سالفة بنت عمتي الكويتية

[العـذوب]

السلام عليكم ورحمة الله وبركاته ..

اليوم يا بنات بكتب لكم سالفة .. من السوالف اللي استوت علي ..

سالفة بنية من الكويت تقرب لي ..

السالفة قديمة حيييييييييييل أو بدايتها اللي قديمة ..


بدت السالفة في الأربعينات من القرن الماضي .. توفى جد أبوي وعنده 4 عيال .. واحد توفى وهو صغير ، والثاني والثالث ( أبو أبوي وأبو أمي ) سكنوا فقي العين والرابع سافر الكويت يشتغل ..

اللي راح الكويت ما رجع العين مرة ثانية .. تزوج وعاش وحصل الجنسية الكويتية..
أبو أبوي جاب عيال صغار ( منهم أبوي) وتوفى .. وظلوا العيال في رعاية أخوه ( أبو أمي) ..
كبروا العيال وسافروا .. وبسبب مشكلة تاريخية في مدينة العن تم تقسيم المدينة لواحات العين وواحات البريمي .. وظل جدي أبو أمي الله يرحمه في أراضي العايلة اللي صارت من أملاكط سلطنة عمان بعد تقسيم الحدود ,, والغريب إن بيت جدي أبو أبوي صار في الجزء الاماراتي من الحدود ..



الخلاصة ..

أبوي اماراتي
جدي أبو أمي عماني
جدي اللي سافر الكويت كويتي ..

يعني صرنا مزيج ..



عيال عم أمي وأبوي اللي في الكويت ما فكروا يسألون عننا .. مع إننا كبرنا ونحن نعرف إن لنا أهل بالكويت ونعرف أسماءهم ..

لحد ما صار الغزو ..


كنا خلاص انتقلنا من العين وسكنا في أبوظي على اعتبار شغل أبوي ( هالكلام صار سنة 1984) .. أبوي ما قدر ينام أربع أيام يتصل بالسفارة الاماراتية بالكويت ويروح للسفارة الكويتية بالامارات ويسأل ويدور وأبوي الله يرحمه كان يعرف الاسماء ويعرف هم وين عايشين بالكويت .. وبعد أسبوع لقيناهم جزء بالبحرين وجزء جانا على الامارات ..


في ذيج الايام عاشوا معانا بالبيت فعرفناهم وحبيناهم .. وبالتحديد بنية من عمري أمها تستوي بنت عم أبوي .. هالبنية اتصاحبت وياها لأنها من سني كان عمري تقريبا تسع سنوات لكني اتذكرها واتذكر اللعب والمواقف وكل شيء ..

بعد التحرير .. رجعوا الكويت .. واتخيلوا ما اتصلوا فينا ولا تيلفون ,, أبوي كان يتصل فيهم لكنهم هم محد اتصل فينا ..


ومرت السنين ..وانقطعت أخبارهم مرة ثانية ..


لحد سنة 2003 ..

كنت على النت وأدور في مواقع بحث .. لقيت موقع يطلع ديوالنيات الكويت كلها بأرقام تيلفوناتها ..


على سبيل التسلية حطيت الاسم في السيرش ..

ولقيت كل المعلومات .. ركضت لأمي أخبرها ( تدرون هذيل عيال عمها ) وأمي حلفت علي نتصل فيهم ..

واتصلنا ..

يومها كلمت عمتي ( أم البنية ) .. وهي الانسانة اللي ما أقدر أنسى طيبها وأسلوبها أبدا,..

وخذت هي رقم موبايلي .. وظليت أبعث لها مسجات وأكلمها .. طبعا سألت عن البنية ( بنتها اللي كانت ربيعتي) .. وقالت لي هي بخير وطلبت رقمها فعطتني عمتي .. قمت اتصلت فيها كلمتني من ورا خاطرها واستأذنت علشان تسكر .. لكنها للأسف خلت السماعة على جنب وسمعتها تقول : ( من وين اطلعوا لنا ها الأهل بعد ... وييييع موب ناقصين فقارى يشحتون ..!) -1


تخيلوا فكرتها إني بشحت منها .. مع إني ماديا أغنى عنها وعن أهلها وخير أهلي مغطي الدنيا .. بس حز في خاطري كلامها .. وطنشت ..




بعد فترة .. اتوفى أبوي .. وكلمت عمتي ( أمها) .. وعقب جاتنا عمتي للامارات وعزتنا وهالشيء كبرها بعيني فوق ما تتخيلون ..

وعقب جم شهر واحنا بعدنا بالحداد على أبوي اتصلت عمتي وعزمتني على عرس بنتها ( البنت اياها) وقالت : عفيه خاطري الناس يشوفونكم عندي .. خاطري يحسون ان عندي أهل يوقفون وياي ..
واحنا بالحداد وأمي بالعدة لكن أمي حلفت علي نروح لعمتي .,. تخيلوا انا نفسيتي تعبانة لكني رحت رتبت أموري واشتريت فساتين للعرس واتجهزت والله مالقيت حجز وأنا مرتبة الشنط لأن زواجها كان في 14 فبراير وكان مهرجان هلا فبراير فالتذاكر بالحسرة .. وتخيلوا يوم السفر لقيت حجز قبل العرس بكم ساعة بس .. وطيران ع مطار دبي علشان نوصل الكويت لعرسها .. طبعا رحت وخذت لها هدية قيمتها 500 دينار كويتي ,, وبوكس عطور بـ 100 دينار من باريس غاليري .. المهم شيء مرتب .. طبعا هدية عمتي كنت مجهزتنها من قبل وهدايا تحسبية لأي حد ممكن اتلاقى وياه ..


لما وصلنا الكويت جات عمتي للمطار وخذتنا على البيت عندها ..
تخيلوا مالقينا بنت عمتي .. لأنها رايحة تبات عند ربيعاتها علشان من الصبح تروح الصالون -2
واحنا طنشنا ..
يوم العرس شفناها .. ولما جينا نسلم عليها تحاشتنا وتجاهلتنا .. -3


وحدة من ربيعاتها جات عندنا تسألنا انتو منو ؟ قلنا لها نحن بنات عم العروس من الامارات .. قالت : عيل ليش لما سألت العروس عنكم قالت ما أدري منو ها الهيلق ..!!! -4


تخيلوا .. تقول عني وعن خواتي هيلق واهي ما تسوى فلس لولا امها ..

تخيلوا من القحط والموت ع الفلس ما رضت تسوي كوشة وأنا وعمتي رحنا وخذنا كنبة من البيت ووديناها القاعة وحطينا وراها قماش على شكل انه نازل من السقف ورحنا جبنا باقات ورد كبيرة وحطيناها مثل الكوشة مع إن زوجها معطيها فلوس بس قالت ليش الخساير؟؟!!




المهم .. ثاني يوم بعد العرس .. قعدنا نسولف أنا وأمها وخواتي جان أقول لأمها : تدرين عمة انتي فيج شبه من بنت عمي لكن بنتج وااااايد تشبهها .. جنها نسخة ..
وأنا كنت ماخذة وياي صور الأهل علشان أراويها عمتي فرحت وجبت صورة بنت عمي جان تقول والله كأنها فلانة بالضبط تقصد بنتها ..


بعد كم يوم جات البنت وقالت لها عمتي .. شفت صورة بنت ولد عمي فلان تشبهج يا فلانة نسخة منج ..

جان تقول : خسي .. ما ناقص الا هالاشكال -5

مع إن بنت عمي هذي مذيعة في التلفزيون ماشاء الله عليها وعلى جمالها ,,
المهم ..


قعدنا عشر أيام .. كنا نطلع مع عمتي وهي ما فكرت تتعشى عنها في البيت مرة .. ولما اتتي البيت تفصخ جوتيها على الكنبة وتفره قدامنا .. هذا غير انها سفور ونحن محجبات وكانت تقول شدعوه تلبسون عبي انتو بالكويت يبا ..!
شو يعني إذا بالكويت ما نلبس عبي...!!!!


وجا يوم قالت أختي الصغيرة خاطري أروح الترفيهية ..قام عمتي قالت بخلي فلانة ( بنتها) توديكم ..
ثاني يوم شرينا التذاكر من الجمعية جان تقول عمتي .. والله فلانة مشغولة اعذروها بخلي فلان يوديكم ( تقصد ولدها ) فأنا اعتذرت وقلت لها : آسفة عمتي نحن نستحي من ولدج ..

المهم في الآخر قالتلي خلاص بخلي بنت صاحبتي توديكم ..


ولما جات بنت ربيعة عمتي .. شفت الويه الثاني من بنات الكويت .. قمة الطيبة والذوق والاحترام .. والله كنت أبا أغير الحجز وأرجع قبل موعد العودة بأربع أيام من كثر مللي من تصرؤفات بنت عمتي ,. لكن هالبنية خلتني أحب القعدة في الكويت ..
سولفنا وضحكنا وطلعنا .. تمشينا الكويت كلها وياها .. وحسيت إن الكويت تستاهل الانسان يقعد فيها .. استانست من خاطري وكسبتها ربيعتي ..

وبنت عمتي ما شفتها مع إني قلت أمها نبا نسلم عليها قبل العودة وطنشتنا ...



ورجعنا الإمارات واستمرت علاقتي بالبنية .. وصرنا ربيعات من الخاطر وبعدها هي جات على دبي علشاني ورحت لها دبي وقضينا يومين مع بعض ..

والسنة الماضية رحت للكويت مرة ثانية علشانها وهالمرة أمي وياي ... حجزت في فندق بس عمتي ما رضت وقعدنا في بيت عمتي .. وظلت بنت على حالها ما تغير فيها شيء .. وعزمونا عيال عم أمي كل واحد في بيته لأن أمي أول مرة تروح الكويت بس بنت عمتي ما يات مع إن عمتي تحلف إن صار لها سنين ما دخلت بيوت اخوانها .. لكن بنت عمتي طنشتنا كالعادة وطنشت اننا يايين نزور أهلها ..


ولما كنا بنروح جابت هدايا لي ولختي الصغيرة .. والله أشياء استحي أهديها شغالتي .. كلها قوم بو 100 فلس .. سوالف ما يرضون فيها اليهال وأنا كنت ماخذة لها هدية وأنا رايحة لكن طبعا موب مثل هدية المرة الأولى ..


المهم الحين بنت ربيعة عمتي تتصل فيني وأسولف وياها وبنت عمتي ما أعرف عنها شيء .. شايفة نفسها وتعتقد إنها فوق الناس ... ليش يعني هالتكبر .. إذا نحنا أهلها بتتكبر علينا كيف بالناس الباجين ..


والله أحس ان هالشيء عيب .. الواحد يستحي يقول عندي حد من هلي هذي تصرفاته .. بس الصفة هذي منتشرة بين الناس .. ليش ..

تعتقد إننا ننتظر منها شفقة .. ليش لأن أبونا متوفي ..! وخير يا طير أبونا يوم توفى ما تركنا نشحت بعده لا والله كل واحد مننا يسد عين الشمس من هيبته وأسلوبه وخيره ..

ليش يعني .. نحن مودين لها هدايا هي من الفقر لابسة الهدية يوم عرسها اللي هي الساعة .. مع إن الساعة موب لفستان عرس لكن هي شافتها ماركة ..

وأنا دخلت غرفتها عمتي راوتني البيت كله مافيه بغرفتها إلا مكياج نيفيا وماكس فاكتور .. يعني بنت فقر حيل .. وعلى شو خقاقة ما أدري ..!



انتو شو رايكم ؟؟؟

 

[رقي]

عيزانه اقرا
شكرا لج

 

[روزالكويت]

قريت اللي كتبتيه العذوب والله مادري شقول يعنى الاخلاق نعمه من رب العالمين والناس سواسيه جدام رب العالمين الله يعين بنت عمتج على نفسها والحمدالله ان بنت رفيجة عمتج عكست صوره سنعه عن بنات الكويت جدامج بالعكس ترى اصابعج مو سوا انا اتمنى لي بنات عم ولا خال يحبونى ويواصلونى مثلج متعنيه من الامارات عشان تحظرين وتشاركينهم افراحهم يابختهم فيج انا بنات عمى وخالى بالديره محد له خلق الثانى القطاعه والحسد منتشر بشكل موطبيعي..
عموما ولا يهمج اذا اشتقتى للكويت تعالي وانا بظيفج عندى و بمشيج وبراويج اماكن حلوه حيل بالكويت واعتبرينى بدال بنت عمتج النفسيه .
بالنسبه للفقر والغنى انا اشوف ان الغنى غنى النفس موكلام امثال لا والله فعلا في ناس شبعانين بس من داخل عينهم شرهه وفارغين ومايترس عينهم شى بالعربي
وناس على قد حالهم ومتواضعين وتحبين تقعدين معاهم ماتملين منهم ومن طيبتهم وصفاء نيتهم
يالله كريم احنا بشر وتمر علينا ظروف والانسان لازم يضبط نفسه ويعرف يكون مجامل ومبتسم وديبلوماسي لان التكشيره وتعقيد الحاجب ماتجيب الا الغم ونفور الناس والابتسامه تشرح الصدر<<<<< مو كنى مصختها وطولتها ترى دايخه حدى راده من الدوام وحطيت الحره فيج هههههههههههههههه

 

[الفيحاء]

سالفتج طويله حيل بس عادي قريتها للاخر
حبيبتي هذا طبع البشر يتغيرون بين يوم وليله
وكل أنسان له أسلوبه وطريقته في التعامل ,انا أشوف تصرفها عادي لانها من
البدايه ماكانت تبيكم فاخلاص ليش تعبتوا عماركم

 

[حلاوه الإيمان]

والله الناس أجناس وبكل مكان نلقى نفس هالفئه ,,

لكن انتي نا عرفت شنو غرضج من الموضوع ؟؟

 

[[ . . Jee Jee . . ]]

حبيبتي العذوب

آنا والله العظيم احمد ربي انج شفتي بنت رفيجة عمتج قبل لا تردين الامارات

اشوة انج عرفتي هالانسانه قبل لا تاخذين فكرة .


حبيبتي آنا اعرفج واقرا ردودج .. وادري فيج اصيلة وبنت ناس

هاذا " اذا سمحتي لي اقول " بنيه جليلة حيا وما تستحي الله يهديها

في بنات جذي شكثر استغفر الله .. الغرور ولتكبر مادري شعليه

بس ترى هي مو علشان الوالد متوفي الله يرحمه

ولا علشان شي فيكم والله .


هاذي شخصيتها والله يعينها على نفسها .. انتي ماعليج

وصلي عمتج ولا تكلمين هاذي .. اذا ماتبين تقطعين رحمج .

بلغي امها توصلها السلام وكفاية ..



بس لا تعورين قلبج والله كل واحد يسوي بأصله ..


وانتي سويتي بأصلج .. وهي سوت بأصلها ...



كفايه الاجر اللي خذيتيه من وصلج لأقاربج بعز حزنكم على الوالد رحمة الله عليه ..

وكفايه هداياج لها ترى تاخذين فيها اجر بإذن الله ..

كفايه وقفتج معاها بعرسها .. وكفايه الناس شافتكم اهل خير وواجب ..

سوي خير وقطيه بحر ..

وبنت عمتج هاذي خليها على صوب
لحد ما الله يهديها وتعرف انه الناس كلها سواسية
ومافي اي شي يخليها تتكبر وتنغر
انا اتوقع انها محترة منج..

والدليل انها تقول عنكم هالكلام واهي تعرف قدرها شنو
وانتي كسرتي عينها بهديتج ..

عشان جذي محترة مسكينة !


بيصيرلها موقف بيعلمها شلون تعتز بأهلها .. بيعلمها شلون غرورها مايفيدها وبينحط ويها بالتراب وعقبها بتحرم تنغر وبتصير معاج انسانه ثانية بس عطيها وقت .. الدنيا جذي تسوي باللي مثلها والله ..

تعوذي من ابليس انسي كل شي عنها

وذكري شلون انتي تعاملتي معاها بذوق وبس ..​

 

[LaSt WoMeN]

بصراحة ما عندها سالفة و عيييب اللي سوته .. و المفروض امها تعلمها و تأدبها ..

انا وايد مستغربة من هالبنت و سوء تصرفها معاكم و هالحجي الجايد اللي تقوله ؟!!

صج عيب !! الله يهديها ..​

 

[زيـنـه]

عيزانه اقرا
شكرا لج

عيل ليش داشه و حاطه رد ؟

اختي صاحبة المشكله ..
انا من رايي هذه اخلاق البنت و اطباعها و ممكن من غيرتها منكم .. انتوا طلعتوا بالزينه ومتواصلين معاهم و اجر صلة الرحم من رب العالمين .. خلي علاقتج بالام و ما عليكم من البنت الحمدلله انتوا ما اخذتوا منهم شي و لا يبون منكم شي ..
و على بنت ربيعه عمتج .. خلي علاقتج معاها زينه .. و تستاهل تعاملينها بالمثل .

و الله يهدي هالبنت المايقه و يكسر تكبرها عليكم .

 

[LaSt WoMeN]

بنات لو سمحتوا لا تشككون بنوايا العذوب .. ​

البنت محترة من تصرف بنت عمها و لا اظن بتاتا ان قصدها شين .. ​

و كافي انها ذكرت رفيجة بنت عمتها الكويتية بالطيب يعني قصدها مو شين .. ​

و اهل الامارات ما عندهم تربط عصاعص و ماكو اطيب منهم ..​

و بعدين لو تلاحظون ردودها على المواضيع اللي قبل يبين اشكثر اهي ذكية و طيبة ما شاء الله عليها ..​

و تذكروا :
" ان بعض الظن إثم "​

------------
العذوب
اضم دعوتي الى دعوة روز اذا ييتي الكويت ان شاء الله عطينا خبر نقوم بالواجب معاكم

" من صجي ترى "
:eh_s(17): :eh_s(17):
​

 

[منورة الكويتية]

بسم الله الرحمن الرحيم
اول شيئ حبيت اقولج اني وايد وايد وايد احب واعز الاماراتييات ماادري احسهم سنعين وذوق
ثاني شيئ بنت عمتج هذي وحده ماتستاهل تضيعين وقتج بالتفكير فيها .. وسلوكها مايعبر الا عن الخلل الي بنفسيتها..الله يشافيها ..والحمدلله انج تعرفتي على بنية ثانية وعرفتي ان مو كل الكويتيات مثل بنت عمتج وان شاء الله انها حببتج بالكويت وزيارتها واهلها.. ولاا يهمج ولاا تحطينها ببالج بنت عمتج .. سوي الواجب وسألي عن عمتج وبس اما هذي طنشيها لانها مو كفو بصراحة ولاا تستاهل الي سويتولها.. حياج الله بين خواتج الكويتيات الي اتمنى ان نحببج فيهم اكثر واكثر

 

[منورة الكويتية]

عيزانه اقرا
شكرا لج

اي والله شحقه متعبه عمرج وداشه :eh_s(13):

 

[أسيرة موني]

واي العذووووووب عاد حددددددددي استانس عليج

ما شاء الله عسى الله يحفظج ويثبتج

فديتج ,,

لاتعورين قلبج بهالنوعيه من الناس

عندي بنت عمي جذي

من زمان ماشفتها وكنت اسمع انها شايفه نفسها مع انها مافيها شي زايد عن الناس ,,

فيوم العيد كلهم يو سلمو علي وانا رحت اسلم عليهم

إلا اهي صدت

عاد بالطقاااااااااااااااااااااااااااااااااااااااااااق ,, انا نوعي الي يصد اصد

يا نحدد اسبابنا و نكون صريحين ويا بعض

ولا سوري ماعرفكم ,,

بس و مريحه عمري

يوم صارت حزت الغدا ,, جان تقولي

اهو فلانااا ؟؟؟

قلت هلا بكل برود و تجاهل

بس وطاف

لاتعورين قلبج على ناس ما تقدرج

طاف طاف

 

[الكويتـ80ـية]

السلام عليكم و رحمة الله و بركاته

حبيبتي العذوووب ...
انتي والله الواصله و الأصيله بأخلاقك و لا تتحسفين على معرفة أخلاقها الحقيقيه .. سبحان الله يمكن خيره انك عرفتي شخصيتها و الله و الحمدلله على كل حال .. و رب العالمين ما ينسى عبيده .. عوضك عنها وحده برقبتها .. الله يهديها عشان عمرها ..
أنت ما قصرتي و عملت بأصلك و هي الله يسامحها ... أشتري راحتك و واصلي صلة الرحم مع عمتك و سلام عليكم و السلام مع البنت هذي .. بس لوجه رب العالمين .. و صدقيني راح يجي اليوووم اللي تستحي على نفسها و اللي حواليها بينقدوون عليها

عسى الله يوفقج يارب و نبيج دوووم بين خواتج الكويتيات ( خليجنا واحد)
و اضم صوتي لصوت زميلاتي و اكيد حياج الله بالديره ... احنا اللي ضيوف عندج و هذا بيتج و مكانج يالغاليه ...

أختك كويتية

 

[@ الرسامة @]

ترى احنا الكويتيين غير
وهذي طلعت جليلة تربية وما اعرفت اشلون تحترم اهلها وتحترمكم
حبيبتي طنشيها تراها ما تسوى وانتي اكبر من تصرفاتها

 

[الاسطورة]

والله يالعذوووووووووب
ان بنات الامارات ينحطون على الجرح يبرى
والنعم فيج يا بنت الاصل
وبعدين هذي وحده معقده الحمدلله والشكر
اعتقد انها تعرف مواخيذكم وتعرف انتو شنو وشنو مركزكم فالظاهر تصرفاتها نابعه عن غيره عميه
ويا بعد قلبي كلنا ربعاتج اهني بالمنتدى
والله يسمح امرج يالغاليه

 

[شاهة]

عذوب اعرضة سالفتها فشة خلق (علي قولة اللبنانيين ) ما اتوقع تقصد شي
اما بنت عمها فهاذي الله يعينها علي روحها حدها متعقدة ومبين محترة منكم عذوب مو قادرة تصدق ان في ناس احسن منها .
البر يا عذوب من ان احنا نواصل الي واصلنا البر ان نواصل الي قطعنا ادري صعبة بس تذكري الاجر والثواب من الله والله يهدي الجميع

 

[حبيبته آنا]

ماعليج منها يالعذوب اهي مو كفو عادي اخذي المسأله وكأنها مو موجوده الاهم منها عمتج والحمدلله انها خوش مره وهذا يكفي

 

[Harmony]

حبيبتي فيه ناس جذي لا تاخذيين بخاطرج و تري اذا هى ما عندها ماركات مو معناته انها نت فقر لأن من اللى قريته امها كريمة و هذا معناته عينهم متروسة بس من طريقة البنت باين انها بخيلة علشان جذي ما عندها ماركات مو من الفقر اختى و الدليل ان كان عندها فلوس للكوشة بس ما سوت قالت ما تبي مخاسير عموما الله يهديها بس تري الزين و الشين موجود بكا بيت و كل عايلة و عسى الله يهدي الجميع
انت لا تحطيين فى بالج و خاطرج و على قولة المثل من باعنى بفلس بعته بتراب انتى كفى نفسج عنها و خلج مع اللى شارينج و ياهلى فيج بالكويت باي وقت اهل الامارات اهلنا و حبايبنا و كلنا لج خوات و لا يحز بخاطرج شيء حبيبتي

 

[$الـــحـــلاوه$]

الله يعينج عليها بصراحه

واجد بنات جذي مادري على شنو نفسهم

الله يهديها ان شاء الله

 

[^ليلاس^]

قريبتج هذي ما تنعطى ويه الله يهديها وانتي تحاشيها اذا شفتيها ولا تهمج :eh_s(17):