رودي للاستشارات الهندسية

[sara3]

مساء الخير يا رودى ,مشكورة يا الغالية

سوال انتى واصلة وين في بيتك؟ارجو ان ما يعتبر تطفل منى

ماقلتى لى اشرايك فى اخر صورة؟

 

[rudy]

بالنسبة لأخر صورة مادري مو متخيله انها تصير حلوه بس ليش لا انا احب الأشياء الغريبة وما احب اصر على راي معين جربي وعطينا رايك بس لو راد الختيار لي ما احطه والناس اذواق

بالنسبة لبيتي انطر الألمنيوم يركب لأن وراه سلسلة من الأعمال مثل الصبغ والنجارة وصبغ البيبان والمطابخ و............. الخ

 

[sara3]

صباح الخير

ما ادرى يا رودى ابى شى غريب للصالات ,تدرين وين شايفتة ,روحى البنك الوطنى اللى يم سينما السالمية شكلة طالع حلو,بس ابو العيال يقول يعنى فحيرنى

انا احب اشوف شى على الطبيعه ساعات الصور ما تقتنعين فيها

انا معاك بنفس المراحل بس مانى عارفة منهو قبل شنهو بعد يا ريت اتنورينا

الشبابيك عندى حيل كبار سويناهم عند الوليد المنيوم قطاع خاص رقم 2 ,اللون ما استقرينا لمن انشوف لون السيجما,الحمامات والسيراميك من عند بسامكو .

لمن الحين الجبس بعد البيبان بعد ,اللى اعرفة ان الكهربائى مدد والصحى بعد

يا ريت اتقولين لى شنو الاول شنو تالى,المركزى امتة

ربى يتمم عليك فى بيتك ويخلص على خير يا الغالية

اي صج فى ردك قلتى المطابخ بعد امتى اى دور المطبخ لمن انخلص ولا اثناء البنيان يقولون يطول اذا تفصال.

اخوى شاف مصمم مطابخ وبيتة عظم سوالة تصميم ونصحة باماكن الكهرباء والجزيرة وهالسوالف اشرايك انتى

 

[الكيكة]

والله الله يعينكم بنات و يوفقكم و يسهل الامور عليكم

 

[rudy]

الله يسلمك كيكه

وهلا فيك سارة بالنسبة للمطبخ لازم تسوين مخطط المطبخ قبل تمديدات الصحي والكهرباء عشان ما تكسرين عقب.
يعني حطي في بالك وين المغسلة والثلاجه والشوله.... وخلي ورا كل جهاز بلاك الكهرباء واذا في بالك تلفزيون بالمطبخ تخيلي وين مكانه عشان واير الستلايت واذا تبين جزيرة وفيها مغسلة لازم تمددين لها من تحتها واذا الشوله غاز مدي لها بايب الغاز من برا المطبخ وخلي سلندر الغاز بره بالبيت افضل واسهل للتبديل.

والمطبخ يركب بعد ما يخفون العمال من البيت احسن عشان ما يخربونه او يكفخونه بسلم ولا اله حاده.... بعد عمال ما يندرى عنهم.

ومن الحين اشتري اضائة البيت لأن انا لما رحت اشتري الاضائة قال لي البائع ان الهلجن لازم بين كل لمبه ولمبه اعتقد 120 سم اما السبوت 150 وهذي المعلومه ما كنت اعرفها احنا لما خلصنا الديكور وعملنا الفتحات رحنا نشتري الإضاءة وهذا غلط.

وفي ملاحظه بعد بالنسبة للأبواب لاتحطين البتات ( قطعة الحديدة الذهبية الي تمسك الباب بالطوفه اي الشرشوب) الحين لن الصباغ راح يلزقهم بلزاق وقت ما يصبغ وراح يكون شكلهم بعدين بشع النجار نصحنا ان نحط بته رخيصة الثمن ونصبغ اللأبواب وبعدين نركب الذهبيات يصير شكل الباب احلي ونظيف.

 

[الكيكة]

رودي عندي سؤالين

الاول:
مدخل صالة الاستقال ابيتي اول ما تدشين تلقين بالوي بس بعيد شوي يعني في مسافه و ستيب ( سلمة وحده ) تلقين كونسول فخم مع منظرته المدوره اوكي؟

و على ايدج اليمين يمج مو بعيد حطيت كرسين و بينهم طاوله مدوره

سؤالي شنو اعلق فوق هالكرسيين؟ ماني حاطه منظره لان قلت لج الكونسول اللي بالوي فيه منظره .

و انا اوريدي حاطه لوحه ايطارها مذهب فخم بالصاله فوق القنفات

ابي اعلق شي مميز حيل فوق هالكرسيين اللي بالمدخل ... شنو ممكن احط؟ انا اوريدي حاطه بظهر هالكرسيين وول بيبر ساده لونه يشابه القمردين

السؤال الثاني

بالممر بين الصالات و بالتحديد جدام الاصنصير حطيت كونسول انتيك و علقت يمينه و يساره تباستري مثل بعض توأم ( علشان وحده منهم تغطي بوكس الكهربا اللي بابه حديد) .. بس المساحه اللي بينهم تقريبا متر فاضيه ( المساحه اللي فوق الكونسول بالضبط ) ؟ احط فازا كبيره فيها بوكيه ورد كبير يغطي هالطوفه؟ ولا اعلق منظره ؟ و لا اخليها جذي؟ ..

لاحظي ان بالمدخل فيه كونسول و منظرته المدوره ( اللي كانوا بسؤالي الاول ) .. فخايفه اكرر فكره الكونسول بنفس المكان
انتي شرايج؟

 

[فينيسيا72]

اشدعوه يا رودي ليش ما رديتي على موضوعي على الصالة وغرفة النوم الي ابي اسويهم مودرن

 

[sara3]

مشكورة رودى ربى ما يحرمنا من افكارك واقتراحاتك

نصيحة حطى تانكى حق الماى الصليبى بالحوش ولا دفنية بالحديقة حق الزرع وهالسوالف ترى الماى الحلو مصرف.

الكيكة مشكورة على الدعوة ما شااللة من مشاركاتك حاسة ان كلك ذوق.اللة يتمم عليك واتاثثين بيتك على خير.

 

[sara3]

رودى بالنسبة للاضاءة ما فهمت عليكلك على شوى في الكهباء انا اسمع اضاءة صفرا واضاءة بيضة ولمن الحين مانى عارفة مكان كل وحدوة وين ؟
البيضة حق القراءة صح جذى .طيب المسافات ليش ووين احط الهلوجين احط السبوت
السرداب شحطلة والصالات شنو

لا وبعد فى سبوت متحرك وفى ثابت,وفى زرار يزيد الاضاءة وفى يقللها

يا ريت اتفيدينا يا رودى

 

[rudy]

اولا نرد على الكيكه

شوفي في لوحة كوكتيل ( انا اسميها كوكتيل)

وهي عبارة عن لوحة اطارها مذهب وفخمه في وسطها مرايه وحواليها اربع رسمات صغيرة
حوالين المنظرة
هذي تصلح حق المكانين سواء مقابل المصعد او فوق الكرسيين.

وعندك بعد فكرة الشمعدان المعلق بالطوفة يصير شكله مثل الأبليكات
بس بدون لمبات ويزين بالشموع والكرستال وهم هذي فكرة حلوه

واذا عندك صحون انتيك سراميك نلقاهم في كل ديرة نسافر لها صفيهم على شكل قوس ايضا شكلهم راقي
من زمان شفت عند بومبي خزانة صغيرة يمكن 40 في40 سم خلفيتها مراية وبابها زجاج وايطارها برواز مذهب تقدرين تحطينها بالمدخل وتحطين فيها عطور وطيب


وسلامتك هذا كل الي في بالي الحين

 

[rudy]

بالضبط انا بيتي دورين وربع وسرداب الربع دور هذا الي اتكلم عنه عباره عن شقه صغييرة صالة كبيره مفتوحة على غرفة نوم مع حمام ودي اسويها نظام مودرن لان بيتي كله كلاسيك ادري طولت عليج عذريني ابي الوان شرحه

شوي وراجعه

 

[rudy]

 

[rudy]

ها فينيسيا عسى يازلك الرد

 

[الكيكة]

العفو ساره انتي الذوق كله .

مشكوره رودي
انا حاطه الشمعدانات المعلقه اللي مثل الشعله بمدخل الاصنصير على يمينه و يساره

فكرة اللوحه الكوكتيل حلوه وين يبيعونها ؟؟؟؟.. يمكن احطها بجناحي عندي طوفه بالوي عليها وول بيبر راقي .. يمكن تصلح لها

بس الخزانه اللي 40 في 40 مو شايفتها بس من كلامج متخيله شكلها جنها صيدليه

ماعندي صحون صين انتيك .. انا لما كنت اسافر ماكنت افكر ابهالسوالف لان ماكان عندي بيت كنت بس اكود ملابس لي و لعيالي . و هالسنه ماسافرت علشان تأثيث البيت.
يمكن السنه اليايه اذا الله احيانا و سافرنا بالصيف القط لبيتي .

اما الكرسيين اللي بالمدخل .. محتاره و ماودي استعيل .. ابي شي مميز اللي اذا اقعدوا الناس بالصاله بس ابيهم يطالعونه

هالكرسيين شاريتهم من رومانتك مع اثاثي .. قيمة الواحد 800 دينار بس خذيتهم بوقت الخصومات اثنينهم اب 800 والله و بدون مبالغه. وايد حلوين و حطيت بينهم طاوله مدوره انتيك و سجاده صغيرونه حرير بلجيكي و وراهم وول بيبر قمرديني ... المكان وااااااااااااااااااااايد راقي ... علشان جذي محتاره شنو اعلق فوقهم .

عفية اذا شفتوا شي حلو او غريب باي مكان علموني.. او اذا عندكم صور حطولي

رودي انا ودي احط صور لبيتي بموضوعج بس اخاف من سوالف النت... علشان جذي يمكن ادز لج جم صوره لبيتي عالخاص راح يعجبج ان شاء الله .

 

[rudy]

بانتظارك كيكه شوقتيني على بيتك

 

[الكيكة]

ان شاء الله رودي .. تدرين مع رمضان و الدوام للساعه 3 و تدريس اليهال وتوجيب الاوادم ماكو وقت اروح البيت اصوره
انا للحين ما سكنت ..
بس ان شاء الله اشوف لي يوم اروح اصور اخر التعديلات و ادزهم لج

 

[فينيسيا72]

مشكوره يا حياتتي كله ذوق تسلمين الصور تشرح القلب

 

[shusha]

ماشاء الله الموضوع وايد حلو والصراحه يفيد وايد ويعطيج العافية يا ردي وان شاء الله لم ابني بيتي بلجالج والبنات بعد ما قصروا ومشكورين على المعلومات القيمه

 

[shusha]

رودي انا ابي منج استشاره
بسالج عن غرفة اليهال انا عندي اصبيين وبنت وولدي الصغير الصيف الياي راح احطة مع خوانه بالغرفة لان حاليا ينام عندي - غرفه اليهال 6*3,5 تقريبا - ادري انها ما تكفي 3 سراير يصير ضيج وودي بنفس الوقت افصل البنت عن الاولاد
ولدي الكبير 8 سنوات وبنتي 6 سنوات وولدي الصغير سنتين
ومافي مجال ابني غرفة زايدة - شرايج ؟
انا راح اصورلج الغرفة وادزهم لج

ادري سؤال صعب ومحير - انا فكرت بكذا طريقه - بس محتاره

ومشكوره

 

[الصراحة راحة]

ابي صور مطابخ ما عليج امر ابي يكون لون المطبخ اخضر تفاحي وابيض