روايتِي الاولى: { مُنـــاي } بِ قَلمي- دِميرة

[đeɱɛɼɑ™]

السَلام عَليكُم

هذي اول رِواية اكتِبها واكمل فيها ليه ه َالعدد من البَارتات اللي وِصلت لها
ولي الحين ما كملتهَا بس إن شاء الله اكمِلها مَعاكُم وبتشجيعكُم

الروآية مقسمتها على فصول وكِل فَصِل فيه جِزئين وسَاعات اكثر حَسب الاحداث
راح انزل فصليِن على يومِين ب ِ الاسبوُع
وإن شَاء الله تحُوز على رِضاكُم

و ماا أسمَح بنقلها باي شكل من الاشكَال حتى لو تَحت اسمِي
انا بكتبِها هِني وانا بس اللي لي الحَق انقلهَا مُنتديات ثانية او مواقع ثانية ، وأكيد تحترموُن قَراري لانكُم ذوق :friends:​

 

[đeɱɛɼɑ™]

روايتِي الاولى: { مُنـــاي } بِ قَلمي- دِميرة

بِسم الله الرحمَن الرَحييم

مُناي

الفصل الاول
الجزء الاول

" الله اكبر الله اكبر لا إله الا الله " ...
على آخر كلمآت الاذان دخل عيسى البيت واهو تعبان من الركض وبسرعة على اوله راح الصالة
استغرب انه لي الحين مو فارشين الصماط ولا موزعين التمر والشوربة ..
راح بسرعة المطبخ ولقى جاندرا قاعدة تحضر صينية صغيرة فيها صحن جريش و ماعون قاعدة تصب فيه شوربة العدس ...

عيسى : عيل وين ماما وليش مو فارشين الصماط ؟!
جاندرا : اوووه بابا انته ما يارف ؟! هذا ماما و كله بنات روح اكل اليوم بيت ماما طيبة

عيسى من الصدمة سكت وعقد حواجبه.
قعد يفكر بكل لحظة وذكرى اجمعتهم مع خالته الكبيرة طيبة ..
و كانت افكار وجمل ملخبطة براسه تدور
" الله يالدنيا خالتي طيبة !! "
" معقولة امي تنازلت وراحت تتفطر عندها !! "
" وماخذة ايمان و سهيلة بعد @@ " " نواله ما اظن ماخذتها .. بس لييش لا كبرت الحين صارت مرة "
... فجاة صحى من دوامة افكاره وتذكر انه لي الحين على لحم بطنه وما فطر

عيسى : جاندروو هالصينية حق منو ؟
جاندرا : هذا حق انته !!
شق الكشرة عيسى : يا بعد جبدي والله منو بهالبيت يفكر فيني غيرج

جاندرا استحت و قعدت تكركر وتغطي ضحكتهآ بيدهآ ..
دايما تسوي هالحركة لانه ضرس من ضروسها اللي جدام طايح وتستحي تبينه .
ضحك عيسى على عفويتها وراح وخذه الصينية يبي يوديها داره . جان تعترض جاندرا وتعقد حَاجِبها

جاندرا : لا لا لا ماااكو يودي فووق انا تعب كله انته ناصر اخذ هذا اكل فوق وانا كل يوم اصعد انزل اصعد انزل و نظف انته دار اهو دار وبعد دار ماما و سوهييلة و نوال ....
قاطعها عيىسى : انزين انزين انزين شفييج كليتيني .. انا ما ارتاح الا لما اكل بداري
تبيني اكل هني بالمطبخ يعني !!
جاندرا : اييي انا في شووغل وااجد ( وتهز براسها يمين ويسار )
عيسى : وليييييييين يعني لازم نجره ما نرتاح بهالبيت . اقول انا باخذ الصينية الدار وانا اللي بنزلها انزييييييييين ؟

جاندرا خافت لانه تعرف عيسى لما يعصب فـ رضت
بالامر الواقع ولو انها تدري انه اهي اللي بالنهاية راح تصعد فوق
وتنزل الصينية لانه هالبيت بنظرها ونظر كل " الخدم " اللي مروا
على هالبيت : اهل البيت كسااااااالي درجة اولى!!

توه عيسى بخطواته الاولى على الدري جان يوقف ويصرخ على جاندرا .

عيسى : عيل وين نصور ؟

جاندرا مرات تصير صمخة او تتصيمخ فمآ ردت عليه .
جان يصرخ مرة ثانية ويسالها طلعت من المطبخ
واهي معصبة وتتحلطم بالهندي على حظها وعلى عيشتها و على الدنيا اللي اجبرتها تخدم ناس
كبر عيالها و على عيالها الي كل وآحد طول بعرض واهي تصرف
عليهم بالهند وعلى بيتها اللي تبنيه هناك وموراضي يخلص ... كل هذا قعدت تفكر فيه واهي بطريجها من المطبخ ليه الدري .. معنه المسافة ما تاخذ دقيقة !

جاندرا : شنوو فيه ليش انته صرخ !!
عيسى : شفيج انتي شايششه اليوم .. كلميني عدل يالله ( نزرها و اهو معصب )
جاندرا : شنو فيه بابا
عيسى : وين نصور ما اشوفه
جاندرا : انا ما يآرف .. ماما يجي بيت الاتوول البس وقول حق ايمآن سووهيله البسس وكله رووح سيارة كبير حق بيت ماما طيبة وقول حق انا سوي فتوور حق انته .. ماكو قول حق ناصر و لا نوال

عيسى استغرب وقعدت افكاره مرة ثانية تدور براسه
" نووول مو معاهم .. !! وينهي هالنزغة !! "
" ونصور بعد وين اختفى " !! " مو ناقص عوار راااس اوووف "!

كمل عيسى طريجه وصعد الدري واهو يفكر باخوه واخته وامه
و شنو صآير بالبيت بهاليوم الغريب.
دش داره وتلاشت كل هالافكار ونسى يدق ويسال اول ما سمع صوت المذيعة منى بوريشه
في برنامجهآ " نبيها صح " على تلفزيون الكويت.

منى بوريشه اهي بنت جار بيت بوقصب ( عايلة عيسي )
عيسى من اول يوم شافها لما انتقلوا لمنطقتهم
واهو متيم فيها ، حتى من قبل ما تصير مذيعة ،
كانت طالبة سنة ثالثة بكلية الادآب قسم الاعلام ،
وكان وقتهآ اهو توه متخرج بتخصص علوم سياسية ،
اول ما شافها اختبص فوق تحت. كان وقتها يوم الاثنين الصبح
و هو واقف عند سيارته يدخن و ينطر اخته ايمان تنزل عشان توخر سيارتها
اللي صافطتها ورا سيارته . واهو بهالحالة شافها !

مُنى كانت لابسه تنورة رصاصية هاي ويست و قميص وردي فاتح ..
شعرها اسود ليه نص ظهرها وبشرتها خمرية صافية ..
عيونها وساع وحواجبها سود كثاف وشفايفها محمرتهم باللون الوردي
وصابغة اظافرها بلون احمر مايل للوردي وكعب رصاصي مكمل جمالها واناقتها ..
نظارتها البولقآري كانت رافعتها على شعرها عشان كانت قاعدة تدور بجنطتهآ ...
بدت افكاره تدور براسه " منو هالصاروخ !! " " اويييلي على هالجمال " ولا شعوريا مشى صوبها واهو مسبه

منى من ناحية ثانية كانت متوترة وتدور بجنطتهآ على بحثها
اللي لازم تسلمه اليوم حق دكتورتها المليغة سامية ،
واهي تدور تسمع صوت من وراها يقولها " لو سمحتي .. لو سمحتي " ..
التفتت عليه وشعرها تحرك مثل الحرير ولصق صوب شفايفها بسبة الحمرة اللي حاطتها .. وخرت الشعر بعصبية

منى : نعم اخوي فيه شي ؟
عيسى : هااا
منى بنرفزة : فيييييييه شي ؟
عيسى : لا لا بس.... انتي ... انتي منو ؟! @@

//

منى بققت عيونها و طالعته من فوق ليه تحت
شافت دشداشته مبهذلة وغترته على جتفه وبس لابس قحفية ..
لحيته ديرتي وعيونه حمر وبيده زقارة جان تخاف وتبتسم بتوتر ،
كان في ظنها انه مينون الفريج اللي سمعت عنه اول ما انتقلوا هني .
ولا شعوريا سكرت جنطتها وبسرعة مشت صوب باب السيارة واهو يطالعها و عايش بعالم وردي .
اول ما ركبت السيارة شغلتها بسرعة و داست حييييل ومشت عنه واهي مخترعة وتتحلطم

منى : واااي يمه يمه يمه ( وتحط ايدها على قلبها ) واي امبيه قلبي يرقع حيييل
انا قايلة حق بابا ماااانبي نييي هالمنطقة الهيلقية بس كله من عمتي حنة حنة فوق راسه
تعالوا يمنا انتوا بعيد خلونا نشبع منكم .. اووف بروح الكويت هالكبر وين بنروح يعني

وكملت طريجها ليمه وقفت عند الاشارة .. تكت راسها على ايدها تفكر بهالمينون اللي شافته!


//

طلعت ايمان من البيت واهي بالبجاما والروب وشبه مغطية شعرها
بلفتها السودة وعيونها متفخة ومعصبة لانه مقعدينها من الصبح واهو يوم اجازتها ..

ايمان : وييينه اووووف بنااااااام بنااااااااام .. عييييييييييسى عيسسسسسسسسسى

عيسى كان واقف عند باب بيت بوريشه يسال صِبيهم
عن البيت ومنو فيه ومتى انتقلوا ويتطقس عن هالبنت اللي شافها وخذت قلبه ..

ايمان : عيييييييييييييييييييييييييييييساااااااااااااااااااااااااااه ( صرخت من قمت راسها )

عيسى والصِبي اخترعوا .. وعيسى عرف صراخ اخته وعصب لانهم بالشارع . .
قط الزقارة وداسها وشكر الصبي ومشى صوب بيتهم واهو معصب ... مسك ايمان من زندها وضغط حييل ...
زفها واهو صاااك ضروسه

عيسى : اناااااا جم مرة قايلج صوتج هذا لا يعلى برة البيت
ايمان : انزين انزين اسفه والله ما اكررها بس ايدي آآآي عورتني وخرر

هدها عيسى وطلع باكيت الزقاير و ولع له زقارة واللي تعتبر الخامسة من اول ما قعد !
و اشر لهآ بيده اللي مَاسك فيها الزقارة صوب سيارتها و اهو منفسس عليها
عيسى : خلصينه يالله وخري سيارتج وراي شغل ... ( وحط الزقارة بين شفايقه وقال بعَصبية) وغطي شعرج عدل

راحت ايمان واهي تعدل لفتهآ صوب سيارتها الجاكوار اليديدة
اللي ما ترضى احد يسوقها غيرها لانها ربحتها من سحب كان صاير
في بنكها ومو مصدقة انها خلاص صارت لها .. .
فتخاف اي احد يسوقها او يلمسها حتى السايق ممنوع عليه يغسلها لازم توديها المغسلة بنفسها.

حركت سيارتها وانطرت عيسى يوخر سيارته عشان تصفط مكانه ...
واهو يحركها اهي كانت قاعدة تطالع ايدها من ورا الروب و تتحلطم :

ايمان : مقيولة المقرود مقرود لازم يزرق ايدي وانا وراي حفلة هيووون .. اوووووف.

حرك عيسى واهو يفكر بهالملاك اللي شافها
وكل ما تذكر شلون خافت منه يبتسم ويضحك " لهالدرجة شكلي يخرع " ...
طول ما اهو بطريجه لـ دوآم خاله سعود واهو يفكر فيهآ....
ام عيسى ( خولة ) موصيته يودي اوراقه حق اخوها سعود
عشان يسوي له واسطة بالمكان اللي يبي يشتغل فيه .. و كان باله يروح ويرد على منى
" شنوو اسمها ؟! " " واهلها شلون راضين تطلع جذي بهاللبس .!! "

عيىسي : بسس حلووووووووووه ( قالها واهو يطلع الدخان من بين شفايفه السود من شرب الزقاير )

نرجع حق وقتنا الحاضر ..
منى كعادتها طالعة بكل اناقتها و جميلة وملفتة للنظر
و عيسى ميت قهر لانه اللي يحبها من اكثر من 4 سنين طالعة جذي جدام الله وخلقه ...
قعد ياكل الجريش اللي مسويته جاندرا بنفسس
واهو حامق على منى وعلى دلعها اللي كل سنة عن سنة يزيد ...

منى ترد على المتصلين بكل دلع و غنج ..
تحورف بكل كلمة تقولها بدلع جذآب ومغري. منى وحيدة ابوها ..
امها توفت من يوم كانت منى بالروضة ..
فتعودت على الدلال من ابوها وخالاتها وعماتها لانهآ كانت يتيمة الام وجمالها من يوم كانت صغيرة ياخذ قلب كل من يشوفها.

منى : آآآلووووووه .. معانا روان ..اللوووه .. روونه انتي معانا
روان : الوووو ...مرحبااا ..مممم ... ممكن اشارك ؟
منى : اكيييد حياتي تفضضلي .. تشوفين اللوحة جدامج اي رقم تختارين ؟
روان : بس انا مو يمي التلفزيون ما اقدر اشوف انا بالسيارة
منى : هههههه وهقتينا :$ .. خلاااسس انا اقولج .. الارقام اللي بقت معانا امممم 5 ووووو 12 ووووو 3
اختاري واحد منهم .. آآآي رااقااام تبيييين ؟
روان : ساعديني منى ابي افوز
منى : هههههه اوكي مخرجنا نساعدها :$ ؟ ... خلااسس بوسلاااح عطانا الاوكي هههههه

عيسى حمق زيادة .. طلع زقارة و قعد يشربها واهو معصب
عيسى : جم مرة قاااايلهااا لا تتدلع بهالطريقة ... ( ونفخ حييل ) بترفع ضغطي!!

فجاة سمع صوت باب داره ..

عيسى : منووووو ؟

ناصر : انا نصور
عيسى : تعاال دششش
ناصر : اوووووه شنو هذا الاكل بدارك @@ شلون رضت جاندرا ( قالها بـ تطنز )
عيىسى : ههههههه ايي بعد جاندرا اهي الامرة الناهيه هني. بس افا عليك ضبطتها .. المهم فطرت ؟
ناصر : بييييييييه من زماااان وصليت بعد

عيسى تدووده و قعد يتنحنح لانه
لي الحين ما صلى ونسى الصلاة من يوم شاف منى تقدم برنامجها

عيسى : عفيييه عليك اهم شي صلاتك لا تطوفها ! بس ما قلت لي وين تفطرت انا داش البيت ما فيه احد
الا جاندرا.
ناصر : حموود اليوم عازمني اتفطر عندهم .. طافك تشرييبتهم عجيييييييييييبة ..
اكلهم موووووو طبيعي كآن
عيسى : عواافي عواافي على قلبك بوو بدييير ( و طبطب على جتف اخوه بحنان )

ناصر استحى من حنية اخوه عليه ، معنه عيسى وناصر بينهم 10 سنين الا انه ناصر دايما يشوف عيسى قدوته في هالحياة ويعتبره بحسبة ابوه واخوه ورفيجه اللي دايما يهتم فيه ويراعيه.

عيسى : الا اقولك ويين نووول ؟
ناصر : ما ادري .. جاندرا تقول انه امي راحت بيت خالتي طيبة يمكن راحت معاها .. مو البنات كلهم رايحين ؟
عيسى : هااا .. لا لا بس ايمان وسهيلة اللي راحوا مع امي .. ( وقال بصوت واطي بينه وبين نفسَه ) ما يندرى شسالفة روحَتهم لبيت خالتي
ناصر : عيل وينها !!

نوال كانت مثل ما يسميها عيسى نزغة العايلة ..
شيطانة لابعد الحدود و اهي سبب توتر خولة اغلب الوقت مو قادرة تسيطر عليها...
و هالشي لانه خولة كانت مدلعتها اخر دلع بما انها اصغر وحدة من البنات ...
نوال من اول ما دخلت سن المراهقة واهي شاقة الارض وطالعة ،
بس تبي تتميكج وتترصرص ولو ما عيسى كل يومين طاقها او زافها جان اهي في خبر كان بـ عالم المراهقين.
الحين توها داخلة سن الـ 18 وباخر سنة بالثانوية صارت كل مالها وتحلو
وكل ماله عيسى وناصر يراقبون لبسها وتصرفاتها لانه يدرون عن سوالف اختهم وعن دلعها الزايد و شطانتها.

//

نوال: مريووم .. لا تلتفتيين .. بس اكو واحد بالطاولة اللي وراج قاعد يبتسم لي من مساع
مريم التفتت بسرعة وردت مرة ثانية حق نوال
نوال : يااااااا شقوووووول مو قلت لج لا تلتفتيين
مريم : يعني شسوي شلون اجاوب على سؤالج بالله ما عندي عيون وراا ترى
نوال : انزين انزين .. شرايج مو ايننن
مريم : ما مدااني .. لحظة خنشووفه مرة ثانية
نوال مسكتها بسرعة : لاااااااااا .. صبري خلينا نخلص اكلنا وبعدين نروح نتمشى صوبه و اوريج اياه
مريم : اوكي خلصي صحنج بسرعة ...

مريم رفيجة نوال الروح بالروح يعرفون بعض من يوم كانوا بالابتدائي
و كملوا مع بعض المتوسطة والثانوي وناوين يدخلون كلية التربية الاساسية مع بعض.
يحبون بعض مثل الخوات . لدرجة انه نوال تحبها اكثر من خواتها ايمان وسهيلة وتعتبرها كاتمة اسرارها.

نوال: امبيييييييييييه شسوي
مريم : شفييييج شفييج شصاااير
نوال: هذاا عيسى امبيه امبيه..... دااق علي
مريم : واااااي طيحتي قلبي ابطني حسباااالي هنييي
نوال : من صجج لو اشوفه هني اموت بمكاني
مريم : انزين ردي علييه شوفيه شيبي

عيىسى قاعد يحاول يوصل حق نوال ومو قادر ..
الساعة صارت 8 بالليل ،
صلى المغرب والعشاا وقعد ينطرها ..
قام يحاتيها واهي لي الحين مو بالبيت وامه مو قاعدة ترد على تلفونها .
دمه فااار وقعد يفكر وين ممكن تكون راحت بهالليل واهي من قبل المغرب طالعة...
عيسى اول شي قال حق ناصر يدق عليها لما ما ردت عليه قاله خلاص وناصر راح
لغرفته يذاكر لانه وراه امتحان قصير باجر.

معنه ناصر دق على نوال كذا مرة بس بما انه اصغر منها فاهي دايما ً مسفهته وما ترد عليه .
اما عيسى تخاف منه موت لانه دايما طاقها وزافها وتشوفه جوونقر خاصة
انه طويل وعريض وحواجبه عراض وكله عاقد النونه.
بنظر نوال اخوها يخرع .. اما بنظر البنات اللي يشوفونه لاول وهلة بلونه الاسمر مِن الشمس
وعصبيته اللي مبينه من عقدة حواجبه الدايمة .. له كاريزما جذابة .. وطلته لها هيبة.

نوال : آآآآ .. آآلوووو
عيسى : نوووووووووول انتي ويييييييينج ؟!
نوال : آآآنآآ .. آآنآآآ كااني
عيسى : وينج فييه ؟
نوال : شفيك عيسى الله يهداك انا قايلة حق امي اني بتفطر مع مريوم بالافنيوز
عيسى : استغفر الله العلي العظيم .. فطوور بالافنيوز وبناات برووووحكم
نوال : لاا لا عيسى و الله العظيم مو بروحنا ام مريووم معانا اهي وخواتها كلهم هني والله والله
عيسى : والله هااا ... وينهي امها ؟ عطيني بكلمها
نوال : عيسى من صجك عييب شنو تكلم امها بتفشلني جدامها
عيىسى : زيين لا تكثرين حجي ربع ساعة واشووفج هني بالبيت سامعة؟
نوال : انزين خلااص كااني الحين ياااية

وسكر الخط بويهها ...
اما نوال كانت شوي وتبجي لانه تدري بالزف
اللي راح ايييها لما توصل البيت وماراح يطوفها لها عيسى هالمرة.

مريم : اووله اوووله صواريخ وصلت السما .. عيييل امي وخواتي معانا هههههههههه
نوال : مريووم ناقصتج عااد اناا .. تدرين بعيسى لو يدري اني بروحي هني ...
قطعت نوال كلامها و ويهها تغيير لونه !!

،

بِ انتظَار آرائكُم

​

 

[Tom ♥ Jerry]

رد : روايتِي الاولى: { مُنـــاي } بِ قَلمي- دِميرة

.




روووووووووووعه بدآيه روعه و الروايه شكلها زوغه ؛$ !
نآطرين البارتات اليايه فديتج ؛***

 

[^ليلاس^]

رد : روايتِي الاولى: { مُنـــاي } بِ قَلمي- دِميرة

بدايه حلوة

متابعتج حبيبتي

 

[•ː̗̀»AghLa 7υB«ː̖́:]

رد : روايتِي الاولى: { مُنـــاي } بِ قَلمي- دِميرة

Woow
Bdayt'ha Tshwiggg :**
Ya36ech il3afya :*
Waiting 7abebty :*

 

[Mazyoona]

ل دموره

بداية حلوة و عجبني عيسى حسيت بشفافيته و حبه
و غيرته على املاكه، تكفين دموره لا يكون هيلقي
خل يكون ذوق و اينن تحت كل هالعصبيه
:hjy5jewf:
حبيييت الاسآمي القـديمه

نااااااااطرين



ل البنات

هالبنت قمة في الذوق ف توقعوا قصة بكاااامل الذوق
:rerrerek:

 

[el7la kla]

رد : روايتِي الاولى: { مُنـــاي } بِ قَلمي- دِميرة

البداايه حلووووه .. كملي :*

 

[đeɱɛɼɑ™]

رد : روايتِي الاولى: { مُنـــاي } بِ قَلمي- دِميرة

.




روووووووووووعه بدآيه روعه و الروايه شكلها زوغه ؛$ !
نآطرين البارتات اليايه فديتج ؛***

حَياتي :$ ميرسسسسي إنتي الزوغَة والله
و بعد شوي إن شَاء الله بنزِل الجِزء الثَاني من هَ الفَصِل

فديت قلبِج
نورتيني :ceaf32e183:

​

 

[đeɱɛɼɑ™]

رد : روايتِي الاولى: { مُنـــاي } بِ قَلمي- دِميرة

بدايه حلوة

متابعتج حبيبتي

عيونِج الحِلوة شُكرا ً :eh_s(22):
لي الشَرف حَبيبتِي

اتمنى تظلين متَابعة مَعاي للآخير


​

 

[đeɱɛɼɑ™]

رد : روايتِي الاولى: { مُنـــاي } بِ قَلمي- دِميرة

Woow
Bdayt'ha Tshwiggg :**
Ya36ech il3afya :*
Waiting 7abebty :*

Allah iy3afeech '3anati merci :wqedqw:
be around ba3ad eshway ba7i6 new part :rerrerek:

​

 

[đeɱɛɼɑ™]

رد : رد: روايتِي الاولى: { مُنـــاي } بِ قَلمي- دِميرة

ل دموره

بداية حلوة و عجبني عيسى حسيت بشفافيته و حبه
و غيرته على املاكه، تكفين دموره لا يكون هيلقي
خل يكون ذوق و اينن تحت كل هالعصبيه
:hjy5jewf:
حبيييت الاسآمي القـديمه

نااااااااطرين



ل البنات

هالبنت قمة في الذوق ف توقعوا قصة بكاااامل الذوق
:rerrerek:

هَلا بِ الزيييييِن :hjy5jewf:

هههههههه َ لا لا مُو هِيلقي بِ تشوفيِن بِ البَارتَات اليَاية شخصيآتهُم عَدِل
اييي خِبرِج الاسَامي القَديمَة ب دَمي

و مَشكووووووووُرة عَ الكَلام الكِبير احرجتِينِي :eh_s(22)::eh_s(22):

لِج مِن القَلب >> :blueSmCLR:

​

 

[đeɱɛɼɑ™]

رد : روايتِي الاولى: { مُنـــاي } بِ قَلمي- دِميرة

البداايه حلووووه .. كملي :*

تِسلمين حَبيبتِي
إن شَاء الله ترقَبيني بَعد دِقايِق

​

 

[đeɱɛɼɑ™]

رد : روايتِي الاولى: { مُنـــاي } بِ قَلمي- دِميرة

الفصِل الاول
الجِزء الثانِي

طيبة كانت طايرة من الفرحة ومو مصدقة انه عقب هالسنين اختها خولة زايرتها ومع بناتها الثنتين بعد ،
مو مهم انها ما يابت كل عيالها معاها بس المهم انها عبرتها
و اقبلت عزومتها لها بهاليوم الفضيل من شهر رمضان المبارك،

صج المكالمة بينهم كانت قصيرة وباردة بس اهم شي عند طيبة الحين انها بتشوف اختها بعد دقايق...
طيبة على كثر فرحتها كانت متوترة و ما تدري اللقا مع اختها شلون راح يكون ..
هل راح يتلاممون ولا خولة بتسلم عليها ببرود .. وشلون راح تتصرف بكلا الحالتين ؟

تساؤلات وايد كانت تدور في راس طيبة و اللي انقطعت بصوت جرس الباب ..
بسرعة طلعت طيبة من غرفتها وراحت صوب الدري :

طيبة : سوزان سوزااان ... كويكلي اوبن ذا دوور

طلعت سوزان من المطبخ بــ يونيفورمها الازرق
و الشعر المرتب المربوط عنقوص وراحت صوب الباب وبطلته

سوزان : ولكم مام بليز فولو مي

ايمان ماعجبها الوضع و قاعدة تلوي بوزها وتشاور بيدها بحركة " بشي بشي "
و سهيلة تقرص فيها و خولة ماشية قبلهم ما تدري عن حركات ايمان.

وصلتهم سوزان لـ صالة كبيرة فخمة من جميع النواحي،
الديكورات الفكتورية والاطوف اللي كل وحدة شكل ولون والثريا العودة
والسقف العالي و الاثاث الاحمر المطعم بالبني والازرق...
قعدوا كلهم على غنفة وحدة منبهرين بـ فخامة الصالة اكثر من انبهارهم بـ البيت لما شافوه من برة.

ايمان : ايييه هنهم هنهم .. خذت فلوس الورث وسنعت بيتها واحنا قطتنا على صخر
خولة : ايمااانووو بقص لسانج و الله
ايمان : يمه بعد شنو الحق ما ينزعل منه
خولة : بح صوتي وانا افهم فييج بالسيارة ما منج رجا انتي ؟
ايمان: خلاص يا جلمة ردي مكانج
سهيلة: يمه بيت خالتي طيبة اينن ما توقعته جذي
خولة : والله وانتي الصاجه يهبل ماشاء الله .. ربي يهنيهم

انزلت طيبة من فوق وصوت كعبها وريحة البخور والعطورات سابقتها،
كانت لابسة تركوارتر بيج وقميص احمر وسييع اطرافه تايقر من روبرتو كفالي
شعرها ما غيرته صارلها سنين .. بوي طويل شوي وفيه خصل رمادية.
طيبة ماشاء الله جميلة جدا ً على كبر سنها .. وكانت مشهورة بجمالها من يوم كانت صغيرة.

دخلت طيبَة الصالة و مبين عليها الارتباك والتردد بخطواتها...
وصلت ليه نص الصالة واهي لي الحين ما نطقت بولا كلمة
جنها تطلب من اختها انها اهي اللي تبادر بالسلام بس خولة ظلت ساكتة تنطر طيبة اهي اللي تتكلم وتبدي بالسلام.
رغم انهم من اول ما دخلت الصالة وقفوا على طول...

طيبة : السلام عليكم ....

خولة و ايمان وسهيلة : وعليكم السلام ....

طيبة : توو ما نور البيت بوجودج يا ام عيسى .. وبوجود البنات طبعا ...

قربت طيبة منهم وخولة قربت منها وتباوسوا ..
وبعد ثواني قليلة لموا بعض لا شعوريا ً واهم يبتسمون والعبرة خانقتهم...
بعدها البنات يوا سلموا على خالتهم...

سهيلة بويهها البشوش كانت مستانسة انه واخيرا ً
رجعوا مرة ثانية مع خالتهم الحلوة الذربة اللي كانوا يشوفونها اكشخ وحدة من بينهم و
يتمنون يصيرون مثلها لما يكبرون ..

ايمان لما يه دورها عشان تسلم على طيبة كانت تتصنع الابتسامة و سلمت بسرعة وراحت قعدت مكانها.
قعدوا كلهم يسولفون سوالف خفيفة وكان ما باقي شي على اذان المغرب، لما قال " الله اكبر " قامت طيبة بارتباك:

طيبة : حياكم على السفرة ترى كل شي زاهب
خولة ضحكت : طيبة الله يهداج توه ماذن و محنا غرب ترانا اهل
ومسكت ايد اختها طيبة وقعدتها مرة ثانية وساسرتها
خولة : لي الحين تهبلين ماشاء الله عليج شالسر ؟

ضحكت طيبة ضحكتها المشهورة و احمر ويهها و ردت ساسرت اختها
طيبة : والله ما اسوي شي بس احب اهتم بنفسي انتي عارفتني

ايمان دنَت شوي من امها وبصوت واطي: يمه ترى يعناا
طيبة سمعتهَا : افا عليج اموونه تيوعين وانتي ابيتي ...

وقامت من مكانها و دلتهم على غرفة الطعام اللي فيها جميع انواع الاكل
اللي ممكن اي شخص يسويها في رمضان ان كان من مختلف
انواع السلطات والشوربات والعصاير و الورق عنب و البرياني والمجبوس والجريش
و الهريس و المرقوق والقبوط الى آخره من قائمة ما لذ وطاب.

تموا هناك حتى بعد ما خلصوا فطور وحلو .. سوالفهم كلها ضحك و حميمية بين اخت او اختها.
ايمان حست شوي بتانيب الضمير انها ظلمت خالتها
بس كانت بنفس الوقت تحس بشوي كره لها لانها كانت دايما تعتقد ان خالتها طيبة بواقة حلال
امها مهما برروا لها تصرفها لما خذت ثلات ارباع حلال جدها وعطت امها وخَالها الربع بس.

في الافنيوز نوال تبلعمت وارتبكت لما شافت الشاب اللطيف اللي ك
ان يبتسم لها واقف فوق راسها وويطالعها بكل اعجاب.
مريم رفعت راسهَا : نااااااعاام اخوي فيه شيي ؟

التفت عبد العزيز على مريم وطالعها بنظرة خلتها تنقد على عمرها ،
ورد التفت على نوال مرة ثانية. نوال دوروها من الحيا ما تلقونها ..
مو عارفة شسوي. على غير عادتها كل مرة لما يتحرشون فيها صج تستانس بس تاكلهم بلسانها ويخافون و يمشون عنها.
اما جدآم عبد العزيز تدودهت وانربط السانها.

مريم : نواال امشي خلينا نروح مو ناقصين سوالف
نوال : هاااا
عبد العزيز بصوت كله دفى : اسمج نوال؟
نوال بعد ما استوعبت الوضع
اللي اهي فيه بسرعة قامت من مكانها ومسكت ايد مريم ومشوا بسرعة.
ما وعوا الا الجرسون يناديهم

الجرسون : لو سمحتوا لوو سمحتوا ... ما دفعتوآ الحساب !! ( بلهجة لبنانية ظريفة)

نوال ومريم انحرجوا حييل وافتشلوا
لانه كل الناس بالمطعم قاعدين يطالعونهم.
لفوا واهم مرتبكيين واعتذروا من الجرسون على بونه انهم برمضان وتوهم متفطرين فداير راسهم.
توهم بيدفعون:

عبدالعزيز: لو سمحت انا اللي بدفع عنهم ( وطلع الكريديت كارد )
نوال: لااااا احنا بندفع ( بدون ما تلتفت على عبد العزيز )
الجرسون : يعني شو بدي اعمل هلا انا .. ؟
مريم : لو سمحت احنا اللي ماكلين يعني احنا اللي ندفع وبعدين هذا ما يستحي قاعد يتحرش فينآ !
الجرسون ابتسم لانه فهم السالفة و نوال قرصت مريم حيييل.

مريم : آآآآآآآآآي شفيج هذا الصج بعد شنووو
نوال : تفضل اخوي واسفين على اللي صَار.

وعطت الجرسون الحساب وبدون حتى مآ تنطر الباجي مشت بسرعة
ويرت مريم واهي قلبها يرقع من الخوف.
خافت احد يعرفها ويشوفها بهالوضع مع ريال غريب
وخافت بنفس الوقت انه هالريال يسوي لهم شي. اول مرة تشوف ريال بهالجراة ويبي يدفع عنهم بعد.

مريم : الوو سراااي تعال احنا خلصنا .. ايي ايي تعال عند مصافط ايكيا احنا الحين يجي.

عبد العزيز دشت بخاطره نوال وبغاها خلاص خاصة انه شافها مرتبكة
و مستحية وهالشي قليل يلقاه في البنات اللي دايما ً يتحرش فيهم...
وما يدري انه نوال اصلا ً من هالبنات اللي لسانهم طويل بس جدامه ارتبكت وخافت.

عبدالعزيز كان بسنة ثانية كلية الهندسة ، مشهور بانه اكبر مغازلجي
بدفعته وراعي بنات، معنه شاطر بس معدله كل ماله وبالنازل لانه دايما لاهي بسوالفه البطالية.

لما شاف عبد العزيز انه نوال ورفيجتها مشوا عنه ...
بسرعة مشى وراهم، وسمع مريم واهي تقول مصافط ايكيا استانس لانه صافط هناك بعد
و سبقهم على سيارته عشان يلحق عليهم.

نوال كانت حدها مرتبكة ومريم نست السالفة وقاعدة وتقرق على نوال بسوالف المدرسة
و عن الام اللي مرت ولابسة تريننق احمر وعن الهندي اللي زلق صوب المصافط
وعن البنت الكيوت اللي مرت وعن وعن وعن ...
نوال كانت بعالم ثاني تفكر في الشخص اللي ابتسم لها وحاول يدفع عنها الحساب
" ياترى ليش سوه جذي " " معقولة معجب فيني ؟" ...

مريم : الووووووووو نحنُ هنا
نوال : هااا شنوو؟
مريم ( لوت بوزها ): والله حالة ... انا من مساع اكلم منو عيل ؟
نوال : شفيج انا حدي متصروعه .. خايفه هالريال يلحقنا ويسوي فينا شي
مريم رفعت حاجبها : ترى وايد تشوفين افلام انتي
نوال ابتسمت : مو بس افلام .. امي بعد كله تنبه علينا من هالاشياء .. وبعدين انتي ما تقرين بالنت عن حوادث الخطف والقتل.؟
مريم : ههههههههههه اي خطف و قتل ترى واايد تتخيلين انتي ..
انا وياج كله هايتين شفتي مرة حتى هه شبه محاولة خطف

نوال : واللي توو مساع شنووو

مريم : ههههههههههههاي .. من صجج ما سوا لنا شي الريال .. كان معجب وخلاص ،
اذا كل معجب بيخطفنا عيل احنا حاولوا خطفنا .. اممممم .. لحظة لحظة خليني احسب ... ( ورفعت عيونها فوق و قامت اتمتم بشفايفها )

نوال طقتها على الخفييف : يااااااااااا ملغي ...( والتفتت يسار ولمحت الجمس ) اقووول امشي امشي مو جنه هذا جمسكم

ومشوا صوب الجمسس ....سراي بسرعة نزل من السيارة وبطل لهم الباب وركبوا ورا.

عبد العزيز بسيارته الكورفت مشى ورا الجمسس واهو يفكر بـ نوال وجمالها الطفولي البريء
على الرغم من كم الميك اب اللي حاطته...
ابتسم عبد العزيز واهو يخطط شلون يكون اول من يلمس هالطفولة.!

نوال شعرها مدرج ليه جتفها وحواجبها طبيعين بس مرسومين رسم. وكانت اهي" شقراء عايلة بوقصب" ،
شعرها اشقر بس غامج وعيونها بنية فااتحة مايلة للعسلي.
وقصيرة بس جسمها جسم امراة مكتملة الانوثة ..
واذا ضحكت غمازتين على كل خد يطلعون لها ياخذون عقل كل من يشوفهم.

نوال : والله كاني خمس دقايق واوصل البيت بس زحمة
عيسى : انزين انزين .. ناطرج انااا

وصكر الخط بويهها مرة ثانية.
طبعا نوال متعودة على تصكر التلفون بويهها من عيسى ، صارت عندها مناعة من هالشغلة.

مريم : اخوج هذا متى يتزوج ويفكنا .. واقف لنا بالبلعوم هني هني ( وتاشر على بلعوومها )
نوال : هههههههههههه هذا واهو مو اخووج
مريم : والله جنه عندي اخوو والسبة انتي .. عاد جم مرة احصل لي زفة عالطاير منه..
تذكرين يوم بالخيران .. لما زفنا عشان ماجرين القاري ، انا ابوي ما زفني جذي
نوال : هههههههههههههههههه يموون يمووون
وقعدوا يضحكون ويتذكرون سوالفهم مع عيسى طول الطريج.

عبد العزيز حاول كثر ما يقدر انه يلحقهم بدون ما يلاحظونه
عشان ما تخاف نوال مثل ما خافت لما كلمها بالمطعم،
وصل سراي بيت نوال ونزلت نوال بسرعة وقبل ما تنزل خذت الكلينكس
ومسحت حمرتها والكحل وقعدت تسال مريم اذا فيه شي بويهها مبين او لا ..
ومريم عطتها الاوكي انه ويهها صالح للدخول الى البيت ومواجهة عيسى.

عبد العزيز طبعا ً شاف هالمنظر وقعد يضحك مع نفسه ويقول " والله تصلح لي خُوش صِيده .... "

عيسى طول الوقت اللي نوال كانت بالافنيوز
و بطريجها للبيت كان اما يدق عليها او يكلم منى بالتلفون،
منى كانت بعد توها طالعة من استديو التصوير بـ طريجها ليه البيت،
وعيسى موصيها انه طول طريجها تكلمه بالتلفون عشان يتطمن عليها، و دار بينهم هالحوار:

منى : آلووه حبيبي
عيسى : ......
منى : شفيك عيسى ما تبي تكلمني ؟ خلاسس اسكر الفون يعني
عيسى : صكريه
منى بنرفزة : شنو سويت بفهم اناا
عيىسى : مو توج تبي تصكرينه .. لا صكريه عشان تشوفين منو يرد عليج بعدها
منى : اوووووه عيسى بتذلني يعني .. تبي تقولي او لا ... شساااير ؟
عيسى : شفتي نفسج اليوم انتي ؟
منى : هههه :$ ايي اهبل كل من يقولي اليوم طالعة باربي
عيسى بعصبية : ومستااااانسسة ... اكو مسلمة تطلع جذي وبرمضان بعد
منى : عيسى الالتزامات الدينية بين الشخس وربه ما تيي انته تحاسبني ...
عيسى : اي التزامات اي خرابيط .. قاعدة تتدلعين وتضحكين ولبسج ما ادري شقول والله نرفزتيني
منى بدلع : تغار علي ؟
عيسى : انا وييييييين وانتي ويين .. انا احبج فهمي احبج والله احبج واكيد اغار عليج .. بس الشي اللي تسوينه ما يرضي الله اخاف عليج و الله حسي فيني
منى : عيسى انته مالك سلطة علي لا انته ابوي ولا اخوي ولااااااااااااا حتى زوجي

عيسى انصدم من كلامها وعرف مغزى كلامها ،
صارلهم ثلاث سنين على هالحالة واهي تطلب منه انه يتقدم لها بس اهو يتحجج انه لي الحين ما كون نفسه ،
بس السبب الرئيسي انه عايلتهم محافظة ودينة وامه لا يمكن ترضى انه يتزوج وحدة مثل منى
وفوق هذا مذيعـــــــــــة وجم مرة يسمع امه وخواته ينقدون على تصرفات منى بالتلفزيون وحركاتها ..
الا نوال اللي طبعا ً عاجبتها منى و كل شي يتعلق بمنى.

تذكر عيسى نوال و صكر الخط بويه منى بدون حتى ما يقولها مع السلامة
وعلى طول دق على نوال يتطمن اذا اهي بالطريج اولا.

منى قعدت تبجي بالسيارة من تصرفات عيسى معاها.
مو عارفة اهو صاج او جاذب ، معنه تحسه صج يحبها ويموت فيها بس رفضه
وحججه انه يتقدم لها خلاها تخاف مليون مرة منه ومن نواياه الحقيقة تجاهها..

ظلت منى تبجي بسيارتها ليمه شافت نوال نازلة من الجمس وتمسح مكياجها
ولاحظت سيارة كورفت صافطة بعيد والشخص اللي فيها قاعد يطالع صوب بيت بوقصب ،
مسحت منى دموعها واستغربت من هالسيارة اللي واقفه بعيد، بس بعدين لاحظت انه اللي فيها قاعد يطالع جمس البنات .. ودقت بسرعة على عيسى.

عيسى : قَسما ً بالله مو فاضي لج الحين
منى ( بسخرية وعنجهية ) :اسلا ً انا مو داقة عشانك ..
بس حبيت اقولك ترى اختك توها رادة البيت و فيه كورفت لاحقتها.

وصكرت الخَط بويهه!!

​

 

[laeya]

يه يه يه دميرا هني و منزله قصه بعد
من الحين مسنتره اناا لووووول
والله وااااااايد حلوووه
مشكوووره عالبارتات و ناطرييييينج على ناار !!!:hjy5jewf:

 

[•ː̗̀»AghLa 7υB«ː̖́:]

رد : روايتِي الاولى: { مُنـــاي } بِ قَلمي- دِميرة

@@
Waaaaaaay Tnrfeezzz Munaaaa
7araaam Aked Ra7 Takelha Nawaaaal :S

 

[Tom ♥ Jerry]

رد : روايتِي الاولى: { مُنـــاي } بِ قَلمي- دِميرة

.


واي منى شريره

نآآآآآآآآآآآآآطرين آكيد عيسى رآح يكسر رآس نوآل الحين :dddds:

 

[DA3LOoOLA]

رد : روايتِي الاولى: { مُنـــاي } بِ قَلمي- دِميرة

شهالحركات دودو منزله روايه

بس ماقلتي لنا اهيه حقيقية والا لا ؟!

وناطرينج ياحلوة :blueSmCLR:

 

[đeɱɛɼɑ™]

رد : رد: روايتِي الاولى: { مُنـــاي } بِ قَلمي- دِميرة

يه يه يه دميرا هني و منزله قصه بعد
من الحين مسنتره اناا لووووول
والله وااااااايد حلوووه
مشكوووره عالبارتات و ناطرييييينج على ناار !!!:hjy5jewf:

حَبيبتِي لي الشَرف بهالتِسِنتِر
عيونِج الحِلوة تسلميِن
وان شاء الله بعد شوي بنزل الجزء الثَالث والاخير من الفصل الاول

​

 

[دآيم آلحب]

ليييييييشششش الملقوفه تتصل :eh_s(2)::eh_s(2)::eh_s(2):

 

[đeɱɛɼɑ™]

رد : روايتِي الاولى: { مُنـــاي } بِ قَلمي- دِميرة

@@
Waaaaaaay Tnrfeezzz Munaaaa
7araaam Aked Ra7 Takelha Nawaaaal :S

لووُوول ْ مِن حرتها
إن شَاء الله البَارت الاخير من هَ الفصل تشوفين شيصير لَها :080402ask_prv:

اشكُرج عَ المُتابَعة :blueSmCLR:
​