عـذرآ / كـلـيــة الـتـربـيـة .. بلآ تــربــيـة !!

[ورور92]

السلام عليكم ورحمة الله ..

يعطيكم العافية ..

انا من زمان بخاطري اكتب هالموضوع !
قلبي متروسة

ويمكن عنواني قوي شوي .. بس اللي بقلبي على الساني !

وياليت تتقبلون الموضوع بصدر رحب و نقاش راقي وتقبل وجهات النظر

----------------------

انا طالبة بكلية التربية (ثنوي و متوسط) داخلة الكلية حبا للتدريس والمدرسة (1)
ولان شخصيتي اجتماعية الحمدلله .. (2)
اطمع بأجر الله و افيد بشهادتي الكويت ..(3)
لا معاش و لا راحة و لاعطلة

--------------------

كنت متحمسة قبل ادخل الكلية .. لكن من دخلت وشفت الوضع هناك قمت ابجي !
لي يومكم هذا ما تعرفت على ولا بنت وانا ثاني سنة لي !
مابقى كلية ما بغيت احول لها بس اطلع من هني !
حتى امي تزفني تقولي قلعتج اكليها وتحملي الوضع:eh_s(14):

--------------------------

(((اولا))) بتكلم من برا لي داخل

انا وحدة اسوق و اسفط حالي حال الناس !
وكليتنا وللاسف ما تقدر الطلبة المتفوقين ولا تعطيهم مسافط داخلية و مسافط داخل فاضية حق مادري منو؟؟؟؟

ووايد من بنات التربية ما يسوقون !
يخلون السواقين ياخذون مسافطنا عند الباب وشخررري:ch12:
و يزحمونا
ترى ما فيها شي يوقف بعيد عند البيوت او يوقف بالجمعية ..
وتتصلين عليه قبل ربع ساعة و ينطرج !
ترى والله عيب اللي يسوونه حطي نفسج مكان اي بنت تسوق
مو تنقطين عند الباب و تزحمين الناس !!

والأردى من هذا ما شالله لا يو هالسواويق ساقو
مايشوفون لا يمينهم ولا يسارهم يمشون و يحكون السيايير عادي :/ !
سيارتي فوق 20 الف لونها راح من غبائهم ! :rgewrg:

---------------

(((ثانيا)))
بتكلم عن الجو العام بالكلية !
وايد مناظر - مقززة - واسمحولي على هالكلمة بس صج تنفر الواحد
ادخل تكرمون الحمام كلينكسات و وصخ بالقاع وعالمغسلة وبنات يلعبون بالماي !
واللي قاعدة مع رفيجتها ساحبين على المحاضرة على قولتهم و يايبين جنطة مكياج و قاعدة تمكيجها !!! وتطلع شعرها و تفصخ فلاتها و تلبس كعب وتتعطر!! @@
وتقولها ما جبتي الماسح للكحل؟؟! خليه عندي لانج تخلصين قبلي؟؟ << والله جد
والصراخ والصوت العالي والضحك المبالغ فيه ! @@

و مسألة انج تطلبين Fast Food و يوصلج لي الكلية
عليج بالعافية !
بس توصل انج تاكلين و ماتشيلين الوصخ !!!!! فهذا شي ما استغربه منها لانها مو متعودة على بيئة نظيفة بالبيت ! هالجو و هالوضع مالوف عليها حيل !

يعني والله عيب بنات هذي مو اخلاق مسلمين !!!
وانتو طالبات تربية المفروض تكونون بشكل اولى ارقى كلية !
شلون بتربون الاجيال بعدين ؟؟؟ شلون بتعلمين طالباتج الصح من الغلط
هذي مسؤولية وانتي مسآئلة عنها يوم القيامة !

واحنا كلنا طالبات !يعني طالبات علم يايين الكلية نطلب علم ونتعلم عشان نعلم ونفيد ونستفيد ونرتقي بالكويت !!

والله لما ادخل المحاضرة والدكتور يشرح و برا ازعاج ومسوين بسطة على قولة الدكاترة - سوق اليمعة- يايبين جايهم و قهوتهم و و حب و سوالف وضحك ! ديوانية مو جامعة

قمت اشك ان احنا شعب متحضر!!!

واتفشل لما اشوف وافدين يدرسون عندنا !
الحين مصورينا عند دولهم بأبشع صورة

----------

احاول على كثر ما اقدر اني اخذ مواد بشويخ والخالدية حتى لو صعبة و OVER LOAD
عشان ما اقعد بكيفان اكثر !



وانا ماخذة وحدة من المواد عند دكتور و هذا هالدكتور يخلي بنت تقوله متى تنتهي المحاضرة
تنتهي محاضرتنا 10:15 ! اهي 9:55 تقوله دكتور خلصت المحاضرة
واهيا موصيتنا محد يقول الساعة جم الا اهي
واهو المسكين يصدق و يطلعنا ..
وانا بصراحة عندي وايد اسئلة و شرح ابي افهمه اكثر !
و بعد المحاضرة بلغته وقلتله ثلث ساعة باقي وتمشينا بالكلية وشرحلي كل شي

اللي بتقول اني فتنت خل تقول لان انا مو ياهل ولا امعة امشي ورا وحدة ياية الكلية لعب
مو فالحة الا بتصبغ عينها !
والساكت عن الحق شيطان اخرس _ وهذا منكر ولازم نغيره !
وهذا مجلس علم يعني تحفنا الملائكة وتدعيلنا
مو نتعاون على الاثم والعدوان !

----------

سالفة الغش !
تييني وحدة من البنات وقت الامتحان
اشكرا تقول لرفيجتها بقعد جنب هذي لان شاطرة
وتقعد يمي تقولي دارسة صح ؟ غششيني تكفين!
قلتلها امممم قولي للدكتورة اذا رضت اغششج ما عندي مانع
ولو تبين انا ابلغها بعد احسن !
واستحت و اسقطت وعادت المادة ! :eh_s(8):
والله ويه عريض ! بدال ما تحطين هالمكياج جان درستي ؟

ما تدري الاخت الغش من الكبائر > فتوى الشيخ عجيل النشمي
----------

المسيد

وما ادراك ما المسيد !

على قولة دكتورنا معفن مو مصلى !
تسدح و تبطح و اكل و عفن لا احترام للدين ولا احترام للصلاة
نسوو ان النظافة من الايمان !
وان ما تصح صلاتج اذا اذيتي خواتج المسلمات وضايقتيهم بافعالج هذي
ترى الاخلاق قبل الدين وجزء منه !

ما اتوقع هالحركات بتسويها معلمة مستقبل ! الا اذا بتعلمهم شي ثاني فيرجع لضميرها

-------------------

الكافتيريا !!!!!!!!!!!!!!!

اللي ما دخلتها الا مرتين وانا مستجدة والاسبوع اللي فات عشان بطلب لي كوفي

الزحمة و حوسة الطاولات والوصخ اللي عالارض والريحة اللي صج تصرع
و الدز بالطابور
لما اكون صافة ربع ساعة و اييون 4 بنات بكل - قلة ادب - يطلبون على جنب و يمشون؟؟
اي نوع من هالناس !
حتى الحيوانات - يكرم القاري - تصف طابور لا يت بتشرب من راعيها !!

وكل شي كوم و سالفة الصراخ والتصفر و التطبل على الطاولات و اللي يايبة طار
واللي ترقص و مسوين سمرة ما شالله عليهم كوم ثاني

ويييييييييييييييييييييع الله يعيين الهندية - السكيوريتي - شلون متحملتهم

--------------

واخر شي مسألة الذمم الوسيعة على قولة دكتورنا
وحدة تحضر الثانية ما شالله مفازع على الجذب

تييني طالبة تبيني احضرها وتقولي كتبي اسمي ولا اذا ناداني قولي عني نعم !!

قلتلها : اذا تجرأتي و طلبتي مني هالشي مرة ثانية ببلغ الدكتور :eh_s(7):!

واقعدت بمكانها واحضرت واضبطت نفسها واربطت السانها !

و ما ننسى الطالبات اللي يسولفون / داخلين كلية التربية وتخصص رياض اطفال عشان سهل و مريح ما فيه امتحانات و عطلة و تطلعين الساعة 12 !
ولااللي تقولي بتخصص اجتماعيات ابتدائي وناسة سهل و الطالبات يرجعون و ياخذون مدرس خصوصي مالي شغل انا :/

وين الضمير؟؟ وين الاخلاق ؟ وين اللي تعلمناه عن المسؤولية؟؟
وين حب الوطن اللي ما يعرفونه الا بالمسيرات ؟
ولا اللي ندرسه كله عشان الامتحان و ما نطبقه بحياتنا

ترى كل شي بننسأل عنه يوم القيامة عن وقتج و عمرج وشبابج وصحتج !

و اكرره فئة من البنات اللي تدخل القاعة تدمرها و توصخها و تشخبط على الادراج
ومابقى فن من الفنون ما ارسمته و ذكريات و تورايخ وبراشيم:eh_s(14):
ما اقول الا حسبي الله عليها الدولة دافعة دم قلبها عشانا بس في بنات مو كفو

يبيلج ورقة و شخبطي عليها ! شخبطي بطاولات بيتكم !!!
ولا عشان مو دافعة الدرج من جيبج تخربينه ؟؟1
واللي تيي تسكر الجهاز مال القاعة و تحط شاحنها وتشحن تلفونها
والله ان الدكتورة ما اشرحت والسبة ان طالبة خربت الجهاز عليها وقالت انا لو افتن عالبنت تدفع الف دينار على هالجهاز وتصليحه عشان شاحنها بس !!
شهالاييد اللي ما تهد التلفون ؟ وين شاحنج بالبيت ؟ ولا مقطوعة كهربتكم:eh_s(10):
في شاحن اسمه شاحن سياره شحنيه عند سايقكم
---------


بالنهاية بنات هذي فئة لا تمثل كل الطالبات
لكن للاسف الشر يعم والخير يخص
ولا في وايد بنات اخلاق و ثقل و عقل و طالبات علم و معاملة راقية :eh_s(17):
لكنها قليلة !!!!!!!!!!

ممحد معصوم عن الخطأ و اتمنى اعالج بهالموضوع بعض السلوكيات
وتتعدل الفكرة السيئة اللي ماخذتها الكليات الثانية
عن كليتنا اللي حالها كل ماله و يتدهور !

واتمنى من البنات يفهمون معنى المسؤولية ..!
و تفكر بالكويت ومصلحة ديرتها و الاجيال اللي بتربيها .....
وتحط ربها ثم اهلها بين عيونها و تسوي اللي يرضيهم وترفع راسهم


عسى الله يوفقنا كل لكل ما يحبه ويرضاه
واتقبل كل الاراء بحدود بـ سعه صدر ..
حياكم الرحمن ...:eh_s(17):

 

[وحَـــــــــش**]

تسلمين على هالموضوع الحلو ومثل ما قلتي اهم شي ( أخلاق الانسان وضميره وذمته ) وهو بلاهم ما يسوى شي ولا منه رجا00والله يهدي الجميع ان شاءالله ويصلح الحال بكلياتنا ومالنا الا الدعاء00وكل اللي قلتيه انا شايفته00ومشكوره مره ثانيه
تقبلي مروري​

 

[قاهره عذالي]

واجد في بنات من داخل تافهات بكليتنا
وتفكيرهم بس بالمظاهر واللبس والمكياج
بس انا ما ابرر لهم
اول شي اعمارهم صغيره 18 و19 و20
للحين سن مراهقه
مو ناضجين
بس بيجي يوم وينضجون
عشان جذي انا مثلج اتضايق من بعض الشغلات اللي ذكرتيها بس ما اواخذهم

 

[دروب البنفسج]

صح لسانج وتسلم ايدينج على كلمة حق قلتيها ... انا مو بالتربيه بس خذيت مواد اهناك وشفت كل اللي اتحجين عنه وما قلتي شي جذب , جد والله اتفشل لمن تشوف هالشغلات اتسير بالجامعه !!! لا واللي يسوون جذي اهما مربيات اجيال ؟؟؟؟؟!!!!!
ترا هالحال يمشي على كل كليات كيفان مو بس التربيه ....# ارتقوا باخلاقكم وحافظوا على نعمة العلم اللي ربي معطيكم اياها ,,

 

[MayOumii~]

ويع الله يعينج
عشآن جذي صرفت النظر عن كلية التربية مع اني كنت حآطتهآ ابآلي
بس صآر حآلهآ حآل التجآري !
رحتلهآ بالقدرآت ! استغفر الله كلش مو شي

الله يهديهم بس .. الا سالفة المسيد وعدم احترام الدكتور
وين قاعدين صراحة شي يقهر
المفروض الي تسوي هالسواة الدكتور بدون نقآش يطردهآ حتى لو توصل يطرد نص الي بالكلآس !
يشوشرون على غيرهم

 

[Nostalgia ~]

السلام عليكم ورحمه الله وبركاته ..*
بما انج يالغاليه حاطه الموضوع للنقاش انا بقولج مو جنه العنوان شويه قوي وظالم بحق كليتنا ؟*

اختي العزيزه انا طالبه كليه التربيه تخصص انجلش رابع سنه وخريجه إن شالله عقبالج وعقبال الكل*
حسيتج ظلمتي كليتنا حيييل .. ومن كلامج حسيتج لان الجو العام بالكليه ماعجبج صرتي تنظرين لكل السلبيات الموجوده انها عموم وغالبيه بالكليه واسمحيلي اقولج هالشي مو صحيح .. فعلا كليتنا فيها سلبيات بس صدقيني مو بالضخامه اللي صورتيها .. لاتزعلين من صراحتي بس انا ماشفت الوصخ اللي تشوفينه طايح بكل مكان !!!*
صحيح ان المباني قديمه ومتهالكه بس احنا مالنا ذنب بهالشي ان مو نفس الكليات الثانيه .. يالغاليه انتي توج ثانيه سنه وماتأقلمتي مع اجواء الكليه ولا خذيتي كلاسات عند الدكاتره اللي يهبلون ومحاضراتهم صج تطلعين منها باستفاده .. وتحسين فعلا انج طالبه جامعيه ولا تعرفتي على بنات طموحات ويهمهم مستقبلهم انتي قاعده تطالعين من بعييد وتحسسين نفسج بالخيبه والحزن*
وعلى سالفه ان ( بعض الاقليه القليله جدا ) انهم داشين يلعبون ومو جديات .. يالغاليه ترا لو دشيتي اي كليه ثانيه راح تلاقين هالنوعيه .. وهالشي على نفسها اهيا اللي راح تتضرر احنا ليش نسولف فيها ونعيش نفسنا بحزن وكآبه عشانها .. المسأله مسأله همم وشخصيات واحس ان من الصحي ان ننشغل بذاتنا افضل من ان نراقب الاخرين او شلون يتصرفون ..*

نروح لموضوع المسجد .. ياقلبي انتي متأكده انج تقصدين مصلانا ماغيره ؟ اللي يم الجبرات .. انا دايما ادشه على حزه الصلاه ومااشوف اكل ولا وصاخه بالعكس اقعد واشوف الكل نفسي ناطرين الصلاه ومن يأذن كلمن يقوم يصلي مااقصد اجذبج بس فعلا انا الحين بتم رابع سنه وماعمري شفت اكل وهالسوالف بالمسجد بالعكس بناتنا فيهم خير يصلون بدون وصاخه ..

اما الكافتيريا انا مالومج عالوضع اللي فيها .. بس عن الظليمه ياقلبي لاتنسين ان الكافتيريا مو حق كليه وحده الكافتيريا حق كليتين ومساحتها ماتكفي لان البنات ماشالله ششششششكثرهم بكليتنا فما بالج لو كانت كافتيريتهم مع بنات الشريعه وانا لما اشوف تصرفات ماتعجبني مااحب اعمم على اغلب بنات كليتي*
لاني قعدت وشفت شكثررر بنات موسطحيات وطموحات ويهمهم العلم فوق ماتتصورين وشخصياتهم حلوه وصدقيني ياقلبي انا اعرف بنات شكثر بكليتنا واللي تتكلمين عنهم اقليه


الشاحن وما ادراك ما الشاحن .. ياحياتي انتي فعلااا شرهتج بهالموضوع مو بمحلها كلش
*انا وحده اداوم والشاحن لازم بجنطتي لان فوني بسرعه يخلص شاحنه ودايما استخدم البلاكات الفاضيه اشحن فوني فيها ماستخدم بلاك قاعدين يستخدمونه الدكاتره ومع العلم ان دكاتره التربيه ودكاترتي الانجليزي بعد يشوفوني بس مايقولون شي لان مااتوقع ان بلاك موصل فيه شاحن وفون مغلق راح يعيق العمليه التعليميه او انه نوع من انواع قله الذوق وعدم احترام الاخرين ! *

ياقلبي اتمنى تكون عندج سعه صدر انج تتقبلين رايي انتي لانج مو متقبله وضعج بالكليه او مالقيتي صداقات تناسبج صرتي تشوفين كل شي سلبي عندنا ومايعجبج .. كليتنا مو كامله اي نعم عندنا مشاكل لكن ماتوصل مرحله ان ينقال عنها ( بدون تربيه ) ياعمري التعميم لغه الحمقى وانتي ان شالله انج مو منهم بس العنوان انا اشوفه ظاااالم وماارضاه على مكان قضيت فيه احلى اربع سنوات من عمري .. مكان طور من شخصيتي كثييييير .. مكان تعرفت فيه على شخصيات كثيره مو اقليه مثل ماتفضلتي في قمه الذوق والهمه العاليه .. وعلى دكاتره ساعدوني وساهمو بتطوير شخصيتي ..*

شوفي ياعمري في مقوله تقول : ( نحن نرى الاشياء كما نحن ، لا كما هي ) لذلك الموضوع كله بايدج وبنظرتج انتي لو ماكبرتي الموضوع على بعض السلبيات اللي موجوده بكل الكليات مو بالتربيه بس والتفتي للإيجابيات صدقيني بتحبين الكليه والمكان*

انا الحين كل مااتذكر اني بتخرج تدمع عيوني ومايهون علي المكان *

وما اخفي عليج ان موضوعج زعلني وخلاني اشعر بالظلم .. انا اؤمن بحريه الرأي لكني ما اؤمن بانه من المنصف انج تصفين الكليه بهالصفه القويه لمجرد انج شفتي اشياء موجوده بكل مكان وبكل الكليات .*

نصيحه لاتضيعين احلى *سنين عمرج *دراستج بانج تكونين متشائمه لهالدرجه القويه !*

وبالنهايه اشكرج واتمنى انج تتقبلين كلامي بدون حساسيه :eh_s(7):

 

[فرفورهـ]

معاج ميه بالميه ولما تخرجت ارتحت وايد
شوفي ببيركج لاتقعدين بالكليه احنا كنا نطلع انا ورفيجتي وبنت خالتي نروح الافنيو او اي مكان نقعد فيه اونس ونقعد نسولف ونتريق او نتغدى
ونرد كليتنا قبل المحاضره الثانيه
وعندج بعد المصافط بلى احنا نصفط داخل الي بين الاداب والتربيه للمتوفقين عادي سوينا اوراقنا وعطونا كارد وصفطنا داخل
اذا تبين كافتيريا فاضيه روحي الاداب احسن لج ومافيها ازعاج كللش

البنات الي يحضرون بعض بصراحه اقثث شي هالفئه خاصه اذا قالت لج بويه عريض بروح اتمشى مع رفيجاتي وحضريني ههههههههههههههه


والله يوفقكم كلكم وان شالله نشوفكم خريجات

والايام تمر بسرررررررررررررررررررررررررررررعه

 

[Miss..ToTa]

بصراحه اوافقج الراي مع ان طموحي التربيه وانا دخلتها باختياري
بس اتضايق من الي اشوفه فيها صرت استثقل روحتها
وصج كفتيريا الاداب وايد اهدا وارقى وان شاء الله الله يهدي بناتنا

 

[همسات شقاوي]

موضوعج قويه مو لهدرجه كليتنا جذي بعدين المسسيد نظيفة واذا واذا دشوا باكل يكون بس قهوة يحطونه ع جنب والاوقات اللي ما في صلاة اشوف بنات يقعدون فيه ييسولفون بالفون او يحلون واجبات لانه مكان نظيف وهادي
وبعدين انا اطلب اكل من كفيتريا ييني القاعة وبعدين اقطه بالزبالة وكذا بنت جذي ما شفت اللي تخلي اكلها

للاسف موضوعج يحسس ان بنات التربية وضخات وبيئتهم مو نظيف

اتمنى انج ترجعين موضوعج في اشياء خطططأ

 

[هنـــا]

السلام عليكم ورحمه الله وبركاته ..*
بما انج يالغاليه حاطه الموضوع للنقاش انا بقولج مو جنه العنوان شويه قوي وظالم بحق كليتنا ؟*

اختي العزيزه انا طالبه كليه التربيه تخصص انجلش رابع سنه وخريجه إن شالله عقبالج وعقبال الكل*
حسيتج ظلمتي كليتنا حيييل .. ومن كلامج حسيتج لان الجو العام بالكليه ماعجبج صرتي تنظرين لكل السلبيات الموجوده انها عموم وغالبيه بالكليه واسمحيلي اقولج هالشي مو صحيح .. فعلا كليتنا فيها سلبيات بس صدقيني مو بالضخامه اللي صورتيها .. لاتزعلين من صراحتي بس انا ماشفت الوصخ اللي تشوفينه طايح بكل مكان !!!*
صحيح ان المباني قديمه ومتهالكه بس احنا مالنا ذنب بهالشي ان مو نفس الكليات الثانيه .. يالغاليه انتي توج ثانيه سنه وماتأقلمتي مع اجواء الكليه ولا خذيتي كلاسات عند الدكاتره اللي يهبلون ومحاضراتهم صج تطلعين منها باستفاده .. وتحسين فعلا انج طالبه جامعيه ولا تعرفتي على بنات طموحات ويهمهم مستقبلهم انتي قاعده تطالعين من بعييد وتحسسين نفسج بالخيبه والحزن*
وعلى سالفه ان ( بعض الاقليه القليله جدا ) انهم داشين يلعبون ومو جديات .. يالغاليه ترا لو دشيتي اي كليه ثانيه راح تلاقين هالنوعيه .. وهالشي على نفسها اهيا اللي راح تتضرر احنا ليش نسولف فيها ونعيش نفسنا بحزن وكآبه عشانها .. المسأله مسأله همم وشخصيات واحس ان من الصحي ان ننشغل بذاتنا افضل من ان نراقب الاخرين او شلون يتصرفون ..*

نروح لموضوع المسجد .. ياقلبي انتي متأكده انج تقصدين مصلانا ماغيره ؟ اللي يم الجبرات .. انا دايما ادشه على حزه الصلاه ومااشوف اكل ولا وصاخه بالعكس اقعد واشوف الكل نفسي ناطرين الصلاه ومن يأذن كلمن يقوم يصلي مااقصد اجذبج بس فعلا انا الحين بتم رابع سنه وماعمري شفت اكل وهالسوالف بالمسجد بالعكس بناتنا فيهم خير يصلون بدون وصاخه ..

اما الكافتيريا انا مالومج عالوضع اللي فيها .. بس عن الظليمه ياقلبي لاتنسين ان الكافتيريا مو حق كليه وحده الكافتيريا حق كليتين ومساحتها ماتكفي لان البنات ماشالله ششششششكثرهم بكليتنا فما بالج لو كانت كافتيريتهم مع بنات الشريعه وانا لما اشوف تصرفات ماتعجبني مااحب اعمم على اغلب بنات كليتي*
لاني قعدت وشفت شكثررر بنات موسطحيات وطموحات ويهمهم العلم فوق ماتتصورين وشخصياتهم حلوه وصدقيني ياقلبي انا اعرف بنات شكثر بكليتنا واللي تتكلمين عنهم اقليه


الشاحن وما ادراك ما الشاحن .. ياحياتي انتي فعلااا شرهتج بهالموضوع مو بمحلها كلش
*انا وحده اداوم والشاحن لازم بجنطتي لان فوني بسرعه يخلص شاحنه ودايما استخدم البلاكات الفاضيه اشحن فوني فيها ماستخدم بلاك قاعدين يستخدمونه الدكاتره ومع العلم ان دكاتره التربيه ودكاترتي الانجليزي بعد يشوفوني بس مايقولون شي لان مااتوقع ان بلاك موصل فيه شاحن وفون مغلق راح يعيق العمليه التعليميه او انه نوع من انواع قله الذوق وعدم احترام الاخرين ! *

ياقلبي اتمنى تكون عندج سعه صدر انج تتقبلين رايي انتي لانج مو متقبله وضعج بالكليه او مالقيتي صداقات تناسبج صرتي تشوفين كل شي سلبي عندنا ومايعجبج .. كليتنا مو كامله اي نعم عندنا مشاكل لكن ماتوصل مرحله ان ينقال عنها ( بدون تربيه ) ياعمري التعميم لغه الحمقى وانتي ان شالله انج مو منهم بس العنوان انا اشوفه ظاااالم وماارضاه على مكان قضيت فيه احلى اربع سنوات من عمري .. مكان طور من شخصيتي كثييييير .. مكان تعرفت فيه على شخصيات كثيره مو اقليه مثل ماتفضلتي في قمه الذوق والهمه العاليه .. وعلى دكاتره ساعدوني وساهمو بتطوير شخصيتي ..*

شوفي ياعمري في مقوله تقول : ( نحن نرى الاشياء كما نحن ، لا كما هي ) لذلك الموضوع كله بايدج وبنظرتج انتي لو ماكبرتي الموضوع على بعض السلبيات اللي موجوده بكل الكليات مو بالتربيه بس والتفتي للإيجابيات صدقيني بتحبين الكليه والمكان*

انا الحين كل مااتذكر اني بتخرج تدمع عيوني ومايهون علي المكان *

وما اخفي عليج ان موضوعج زعلني وخلاني اشعر بالظلم .. انا اؤمن بحريه الرأي لكني ما اؤمن بانه من المنصف انج تصفين الكليه بهالصفه القويه لمجرد انج شفتي اشياء موجوده بكل مكان وبكل الكليات .*

نصيحه لاتضيعين احلى *سنين عمرج *دراستج بانج تكونين متشائمه لهالدرجه القويه !*

وبالنهايه اشكرج واتمنى انج تتقبلين كلامي بدون حساسيه :eh_s(7):

اوافقها الرأي :eh_s(17)::rerrerek:​

 

[om-3azo-83z]

انا معااااج و كل حرف قلتيه صح
و nostalgia حبيبتي انا اخالفج الراي انا بعد طالبه و كارهه الوضع صرت اكره الدوام من الكلام اللي قالته انتي متاكده انج بكليه التربيه؟

 

[لحظآتَ]

أولاً قبل كل شيء هالكلام هذا كله انقال على لسان دكتور فاضل من دكاترة الشريعه الساخطين
وقهرني ماقدرت ارد عليه فـ شيء حلو أرد هني , وأفنّد كل سطر كتبتيه اختي ور ور !​

,​

بخصوص المنـآظر اللي تتكلمين عنهـآآ ..
العفو بس مو جنج حسستيني انج كنتي تدرسين بهارفورد وفجأة انحدتيني على جامعتنا اللي بلا تربية :eh_s(2): !!!
اعذريني بس فعلاً ما اشوفه شيء يستحق الطعن !
بلا تربية مره وحده , لك اللهُ أكبرررررررر ما أرزل هالكلمي !!​

اتمنى تتقبلين كل كلامي برحابة صدر , لإني بتكلم بدون مثاليات !
هذا هُو الشعب الكويتي
متعودين نعيش ببساطه ونمارس تفاصيل حياتنا بعفوية !!
طبعا بالشيء المعقول !
لا افراط ولا تفريط بمسألة العفوية !!!!!​

يا اختي , شنو بيضرج لا قعدوآ بنات بالاستراحه ومعاهم قدوعهم وتقهووآ .؟
عليهم بألف عافيه , الجامعه من المفترض تكون بيتهم الثاني عدل ولا لا ؟!​

ما عمري شفت بنات باسطين عند الممرات بوقت المحاضرات ويتقهوون؟
وينهم هذول؟
هذي رابع سنه لي , دليني عليهم خل اشوفهم :eh_s(10): حسيت لوهلة اني مُستجده !!!​

,​

الشغله الثانيه ,
بخصوص الحمامات تكرمين ويكرم القارئ الكريم !
صح بهذي ما راح اتجاهل نداء ضميري
فعلاً اتفق وياج إنه مزبلة :eh_s(2): ومتروس ماي وكلينكسات , وشخابيط الله يسامحهم البنات !
بس هم ما نقول بلا تربية !!!
نقول طيش , وقلّة عقل وافتقار للاتيكيت !!
هذي كل المسألة !!​

,​

نروح لسالفة الكافتريا ,
ياقلبي , ياعزيزتي , انتي مستوعبه كم عدد طالبات الشريعه + التربية ؟!
كمممممم هائل
ضيفي عليها ان فيه بنات مايطلعون من الكافتريا مرابطين فيها لظروفهم الخاصه مايبون يطلعون برا على راحتهم !
فـ الضوضاء هذي شيء جداً طبيعي ,
انا عن نفسي ما احب هالأجواء
شـ أسوي ؟
مااكل فيها , يفتح الله من اكل الكافتريا
آكل ببيتنا وأفك عمري
وبما انج تسوقين , ماشاء الله يعني سهله , دقّي سيارتج سلف والله يسلم الكوفي بين
واذا بتقعدين تدرسين عندج مكتبة الآداب أنصحج فيهـآآ بالذات فوق حييييييييييييل هاديه ومُغريه ومُحرضة للـ القراءة والدراسه !​

وبجذي انحلّت مشكلة الكافتريا ,​

:​

أما المسافط​

هم هذي اضيفها لسالفة الحمامات
اتفق وياج والله
انا اروح مع اخوي ,
وربج مع انه طالب ويانا !
بس هم يسفط عند الفرع
لإنه فعلاً مايحصل مسفط
ويجينا لحد بوابتنا شنسوي بعد !!!!​

يعني نداء للبنات اللي معاهم سواويق , أتمنى يلبون هالنداء
واذا مالبوه هم الله يسامحهم العتب ع تخطيط الديره الفاشل بالشوارع والطرق
وهم مفترض مانقول [ بلا تربية ] ​

اذا شتمتي جاهل بألفاظ نابية , ماراح تفرقين عنه يا اختي بشيء لإنج نزلتي لمستواه
فأنا لأني احبج في الله ,
أبيلج الزين , ارتفعي عنهم ودع ِ الخلق للخالق , هم بالآخير مُحاسبين على تصرفاتهم ونواياهم​

اللي تحضر لرفيقتها ,
واللي توصخ ممتلكات الدولة ,
واللي تصارخ وتطبّل
واللي تحط مكياج وتلبس كعب
واللي تطنش محاضرتها
واللي تحشش
كللللللللللللهم كلهم بدون استثناء
مُحاسبين على سلوكياتهم​

لهم رب يحاسبهم
وأنتِ لج ضمير يوجّه سلوكياتج ,
حكمي ضميري ولا تنشغلين بالعالم عشان ما تنشغلين عن نفسج ,
طوريها واهتمي فيها والناس تتفلق ​

وسلامة عمرج:eh_s(7):​

على فكرة
دكتور جميل يبالغ
انا داشه مصلى الشريعه الخميس
كان جيد جداً
مافيه ريحة بنغاليه ولا هنود على قولته
لذلك لا تخاذين على كلامه ​

 

[اسيل الصمت]

صراحه لا تعليق
الله المستعـــان

 

[~عيون الحب~]

ماشاءالله عليج الله يحفظج ويكثر من امثالج

انا مستغربه شلون مخرجات كلية التربية تكون بهالصوره ؟؟ راحت ديرتنااا !!!

انا مو بكلية التربية .. بالآداب

اشوف نماين جذي بس الحمدلله مو وايد

اكره ما اكره لما ادش الحمام وانتو بكرامه واشوف بنات مجابلين المنظره كل وحده يايبه عده مكياجها وهلاقتها :\

ماقول انا ماحط مكياج .. بلا احط

بس جدام اهلي ما اسوي شي من وراهم , لكن هذا مو الهدف !

للاسف في بنات يداومون جنهم رايحين مجمع يقزون ويردون بيوتهم ! من مكياج ولبس وقله ادب !!

ولا اللي بالمسافط اهي ورفيجتها مبطلين الدرايش ومطولين عالاغاني وطايحين له رقص !!! انا استحيت اطالعهم !!!

وزين تسوين انج نبهتي للدكتور انكم تطلعون قبل الوقت .. هالشي من حقج ومصلحتج لازم تاخذين وقتج بالمحاضره وتفهمين

بس لاتظلمين كل كيفان .. كليتي تهبل لووول :$

انا شكثر كنت اسمع عن الآداب وان سمعتها مو حلوه وتلوع الجبد و و و و و

بس بالعكس ماشوف ان الكليه جذي! الحمدلله مرتاحه وحاااابه الكليه لاني ما اعطي هالقله القليله اهميه وولا افكر اطالعهم

بالنهايه حاولي قد ماتقدرين تحضرين محاضراتج وتطلعين لا تلتفتين لهم ، والله يعينج ويصبرج على هالاشكال

موفقه

 

[miss $_$ semsem]

تصدقين عاد مع احترامي لبنات كيفان

انا صج بشويخ واتعب من حوسة طريجها وحوستها بس عندي محاضرة بكيفان والله من ادش كيفان اقول يا زين شويخ واصلا ايي بوقت المحاضرة بالضبط واطلع على طول لأن الكافتيريا ضيم ضيم والحمامات تكرمين هم بعد والكلية بكبرها وحتى مره خذيت معاي رفيجتي قالتلي آخر مرة ايي معاج هني

و ما ألوم لي ييتوا وخذيتوا بشويخ صج يبتوا لنا الزحمة بس انا مادة وحدة ولاعت جبدي

والله يهديهم ان شاء الله

 

[miss $_$ semsem]

وبالنسبة للمصافط انا عشان هالشي اروح باص من شويخ لكيفان والله انا اللي مو صافطة بالمواقف وايدي على قلبي ترا حتى سواويق الباصات فيهم طفاقة :s

 

[College of Educ]

مع إحترامي لج عزيزتي

هذا افتراء ومبالغات على طالبات كلية التربية و "تخصيص"

و كأن إللي بالكليات الكليات الثانية أنبياء مرسلين !!

//

بالنهاية بنات هذي فئة لا تمثل كل الطالبات
لكن للاسف الشر يعم والخير يخص
ولا في وايد بنات اخلاق و ثقل و عقل و طالبات علم و معاملة راقية

لكنها قليلة !!!!!!!!!!

عذراً عزيزتي تقولين فئة قليلة على أي أساس !!

إذا إحنا لمن نقعد بالقاعة مثلاً تكون فقط مجموعة لا تتعدى 5 طالبات هم اللي يسببون شوشرة و معروف عدد الطالبات لا يقل عن 50 طالبة في المحاضرة الواحدة "بآلغالب"

فـ على أي اساس صارت الفئة المحترمة قليلة ؟

،

أما بـ خصوص إللي يقولون الآدآب أحسن !!

سلآمآت من متى !!

مصلى الآدآب خصوصاً مصلى لا تصلح الصلاة فيه لعدم طهارته

و أتحدى وحدة تقدر تقول غير هالكلام !!

وهذآ فقط على سبيل المثال

و لتوضيح أن مقارنة الآدآب بالتربية لآ تصح من نآحية الأفضلية بآلطآلبآت و النظافة !!

،

في من كل شي سيء أكيد ، بس تعميمج و تصويرج أن هذا هو الغالب بالتربية مرفوض ولا يمكن ان نقبل فيه بأي شكل من الأشكال

بديت أحسن أن هالكلام لـ نظرة عنصرية أو فكرة مسبقة

،

أرجو الإعتذار من طالبات كلية التربية ، فما قلتيه جداً قاسي و غير دقيق

و محشومة زميلتنا عن كل هالإفتراء إللي نتمنى التراجع عنه

،

طبعاً لا أنسى الإشارة إلى أن جزء كبير من المسؤولية تتحمله القائمة التربوية ( الفاضية بس للشيلات )

و أيضاً عمادة كلية التربية مسؤولة بشكل كبير

،

و شكراً على رايكم بكليتنا

لكن مو ذنبنا صغر كليتنا ومبانيها المتهالكة وعدم توفير خدمات للطلبة والطالبات أسوة ببقية الكليات

/

شكراً للجميع و عذراً على أي إساءة
​

 

[قاهره عذالي]

مع إحترامي لج عزيزتي ​

هذا افتراء ومبالغات على طالبات كلية التربية و "تخصيص"​

و كأن إللي بالكليات الكليات الثانية أنبياء مرسلين !!​

//​

عذراً عزيزتي تقولين فئة قليلة على أي أساس !!​

إذا إحنا لمن نقعد بالقاعة مثلاً تكون فقط مجموعة لا تتعدى 5 طالبات هم اللي يسببون شوشرة و معروف عدد الطالبات لا يقل عن 50 طالبة في المحاضرة الواحدة "بآلغالب"​

فـ على أي اساس صارت الفئة المحترمة قليلة ؟​

،​

أما بـ خصوص إللي يقولون الآدآب أحسن !!​

سلآمآت من متى !!​

مصلى الآدآب خصوصاً مصلى لا تصلح الصلاة فيه لعدم طهارته​

و أتحدى وحدة تقدر تقول غير هالكلام !!​

وهذآ فقط على سبيل المثال​

و لتوضيح أن مقارنة الآدآب بالتربية لآ تصح من نآحية الأفضلية بآلطآلبآت و النظافة !!​

،​

في من كل شي سيء أكيد ، بس تعميمج و تصويرج أن هذا هو الغالب بالتربية مرفوض ولا يمكن ان نقبل فيه بأي شكل من الأشكال​

بديت أحسن أن هالكلام لـ نظرة عنصرية أو فكرة مسبقة​

،​

أرجو الإعتذار من طالبات كلية التربية ، فما قلتيه جداً قاسي و غير دقيق​

و محشومة زميلتنا عن كل هالإفتراء إللي نتمنى التراجع عنه ​

،​

طبعاً لا أنسى الإشارة إلى أن جزء كبير من المسؤولية تتحمله القائمة التربوية ( الفاضية بس للشيلات )​

و أيضاً عمادة كلية التربية مسؤولة بشكل كبير​

،​

و شكراً على رايكم بكليتنا​

لكن مو ذنبنا صغر كليتنا ومبانيها المتهالكة وعدم توفير خدمات للطلبة والطالبات أسوة ببقية الكليات​

/​

شكراً للجميع و عذراً على أي إساءة ​

كلامج حيل حيل منطقي
فعلا شذنبنا
صاحبة الموضوع:
وعلىى طاري الغش وتحضير بعض
ترا موجوده بكل الكليات
+
انه سالفة المكياج واللبس صح موجود
بس هم موجود بكل الكليات
بنات الشويخ والخالديه فيهم اللي مفرعه اللي ماتلبس لا حجاب ولا عبايه ولبس قصير
وهم بالاداب في بس قليل

وسالفة ان بالكافتيريا يحطون اغاني ويترقصون
معاج حق بهذي
بس ترا هذي تصرفات فرديه
لاتعمينها على كل الكليه

 

[بنوتة كول]

أنا معاج في بعض الأشياء اللي قلتيها
و أنا مستجدة هذا ثاني كورس لي بالجامعة بس فعلا فعلا أحلى أيام عمري فيها
و انتي شفتي السلبيات و ما قلتي و لا إيجابية وحدة
مو معقولة التربية بلا تربية و انتي شكلج إنسانة راقية بتفكيرج بس هالوصف أو بالأخض هالكلمة عيب تنقال
عيييييييييييييب و ما في شئ كامل
و بعدين إذا انتي صارلت سنتين بالجامعة و ما عندي رفيجأت فأنا أقول لأنج بس شفتي السلبيات
يعني مو مقولة كلية تضم أكثر 1000 طالبة مو زينين و كلهم فيهم عذاريب علشان جذي ما قدرتي ترافجينهم
حبيبتي لا تفكرين بهالتفكير السلبي بهالطريقة
أنا معاج إن في بعض الأمور مش ؤلابد بس مو معناته أحرم عمري من الوناسة في أحلى سنيني علشان بعض البنات اللي تقولين عنهم أقلية
و بالتوفيق للكل

 

[لحظآتَ]

أساساَ معروف كلية التربية ثلاث أرباع طالباتها من أي فئة !
وهي اساساً و العلم عند الله تقصد بكلامها [ بلا تربية ] هالفئة اللي تدرس و تمثل جزء كبير من كلية التربية !
بدليل قارنتها بالشويخ وبمدري شنو !​

وأنا بعد أطالبهـآآ باعتذار للي ذمتهم بموضوعهاا لإنها حيييييييييل حيل تطرّفت وبالغت بالوصف !!!​

وفجرت بالخصومة بعد
اذا انتِ مو حابة المكان ومو متأقلمة ماله أي داعي تتهكمين بهالشكل المُتعصب اللي مافيه ذرة إنصاف أو موضوعيه !!!​

كأن بنات الشويخ مثلاً مُنزهات ,​

وبعدين على سالفة المكياج ترى دخنا والله !
يبا شخباري اللي تحط مكياج من ورا اهلها
ولنفرض ان فيه فئه تسويها , كيفهم ..
شمعنى الحين لما ننتقد السفور و لا نجيب سيرة بعض الشغلات اللي مو عاجبتنا تقولون لنا [ حُرية شخصية , ] وذليتونا على هالسالفه ,
لكن لما توصل انتقاداتكم للفئة الثانيه !!
سبحان الله تتحول السالفه لـ هلاقة , و قلة تربية , ووقاحه وذمم وسيعه وصياعه ومدري شنو !!​

اقول , ترى الشرع مايعرف هذي منقبه وهذي بس محجبه !
المنقبه لا حطت مكياج صارت صاييعه
والمحجبه لا عادي تصير كيوت وسمبل لإن لايق عليها !!​

لا قلبي اذا بتشوفينها من ناحية الشرع , اثنينهم بنظر الدين [ متبرجاااااااااااااااااااااااااااااااات كـ تبرج الجاهلية الأولى ]​

سواء ام نقاب ولا المحجبه ولا السفور حتى !!​

[ ولا تقولين انا ما قصدت المُنقبة , ترى حتى عديم المفهومية بيلقطها وهي طايره من بين السطور ]​

فـ لا تبالغين بالتصوير , لمجرد انج كارهه الناس اللي موجودين بالكُلية !!!​

أو مو متأقلمة وياهم !!!!​

سواء انتِ أو غيرج بالموضوع هذا ​

رديت مره ثانيه لإني حاسة إني كوني إحدى طالبات كلية التربية , انظلمنا بموضوعج هذا !​

,​