....واكيد ماتركتها مهاااا دون مساعده.....

مها: شلونج خالتي
اام شوق: هلااا ( بدون نفس)
مها: بغيت شوق
ام شوق: بيتنا مافيه رياااايييل صعدي و نزلي براحتج
مها ( تبتسم)...

صعدت مهاا فوووق...
لقت شوووق توها ماخذه شاور و قاعده تنشف شعرها...............

استشوار ..وستريت ..و سبريه للشعر.....سنفره و ماسك للبشره.....الفل ميك آآب ..ابتدائا من الفنديشن ...الى اخر لسمه...اكيد عرفتوها ..(( المسكره..))

لبست شووق اصيع بدله كانت عباره عن تنوره و بدي كان شكلها كلاسيك بس ضيج حيل يعرض مفاتنهااا..

شوق: آآي آآآآي شوي شوي
مها: يلا كاهي ثبتتت الماشه
بعد العطر لبست الكعب بحذر عشان ماتتكسر االاضافر التركيييب..
مها: يلا انا بمشي برد البيت وقوليلي اول بأول شنو راح يصير معاااج
شوق: ديل
مها: يلا حبيبتي( وتسلم عليها وتنززززل و تركب سيارتها وتحررررك.)

شوق وقفت عند باب بيتهم بعد ماوصلت مها للباب.....وشافت العيون اللي لطالما عشقتها ومازالت تعشقهاا....شاب اسمر نحيل.. التعب باين بعيوونه..سااكن بملحق بيت جيران شوق...مع خواته الخمسه و امه المريضه....ترك تعليمه و ترك حلمه...عشااان يقدر يشتغل و يعيش و يعيش اهله...اللي تركهم له ابوه في احرج مراحل حياته..حرم نفسه من كل شي..من السعاده ..ومن كل احلامه...الا الحب..ماقدر يمنع نفسه منه...حب شوق.......آآآخ ياشووق...ياحلمي اللي عمره ماراح يتحقق...........نواف...أسمه نواف...من فئة غير محددين الجنسيه ((( بدون بالعربي الفصيح وبالانقلش with out)) ...عمره 19 سنه...بس ملامحه ملامح رجل لعبت فيه الدنيا لعب....شاف الظيم و انواع الحرمان كلهااا...واعتاد عليها...عايش على اعصاابه....ويصرف الفلس بعد تفكير طووووويل...مو بخل منه...بس يخاف ينتهي الشهر...ومايحصل 20 فلس ...قيمة جيس الخبز....ترك تعليمه بعد ما انتهى من 3 متوسط...اشتغل يبيع بنك وترمس على الدوار...ولما كبر شوي..تعرف على واحد عرض عليه العمل في فرقة اعرااس...يسخن الطار و يطق الطار...ولما اتقن عمله....رقوه مثل مايقولون....وصار يغني كورال...كل هاذا الذل ...عشان لقمة العيش.......

شوق: عمى ...شتطالع..
نواف: ها ..آنا اسف
شوق: ان شفتك هني مره ثانيه والله لاعلم خالي
تراجع نواف بكل انكساار...تعود على الاهانه والاستحقار منها...تعود...من اول يوم حبها فيه..تجريح واستصغار..وامتهان لكرامته....


في الروضه
==============================

بدر كان يسفط سيارته توه راد من الجامعه ....ويدق عليه محمد..اللي وعده يشوفله موضوع نقل مناير بنت عمه مبارك...

محمد: خلاص من بداية السنه اليديده تداوم هناك
بدر: مشكور يابو جاسم والله وانك قدها
محمد:شعبالك حبيبي يلا خلنا نشوفك مو بس حزة الواسطات تينيا تركض يلا يبه نشوووفك
بدر: على خير حبيبي...

وينزل بدر ويدخل البيت يلاااقي امه و دانه بالصاله مع الوالد بو بدرررر كانوا قاعدين يشربون جااي..
بدر: السلاااام عليكم
يردون: وعليكم السلام
بدر: يمه نجبيلي الغدا حدي يوعااان
بو بدر: عاد اليوم مطبق تخدر من بعده
بدر: تسلملي ايد الوالده
ام بدر: صج قبل لا اقوم..شصار على اوارق البنيه..اليوم خالتك دقت تسأل
بدر: خلاص قوليلها من السنه اليديده تداوم هناااك
ام بدر: وي فديت ولدي صج انك تبيض الويه خل اقوم ادق عليها اخليهم اييوونا البيت اليوم
بدر: اول شي غدي ولدج ياي ميت يوع من هالاهوب اللي بره




بعد الغداا...نام بدر ساعتين قيوووله مثل مايقولون....واول ماقام تذكر انه من الصبح ماكلم مها..واهي بعد مادقت ولا دزت شي !!

دق وانقط ع الwaiting (( إنتظار..))

بدر ( يكلم نفسه): من قاعده تكلم هاذيييييي ( عصب الحبيب)



++++++++++++++++++++++++++=

المنصوريه...
مها منسدحه ع السرير و تكلم شوووق...
مها: سكري سكري بدر قاعد يدق
شوق: اي احسن لقاه waiting ..الحركه اللي تغث الجميع هههههههههههه
مها: يلا زيييييين ذلفي لا يسكره..

وانهت مها مكالمة شوووق...وردت على بدر..اللي كان نااطر ..خط ثااني..

مها( بدلع): هلا حبيبي
بدر: من كنتي تكلمين؟!
مها: رفيجتي شوق..شفيك امعصب
بدر: شتبي هاذي
مها: وااي قاعده تسووولف
بدر: وينج من الصبح مادري عنج
مها: شواقه صايرلتها سالفه وقاعده اساعدها عشان تحلها وآسفه حبيبي بس صدقني مو ناسيتك
بدر: حبيبج ها
مها: حبيبي وعمري وحياتي وكلل دنيتي
بدر: بس بس بس..اناا بطلع الحين
مها: شهالنفسيه..وين رايح بدر؟؟
بدر: الدوانيه
مها: واااااااااي لو الله يفكنا من هالدوانيه جان مرتاحين
بدر: اكلمج بس ارد

بدر كان امعصب واهوا من النوع اللي اذا حب الشي يحب يمتلكه كله كله كله ويكون له وحقه برووووووحه فا مو شي غريب اذا تنرفز من الwaiting عقله صغير من هالناحيه

مها: الله معاك باي
بدر: لحظه
مها: نعم
بدر: زعلتي؟
مها: ليش ازعل؟..انت قلت شي يزعل؟؟؟
بدر: لأ
مها: خلاص عيل بااي
بدر: لحظه ( وبصوت عالي) قاعد اكلمج انا الحين
مها: نعم..شتبي
بدر: شبي ..؟
مها: ايييي شتبي
بدر: الشرهه علي تدرين...يلا باي
مها:لاتعال لحظه لاتسكره
بدر: هلا
مها: احبك
بدر: وانا بعد
مها: وانته بعد شنو؟
بدر: وانا بعد احبج
مها: فديييييييييييييييييييييييته حبيبي والله احبه احبه احبه احبه
بدر: ثقلي ثقلي...ويلا اكلمج بس ارجع
مها: حبيبي ديربالك على روحك..
بدر: انشالله يابعد روحي
مها: يلا باي
بدر: باي


نزل بدر لقى مناير وامها و العله نــــــــــــوره......اذا ذاكرينها...

شنو صار؟؟؟

تابعوا الجزء الخامس​

 

[كوووكه]

هــــــــــــــذا الجــــــــــــزء الخــــــــــامس ...
*********************************​

نزل بدر لقى امه و دانه اخته.. مع مناير و نوره بنات عمه مبارك ياييين مع امهم...امهم مره كبيره ...غير متعلمه التعليم الكافي...اللهم تعرف تقرا و تكتب...مره على نياتها ..واللي بقلبها على راس لسانها...

بدر: السلام عليكم
ام مناير:وعليكم السلام والرحمه هلا بولدي بدر
بدر: هلا خالتي...شلونج شلون صحتج
ام مناير: والله بخير دامكم بخير وبعافيه
بدر: شلونكم بنااات
نوره: بخيررر
مناير: الحمدلله تمام
بدر: خالتي خلصت اوراق مناير وانشالله من السنه اليديده تداوم بالمدرسه اللي اختارتها
مناير: وافقوا على المدرسه اللي اخترتها آنا؟
بدر: اي وافقوا
مناير: فرحت قلبي الله يفرحك صج صج صج كنت متضايقه ..مشكور بدر وماتقصر
ام مناير: عين السيح بدر مايقصر ولا يرد احد الله يخليك لأمك وخواتك
بدر: تسلمين خالتي ولو ماسويت شي ..يلا توصون شي؟
ام مناير: وين رايح بدر؟
بدر: والله مشوار ..ليش تامرون علي شي؟
ام مناير: اي بغيت تقعد شوي
بدر: هاذا انا ..وقعدت...بس اقعد؟؟..تامرين امر خالتي
ام مناير: مايامر عليييك عدووو قعدتك ماتنمل..بس اذا شغلتك مهمه حيل توكل
بدر: لا قعدتكم اهم
ام مناير: ماكو احلى من قعدة الاهل و الجمعه يابدر الانسان شماخذ من هالدنياا
بدر: اي والله ياخالتي كلامج كله عدل
ام مناير ( قعدت تحوس جنه براسها شي وحجي ودها تقوله...)
ام بدر حست بهالشي وقالتلها: شفيج فوزيه ((( فوزيه = ام مناير وزوجة عم بدر مبارك))...جان ودج تقولين شي لا تستحييين انا اختج و بدر ولدج...ومحد غريب
ام مناير: والله يا ام بدر..كاج قلتيها..انا حسبة اختج ويعلم الله بمعزتج اللي بقلبي..والله شاهد على انج اقربلي من خواتي نفسهم
ام بدر: تسلمين يالغاليه احنا خوات من عمر فهمتج من عيونج و حسيت ان في حجوه(كلمه) تقرقع بقلبج ..قوليها يا فوزيه مامن غريب
ام مناير: والله يا ام بدر يقولج الكلمه اللي تستحي منها بدها ..وانا ببدي كلمتي...بدر وحسبة ولدي..ويعلم اللله اني اعزه ومستثنيته عن الباجي دايمن كنت اقول بدر غير و بدر غيررر..وعسى الله لايغير عليه انشالله
ام بدر: آآمين انشالله
ام مناير: اللي بغيت اقوله ياوخيتي( يااختي)..مناير بنتي ماعليها قاااصر والحمدلله كاهي تشتغل وعندها شهادتها ...وبدر حليو ويدخل القلب ومن اهما صغار وانا اتمنى بدر زوج حق مناير...ها وليدي بدر شقلت........

مناير...قامت وقفت من شدة الصدمه..ماتوقعت هالتصرف من امهاااا!!!!..كانت كل علامات الصدمه باينه على ملامحهااااا.....كانت نظراتهااا مو ثابته..تطالع امهااا و بدررر و نوره و ام بدر......: يمه شنووو هالحجي انتي شقاعده تقوووولين
نوره تدخلت قامت و صرخت بصوت عالي: يمه شفيييج انتي

بدر طالع امه ومناير و قام وقف وقال لمناير:: مناير خالتي ماقالت شي غلط
مناير(تبجي وبصوت عالي قالت): شنوو ماقالت شي غلط...انت سمعتها شقالت؟؟؟..بتخطبني لك؟..
بدر(بتردد وحروف متقطعه): بتخطبج لي...خالتي حسبة امي وماقالت هالشي الا واهي نيتها خير لنا...وانا اقولج ياخالتي ان يشرفني هالشي...

مناير ماقدرت تستوعب اللي صار..او تقعد ثانيه وحده ببيت عمها...
مناير(تبجي): قومي يايمه نرد البيت...
ام مناير( فوزيه): شفيج يامناير تبجين...انا ماغلطت يايمه..مسحي دموعج غاليه علي حيل
مناير(تبجي):لو كنت غاليه عليج جان مااابعتيني بهالطريقه...قومي نرد البيت
ام بدر: عيب مناير انتي شقاعده تقوووولين تعوذي من ابليس ....كلمه وقالتها فوزيه ...جانج موافقه قولي خلينا نفرح...
مناير: بس مو بهالطريقه ياخالتي...مو بهالطريقه..(((( وتبجي)))))
ام بدر خزت بدر بقوه ..بدر نززززل راسه....بس موقفه كان اقووى من انه يرفض...خاف على مشاعر منايرررر اللي بدت تنهار جدام عيونه من الفشله و الموقف البايخ الللي حطتها فيه امها....: مناير..ماراح ألقى احسن منج..

نوره: انت شقاااااااااعد تقول..ماتبيك ياخي افهم
ام مناير: انجبي انتي لي حجوا الكبار الصغار ينطموون انجعمي بس وسدي حلجج
مناير: شلي قاعد يصير؟؟ليش جذي ..ليش؟؟؟؟
ام بدر: سمعينا رايج خلينا نفرح واللي صار انشالله ماوراه االا كل خير...لاتصيرين حساسه يابنيتي...واحنا اهل ..وانا حسبة امج فوزيه...
بدر( حس ان الموضوع صااااار صجي.............ومها يابدر ...مها!!!...)
فزت دانه من مكانها و وقفت

كان وده يصرخ بصوت عالي و يوقف المووضوع.بس خاطر امه يسوى عنده الدنيا ومافيهااا...اي يايمه اي.....عشان خاطرج يايمه ..ببيع خاطري...وراحتي...........و ...و ...واحساسي...

مناير( هدت شوي):يمه خلينا نروح الحين ونتفاهم بالبيت
ام مناير:على راحتج ..مع ان مامن غريب هني.....يلا يا ام بدر...انشالله الله يكتب اللي فيه الخيرررر...
ام بدر: وانا ماراح القى احسن من مناير جنه لي....وتوني قبل يومين تكلمت مع بدر بهالموضوع...

ابتسمت مناير بس االاحراج بان عليها..كل ماتذكرت الموقف البايخ اللي انحطت فيه....
طلعت مناير و لحقتهااا نوره....
وعند الباب..
نوره: انتي من صجج بتوافقيييين .؟؟؟؟ انتي اكبر منه...ينيتي...رفضيه مناير....باجر بيعايرج بيقوووولج امج باعتج لييي ..رفضيه صدقيني منايررررر احسنلج والله احسن لج
مناير كانت ساكته ولا كلمه..وماعبرت عن رايها ابد...
لحقتهم امهم بعد ماسلمت على ام بدر و بدر.....
واول ماركبت فوزيه ( ام مناير) السياره...انفجرررررررت مناير من البجي...بدت تبجي بقهرررررررر حست بالذل و الاهانه حست بأن حجمها صغيررر عند امها...بهالطريقه يايمه ...بهالطريقه ؟؟...جذي يايمه جذي ترخصين فيني.....ليش يايمه ليش..ليتني مت قبل لا ايي هاليووووم..ليتني مت...آسفه يابدررررر..آسفه...انحطيت بموقف باايخ مثلي.......والله مو ذنبي واللله مو ذنبي.....ليتني مايييت ...آآآآخ يايمه ..............


ام مناير: تعوذي من ابليس يايمه اناااا ماسويت جذي الا لأنج غاليه علي وماراح ألقى احسن من بدرررر زوج لج اهدي يايمه اهدي و مسحي دموووووووعج....

مناير ماردت على امهااا ...وماقالت ولا كلمــــه...بس صوتها واهي تبجي كل ماله و يزززززيد...تحس بحرقه بقللبها..ونااار محد يقدر يطفيييهاااا...آآآآآآآآآآآآآآآخ يايمه ليش جذي .....

نوره: انتي شسووووويتي..خربتي كل شي..مو حرام عليج تفرضين عليه يتزوج مناير...واهي اكبر منه و يمكن يكون مايبيها...مو حرام عليييييج تفشلين بنتج و وتصير حالها حال اي شي رخيص عندج تهدينه للغير...عيب يايمه اللي سويتيه والله عيببببببب

ام مناير: انتي تسكتييييييييييين ماتتحجييين....وليش ماتبيه منايررررر ليش...وفرق العمر ماهوو عود (( كبير))...والريال جامعي وبعد سنه يصرف على نفسه و يقدر يفتح له بيت بعد....وين يلقى احسن من مناير جمال ودلال واصل و فصل و فوق كل هاذا ولد عمج....اولى من الغريب يايمه..باجر لي خذيتي الغريب شلون بتعيشين معااه..ع الاقل احنا فاهمييين اطباعه و عارفيييين اخلاقه و قريب و رابي بينكم...ليش يايمه كل هالبجي ليش...يشهد الله اني ابيلكم الخير والأحسن..احنا الكبار نشوف اشياء انتوا ماتشوفونها ولا تفهمونها..احنا فاهمين بالحياه زين..وعارفين ان الانسب للبنت ولد عمها...

مناير كانت تبجي وتحاول تركز على طريجها واهي تسووووق..تلطخ ويهها بالكحل امختط بدموع القهر و الذل....وصارت تتنفس بصعوووبه...

نوره: تشوفووون اشياء.؟؟..هاذا اكبر دليل على انج خرفتي يايمه...خرفتي..ولا شلون تحطين بننتج بهالموقف..شلوووووووون
ام مناير: قلتلج تسكتين ولا اربيج من يديد بهالنعال على رااااسج يالمو متربيه....احنااا مو غرب انتي ماشفتي شلووووون بدر استانس انا سهلت عليه الأمور ادري فيه خجول...وانا مافيني صبر انطر

نوره: الا انبطت جبده وانحرج وماعرف شيقول واللي قاله..يقوله كل واحد ينحط بهالموقف يمه...اصحي يايمه الريال باين عليه مايبيها وانتي فرضتي مناير عليه غصب وعشان جذي قال هالحجي....مناير لا توافقين خلج ثقيله قدرج عالي مو رخيص عشان تبيعين روحج بهالطريقه.........

صراخ بجي ...ونقاااش حار..طول الطريج...لين وصلوا بيتهممم بالنزهه...نزلوا و اول ماحطت مناير ريلها ع الارض.............حست الدنيا صارت بيضه فجأه....
عوار براسها غريب.....اذنها انسدت فجأأأه..دوران ...دوران....كل شي صار يدور حوولهااا....والصوره ماعادت واضحه.......

وطاحت مناير...


===========================

وبالروضه...

بدر حاط ايده على راااااسه...وحس بالنااار تحرق قلبه..وعقله قاعد يعيييد الموقف اللي من دقايق صار جدام عيونه ...

دانه(بصراخ): شنو هالاسلوب وهالطريقه البدائيه ....بدر اذا انت ماتبيها تكلم هاذا مستقبلك وانت بتعيش معاها طول العمر..لا تفرض على روحك وحده انت ماتبيهاا..حرام تظلمها معااك..تنجرح الحين..احسن من انها تنجرح بعدييين..وانت ريال..كلمتك عندك...تكلم ليش ساااااااااكت...

ام بدر: ماعليج منه اهوا بغاها ووالريال ماينجبر على شي مايبيه..لو مايبيها جان ماقال لها ماراح ألقى احسن منج.....

بدر كان قاعد وسارح بقوه وامه واخته ذبحووووه بالحجي اللي كل دقيقه يتغير....مو عارف شيقووووول مو عارف شيقرر...وفجأه
بدر(يصرخ): بــــــــــس!!!..مو ناقص الا يعطوني المهر ويقولون لي جهز روحك للزواج...
ام بدر: اسكت بس اسكت ..انت مو عارف شي..مناير انسب وحده لك...وانا امك واعرف شلي يناسبك واللي مايناسبك...بتكسر بخاطر البنت؟؟؟..بتبيعها؟؟.. بتفشلني عند فوزيه؟؟؟..بتفشلني يابدر..شقول لها ...شقول لها قوولي رد علي...قبل كان رايك مهم قبل اللي صار قبل شوي..بس الحين انت مالك راي ....مالك غير مناير يابدر..واللي يعافيك لا تحطني بموقف انا مو قده..ماراح اقدر احط عيني بعينها يابدر ...صدقني البنت مناسبه لك ..من ناحية الجمال حلوه..والشهاده اهي جامعيه..شتبي اكثر يابدر شتبيي..
بدر ترك امه و صعد غرفته....حس الدنيا تدوور فيه...
انشالله يارب ماتوافق....يارب ماتوافق...انا شلي خلاني اقعد لو طالع مو احسن..لو مو نازل من الاساس مو احسن..ليتج يامها قلتيلي انثبر لا تنزل جان اهون من اللي صارلي الحين ..شنو هاذا شلي قاعد يصير..انا ماصدقت ألقى الانسانه اللي حبيتها..تطلع لي مناير وامها....انتي من وين طلعتيلي...من وووووووين...وانتي يا خالتي الله يهداج شفيييييج بهذلتينا عفستي البنت و عفستيني...

مسك موبايله قرر يدز مسج حق مناير يكتب لها فيييه اني ما ابيج... وانج اخت مو اكثر بالنسبه لي...كان تحت تأثير الصدمه ..خايف ينجبر ياخذها...ومها..آآخ يامها..ومها شقول لها..ومها ما اتزوجها يعني؟؟..مها حياتي ودنيتي واول حب لي ..يروح..كل اللي بنيته يروح جذي بلحظه..

ادري هالكلمه جارحه حيل..آنا آسف يامناير...آآآآسف...ما اقدر اربط روحي فيج وانتي حسبة اختي سااره..ما اقدر يامناير ما اقدر استوعب هالشي.......... ما اقدر يامناير...
انا اللي ابيهاااا اسمها مها...اسمها مها ....فديت كل مافيها ..فديت روحها وقلبهااا.....فديت احساسها ...اعشقها يامناير اعشقهاااا....ما اقدر اترك حلمي ..عشان حضرة شعورج....ما اقدر يامناير ما اقدر......




==============================

منايررر كانوا حواليها السسترات...مجرد اسعافات اوليه بسيطه....رفعوا ريلها شوي فوق...عشان الدم اللي تجمع بريلها ....وعطوها ابره.....وبللوا ملامحها بالمااي....فتحت مناير عينها ...صوره موواضحه....بعد ثواني تجمعت الصوره بعيونها....وشافت امها يمها..اللي فزت من مكاااانها....
ام مناير: سلامات يمه.....سستر شفيها مناير؟؟
سستر: شوية هبوط خليها ترتاح شوي ووبعدها تأدر (تقدر) تروح البيت
ام مناير: الله يطمن قلبج...يمه مناير سامحيني ..سامحيني يمه ...والله ماكنت داريه ان هالشي بيكون صعب عليج...توقعتج تفرحين يايمه والله آآسفه


مناير( تذكرت الموضوع و بدت تبجي بس بهدوء هالمره ): يمه خلاص اللي صار صار.....
وطقت على ملاحهاا بأيدها حييييييييل و بقوه وبحسره

نوره: خلاص رفضيه منايررر.....لاتوافقين عليه خلاص
مناير سكتت مانطقت بحرف
....غمضت عيووونها.....

وبعد دقايق...لبست شيلتهاااا بعد ماا لمت شعرها اللي كااان نازل على ملامحهاااا..وقامت من السرير.......
وراحوا وراها امها و اختهاا....
ركبوا مع الساااايق.....حطت راسهااا منايررر بين ايدها..طول الطريج ...وكانت تبجي بهدووووء....

دخلت البيت ...

مبارك( بو مناير): عسى ماشر يبه...قولولي شصاااار...شفيج يبه شفيج..
مناير مانطقت بولا حرررف...
ام مناير: خلها مبارك خلهااا...خلني آخذها غرفتها ترتاح
مناير: مافيني شي اقدر اصعد بروحي..

بعد ماصعدت مناير غرفتها
نوره: يبه يمه فشلتناااااااا ليتك كنت موجود وشاااااايف امي شقالت..ليتك سامع الحجي اللي صار تووووه
مبارك( ما اهتم لكلام نوره ): فوزيه علميني شصار ببيت اخوي...؟؟..ردي تلفتي اعصاااابي...

فوزيه: مبارك انت عارف بدر ولد اخووك ريال وحشا ماكو منه اثنين
مبارك: ومعناة الحجي؟؟
فوزيه: كل اللي قلته لبدر...بغيتك لمناير
مبارك: وشقال بدر
فوزيه: قال ماراح القى احسن منها زوجه لي
مبارك: عيل ليش هالنجره والصياح ؟؟
فوزيه: يقولون فشله
مبارك:تركيهم عنج زين ..يهال ومايعرفون مصلحتهم وينهي...وبدر من زمان انا بغيته لمناير..ودامج قلتيله هاذي الساعه المباركه والله

نوره: انتوو شكلكم ينيتوا خرفتوا وبتخلونا نستخف من سواتكم ....بعتوا البنت بهالطريقه...والريال غصبتوه..والله حرام عليكم...بالله الريال ما يبيهاا..

مبارك: انتي آخر من يتكلم...اختج ماعليها زود...وبدر بعد ماعليه زود..والاثنين مناسببين لبعض


نوره: شنو مناسبيين انت من صجك يبه...يمكن روحه ماتبيها ماتشتهييييييها

مبارك: سكتي لا ألسب هالعقال على ظهرررررج والله ماعرفت اربيج ..شوفي بنتج شتقول فوزيه

فوزيه: سمعت يامبارك..هاذا غير الحجي اللي سمعته منها طول الطرييييج...غثتني و حرقت قلبي يامبارك

مبارك: انتي مالج علاقه بهالموضوع..وان سمعتج نطقتي ماتلومين الا نفسج..بدر ماياخذ ااالا مناير..ومناير مالها ريل غير بدر...


مناير صعدت غرفتها وقفلت الباب..ولما صارت بروحهااا..قطت الشيله و فتحت شعرررها..اللي نزل على ظهرررها...تذكرت اللي صار...ماكاااان عندها غير البجي..الصدمه خلتها ماتعرف شتقووول..

لكن ...وصل لها مسج...قطع نوبة البجي اللي غرقت فيهاا....فزت ..مسحت دموعهااا...

خذت تليفونها..ولما صار بين ايدهاا..
رسالة جديدة : 1

(( السلام عليكم....اللي بقوله يجرح حيل..بس صدقيني انتي حسبة اختي ساره.. عزيزه وغاليه..))

انتظروا الجزء السادس​

 

[كوووكه]

الجزء السادس,,,
******************​

انتي حسبة اختي ساره...عزيزه وغاليه.......))

تجمعت بعيونها الدموع من قرت اول كلمه...وآخر كلمه..كانت طعنه..مو جرح....خذت نفس طوووووووووووووووويل حطت راسها بين ايدينهااااا : ليش يايمه ليش..

حست ودها تصرررخ..حست بأحساس كل بنت تنحط بنفس موقفهااا..حست بالاهااانه....انتي حسبة اختي سارة!!..انا آآآسفه يابدر آآنا آآسفه...

ردت عليه بمسج::
( وانت حسبة اخوي فيصل...آسفه على اللي سوته امي..بس مره كبيره ولا تلومها..)

دفنت راسها بالمخده وحست بدموعهااااا حآآآآآآره تنزل على ملامحهااا ...وتحرقها...
تبللت المخده بدمووعهااا..ليش يايمه ليش..هاذي الكلمه الوحيده اللي كانت تطلع من لسانها...حاولت تكتم صوت آآهاااااتها بس دخلت عليها امهااا...

فوزيه: يمه مناير...يمه انتي ليلحين تبجيييين..انتي شفيج يايمه شفييييج ..أللي صار مايسوى كل هاذا..ويفرح اكثر من انه يبجي..انا معاج انه الموقف شوي كان محرج بالنسبه لج..بس لو كان مع غير ام بدر ...جان قلنا...بس ام بدررر اختي يايمه اختي...وبدر اهو نفسه بدر اللي تربى ببيت واحد معاااكم قبل لا نفترق بالسكن...

مسكت بنتها و ظمتها على صدرهاا...
مناير: بدر قال مايبيني يايمه
فوزيه: الريال قال ماراح يلقى احسن منج بس ييايمه بس عورتي قلبي...انشالله باجر بيي يخطبج من ابوج ..
مناير: يمه بدر قال مايبيني
فوزيه: يمه الصبي ماقال مايبيج
مناير: قالها يايمه قالها....( عطتها تليفونها)..شوفي يمه شقااال..( وزادت بالبجي)..
فوزيه: شنو هاذا ما اشوف يمه شكاتب بدر
مناير: يمه يقول اني حسبة اخته(وتبجي )
فوزيه:وهاذي الرساله متى دزها
مناير: قبل شوي يايمه...خلاص تكفييييين خليني طلعي وخليني
فوزيه: لالا شكله ين الصبي..يرفضج انتي..صج مايستحي على ويهه..لا ودازلج رساله بعد...خلاص يايمه من باعج ابيعه ..بس يمه مسحي دموعج
مناير: شعقبه يايمه شعقبه..خليني الحين خلييني ابي انام بس طلعي بره...



فوزيه طلعت من غرفة بنتها واهي حاسه بالذنب...تسرعتي يافوزيه تسرعتي..لو اني مستشيره امه قبل لا انطق جدام الكل..جان يمكن موقف بنتي كان احسن....آسفه يايمه آآسفه..والله مانويت الا الخير..والله عالم بللي في قلبي لكم..والله اني ابي لكم الخير و السعاده...آآآخ يايمه....

=======================================


شوق كانت وسط الحريم في حفلة استقبال ولد خالتها حمد ..من كلية الشرطه..في بيت خالتها بالسرداب...كانت الحفله كبيره وفيهااا حريم من كل المستويات والاصناف..والشاطره من البنات تكسب رضا وحده من هالحريم عشان تفكر فيها زوجه لولدها..
لكن شوق قلبها كان يقول ابي واحد بس...ابي حــمـــد..
شوق كانت تبتسم للكل وتسلم وتوجب..


وحده من المعازيم كانت طول الحفله تطالع شوووق..ومراقبتها في كل تصرفاتهاا..
في الدوانيه كانوا االرياييل مجتمعيين يباركون لــحمد..كان شاب مبتسم و بشوش...

مازالت هالمره تطالع شووق و تخزهاا من بعيد لي بعييييد....لين سألت وحده يمها....: من بنته هاذي؟؟
وحده من المعازيم: بنت غانم اللي رحنا عزاه قبل سنه
ردت عليها: امها مشاعل السمره اللي بكل حفله نلقاها؟؟
ردت الثانيه: اي هاذي امها...


شوق كان الموبايل على اذونها تكلم مها....
شوق: ماشفته ليلحييين
مها: وشناويه تسوووين انتي..عن الينون تكفين
شوق: لأ ..انا دارسه هالشي سنين ومضمون
مها: قوليلي شبتسوين...خليني انصحج او اساعدج
شوق: ساعدي روحج خليني انا اضبط روحي بروحي..
مها: وي مالت عليج خليني ادق على بدر احسن لي يلا باي
شوق : باي
مها: قولييلي شيصير معاج اول ماتخلصيييين..
شوق: انزين يلا باااي..

بعد ماسكرت مها من شوووق..قررت تدق على بدر اللي لا حس له ولا خبر من 4 ساعات!!

بدر اول ماشاف رقم مها نبض قلبه من يديد وبده التفاؤل يدخل قلبه..ابتسم وقال ..عسى الله لايحرمني منج يامها...وماتكونين زوجه لغيري...والله لأوريج السعاده على اصوولها وبنعيش احلى ايامنا مع بعض...

بدر: ألوو
مها: هلا حبيبي..وينك لا حس ولا خبر..ليلحين انته بره
بدر: لا ماطلعت
مها: ليش بدر مو قلت بتطلع..حبيبي فيك شي؟؟صوتك مو طبيعي!
بدر: لااا مها مافيني شي شوي متضايق
مها: اي باين ..يلا حبيبي قول لي شفييك عن الدلع
بدر: مشتاقلج
مها: اووله اووله يالجذاب ..قول شفيك خلصني لا تقص علي
بدر: متهاوش مع واحد من الربع وخلاص انسي ..
مها: اهاا..لايهمك حبيبي..انشالله تتراضوون
بدر: يولي الخسيس
مها: لالا بدر مو جذي عاد..بتقول هالحجي قوله لما اسكره
بدر: انززين..شكنتي تسوين
مها: اكلم شوق
بدر: بليييييييييه بعد شوق
مها: حبيبي شوق نصي الثاني
بدر: وآنا؟
مها: انته انا
بدر: انا شنو؟
مها: إنته آآنا..وآنا إنته
بدر: يابعد طوايفي وهلي وكل ناسي احبج يامها احبج
مها: اموووووووت فيك
بدر: ماراح اخليج مها
مها: فال الله ولا فالك شياب طاري الفراق الحين
بدر: كلمه كنت بقولها..والحين قلتها وانا مرتااح
مها: عسى دوم مرتااح حبيبي
بدر: وعسى الله لايحرمني من وجودج بحياتي
مها: وعسى الله لايغير علينا حبيبي
بدر:آآمين ياقلبي

+++++++++++++++++++++++++++++++++++++++++++

شوق طلعت من الصالــه اللي كانت تظم اكثر من 60 مره.....راحت صوب مدخل الدوااانيه ....كان فاضي كل الرياييل كانوا داااخل...هني طلع عمهااا وليد....
وليد: شوق!!...شتسووين هني؟؟؟؟؟
شووق: ها...طلعت ..طلعت بتكلم بالتليفون ..ازعااااج داااخل
وليد: يلا دخلي داخل ..لا اشوفج هني
شوق: انشالله عمي...

ابتعدت شوووق ...وراقبت عمها من بعيد ولما دخل....دقت على حمد....هاذا الوقت المناسب ياشووق...لازم اللي ابيه يصير.....

حمد كان داخل بين الريايييل ..ضحك وسوالف..والكل يبارك لــه..ماسمع صوت موبايله ولا حس فييييه....

شوق...تكفه رد ...تكفه رد...تكفه ياحمد رد ...

حمد واخيرا سمع صوت الموبايل..ولما شااف رقم شووق...عفس ملامحه ...ورد بنفسيه بعد ما ابتعد شوي عن الرياييل: نعم...شتبين داقه...

شوق: انا عند الباب ..اطلع بكلمك
حمد: انتي من صجج!! سكريه يلا سكريه ولا تدقين مره ثاانيه
شوق: موضوع يهمك حمد
حمد: مايهمني اعرف شتبين..يلا سكريه
شوق: بنطر 5 دقايق اذا ماطلعت راح امشي
حمد: بللي مايحفظج
شوق: حمد بقولك كلمتين ماعجبوك خلاص ..وما ادق مره ثاانيه
حمد: بلييييييييييييه ..يلا كاني طالع لج....
شوق: يلا ناطرتك

+++++++++++++++++++++++++++++++++++++++++++++

ام بدر كانت قاعده مع ابو بدر بالغرفه....وبدوا يتكلمون بللي صار اليوم
بو بدر: لا ابد ماغلطت فوزيه...وين بنلقى احسن من مناير
ام بدر: قول لولدك هالحجي
بو بدر: ولدي مايرد لأبوه طلب...وانشالله باجر اكلمه ..
ام بدر: كل خوفي يابو بدر يفشلني عند المره و يرفض البنت..والله ساعتها مادري شلون راح اجابل فوزيه مره ثااانيه
بو بدر: لا يا ام بدر ولدج بدر فاهم و عاقل و متعلم وماظنتي يرفض بنت عمه اللي تربت معااه ..نعرفها زين و نعرف اخلاقهااا...
ام بدر: ان وافق بدر والله لخلي الكويت كلها تتكلم عن عرسه ..
بو بدر: مايصير الا الخير انشالله..


++++++++++++++++++++++++++++++++++++++++++++


شوق كانت على اعصاابها و ناطره حمد...وكانت متوتره و تتلفت خايفه احد يطلع و يشووووفهااا...
بعد دقايق طلع بدر من الدوانيه وراح صوب السيارات....كان مستعيل...شاف شووووق نازله لكعبها اللي لابسته و تحاول تسكره لأنه فلت.....كانت متعمده تسوي هالحركه جداااامه.....رفعت راااسهااا...ولما شافهاا...

تبلعم ..هاذي شمسويه بروحها!!..
شوق: هلا حمد..تقدر تاخذني مشوار
حمد:اي مشوار انتي ينيتي
شوق: الموضوع اللي بكلمك فييه ماينفع اكلمك فيه هني..اخاف احد يمر ويشوفنا
حمد: انتي من صجج تتحجين؟؟!...اترك الريااييل واطلع معاج انتي؟! خبله انتي خبله
شوق(( بدلـــــــع))...:خلاص اشووفك باجر و نتفاهم
حمد: شوق خلصيني شتبين قولي ..ولا تدرين..انا الغلطاااان اللي طالع حق وحده خبله مثلج...
شوق:لالاالا لحظه حمد لحظه ...(تمسكه من ايده)........



حمد طاحت عينه بعينها فتره وقعد يطالعهاا...: لو سمحتي ايدج وخري بعيد الواحد ااذا بياخذ ذنب ياخذه على شي يسوى
شوق: انته ليش تكرهني؟! انا شسويتلك..يعني عشاني حبيتك قاعد تكااااابر ..ليش ياحمد ليش
حمد: اكرهج ما ادانيييج تلوع جبدي لما اشوفج ...الله يلعن الساعه اللي صرتي فيها بنت خالتي....ماتشرفيني ولا ابي اشوف هالويه الخايس مره ثااانيه...ذلفي عن ويهي يلا...وان دقيتي مره ثاانيه لاتلومين الا نفسج..


تركها حمد و دخل....صدمة شوق خلتهااا توقف بمكانهااا بدون اي حركه وبدون لا تنطق كلمه وحده.....

بعدها ركضت دااااااخل تبجي.........بس دعمت اختها ..ابرار..
ابرار: عمى شفيييج ..منو طاقج ؟؟؟؟
شوق: ابرار نادي امي خلينا نمشي....تكفين دشي ناااااديهااا بسرعه
ابرار: زين زين زين الحين اناديها...( اخترعت ابرار وحست ان اختها فيها شي..وشي جايد بعد)..

قعدت شووووق على عتبة الباب...حاطه راسها بين ايدها تبجي بحرقــــه..
ليش ياحمد....تجرحني بهالطريقه.....وانا اللي سويت كل هاذا عشانك.....ليش ياحمد ذبحتني..ذبحتني الله ياخذك ذبحتني....الله لا يوفقك وين ماتروح يالحقير...الله لايوفقك ياحمد...وين ماتروح....الله ياخذك ياحمد ياخذك....آآآآآآآآآآآآه ليش يصير معاي جذي ليش.....

ام شوق: شوق و ويعه شفيج تبجييين ..احد قط عليج كلمه ..قوليلي اقوم ابرك عليه الحين
شوق: يمه بروح البيييييييييييييت يمه تكفين خلينا نروووووووووح
ام شوق: وشقول حق خالتج انتي ينيييتي ..قوليلي شفيييييج وانا اعلمهم لج
شوق: يمه خلاص ما اقدر اقعد هني ثانيه وحده تكفين يمه خلينا نروح تكفييييييييين( ولمت امها))
ام شوق: بس يمه لاتبجييييييين انا اعتذر من خالتج واطلع الحين بس لحد يشوفج تبجين ..مسحي دموعج يمه ..
راحت ام شووووق ودخلت داخل
ابرار: شوق شفييييييج لاتبجين قوليلنا شفيج وانا وامي نروح نراويهم...
شوق: ابرار حمد مايبيني حمد قال اني ألوع جبده ...يقول يكرهني يا ابرار يكرهني.....
ابرار: من زمان قايلتلج انه خايس و مغرور والله ماعنده ذوق هالجيكر ...خليه يووولي والله اهوا اللي مرده بيحس بقيمتج ويندم
حظنت اختهاا واهي حاسه بمنتهى الاهانه حست بروحها بتطلع...حمد اللي نطرته طول هالسنين منعت قلبي من حب غيره..حرمت روحي من كل شي..عشان اكون الزوجه المثاليه اللي يحلم فيهاا...سويت كل شي عشان يرضى علي و يحس بحبي ...ليش يصير معاي جذي ...آآآآآآآآآآآآآه ...


طلعت ام شوووق و خذت بناتها اسرار و ابرار ...وركبوا السياره مع شووووق....
ام شوق: يلا..قوليلي شفييييج ردي علي لاتسكتين
شوق: مافيني شي يمه مافيني شي ((( وزادتت وناتها..)))
ام شوق: شفتي حمد يمه
شوق (( زااااااااد بجيهاا و عرفت ام شوق ان اللي ببنتها اسبابه حمد..حمد اللي عمره ماحس بحب شوووق و قدرها ...اللي على طول كااان يستهزء بمشاعرها و يجرحهاااا...حتى يوم وفاة ابوها..الكل تعاطف معااهاا.. ..الكل وقف معاهاااا بعد مافقدت اغلى انسان على قلبهاا..ألا حمد..تدرون شقال؟..قالهااا ياشوق عظم الله اجرج ولو انتي رايحه بداله وايد احسن!!...بكل برود و وقاحه واستحقاار..ماتدري شنو مصدر هالكره كله..ماتدري ليش حمد حاقد عليها جذي....هل لأني عطيته قلبي واحساسي..بدون تفكير...هل لأني كنت مستعده ابيع نفسي له...هل لآني سمحت له يجرحني مره ومرتييييييين....))


وصلوا البيت...ونزلت امها و نزلوا خواتهااا ودخلوا قبلهاا....
شوق قطت الكعب...وداخلت حافيه....كان حيل يعورها وتحملت العوار طول الحفله ..عشان حمد..عشان تعجبه ...عشاانه بس عشانه.......
ونواف كان يطالعها من بعيييد...حس انها متضااايقه و قرب منها:شوق
شوق طالعته بنظرة استحقااااااار وكملت طريجها
نواف: اوقفي سمعيني بكلمج
شوق( بصراخ): انت شتبي وخر عني وخر عن حياتي ياخي حس ماعندك كرامه ماعندك احساس
نواف( ابتسم ابتسامه بارده):شوق...اللي يحب للأسف ينسى كرامته
شوق: وشتبي الحين ياي تعلمني بالحب
نواف: ياي اقولج ابيج
شوق: اكل تبن واذلف عن ويهي مو ناقص الا...ولا اقول ماني قايله ..انت عارف روحك شنوو..وهاذا آخر انذار لك ان اعترضت طريجي مره ثااانيه راح اعلم خوالي يخلونك بيزه ماتسوى..وانت من الأساس ماتسوى
نواف: شوق انا معاشي ماعاد مثل قبل...زادوني اميه الحين وصار 400 دينار....واذا خذيتج اقدر اصرف عليج..صار عندي فلوس..مو مثل قبل
شوق: رقوك حبيبي...لايكون صرت ترقص بالاعراس بعد...اقول ..روح سخن الطيرااان روح حبيبي روح...

دخلت شووووق البيت ..وركضت غرفتها تبجي....
نواف تجمد بمكانــــه..حس يانواف حس..البنت اهانتك..حس..كافي ياشووق كافي...كرهت روحي ودنيتي..انا شنو ذنبي اذا الله خلقني فقير وعلى قدي....حاولت و حاولت و حاولت و حاولت و مازلت احاول اصنع نفسي ..اكون لي ذات بس عشان تحترمييينها...اكون لي شاان تحطين له اعتبار...هاذا كل اللي ابيه منج ياشوق..والله حرام عليج..رحميني ياشوق رحميني...رحمي قلبي الللي ياما نزف جروووح والسبه انتي ياشوووق....نسيت كرامتي نسيت كل شي...بعت عزة نفسي عشان اكسب رضاج..شتبيني اسوي اكثر من جذي ياشووووق...شتبيني اسووووووووي...دمعت عينه دمعت قهر...بس لازال مبتسم ابتسامته اللي اعتاد عليها..ابتسامة قهر و سخريه من القدر القذر اللي لازال يسكر بيبانه بويهه وين ماراح...هاذا انت يانواف بتعيش ذليل و بتموت ذليل ..وعمره محد راح يحطلك شان....

انتظروا الجزء السابع​

 

[كوووكه]

وبشوف ردودكم ان شاء الله اليوم,,,
ومشكوريييييييين وايد لتشجيعكم لي,,
دلوعة بكيفي ,,, يسلمو من ذوقج حبيبتي ..
سولاف ,,, شرفني تواجدج بموضوعي ..
بطوطه ,,, مشكورة على اهتمامج ..
حياتي معاناة ,,, شكراً على التشجيع ..
روح اهلها ,,, تستاهلين حبيبتي ..
ماسيتي ,,, نورتي موضوعي..

ماكنت ناوية انزل البارتات بس والله عشانكم نزلتهم...​

 

[حياتي معاناة]

كــــــــــمــــــــــــــلــــــــــــي بســــــــــــرعة
نــــــــــاطـــــرتـــــــــــــــــــــــــــــج

 

[marshmallow]

kamlaaaaaaaaay ambeeh il gi9aa mo 9ij
lat3algeeenaah

 

[روح اهـلـها]

انتي اللي كاتبه الرواية عبالي نااقلتها اسلووووبج عجيييييييب وعندج كريزما موطبيعيه
وبنت عمي قلتلها عن الروايه قالتلي اقريهاا عجيييييبه
بليييييييييز كمليييييييي

 

[وردة^الكويت]

تكفين لا تنطرينا أكثر

 

[marshmallow]

na6reeenich up

 

[]دنيا الوله]

كملي اندمجت حدي