شوفو شكثر أثر حريق الجهرا على نفسياتنا:(:(

[سبائك]

السلام عليكم


أول شي عظم الله اجورنا كلنا بضحايا حريق الجهرا الي قلوبنا كلنا احترقت وياهم

ثاني شي بغيت أقول لكم مدى تأثير الحادث هذا على نفسياتنا طبعا أنا ماراح اتكلم عن ضيقة الخلق والكدر وبرود الحيل الي حايشنا هذا كلنا نعاني منه من صار الي صار...روسنا شكبرها والله احس راسي منتفخ واحس مالي خلق اسوي شي بس قاعده عالاب توب اتابع الاخبار اول بأول

المهم أمس انا متواعده مع رفيجتي ازورها ببيتها

ما وعيت الا تدزلي مسج شرايج نروح معرض القادسيه تبي شغلات من هناك

بيني وبينكم ماكان لي خلق احس نفسيتي مو شي بس ماحبيت اردها ولا والله احس اني رايحه وفيني غصه بس رحت عشانها

واحنا هناك تصدقون وانا قاعده ادش المبنى قاعده اقول ما ادري اطلع منه ولا لأ

والله العظيم حسيت بخوف رهيب بس ما تكلمت مابغيت اضيق خلق رفيجتي

واحنا قاعدين نفتر شفت دراعه سألت البنت بجم اشوفها تتلفت ولاهي صوبي!!!!

رديت سالتها مره ثانيه ولا اسمعها تقول حق رفيجتها ترى اشم ريحة شي يحترق

انا هني صبت عظامي والله وقلت لها والله ماتنلامين كلنا قمنا نوسوس

بس ماصدقت على الله رفيجتي خلصت من الجولة وركضه على باب الخروج من حلاة الروح لا أله ألا الله

حتى ذاك اليوم حاطين اعلان خيمة معرض رمضاني بالموفنبيك بيني وبين نفسي قاعده اقول والله لو يعطوني عدالي فلوس مارحت لها

صار فيني وسواس من هالاماكن عسى الله يكافينا ويكافيكم الشر يارب

 

[ReeM ^ Style]

والله يااختي ماادري شقول لج فعلا الله يعينا ويعني امة محمد ويصبرنا ويثبتنا يارب ويبعد عنا الوسواس

والله اختي قبل لا انام احداث القصه كلها تمر قدامي افزفز من نومي اعوذ بالله شي مايخطر على البال

هذا قدر رب العالمين وان لله وان اليه راجعون اللهم لا اعتراض

للاسف قدرنا هالسنه مانفرح بقدوم الرمضان وقدرنا نستقبل الرمضان بقلوب معصوره من القهر والالم

لاحول ولا قوة الا بالله العلي العظيم

 

[hatoona]

بصراحه انا من يوم ماسمعت بالخبر حدي ضايق خلقي ومصدومه مصدومه من الوضع مو مصدقه انه هالشي صاير بديرتنا الكويت احنا يموت واحد نتكدر شلون فوق الاربعين محده وبالطريقه هذه وعشان شنو عشان وحده ماتخاف ربها حبت تنتقم شنو ذنب هالناس شنو ذنب هاليهال الي تيتمو والامهات الي راحوا ولا البنات الي تشوهواولا البيوت الي سكنها الحزن والقهر عشان وحده مجرمه الله لا يرحمها لا دنيا ولا اخره انشالله كل اه تطلع من كل مريض او دمعه من كل يتيم نار تصب عليها وتحرقها يارب

 

[احبج يا الكويت]

والله كلنا تاثرنا والوساوس اشتغلت فينا
ياربي كله افكر في اللي نجوا من الحريجه شلون نفسياتهم وشلون بيعيشون
الله يثبت عقولهم ويخفف عليهم

 

[ektifeet]

احساس مؤلم والله

انا كل ماشوف بنتى الصغيره والاعبها اقول الصغار اللى تيتمواا منو يلاعبهم ماعندهم احد يعوضهم عن الام

وانتو عارفين شنو معنات ام فلوس الدنياى ماتعوض فقدانها

ومنظر الرجال اللى يدورون بناتهم وحريمهم وامهاتهم وخواتهم

جنهم ميانين مايدرون وين يروحون من الحره

حسبى الله ونعم الوكيل

 

[@ نجمة العطااا @]

النفسية صارت عدم وحالتي حالة والله لي 3 ايام الضغط فووول وربي موقادرة الم روحي تعبانه حده والبيت كله كآبة حده وعيالي ازهقوا من الصمت الرهيب وبس على النت او التلفزيون اخبار ابي بس اي خبر يطمني والله باحلامي تحلمت ووالنووووم يالله بالحسرة والقطارة بو ساعة ساعتين ويالله تعبنا نفسيا وتأزمنا وللحين ما لي خلق اروح اتقضى لرمضان ضايقة الدنيا فيني
اليوم تهاوشت مع ريلي يقول خلاص مو حاله هذي استغفري ربج خلاص كآبتينا شذنب اليهال ؟!!! طلعي صدقة لهم او ادعي لهم هذا اللي يبونه اهم مو البجي والكآبة كرهت البيت خلاص<< على فكرة اهو اكثر مني متأثر وراح تبرع بالدم لكن سبحان الله الرجال عندهم طاقة يخبون اللي بقلوبهم يارب رحمتك وشلوون الاهالي يارب تساعدهم
وربي موعارف شقووول احس متخربطة لكن ربي كريم وفوق الكل وعشان هالشي قررت اوقف شوي عن الجرايد والاخبار وبتابع معاكم اهنيه لكن بصمت ويارب تبرد قلوبنا وتظهر الحق وتنتقم من الجاني يارب

 

[нάγoηά cнεмίsтяγ]

واااي يا بنات انا من سمعت الخبر ماني قادره انام الليل
واذا نمت اشوف احلام وكوابيس حريجة وانفجارات ...
والله حيل تاثرت نفسيتي تعبانه

و24 افكر بالموضوع وقلبي يعورني وكلما اتخيل الموقف تخنقني العبره وابجي
ياااربي اذا انا جذي شلون حالة الاهل ؟؟؟؟؟؟؟؟؟؟
شلون ماني قادره اتصور عوار القلب ..
الله يصبركم ويهون عليكم مصيبتكم والله قلوبنا تحترق معاكم

قلبي يتقطع و حسيت ان حياتي ممكن تنتهي باي لحظة ............
عطلتي توها باديه والله ما طلعت .. مالي خلق اطلع مالي خلق استانس
ودي ما اروح مكان بس اقعد بالبيت .. شنقول قدر الله وماشاء فعل

عظم الله اجوركم والله يجعلهم من الشهداء يارب
انشاءالله تكون نار الدنيا الي حرقتهم سبب بدخولهم الجنة
و سبب بتحريم اجسادهم من نار الاخرة قولو امين ويارب تحسن خاتمنا
و تنجينا من نار جهنم

 

[كويتيه رزتها ملكيه]

تأثرت نفسايتنا ؟؟ اااى تأثرت00 مو شويه واااااااايد تعبننا 00 صرت اشوف الدنيا ماتسوى لاالركض ورا المظاهر والشى الجديد وحب اللبس والكشخه 00والفسق والطغى الزايد 00يكل هالمظاهر الزائفه ما تنفعنى باجر بيوم الحساب00جم وحده من الى احترقوا احياء كانوا باعمارنا شابات بعمر الورد 00نفس طموحنا واحلامنا كانوا يعيشونها كل يوم 00كل وحده راحت العرس كانت تبى توجب وترفه عن نفسها ماتدرى ان هاليوم اخر يوم بعمرها وبتموت موته بشعه وتهتز لها امم العالم 00هالفاجعه اهميتها نفس اهميه الغزو العراقى 00نفس الصدمه والذهول والقهر واشتركوا بشغله الغدر والخيانه


نفس يوم الحريق صابتنى ضيقه مو طبيعيه من قعدت من النوم 00والله العظيم بنات قبل الحريق باشهر حلمت بحريق كبير والضحايا شكثر والسماء غطاها الدخان وانى بالحلم اسمع اصوات صراخ0 والناس موقادره تساعد الى يحترقون ونشرات الاخبار تطلع اخبار هالحريق وانه بالكويت 00قمت مرعوووبه واتعوذ من الشيطان الرجيم 00
اللقمه مااحس بطعمها مثل قبل اربع ايام 00حتى الطلعه لمشوار ضرورى بس مجابله اهلى والنت 000الماساه تنبيه للاحياء منا والغافلات منا 00لانقصر بعبادات وخلنا نسعى وراء الاجر بجميع وسائله 00الصدقه والصوم0وقيام الليل 00ووصل الرحم 00كل سبيل نكسب منه اجر ونمحى فيه سيئه 00الله يعطينا هالقوه والاصرار عشان نتحدى الشيطان الى يوسوس لنا


وعلينا بالاستغفار بنات كثرت هفواتنا وغلطاتنا ا سواء الى نعلم فيها والى لانعلم فيها :
استغفر الله العظيم الذي لا اله الاهو الحي القيوم واتوب اليه ). ثلاث مرات غفرله ذنبه حتى ولو كان فر من الزحف وهو ذنب كبير
وهناك دعاء اخر ( للمغفرة اللهم انك عفو تحب العفو فاعفو عني )
وسيد الاستغفار لتذكير فقط (اللهم انت ربي لا اله الا انت خلقتني وانا عبدك وانا على عهدك ووعدك ما استطعت اعوذ بك من شر ما صنعت ابوء لك بنعمتك علي وابوء لك بذنبي فاغفر لي فانه لا يغفر الذنوب الا انت )

 

[Turquoiseya]

انا صار لي كم يوم ونفسيتي سيئة من الحادث حتى وجهي قب حبوب
احس الضحايا للحين صوتهم وصورهم في مخي
أما عن الزوجة: اللهم لا تبلانا فيما ابتليتها فيه والحمدالله انه فضلنا وماصرنا مثلها، يمكن اللي سوته درس لكل وحدة تروح لساحرة لان من كلام المباحث اللي بجريدة الوطن انها كانت مسوية عمل تخرب فيه العرس00 يعني استعانت بابليس بدال الله سبحانه وتعالى
والشرك من اكبر الكبائر ( إن الله لا يغفر أن يشرك به ) وشوفوا شنو كانت النتيجة: 45 نفس في رقبتها غير دعاوي المظلومين والناس عليها
حتى لو قالوا عقوبتها مؤبد فوقها الله اللي بيقتص منها ل45 نفس بنفس الطريقة اللي هي اودت فيها حياتهم غير الناس اللي ضرتهم
ونار الدنيا جزء بسيط من نار جهنم.
اللهم لاشماته، وانا لله وانا اليه راجعون

 

[om_3kash]

الحريجة الي صارت خرعتنا خلتنا نوسوس

بس الحمد الله على كل حال و الله يجازي الي كان السبب

 

[قمر^خالد]

الله يجازي اللي كان السبب......... الله يعينكم يا بنات ويعين كل أهل المتوفين رحمهم الله

 

[ghalaty]

واااي انا صداع راسي احسه اشكبره من التفكير ويهي صار كله حبوب الفرحه برمضان ما ادري شنو صار فيها الله يرحمهم ويشافي مرضاهم

 

[نسناس]

موضوع ينفع أختي سبائك للواحد إنه يفضفض عن نفسيته ,,,

تآمنون بالله أنا طول الأيام اللي فاتت كنت شوي متماسكه ؟؟ لكن أمس والله العظيم انهرت من البجي وخصوصا بصلاة الفجر ,,,

ما أدري ليش حسيت بشعور غريب ,, إني راح أموت وأنا نايمه ,,

أتعوذ من ابليس ,, قريت آيات من القرآن ,, لكن خلاص غصه ماني قادرة أبعدها عني ,,,

وتميت قاعده خايفه لين دق منبه زوجي للدوام الساعه ثمان الصبح ,,,

أروح لعيالي وهم نايمين ياحياتي ,,, وأقول لو كنت بالعرس وياهم ,,,(( بالعلم كنا معزومين للعرس لكن واحد من أهلنا بالمستشفى ومارحنا ))

وأقول من ينومكم عقبي ؟؟ من يدرسكم عقبي ؟؟ من يتحمل شغبكم وشطانتكم عقبي ؟؟ من يسمع لكم ويلبي طلباتكم ؟؟

إذا الأبو وهو الأبو ساعات يمل من حنة الجهال ,,, فما بالج غير الأم ,,, يالله يارب لا تروعنا وكل مسلم يارب

والله إني أمس أبجي مثل الجهال ؟؟

شلون حسوا بألم النار ؟؟ شلون شافوا عيالهم يحترقون جدامهم ؟؟ شلون وشلون وشلون ؟؟

أسئلة كثيرة جالت في خاطري ,,, لكن للأسف ؟؟ لم أجد لها الإجابه ,,,

 

[[[ عيون جابر ]]]

عيل انا بس اطالع اليوتيوب والمنتدى وبجي ونواح والله ظايق خلقي عليهم اشذنبهم
حسبي الله عليها من مره
اللهم إن شهداء الجهرا في ذِمَّتِكَ وحَلَّو بجوارك، فَقِهِم فِتْنَةَ القَبْر ، وَعَذَابَ النَّارِ ، وَأَنْتَ أَهْلُ الوَفاءِ

والحَمْدِ ، اللَّهُمَّ فاغفِرْ لهُم وَارْحَمْهُم ، إنكَ أَنْتَ الغَفُور الرَّحيمُ وعافِهِ ، واعْفُ عنْهُم ، وَأَكرِمْ نزُلَهُم ،

وَوسِّعْ مُدْخَلَهُم واغسِلْهُم بِالماءِ والثَّلْجِ والْبرَدِ ، ونَقِّهم منَ الخَـطَايَا، كما نَقَّيْتَ الثَّوب الأبيَضَ منَ

الدَّنَس ، وَأَبْدِلْهُم دارا خيراً مِنْ دَارِهم ، وَأَهْلاً خَيّراً منْ أهْلِهِم، ، وأدْخِلْهم الجنَّةَ ، وَأَعِذهم منْ عَذَابِ

القَبْرِ ، وَمِنْ عَذَابِ النَّار ..

رحم الله امواتكم رحمه واسعه واسكنهم فسيح جناته

ونسأل الله ان يلهمكم الصبر والسلوان والله يكون في عونكم

وان يغسلهم بالماء والثلج والبرد

وان ينقيهم من الذنوب والخطايا كما ينقى الذوب الابيض من الدنس

 

[الهجر والوجد]

مادري شقول مشاعرنا صارت وحده حتى مالنا خلق نكمل اغراض الشهر الفضيل
والله امس رحت اشتري اغراض وانا اتشره اقول ياربي الله يرحهم ها الحريم الي راحو مادري اكيد الي شرت اغراض والي يابت اطقم شوربه على عدد افراد عيالها
والله ما ادري الا اقول للخدامه يلا بس انا تعبانه مالي خلق اكمل

 

[وحشتني لياليك]

الواحد مايقول الا الله يرحمهم هم مايبون الحين بكي ولا دموع ولا حزن مايبون الا الدعاء ..
الله يرحمهم ويغفرلهم

 

[mirrorsweet]

والله حتى انا يا بنات حاشني وسواس قووييي


قمت بليل اقوم اجيك على البلاكات وتلفزيونات المبطلة ودق على اهلى الباب واهم نايمين اقولهم جيكو الجراح قصدي الشاحن مال لاب توب سكروة


رحت لندوة دينية كانت خيمة نفس اخيام الافراح والمناسبات والله وانا اسمع الي تلقى الندوة اوسوس وطالع جم باب بلخيمة

 

[FOZQ8]

سبائك اصلا انا كل ما أنسى المووضوع واعيش عادي اطالع جم موضوع هني وانتقد نفسي اني اشارك بغير مواضيع ومشتريات صار الواحد نفسيته فوق تحت والله مثل البوورصه .. قمت اتخيل اشياء واكثر شخص اخاف عليه ابوي الله يطول عمره وياعل يومي قبل يومه لاني ادري ان مو بسرعه يقوم ويتحرك من مكانه اصلا انا ناويه اشتري طفايه حريج اخليها يم سرير ابوي قمت اوسوس
ياربي يعني السالفه مو بس بالخيام قمت اشك بكل شي
الله يحفظ الغالين
عيل اللي عندها عيال شتسوي !! انا يمكن أين بروحي مصرقعه ..

 

[RaMoSha]

بصرراحه صج نفسيتي تعبت واحس اكتابت الحمد الله على كل حال انا حالتي جذي معني مااعرف احد هناك فمابالك الناس الي فضا عليهم البيت فجاه والمساكين الي تعودو امهم برمضان تحوس بالمطبخ وخواتهم يحوسون معاها و اليمعه الي يتيمعونها برمضان حسبي الله على الي كان السبب كل مااذكر كلام المره الي تقول الناس ذابت والزقت بكراسيها احس انه المنظر جدامي يبيلنا طبيب نفسي عقب هالاحداث الله يصبر اهل الضحايا ويرحم امواتهم برحمته الواسعه

 

[جوك احلى جو]

الحدث حيل يخرع الله يصبر اهلهم الكويت كلها متاثره بهالموضوع ونفسياتنا تعبانه ومصدومين من الحدث المفجع