صديقاتي وبنات عماتي وخالاتي حوامل...نفسيتي صفر :(

[كويتيه مذهله 87]

حبيبتي
ماعليج انج ترييحين هالشهر من كل شي
وانشالله الشهر الي وراه حامل
ومالج شغل بالي يضايقج
ومسكي ريليج وفهميه انج تبين يهال

 

[[]نهاوند[]]

الله يرزقج اختي ولاتتعبين نفسج بالتفكير ترى النفسيه تلعب دور

والله انا الحين من كثر ما افكر الدوره ماقامت تجيني

انا مو متزوجه بس من كثر ما افكر من هم الدراسه والقعده بالبيت والمشاكل اللي انا فيها

والله محد مرتاح بهالدنيا لكن الحمدلله والشكر على كل حال ​

 

[bnt_kwt]

الله كريم وما يقصر انتي سنتين ومحترقه
انا شقول اللي صار لي 7 سنين
وغيرنا على 8 و9 و 10 واكثر شيقولون

انا ما اقولج الا الصبر مفتاح الفرج
انا بعد مافيني شي والتبويض بعد كان ضعيف وصار زين عندي وريلي ولله الحمد مافيه الا العافيه ومع ذلك الله ما كتب لنا الذريه

تخيلي 7 سنين واللي تزوجوا معاي وعقبي كلهم عندهم عيال

ما غير هذي حكمه من الله وكل شي بإرادته راح يصير

كلنا نحب اليهال وكلنا قلوبنا تحترق بس مالنا الا الصبر وانتظار رحمه رب العالمين علينا

الله يرزقني ويرزقج ويرزق البنوته وجاره القمر والخنساء والنويره وزيتونه وجروح تبتسم والريشه والفنانه79 وبنت الطنايا وكويتيه مذهله وكل وحده محرومه نسيت اذكرها

 

[julanar]

وييييييييه
حبيبتي هذي كتبة الله
انتي عيشي أيامج
تدرين الحمال والولاده شيسوون بالوحده ؟
عبالج وناسه ؟
أول شي جسمج يروووووح فييييييييها
ثاني الشي العلاقه الجنسيه تتأثر على خفيف .. لأن المهبل يكون منمقط
غير المسؤوليه
انتي اللحين ويا ريلج شحلاتكم طيوور .. استانسي طلعات روحات
الياهل ما وراه الا الويق واااق
الا حفاظة الا حليب الا مريض ودوه الطبيب
الا يبجي ماتدرين شفيه
غير التطعيمات
والطلعات والليالي الرومانسيه مو سهل التخطيط لها او عملها
الا جان تخلين الياهل عند أمج أو خدامه والخدم واي واي من بلاويهم
يعني حمدي ربج وقولي ربي لك الحمد
لا تحطين الشغله هذي ابالج وايد
مرات الواحد من كثر ما يفكر ويوسوس الشغله اللي يبيها تتأخر
استانسي واستمتعي بحياتج .. وبصلاتج ادعي ربج يرزقج الذريه الصالحه ووكلي أمرج لله
ان شاء الله ربي يكتب لج الذريه الصالحه انتي وريلج

 

[bnt q8 in usa]

عسي الله يرزقج الذريه الصالحه يارب وهو خير الرازقين انشالله
انسي الحمل والتفكيرلانه يلعب دور رئيسي تري الغده النخاميه تأثر علي هالشي........................بس الي عرفته منج انه عندج انسداد بالانابيب تري الاشعه الزيتيه احيانا يتبطلون ووكلي امرج لله سبحانه وتعالي ونعم بالله

 

[جكورة]

عسـى الله يرزقج الذريه الصالحـه..حبيبتي البنات ماقصروا كفوا ووفوا والله العظيـم لو على كلام الناس ماراح ترتاحين إذا جبتي ولد قالوا ليش ماعندها بنت وإذا جبتي بنت قالوا ليش ماجبتي ولد وإذا إخذتي مانع قالوا ماتحمل من الله وإذا جبتي عيال ورا بعض قالوا وول ماتشبع عيال بإختصار ( إرضاء الناس غايه لاتدرك ) يعني خلي إيمانج بالله قوي وإصبري وإحتسبي الأجر من الله وإنسي الكلام وترا النفسيه تلعب دور كبير.والحمدلله إنتي حملتي وتعورتي يعني إن شاء الله هذا يكون فأل خير وسنتين ترا مو واجـد..والله العظيــم بنت عمي صبرت 6 سنوات بدون عيال ومافيها إلا العافيه هي وزوجها بعدها حملت من الله وجابت بنت بعدين تؤام ( بنت وولد) وبعدين بنت بعدين تعورت وهذا أمل لج ولباقي الخوات.. وإن شاء الله نسمع أخبار حلوة عن قريب..

 

[^^دموع الكويت^^]

والله عورتي قلبي اختي هندااا


خلي ايمانج بالله قوي ... راح اقولج وصفة سحرية


عليج بقيام الليل والله ثم والله انها مثل السحر سبحان الله


صلي ركعتين وادعي وادعي من كل قلبج انه الله يرزقج بالذرية الصالحة وخاصة وانتي ساجدة كثري من الدعااااااااااااااء

وان شاءالله بتدعينلي :eh_s(6):


ولا تنسين الصدقه بأي مبلغ تقدرين عليه


ويا رب يا رب ترزق اختي هندا بالذرية الصالحة اللي تفرح قلبها

 

[زوغه طلال]

يابعد قلبي حيااااااااااااتي
والله عورتي قلبي
بس لاتشيلين هم وتعورين راسج انسي الموضوع وشوفي الصدف وين بتحطج يمكن تغمضين وتفتحين عينج ولا انتي حااامل &&&باذن الله تعالى &&

وربي لا اهمووونج ولاتبينين لهم انج تحبين عيالهم بس خليه سلام واشلوونهم

وريلج علميه ان لااااااااااااازم اساعدج لان ايد وحده ماتصفق

اللهم ارزقهااا الذرية الصالحه عاجلا غير آجلا​

 

[أم الطيب]

ياااااااااااا بعد عمري عمرج
حياتي انتي مادري شقولج الحال من بعضه
تصبري ياقلبي وان شاء الله عاجل غير اجل كلنا ما نقدر نمشي من بطوننا يلي جدامنا

والبنات وفو وكفو حياااااااتي

 

[مستقبلي احلى]

ادعي وادعي وادعي وادعيلي معاج

امن يجيب المضطر اذا دعاه ويكشف السوء

وربي لا تذرني فردا وانت ارحم الراحمين

 

[سبائك]

والله صااااااااجه جكوره

الي عندها بنات يقولون لها يبيلج ولد

والي عندها اولاد يقولون لها يبيلج بنوته

يعني محد مرتاح صدقيني

وكل شي بايد ربي سبحانه

واكيد كل شي يصير لبني آدم فيه خير له وحكمه من رب العالمين

انتي ما سمعتي حديث الرسول صلى الله عليه وسلم (بما معناه) عجبا لأمر المؤمن فأن كل ما يصيبه فيه خير....فاذا أصابته سراء شكر فكان خيرا له......وأذا أصابته ضراء صبر فكان خيرا له

 

[keeka]

الله يرزقج ان شاء الله بالذريه الصالحه ان شاء الله وكل محرومه ماكو شي على ربج بعيد وان شاء الله عن جريب تفرحينا

 

[xxx]

والله حاسه فيج >> اسال مجرب :eh_s(22):

انا تميت خمس سنوات يالله حملت

عليج بالاستغفاااااااار والدعاء وقت السجود

ولاتقكرين بالحمال نفسيتج راح تتعب وهالشي يأثر وايد

انا عالجت وتعبت وحتى عملية سويت هم ماكو فايده

قالتلي دكتورتي علاجج الضعف وفعلا نسيت موضوع العلاج

7شهور ورديت لها قالتلي الحين صيف وانا بسافر نزلي بعد جم كيلو على ما ارد

حمدالله ماشفت الدورة عقبها والله ماكنت حاطة ابالي اني بحمل بدون علاج

بس الله كتب وماخيب ظني حمدالله


لاتيأسين من رحمة ربح ماكو شي بعيد

كل تأخيره وفيها خيره

واذا بتمشين ورى كلام الناس بتتعبين

انا قبل لا أحمل يقولون ماحملتي

وعقب مايبت عيالي يقولولي ماصارت كل سنة حامل :eh_s(13):

يابنت الحلال هونيها وتهون وهالشي ابتلاء من رب العالمين

عسى الله يرزقج ويرزق كل محرووووووووووم

 

[طير الحب]

الله يرزقج ويرزق كل محروم ان شاء لله

 

[زهرة اللوتس]

عليك بالدعاء ثم الدعاء ثم الدعاء لا تيأسين من رحمة رب العالمين
وعيشي حياتجووالله يوفقج

 

[دندرمه]

يابعد عمري والله نفس شعورج خصوصا لماتشوفين اللي عقبج تزوجو وحملو وجابو واحنا للحين
الله كريم يارب
بس هذي اللي تقرى على ولدها قليلة ادب وماتستحي اسمحيلي قهرتني ياويلها من ربها ليش جذيه؟؟ ليش تحرجج موحرام عليها الله يهديها بس
اختي لاتشيلين ولدها ولايهمج مالت عليها وعلى ولدها

الله يرزقج ويرزقني زيرزق كل محروم يارب عاجلا غير اجلا يارب العالمين

والله انا مومزعلني الا سالفة التفكير ماني قادره ماافكر كلش مااقدر ولاااقدر اشغل نفسي

يالله يارب انك ترزقنا بالذريه يارب العالمين انا وكل البنات اللي ماعندهم ذريه يارب

 

[QT]

يا قلبي
تضرعي لله وحده
اكثري الاستغفار
لاتتركين سورة البقرة
اقري الرقية الشرعية


صلي صلاة التهجد واطلبي من رب العالمين
اعرف اشكثر نفس حالتج

في ناس متعلق قلبهم بالدكاترة
وناس متعلقين بالله عز وجل


ياقلبي..اكثري من الاستغفار

وتذكري من ترك شيئـا لله عوضه الله بخير منه


إذا كنت تسمعين أغاني .. اتركيها لوجه الله

اذا كنت تنمصين فاتركي النمص

شوفي بحياتج معصية واتركيها

وتذكري رب العالمين رحيم بعبادة

ويحب من العبد ان يدعوه

صلي الوتر
وادع الله رب العالمين

وابذلي الاسباب

تذكري ان العلاج سبب

ويكون قلبج متعلق بالله الواحد الاحد

يا قلبي.. يمكن انا ما احس فيج
لأني مو متزوجه

لكن اللي قلته هو تجارب بنات

وحده من البنات .. تركت النمص لله عز وجل
وحملت..

ووصي اللي عندج على وجه ولادة تدعي لج اذا هي بتولد

الله يرزقج الذرية الصالحه يا رب

 

[QT]

بنات

تكفون تعلقوا بالله العزيز

الواحد الاحد

 

[هندااا]

مشكووووووووووووورة اختي qt......


من وين طلعتي هالموضوع امغبر

بس ليلحين النفسية صفر من كل شي من هالسالفة وسوالف ثانية....الله كريم

 

[فوفه]

آآآآه يا هندا .. والله نفس الشعور .. وانا قاعده اقرى انتي شكاتبه احس جني آنا اللي كاتبه هالكلام
الله كريم والله يرزق يارب كل محرومه

(( ربي لا تذرني فرداً وأنت خير الوارثين ))