شوفو شكثر أثر حريق الجهرا على نفسياتنا:(:(

[ReeM ^ Style]

اختي كويتيه رزتها ملكيه تصدقين بنفس يوم الحادث راودني حلم

انه يصير انفجارات وصواريخ وحريق وناس تركض وصراخ وانا مذهوله وقلبي مقبوض واطالع يمين ويسار وناس تركض وطياره اطيح ويركضون منها ناس سبحان الله قلب المؤمن دليله

فزيت على صوت اختي تصارخ يمه حريق تعالوا شوفوا اليوتيوب

وسبحان الله صار الغير متوقع وان لله وان اليه راجعون

 

[عنايد]

انا وحده صار لي 4 ايام ماني طيبه وبس افكر فيهم وبس ابي اقرا اي خبر عنهم

ونفسي انسدت عن كل شي وبس افكر شلون تحملو قوة النار ياربي ترحمهم وترحمنا برحمتك يارب

والله يشافي المصابين الباجين

 

[سمسميه]

والله صدقتي يا سبائك انا مو عارفه انام من يوم الفاجعه استغفرالله يا ربي
ما غير مجابله اللاب توب واقرا الاخبار
عسى الله يرحمهم ويصبر اهاليهم يا رب
اليوم الصبح سمعت مطافي ماره بفريجنا مت من الخوف !
استغفرالله صار هاجس
عسى الله يكافينا الشر ويحفظ اهل الكويت والمسلمين يا رب

 

[$الـــحـــلاوه$]

صاجه تأثرنا وقمنا نوسوس
بس اللي الله كاتبه بيصير وهذي الدنيا

الله يرحمهم

 

[الاسطورية]

ورا اي حادثه هذا شي طبيعي كلنا متضايقين انا قمت اكره شكل الخيمه
فتره وتعدي ان شاءالله

 

[يابختي]

ايه والله... قمنا نوسوس.. انا نوعي شوي مهملة بالاجهزة..اشغل وامشي.. الحي اقول اخاف يحتر ولا يولع اعوووذ بالله..

واللي زاد الطين بلة ان الحريق بفعل فاعل..لا اعتراض على القدر..لكنه لو بسبب التماس يمكن اقول اهون..لكن وجود وحدة لها القدرة انها تتعني من بيتها للمحطة البنزين لخيمة العرس وتولع بالخيمة بدون ما تردد لحظة...وترد ترجع البيت وتسمع بالخبر وبموت هالحريم والاطفال وماتروح تعترف..او تسلم نفسها... قلبها ما كان يعورها؟؟؟ بغض النظر عن اشكثر ريلها حارق قلبها... للاسف اهيا مو بس احرقت قلبها..قلبنا وحياتنها وحياة اعيالها...

ماكو ضمير... ماكو رجوع لرب العالمين..مافي استسلام لامر الله عندها... انعمت عينها وقلبها...

هذا كله رجع لي جرايم سمعت عنها وحتى توها رفيجتي قالت لي عن وحدة... اشلون حياة الناس ترخص بلحظة...

الحيوان مكرم القاريء لو دعميته او عورتيه بالغلط..شنو يصير فيج...

القطوة لو دعمتيها تسألين عن ديتها...الادمي اشلون...


الله لا يبلانا...

اعوذ بالله من قلب لا يخشع..وعين لا تدمع...

 

[فديـت عيـونك]

اي والله كلنا نفسيتنا زيرووو والوسواس ذابحنا انا من يوم الحادث قاعده اوسوس كل شوي اجيك على وايرات الكهربا وكل شي يسبب حريجه غير اني صايره ما اناام م التفكير الله يرحمهم

 

[حبيبة ماماتي]

حبيبتي كل شي مكتوب واللي صار يومهم وانشالله عند ربهم شهداء احسن من العيشة بهالمصايب ويومهم والواحد سبحان الله يومه لو اهو قاعد فبيته جدام اهله مافي مفر من الموت
شتقولين عندي ولد اخوي سوا حادث وقعد بغيبوبة 6 شهور واول ما صحصح حطوله هوز برقبته ومنظره سبحان الله كان آيه من الجمال وكل اللي يشوفه يشاهق عليه كان الله يرحمه 20 سنة :0bee2e8d89: وصار مثل الربيانة وملامحه كلها تغيرت سبحان الله جنه واحد عمره 80 سنة :eh_s(11): وبعد ماتشافى وصار حمدلله رخصوه ماتخيلين منظر ابوه وامه اشلون جنه مولود يديد يراعونه مستانسين فيه بشكل مو طبيعي وقال بخاطري نروح شاليه قلنا يلا احسن الكل يبي يغير جو بس سبحااااااااااان الله في اول ليله كنا مستانسين وكان يضحك معانا ويتغشمر وكل ما نبي انام :0bee2e8d89: يقول قعدو شوي احس انه هاليوم ماراح يتكرر :eh_s(11)::eh_s(11): تمينا لي الفجر صلينا ونمنا وبعدها قعدنا كلنا عالساعه 10 تقريبا وقعدنا على طاول الطعام ناكل والله يا بنات وييه سبحان الله صار جنه بيبي عمره بالاشهر :0bee2e8d89: واحنا ناكل ماحسينا إلا اللي حاط علينا راسه على الصحن :eh_s(11): وكنا نقعده بس مافي فايده الله يرحمه :yaaaaaarb: روحه طلبت ان يموت بالشاليه واحنا كلنا متجمعين امه من صوب تقعده وابوه واحنا امه تقول اشفيكم تبجون!! اهو مامات اهو داخ شوي من الطقه على راسه شوفو راسه ... اهو شوي ويقعد :0bee2e8d89: لين اخوي عطاها طراق صحاها قالها خلاااص الله يرحمه اغمى عليها وظلت اسبوع نايمه بالمستشفى وكله على المنوم والمهدئات :0bee2e8d89: ... آآآآآآآآآآآآآآآآآآآآآآه يا قلبي آآآآآآآآه
الله يرحمه ويرحم كل واحد مات عشان جذي احس ان اللي ماتو بالحريق اهلي لأني جربت فراق الاهل الله بيعده عنا وعنكم انشالله :yaaaaaarb:
ادري طولت عليكم سامحوني بس والله انا مقهووورة من اللي صار وقلبي محروق من جم سنة على اللي فقدته الله يعين اللي فقد واحد واثنين وثلالث من اهله :0bee2e8d89:

 

[BuNNy]

بنات والله لما اقرا عن اللي صار والله عيوني ادمع واتخيل لو صار جذي بأحد من اهلي

شنو كان بيصير فيني (( الله لا يقوله طبعاا )) والله مو قادره استوعب اللي صار

هالمره لازم يعدمونها لازم مدخلينها مستشفى المجانين عشان اجذب وتطلع

مريضه نفسيا وتفلت من جريمتها شهالمصخره هذي وحده حقيره الله لا يوفقها لا دنيا ولا آخره

وانشالله تاخذ جزاها عند رب العالمين (( اقتلت نفس بدون اي وجه حق ))

افففففف والله قلبي يعورني والله ..

 

[بتبوتااا]

وواي انتي نفسي كل شوي اتخيل ويتهيأ لي انه بيصير شي استغفر الله العلي العظيم !

والله نفسيتي داااون ومو بالي ولا تفكيري غير هالسالفه حسبي الله ونعم الوكيل فيهاا

 

[بتبوتااا]

اختي كويتيه رزتها ملكيه تصدقين بنفس يوم الحادث راودني حلم

انه يصير انفجارات وصواريخ وحريق وناس تركض وصراخ وانا مذهوله وقلبي مقبوض واطالع يمين ويسار وناس تركض وطياره اطيح ويركضون منها ناس سبحان الله قلب المؤمن دليله

فزيت على صوت اختي تصارخ يمه حريق تعالوا شوفوا اليوتيوب

وسبحان الله صار الغير متوقع وان لله وان اليه راجعون

اي وايد تصير سبحان الله نفس اني احلم انه ولدي يقول لي قومي تلفونج وانا اقوم اخذه وفجأه اصحى من نومي الا قي تلفوني يرن :\

 

[ღ•»الًـجٌـوِرٌيّ«•ღ]

اي والله صح كلامج

وانا مثلج والله قمت اوسوس بكل شي حتى العروس قمت اخاف اروح لها مادري كله احس انه بيصير شي

وحتى المعارض النسائيه وجذي تعقد

لاحول ولاقوة الا بالله

 

[q8nina]

وانا بعد اثر في نفسيتي حييل بشكل والله مو طبيعي

امس الصبح قالي زوجي امشي ارض المعارض بنشتري اغراض للرمضان ... والله يا بنات وانا قاعده امشي بدخل المعرض ..

واتخيل شكل الحريق .. خفت تحترق ولانه معرض اكل واكيد فيه طبخ .. وبعدين قلت مايصيبونا الا ماكتبه الله لنا ..

وكل يوم افتر بالبيت على الكهربا واشوف الجوله اخاف ناسية الغاز ..

اللهم ارحمنا برحمتك والله حسن الخاتمه​

 

[.:. عبرة مُوادع .:.]

اول شي ..

شلونك سبائك من زمان عنك !

،

ثاني شي

والله نفسسسسسسس الكلام اللي قلناه انا واختي عند معرض القادسيه !

صار فينا وسواس

 

[al.nada]

والله نفس شعورج اذا رحنا مكان دايما اقول لنفسى شلون اذا صار حريجه شنسوى
واذا شفت لهب نار نفس الشى اخاف
والله شى فضيع الى صار ما ينسى وترك بقلبنا غصه

 

[^SwEeTa^]

قدر الله و ما شاء فعل

الله يكافينا و اياكم الشر

 

[أمووورة الكويت]

بالنسبه لي الي صار يخلينا نرااجع كثير امور مرت بحياتنا


وانا اصلي اقول بقلبي ياربي اخلص من صلاتي ولا بتطلع روحي فهالشي يخليني التزم بصلاتي اكثر واخشع فيها


بنااااااات خلووا هالشي ايجااابي مو سلبي ....... كثروا استغفار الواحد موعارف ولا ضامن متى يومه


الموت حق وواااااااااقع مالازم نشيل هالشي من بالنااااا


تذكرووا الي صار كانوا بقمه فرحهم ووناستهم لكن سبحااااااااااان الله ولا قوة الا بالله راحوا بيومهم



الي صار قضاء وقدر .. قدر الله وماشاء فعل


حبيبتي سبائك لاتوسوين موزين حبيبتي تعوذي من ابليس ولاتخافين من الموت لان حق

يالله حسن الخااااااتمة


اسئل الله العظيم رب العرش العظيم ان يرحم شهيدات الجهرا ويغفرلهم يااااااااااااااااااارب ويسكنهم فسيح جناته يارب

 

[شبيهة ديانا]

ياعل ربي يحرق قلبها مثل مااحرقت قلوب هالعالم

حسبي الله عليج............ :eh_s(14)::eh_s(14):

 

[ماريسول]

مع اني سعودية متأثرة نفسيتي بشكل مو طبيعي

من يوم الحادث وانا نفسيتي تعباانة ماأنام

اجلس على السفرة آكل لي لقمتين وأقوم

كل هواش مع زوجي وأولادي

وكل عصبية ومالي خلق احد

راااسي منفووووخ احاول انام بأي طريقة بس لأ

محرووومة من النوم
امس اضطريت اني اشرب حبوب منومة والله العظيم نمت شوي

بس كل شوي اقعد ابغى انام نوم عميق مو عارفة من التفكير

اي صوت واي حركة يفز قلبي من مكاااانه


قلوبنا معاكم ياأهل الكويت

حسبي الله ونعم الوكيل

 

[Heaven Light]

صحيح الحادث أثر فينا حيل ..

بس محد يموت إلا بيومه ..

وإحنا ما بيدنا نقول إلا ..

اللهم أحسن خاتمنا ..

وتوكلوا على الله وهو نعم المتوكل ..
​