شفط الدهون بتقنيه الvaser

[salsa]

هلا فيج افروديت ها ما تذكرتي شكتبتي؟
عسى يايبتلنا معلومات يديده؟

 

[salsa]

طبعا انا باذن واحد احد عقب باجر عمليتي الغير جراحيه باذن الله..طبعا الوالده الله يهديها عيزت تقولي انتي ادورين الطلايب حق عمرج ماله داعي تسوين شفط اهي اول ما قلتلها صراحه ما قالت شي لانها تدري اني وايد متنت ودها اضعف واصلا حاسه فيها من فتره لو بقولها عمليه ما راح تعارض بس الحين يوم صارت الصجيه تخوفت بعد ام الواحد يعذرها ..تبون الصج انا احاتي شكلي بعد العمليه لان امس قعدت اشوف صور مصورتهم قبل اسبوع مع اهلي تكدرت يوم شفت شكلي ضخم وكل شي متين لان انا المتن عندي متوزع ولازم ضروري عقب العمليه اشد حيلي واصك حلجي وامشي عشان احصل نتيجه خصوصا ان الشفط حتى لو بينزل من الوزن الا انه ما ينزل وايد وايد اهو يصغر المناطق اللي مسوين فيها شفط بس الشحم اللي داخل عند اعضاء الجسم الداخليه هذا موجود فهذا ان شاء الله اللي ابي اتغلب عليه علشان كتله جسمي تصغر لان انا سبحان الله كتله الجسم عندي كبيره..انا كتبت هالحجي لاني فعلا ابي افضفض وانتوا صراحه في متسع بصدوركم واوقاتكم ما القاه عند احد ثاني اول ما اشرحله مشكلتي سييييييييده بيصير دكتور فجأه ويعطيني نصايح ورجيم وقائمه مسموحات وقائمه ممنوعات ما يدرون اني انا الحين اقدر اخذ دكتوراه بالرجيمات وطرق التخسيس من كثر التجارب بس الحجي سهل هذا اللي اقدر اقوله ..وسلامتكم

 

[salsa]

صدى الافراح حبيبتي انا قست محيط البطن من 3 اماكن فيه وبكتبهم هني عشان اتابعون وياي :بالنسبه لمنطقه المعده 109ونص
عند منطقه السر المحيط 127 ونص
المنطقه السفليه من البطن 134 ونص

 

[AFRoDiT]

حبيبتي الله يسهل عليج ..

كنت كاتبه وايد أشياء ..

كتبتلج تنبيهات حق بعد العمليه ..
مو تضعفين وتخربطين عفيه شدي حيلج وقللي كمية أكلج .. بس وضعج يبكون سهل لأنج تبين تحافظين مو تبين تنزلين وزنج
فـ انشالله من تقللين كمية أكلج و تراقبين النوعيه وتخففين سكريات و نشويات انشالله كل شي أوكي ..

وقلتلج بعد .. حسبي حساب الشد من الحين

ترى الشفط بيونسج في اللبس ومقاسج بيصغر و وناسه بتفرين السووووق فرررر ..
بس حسب مافهمت من كلامج انج مومتزوجه .. يعني وراااج زوااااااج
عشان جذي لازم تسوي الشد مبجر قبل لا ايي النصيب .. ع الاقل يكون خفت آثاره
مو تتزوجين وتقولين حق ريلج انج كنت مسويه عمليه .. ديريبالج .. فهميه انج رشيقه من طلعتي من بطن امج لووول

ولاتخافين ولا تحاتين .. بالعكس استانسي
اعرف بنات الي كانو متان والله مسوين البومات حق صورهم قبل و بعد والحين يطالعونها ويضحكووون على زمن المتن

لاتفكرين بوقت العمليه نفسها .. فكري بالنتيجه والدهون الي يتقطينها وتفتكين منها

عقب العمليه انشالله تسئلين الدكتور عن كل شي .. قوليله في كريمات معينه استخدمها حق المناطق قبل لاتشدها
لأن على حسب علمي الجلد المرن يساعد أكثر على الشد ..

وهم سئليه عن الآثار مالت العمليه الي بتسوينها عقب باجر موتنسيييين ..
وهم سئليه اذا تحتاجين تاخذين حبوب فيتامينات معينه ولا لأ


حبيبتي انتي لاتحاتين
وكلام امج ولاكأنج سمعتيه .. لأن محاتاة الأم طبيعي تكون مبالغ فيها , واحنا لما امهاتنا يحاتونا احنا الي نتوتر
فـ انتي هدي اعصابج وقولي حق نفسج "هذي ام ولازم تبالغ في المحاتاة"
وانتي استانسي وفكري بالنتايج الحلوه الي بتحصلينها والحمدلله ماكو جراحه

وتمسكي بدعائج وانشالله ربي يسهل عليج


واحنا بانتظار يومياتج
وكل الي بخاطرج كتبيه

 

[AFRoDiT]

صلصه .. لما تضعفين غيري نكج خليه salsa low fat


ماقلتيلنا جم عمرج؟؟

 

[salsa]

واي افروديت بعد عمري طايره انا من الفرحه على هالتشجيع والاهتمام والله مستاااااااااااااانسه ,انا عمري 30 وسبقلي الزواج بس انفصلت ومن اهم الاسباب كانت ترى شكل جسمي كان زوجي يقولي ان جسمج جسم ريال :"( ,ترى هذا الشي وايد اثر فيني مع اني كنت اضعف من الحين كنت بالثمانينات وكان شكلي عادي بصراحه مو متين بس اهو يتكلم عن تقسيم الجسم والشكل الداخلي يعني شكل الجسم بدون ملابس وانا ما راح اقولج انه غلطان بس اهو بالغ وايد صح انا في عيوب وايد بجسمي بس الحمدلله كلي انوثه بس تدرين بعد اساليب رياييل لكويت ماله داعي اشرح كل متزوجه تدري شقصد..

 

[ii DareeN ii]

الله يوفقج ويسهل عليج وان شاء الله سهالة بس تطلعين من العملية بلشي رجيم محترم ومشي ورياضة عشان تضبطين كل جسمج

وبشرينا عنج بنحاتيج

 

[جوجو.]

شنو كان رجيمج ؟

 

[salsa]

الجوري حبيبتي حياج الله بمتابعه موضوعي تبين الصراحه انا كان رجيمي من اختراعي وقتها كان وزني 110 نزلته لي 85 وبصراحه وقتها كان شكل جسمي عجيب بس عندي سيليوليت بالففخوذ والمؤخره وطبعا صعب انزل اكثر مع ان وقتها كنت ذابحه عمري اسوي رياضه ومساج ورجيمي كان توست اسمر مع سلطه بس يعني كنت اكل 3 توستات مع جبن وسلطه طول اليوم ووقتي كله رايح ترى رياضه بعدين عاد شوي شوي زاد وزني والحين صار مثل ما قريتي 97 ونفسيتي كلش مو مساعدتني انزل وهم حاليا اعاني من تعب بالمشي بالرجل والظهر وصعوبه الحركه بالصلاه وهم مثل ما وضحت من قبل تقسيمه الجسم عندي مسببتلي حاليا ضرر نفسي يمكن بالهدوم عادي شكل جسمي بس بدون نوعا ما في عيوب وايد بس الف الحمدلله والشكر لله على نعمته اللي انعم فيها علي

 

[salsa]

بنات اللي متابعين موضوعي واللي هم ناويين يتابعون حابه اعطيكم فكره عن اخر زياره لي لعياده الدكتور سامح صادق,طبعا اخر زياره كانت الاربعا اللي طاف لمن دقت علي السكرتيره وقالتلي ان تحاليلي وصلتهم من المختبر وانهم حددولي موعد حق يوم العمليه واهو الاحد الياي وطلبت مني امر الاربعا ادفع سعر العمليه للدكتور اللي اهو 1000 دينار لشفط منطقه البطن والظهر وقالتلي موعد العمليه واني لازم قبلها بساعتين اكون بالمطار:dddds: اقصد بالمستشفى حسيت اني بسافر ,طبعا لازم اكون واصله قبل موعد العمليه علشان يشوفني الدكتور ويرسم على جسمي اماكن اللي بيشفطها ويعطيني بنج يعني تحضيرات ما قبل العمليه وهم قالتلي اني لازم اروح اشتري من شركه عطوني عنوانهم "مشد" كورسيه للجسم واييبه معاي عشان لمن استيقظ من البنج بلقى نفسي لابسته طبعا سعر المشد 75 ديناااااااااااااااااااااااااار حده غالي صراحه بس اهو كامل لي الفخوذ وقالتلي بعد لازم اصوم من 12 بالليل قبل يوم العمليه ,عاد انا صراحه مفكره اني اخلي الدكتور يسوي فخوذي مدام ان الكورسيه لي الفخوذ يالله اسويهم وافتك لان متضايقه بالصلاه وقت التشهد يذبحوني:0bee2e8d89:

 

[الدمعة]

الله يوفقج انشالله وبانتظارج يارب تطلعين بسلامه وماتعنين من اي اعراض جانبيه

 

[goldengirl_q8]

هلا حبوبه سوي عمليه تحزيم معده وارتاحي من شفط الدهون انا اعرف وحده سوتها مالها اي اضرار عند الدكتور الجار الله وتعالي شوفيها الحين جسمها روووووووعه الحين

 

[salsa]

الدمعه الله يسمع منج وما قصرتي حبيبتي


قولدن قيرل انا قبل لا اقرر اسوي شفط سويت دراسه كامله عن جميع العمليات سواءا بالنت هني والمنتديات ولا بالسؤال اللي مجربين العمليات وكونت قناعه اللي اهي الله يسلمج اني افضل انزل وزني باقل الم ممكن+اقل اخطار ممكنه+اهم شي باقل الام وتعب فلقيت ان هالطريقه اكثر طريقه متوفره فيها هالشروط تدرين ليش ؟؟
اول شي لانها بدون جراحه ودم
ثاني شي نتيجتها سريعه خلال اسابيع تبين النتيجه النهائيه
ثالث شي الامها ومعاناتها وقتيه وبسيطه
رابع شي واهو الاهم ان الشفط مثل ما قالي الدكتور يكون للدهون في المنطقه بين الجلد والعظلات يعني المنطقه الخارجيه من الجسم ما فيها لعب للاعضاء الداخليه او اثر فشرايج انتي لمن يكون الشي سطحي اامن ولا لمن شي يكون يمس الاعضاء الرئيسيه بالجسم؟!
وفي شي مهم فعلا من خلال البحث اللي سويته عرفت ان عمليات كل من "البالون,التحزيم,تصغير المعده,تغيير مسار المعده.....الخ من العمليات اللي تدخل باختصاص المعده"تبدأ معاناه الشخص فيها من بعد اجراء العمليه الى ماله نهايه يعني اخذي ترجيع+شرقه+تحرك الحزام بالتحزيم اوالتهابات او رفض الجسم للحزام او البالونه+عمليه تغيير المسار دوخه+هبوط لمن ياكلون حلويات+استخدام حبوب بشكل دائم+مراجعات دائمه ومتابعه مستمره من الطبيب +بعد الضعف ترهل+احشائج الداخليه سويتي فيهم عاهه دائمه يعني حتى غيرتي خلق الله استغفر الله.
طبعا انا حتى الشفط مستحرمته لكن انا حاليا قاعده اعاني بصراحه ففي حاجه ملحه ,طبعا للناس اللي تحتاج العمليات السابق ذكرها كحاجه ملحه واوزان ما ينفع وياها الشفط اللي اوزانهم فوق ال 100 وفوق هم ما الومهم يسوونها لانهم جذي هم عندهم ضروره لان السمنه هم ممكن تضرهم بس انا اقول اللي ما يحتاج لا يسوي يالله العافيه ..انا هذي وجهه نظري قد تقبل الخطأ او الصواب

 

[jolie_q8]

الله يقومج ان شاءالله بالسلامه وبندعيلج ..

واهم شي ترى النفسيه ... وان شاءلله تكون هالتقنيه ناجحه وتفرحين فيها

بس هاااااااااااا .. نبي التفاصيل عقب لما تقومين بالسلامة

 

[salsa]

افا عليج يا جولي اصلا انا قايله ان شاء الله بنقل التجربه كامله هالمره بخالف كل التجارب اللي قريتها لان حاسفه يشوقونا واخر شي يفرحون بالنتايج ويسكبونا لوووول لا بس صج انا احب افيد غيري وهم مستعده احط اي تفاصيل بخصوص الاجراءات او الاحساس اللي يراودني بكل المراحل فلحد يتردد باي سؤال يخص التجربه واشكر كل من دعمني بالمشاركه والدعاء عسى الله يستجيب منكم

 

[كشموووشه]

الله يحفظج ويقومج بالسلامه
متابعينج

 

[غمازتين وشامه]

يا بعد عمري يا salsa
والله قلبي معاج قاعده اقرا موضوعج وادعيلج ورا كل كلمه
الله يقومج بالسلامه ويخليج لميمتج واهلج ونشوف النتايج الباااهره
وتصيرين رشيقة المنتدى ياااااااااارب
توكلي على الله وصلي ركعتين قبل العمليه والله الموفق

 

[salsa]

مشكووووووووووووورين تسلمون وعسى دواتكم تكون مستجابه يا رب

 

[salsa]

مرحبا بكل المتابعات لموضوعي
ترى باجر عمليتي ..هالله هالله بالدعاء
اليوم قعدت الصبح وعلى طول دقيت على العياده عشان اشوف شصار على موضوع شفط لفخوذ مع باجي المناطق لان انا لمن شافني الدكتور قال سوي البطن والظهر اهم لان شكلهم مخرب وقال لفخوذ سوي ميزوو ثيربي بس انا قلتله لأ ميزو ما بي جربته مرتين عند عيادتين وما سوى شي بس عوار عالفاضي قال عيل نسويلج بعدين فيزر مع جلسات بالليزر عشان السيليوليت فانا قلت خله مره وحده مدامي متضايقه بصلاتي والله قمت ما اقعد عدل احس شي تحتي وهم فوق لركب عندي منطقه فيها دهن شحم يعني فلمن قررت دقيت عليهم وقلتلهم قولوا حق الدكتور ابي اسوي لفخوذ بعد بنفس اليوم بصراحه ما عندي استعداد اسويهم بروح واقعد بس كل يوم ادش المستشفى اسوي شي وهم بعد بيطلعلي ارخص لان بس بدفع سعر شفطهم يعني 500 وانا اصلا دافعه حق المستشفى فليش ارد اسوي بيوم ثاني وادفع حق المستشفى مرتين والبنج مره حده ليش مرتين المهم ماطول عليكم قالتلي السكرتيره اهو الحين بيي وعلى طول بسئله واردلج خبر عشان اروح ادفعلهم تدرون بعد خلاص ماكو وقت باجر الموعد الله يسهل ,طبعا ودي انقلكم شيين بايخين شوي بالموضوع اللي اهم ان الدكتور حده مشغول اهو حليو بس وقت المراجعات يعطيج المختصر المفيد لان مواعيده ورى بعض وزحمه يعني مو مثل دكاتره التغذيه اللي تقعدين ساااااااااااااااااعه تقرقين وياه وتعطلين اللي وراج لا كله مختصر فساعات احس اني طلعت وفي اشياء ما عرفت اجابتها بس انا اللي فايدني اني اسوي بحث بالنت واستفيد من تجارب غيري انا بالنسبه لي التجارب افضل لان الشخص لمن يجرب ينقلج حتى شعوره فانا من هالمنطلق قمت وقلت للسكرتيره ابي اكلم احد من اللي شفطتولهم بالفيزر بسئلهم عن تجاربهم,قالتلي اشوف اذا يوافقون ولا لأ لان بصراحه اغلب اللي سووا الشفط مسوين معاه شد فتجربتهم مختلفه عنج قصدها العمليتين مع بعض وطبعا لمن اليوم ما حصلتلي احد ممكن يكلمني تقول اللي مسوين نفس اللي انتي بتسوينه محد راضي نحاااااااااااااااااسه انا اصلا كنت بسئل عن الالام بعد العمليه بشوف تستدعي ابات بالمستشفى ليله ولا لأ فقلت ماكو الا اسئلها اهي تشوف المرضى جان تقولي اغلب الناس تنام بس ليله قلتلها يعني ما يطلعون بنفس اليوم جان تقولي اذا منطقه وحده مبله يطلعون عاد انا قلت شحقه العذاب انا الحين صاروا 3 مناطق واكيد بيكون في الم يعني لان الميزو ثربي يذبح اذا ما عطاني مسكنات احس ان جسمي بيطير من الالم فشلون الشفط؟؟ اقعد بالمستشفى تحت عينهم ابرك والليله مدفوعه مدفوعه على الاقل لي تألمت الا طقيت الجرس اييون يعطوني مسكن وصراحه انا اشكر الاخت نفنوف 85 اهي اللي كانت تجربتها دقيقه بحيث انها شرحت حتى الشعور فقدرت اتصور حجم الالم اللي ممكن احسه طبعا مع اختلاف تقنيه الشفط المستخده وهذا الرابط مال تجربتها للي يحب يستفيد: http://www.q8yat.net/showthread.php?t=180733
بنات عفيه ابي دعواتكم ووعد مني ان شاء الله اذا كنت من الاحياء اني اشرحلكم كل شي بالتفصيل واجاوب على كل الاسئله بامانه تامه..تحياتي

 

[صدى الأفراح]

حيااااااااااااتي والله الموضوع قلب جد هههههههههههههه الله يكون معك يارب وكلنا رح ندعيلك والله بيعلم شو موضوعك واقف عليه قراري انا اني اعمل نفسك بتمنالك كل خير وكان نفسي اطلب منك طلب لو بتقبلي تبعتيلي رقمك عالخاص أطمن عليكي وأزروك لأنو انتي السابقه وانا اللاحقه خلص قررت بس كل خوفي اني بدي أحمل فهذا بس اللي مأخرني قلبي معك وصدقيني رح ندعيلك بكل صلاه والله