في بيتنا إمرأه ... ( ولكن ) ... ورايتي اليديده ويارب تعجبكم ..

[حياتي فراغ]

السلام عليكم

أشــكر كــل حبايبي اللي قروا روايتي الأولى
( ياسنين كفي عن الذكرى وخليني )
وهذا رابطها

( هنا )



واليوم تشجعت وبكتب لكــم روايتي الثانية وأتمنى تكون أقوى وأحلى من الاولى ..

روايتي الاولى كانت تتكلم عن واقع الفتاة بعد التخرج و بحثها عن زوجة المستقبل

ومشكلة التسرع بالزواج ..

أما روايتي هذي
فراح يكون لها مسار ثاني ..
باخذكم بأجواء واقعية وقريبة من الواقع ويمكن تشوفونها ببيوت وايد ...
وعلى فكره ترى من تأليفي وماهي قصة حقيقية
بس المواقف مقتبسة من أشياء نشوفها بالواقع
دمجتها لكم بأحداث تاخذ لأرض الواقع ...


أتمنــى أشوف تشجيعكم لي ...


برب ​

 

[M!U-M!U]

ناااطرينج حبيبتي :d


وتسلم ايدينـــــــج :d

 

[حياتي فراغ]

رد : في بيتنا إمرأه ... ( ولكن ) ... ورايتي اليديده ويارب تعجبكم ..

البارت الاول


غدير : خالد ... خالد .........
خالد : هلا سمي ..
غدير : تعال أبيك بسالفة ..
خالد : كاني جاي ,,

يدخل خالد الغرفة ..
خالد : ها شفيج ؟..
غدير : سعد أمه تدور له مره ..
خالد : سعد منو ؟؟
غدير : سعد ولد خالتي نجله ..
خالد : اي .. عاد توني شايفة يسألني عن بيت عبيد اللي ساكنين بقرين جيرانا الاولين ..
غدير : تقول خالتي نجله اهو يبيله اهم شي تشتغل بمدرسة عشان لا اختلاط ولا شي ..عاد قلت لها عن بنات أم علي أذكر بناتها كلهم مدرسات ..
خالد : انزين شنو مسوين عشى ؟؟
غدير : والله أنا طلبت لعيالي عشى من المطعم
خالد : اشوفهم منتفخين من هالمطاعم
غدير : اذكر الله .. مناشب عيالي
خالد : وينهم مالهم حس ..؟
غدير : ناموا وراهم مدارس ... اسمع .. ماتبي ادور لك مره ..؟؟
خالد : لاتكفين فكيني ..
غدير : ليش بالله ... هذا سعد بيتزوج.. و عيال خالتي كلهم تزوجوا حتى سليمان الاصغر منك تزوج و مرته حامل ..
خالد : زين ..تو الناس
غدير : اي شناطر.. شغل وتشتغل و عمرك 27 سنه شناطر
خالد : اممم مدري احس تو الناس ..
غدير : لا تو الناس ولا شي .. انت شوف شتبي و أنا أدور لك ..
خالد : مدري .. عادي اي شي
غدير : شنو اللي اي شي ..؟
خالد : عادي يعني اهم شي انها اهلها زينين و تكون صغيره ..
غدير : شوف أنت معاشك ضعيف .. باخذلك وحدة معاشها قوي تساعدك بالمصروف .. تعرف بعد باجر العيال ياكلون أكل بالفلوس و البيت بياكل و خدامه و بلاوي ..
خالد : وليييييييييه شكلي هونت ..
غدير : عادي كلنا جذي جت عليك ..
خالد : اسمعي أهم شي مابي من أهلنا فكيني .. مو تقعد أمي تحن عليج تاخذلي من بنات خالتي مالي خلق
غدير : لا والله أنا اللي مابي من بنات خالاتي .. أعرفهم كلهم عوب باجر يجننونك ..
خالد : ولا بنات عمي جابر فكيني منهم و من أمهم
غدير : أنت مجنون اذا احنا بنفس المنطقة وماندش عليهم الا بالسنه حسنه تبيني آخذهم لك .. لا والله اشطر اللحم عن اللحم لا يخيس ...
خالد : انزين امي وينها ماشفتها ..؟؟
غدير : امي نامت من الساعه عشر ..
خالد : انزين بروح اريح ساعتين .. وراي دوام ..
غدير : خلاص طف الليت قبل لاتطلع ..




غدير ( أم محمد ) مطلقة من سبع سنوات .. عندها ولد اهو محمد و ثلاث بنات .. منى ، ومها ، ومريم ..
كلهم صغار .. منى الكبير 11 سنوات .. ومحمد 8 سنوات و مريم ومها توائم 6 سنوات تطلقت واهي حامل بالشهر الاول بمريم ومها ..
أول ماتطلقت كان بو محمد يزورهم مره بالاسبوع ويطلع عياله .. بس بعد الطلق بسنه ونص تزوج من بنت عمه و من يومها ماشوفوه كلش ..
غدير ماخلته كلش و اشتغلت برفع القضايا عليه (( نفقة ومصروف و خدامه و سكن وغيره )) ..

سبب الطلاق .. مشاكلهم المادية .. أبو محمد كان عليه ديون كثيره ومعاشه مو كافي للصرف على البيت .. وعلى عياله الاثنين .. أما غدير كانت مبذره بشكل ملحوظ ..
وكانت طلباتها وايد .. و مصاريفها وايد ..
مــشاكل مشاكل مشاكل ... لين توصلوا لطلاق ..
أبو محمد مل من كثرة المشاكل .. و غدير ملت من قلت المادة .. و قررت انها تتطلق و تحط معاشها بجيبها و تعيش في بيت أبوها و تفك العيال من الجو المشحون بالمشاكل اللي راح يأثر عليهم وايد ...

مر يومين على موضوع خالد مع أخته غدير ..
بالصاله

غدير : يمآ .. ترى خالد قال دوريلي مره
أم عبدالله : صج والله .. خلاص عجل بكلم أختي باسمة آخذ له دلال بنتها
غدير : تكفين يمآ فكينا من بنات خالتي و الله لو تصير مشكله صغيره بتضر علاقاتنا معاهم.. مالنا خلق
أم عبدالله : يويلي شمشاكله بنات أختي ماشاءالله سنعات و راكدات
غدير : اهو قايل فكيني من أهلها .. أنا أقول آخذله عبير بنت هدى ..
أم عبدالله : أي عبير ؟؟
غدير : عبير بنت هدى .. هدى مرت سالم امام المسجد ...
أم عبدالله : يويلي هدى المصرية ..؟؟!!
غدير : إيه ..
أم عبدالله : يمج أنا أبيله بنت كويتيه ما ني ماخذتله بنت مصرية ..
غدير : وشفيها يمة بنت المصرية .. البنت تتبع أبوها مالها شغل بأمها و أمها ماشاءالله حبيبه و حليوة .. ذهبة تقوم بالكل و ماتطلع منها الا الكلمة الطيبه ..
أم عبدالله : والله مدري .. عز الله هدى حبيبه و سالم إمام و ملا و مسمي ومصلي و خوش رجال الناس كلها تمدحة ..
غدير : وماشاءالله عبير مزيونه الشعر لي الركبة و البياض و العيون تجيب العافية .. وآخر سنه لها بالجامعه تصير مدرسة روضة ..
أم عبدالله : هيي اسمعي دقي على أختها الجبيره هنادي و قولي لها ,, إن جان راضين نروح نخطبها له و وعقبها يروح خالد يشوفها إن جازتله ملجنا عليها ..
غدير : خلاص أنا آخذ رقم هنادي من سلوى بنت خالي علي .. وأدق عليها ..




(( شرايكم بالبارت الاول ؟؟ ))
( أدري قصير و لي الليحن مابدت القصة ولا الاحداث .. بس ان شاءالله كل الاحداث ياية بالطريج )


أنتـــظر تـشجــيعكم...​

 

[حياتي فراغ]

رد : رد: في بيتنا إمرأه ... ( ولكن ) ... ورايتي اليديده ويارب تعجبكم ..

ناااطرينج حبيبتي :d


وتسلم ايدينـــــــج :d

حبيبتي يعطيج العافية على التشجيع الحلو .. و ماقصرتي ..
و تسلمين ..

:blueSmCLR:​

 

[غــلآهاا غير]

نااااااااااااااطرينج حبووووبه

 

[غــلآهاا غير]

الباارت رؤووعـــه يعطييج العاافييه نااااااااااااااطرينج

 

[حياتي فراغ]

رد : رد: في بيتنا إمرأه ... ( ولكن ) ... ورايتي اليديده ويارب تعجبكم ..

الباارت رؤووعـــه يعطييج العاافييه نااااااااااااااطرينج

حـبيبتي .. تســلمين على التشجــيع الحلو ..
و إن شاءالله أشوفج من متبعيني ..​

 

[غــلآهاا غير]

الله يسلمج حبووووبه بس متى الباارت ؟!

 

[حياتي فراغ]

رد : رد: في بيتنا إمرأه ... ( ولكن ) ... ورايتي اليديده ويارب تعجبكم ..

الله يسلمج حبووووبه بس متى الباارت ؟!

حبوبة أن شاءالله باجر
بشوف اول شي اذا في اقبال لو بسيط على البداية .. وبعدها ان شاءالله بنزل بارتين باليوم و بدخلكم بجو الرواية ..
اشرايج تتصفحين روايتي الاولى وتاخذين فكره عن طريقتي بالكتابة ..:rerrerek:​

 

[بيتي بوب بس كويتيه]

وناسه انا قريت روايتج الأولي ووايد عجبتني
والحين بتابعج:hjy5jewf:

 

[حياتي فراغ]

رد : رد: في بيتنا إمرأه ... ( ولكن ) ... ورايتي اليديده ويارب تعجبكم ..

وناسه انا قريت روايتج الأولي ووايد عجبتني
والحين بتابعج:hjy5jewf:

حبيبتي تسلمين على التشجيع الحلو و مشكورة وايد
وإن شاءالله راح تعجبج هذي بعد بس نطري شوي وتشوفين الاحداث تطلع وماراح تقل عن مستوى الرواية الاولى بإذن الله​

 

[عواار قلب]

رد : في بيتنا إمرأه ... ( ولكن ) ... ورايتي اليديده ويارب تعجبكم ..

يعطيج العاافيه
متابعينج
وناطرين بعد


بدعتي بالاولى

 

[دمرت كياني]

رد : في بيتنا إمرأه ... ( ولكن ) ... ورايتي اليديده ويارب تعجبكم ..

:n2006107:
واااااااااااااو

كملي

عاد تذكرني كنت متابعتج ياويلج مومذكرتني

 

[حياتي فراغ]

رد : في بيتنا إمرأه ... ( ولكن ) ... ورايتي اليديده ويارب تعجبكم ..

يعطيج العاافيه
متابعينج
وناطرين بعد


بدعتي بالاولى

تــسلمين يا قلبي على التشجيع
و إن شاء الله هذي بعد ابدع فيها ... ويارب تعجبكم :yaaaaaarb:​

 

[حياتي فراغ]

رد : في بيتنا إمرأه ... ( ولكن ) ... ورايتي اليديده ويارب تعجبكم ..

:n2006107:
واااااااااااااو

كملي

عاد تذكرني كنت متابعتج ياويلج مومذكرتني

فــصلت على توقيعج .. خروفها عاد .. قمت اتذكر كلمات الغنية اقول ياربي اهو قال خروفها ولا لا .. تذكرت مجنونها رسمي .. لووووووووووووول


حببيبتي اكيد ذاكرتج ما أنساكم حبايب قلبي
وهذي ان شاءالله بتعجبج اغلب احداثها موجودة في كل بيت ...
بس نطري شوي وتطلع الاحداث ...​

 

[حياتي فراغ]

رد : في بيتنا إمرأه ... ( ولكن ) ... ورايتي اليديده ويارب تعجبكم ..

البارت الثاني


نفس اليوم
العصر ..

غدير : كوماااااااااااااااري .. كوماري
كوماري : ن،،،،،ععععععععععم ؟؟؟
غدير : قولي لجلال يركب السياره
كوماري : جلال راح يودي ماما منيرة بيت ماما
غدير : متى راح ؟؟؟ !!!
كوماري : قبل عشره دقيقة
غدير : لاااحول ولا قووووووة إلا بالله ... (( بصراخ )) هي تدري أن أنا بروح السوق ... شموديها بالسايق ليه ماخلت عبدالله يوديها ؟؟

سمعتها أم عبدالله اللي قاعدة بالصاله ...
أم عبدالله : شفيج تصــــآآآآرخين ؟؟
غدير : شمودي منيره بالسايق اهي تدري اني بروح السوق انا قايلتلها ...؟؟ ليه ماودها عبدالله
أم عبدالله : عبدالله يقول عندة شغل ما يقدر يوديها .. شسوي ذبحوني كل شوي ماخذين هالسايق ..جننتوه بينحاش منكم ...
غدير : ولدج هذا بعد مايعرف يودي مرته .. شلون اللحين ؟؟
أم عبدالله : كيفكم دبلتوا جبدي .. جنكم ديج ودجاجة مغير تتذابحون ...
غدير : وينه عبدالله ؟؟؟
أم عبدالله : فوق بشقته ..خليه لا تروحيله ..
غدير : شنو اخليه لا والله بكلمة ماعلي منه ..
أم عبدالله : خلاص شوي ويجي السايق .. شفيج
غدير : شنو شوي ؟؟ يبيله ساعة من الرقة لي صليبيخات ...
أم عبدالله : اي اصبري ماعليه
غدير : ولي متى أنا على هالحاله هذا سايقي وسايق عيالي مناشبيني فيه ..

نزل عبدالله على صراخهم ..

عبدالله : شهالصراخ اللي واصل لي آخر الشارع ..
أم عبدالله : يمك مايصير جذي.. اختك بتروح السوق تشري أغراض عيالها .. وأنت مرتك ماخذة السايق .. ليه ما وديتها أنت ؟؟
عبدالله : اي شفيكم .. ماراح يطير السوق .. وأنتي بسج تحلطم ..
غدير : أففففف .. بعد هذي مهي حاله .. هذا سايقي و كل ما بغيت أروح مكان .. ألقى مرتك ماخذة السايق ؟؟
عبدالله : (( بحلق عينه )) أخـــاف رايح بحلالج وأنا ما أدري .. السيارة سيارة أمي صكي حلجج لا وربي منتي شايفه سويجها ..
غدير : (( تصارخ )) شنو سيارة أمي أنا اللي أدفع الاقساط .. شوفوا ترى صج أنا راسي عورني من هالسالفة .. أبفتحلي سياره وأفتك ..
عبدالله : أقول يالله عاد صكي حلجج .. و انقلعي .. بعدين الساعة سبع شموديج السوق هالحزة ؟؟
غدير : يعني متى أروح إذا أنا من الظهر مجابله دروس عيالي توني خلصت .. قلت بروح أشتري لمحمد قكميص للمدرسة .. قميصة منشق ..
عبدالله : ولي متى ولدج هذا كل يوم طالع بطلب ..
غدير : والله ماطلب منك شي ...

,, دش خالد على صراخهم ...

خالد : شفيكم شالسافة شنو هالصياح ..؟؟
أم عبدالله : بعد غدير و عبدالله .. يتذابحون على السايق ..
خالد : أنتوا لي اللحين ..
غدير : اي بعد أنا هذي قعدتي من الصبح .. تعبانه ودايخة بروح السوق بشتري قميص وبرجع .. والسايق رايح صليبيخات .. متى بيرجع
خالد : امشي امشي أنا أوديج و عن الحنه
عبدالله : اي اخذها فكنا من صراخها ..
غدير : ياله يالله امش .. افففففف..



راحوا خالد و غدير السوق ..

أم عبدالله : يا عبدالله بعد مايصير جذي .. مرتك كل شوي ماخذة السايق وماتردة لين يهلك من الفراره .. بعد أحنا عندنا شغل ..
عبدالله : شفيج يما حرشتج .. ؟؟ بعد اهي هايته طول اليوم .. وهي مطلقة شتبين الناس يقولون عنه .. خل تهجع
أم عبدالله : يمك شنو هياته اللي تتكلم عنها هي ماتروح الا عند خالاتك ولا تشري اغراض عيالها ولا جمعية .. بعد حرام عليك المره بتخلص اشغالها ..يكفيها اللي فيها
عبدالله : شفيها ..؟؟ هي اللي تبي الطلاق .. خليها تتحمل
أم عبدالله : هي ماقالت شي انت اللي ناشب في بلعومها خلها بحالها ..
عبدالله : خل تولي و الله ان عطيتيها وجهه بدوس على روسنا ..
أم عبدالله : يمك شفيك هذي اختك مهي عدوتك .. وهي مسيكنه مالها إلا أنت وأخوك خالد .. والله انها بتضيع من غير أبوك ..
عبدالله : ليه حنا شسوينالها ... عشان سايق خليتينا بنججننها ؟؟؟
أم عبدالله : الله يهديكم الله يهديكم ...



بالسيارة خالد

غدير : استغفر صج قلت أدب .. هي تدري أن بروح بالسايق وقالتلها ..
خالد : شفيج أنتي بعد خلاص ماعليها كلها مسافة طريج ...
غدير : خالد شنو مسافة طريج .. كل ماشافتني بطلع قامت لبست و ركبت السيارة و مشت .. هي تتعمد أنا ادري عشان تبي عبدالله يسوقها ...
خالد : ماعليه أسكتي عنها و اكسبيها ترى والله المعامله الزينه تلين القلب .. وانتي اتفقي معاها لا صار عندج مشوار .. قوليلها يا منيره تبين تروحين مكان .. لا قالت قولي لها أنا بطلع ..
غدير : تخسي خل تولي .. اصلا تقولي ماني رايحة ولا شافتي لبست راحت ركضت وركبة السيارة ومشت .. هي جلبة ماعليك منها .. قلبها شكبره .. تسوي كل هالسوالف عشان تبي تحط سايق ولا تسوق ..
خالد : بعد عبدالله هذا لاراضي يودي ولاراضي يجيب سيارة
غدير : اي واهي تحط حرتها فيني ..
خالد : الله يعنكم سوالف الحريم ماتخلص ..
غدير : خل تولي .. اسمع أنا دقيت على أخت البنت اللي بخطبها لك .. وقالت تشوف أمها .. إن رضوا ترى بنروح عقب باجر نخطبها
خالد : اي بنت ؟؟؟
غدير : بنت سالم ( الدين ) اللي كان يأذن بمسجدنا ..
خالد: ايييييييه ويه ونهم هذول ؟؟
غدير : لي اللحين بقرين ..
خالد: أخوها فهد صح ..
غدير : اي ماشاءالله اللحين صار ضابط
خالد : ماشاءالله .. اذكره صغير يلعب بالشارع
غدير : وين صغير .. تزوج الولد ..
خالد : يحليله متى تزوج؟؟
غدير: يمكن صارله شهرين ..
خالد : الله يهنيه ...




(( ان شاءالله يعجبكم هالبارت )) ​

 

[حياتي فراغ]

رد : في بيتنا إمرأه ... ( ولكن ) ... ورايتي اليديده ويارب تعجبكم ..

(( وين التشجيــع يا بنات :080402ask_prv: ))​

 

[دمرت كياني]

رد : في بيتنا إمرأه ... ( ولكن ) ... ورايتي اليديده ويارب تعجبكم ..

:wqedqw:
كاااني يا حلووو
صج تبط جبد منيره :rgewrg: قطع
حمدالله لي سيارتي


افا عليج اعجبج بالتوقيع
كنت يومها فصله على اغنيه هههه ما خليت مكان ما حطيته بالفيس بوك وتوبك ايميلي كل مكان :krkrkr:
لزام اكتب عليها حقوق الطبع ههههههه

 

[rayona]

شدني عنوان قصتج .. مادري حسيت وراه سالفه غريبه

بدايتها حلوه و حيييل اندمجت ..

مشكوورة حبيبتي على البارت .. ناطرين البارت الياي :wqedqw:

 

[هجران الليالي]

الكلام اللي بالقصة واقعي 100% ويحصل في وايد بيوت
والقصة بدايتها حلوة وناطرين البارتات الجديدة