شرايج تكونين زوجه ثانيه ؟؟؟؟

[حنان الذكريات]

السلام عليكم بنات:aha:..
عندي موضوع واايد مهم وحساس وملاحظه انه منتشر هالايام..
ظاهرة الزوجه الثانيه للرجل ....انا ملاحظه واايد بنات عوايل واايد مو متزوجات من قبل عندهم عادي انهم يتزوجون ريال متزوج ...
وتكون البنت زوجه ثانيه .. عندي شوية اسئله واتمنى تجاوبون عليها وتعطوني رايكم ...عشان نعرف راي اغلب الكويتيات بهالموضوع....
انتوا شرايكم بهالظاهره؟؟؟
وهل لو انتوا بمكان هالبنات راح توافقون على هالشي ؟؟؟
وشنو راي اهلكم بالموضوع؟؟؟
واذا كانوا مو موافقين شلون اقنعتيهم؟؟
شنو موقف الزوجة الاولى بهالموضوع؟؟
وشلون علاقتها مع الزوجه الثانيه؟؟
ومنو من البنات اللي معانا بالمنتدى او تعرفين احد هي زوجه ثانيه ؟؟
وهل مرتاحه بزواجها ولا لا؟؟
اتمنى اللي تدخل تجاوب على اسئلتي عشان نتناقش بالموضوع بكل جدية ..ومشكورين وما قصرتوا..​

​

​

​

 

[اللوحة الناقصة]

عليكم السلام هلا حبيبتي

انتوا شرايكم بهالظاهره؟؟؟

والله اهي ظاهرة موجودة من زمان بس يمكن زايده هالايام مايندرى بس سمعت ان بيي وقت عدد الرجال فيه يكون اقل من عدد النساء وبناء عليه كل ريال راح ياخذ 4 وماني متاكده من هالحجي
وهل لو انتوا بمكان هالبنات راح توافقون على هالشي ؟؟؟

شوفي انا عن نفسي راح اوافق بشرط واحد فقط وهو اذا حبيت هالشخص اما اذا متقدملي تقليدي نو واي اوافق لو اهو منو

وشنو راي اهلكم بالموضوع؟؟؟

مادري الصراحة ما صادفني للحين موقف جذي فما ادري شنو راح يكون رايهم
بس يمكن اذا شافو ان عمر بنتهم قاعد يمر وما تزوجت يمكن يوافقون ولا انها تعنس في ناس جذي تفكيرهم

واذا كانوا مو موافقين شلون اقنعتيهم؟؟

اقولهم اني احبه واهو الانسان المناسب لي واذا ما تزوجته ماني متزوجه طول عمري

شنو موقف الزوجة الاولى بهالموضوع؟؟

اكيد ماراح توافق على هالوضع وفي بعضهم يطلبون الطلاق

وشلون علاقتها مع الزوجه الثانيه؟؟

هذا عاد على حسب كل حالة يعني اذا ساكنين في نفس البيت والا كل وحده في بيت مستقل

ومنو من البنات اللي معانا بالمنتدى او تعرفين احد هي زوجه ثانيه ؟؟

اي وحده من اهلنا

وهل مرتاحه بزواجها ولا لا؟؟

تبين الصج لا ما احسها مرتاحه بزواجها واحيانا احس ان ودها تتطلق

وصدقيني بالنهاية اهو كله نصيب يعني هذه الي تصير لنا تزوجت شاب ما
سبق له الزواج وكان مركز وجذي بس انفصلت منه ونصيبها كان المتزوج سبحان الله مكتوب لها تاخذه


وثاانكس عالموضوع حبيبتي ​

 

[ضايعة بدنيتي]

رد : شرايج تكونين زوجه ثانيه ؟؟؟؟

انتوا شرايكم بهالظاهره؟؟؟

بالنسبة للزواج الثاني او المتعدد .. هذي ياقلبي مو ظاهرة هذا شرع الله من ظهر الاسلام وكافي ان افضل واطهر خلق الله عليه الصلاة والسلام كان عنده عدة زوجات
وهل لو انتوا بمكان هالبنات راح توافقون على هالشي ؟؟؟
شوفي حبيبتي يعتمد على وضع كل بنت وظروفها . يعني انا شخصيا ممكن اوافق بس بشروط ممكن تعتبر قمة في الصعوبة . واهمها اني اكون احب هالشخص عشان ارضى اتزوجه واكون له زوجة ثانية و.. ثاني شي موافقة الزوجة الأولى وعلمها .. وطبعا مع اختلاف السكن .

وشنو راي اهلكم بالموضوع؟؟؟
مرة تقدم لي واحد متزوج بس امي ردتهم بدون حتى لا ادري بالموضوع وقالت مستحيل ارضى انك تكونين زوجة ثانية !
واذا كانوا مو موافقين شلون اقنعتيهم؟؟
ربي لا يحطني بهالموقف لان حنا يالحريم عقولنا صغيره ما نفكر بالعقل مشاعرنا هي الي تحكمنا . يعني لو بتزوج واحد ثاني اكيد الزوجة الأولى بتسوي فيلم هندي وبتحرق قلبها وما تنلام طبعا .ف ما اعتقد اني بنحط بهالموقف بس ما يندرى ربي شكاتب لنا .

شنو موقف الزوجة الاولى بهالموضوع؟؟
حبيبتي ترى صدقيني ردة فعل الزوجة الآولى كله مرتبط بقوة ايمانها بربها . هذا شرع ربها هو حلله بتجي هي بتحرمه يعني ؟ ورب العالمين ما حلل شي الا لحكمة ما احنا يالعباد ما نعرفها ولا نقدر نفهمها مهما كثرت التفسيرات . يعني تلقين الي تحرق قلبها وتهدم بيتها وتلقين الي تصبر وتحتسب وربي تصير هي وضرتها مثل الخوات بس عاد هذي تمثل 1% من نسبة الحريم الي على راسهم ضرة .

وشلون علاقتها مع الزوجه الثانيه؟؟
يا انها تكون حيل طيبة علاقتهم او انها تكون منقطعة عن المشاكل .

ومنو من البنات اللي معانا بالمنتدى او تعرفين احد هي زوجه ثانيه ؟؟
عمتي كانت هي الزوجة الآولى وفوقها ضرتين مو وحدة . صابره ومحتسبة وهي اصلا حيل طيبة ولا لها ولا عليها من احد . كاهي اكثر من 20 سنة مرت عليها وما تغير شي .

وهل مرتاحه بزواجها ولا لا؟؟
ماشية الحياة معاها بس زوجها صعب ما اعتقد انها مرتاحة حيل معه .



مشكورة حبيبتي على هالاسئلة المهمة وربي يجزاك كل الخير

 

[حلوة الحلوين]

انتوا شرايكم بهالظاهره؟؟؟ عادي منتشرة
وهل لو انتوا بمكان هالبنات راح توافقون على هالشي ؟؟؟ اي
وشنو راي اهلكم بالموضوع؟؟؟ عادي
واذا كانوا مو موافقين شلون اقنعتيهم؟؟ انه نصيبي ومن حقه
شنو موقف الزوجة الاولى بهالموضوع؟؟ لازم تكون راضية
وشلون علاقتها مع الزوجه الثانيه؟؟ راح اعدها اختي
ومنو من البنات اللي معانا بالمنتدى او تعرفين احد هي زوجه ثانيه ؟؟ ما ادري
وهل مرتاحه بزواجها ولا لا؟؟ ما ادري

 

[فـــخـــر]

انتوا شرايكم بهالظاهره؟؟؟
سوري بس هذي مو ظاهره !!! هذا شرع الله يعني الله حلله

اجي حضرتي واحلل وافتي فيه غلط صح بعدين الله ماحلل شي

الا وراه حكمه

وهل لو انتوا بمكان هالبنات راح توافقون على هالشي ؟؟؟
مادري والله موقف صعب توني صغيره

وشنو راي اهلكم بالموضوع؟؟؟

انا اكبر وحده يعني مافي احد اكبر مني سبق وصارله هالموضوع

واذا كانوا مو موافقين شلون اقنعتيهم؟؟

مو البنت تقنعهم الرجال لانه اكيد في سبب مو بس جذي مني والطريق يبي

يعدد ... او انهم مقتنعين وخالصين انه هذا شي الله محلله فـ عادي

شنو موقف الزوجة الاولى بهالموضوع؟؟

مايبيلها بعد اكيد زعلانه مهما يكون الموضوع صعب

وشلون علاقتها مع الزوجه الثانيه؟؟

في اللي علاقتهم زيينه وفي العكس جني وعطبه

ومنو من البنات اللي معانا بالمنتدى او تعرفين احد هي زوجه ثانيه ؟؟

بنات شباب لا مافي بس حريم كبار اي وبنات اول غييير عن اللحين راضيه

بنصيبها بزينه وشينه حريم سنعات جويدات

وهل مرتاحه بزواجها ولا لا؟؟

مادري

شكراً

 

[iron women]

حبيبتي بجاوبج بالعموم بالنسبة للزواج الثاني الكل ايعرف ان الله حللة لاسباب معينة

طبعا انا من الناس اللي ترفض الزواج الثاني بالنسبة لنفسي وعندنا هاذا شي مرفوض بالعايلة الا بحالاة نادرة جدا

طبعا هاذاقبل بس من وعيت عالدنيا ماسمعت ان واحد تزوج على مرته بعايلتنا

طبعا هالشي يختلف من مجتمع ليي مجتمع في مجتمعات تتقبل الفكرة وفي حريم ترضى بالامر الواقع والعكس صحيح

تبقى بالنهاية المسئلة نسبية وراجعة لضروف ولحسابات معينة اما عن نفسي اتمنى ان ماكو ريال يتزوج على مرته

مهما كانت الاسباب
مشكورة حبيبتي عالموضوع

 

[مخدوشة الوريد]

انتوا شرايكم بهالظاهره؟؟؟

[color="magenta[SIZE="3"]"]* بالنسبه لي اشوفها عاتي موجوده بكل زمان ومكان ولا نقدر انسميها ظاهرهـ الان هذاا شرع اهو الي حدده
يعني يدخل بدينآآ الأسلامي ..

وهل لو انتوا بمكان هالبنات راح توافقون على هالشي ؟؟؟

* الله لايكتب لي متزوج ان شاءالله .. وانا حالياً بنت يعني ماافكر اتزوج شخص متزوج .. نهائياً
لا الحين ولا بعدين ..

وشنو راي اهلكم بالموضوع؟؟؟

* اذا على اهلي عندهم عاتي التعدد مايفرق معاهـم ..

واذا كانوا مو موافقين شلون اقنعتيهم؟؟

* ماصاار هالشي وان شاءالله مايصير ..

شنو موقف الزوجة الاولى بهالموضوع؟؟

* الله يعينها اظن اطق وتموت .. الشريجه تحر لو بالقبر

وشلون علاقتها مع الزوجه الثانيه؟؟

* الصراحه عندي يعني بجماعتناا استغرب ان الشريجات متفاهمات جنهم خواااات وربي
مووحده ولا2 اكثر من وحده وتحسهم عاتي سهالات السالفه وليتهم كل وحده بيت لا بيت وااااحد
والله استغرب مووووت انا لو مكانهم اطق واموووت

ومنو من البنات اللي معانا بالمنتدى او تعرفين احد هي زوجه ثانيه ؟؟

* مااعرف احد بالمنتدى والله بس بحياتي عدي وخربطي لووولز

وهل مرتاحه بزواجها ولا لا؟؟

* بالي اشوفه واسمعه اي اشوفهم مرتاحين وبزياده بعد ..
ومثل مايقولون البيوت اسرااار ورى البيبااان محد عالم فيها غير ربج

موضوع حلو لنقاااش تشكراات [/color][/size]

 

[Om Hayoon]

رد : شرايج تكونين زوجه ثانيه ؟؟؟؟

نتوا شرايكم بهالظاهره؟؟؟
الله سبحانه و تعالى حلل للرجل مثنى و ثلاث و رباع
ومنو انا عشان احكم بحكم من الله سنه و حلله للرجال

وهل لو انتوا بمكان هالبنات راح توافقون على هالشي ؟؟؟
اني اكون زوجة ثانية في حالة وحده ...اذا الرجال يحبني و شاريني وبس

وشنو راي اهلكم بالموضوع؟؟؟
ما ادري لاني ما انحطيت بهالموقف ...بس بشكل عام بالمناقشات العامه مايحبون اهلي هالفكرة كلش

واذا كانوا مو موافقين شلون اقنعتيهم؟؟
اكيد بيكون عشان فشل تجربتي السابقه ...و بيكون حبي للثاني هو سبب زواجي للمرة الثانية

شنو موقف الزوجة الاولى بهالموضوع؟؟
ما ادري !!!! بس اكيد المراة ما ترضى بشريكه لوشنو يكون

وشلون علاقتها مع الزوجه الثانيه؟؟
انا في تجارب عائلية موجوده و شايفتها ...في علاقه ودية عشان الزوج الطيب و العيال و ساكنين في بيت واحد او ساكنين في بيتين و كل وحده لها نصيبها مع الزوج و متعايشين مع هالوضع

ومنو من البنات اللي معانا بالمنتدى او تعرفين احد هي زوجه ثانيه ؟؟
اي اعرف وحده قريبه مني متزوجة و اهي الزوجه الثانية عسى الله يهنيها توها يايبه الياهل حق زوجها و يحبها و حطها في بيت بروحها و اهو مقتدر و منصب ما عليه قاصر في البداية عياله و زوجته من الاولى شوشورو عليه بس الريال يختج في باله الزوجه الثانية و خذاها غصب عليهم ما همه احد

وهل مرتاحه بزواجها ولا لا؟؟
ايييي ماشالله عسالله يرزقنا باللي رزقها قولو اميييييييييين

 

[غير كل الناس]

هاظاهره انتشرت بسبه العنوسه

 

[واشوقاه]

رد : شرايج تكونين زوجه ثانيه ؟؟؟؟

لاا ماا اوافق ..

لانه انا ماارضاها ع نفسي ..

 

[أم يزيد &سديم&]

برضه أنا ما أوافق أكون الزوجة الثانية

لأني ما أرضاها زوجي يتزوج علي

فمستحيل أوافق الزوجة الثانية
إلا بشرررررط
تكون الأولى فيها عيب
ومش أي عيب
إذا كانت ما تنجب يعني عقيم
بها الشرط راح أوافق

 

[ميونة الحلوة]

انتوا شرايكم بهالظاهره؟؟؟
هذا مثل ما قالو خواتي شرع الله مانجي احنا نتكلم فيه لكن مو معناته ان اي واحد يقدر يتزوج اكثر من وحده الزواج المتعدد له شروط مثل العدل

وهل لو انتوا بمكان هالبنات راح توافقون على هالشي ؟؟؟
ان شاء الله يا ربي ما انحط بالموقف هذا لكن على حسب اذا عايلتهم عادي عندهم او لأ او كبرت البنت يوافقون احسن من انها تقعد او انها مطلقه اكثر من مرة يعني على حسب الظروف

وشنو راي اهلكم بالموضوع؟؟؟
ما ادري بس اتوقع ما يوافقون

واذا كانوا مو موافقين شلون اقنعتيهم؟؟
مادري حتى لو جاني واحد مو متزوج دام اهلي ما يقتنعون انا اوافقهم الراي هم اخبر مني و يبولي الخير

شنو موقف الزوجة الاولى بهالموضوع؟؟
اكيد بتنقهر مهما كان ماودها الوحده يكون لها شريكة بس الحمد الله هذا شرع الله و ما يصير نقول اي شي كل شي فيه حكمة سبحان الله

وشلون علاقتها مع الزوجه الثانيه؟؟
على حسب بعضهم عادي علاقتهم تصير ويا بعض ودية و بعضهم على طول حريجة بينهم

ومنو من البنات اللي معانا بالمنتدى او تعرفين احد هي زوجه ثانيه ؟؟
وحده من قرايبنا

وهل مرتاحه بزواجها ولا لا؟؟
الي اعرفه انها مو مرتاحه هذا الي وصلني

 

[حنان الذكريات]

انا اشكر كل البنات اللي ردوا على موضوعي ...وفعلا هي مو ظاهرة...هذا شرع الله
وسبحان الله اكييد في حكمه من هالشي
بس هم يظل الشي هذا يحر الزوجه الاولى في اغلب الاحيان

 

[جارة القمر1]

انتوا شرايكم بهالظاهره؟؟؟

لا ثم لا ثم لا على هالظاهره

وهل لو انتوا بمكان هالبنات راح توافقون على هالشي ؟؟؟
لأ طبعا مارضى اشوف زوجي رايح حق وحده ثانية ماتحمل كلش وماصدقه لو قالي احبج اكثر منها لانه راح يقولها مثل الكلام والواحد عنده قلب واحد مو اثنين

وشنو راي اهلكم بالموضوع؟؟؟
اخيييه ليش تخرييب البيووت ماارضاها على نفسي

واذا كانوا مو موافقين شلون اقنعتيهم؟؟
---------------


شنو موقف الزوجة الاولى بهالموضوع؟؟
اخييييييييييييه وعليه علىيها بتموووووت الله لا اييبني مكانها يااااارب ياارب

وشلون علاقتها مع الزوجه الثانيه؟؟
محد له شغل بالثاني

ومنو من البنات اللي معانا بالمنتدى او تعرفين احد هي زوجه ثانيه ؟؟
مرت ابوي لووول


وهل مرتاحه بزواجها ولا لا؟؟
لأ لوووول


شكرا على الموضووع الحلووو ياحلوووو

 

[حنان الذكريات]

العفو حبيبتي جارة القمر
وانا بعد اشكرج على ابداء رايج بالموضوع

 

[مدرسة84]

انتوا شرايكم بهالظاهره؟؟؟
ظاهرة حلووووه وبعدين هذا شرع الله .وسبحانه ماشرعة الا لحكمة .
والحين الريال تحصيلهم بالقطارة طبعا الزينين منهم .
اما اشبها الرجال ياكثرهم .
وهل لو انتوا بمكان هالبنات راح توافقون على هالشي ؟؟؟
من بعد تجربتي الفاشلة ...فاشوف حاليا افضل لي اخذ متزوج
ليش متزوج وليس مطلق ...المطلق ماتدرين شنووو سالفتة وعقدة النفسية
وليش مرته الأولى اجحتته ...فعلى الاقل المتزوج تقدرين تحكمين عليه
من خلال بيته الأول هل هو مهني مرته يعني راح يهنيج.

وشنو راي اهلكم بالموضوع؟؟؟
امممم بصراحة تقدملي متزوج بس ماكان مقتدر فالرفض كان مني.
هذا يعتمد على الاهل وعلى البنت
اذا كنت البنت مطلقة فمو ناطرة موافقتهم وكل واحد حر باختيارات وحياته .
اما اذا كانت بنت فالله يعينها ....

واذا كانوا مو موافقين شلون اقنعتيهم؟؟
يبيلهم شيخ دين للبيت وهو يقنعهم....( :

شنو موقف الزوجة الاولى بهالموضوع؟؟
أنا شكو فيها ...المثل يقول روح بعيد ورد سالم.
ومايهمني احد يدري ....ولو يكون زواج سري يفضل ( :
الناس الحين مايخلون احد بحاله ليش افتح على نفسي باب.
شنو تستفيدين ناس يمج وتخرب عليج ....مافي احلا من السرية.
واللي موعاجبة ...الله يسامحه.

وشلون علاقتها مع الزوجه الثانيه؟؟
اذا الزوجة الأولى حابه تصادقني فحياهاااا الله
بس حيتين تحطيهم بحجر واحد ماينفع.

ومنو من البنات اللي معانا بالمنتدى او تعرفين احد هي زوجه ثانيه ؟؟
مادري بس عندي عماتي منهم كانوا ثانية وفي هم ثالثة( :

وهل مرتاحه بزواجها ولا لا؟؟
اذا ماخذتلج واحد مريش مابقصر معاج ...واحيانا تلقينه احسن
من اللي مومتزوج بالمرة حتى سكن مستقل مايقدر يحطلج.[/i]

 

[ماريا 2006]

انا بييبها من الاخر
اخذوها مني بنات انا عندي العنوسه ولا تتزوجين واحد متزوج مشاكل العنوسه يابنات اهون بوايد وايد من انج تعيشين مع نص ريال

 

[هدولى]

انتوا شرايكم بهالظاهره؟؟؟
هذا شرع الله .

وهل لو انتوا بمكان هالبنات راح توافقون على هالشي ؟؟؟
مستحييييييييييييييل .

وشنو راي اهلكم بالموضوع؟؟؟
أكيد ماراح يوافقووون .


واذا كانوا مو موافقين شلون اقنعتيهم؟؟
-------------------
شنو موقف الزوجة الاولى بهالموضوع؟؟
مسكينه اكيد بتموت من الحسره

وشلون علاقتها مع الزوجه الثانيه؟؟
مشاكل بمشاكل شى معروووف .

ومنو من البنات اللي معانا بالمنتدى او تعرفين احد هي زوجه ثانيه ؟؟
ما اعرف

وهل مرتاحه بزواجها ولا لا؟؟
شى طبيعى لا .

 

[كريستال ليدي]

انتوا شرايكم بهالظاهره؟؟؟

ظاهرة عادية و منتشرة وايد و راح تنتشر اكثر م الايام بسبب زيادة العنوسة

وهل لو انتوا بمكان هالبنات راح توافقون على هالشي ؟؟؟

اي اوافق

وشنو راي اهلكم بالموضوع؟؟؟

عادي

واذا كانوا مو موافقين شلون اقنعتيهم؟؟

مافي سبب يخليهم ما يوافقون هذا زواج على سنة الله و رسوله

شنو موقف الزوجة الاولى بهالموضوع؟؟

على حسب شخصيتها

وشلون علاقتها مع الزوجه الثانيه؟؟

هم على حسب شخصيتها و شخصية الزوجة الثانية

ومنو من البنات اللي معانا بالمنتدى او تعرفين احد هي زوجه ثانيه ؟؟

اي اعرف وحده بالمنتدى و اعرفها برة المنتدى بعد

وهل مرتاحه بزواجها ولا لا؟؟

الحمدلله مرتاحة

 

[Tutti-Frutti]

مو شرط يعني حلال لازم نطبقه بحذافيره
عشان ياخذونها حجه الرياييل

انا وحده ما ارضى اكون زوجه ثانيه مهما كانت ظروفي
اللي ما ارضاه على نفسي ما ارضاه على غيري

وبث بالمختصر المفيد