زميلة زوجي

[زوجة عزيز]

السلام عليكم بنات مشكلتي اللي تاعبتني ومخليتني اكره دوام زوجي اهو زميلته وانا اسمع هالشي بأذني ومحد قالي اول ماتوصل الدوام تسال الموظفين عنه اهو بالذات واتعمد انها تسولف معاه واهو مومعبرها وكل مره اتييب ريوق واهو بالذات اللي تقوله تعال تريق معاي واليوم سمعتها تغصبه واهو يقولها لا مابي تريقت في البيت وطلع من الشغل انا اتصلت فيه وقلت له باشتكي عليها قال كيفج اشتكي والله حدي مقهوره منها مع انها عمرها بنهاية الاربعين ومتزوجه واعيالها كبار بس قاهرتني موعارفه شااسوي لها !!!

 

[شادن33]

الزين ان ريلج معطيها طاااف خلاص ليش تخافين

 

[شادن33]

مسائل الزميلات في الشغل احسها ماتنحل الا ابيد الريال اهو يقدر يوقفها عند حدها ولا يتمادى معاها

يعني شنو بتسوين مابتخلينه يداوم ويقطع رزقه!!!!

خليه يوقفها عند حدها وماراح تتمادى المره

 

[فرزاشيهـ]

اخذي رقمها او روحي كلميها شنو تبي بالضبط !! دام بالاربعينات و معيله

 

[sh_mashael]

دام مو راد عليها ريلج

خلاص و لا تهتمين

 

[noor salam]

حبيبتي لازم زوجك يضع لها حد لانها راح تتمادى
وبعدين انتي مو بنفس العمل او الدوام علشان تشتكين عليها مو حلوة بزوجك ولانها في هالحالة ممكن تتقرب لزوجك و تتحجج باي عذر

الحل بايد زوجك.....​

 

[Gatwa DaloO3a]

يمكن مو قصدها شي لا تظلمينها ، يمكن هي طيبه بزياده و يمكن تحس ان زوجك اخ لها ، بما ان زوجك كبير بالعمر حسب مواضيعك السابقه

 

[الأميرة جوري]

مادام معطيها طاف عادي

 

[M!SS.LOBY]

خلاص لا تحاتين ريلج عطاها طاف لا تقهرين عمرج

مشاءالله ريلج ثقة .

 

[زوجة عزيز]

فديتكم ماقصرتوا اهو مومعبرها بس اهي من نبرة صوتها حسيتها تبي تتقرب له صوتها قاعده اتغير صوتها واتسويه ناعم قهرتني واتعرفون بعد كثر الدق يفج اللحام واليوم يوم قلت له قال والله مالي اي شغل فيها انتي اذا شفتي علي شي حاسبيني

 

[بلسم جروح]

يمكن نظرتها له ما تتعدى الاخوة

ليش الظلم ؟

يمكن تناديه بدافع الزمالة والمكان الواحد

 

[miss.unique]

يبا قلتيها المرة اكبر منه بمادري شكثر و فوق هذا معيلة .. خل زوجج مايعطيها ويه و خلاص لا تكبرين الموضوع ياعمري

 

[اميره1980]

يمكن المره نيتها صافية مو قصدها شي و معتبرته زميل و يمكن يكون اصغر منها بوايد و بحسبه اخوها الصغير
اذا ريلج مو مهتم فيها و لا حاطها في باله لا تلحين عليه بسوالفها عشان السالفة لا تصير صج و يفكر فيها

 

[توتة UAE]

يعني انتي تشتغلين ف نفس المكان عشان جي تسمعينها؟
ودام ريلج بين لج انه مب مهتم فيها لا تكبرين السالفة عشان
ريلج ما يحط ف باله شي أعرف قهر بس شو ترومين تسوين
أكثر عن اللي سويتيه؟
دام انج شاكة فيها خليها تشوفج يعني تعرف زوجته موجودة
ما أقدر أتقرب من الريال

 

[مييريآ]

والله ما في شي يسوونه البنات بالدوام بنيه بريئة

وعادي ولو عمرها 50 ينخاف منها

عندنا بالدوام كان في وحدة مصرية وعندها 5 اولاد وتمت تلاحق واحد وهو متدين وايد ويخاف ربه

وقدرت عليه ، مع انه عزابي واصغر منها واحلى منها بوايد ، وتركت ريلها وعيالها وتطلقت

والله اكثر شي ينخاف منهم زمايل الشغل ، اليوم خطيبي يكلمني عن وحدة جت تشتغل معاهم وهو راح يدربها

والله انقهرت اني مش معاه بالدوام ههههههههه ، ما ارتحت كلش ، كفايه السكرتاريه اعرفهم واعرف حركاتهم لاني كنت بنفس الدوام

صج انه يحبني وما راح يطالعها بس تضايقت وايد ما ادري ليش ، كله اتذكر سالفه المصرية وشلون قدرت تلعب على واحد

يعني تخيلي كان مطوع ويجي يتكلم ويطالع تحت وما يتكلم مع اي بنت الا للضرورة وبعمره ما جات عيني بعينه من ادبه واحترامه

والحين يطلع بعد الدوام معاها وهي تاركه ريلها وعيالها ، صج محد له امان ،

بس انتي لاتحاولين تبينين لريلج انج مهتمة وايد او تغارين ، دلعيه وونسيه ولا تنكدين عليه ولاتجيبين طاريها

ترا الريال بيصير ينتبه لها ول تصرفاتها اكثر لو تميتي تتكلمين عنها ، ولو نكدتي عليه انج ما تحبين تصرفاتها ما تدرين يمكن بكرا يروح لها

ويكلمها ويشتكيلها معتبرها مثل اخته ، وهي بتضحك عليه وبتسوي نفسها الحنونه ، والريال ما يهمه شي غير راحة باله والوحدة الحنونه الي تراعيه وتسمعله

 

[zozo.7ob]

انا من رايي يمكن تسوي جذي عشان ريلج يذكرها بابنهاشيء جذي او يمكن معجبة فيه
خلي ريلج يوقفها عن حدها و لو ما تعرفت انج زوجته قوليلها خل تحترم نفسها شوي
و الزميلات الي بالدوام ينخاف منهم حيل ما تدرين شنو يمكن يصير روحي بلغي عنها سوي اي شيء يوقفها عن حدها

 

[بدوني تتضايقون]

مرحبا بالجميع لانها مشاركتي الاولى

برايي انج اذا يبتي طاريها جدام ريلج بتلفتين انتباهه زياده وبكل حركه بيلاحظها وبنفس الوقت دوم تمسخري عليها وقولي استغفر الله العظيم طلعي الشين اللي فيها كله جدام ريلج لكن بفرفشه وضحك على انها مو هامتج لكن متى اذا كنتي متكشخه ومغيره من شكلج على انها يأت على بالج لما جفتي برنامج او مسلسل

 

[معزوفة عشق&]

احلى ششي ف الموضوع انو زوجك مو معطيها وجه الحمد لله ,,
ودامها كبيره انا مع البنات اللي يقولو كلميها بالطيب وبالحسنى ,, واحسني النيه فعلى نياتكم ترزقون ان شاء الله تتفهم عليك وتكون بنت حلال
والاهم من هذا كله انتي كل يوم الصباح استودعي الله زوجك والحافظ الله ,,

 

[%دانة%]

الله يحميكم من كل شر

 

[يتيمة جابر العز]

بناااات بلا مثالية زايده


البنت تقولكم تنعم صوتها وتدلع وكل هذا بحسن نية !!!


أختي أصحي من غفلة البنات محد بينفعج اذا فرت راس رجلج تالي العمر وطلقتج منه وخذا البيت !!!


انتي ما تسمعين عن بلاوي الحريم !! حتى لو زوجج كبير بالعمر ولو هذا ما يعني ان زوجج نزيه وماعنده خرابيط


يمكن اليوم ماعطاها وجه ولا لقى بال لها باجر بتجذب انتباهه وتأخذه منج


أختي دام زوجج سلمج العصمه وقالج تصرفي معاها معناته انتي تدقين عليها وتهددينها اذا ما ضبطت نفسها قوليلها أدق على عيالج واعلمهم الصج دام ما وراج والي


نصيحتي الحين هدامات البيوت على قفى من يشيل !! والحياة سهله عندهن


بنت عمج الي هي قريبتح ماتثقين !! شلون وحده مع زوجج بالدوااااام



وانتي ابخص بحياتج