روايتي الجديدة مثل ما وعدتكم " حبيب الأمس" ..حياكم

[SupeR-GirL]

Waiting rawona 4 the final parts


Plz Plz don't be late :ggdw:

 

[rawona]

مستعدين للنهاية؟؟؟



كاهي يايتكم الحين .. ان شاءالله تعجبكم وسامحوني على القصور ! :tek:

​

 

[rawona]

بنفس الليلة .. رجع خالد من القهوة .. وكالعادة الكل نايم .. كان يسولف مع ألاء بالتليفون ..

خالد: خلاص حبيبتي انا صاعد غرفتي اغسل و اريح شوي .. اشوفج بعد ساعة بالماسنجر اوكي؟

ألاء: اوكي حبيبي .. تعشيت؟؟

خالد: اي كليت مع الشباب فهد وفيصل بالقهوة الحمدلله..

ألاء: بالعافية .. خلاص انا باروح اشوف امي للحين ما نامت .. وبعد ساعة اشوفك بالماسنجر ان شاءالله ..

خالد: اوكيك ..

ألاء: يلا باي ..

خالد: باي : )

*********************************

دخلت ام خالد دارها وسكرت الباب ..

بو خالد: نوال؟ للحين ما نمتي؟؟

ام خالد: ليش اتهقى اقدر انام قبل لا اطمن على عيالي؟؟ توه خالد دخل داره !

بو خالد: تعالي نامي ريحي باجر وراي قعدة من الصبح ..

ام خالد: ليش شعندك؟

بوخالد: باروح مع بو يوسف حق العدل عندنا جم شغيله اهناك وتالي باروح اطق اقامة السايق اليديد ..

ام خالد: على خير ان شاءالله .. انا بعد باطلع من الصبح باجر توها لطيفة اختها مكلمتني من شوي .. تقول هيه بنتها يايها عوار وبتوديها المستشفى .. ما تتوقع بتولد قبل الصبح .. فقلت اروح اساعدها واشوف شاللي يحتاجونه ..

بوخالد: اي زين تسوين .. تستاهل ام عبدالرحمن .. وهيه بعد تستاهل هذا بجرها عدل؟؟

ام خالد: اي فقيره من تزوجت وكل ما حملت طاح والحمدلله اللي تمم عليها هالمره والله يقومها بالسلامه

بوخالد: آمين .. يلااا يبه خلينا انام ونرتاح ورانا اشغال باجر..

طفت ام خالد ليت الابجوره وقالت : تصبح على خير

بوخالد: وانتي من اهله..


بهالحزة كان خالد وألاء يسولفون بالماسنجر ..

خالد: تصدقين مالي خلق اداوم باجر!!

ألاء: ليش؟

خالد: جذي! من تعينت وانا ولا مره خذيت لا عرضي ولا استأذان ولا اجازة ولا شي! شكلي باجر باسحب عليهم..

ألاء: يصير؟؟

خالد: اي ليش ما يصير؟؟ صارلي اكثر من 4 اشهر مداوم.. عادي باجر ادق على مسؤولي وابلغه ..

ألاء: اها اوكي ..

واقعدوا يسولفون مع بعض لي الصبح! صلوا الفير و ناموا ..




​

 

[rawona]

اليوم الثاني – الصبح بيت طلال ونوره

طلال: صباح الخير يالكسلانه!

تمددت نوره وحدها مالها خلق تنشلع من الفراش ..

نوره: هلا صباح النور .. جم الساعة الحين؟

طالع طلال بساعته: 6 .. متى بتقعدين؟؟

نوره: شوي ..شوي ..

طلال وهو يكمل لبسه: خلاص انا عيل طالع الدوام الحين مو تتأخرين على دوامج!

نوره: واااااااااااااااااااي مالي خلق!! مادري شفيني.. شكلي باروح الدوام اقدم اجازة جم يوم واستأذن واطلع!

طلال: يه!! اي ليش عاد؟ خلي لج ايام بالرصيد لا اطيرينهم يمكن نسافر نروح مني والا مني!

نوره: عادي طلال جم يوم ما يضرون..

طلال: على راحتج..

نوره: وييييي نسيت!

طلال: شنو؟

نوره: اليوم اختك منى حاجزة لنا انا و عزوز معاهم فيلم بالسينيما .. مالي خلق اروح!

طلال: اشفيج اليوم مالج خلق شي؟!!

نوره: مادري.. خلاص راح اكلمها بعد شوي واكنسل معاها..

طلال: كيفج .. المهم يلااا انا ماشي ..

نوره: ديربالك على نفسك..

طلال: ان شاءالله .. مع السلامة

نوره: حافظك الله..




​

 

[rawona]

قعدت ام خالد الصبح .. كان بوخالد توه بيطلع من الدار..

ام خالد: ها حبيبي طالع؟؟

بوخالد: اي والله تأخرت على الريال..

ام خالد: انزين انطر شوي تريق.. اكل لك شي!!

بوخالد: لا كلش مافي وقت .. اكل لي اي شي بالطريج .. والا نروح انا وبو يوسف نتريق برا..

ام خالد: انزين .. عيل انا باقوم بعد .. لطيفة داقة علي باروح اغسل والبس قبل لا اكلمها ..

بوخالد: يلااا انا رايح .. دقي علي وقوليلي شيصير معاكم ..

ام خالد: ان شاءالله .. ديربالك ..

بوخالد: مع السلامة ..

ام خالد: مع السلامة ..

وراحت تغسل و تبدل و تصلي ركعتين .. وتالي انزلت تحت الصالة .. راحت بتاخذ سويج السيارة علشان تعطيه للخادمة تخلي سايقهم القديم يشغل السيارة ..

ام خالد: هذا مو سويج خالد؟؟ شنو ماراح الدوام؟؟

ام خالد: رتناااااا .. رتنا ........

رتنا: نااااااام ماما

ام خالد: بابا خالد ما يروح الدوام؟؟

رتنا: لا ماما هوا ماكو ينزل!

ام خالد: شفيه اليوم ؟؟ مو عوايده؟؟

رتنا: يبي شي ماما؟

ام خالد: اي عطي السويج حق السايق قوليله يسوي سياره حار علشان باروح الهوسبيتال.. وسويلي نسكافيه حطيه لي بالمغ مالي..

رتنا: جين ماما

اصعدت ام خالد فوق وراحت دار خالد وطقت الباب ..

ام خالد: خالد .. خالد ..

خالد من ورا الباب: هممممممممممممم

ام خالد: خالد يمه .. قوم بطل الباب ..

ام خالد: خالد يمه قوم .. خالد!

خالد: همممممممممممممم

ام خالد: خالد يمه قوم لا تتأخر على دوامك .. قوم يمه دواام!

خالد: ان شاءالله .. ان شاءالله!!

ام خالد: انا طالعه لا تخليني احاتيك؟؟ قوم يمه عفيه حبيبي لا تتأخر على دوامك..

خالد: هممممممممممم انزين الحين اقوم!

وراحت ام خالد وخلته على اساس يقعد ويروح دوامه ..

طارت النومه من عيون خالد .. وقعد على الفراش منفس!! فكر شوي شيسوي ..

خالد: اوووفف الحين شلون ارد انام!!

قعد وسحب التلفون الساعه 7 .. فكر شوي وقرر انه يقوم ياخذ شاور ويبدل ويروح الدوام مدام طارت النومه!! .. بس قبل لا يقوم خذا التلفون ودز مسج حق ألاء و هو يبتسم ..

خالد: اكيد اهي بسابع نومه الحين هههههه خل تقعد وتتفاجأ بالمسج!

دزلها " بنتزوج .. ان شاءالله" !

وقام غسل وبدل و طلع راح الدوام..




​

 

[rawona]

كان بوخالد ويا بو يوسف توهم محركين من جدام مطعم بدر البدور عقب ما شرولهم سندويشات تريقوا فيها ..

بوخالد: الحين وين بنروح؟؟

بو يوسف: خلنا نمر العدل اول قبل لا تروح اطق فيزا سايقكم اليديد ..

بوخالد: خوش توكل على الله ..

رن تلفون بوخالد..

طلال يتصل ..

بوخالد: هلا طلال .. شلونك؟؟

********************************************

مستشفى المواساة .. كانت ام خالد مع اختها لطيفة بالمستشفى .. هيونه للحين ما ولدت ولادتها تعسرت شوي .. وراحت ام خالد وقفت يمها وقعدت تسمي وتقرا عليها ..

ام خالد: ميخالف يمه ذكري الله .. استحملي شوي كل شي باجره ..

لطيفة: هذي وينها اتصل فيها ما ترد!

ام خالد: وييي جنها الخدايوه اللي عندي .. احسن شي الواحد يقعد بدون خدم!

اهني اصرخت هيه .. وسمت عليها ام خالد: ولطيفه اختها "ام عبدالرحمن" قامت تبجي ..وراحت نادت الدكتوره .. شوي والا يسمعون بجي ياهل..

الدكتوره: مبرووك .. جاتك بنت زي الأمر!

استانست لطيفة ونوال ام خالد .. وتحمدوا لهيونه على سلامتها و بخششوا الممرضات والعاملات اللي هناك ..

***************************************

نوره واهي تركب سيارتها عقب ما اطلعت من الدوام وقدمت على اجازة لي نهاية الاسبوع تريح فيهم .. كانت تكلم منى حماتها بالتلفون ..

منى: ويييييي ليش ما تبين اتيين؟؟

نوره: والله مادري منى مالي خلق شي كلش حتى توني طالعة من الدوام وقدمت على اجازة!

منى: يعني شلون نكنسل..؟؟

نوره: ليش تكنسلون؟؟ روحي انتي والبنات واذا تبون تاخذون عزوز معاكم علشان يستانس مع ضاري ولدج مري اخذيه ..

منى: خلاص اوكي .. راح امر اخذه خليه جاهز قبل وقت..

نوره: ان شاءالله ..

وصلت نوره البيت و تفاجأت بسيارة خالتها ام ريلها صافطه عند الباب .. نزلت وقفلت السيارة ودشت البيت ..

نوره: السلام عليكم ..

ام طلال: هلا يمه شلونج؟؟

نوره: بخير خالتي شخبارج؟؟ شهالمفاجأة الحلوه؟؟

ابتسمت ام طلال: ولهت على اليهال و قلت حق خدامتهم تروح تلبسهم و تزهب جنطتهم باخذهم عندي جم يوم..

استغربت نوره هالتصرف من خالتها .. بس سكتت وماقالت شي و حبت تنطر طلال علشان تشوفه شراح يقول وهل عنده علم بهالشي والا لا؟

وجنه كان يقرا افكارها.. دخل طلال البيت وسلم ..

ام طلال: هلا حبيبي شلونك؟؟

طلال: زين .. زين .. نوره تعالي بسرعة فوق ابيج!

ارتبكت نوره شفيه طلال معصب؟؟ وطالعت خالتها اللي اول ما طاحت عينها بعين نوره وخرتها و سوت روحها لاهية بقراءة الجريدة ..

صعدت نوره الدري .. تحس في شي مو طبيعي صاير وان خالتها وطلال خاشين عنها شي!

دخلت الدار ..

نوره: شفيك طلال شصاير؟؟

كان طلال يحوس بالغرفة مثل المينون .. وويهه اسود وتعبان!

نوره: طلال!!

قرب طلال من نوره .. ومسكها حيل .. نوره خافت وحست ان في شي "جايد" بيصير ..

نوره: طلال شفيك!! علمني شالسالفه!!

طلال بصوت مرتجف : نوره .. انتي انسانه مؤمنه.. و ..

انتفض طلال قام يبجي حضن نوره حيل و نوره كانت متجمدة بمكانها .. انسانه مؤمنه؟؟ منو ؟؟ منو ؟؟

نوره: منو؟؟ طلال... منو ؟؟؟ منوووووو؟؟ قولي منو!!!!!! << تصارخ!

طلال: يحاول يتمالك نفسه ودموعه تصب .. خالد .. عطاج عمره!

نوره: لااااااااااااااااااااا .. خالد .. لاااااااااااااااااااااااااا .. لااااااااااااااااا .. طلال خالد لاااااااااااا .. لاااااااااااااا .. لااااااااااااااا خالد.. خاااااااااااااااااااااااااااااااالد ... لا طلال لا .. لا اتقص علي لاااااااااااااا

كانت نوره تصارخ بهستيريا .. وطلال حاضنها يحاول تخليها تهدا ..

طلال: تعوذي من ابليس .. نوره.. ما يصير قولي لا حول ولا قوة الا بالله!! اذكري الله .. بس حبيبتي .. بس اذكري الله .. وقمت بجيته بصدره .. يبي يصير قوي علشانها...


نوره: لا حول ولا قوة الا بالله ... إنا لله وانا اليه راجعون ... لاااااااا خالد .. وتبجي... وتصيح اكثر .. مو عارفة ليش تبجي!! مو مصدقة .. مستحيل .. خالد؟؟ لا مستحيل..

طلال: نوره قومي بدلي بسرعة .. قبل لا ترجع امج البيت .. خلج قوية .. امج محتاجة لج الحين .. قومي بدلي بسرعة خليني الحق اقطج البيت قبل لا توصل !!

قامت نوره اتجر نفسها جر .. ودموعها ما وقفت .. تبجي .. مو مصدقة .. تردد هالكلمات واهي مو حاسه " لا حول ولا قوة الا بالله"

لبست عبايتها وملفعها ويايه تحط اغراضها ..

طلال: خلي كل شي الحين انا ايب لج اغراضج بعدين .. اهم شي الحين نلحق على امج!

نزلت نوره .. وطلال ماسكها .. تحس ان خطواتها ثقيله .. مو قادره .. سكتت شوي .. نزلت شافت خالتها .. لمتها حيل واقعدت تصيح وتبجي معاها .. وتالي سحبها طلال .. وركبها السيارة .. حست نوره بدموعها تتجمد .. ومافيها تبجي .. كل شي تجمد فيها .. كانت طول الطريج ساكته.. تذكرت امها .. ياربي شراح تقول لها؟؟ شلون تقولها؟؟ شلون؟؟ جان تقعد تصيح وتبجي!!

سكت طلال وحس انها ما تنلام .. وتذكر كل شي بلحظات...

كان قاعد بمكتبه مع رفيجه ناصر .. وياهم خبر ان في حادث صاير على طريق الملك فهد وان اللي مسوي الحادث دكتور بالمستشفى .. اهني طلال نغزة قلبه .. واتصل على خالد .. بس جهازة كان مغلق .. من غير تفكير راح وطلع سيدة من الدوام وراح مكان الحادث.. لقى الناس ملتمه والشرطة بعدها ما اوصلت ..

طلال: عايش؟؟

قاله واحد من الموجودين: لا للأسف عطاك عمره ..

التفت خالد يدور داخل السياره .. مالقى احد .. والا يشوف واحد يأشر له طالع مكان ما أشر الريال .. والا يلاقي واحد مغطينه بسجادة .. راح يسحب ريوله بالغصب صوبه .. وبايد مرتجفه رفع السجادة وكشف عن ويهه .. وانصدم!!

كان خالد ممدد اهناك .. ملامحه فارقتها الحياة .. ماكان متعور .. ولافيه شي ظاهر .. متمدد بصمت اهناك! استخف طلال يوم شاف رفيجه واخو مرته بهالحاله .. قام يحضنه ويبجي ويصيح بهستيريا .. حاولوا الموجودين يهدونه بس مافي فايده .. قام يصرخ ..

طلال: اسعااااااااااااااااااااااف .. هاتوله الاسعاااااااااااااااااااااف ..

طلال: خالد.. خالد.. رد علي يا خالد.. تسمعني .. خالد ..

وراحوا اثنين واسحبوه فهموه انه خلاص توفى وان مافي فايده من اللي قاعد يسويه .. قعد طلال يم خالد يصيح ويبجي جنه ياهل .. وصلت الأدلة الجنائية .. وخذوا خالد .. راح معاهم طلال واهو بالطريج اتصل على عمه ..

بو خالد: واهو وينه الحين؟؟ عايش؟

طلال بجى .. وماقدر يقول شي .. فهم بوخالد وقال: لا حول ولا قوة الا بالله .. انا لله وانا اليه راجعون..

وخلى رفيجه يوديه للأدلة الجنائية .. ولقى طلال اهناك..!

وصل طلال ونوره لبيت بوخالد.. نزلت نوره وقفت اطالع البيت اللي حسته فجأة حزين.. وفكرت بامها وقامت تبجي .. ياربي شراح اقولها؟؟ وشلون ابلغها؟؟

دشت الصاله مع طلال والا تلاقي خالتها الكبيره منيرة موجوده وقاعدة تبجي .. استغربت شلون وصل لها الخبر؟؟ صج الاخبار الشينه بسرعه تنتشر!!

لمت خالتها و قعدت تبجي معاها .. تنحنح طلال شوي وقال حق نوره..

طلال: روحي شوفي وين اخوانج؟ في احد في البيت؟؟

سألت نوره رتنا خدامتهم وقالت لها ان حصة بالمدرسة وبدر طلع وراح كليته!

طلال: انا راح انطر بره بالدوانية اذا بغيتوا شي نادوني..

منيرة: ماتقصر ياولدي ..

مرت الدقايق على نوره جنها دهر!! كل ما تذكر امها تبجي وتصيح .. تذكرت كلام امها لها امس بليل لما كلمتها عن ألاء وشلون كانت متضايقة من اللي قاعد يصير بخالد .. بجت اكثر وقالت حق نفسها : يا حبيبتي يا يمه!

سمعوا صوت قفل السيارة بره .. اركضت نوره صوب الباب .. ادخلت امها باندفاع واهي تصرخ..

ام خالد: شفيه ولدي؟؟ شفيه؟؟ واخترعت زيادة يوم شافت اختها منيره!

ام خالد: علموني .. شفيه خالد؟؟ وينه؟؟ صارله شي؟؟ شفيهههه؟؟

سكتت نوره حست ان الله عطاها قوة ماتدري من وين يتها.. بس مكست نفسها وما بجت .. حاولت تهدي امها .. واللي زاد الطين بله ان بعد دخول امها بلحظات انترس بيتهم بالخالات والخوال وعيالهم!!

ام خالد: شفيكم؟؟ ليش يايين؟؟ ولدي اشفيه؟؟ قولولي شفيه؟؟

نوره: يمه ذكري الله .. هاج شربي ماي .. انتي توج يايه من بره شربي شوي ..

دزت ام خالد القلاص : مابي ماي !! مابي شي .. قولولي ولدي وينه؟!!

الكل كان يتكلم والكل يبجي .. حاولت نوره تهدي الوضع بس ماقدرت ..

نوره: يمه .. قولي لا حول ولا قوة الا بالله ..

ام خالد بصراخ: لااااااااااااااااااااااااااااااااااااا لااااااااااااااااااااااااااااااااا

وتالي قامت تبجي: نوره! قولي والله؟؟

بجت نوره وحضنت امها سمت عليها وحاولت تهديها : يمه قولي لا حول ولا قوة الا بالله .. انا لله وانا اليه راجعون ..

ام خالد: لاااااااااااااااااااااااااااااااااا .. لاااااااااااااااااااااااا وين خالد؟؟ وين ولدي؟؟ ووينه ؟؟

حاولوا الخوال والخالات يهدون اختهم واسحبوها وقعدوها على القنفه بالصالة ..

ام خالد: ابي ولدي ابي اشوفه؟؟

منيره (تحاول تهديها وتخفف الصدمه): مافيه شي ولدج انتي بس اهدي شربي ماي ..

ام خالد: ابي ولدي .. اذا صار بولدي شي ياويلج..!

منيره: ميخالف حبيبتي انتي بس اهدي شربي هالماي ..

ام خالد ادز الماي: ماااااااااااااااااااااابي!! مابي شي!! وين خالد!! وين ولدي!!



​

 

[rawona]

فوق بغرفة بدر .. كان بدر نايم .. ماعنده محاضرات اليوم الا العصر .. قعد من النوم وطل بتلفونه .. لقى عنده 30 ميسد كول!!! استغرب ابوه وطلال داقين عليه و خواله وعمامه وعيال عمامه ..يه! شالسالفه!! قام من الفراش وراح بطل الستارة .. لفت نظره منظر السيارات بره ..

بدر: منو ياينه؟؟!!

وراح غسل بسرعة وبدل ونزل من داره ركض ..

تفاجأ بوجود خالاته .. وخواله.. امه .. نوره.. الكل يصارخ .. الكل يبجي ... سمع شي .. بس ما استوعبه في البداية .. قرب لقى امه تصارخ وتقول خالد.. شفيه خالد؟؟ سمع "لا حول ولا قوة الا بالله" شالسالفه؟؟ سمع " الله يرحمه.. اطلبوله الرحمه" !!!!

صرخ بدر: شفيكم؟؟ شصاير؟؟

اهني قامت ام خالد وبجت: احضنت ولدها

قام بدر يبجي .. ما يدري ليش يبجي ؟؟ بس بجى!! مسكوه خواله .. وفهموه السالفه .. صرخ وبجى ..

بدر: لا ما اصدق!! لا خالد فوق .. خالد بداره!!

قامت ام خالد تبجي ونوره حست ان روحها بتطلع من البجي ..ركض بدر فوق .. راحت نوره والحقته .. لقته واقف على باب دار خالد.. يبجي ويصيح مثل الياهل..

بدر: خالد.. خالد.. بطل الباب .. خالد .. خالد .. خالد انا اسف .. خالد سامحني .. ولا ما اعلي حسي عليك مره ثانية .. خالد سامحني .. خالد .. خالد بطل الباب .. بطل لأخوك يا خالد ..

كانت نوره اطالعه .. مو عارفة شتسوي .. او شتقول .. مسكته وقامت تبجي معاه .. حضنته .. وسحبته بعيد عن الباب .. اذكر الله يا بدر.. اذكر الله ياخوي مو زين .. ترحم عليه .. اهو محتاج لدعائنا الحين .. اذكر الله.. وخذته وراحت اغسلت ويهه بالماي وسمت عليه .. اقعدت تقرا عليه المسكين قام من النوم مخترع ! وتالي خذته ونادت طلال .. وقالت له

نوره: خله معاك .. ديربالك عليه ..

هز لها طلال راسه وخذا بدر معاه وطلع .. رجعت نوره اقعدت يم امها .. احضنتها وسمت عليها .. حست ان دموعها خلصو وقلبها مات!! قامت بس تذكر الله و تقرا عليها .. وفجأة رفعت ام خالد راسها باتجاه نوره وهمست لها ..

ام خالد: نوره .. وصلتي للبنت كلامي؟؟

ردت نوره بسرعة تطمن امها: لا يمه .. ماقلت لها شي!! لا تحاتين !

ام خالد: حلفي؟؟

نوره: والله يمه ما قلت لها شي ولا طرشت لها شي .. ما اقص عليج صدقيني ..

قامت تبجي ام خالد.. كانت خايفة لا يكون نوره وصلت لألاء راي امها وكلامها وتكون ألاء وصلت الكلام لخالد وبسبتها سوى الحادث .. بس نوره اكدت لها انها ما قالت شي ولا يابت طاري لاحد!

بعد فترة ادخلت حصة ومعاها بدرية بنت خالتها اللي رجعت معاها مع السايق .. اركضت ولمت امها واقعدت تصيح وتبجي.. بلغوها بالخبر واهي راده وماكانت مصدقة !! ام خالد حاولت تهدي بنتها و تقرا عليها لأنها كانت وايد مخترعة وبس تبجي .. خذت نوره اختها وصعدتها فوق اطلبت من بدرية تقعد معاها .. وتخليها بتدل وتنزل ..

انترس البيت الخالات والعمات وعيالهم .. الكل كان موجود ..

ام خالد: ابي اشوف ولدي .. ودوني له.. ابي اشوفه ..

عبدالرحمن "ولد اختها": ان شاءالله خالتي ..باخذج له

منيره: لا لاتروح!

نوره: امبلا! خل تروح!

منيرة: مو زين تشوفه يمه..

نوره: اذا ماشافته ماراح يبرد قلبها! خل تروح تشوفه..

نزلت حصة واهي منهارة حضنت اختها ولمت امها ..

اتصل طلال على نوره ..

طلال: انا باروح الأدلة الجنائية عمي ينطرنا اهناك علشان نخلص الاجراءات .. ماراح يمدي يدفنونه اليوم .. ماكو الا باجر الصبح ان شاءالله ..

بجت نوره: انطر .. لا تروح .. اخذ امي معاك!

طلال: وين تروح الله يهداج خليها اهني اريح لها ..

نوره: طلال امي بتروح .. وماراح تصدق او يبرد قلبها الا اذا شافته !

طلال: خلاص عبدالرحمن بعد شوي بيروح خل تيي معاه .. انا راح اخذ بدر واطلع الحين

نوره: خلاص اوكي ..

بعد شوي راحت ام خالد وبدلت لبست عباتها علشان بتروح الادلة الجنائية ويا ولد اختها ..

حصة: وانا بعد باروح!

منيره: وين بتروحين انتي بعد؟؟

حصة: مابي باروح ويا امي ..

هزت نوره راسها وقالت: خلاص روحي ..

بدرية: وانتي نوره ماراح تروحين؟؟

نوره تهز راسها: لا باقعد اهني..

وطلعوا ام خالد و حصة ومعاهم بنات منيره الثنتين لطيفة وشيخه ..

اصعدت نوره فوق .. حست مو قادره تتحمل الجو العام تحت .. طلت من الدريشة وشافت امها تركب السيارة ..

نوره: الله ياجرج يارب ويصبرج و يثبت قلبج يا يمه!

وقعدت تبجي وتترحم على اخوها خالد..

بليل .. دخل بوخالد البيت .. شافته نوره اركضت صوبه لمته وبجت وحبت راسه .. حست ان ابوها كبر عشرين سنه !! كان بوخالد ساكت طول الوقت . دخل الصالة .. الكل قاعد يعزيه .. مو قادر يرد على أحد .. شاف ام خالد قاعدة علة القنفة تبجي .. رفعت عينها وطالعته من ورا دموعها .. طاح عليها بوخالد حب راسها وحضنها وقعد يبجي مثل الياهل الصغير .. نوره وحصه عورهم قلبهم على ابوهم .. بدر كان مصدوم .. للحين مو مصدق .. !




​

 

[rawona]

الصبح .. بيوم الدفان .. كانت المقبرة متروسه بالمعزين .. بوخالد ما عطاه قلبه يروح يغسل ولده .. ماقدر يستحمل .. طلال الله يجزاه خير قام بالواجب وخذا بدر معاه .. بدر دموعه كانت تصب مو راضية توقف .. مو مصدق انه قاعد يغسل اخوه بايدينه .. اخوه خالد.. امس كان معاه واليوم وين؟؟ لفوه بالكفن .. وشالوه .. بدر مايشوف طريجه من الدموع اللي غرقت ويهه .. نزل طلال القبر علشان ينزل خالد .. وساعده بدر .. "الله يرحمك ياخوي.. الله يرحمك .. الله يجمعنا وياك بجنات النعيم اللهم آمين"!



مرت أيام العزا كئيبة .. طلال ياب حق نوره اغراضها وقعدت عند امها ..ماتدري عن عيالها .. خذتهم خالتها عندها في البيت لين تعدي هالأزمة على خير ..

والعصر والمعزين داشين طالعين رفعت نوره عينها على اللي ادخلوا من الباب و تفاجأت!! كانت ام جاسم وألاء وعماتها يايين .. بسرعه راحت عيون نوره ادور على عيون امها اللي حست فيها ورفعت عينها وطالعت بالاتجاه اللي طالعت فيه نوره ..

ام جاسم شافت نظرة نوره المصدومه لها .. وقربت منها واهي تقول
" ادري .. والله ادري!" وتحضن نوره وتبجي

اهني نوره ما مسكت نفسها وقانت تبجي وتصيح .. طول الوقت كانت ماسكة عمرها بس شافت اهل ألاء بجت وبجت وبجت .. حست انها قاعدة اطلع كل اللي بداخلها !! الكل التفت صوبهم .. الكل قام يتسائل منو هالناس وليش نوره تبجي جذي؟؟

وتالي راحت ام جاسم وسلمت على ام خالد وعزتها بجوا الثنتين .. ثنتيهم عارفين السبب وليش يبجون .. الثنتين حسوا بان الدنيا ما تسوى .. وام خالد تقول بقلبها "ليته خذاها بس ظل عايش مامات" !!

ألاء حضنت نوره حيل وبجت .. الفتت كل من كان بالعزا .. منو هالبنت الحلوه اللي تبجي؟؟ وليش تبجي بهالحرقة؟؟
نوره يوم شافتها حست انها تشوف خالد .. قامت تبجي حيل وحست ان الحزن كله والدموع كلها ما اطلعت الا بهاللحظة !!

حضنت ألاء ام خالد .. اللي لمتها حيل وقعدت تبجي معاها .. الكل وقف بالعزا .. ما قدروا يعزون ام خالد الا عقب ماراحت ألاء واهلها واقعدوا بالصالة الخارجية ..

طالعت ام خالد نوره ..قربت نوره من امها .. سمعتها تهمس .. ناديلي ألاء .. بجت نوره وهزت راسها واطلعت ادور ألاء .. لقتها قاعده اهي واهلها بس تبجي .. نادتها وراحت ألاء حق ام خالد .. طاحت بحظنها واقعدت تبجي معاها ..!





​

 

[rawona]

التفتت ألاء على حسين والدموع مغرقة عيونها ..

ألاء: 3 اسنين مروا من وفاته الله يرحمه .. 3 اسنين ما نسيته فيهم ولو لحظه!

كان حسين ساكت يسمعها واهي تتكلم وحيل متأثر بكلامها وماحب يقاطعها .. حسها كانت محتاجة تفضفض .. وكان بينه وبين نفسه مستانس انها قالت كل اللي بخاطرها له ..

ألاء: بتي تعرف شصار بهالثلاث سنين؟؟

سكت حسين ما تكلم بس عطاها نظرة يعني انه قاعد يسمعها ..

اضحكت ألاء : صدق ولا تصدق!! انا وام خالد ونوره صرنا حيل قراب من بعض! دايماُ ازورهم ويزورونا.. بدر؟ الله هداه ..موت اخوه هزه ووعاه.. ترك عنه الخرابيط والمغازل وكمل دراسته بالمعهد التجاري واشتغل في بنك وسجل بجامعة بمصر علشان يكمل دراسته بالانتساب.. تزوج بدرية بنت خالته وياب منها خالد!! طالع على عمه الله يرحمه .. وعمره الحين سنه!

حصة وبدرية ادخلوا كلية الهندسة وللحين يدرسون فيها ..

نوره.. دايما مع امها .. وطلال مايقصر بعد مو مخليهم محتاجين شي .. كملت ماجستير وناوية بس تخلص تحمل وتيب بيبي..

وأنا؟؟
أنا تمنيت اني ادخل بيت أهل خالد عروس .. بس دخلته بعزاه!! تصور؟ تدري لما تحب انسان من كل قلبك .. وتبني على هالحب احلام واماني ومستقبل .. وفجأة يروح منك هالانسان!! شاللي يبقى؟؟ الدنيا اسودت بعيني .. ومرت علي ايام اتصل على رقمة وكل يطلعلي مغلق ! بس وعيت بالاخير اني انسانه مؤمنه ولازم آمن بالقضاء والقدر .. وان كل شي مقدر ومكتوب ..

سكتت ألاء شوي ورفعت عينها واهي مستحية صوب حسين .. حست انها قالت كل شي وماخلت شي لنفسها!! استغربت من جرأتها وافتشلت عقب ما استوعبت انها خرت الأكو والماكو ..

ألاء: شنو لا تعليق؟؟

طالعها حسين شوي وسألها سوال فاجأها وماتوقعته: بس ماقلتيلي .. شلون عرفتي بخبر وفاة خالد الله يرحمه؟

غيمت عيون ألاء وحست بالقمته واهي تذكر هذاك اليوم...

كانت ألاء نايمه لما وصلها مسج خالد .. واقعدت متأخر .. بطلت المسج ماله

"بنتروج ان شاءالله"

ضحكت ودقت عليه .. كان جهازه مغلق .. أكيد نايم للحين لأنه نمنا متأخر أمس ..

نزلت سلمت على أمها .. وكانت امها تتكلم بالتفلون ..

ام جاسم: يعطيك العافية بو علي ماقصرت .. مع السلامة

سكرت ام جاسم الخط وويها ما يبشر بخير ..

ألاء: شفيج يمه؟؟ منو كنتي تحاجين؟؟ عمي بوعلي؟؟ سأل عن خالد؟؟

خزتها أمها ومشت عنها ..

هزت ألاء كتفها بلا مبالاة وقعدت تقرا الجريدة .. تغدت وتالي اصعدت دارها .. اتصلت على خالد للحين جهازه مغلق..

ألاء: ماصار نوم للحين!

على الساعة 5 العصر بلغتها أمها بالخبر! بوعلي عم ألاء يشتغل بالشركة وكان بوجاسم طالب من اخوه يسأل عن خالد وعن أهله .. وبسرعة انتشر الخبر بالشركة فعرف بوفاته وبلغ أهل ألاء...


طالعت ألاء حسين: طبعاً ما تبي تعرف حالتي حزتها!! الكون كله اظلم بعيني.. وتمنيت اني اموت معاه! بس بعدين مثل ما قلت لك .. تعوذت من ابليس والله مسح على قلبي .. والحمدلله للحين ذاكرته وادعيله لأني عرفت انه مايبي مني الحين الا الدعاء ..

ألاء: اعتقد الحين عقب كل اللي سمعته بتهون عن هالخطبة ..

ابتسم حسين وقال: بالعكس انا متمسك فيج الحين أكثر من قبل!

بطلت ألاء عيونها باستغراب وحاولت ترد عليه بس ما عطاها مجال..

حسين: شوفي يا ألاء مافي ريال يرضى على نفسه ياخذ وحده تحب واحد غيره ولا كرامته تسمح له وتأكدي انه لو خالد الله يرحمه للحين عايش جان ما شفتي رقعة ويهي بعد ! .. انتي انسانه وفيه .. وفيتي لذكرى حبيبج .. وظلتي مخلصه لذكراه طول هالسنين .. ووحده بهالوفاء نادر وجودها .. تهقين عقب ما لقيتها باخليها تضيع من ايدي؟؟

ألاء: بس اذا تزوجتك ماراح اكون وفيه لخالد!

حسين: بس انا واثق انج بتكونين مخلصة ووفيه لي!

ألاء: مستحيل أنسى خالد!

حسين: ومن قالج انسيه؟؟ أصلا كل ما ذكرتيه احسن له لأنج بتترحمين عليه وتدعين له!

استغربت ألاء من حسين ومنطقه !

ألاء: بس ..

حسين: من غير بس يا ألاء .. اعتقد الوقت حان الحين انج تفكرين بنفسج .. وبعيالج!!

ألاء: عيالي؟؟؟!!!!

حسين: اي عيالج يا ألاء والا ما تبين عيال؟؟ ما ودج يصير لج ضنى يناديج بيمه؟

نزلت ألاء راسها واقعدت تبجي ..




​

 

[rawona]

بعد سنه من هالأحداث ..

ام خالد: يلاا يانوره يا كرهج على هالتأخير!

نوره: وييي يمه كاني يايه .. ما تشوفين كرشتي جدامي؟؟ يالله امشي بعد!

ام خالد: خلصينا لا نتأخر على الناس فشله احد يزور هالحزة؟!

نوره: يلاا كاني .. وينه هذا شغل السيارة والا للحين؟؟

ام خالد: اي امشي السيارة دخنت الحين!

نوره: وين خالد ؟؟ ماهو ياي معانا؟؟

ام خالد: امبلا بس قاعد بره مع ابوه ينطرونا ..

طلعوا بره ويلاقون بدر قاعد يلعب مع ولده خالد كره بالحوش ..

ام خالد: يلا خلودي ماما امش بنروح ..

بدر: بتاخذونه معاكم؟؟

نوره: اي لازم بعد ههههه

بدر: ديربالكم لا تتأخرون ..

ام خالد: ان شاءالله يمه لا تحاتي ..

واركبوا السيارة وراحو بيت بو جاسم ..

كانت ألاء قاعدة بالصالة وشايلة بحضنها بيبي صغيرون .. دخلت ام خالد مبتسمه مع نوره وخلود الصغير وياهم .. سلموا على ام جاسم وألاء ..

نوره: الحمدلله على سلامتج .. ومبروك ما ياج ..

ألاء: الله يسلمج حبيبتي والفال لج ان شاءالله ..

ام خالد: ان شاءالله .. خل تفكنا من حنتها شوي جنها اول مره تحمل و تولد!

البنات: هههههههه

ام خالد: ام جاسم شخباركم وشلون الصغير؟؟

ام جاسم: ياحلوه والله يهبل ..

نوره واهي اطالع ألاء: شسميتوه؟

ابتسمت ألاء: تدري الود ودي اسميه خالد ! بس سميناه على عمي علي..

ابتسمت ام خالد: يتربى بعزكم ان شاءالله .. والله يحفظه ويخليه لج يارب ..

ألاء: مشكوره خالتي .. ويخليلج بدر وخواته وعيالهم يارب ..الا صج شلون حصة؟ ليش مايت معاكم؟؟

نوره: ويييييييي حصه وينها الحين؟؟ لاهيه عنا بربوع روماا! رايحة بشهر العسل مع ريلها ..

ام جاسم: الله يهنيها ويسعدها يارب ..

ام خالد: خلودي ماما تعال لا تطلع بره ...


وعاد اسم خالد يتردد بحياتهم من جديد ..!










النهــــــــــــــــــــــايــــــــــة!








اتمنى تكون القصة عجبتكم .. وسامحوني على البدليات والأخطاء كل هذا من العيله ههههههههه وأمانه كل وحده تقولي رايها بالقصة ساء اعجبتها او لا؟ واذا اعجبتها شنو احلى شي عجبها فيها وشنو اللي ما عجبها بالقصة؟ وين نقاط الضعف؟؟ ترى ارحب بالاراء الصادقة والانتقادات البنائة طبعاً وسامحوني على القصور :tek:

​

 

[ضي2007]

القصه قمه قمه روونه .. وماشالله أسلوبج عجييب عيشتيني الجو معاهم وقمت أصييح .. كلش ماتوقعت النهايه جذي .. توقعت ان يا بياخذها أو بيفترقون ..بس صج العبره من القصه .. ان كل شي قضاء وقدر وان الدنيا ماتسوى والحمدالله على كل حال

وااااي بجيتيني بحرقه صج قلبي عورني وخصوصا لمن أحد يفقد شخص غالي عليه تردله ذكراه .. ربي يرحم جميع موتانا وموتى المسلمين

 

[» miss♥f6oum «]

النهااااااااااااية حلوه بس موووووووووووووت خاااااالد اثر فيني وبنفس الوقت النهاااااية حزينه

والروااايه حدهااا روعة والله لايحرمناا من يديدج

وانشاءالله تسوين روااايه 3 >>>> طماعة

 

[ام _خلودي]

الله يساامحج

من كثر مادموعى تارسه عينى مو قادره اشوف الشااشه

اكثر شىء معور قلبى انا البطل اسمه خالد

 

[المستبــده]

واااااااي بجيت على خالد
ضاق خلقي حييييييييييييييل والله
بس بقصتج لو يعرضونها وتصير مسلسل
يبينون حق الناس انه ماكو فرق بين المذاهب وانه نهاية الانسان قبرره
اخييييه انا بس ضيق خلقي على خالد ما تهنى مع الاء

مشكووووره روونه والله يعطيج العافيه
القصه ابداااااااااااااااااااع

وطبعاااا ,,

ننطر الروايه الثالثه
لانه اللي نفسج ونفس رواياتج ننطرهم بفارغ الصبرر ,,

 

[المستبــده]

ويي توني اقرى شنو كاتبه اخر شي


القصه وايييد حلوووه
ومانقدر ننقد على ولا شي فيها

واللي عجبني اكثر شي
انج بينتي انه ماكو شي يسوووى
لو مخلينهم يتزوجون عل اقل جان فررح بزواجه ومع الاء قبل مووووته

 

[وين^العهود]

يعطيج العافيه على القصه

ووايد تأثرت بموت خالد وبجيت عليه

وتوقعت موته ماادري ليش

وعجبني اخر القصه ان الاء كملت حياتها وماقفت على خالد

والحي ابقى من الميت ويتم خالد ذكرى حلوه في حياتها

وتسلم اناملج على القصه الرووووووووعه

وناطره جديده بالروايات

 

[nawnaw]

ما شاء الله عيشتينا بجو القصه ..كانه عايشين معاهم
بس النهايه حييييل حزينه...بس هذي حال الدنيا ...مو كل شي يمشي مثل ما نبي

 

[OM FHD]

Rawoon el Qe9a 3jeeeeeeeeBa
el nahaya 9ij 7azena bes etDesh el 3aQel
ako Qe9a9 yanhunha eb 6reQa et5lech et7sfen 3leha
jad mobde3aa
waiting for ur new ;D​

 

[♥ الــزيــن ♥]

من صجج راوونه تسألينا اذا روايتج عاجبتنا او لا يكفي انج انتي كاتبتها ...



بس صج صج مشكوووووره واااايد على القصه الحلوه....



لكن كانت النهايه واايد حزييييينه..



والله لا يحرمنا منج ولا من ابداعاتج...




اختج:كــويــتــيــه​

 

[fatma]

بجيتيني بجي من اول ماقريت ان خالد توفى لين نهاية القصة والله القصة اتعور القلب بس روعة ووفاءها حق خالد .... انشالله ناطرين منج قصة ثالثة