صديقاتي وبنات عماتي وخالاتي حوامل...نفسيتي صفر :(

[هندااا]

بنات ضايق خلقي حيل.....

ودي ودي ودي بياهل يونسني واشيلة بيدي وبوسة...ودي ياهل من لحمي ودمي ....

ميته على ياهل يابنات......

انا من قبل مااتزوج ومن انا صغيرة غرامي اليهال ...اموت عاليهال الصغار...وكان ودي احمل من اول شهر من زواجي بس الحمدالله ...الله ماكتبلي اني احمل الا مرة وحده بعد 8اشهر من زواجي وطرحت من او شهر ....والحين صارلي سنتين متزوجة ولاحملت.....

انا اعالج عند د هدى الزكري ..اهي وايد زينة وانا سويت عندها منظار من شهر ونص وطلع فيني سداد ويتلي الدورة عقب العملية مرتين...

بنات خايفة خايفة ماحمل وانحرم من اليهال...ادري بتقولولي هذه كتبت الله بس انا وايد احب اليهال وودي مانحرم منهم...نفسيتي حيل تعبانة ....وكل الي حوالي حوامل ماشاء الله تبارك الرحمن...الكل الكل ماتتخيلون اشلون ..كل رفيجاتي من غير اسثناء وكل بنات خالاتي وبنات عماتي المتزوجات ...وكل الي متزوجين قبلي بشوي عندها واحد وحامل بالثاني والي اتزوجوا عقبي هم حوامل.......الله يثبت حملهم انشالله ويعافيهم...

والمشكلة الكل يدري اني احب اليهال ...وتلقينهم اذا احملوا مايعلموني الا بعد 3 أو 4 اشهر . يخافون اصكهم عين ...يعني يالله اذا بين بطنهم وذيك الساعة لازم يقولون انهم حوامل..مع اني افرحلهم ورب الكعبة مااحسدهم ولاشي...
عاد ولا هذيج الي ماترضى اشيل ولدها واذا شلته تقعد تقرا عليه والمشكلة صوتها واضح.... يعني قمت الاحراج

بنات شسوي ؟؟؟ والدعلة ريلي مايرضى اسوي تلقيح صناعي ...وطفل الانابيب شايلة من باله مووليه.....:eh_s(16): :eh_s(16):

والمشكله ان كل شي اوكي ماشالله.........بس هم خايفة بنات

ابي ياهل ابي ابي ابي:eh_s(4):


واسووووووووووووووني :eh_s(11):

 

[brownness]

بعد عمري والله انشالله الله يرزقج بالعيال يارب وهالمرة اللي تقرة على ولدها وماترضة تشيلينها ماعندها سالفة عيب الصراحة ماعليج منها ولا تشيلين ولدها باجر لا صار شي حتى لو مالج شغل قالو منج

والناس عقليتهم مادري شلون انا وحدة تصيرلي وتدري اني ماكنت ابي احمل من اول زواجي حملت وماقالتلي ولما دريت قطت علي كلمة ماذكرها بالضبط بس قصدها لا تحترين وتعطيني عين الحمدالله والشكر

 

[الفنانه79]

حبيبتي والله عورتي قلبي ودكرتيني بنفسي اول

لاتستعيلين ولاتيأسين من رحمة ربج اقري سورة مريم على طول من بعد الدوره لحد موعد الدوره الثانيه وسوره ال عمران

ودعاء((ربي لاتدرني فردا وانت خير الوارثين))

ولاتفكرين واااااااايد ولا اتحاتين لان التفكير يأخرالحمل وتأكدي ان اللي رزقهم راح يرزقج صلي قيام الليل وادعي واستغفري على طول وافتري اشوي في المنتدي راح تلقين وايد من الخوات عالجوا واحملوا وهالشي اح يعطيج امل في ربج وعسى الله يرزقج عاجلا غير اجلا يارب العالمين

 

[¤§ زيتونة §¤]

حبيبتي



الله يرزقج ويفرح قلبج

وصدقيني كل تاخيرة فيها خيرة ما تدرين ليش للحين الله ما رزقج يمكن فيها دفعت بلا عنج

وانتي بعدج صغيرة وسنتين ترى مووايد

شوفينا اللي 9 مثلي واللي اربع وخمس وثمان والحمدلله انا صبرت ويتني بنوتة تينن اسم الله عليها وربج كريم ما ينسى عبده

انتي خليج ويانا بهالتجمع وتفائلي ولا يضيق خلقج وما عليج بالناس اللي قلتي عنهم وخلج طبيعية ولا تخلين الناس يحسون فيج حزينة .... لانهم ما راح ينفعونج خلي اتكالج على ربج الكريم وكثري الاستغفار والدعاء وصلاة الليل


صدقيني راح ترتاح نفسيتج ويصير الامر عادي وبيرزقج الله عن قريب انتي وكل خواتي هني اللهم امين

ولا ياثر فيج حمال فلانة وغيرها قولي الله يتمم عليها ويرزقني مثلها ووكلي امرج لله




ولا تتعبين ولا تتكاسلين من المراجعات والعلاج الله كريم ما تدرين الصالح وين فيه؟؟!!





موفقة حبيبتي

 

[أم بدير]

تعبانه نفسيتج وانتي ماصارلج الا سنتين؟
امي ماحملت الا عقب ثلاث سنين زواج
بدون لا علاج ولا أدويه

ويابتنا بعدين ورى بعض فرق بين كل واحد والثاني سنه
باجر الله يرزقج انشالله باليهال ويأذونج وتقلوين ياحلاة الراحه

الله يرزقج ويرزق كل محروم انشالله
بس لاتتعبين نفسج ترى تو الناس على هالهموم
واذا عالاوادم المتخلفه اللي يخافون على نفسهم
لاتفكرين بالموضوع وعطيه طاااااااااااف​

 

[رماديه]

حبيبتي هندااا شعورج هذا نفس شعوري ونفس شعور أي وحده تأخرت بالحمل وثقي بالله انج مو لوحدج واحنا وااايد وكلنا معاج وانحس فيج وباللي انتي اتحسين فيه. واذا انتي صارلج سنتين الحين في واايد اصبروا اكثر منج وآنا منهم الحين بيصيرلي خمس اسنين.وعمري اكبر من عمرج.
وسالفة ان كل اللي تزوجوا بعدج احملوا كلنا انمر ابهالشي وصج انحس بالاحراج ابهالمواقف بس محد يعلم بالحال الا الله وماتدرين يمكن هالشي فيه خيره لج محد يعلمها الا الله سبحانه وتعالى وهاذي اللي تقرى على ولدها جدامج ( ماتستحي ) بصراحه وانتي بعد ما عندج سالفه اتشيلين اعيالهم وصاجه الاخت اللي قالت ان باجر حتى لو صار فيهم اي شي بيقولون منج انتي ، آنا ابصراحه ما اجرب صوب اعيال اي احد وبعدين ما يشدوني اعيالهم مادري ليش يمكن لأنهم مو اعيالي، انشاء الله باجر الله بيرزقج مثل ما رزق كل هالعالم ولا توسوسين وايد واتقولين خايفه ما احمل وانحرم من اليهال لا حبيبتي اللي خلقج موجود واتكلي عليه وادعي انه يستجيب لدعائج ،

بس سالفة زوجج اهي اللي اتضايق ابصراحه اذا صارلج مده طويله لا تقعدين وتسكتين لأن مايرضى يعالج لا حبيبتي حاولي تقنعينه و اذا ما اقتنع كلمي أي أحد يمون عليه خل يكلمه.

واذا كنتوا سليمين مافيكم شي اخاف هاذي عين ما صلت على النبي اقروا سورة البقرة انتي وياه لمدة سبع ايام متواصلين لأن اعرف ناس سووها والله رزقهم ماشاء الله ، واذا نفسيتج وايد تعبانه روحي العمره انتي وزوجج وادعي ربج وشربي ماي زمزم مقري ماشاء الله اهناك المفتي اللي بالحرم يقرى على الماي.

الله يرزقج ويرزقني ويرزق الجميع ويفرج اهمومنا جميعا يااارب

 

[هندااا]

مشكورين بنات وايد.......

الموضوع حساس ومتعب للنفسية....
ويخويتي سنتين موشوية انا احسها دهر ...لان عمري 24 و10 اشهر يعني 25...وخايفة العمر يركض فيني.....

 

[أم بدير]

حبيبتي شنو يعني 25؟؟
البنات الحين يتزوجون 27 واكثر
اختي الحين حامل ببجرها
عمرها 28
لاتتعبين نفسج
ترى والله النفسيه تلعب دور بهالسوالف​

 

[هندااا]

بعد قلبي رمادية كلامج حلو......

وعلى سالفة عيال الناس انا اتصرف معاهم على طبيعتي وكلهم يدرون اني احب اليهال...اخاف ما اقرب يم اعيالهم يقولون محترة....

وريلي يبط جبدي كلة يقولي تو الناس عاليهال نبي نطلع ونسافر....اهو لما يقول جذي ودي افلعه بأكبر ماعندي ..احس اهو بوادي وانا بوادي......

امس قاعدة اقولة خنسوي تلقيح صناعي ...جان يقولي انسي ولو بنفكر مو الحين عقب فتره....انا ستانست قلت عقب فتره يعني شهرين ثلاث....جان اقوله عقب فتره اشكثر يعني؟؟؟؟
جان الاخ يقول يعني بعد 3 او 4 سنين....انا اهني شبيت حريجة:eh_s(14):

ينرفزززززززززززززززززززززززززززززز

الناس عقب هالفتره الطويله((يعني 6 سنين زواج)) يسوون اطفال انابيب والحلو الي عندي يبي يسوي تلقيح صناعي....

يرفع ضغطي ...برووووووووووووووووووووووووود

 

[هندااا]

مشكوره براونيز والفنانة وام بدير ورمادية وزيتونة..........

ام بدير صاجة والله بس شسوي قاعده احس بالنقص واحس اني كبرت وماعندي عيال ....غصبن علي هالاحساس

 

[رماديه]

خل يقولون اللي يقولون لا يكون ( بيقصون من معاشنا ) والا ( بيلبق بهدومنا ) على قولت أمي

شوفي ما عليج من احد ولا تهتمين حق أي أحد واذا بتسمعين كلام الناس ترى ماراح اتخلصين ( والناس ما يعجبها العجب ) وحتى لو يبتي بنت بيقولون ما يابت ولد وان يبتي ولد قالوا ما يابتله أخو وهاذي الدنيه.

وكلام زوجج صحيح ونسي نفسج طلعي استانسي شمي اشوية هوى لأن باجر لي صار عندج اعيال ترى الطلعه تفرق راح يقيدونج ابكل شي وراح يصرخون كلما شافو شي وكل اشوي يبون شي ترى محد مرتاح ( مافي احد مرتاح على قولت ارويشد ) اللي عنده اعيال واللي ما عنده ترى اللي عندهم اعيال شقيانين ويحاتونهم ويفكرون فيهم وبتربيتهم ليل نهار والله يكفينا الشر في ناس ربت واتعبت وآخرتها اعيالهم قطوهم بالشارع.

خليها على الله وكل بياخذ نصيبه ولا تنسين ان آخر هالدنيه ممات وهالدنيه مو دايمتلنا ولا دايملنا لا ازواجنا ولا اعيالنا ان الله رزقنا وانشاء الله اهناك دار البقاء راح نلقى فيها كل اللي نبي وآنا واثقة ان هذا ابتلاء من رب العالمين ( ان الله اذا احب العبد ابتلاه )وصبرنا كله ماراح يضيع اجره عند الله

يارب اتكون راضي عنا ( هذا اهم شي ) وترزقنا الصحه والعافيه لأن مافي اهم من نعمة الصحه والعافيه واحنا كل يوم قاعدين نسمع فلانه فيها هالمرض الشين الله يكافينا الشر عيل هذيل شنو حالتهم مساكين اللي فيهم هالامراض وكثير منهم ماتوا وخلوا اعيالهم وخلوا كل شي.

اييييييه الكلام ما يخلص هذا حال الدنيه بنتكلم طول ما احنا عايشين

يالله يارب الله يسهل أمرونا وييسر علينا كل امور الدنيه والآخره ( ربنا آتنا بالدنيا حسنة وبالآخرة حسنة وقنا عذاب النار)

قولي ( اللهم اصلحلي شأني كله ) والله يصلحلج شأنج يارب ويرزقج ويرزقنا ويرزق الجميع.

 

[هندااا]

كلامج يرد الروووووووووح....

احسه هوااااا بارد

 

[رماديه]

الله يبرد عليج دنيه وآخره قولي آمين يارب

الحمدلله اني قدرت اني اساعدج ولو ابشي بسيط جدا

 

[جارة القمر]

هنداا

حبيبتي

أنتي هونيه وتهون

أنتي سنتين



وأنا تسع سنوات

وغيرنا جم سنه


وأنا حملت من قبل وتوفيت

وأذا غلينا ناطرين رحمة ربنا بس الريال وأهله وأهلي والله كريم

والأخت رمادية كلامه عدل

والبنات ما قصروا


أنا زوجة حماي انطرت 14 سنة وربي رزقه بالذرية الصالحه

وخلي ايمانج بربج كبير

والله يرزقج ويرزقني ويرزق كل محروم حبيبتي

 

[امووره]

حبيبتي لا تتعب نفسيتج و لا بطيخ
ولا تفكرين حيل بالموضوع لان النفسيه لها دخل كبير بتاخر الحمل
وبقولج سالفة وحده من اهلى عشان اعطيج الامل ..
هذه الله يسلمج حملت عقب سنه تقريبا من زواجها و مدانا نسمع الخبر الا ونزل البيبي... و ما حملت عقبها و تمت تعالج لمدة 5 سنوات و ماكو شي ماسوته لي درجت انها عالجت برة الكويت بعد. لمن قالولها ان خلاص ما فايده من العلاج لا منج و لا من ريلج. وضاق خلها الفقيره و لمن ايأست قامت تخلص النيه حق ربها..و مرت سنتين و شوي بدون علاج و الحين عندها بنتين و حامل بالولد ماشالله
فحبيبتي انتي تو الناس عليج على هالشعور و مالج شغل من الي حوالينج الي قاعدين يضايقونج و خلي كل شي على رب العالمين
وسامحيني حبيبتي .. ادري قرقت وايد

 

[وصيت قلبي]

الله يصبرج ويرزقج بالذرية الصالحه عاجلا غير اجلا

انا حالتي مثل حالتج بكمل 3 سنوات وربي ماكتب لي احمل

الا مره وحده وسقطت والنفسيه مره فوق وعشر تحت

وفوق هذا الحين اربع من حريم حمولتي حوامل

الله يثبت حملهم ويرزقني ويرزقج عاجلا غير اجلا

يارحيم يارحيم يارحيم

 

[هندااا]

الله كريم بنات............
بس والله نفسيتي مو بيدي غصبن علي والله...
انا وايد اسافر وكله طالعة واشتغل بعد بس ماقدر انسى ...احب اليهال واحب ريحتهم.والله لو ايييلي ياهل بصحة وعافية انشالله هاللحظة تسوى الدنيا والي فيها...يالله لا تحرمني من كلمة يماااا........

 

[زيـــنه]

السلام عليكم

احمدي ربج انج حملتي يعني ان شاء الله فيه امل وامل كبيييييييييييير انج تحملين مره ثانيه وهم احمدي ربج ان مافيه اي مشاكل تعوق الحمال بإذن الله

وكلي امرج لله وابذلي الاسباب شلون انا اقولج

انا وحده قعدة سنتين ماحملت حملت برمضان اللي فات وسبحان الله مالله كتب له يثبت والحين انا حامل ولله الحمدلله والمنه الى جانب العلاج اتجهت لله بكل صدق طبعا مااقولج ان سورة البقرة يوميا صارت جزء من حياتي مااتركها ابدا احس براحة نفسية من وراها البقرة عظيييييييييييييمة ولها فضل كبير اعرف كذا بنت والله حملوا بعد الله من هالسورة

خصصي لج وقت معين باليوم بالليل اذا خلصتي كل شغلج قعدي بروحج وحطي ايادج على بطنج واقري سورة البقرة من غير قطع متواصله وصدقيني ماتاخذ منج اقل من ساعة الى جانب الدعاااااااااااااااء سلاح المؤمن وحسن الله التوكل على الله ومن توكل على الله كفاه الله مااهمه اطلبي من الله والحي بالدعاااااااااااء وابجي وادعي قولي ( ربي لاتذرني فردا وانت خير الوارثين )(اللهم قر عيني وزوجي بذرية صالحة تسعد بها قلوبنا )(ربي هب لي من لدنك ذرية صالحة انك سميع الدعاء )

واكثري من الصدقة وخليها خفية واكثير من الاستغفار استغفري باليوم والليلة الف استغفار قسميها طول اليوم

ولاتيأسين من رحمة الله خلج هالجدول فترة شهر واذا ماحملتي كملي الشهر اللي وراه خليه جزء من حياتج لاتستسلمين للشيطان ووساوسه وان الله ماراح يستجيب لج لا بالعكس الله قال ( واذا سألك عبادي عني فـني قريب اجيب دعوة الداعي اذا دعان)

والله يرزقج ويرزق كل من يطلب الذرية يارب وادعولي الله يثبت حملي ويفرح قلبي

 

[جروح تبتسم]

ياقلبي الله يفرح قلبج ويبرد قلبج

ان شالله تحملين وتصير هالايام ذكرى

بس انتي قلتي ان رحتي للدكتوره وقالت فيه سداد يعني شنو ؟؟؟



الله يرزقج الذريه الصالحه ياااااااااارب

 

[LaSt WoMeN]

هذا ابتلاء من الله سبحانه .. - و كل الناس مبتلين لأن احنا بالدنيا و نمر باختبارات - حتى هالحوامل الله يتمم عليهم تلقين عندهم ابتلاءات من نواحي ثانية ..

حمدي ربج على الصحة و على كل نعمة انعم الله فيه عليها و شوفي الكأس المملوء ..

و الانسان اللي يمر اببلاء لازم يكون صابر , حامد لله , كثير الاستغفار و الصدقات و أهم شي الرضا بقضاء الله و قدره و الثقة فيه ..

توكلي على الله و اكثري الدعاء و استبشري خير ..