رواية لاتضيعني منك رواية كويتية واااااايد حلوة

[روح اهـلـها]

الروايه شكلها تهبل بس الحين شسوي اجيك على ريما ونواف وبقرا هذي ومملكة جود اممممم مادري احترت صراحه بس هذي احلى خصوصا انها كويتيه يلااا نبي التكملله

 

[girla]

أصايل صباح الخير وييينج يلا كملي بليييييييييييييييييييييييييييييييييييييييييز

 

[miss 3yara]

صباح النور ياقلبي
وعلى هالردود الي صراحه تفتح النفس تستاهلون مني 6 بارتات والله انكم تستاهلون

 

[miss 3yara]

فاطمه قعدت تحوس بالغرفه ولقت مجله الاسطوره قعدت عالسرير تقلب فيها .. وكان باب الغرفه مفتوح ولا يدخل سعود....




سعود دخل ووقف يوم شاف فاطمه قاعده: اسف مادري ان في احد
فاطمه اللي فزت من عالسرير وطاحت المجله من ايدها: لا ... عادي .. مـ .. ما... صار .. شي
سعود مرتبك وواقف : اسف .. شلونج فطو.. فاطمه
فاطمه تعدل شيلتها وماتدري تقعد ولا تظل واقفه: بخير الحمدلله
سعود ظل واقف عند الباب يقول حرف ويسكت وفاطمه بعد ظلت واقفه تنطر منه جمله مفيده وبعدين..
سعود: انا كنت ياي باخذ شسمه ...
فاطمه: ......
سعود يأشر بايده على تلفونه: باخذ هذا شسمه!!
فاطمه فيها ضحكه بس تحاول تمسك روحها:..........
سعود: حق التلفون أبي ... شسمه
شوق من وراه: تبي شنو؟
سعود نقز والتفت عليها وصرخ: خرعتيييينيييييييييييي
فاطمه: ههههههههههههههههه
شوق: صار لك ساعه واقف شسمه وهذا وشسمه قلت اساعدك اعطيك دزه يمكن تقول كلمه مفيده
سعود بعصبيه: هونت مابي شي ... (وطلع من الغرفه وراح غرفته)
شوق: ههههههههههه مو صاحي هالصبي من اشتغل بالبنك واهو عقله كله طاير
فاطمه: ههههههههههه الله يقطع ابليسج شوق انتي بعد خرعتيه
شوق تطالع فاطمه: يا عييييني على الدفاع .. صرت انا خرعته؟؟ ولا انتي اللي خلتيه يبلع لسانه؟
فاطمه بحيا وعصبيه: وانا شكووو
شوق تقعد يمها: عيني بعينج
فاطمه توخر ويها: اووو شووووق
شوق: هههههههههههههههههههههه حلاتها اللي تستحي .. اقول مرت اخوي
فاطمه توقف: شوووووووووق ياحماره
شوق: هههههههههههههههههههههههههه تدرين يونس شكلج لما تعصبين ههههههههههه قعدي لا انادي سعود
فاطمه: شوق يوزي عني عاد ترى مالي خلقج
شوق: هههههههههههههه جذي سيرة سعود تكهربج فطووم؟؟
فاطمه تاخذ المخده وتطقها: يالبايخه يالبايخه ...


شوق ميته من الضحك وتنحاش من فاطمه وقعدو يتراكضون بالغرفه مثل اليهال ... وسعود بغرفته يطالع نفسه بالمنظره و يكلم نفسه..


سعود: انت غبي صح ؟ لا انت حمار .. تدري .. انت غبي وحمار.. الحين البنيه قبالك قباااااااااااااااالك انت وبس معاها ما تستغل الفرصه يبه سلم مثل الاوادم قول أي شي ماقول غير مالت على هالويه ..(ويلبس ساعته ويقعد عالسرير ) والله ياربي انا احبها وابيها اليوم قبل باجر بس ليش مو عارف اتكلم مادري حتى امي تيي تسألني تقولي تبيها اقولها ايي بس مو الحين ليش مادري؟؟؟ اخاف ما تبيني! معقوله بس تصرفاتها تبين انها تبيني ... عيل ليش ماتقول؟؟؟؟؟ (يوقف ويطالع نفسه بالمنظره مره ثانيه ويطق راسه بايده) الحين انت الريال ما تكلمت تبيها اهي البنيه تتكلم صج حماار ...(ويرن تلفونه) الووووووووو
يوسف: انت موظف بالبنك ولا سكيورتي؟؟؟ ويييييييييييييييييييييييييييييييييييييييينك؟
سعود: هلا خالي يوسف كا الحين بطلع
يوسف: سكرو البنوك من زمان وانت كاني كاني .. ترى الشاليه ببنيدر مو بالسالميه
سعود: شسوي خالي على ما ييت سبحت بدلت ....
يوسف: وليش سبحت مو بتيي هني تسبح صج غبي طالع على ... ولا ماله داعي يلا ناطرينك
سعود: يلا ياي....
يوسف: باي ...
عبدالله: هاا وينه؟؟
يوسف: يقول ياي والله شكله بيعطلنا .. متى بنشوي؟ متى بنتعشى؟
احمد: شوي بهالحر يوسف الله يهداك!!!
يوسف: بعد شاليه حلاته شوي .. بعدين الحين ليل الجو يبرد شوي وبنشوي عالبحر
عبدالله: انا مع خالي يوسف شاليه يعني شوي
خالد: تدرون عاد ان الاكل المشوي بدون دهن افضل للصحه
عبدالله يعض على اسنانه: بدينا سخافات
احمد: انا اقول خل نلعب لنا شوية قيم عالبلاي ستيشن على ما يوصل سعود
يوسف: جنة صوت الباب.. معقوله سعود وصـل!!!!!!!!
وكان الواصل جسم ريل حصه ...
جاسم: السلام عليكم
الكل: عليكم السلام
يوسف يكلم عبدالله: هذا منو مناديه؟
عبدالله: احمد دق عليه ... ليش خالي شفيك؟
يوسف:لا ولا شي .. (ويشوف جاسم ياي صوبه)
جاسم: شلونك يوسف؟
يوسف: هلا والله بخيرعساك بخير شلونك انت؟
جاسم : والله الحمدلله .. (ويقعد يمه)
يوسف يقوم: انا بروح اشب الفحم
عبدالله: خالي تو الناس!!!!!!!!
احمد: ايي والله يوسف شفيك مستعيل
يوسف: شفيكم انتو مو حق الشوي بسويلي راس شيشه
خالد: والله يا عمي انا اقول لو تترك التدخين لان يضر بصحتك
عبدالله يكلم احمد بصوت واطي: شرايك اقوم اغرقه!!
احمد: شقال عاد مسكين قاعد ينصح .. انت بس اسكت عنه
يوسف: والله يا خالد مرات اللي يضرك يريحك بنفس الوقت شنسوي
جاسم: أي والله صدقت .. تدري بقوم معاك لان خاطري براس والله
احمد: زييين ماشي ماشي ... عند عمتي حصه
جاسم: ما راح تصدقك وين دليلك؟
احمد: الله يعافي التلفون نصور وندزه لها ملتيميديا
جاسم: الله يلعن التكنولوجيا
الكل: هههههههههههههههههههههههه
جاسم: تدري سو اللي بتسويه اصلاً حصه تحبني وبكلمه مني بترضى بسرعه
يوسف سرح بكلام جاسم، وظلو الشباب يتكلمون عن التلفونات وموديلاتها وعبدالله قعد يقولهم عن التلفون اللي شافه مع خاله يوسف من يومين وقالهم سعره واحمد قعد يغلطه ويقطع تفكيره صوت عبدالله ...
عبدالله: صح خالي يوسف
يوسف: اييي صح صح ...
احمد: شنو اللي صح شكلك ما كنت ويانا
يوسف واهو يقوم: كل شي يقوله عبدالله صح .. يلا جاسم الفحم ينطرنا
جاسم: يلا وراك....
خالد: مادري ليش الناس جذي ماتفكر بالمستقبل تدرون ان التدخين اضراره مستقبليه و...
عبدالله يقاطعه: احمد حط لنا شي نلعبه على ما يوصل سعود
ويدخل سعود: وهذا سعود وصل .. السلام عليكم
الكل: عليكم السلام
خالد: الطيب عند ذكره
احمد: الا يبنا سيرة الـ..
سعود على غشمره يمسك احمد من رقبته: كمل اشوف كمل
احمد مختنق: كحح كحححح .. بس اختنقت ..(سعود يوخر ايده)
سعود: علشان اتوب مره ثانيه
خالد: لاتتغشمرون جذي تنقلب صج بعدين
احمد: لا لا سعود يمون
عبدالله : خلونا من هالحجي الحين وينك تأخرررت سعود ؟
سعود: على ما رديت من الدوام وسبحت و مريت مشاري وييت
احمد: ها مشوور معاك .. وينه؟
سعود: كاهو ياي بس يتكلم بالتلفون بره .. تدرون بعد توه خاطب
عبدالله: ايي يلا عيل خل نستلمه
احمد: لا حرام عليك
مشاري يدخل: ان شاء الله لا تحاتين .. ان شاء الله حبيبتي ... وانتي بعد .. باي ....... السلام عليكم
الكل: عليكم السلام
عبدالله يغني: يا معييييريييييييس عين الله تراك والقمر والنجوم تمشي ورااااااااك
احمد قام يرقص ويكمل: يا معيرييييس عاشو عاشو
وسعود معاه ويصفق: عااااااشو
مشاري فصل معاهم وقام يرقص ويكمل: والقمر والنجوم تمشي ورااااااي
عبدالله: حااارس حاااااااارس الف الصلاة والسلام عليك يا حبيب الله محمد
سعود واحمد: كلللللللللووووووووش


لايغركم تلخبط وحيا سعود اهو بالاصل فصله وخريش وبسرعه ينسى نفسه بهالمواقف وقلبوها عرس واغاني وكملها معاهم يوسف وجاسم وهذي حالتهم طوول الليل اغاني ولعب وما ابتدو شوي الا الساعه 10 وتأخر الوقت فـقررو انهم يباتون بالشاليه .....

حصه بالتلفون: انزين والبحرين نسيت؟
جاسم: لا ما نسيت بس قلنا نبات ونحدر الصبح لا تنسين الجماعه كل خميس بيت اخوهم مبارك بعد بينزلون حق الغدا
حصه: وانا اقعد بالبيت بروحي؟؟
جاسم: لا طبعاً باتي عند بيت اخوج سعد ولا فيصل
حصه: لا بروح بيت سعد فشله بيت فيصل يروحون بيت مبارك
جاسم: خلاص حبيبتي اشوفج باجر ...
حصه: على خير عمري دير بالك على روحك عاد
جاسم: ان شاااااااااااااااء الله .. اقول حصوص
حصه: هلا والله
جاسم: بشتاق لج لي باجر
حصه بحيا: وانا بعد .. يلا سكر الحريم يمي فشله
جاسم: ههههه ماشي يلا باي
حصه: باي ... (ترجع للصاله حق الحريم وتقعد) ترى اهل الشاليه مو رادين
ليلى: سعود وراه دوام باجر
سعاد: يمكن بياخذ اجازه
ليلى: لا ما يعطونه... شوق يمه قومي دقي على اخوج شوفيه واذا بيرجع لا يرجع بروحه بهالليل
شوق: ان شاء الله يمه .. وتقوم
شيخه: مسكين عنده باجر دوام اهو بعد؟
ليلى: أي والله حالنا من حالكم ابتلى سعود واحمد بهـالدوامات
شيخه: صدقتي ابتلو عيالنا بدوام الخميس .. والله يمه اميره لو تشوفين احمد انتي بعد جان يرد مع سعود
ليلى: أي والله يتسايرون
شوق واهي راده: يمه سعود يقول بينزل مع احمد ومشاري بيتسايرون
ليلى: أي زين الحمدلله ... يلا بنات الحلو الجاي تخصصكم
شيخه: بعد حلو وجاي والله يا ام سعود مكلفه على روحج
ليلى: والله ما سوينا شي وهذي الساعه المباركه اللي نلتم هاللمه الحلوه بعدين ذوقو شغل ايدي
شيخه: وي ماشاءالله معروفه ام سعود من صغرج طباخه ما يحتاج
ليلى: تسلمين بعد عمري
شيخه: ان شاء الله يوم اللي نلتم حق عرس سعود
ليلى: ياااااااااا رب الله يسمع منج
ساره تطالع فاطمه: فطوم طلع اسمج
فاطمه: اص انتي
شوق:يلا عاد فطوم قومي حطي الحلو علشان تبينين حق امي انج خوش جنه
فاطمه: خو انتي الكاسكو مالها مالت عليكم ماني متحركه انتو قومو
سعاد: يلا يا بنات بننطر وايد قومو شوقتنا ليلى على الحلو
ساره: يلا بنقوم غصباً علينا ولا يتقولين حق امج بعد لا


فاطمه تطلع لسانها حق ساره وساره تطلع لها لسانها مثل اليهال ويأشرون حق بعض لما زفتهم سعاد،قامو البنات ويابو الحلو والجاي وقعدت فاطمه تحط الحلو وساره توزع وشوق توزع الجاي وقضوها سهره وسوالف وضحك لي الساعه 12 بعدها الكل مشى وظلو بس الخوات سعاد وليلى وحياة والبنات صعدو فوق ..

 

[miss 3yara]

ليلى تقعد : حياة هذا احنا صرنا بروحنا شرايج نتكلم
سعاد: أي حياة اللي قاعد تسوينه مع سلمان غلط بغلط ترى
حياة: بس كله انا غلط ما تشوفونه اهو شيسوي فيني
ليلى: منج حياة لا تزعلين مني لو الريال شايف منج ريج حلو ما يسوي جذي
حياة: مادري مادري ... تبون الصج مرات يكسر خاطري ومرات ودي اذبحه
سعاد: حياة حبيبتي صج ابوي الله يرحمه غصبج على سلمان بس هذا مو معناته انج تكرهينه وتسوين جذي والله سلمان يحبج
ليلى: والله صاجه سعاد ... انا ماعمري شفته صدج ولا ردج في شي كله اوامرج ماشيه شفيج عليه
حياة: كلامكم والله صح .. واهو ما يشد معاي الا اذا شديت انا
سعاد تقاطعها: وطبعاً انتي كله شااااااااااده
حياة تهز راسها بمعنى أي ....
ليلى: حياة الريال شيبي من مرته غير الكلمه الطيبه اللي تشرح خاطره بالدخله والطلعه والله هذي تسوى الدنيا ومافيها عنده ريحيه حياة لاتخلينه يدور راحته بره البيت
حياة: والله جان اذبحه
سعاد: والله انا اللي بذبحج .. لي سواها حياة محد بيلومه ترى بالعكس بيكون معاه حق
حياة: لا تخوفوني
ليلى: مو عن نخوفج احنا نصحيج وانبهج لشي انتي غافله عنه ... ريلج والحمدلله ولد خير ونعمه ومحترم وله مكانته بالديره وسمعته طيبه بين الناس واجتماعي ومو مقصر عليج ولا مع ولدج وعلى قولتهم اذا كان صاحبك عسل لا تاكله كله
حياة: يعني شنو شسوي قولولي
سعاد: يعني تتعدلين وتصيرين خوش مره معاه .. انسي انج انغصبتي عليه هذاك اول ماقولج صح ..بس شي صار وخلص وسلمان الحين ريلج لازم تدارينه وتحبينه
حياة باسلوب بس تبي تسكتهم: انزين انزين بحاول
ليلى:لا مو بحاول قولي بسوي من اليوم
حياة: شنو من اليوم اهو بالدوانيه
سعاد: شكو الدوانيه كلنا رياييلنا بالدوانيه الحين
حياة: ايي شنو الملطوب يعني؟؟
ليلى: شوفي لي مر خذاج صعدي السياره وسلمي عليه وسأليه استانس ولا لا وشنو سوى تعشى ولا لا ... ترى الريال يحب هالسوالف يحب مرته تسأل عنه وتطمن عليه تحسسه انه مهم عندها
حياة تسمع : انزين وبعدين
سعاد: وبعدين اهو بيسألج نفس الشي ردي بنفس حلوه واذا رديتو البيت صعدي الغرفه قبله وتكشخي وتعدلي
ليلى: ولي دخل عطيه من هالحركات والحجي الحلو
حياة: انزين وبعدين
ليلى وسعاد يطالعون بعض ويضحكون ...
سعاد: وبعدين شنو؟ .. باجر تقولين لنا شنو صار هههههههههههههههههههههههههه
ليلى: هههههههههههههههههه بس بشرط بدون رقابه نبي
حياة اللي بعدين فهمت قصدهم واستحت : اوووو يا كرهكم ... (ورن تلفونها مسج وتقرا)... هذا سلمان يقول ياي خل اقوم البس عباتي عيل
سعاد :مثل ما وصيناج هله هله باللسان الحلو
ليلى: والاخبار باجر هههههههههههههههههه
سعاد: هههههه أي صح هذا اهم شي ... (وتطالع الساعه) بيييييييه تأخر الوقت خل نقوم احنا بعد
ليلى: وييين تو الناس خو كا بيتكم سعاد قعدو شوي
سعاد: لا والله ليلى الوقت تأخر هبابنا نرجع اكيد بعد فيصل على ييه الحين .. الا باجر شنو بتسوون حق بيت مبارك؟
حياة اللي رن تلفونها: انا بسوي ورق عنب ويلا مع السلامه سلمان بره ... وتطلع
سعاد وليلى: الله يسلمج ...
سعاد : وانتي ليلى؟
ليلى: بعد تدرين انا تخصصي حلويات بسوي طبقين حلو
سعاد: يلا زين انا بسوي برياني هندي على لحم ... (وتنادي) فطوووم ندوووي يلا يمه الوقت تأخر .. (وتلبس عباتها وشيلتها) ..
ليلى: عيل باجر بناكل اكل
سعاد: ايي ونقول نبي نضعف ههههههههههه
ليلى: ههههههههه على قولتج
سعاد: والله ياحلو قعدتنا اليوم
البنات نازلين من الدري وفاطمه تكمل على كلام امها...
فاطمه: القعده كانت حلوه ليش مرت عمي خليفه نوريه ومنيره ما يوو فكونا
سعاد: فطوم عيب
ليلى تروح صوب فاطمه وتحط ايدها على جتفها: والله صاجه بنت اختي .. لاتنكرين سعاد
سعاد: انا مابي اعلمهم يكرهون بعض ليلى هذول بيت عمهم مهما صار مو نعلم حياة ونسوي العكس مع عيالنا
ليلى: ايي بس والله نوريه ما تنبلع لا اهي ولا بنتها ....مادري شلون خليفه مستحملها
سعاد: علشان فلوسها .. استغفرلله ياربي بس خليتونا ناخذ ذنوب الله يقطع ابليسكم
الكل:ههههههههههههههههههههههههههههههههه
شوق: لا خالتي عادي احنا مو قاعد نحش هذي الحقيقه المره
الكل: ههههههههههههههههههههههههه
سعاد: ههههههههه الله يقطع سوالفج شواقه .. اقول يلا بس خل نمشي تأخرنا ..يلا مع السلامه نشوفكم باجر بيت بو خالد
ليلى: على خير اختي سلمي على بوعبدالله
سعاد: يوصل .. مع السلامه
فاطمه وندى: مع السلامه
ليلى وشوق وبدور: الله يسلمكم ..

سعاد وبناتها واهم طالعين صادفو بدر بالحوش ...
سعاد: هااا بدر توك ياي
بدر : هلا والله خالتي أي والله توني داش (ويبوسها) شلونج خالتي
سعاد: الحمدلله شلونك انت وشلون الامتحانات ان شاء الله النتايج تبيض الويه
بدر: اكيد ان شاءالله .. فاطمه شلونج
فاطمه: بخير الحمدلله شلونك انت
بدر: بخير الحمدلله (ويطالع ندى) شلونج ندوي؟
ندى بعصبيه: اولاً انا اسمي ندى .. ثانياً انا مااحاجيك .. وتطلع من البيت تروح السياره
سعاد: ماعليك منها يمه ياهل هذي
بدر: ههههههه لاعادي خالتي يحق لها انا مطفرها بس ماعليج اعرف اراضيها
سعاد: دام جذي عيل باجر الصلح بيت خالك مبارك مو ما تيي ياويلك ترى
بدر: لا بيا كافي الاسبوع اللي طاف مابقى احد ما زفني توبه توبه
فاطمه: تستاهل... تهد لمتنا وتروح المارينا تتغدى بالمطاعم .. عاد لايطوفك برياني امي باجر
بدر: اوووووووو لا السالفه فيها برياني سعاد لا عيل ياي اكيد
وقعدو يضكحون الا بدخلة ابراهيم بوسعود ...
ابراهيم: السلام عليكم
الكل: عليكم السلام
ابراهيم: شعندكم بالحوش دخلو ولا عاجبكم الجو؟
سعاد: لا والله بوسعود احنا ماشين بس سوالف بدر وقفتنا
ابراهيم: أي دخلو شوي عاد ترى فيصل بعده قاعد بالدوانيه مو راد بوضاري وبوفهد قاعدين وسوالف عن البورصه يعني ابشرج بينام هناك
الكل: ههههههههههههه
سعاد: هههههههه والله صدقت .. بس الوقت تأخر يلا خل نمشي يلا فطوم ... مع السلامه تصبحون على خير
فاطمه: يلا .. مع السلامه
ابراهيم وبدر: مع السلامه وانتو من اهله



يتبـــــــــــــع

 

[miss 3yara]

وخلصت قعده الأربعا والحين تعالو نشوف حياة مع ريلها ابراهيم بعد نصايح خواتها ..

وصلت حياة مع ريلها البيت بعد السوالف بالسياره .. يعني شوي نفع كلام سعاد وليلى ... ودخلو طبعا مثل كل مره اهي صعدت و ابراهيم قعد بالصاله يطالع تلفزيوون .. بهالوقت حياة كانت فووق .. تحووس بكبتها وتكلم نفسها

حياة : شنو البس ؟؟ الله يقطع ابلييسكم يا ليووول وسعاددو على هالسالفه شوشتو مخي " وترجع تطالع بالكبت جان تطلع بجاما حفر لونها وردي وحطت شوي كحل وقلوس ومن هالسوالف وبعدين قعدت تطالع في نفسها جا تقوول ليش ما اسوي جذي من زمان ؟؟"

سلمان ما انتبه لها كان مندمج بالتلفزيوون بعدين حس ان في احد واقف التفت ورد ويها مره ثانيه .. جان فجأه يلتفت عليها مرره ثانيه :| جنه موو مصدق اللي قاعد يشوفه
حياة تلخبطت باسلووب ناشف ولا جنه خزااتها نصحووها :: شنو اول مرره تشوفني ولا شنو >>> الأخت داشه هووشه
سلمان : لا بس صايره غيير حدج :|
حياة بأسلووب انشف : شلون يعني غير يالله حبي... حبيبي >>طبعا غصب اطلعت
سلمان بطل عيوونه : حبيبي ؟؟ ما اصدق
حياة واهيه متخصررره :: ليش عيوني شنو شايفني جدامك ؟.
سلمان : بس بس بس الحين تأكدت انج حياة
حياة تكلم روحها : والله اني خبله .. انا شنو سويت .. ليش مو قادره اتحكم في نفسي ؟
بعدين سلمان قال لها : حياة تصبحين على خير وراح نام
حياة : الله ياخذ الساعه اللي قلت فيها نعم !!!!


طبعا سلمان مارد عليها لأن هالحجي مو اول مره تقوله .. وعقب ساعه صعد سلمان جيك على ناصر ولده وما لقاه جان يتذكر ان اهوه كل اربعا ينام بيت عمه .. وبعدين دخل الغرفه ولا يشوف شي اول مرره يشووفه بحياته
حياه قاعده على الكرسي وتبجي بجي وبس شافته مسحت دموعها وراحت فالسرير بس سلمان راح لها
سلمان : الحين منو المفرووض اللي يزعل انشالله ؟
حياة :.........
سلمان :شفيج حياة ؟
حياة بصوت مببحوح : ما فيني شي
سلمان :كل هذا ما فيج شي ؟؟ حياة انا ريلج قوليلي شفيج ؟
حياة : قلتلك مافيني شي غصب .. تصبح على خير وتتغطى وتنام
سلمان :ماكو فايده فييج طوول عمرج بتظلين بعيده
حياة : لا والله مااشي شرايك لو ابتعد اكثر .. وتاخذ لحافها وتطل برره الغرفه
سلمان : وين رايحه بهالليل ؟
حياة:بناااااااااااااااام بغرفه ناصر و " ترقع الباب "
سلممممممان : اووووووووف الله يهدييج


حياة دخلت غرفه نااصر واهي تبجي : وتقول انا ليش سويت جذي اهو خووش وااحد والله ما يستاهل اللي قاعده اسوييه فيه






وصار يوم الخميس يوم الزواره بالروضه بيت مبارك بو خالد وطبعا الكل كان ياي ..لأن اللي يفوت هالقعده ياويله من بوخالد والكل وصل الا سعوود اللي كان بالدووام

 

[miss 3yara]

مبارك بوخالد: اقول ليلى سعود متى يطلع من الداوم؟؟
ليلى: وحده ونص بس اهو بيستأذن اليوم بيي ابجر تدري عقب تعب الشاليه اصلا مادري شلون قام الصبح ما رجع الا الفجر
مبارك: الله يعينه زين ننطره عيل وبقت حياتو ..يلا عن اذنكم اروح يم الرياييل
الكل: اذنك معاك .......
نوره التفتت على ليلى: الا ام سعود امس نوريه ليش ما يت ؟؟؟
ليلى: تقول معزومه على عرس مادري من بيته
نوره: ايي انا اقول نوريه ما تطوف شي الا لشي اكبر
سعاد: أي والله على قولتج .. (تطالع ساعتها) جنه حياة تأخرت مو عادتها
نوره: أي صح شوفي شنو شغلها
ليلى: يمكن نصايح امس طلعت فايدتها هههههههههه (أي نفعت عدل)
سعاد: ههههههههه الظاهر (والله لو تدرين بس تذبحينها وتزوجين سلمان)
نوره: هاااا خير صاير شي من وراي؟؟
ليلى: سكتي امس جابلناها انا وسعاد لما ضبطناها على قولتهم ههههههههههههه
نوره: هههههههه زين تسوون والله سلمان خوش ريال
سعاد: هذا اللي قلنا وبنشوف
نوره: اقول بغيتكم بموضوع
سعاد وليلى: خيـــر
نوره: يوسف ما يبي يتزوج؟
سعاد تاخذ نفس : والله مادري انا عيزت وانا اكلمه
ليلى: والله حتى انا كله يقولي مو الحين بعدين
نوره: نفس الكلام يقوله لي، بس انا شقول لو ندور له وحده ونفاتحه بالموضوع ونشوف
سعاد: أي بس ما يصير ندور وبس نبي كلمته اول لا يوهقنا مع الناس
ليلى: ايي يسوي نفس ذيك السنه فشلنا مع ام وليـد والله للحين افتشل احط عيني بعينها، بعد الله يوفقها بنتها تزوجت والله طيرها من ايده
سعاد: لا تقولين جذي مو نصيبه بعد ..(وتلتف على نوره) بس شعندج على هالسؤال نوره؟؟لا يكون مليتي من اخوي وبتطلعينه من البيت؟
نوره: حراااااااااام عليج سعاد تدرون شكثر اعز يوسف واحسبه والله مثل اخوي واكثر بعدين حتى لو يتزوج شقته عندنا بالبيت بس انا اقصد لازم يشوف نفسه اللي صار صار
سعاد: يا ريت والله يا نوره يا ريت
نوره: اقوم اطل عالغدا وليلى دقي على سعود صارت الساعه وحده اذا ياي علشان نجهز
ليلى: ان شاءالله ...



في مجلس الرياييـل كانو قاعدين فيصل ريل سعاد وابراهيم ريل ليلى ويوسف وعبدالله وخالد وطبعاً مبارك ...


مبارك: والله يا بوعبدالله انا معاك اهو خوش مشروع بس مادري انا مالي بهالسوالف
فيصل: والله يا بوخالد انا متوكل على الله لان جاسم واايد مدح الموضوع وبعدين راح يسهله علينا كلنا
ابراهيم: والله يا بوخالد انا اشوف بوعبدالله كلامه عدل الحين مو ماشي بالديره غير العقار والاراضي
مبارك: والله مادري .. عطني مهله افكر
فيصل: اكيد خذ راحتك مو مستعيلين ... ها يوسف معانا؟؟
يوسف: والله بوعبدالله تدري فيني انا ماعندي هالسوالف انا احب اصرررف
مبارك: وانت مو مضيعك غير الصرف اللي ماله معنى .. تراك كبرت وراك زواج لازم يكون عندك مبلغ
يوسف: لا تخاف ما راح اتزوج
مبارك: هذا مو حجي يوسف الزواج نص الدين
يوسف: مابي اتزوج احنا خالصين من هالموضوع مبارك لا تفتحه مره ثانيه .. (وقام) عن اذنكم ..( وطلع من الصاله)
مبارك: لا حول ولا قوة الا بالله ... بيذبحني بتصرفاته هذا
فيصل: وسع صدرك بو خالد ما عليه .. عبدالله يبه قوم روح شوف خالك
عبدالله : ان شا ءالله يبه ..(وراح )
ابراهيم: ماكو ريال يتم بدون زواج خله شوي وتاليته اهو بنفسه بيقولك لقيت بنت الحلال زوجني عااادي كلنا مرينا بهالسالفه
مبارك: الله يسمع منكم والله تعبت منه ومن الكلام معاه عايش يومه وبس ما يشوف جدام مستقبل يايه الله يهديه
فيصل: الله يهديه انت بس هد بالك وانا بحاول اكلمه
وشوي ولا يدخل سلمان ريل حياة وناصر اللي اهو بعمر بدر تقريباً ...
سلمان وناصر: السلام عليكم
الكل: عليكم السلام .....
مبارك: يا هلا بو ناصر شلونك شخبارك
سلمان: هلا فيك بوخالد بخير عساك بخير ...
ناصر يحب راس مبارك: خالي شلونك
مبارك: هلا والله بولدي ناصر شلونك من زمان ما شفناك طل علينا خل نكحل عينا بهالويه السمح
ناصر: والله ماكو خالي خلصت امتحانات والحين سجلت بالنادي العلمي اقضي وقت فراغي
مبارك: بارك الله فيك ياولدي . أي جذي الناس تستغل العطله .. مو اكل ونوم ومارينا وبحر
سلمان: لا ناصر يعجبك ولا عنده هالسوالف ماشاءالله عليه
مبارك: عسى الله يحفظه ويكبر عقله
سلمان: آميـن الا اقول مبارك .. وينك ياخوك امس ما بينت بالدوانيه؟
مبارك: والله توني اقول حق بوعبدالله امس كنت معزوم على عرس ولد رفيجي ورحت سويت الواجب
سلمان: طول عمرك صاحب واجب الله يطول بعمرك
مبارك: باعمار الجميــع ان شاء الله ..
مبارك: ابراهيم ... بدر بعد ما بين لا يكون رايح هالمجمعات بعد؟؟؟
ابراهيم: هههههههه لا تخاف ياي بس تدري هالشباب سهر بالعطله ولا يقعدون الا الظهر بيي مع سعود
مبارك: زين ... الا شرايك يا بوعبدالله اييب الدامه واكسر راسك شوي
فيصل: هههههههههههههههههههه ييبها شورانا خل نشوف من يكسر راس الثاني
الكل: ههههههههههههههههههههه




شوق وفاطمه وساره كانو فوق بغرفة ساره ويطالعون مجلة ازياء توها ساره شاريتها ....


فاطمه: هذا هذا رووووووووعه
شوق: عفيه شهالاجسام شنو ياكلون هذول كلنكس!!
ساره: ههههههههههه كلنكس عاد لا حبيبتي هذول مو مثلنا عيووش ولحوم كله خضروات وفاكهه صحيين
شوق: مصيبه صابتهم .. (وتطالع المجله) واااي هذا روعه حجزته حق عرس فطوم
فاطمه: طالع هذي ليش مو ساره انزين ؟؟؟؟
شوق: انتي اكبر بعدين ريلج مضمون ساره ما ندري يمكن تعنس
ساره تطقها على راسها: فال الله ولا فالج اسم الله علي ان شاء الله اتزوج قبلج
شوق: هههههههههه شفقانه عالزواج تفشلين
ساره: سنة الحياة اصلاً
فاطمه: لا تلزقينها بسنة الحياة قولي ابي اتزوج وفكينا
شوق: هههههههههههههههههه أي والله .. ويي ساره ما قلت لج شصار امس (وتغمز حق ساره)
ساره مسايرتها : شنو؟؟ شصار؟؟
شوق: يي امس سعود البيت ولا حالته حااااااااااااله طايح بالشاليه ومنشقه ريله
فاطمه شهقت مره وحده: حلفييييييييييي وين؟ ..شلون؟...شصار؟
شوق وساره: هههههههههههههههههههههههههههههههههههههههههههههههههه هههه
فاطمه تطالعهم وتقوم: يا حمير يا كلاب اوريكم ما بقعد معاكم بنزل تحت مالت عليكم .. (وتقط المجله عليهم وتطلع وتصفق الباب)
ساره: هههههههههههههه تعالي فطوم تعالي نتغشمر معاج ههههههههههههههههههههههه
شوق: هههههههههههههههههههههه مسكينه فطوم قومي نلحق عليها هههههههه



ونزلو تحت يراضونها ومثل كل مره ترضى فاطمه بجم كلمه وترجع عادي، بهالوقت سعود وبدر كانو واصليــن قامو الحريم حطو الغــدا وكالعاده السفره فيها ما لذ وطاب من اكل هذا غير الحلو والجاي بعد الغدا والسوالف والضحك البنات صعدو فوق بغرفة ساره والحريم قاعدين يسولفون عن مسلسلات هالايام...

نوره: وين اول خالتي قماشه وخرج ولم يعد هذي المسلسلات الحين عرض ملابس ومكياج بس
ليلى: أي والله والقصه لا طعم ولا ريحه ولاتلقينهم كله طق مطقاقق اللي يشوفهم يقول الخليجيين كل عندهم مشاكل

سعاد عينها كانت على حياة من يت مبين عليها متضايقه مو عوايدها تقعد ساكته جذي العاده يا تسولف معاهم اوتتكلم عن هوشاتها مع ابراهيم وبهالوقت كانت حياة ماسكة بيالة الجاي وسرحاااانه عالآخر تفكر بحياتها مع سلمان بس صوت ليلى ردها للواقع ...


ليلى: تذكرين حياة هههههههههههه
حياة ببرود: ها .. شنو؟
نوره: لاااا حياة كلش اليوم مو معانا شفيج سرحانه حدج
حياة تنزل راسها تحرك بيالة الجاي بايدها: ولا شي
سعاد: حياة من وصلتي وانتي مو على بعضج شفيج؟
حياة بحده شوي: قلت لكم ولا شي ..(وتحط جايها على الطاوله بعصبيه وما توازنت ايدها جان تطيح البياله على الارض وينكب الجاي ويحوش ريلها وصرخت) احححححححححححححح
نوره: الله اسم الله عليج عسى ماتعورتي
حياة وقفت مره وحده: لا بس حار الجاي حاش ريلي
ليلى: فدوه عن عمرج وخيتي اسم الله عليج
سعاد: خير خير ان شاء الله ...
نوره تنادي الشغاله: بريــا ... يبي خرجه مع ماي وصابون
سعاد تقوم وتقعد يم حياة: حياة شفيـ

 

[miss 3yara]

سعاد ما مداها كملت وحياة غطت ويها وقامت تصيح نوره وليلى استغربو اول مره يشوفون حياة جذي وقعدت تصيح من قلب حتى الشغاله لما دخلت وشافت الموقف وقفت وقامت نوره خذت منها الخرجه وقالت لها روحي ليلى عورها قلبها ويت يم حياة ..



ليلى بصوت حنون: شفيج حيووت؟؟
حياة تصيــــــــــــح
سعاد تحاول تشيل ايدها من على ويها: حياة شفيج والله خبصتينا شصاير؟؟
نوره متوهقه ماسكه الخرجه بايدها وماتدري شتسوي وبعفويه: سعاد قومو روحو فوق بداري اخذو راحتكم
حياة تحاول تسكت: لا ماله داعي
نوره : لا قومي لا احد من اخوانج يدخل يشوفج جي يلا قومو شدعوه اخذو راحتكم فوق يلا قومي


وتقوم حياة اللي سعاد وليلى ماسكينها من الجنبين لما صعدو وظلت نوره تحت قالت فشله خوات خل ياخذون راحتهم مع ان ليلى لزمت عليها تيي ليش انهم يعتبرونها اختهم مو بس مرت اخوهم العود ولا يخشون عليها شي بس اهي حست ان الموضوع حساس وايد ومو حلوه تكون موجوده بينهم اصيله وراعية ذوق من عمرها، وفي غرفة نوره حياة بعدها تصيح وسعاد وليلى يحاولون فيها ..


سعاد: وبعدين حياة والله قطعتي قلوبنا من صياحج اهدي شوي خل نفهم شصاير
حياة تحاول تهدي روحها بس مو قادره تصيح من قلب جنها كاتمه هالصيحه من سنين
ليلى بدت تصيح معاها لانها حنونه وايد وبسرعه تتأثر: عورتي قلبي حياة تكلمي عاد
سعاد عينها تدمع بس شاده على نفسها شوي شخصيتها قويه طالعه على ابوها واخوها مبارك: ليلى احنا نبي نسكتها لا تزيدينها .. حياة حبيبتي اذكري الله ..
حياة بصوت متقطع من الصياح: لا اله .. لا اله الا .. لا اله الا الله ...


وشوي شوي هدت وقالت لهم اللي صار امس بينها وبين سلمان وترد تصيح وتكمل وتصيح وتتكلم وهذي حالتها لما خلصت السالفه، طبعاً سعاد ودها تذبحها بس مسكت نفسها وليلى كانت طول الوقت تصيح معاها وتمسح عليها وبعد ما خلصت سعاد تكلمت..

سعاد بهدوء: حياة ياعمري لاتزعلين بس اللي سويتيه غلط وانا مابي ازيد عليج بس مو هذا اللي اتفقنا عليه
حياة تمسح دموعها: ادري والله حاولت بس مادري شفيني ماااااااادري
ليلى: انزين ماعليه شرايج نعتبر ما صار شي وتحاولين بعد مره
سعاد: صح كلام ليلى الدنيا ما وقفت بعدها وعندج اليوم وباجر واللي بعده حاولي وحاولي
حياة بصوت مبحوح من كثر الصياح: والله انا مستعده وودي والله لاني تعبت من الهم وناصر اسم الله عليه كبر مابي يشوفنا جذي
سعاد: هذا انتي قلتيها عيل خلاص تحاولين اليوم
حياة واهي تصيح: بحاول
ليلى تصيح على صياحها: انزين لاتصيحين
حياة قطت روحها بحضن سعاد: اذيتكم بس مالي احد غيركم امي الله يرحمها كانت متحملتني وايد بس راحت وخلتني ..(ترفع راسها) لا تخلوني
سعاد تلمها حيل: ما بنخليج شلون نخليج ..(وماقدرت تكمل لانها قامت تصيح على ذكرى امها)
ليلى اللي قطت روحها على ظهر حياة وحضنتها من ورا: لاتقولين جذي احنا خوات ما بينا هالحجي وكلنا مالنا غير بعض واذا ما شكينا لبعض حق منو بنشتكي
سعاد قامت وقعدت بوسط خواتها ولمتهم بايدها الثنتين: مابي اسمع هالحجي امي الله يرحمها راحت انا موجوده لكم باللي تبونه اشتكو فضفضو لا تكتمون بقلوبكم طول ما انا موجوده ولا نسيتو قبل من كان يمشي اموركم عند الوالد
ليلى والدموع بعينها بس ابتسمت: الله يخليج لنا وشلون ننسى واسطتنا لولاج جان ما طلعت مع ابراهيم ايام الخطوبه
حياة: ولا انا شريت علبة المكياج
سعاد مره وحده ضحكت: ههههههههههههههههههههههههههههههه عاد حياة انتي كنتي على جنب مع هالسالفه تتذكرين ليول
ليلى: ههههههههههههه اذكر اذكر هاليوم ما ينسي
حياة: هههههههه ولا تذكرون لما طلعنا مع مبارك اخوي نشتري حق العيد وتحرش فينا واحد ومبارك طقاه ههههههههههههههههه
سعاد ميته ضحك: هههههههههههههههههه عاد مبارك كان فتوة الفريج قبل ما خلى صبي ما طقه
الكل: هههههههههههههههههههههههههههههههههههههه


وقعدو يتذكرون كل سوالف قبل ويضحكون واهم بحضن بعض اللي يشوفهم مايقول متزوجات وعندهم عيال جنهم توهم بنات، بس شكلهم كان روعه يعطي احساس بالاخوه اللي صار نادر الحين ما نلقى مثلها
ام مبارك الله يرحمها كانت تعتمد على سعاد بوايد شغلات ودايما توصيها بخواتها وبومبارك بعد كان دايما يوصيهم في بعض وهذا اللي خلى علاقتهم قويه جذي حنونين على بعض وايد ووقت الشده تلقاهم صف واحد ما يخلون للريح مكان تدخل وتخرب صفهم، حتى مبارك ويوسف على اختلافهم في بعض الامور الا انهم يخافون على بعض وايد ويدارون بعضهم وخواتهم، ومثل ما انتو شايفين مبارك سكن يوسف عنده في بيته وبنى له شقه كل هذا خوف عليه يبيه يكون تحت عينه ويتطمن عليه بس لو يتزوج جان الكل يرتاح ...

يتبــــــــــــع

 

[miss 3yara]

وما زلنا في بيت بومبارك ...البنــــات في غرفة ســـــارونه مشغلين اغنية اليسا " اجمل احساس بالكون" وكانت فاطمه تغني معاها...



فاطمه تغني: عشئاك بجنون روحي انا البي المجنون كلو منا وياك بيعيش احلى هنا حبيبي اناااااااااااا
شوق تتحرش: وينك ياسعود عن اليسا قصدي عن فطوم خخخخخخخخخخ
فاطمه تطقها على راسها: جــــب
ساره منسدحه على السرير: افففف ملل مللل
شوق: أي والله مللل .. خل نطلع
فاطمه تعجف شعر ساره: وين نطلع من صجج انتي وين نروح ؟؟ اليوم الخميس يعني ويك اند .. يعني كل مكان زحمه .. يعني لازم مرافقييييييــن مستحيل خالاتي يخلونا نطلع بروحنا
شوق: مع السايق
ساره: أي علشان ابوي يذبحنا
شوق: ناخذ ناصر وبدر معانا
فاطمه ماسكه شعر ساره وتعجف: لا مانبيهم شكلنا غلط وياهم احنا شكبرنا واهم يهالو
ساره: أي والله ..(ترفع عيونها) شتسوين فطمو
فاطمه: تسريحه قعدي
شوق: انزيــــن انا عندي فكره ... خل نقول حق الصبيان يطلعونا
ساره: ما راح يرضون اليوم الخميس وكل واحد بيطلع مع ربعه .. آآي فطوم شعري هذا مو حبل
فاطمه مطنشه ساره: لحظه لحظه ... شوق تقنعينهم ؟؟

شوق تقوم وتلبس شيلتها: الحين تييكم الاخبـار نطروني شوي .. (وتنزل تحت تروح صوب صالة الرياييل تطق الباب وتنادي سعود) ..

شوق: تعال شوي سعود ابيك
سعود يفتح الباب: هلا شوااق خير
شوق تبتسم: سعود عندك شي اليوم ؟؟ بتروحون مكان؟
سعود: بتروحون؟؟؟ انا ومنو؟؟
شوق: انت وعيال خالتي يعني عبدالله وخالد
سعود: وليش تسألين؟
شوق: سعود والله ضيقة خلق واحنا تونا مخلصين امتحانات واليوم الخميس و..
سعود يقاطعها: شوي شوي لاتبجين انزين شدعوه .. عطيني الزبده ترى راسي يعورني
شوق: طلعونا عفيه عفيه سعود كل واحد مع اخته عفيه سعود يلا يلا سينما وعشا بس بس بس
سعود: والله مادري عالشباب
شوق: سعووود افهمني كل واحد مع اخته انا وانت وعبدالله وفطووووووووووووم وخالد وساره يلا عـااد
سعود يسوي نفسه مو فاهم: شتبين انتي الحين ؟
واهم يتكلمون ولا خالهم يوسف : شعندكم هني انتو بنص الطريج
شوق: عفيه خالي قوله خل يطلعونا
يوسف يطالع سعود: طلعوهم يلا
شوق: لا خالي صج صج قول له
يوسف: وانا قلت جذب أي يلا طلعوهم
شوق: خالي من صجي انا
يوسف يمسك سعود من دشداشته: يعني اسدحه وادوس ابطنه ولا شنو يعني شفييييييييييج
شوق: لا مو جذي بس كل شوي يقولي مادري اقوله خو كل وحده مع اخوها
يوسف: انزين وين بتروحون؟
سعود: يبون سينما وعشا
يوسف يفكر: سينما وعشا! والله خوش فكره شخباري السينما والله
شوق: يلا عيل خالي فوقه معانا
سعود: اذا خالي معانا انا موافق موافق موافق
يوسف: خلاص عيل يلا نروح نحجز سينما ونييكم .. وين سينما الفردوس ولا السيارات
سعود ايده على راسه: بييييييييييييييييييييه خالي قديييييييييييييييييييييييييييييم شخبااااااااااااري هالسينمات هدموهم الحين وينك انت
شوق: وشخباري تروح تحجز خالي كل شي على الشبكه العنكبوتيه الحين
يوسف: وشتطلع البسكوتيه هذي!!
سعود: الانترنت يا خالي افا عليك مو ذاك اليوم علمتك
يوسف: اييييييييييي تذكرت الياهو وعاشو وشالو وارقص يا ولد بلى بلى ... خلصوني يلا حجزو من وين ما تبون بس فكونا
شوق: يلا فوق جهاز ساره تعال احجز سعود
سعود: يلا انادي عبدالله وخالد ونيي ............

وصعدت شوق فوق حق البنات تبشرهــــــــــــم ...

شوق تدخل الغرفه واهي ترقص: انا شواقه والاجر على الله بتطلعون يا بنات يببو يببو كللللللووووووووش
فاطمه وساره : كللللللللللوووووووووووش
فاطمه واقفه عالسرير: حلفي شوووق بنطلع والله
شوق: انا عمري قلت شي وما صار قلت بتطلعون يعني بتطلعون لا ومو أي طلعه عشا وسينما
ساره تصفق: ايوااااااااا كفو كفو بنت عمتي .. بس ما قلتي شلون اقنعتيهم؟
شوق ترفع راسها وتحط ايدها على خصرها: بكل بساطه شوية حركات وخالي يوسف
فاطمه طايره من الفرحه : خالي يوسف معانا
شوق : ايييييييي وكا بيي الحين مع الصبيان يحجزون سينما يلا لبسو شيلاتكم وصيرو خوش بنات..


ودخلو الصبيان واشتغل الصراخ كل واحد يبي فلم وكل وحده تبي مجمع وكل واحد يبي سينما وسعود عالكرسي وكلهم فوق راسه واقفين لانه اهو اللي يعرف يحجز ومن بطاقته ...

شوق: سعود مانبي المارينا !!!
عبدالله: بلى شوق المارينا اونس نروح نتعشى بجوني روكتس
شوق: لا لا مانبي المارينا ماكو دبنهامز هناك!
سعود: انتي تبين سينما ولا سوق؟؟!! خلصوني يلا قاعد يضيع الوقت علينا ترى
يوسف حاط ايده على خده: والله انا اقول نروح نشتري اشرطة افلام من الوسام ونييب عشا من نواره ونقعد ابرك لنا
ساره: عمييييي شهالسوالف المغبره .. لا لا نبي سوق شرق اقرب لنا شفيكم ..(وتلف على فاطمه) فطوم قولي لج كلمه ساكته من قعدنا
فاطمه: كيفكم ..(اكيد لسانها انبلع يم سعود)
شوق تطالعها: اسم الله عليج صرتي مؤدبه مو توج لسانج شطوله
فاطمه تقرصها:كيفكم وين ما بتروحون بروح عادي
شوق: آي آي يعلج شقول ... (تلف على سعود) .. سعود فطوم تبي سوق شرق فلم الساعه 10
فاطمه تطقها على ظهرها: جذااابه قلت كيفكم
ساره: بلى قلتي فطوم .. يلا سعود احجز
خالد: والله انا اقول الطلعه هذي مبين عليها فاشله
عبدالله: اكرمنا بسكوتك انت .. سعود احجز احجز خلصنا


وحجزو فلم الساعه 10 في سينما شرق وراحو مبجر طبعاً على طلب البنات علشان تصير سوق وعشا وسينما مره وحده ذكروني بوحده اسمها الغاليه ههههههههه .. واكثر اثنين مستانسين بالطلعه كانو فاطمه وسعود لانهم طول الوقت كانو مع بعض يتبادلون نظرات وابتسامات من بعيد لي بعيد الكل كان حاس فيهم مره البنات يطفرون فاطمه وتعصب ومره شوق تعطي جم كلمه حق سعود ويزفها،طبعاً ما برد قلب شوق الا لما دخلت دبنهامز لانها شايفه تنوره عند topshop وتبي تاخذها وطبعاً التنوره تسحب بدي وقميص وشوية ميك اب وعطورات ولما زفهم يوسف لانه طفارته شي اسمه تسوق، بعدين تعشو في برجر كنج لانه قريب عند مدخل السينما، ودخلو السينما وكانو حاجزين سطر كامل دخل يوسف وبعده ساره وفطوم وشوق بعدين سعود (الحركه مقصوده من شوق) وظل عبدالله واقف مو راضي يقعد يم خالد فقام يوسف وبدل مع خالد وزف عبدالله لانه مصخها ولا جنه ريال، المهم خلص الفلم وطلعو ...


يوسف: الفلم عجيييييييييب
عبدالله : حدددده صج صج روعه
شوق: روعه!! احنا متنا خوف ولصقنا بكراسينا وانتو تقولون روعه !!
سعود: والله انتو قلتو تبون فلم الساعه 10
ساره: بس ما قلتو فلم رعب!!!
شوق: والله هذي حوبة ندى وبدور ليش ما خذناهم
ساره: أي والله الظاهر ... بس بعد وناسه مو فطوم؟؟
فاطمه: أي وناسه وايد ..(بوجود سعود يقل الحجي)
يوسف: انزين يلا انا تعبان وابي الفراش
سعود: أي واللللللللله الفراش الفراش ابي اناااام نوووم عميييق
عبدالله: شفيكم انتو الحمدلله والشكر لا تنامون علينا بس يلا يلا..
خالد: يلا ساره
شوق: لا خلها بتنام عندي اهي وفطوم
فاطمه تبطل عيونها: لا لا ماقدر انـ .. لا انا عند. عندي امتحان وبروح ادرس
ساره: يمه منج امتحانج يوم الاحد وقلتي سهل ما يبيله دراسه
فاطمه: أي بس لا .. ماقدر لا .. بروح ادرس
شوق تمسكها من ايدها: امشيي زين ياكرهج بتنامين عندنا يلا وانا ادق على خالتي سعاد اقولها يلا عبدالله توكل على الله ... سعود يلا البيت (وتجر فاطمه وراها وتمشي وساره وراها تضحك)
سعود مستانس: يلا نشوفكم ..(ومشى)


ظلو يوسف وعبدالله وخالد يمشون لي سياييرهم ساكتين بس كل شوي يوسف يدز عبدالله ويغمز له ويأشر على خالد جنه يذكر عبدالله بشي وعبدالله مطنش بالبدايه بس من جنة يوسف تكلم..


خالد وصل سيارته: يلا مع السلامه ..
عبدالله بتردد: لحظه ... خالد ... ابيك شوي
خالد: خير
عبدالله: خالد انا ماكان قصدي اللي سويته بالسينما .. اعذرني
يوسف دزه من ظهره ..عبدالله: قصدي انا .. آسف
خالد ابتسم: ماعليه .. انا ادري انك ما تطيق الكلمه مني بس تظل ولد عمتي كل اللي اطلبه منك تتحملني شوي ياخوي
عبدالله مستغرب: ولا يهمك خالد ..(على غشمره) بس انت لا تتميلق وايد بعد (مصختها عبووود)
خالد مات من الضحك: هههههههههههههههههه .. ماشي ماشي يلا مع السلامه
عبدالله ويوسف: الله يسلمك ..
يوسف ماسك باب السياره لانه بيرجع مع خالد: شفت مو قلت لك ..(ويغمز له) يلا بنسوار ..(ويركب السياره)
عبدالله يضحك على خاله: وانت من اهله .....


وقدر يوسف شوي يجمع بين عبدالله وخالد وناوي بعد يقعد لهم قعده لان اللي يينهم سوالف سخافه وبس...

نرجع للثلاثي المرح صج يومها البنات نامو عند شوق بالبيت وسووها سهره وضحك شوق طلعت صورهم لما كانو صغار وقعدو يعلقون على اشكالهم ومع الصور طلعت صوره حق سعود وعبدالله ايام المتوسطهلابسين بيجامات وحاضنين بعض بحوش بيت يدهم بومبارك وقعدو يضحكون ضحك عليهم عقب طلعت صور عرس خالتهم حياة ماتو من الضحك على خالاتهم مع الموديلات والتسريحات القديمه لدرجة ان ساره غصت بالبيبسي اللي كانت تشربه، بعدها طلعت جم صوره من عرس حصه ماتو من الضحك على صوره لهم قاعدين يم بعض وماسكين قلاصات العصير شكلهم يفطس من الضحك وكان في صوره حق جاسم معاه عبدالله واحمد وسعود وكان شكل سعود اينن ورزه بس مبين عليه اصغر أي ايام الدراسه وقعدو البنات يطفرون فاطمه وتزفهم كالعاده، عقب لعبو اونو بعدين لعبتهم المفضله انسان حيوان نبات كل الالعاب القديمه طلعوها

وعادو الذكريات القديمه واستانسو وااايد وسهرو لي الفجر صلو ونامو الا فاطمه وسعود اللي كان بالهم كللله في طلعة اليوم، مع ان كل واحد في غرفه بس كان تفكيرهم واحد ...

فاطمه بداخلها: اليوم كان روعه وانا معاك سعود .. صج كنت بعيد بس كنت احسك اقرب واحد لي منهم كلهم ..
سعود على فراشه: يابختي فيج يافطوم والله اخلاق وجمال .. ياترى حاسه فيني؟؟ واصلتج مشاعري؟؟
فاطمه: ياترى حاس فيني سعود؟ .. حاس بحبي لك ولا لا ؟؟
سعود: احبج فطوم .. كاني اقولها ليش جدامها ماقدر انطق بحرف ليش ليش؟؟
فاطمه: متى بتتكلم بس؟ .. والله تعبتني معاك .. بعد مو عدله انا ابتدي اهو الريال أي بعد شنو
سعود: انا لازم اتكلم معاها واصارحها بكل شي .. وعقب اكلم امي تخطبها أي خلاص لازم احدد موقفي


ونامو اثنينهم فاطمه بقلبها امل ان سعود يتكلم ويريح بالها واهو بقلبه ان يكلمها باقرب فرصه ويصارحها .. بس متى بيصير كل هذا؟ .. صج سعود بيتكلم؟ ... وشلون راح يبتدي؟ ... وشنو بيقول؟؟ ....

يتبـع

نزلت لكم الحين 6 بارتات والحين ابي اشوف توقعاتكم وردودكم الي تفتح النفس وتينن والحين عاد ابي ارد عليكم ولاتنسون راح اكملها ورا الردود و التوقعات

 

[miss 3yara]

عاشت أصايل
البدايه حلوه وتعلقت فيها
يلا ناطرينج

وعاشت اصايل وعاشت اصايل :ggdw:>>>>>>>لووووووول

وانتي احلى من البدايه
الحين اقري التكمله كملتها

 

[miss 3yara]

تسلمين

الله يسلمج حبوبه

 

[miss 3yara]

الروايه شكلها تهبل بس الحين شسوي اجيك على ريما ونواف وبقرا هذي ومملكة جود اممممم مادري احترت صراحه بس هذي احلى خصوصا انها كويتيه يلااا نبي التكملله

حبيبتي رواية ريما ونواف طلبت من المشرفه انها تحذفها لانه عضوه قالت لي انها منزلتها قبلي ومن هالسوالف ومن ناحية احلى رواية لاتضيعني منك احلى بوااايد من ريما ونواف

 

[girla]

حبيبتي أصايل
مشكوره وااايد عيشتيني جو الزواره اللي بروحلها بعد أشوي
اشووفج على خير بعد الزواره

 

[miss 3yara]

العفو حبيبتي
اوكي حياتي بااي

 

[روح اهـلـها]

اي مبين هذي احلى واندمجت فيها اكثر ولانها كويتيه
بلييييييييييز كمليييييييييي
نااااااااطره

 

[أم جراج]

الروايه حلوه وناطرين التكمله

 

[miss 3yara]

انشالله ياروح اهلها ويا ام جراح

 

[miss 3yara]

الحين بنزل لكم بارتات

 

[miss 3yara]

يوم ثاني الصبح قعدت فاطمه اول وحده مع انها نامت اخر وحده بس لان متغير عليها مكانها ما نامت بعمق كانت الساعه 9 الصبح شوق وساره بسااابع نومه، قامت غسلت ولبست شيلتها ونزلت وبهالوقت خالتها ليلى وريلها كانو قاعدين ....



فاطمه تدخل الصاله: صباح الخير
ليلى وابراهيم: صباح النور
ابراهيم: هلا يبه فاطمه شلون نومتج؟ عسى مرتاحه؟
ليلى: والله مبين عليج مانمتي لما قعدت اصلي الفجر صوتكم مالي البيت ضحك وسوالف
فاطمه: صدقتي خالتي حاولت انام بس الظاهر ليش متغير علي المكان انا هذا طبعي
ليلى تبتسم : جنج سعود ما ينام غير بداره وعلى فراشه اذا تغير مكانه ما تغمض عيونه
فاطمه ابتسمت ومن داخلها شابه ضو من الحيا ..
ليلى : اصب لج جاي ولا حليب؟؟
فاطمه: لا خلج خالتي انا اصب لي
ابراهيم واهو يقرا الجريده: شصار على ريوقنا ليلى؟
ليلى: يلا ان شاء الله اقوم
فاطمه: عنج خالتي انا اقوم احط الريوق
ليلى: لا يمه خلييج قاعده يايبينج تشتغلين لا لا حبيبتي انا اقوم
فاطمه: لا والله خالتي عادي ترى اعرف والله لا تخافين شوية جبن على بيض وزيتون ويصير ريوق
الكل: هههههههههههههههههههههه
ابراهيم: خلاص عيل ليلى خل نجرب ريوق فاطمه اليوم تغيير
فاطمه: خلاص مدام عمي ابراهيم طلب عيل اقوم ..(وراحت المطبخ)
ليلى ترفع ايدها: الله يجعلها من نصيبك ياسعود والله انها خوش بنيه
ابراهيم: أي والله فاطمه خوش بنت وكفايه ابوها فيصل والله ريال ذكره طيب واصل .. ما كلمتي سعود انتي انا مادري احسه ميال لها
ليلى: انا بعد بس لما كلمته قال مو الحين .. قلت اخليه على راحته ما بغصبه
ابراهيم: على قولتج اللي الله كاتبه يصير....

شوي وتدخل فاطمه بصينية الريوق سوت سوالف خفيفه بس قعد ابراهيم يطفرها ويسألها شلون سويتي هذا .. علمي خالتج ماتعرف هالسوالف ويضحكون .. الا بنزلة ساره ...

ساره: صباح الخير
الكل: صباح النور ...
فاطمه: حماتج تحبج يلا لحقي على الريوق
ساره: ليش طالبين من المطعم
ابراهيم: ايييي من مطعم فاطمه تيك اواي
الكل: هههههههههههههههههههههههههه
ليلى: جان قعدتي شوق معاج ..
ساره: قعدت عمتي بس تبدل وتنزل .. قعدنا على تلفون فطوم
فاطمه: تلفوني رن؟
ساره: كسر روحه
فاطمه: جان نزلتيه معاج
ساره: مالي خلق ... عمتي صبيلي حليب
ليلى: ان شاء الله
فاطمه تقوم: مالت عليج خو اقصاه تلفون ... (واهي رايحه تصعد الدري ولا سعود بويها) ........
فاطمه جمدت ولا كلمه وسعود بعد ظل ساكت بس يطالعها بعدين انتبه لنفسه ..
سعود: صباح الخير فطو ... فاطمه
فاطمه مو قادره تطالع بعينه: صباح النور سعود (ياحلو الحيا والذرابه)
سعود طار من الفرحه لما سمع اسمه: وين رايحه؟
فاطمه: بييب تلفوني من فوق
سعود يدور أي سالفه بس علشان ما تروح: أي انزين .. امي وابوي تحت؟
فاطمه: أي قاعدين يتريقون
سعود: ايي زين .. وانتي تريقتي؟
فاطمه: أي الحمدلله
سعود: بالعافيه
فاطمه: الله يعافيك .. شوي سعود بصعد
سعود اللي كان بنص الدري: أي سوري أي تفضلي .. (وظل يطالعها لييييين صعدت فوق ونزل)..
فاطمه وصلت اخر الدري ولا شوق واقفه وميته ضحححححك...
فاطمه: شعندج ميته من الضحك لا يوقف قلبج
شوق: هههههههههههههههه امبيه لا لا انتو مسخره ترى ههههههههه
فاطمه تطالعها مستغربه: منو؟!
شوق واهي تضحك: بعد اكو غيركم الثنائي الفكاهي انتي وسعود .. ههههههه هذا يوم سولفتو كلمتين عدلين على بعض ما قلتو وعليه على اخوي كل سؤال اسخف من الثاني ههههههههههههه
فاطمه عصبت: جب جب فاضيه انتي .. (وراحت الغرفه تاخذ تلفونها وتطالع المكالمات)..
فاطمه: 3 مسد كول من ريم .. من الصبح شصاير بسم الله خل ادق (ودقت)..
ريم بعصبيه: انتي وينج ؟؟؟؟؟؟؟؟؟
فاطمه: كنت تحت وتلفوني فوق شفيج ريوم خرعتيني مو عادتج تدقين من الصبح لايكون لغو امتحان الاحد ولا سقطت بالاحصاء؟؟؟؟
ريم: انا وييييين وانتي وييييييييييين ... انا ما نمت من امس
فاطمه ايدها على قلبها: شصاير ريوم خير طيحتي قلبي ترى
ريم شوي بتصيح: فطوم .... في شي صاير
فطوم وقلبها يدق: قولي ريوم شصاير؟؟
ريم خانقتها العبره: اففففففف يا ربي
فاطمه عصبت: ريوووووم وترتي اعصابي شفيج تحجي
ريم بصوت مخنوق: فطوم ....في ناس يبون يخطبوني
فاطمه صرخت : حلفييييييييييييييييييييييييييييييييييي .. ريوووووم يا خايسه خرعتيني انا حسبت شي صاير
ريم تصيح: والله العظيم ياالكريهه من امس بكلمج مو عارفه ما نمت فطوم مانمت
فاطمه تضحك: ههههههههههههه يا الهبله ريوم ليش؟ انزين منو؟
ريم تسكت شوي: رفيجة امي .. عواطف تعرفينها؟
فاطمه: اييييييي اعرفها .. لايكون حق .. حق صلاح؟؟
ريم وجنها بترد تصيح: أي أي فطوم بطني يعورني لا تقولين اسمه
فاطمه طايره من الفرحه: هههههههههههههه بالعكس يالهبله لازم تفرحين صلاح رفيج اخوج عبدالوهاب يعني تعرفونه عدل واكيد اهو اللي شايفج ومكلم امه
ريم: مادري مادري فطوم بس والله خايفه ومحتاره مادري .. حسيت بس ابي اكلمج اقولج
فاطمه تأثرت: ياقلبي ريوووم ... والله فرحتيني والله فرحتيني
ريم: ادري انج بتفرحين ياعمري ولا جان ما دقيت عليج .. المهم اهم بيوون يوم الاحد عقب صلاة العشا
فاطمه: زين نكون خالصين امتحانات
ريم: مو هني الحجي ابيج تيين فطوم الله يخليج تعالي ابيج معاي عفيه عفيه مو عارفه شسوي وتدرين ماعندي خوات فطوم
فاطمه: شهالحجي وانا وين رحت؟ حبيبتي تامرين امر خلاص تدرين شلون ..امتحانه الساعه 11 اييج البيت نروح نمتحن ونرجع نقعد مع بعض لما يخطبونج ونفتك هههههههههههههه
ريم: جذي فطوم .. بتفتكين مني؟
فاطمه تنهدت: من صجج ريووم تدرين شكثر انتي غاليه وعزيزه على قلبي وصداقتنا صار لها عمر من الابتدائي مع بعض يعني 1000 سنه
ريم: هههههههههههههههه ماكو فايده فاشله بالحساب ..
فاطمه: ههههههه.. انزين عندج شي تلبسينه
ريم: أي بالبس بدلة غدا عيد الاضحى اللي ماخذتها من انسام كوليكشن
فاطمه: ايييييييي كانت تهبل عليج ماشاءالله
ريم: أي امي قالت لي بعد ... المهم حبيبتي اخليج الحين احس ارتحت وايد ابي انام
فاطمه: ههههههههههه اوكي خلاص روحي نامي ويوم الاحد على وعدنا .. يلا باي
ريم: باي ..
فاطمه عقب ماسكرت التلفون: يحلييلج ريوووووم والله بتصيرين عروس .. الفال لي يارب ....
ساره اللي كانت واقفه عند الباب: يارب الله يسمع منج
فاطمه نقزت من مكانها: بسم الله .. انتي من متى هني؟؟؟؟؟؟
ساره: من وقت الدعوه .. اثاريج شفقانه عالزواج فطوم ههههههههههههههه
فاطمه: مالت عليج .... شتبين؟؟
ساره: لا بس شفناج طولتي عمتي قالت روحي شوفيها .. ومدام ما فيج شي امشي ننزل تحت
فاطمه: يلا .. بس ساره .. سعود تحت؟؟
ساره: لا طلع
فاطمه واهي ضايق خلقها: حلفي
ساره: والله العظيم طلع دق عليه رفيجه مشاري وطلع حتى طلي من الدريشه سيارته مو هني حتى عمي ابراهيم طلع
فاطمه ببرود: زين خلاص يلا امشي ننزل ...



ساره حست بفطوم بس خافت تطفرها وماتسلم منها وخصوصاً ان مساعدتها شوق مو موجوده، ونزلو وقعدو سوالف مع خالتهم ليلى وقالت لهم فاطمه عن خطوبة ريم وفرحو لها وايد وطلعت ليلى تعرف اهل صلاح خطيب ريم لان كان جيرانهم قبل وقعدت تتكلم عنهم، بعدين طلبت ساره من شوق ان توصلها البيت لان معزومين بيت خالها على الغدا وقامت فاطمه معاهم علشان تروح تدرس حق الامتحان ووصلهم السايق

ولما وصلت فاطمه البيت على طول راحت غرفتها تنام وقالت حق امها ماتبي غدا وصج نامت ماقعدت الا الساعه 5 العصر عوضت عدل ولما نزلت قالت حق امها عن خطبة ريم وانها طلبت منها تكون معاها يوم الاحد وسعاد وافقت لانها عارفه ان ريم وفاطمه مثل الخوات واكثــر وماحبت تكسر بفرحتهم ...


فاطمه: والله يمه فرحانه لها وااااااايد
سعاد: وريم تستاهل كل خير وعايلة الصبي معروفه خوش ناس والله الله يهنيهم
فاطمه: تقول خالتي ليلى كانو بفريجكم قبل
سعاد: ايي بيت بومحمد ابو صلاح خوش عايله ماشاءالله عليهم
فاطمه: الحمدلله زوجت ريم بقت شوق وسويره
سعاد: هههههههههههه وانتي شعليج منهم يبتيهم ونسيتيهم؟
فاطمه: ههههه لا بس يعني رفيجاتي وابي اتطمن عليهم
سعاد تمسح على راس فاطمه: الله يطمني عليج
فاطمه ابتسمت بحيا: يممممه
وتدخل عليهم ندى : هااااي ...
سعاد: جم مره اقولج لا تقولين هاي وين السلام عليكم اختفت من القاموس
ندى: يمه لا تصيرين جذي خلج كوول شوي وعطيني 10 دنانير
سعاد: حق شنو؟
ندى: بودي الجهاز بسويله فورمات
فاطمه: ايي تخربه بعدين عطوني فلوس اعدله
ندى: انتي سكتي اذا ما تفهمين بالشي لا تتكلمين فيه
فاطمه: لا والله !! .... ماشي شوفي منو بيوديج
ندى: عبدالله
سعاد: عبدالله مو هني بالنادي
ندى: انطره ميخالف مو مستعيله ....
سعاد: انزين حق شنو عشره خو هالتصليح بخمس دنانير الخمسه الثانيه حق شنو
ندى: بشتري سي ديات علشان بسوي مكسات اغاني وابيع على البنات
فاطمه: الحمدلله والشكر اخاف روتانا بس!
ندى تقلدها: اخاف روتانا بس مالج شغل كيفي والله ....
سعاد عصبت على اسلوب ندى: احترمي اختج العوده وعن المصاخه سمعتي
ندى: اسفــه ... انزين صج يمه يوم الخميس بنروح الشاليه؟
سعاد: يقولون
فاطمه: يوم الخميس شاليه ؟؟ ... ما قلتولي متى صار هالاتفاق؟
ندى: لما صارت الخيانه
فاطمه بطلت عيونها: أي خيانه بعد ؟؟؟
سعاد: لما طلعتو حق السينما .. نوره اقترحت ومبارك وافق
فاطمه الابتسامه ماليه ويها: وناسه الاسبوع الياي كله سوالف حلوه .. خطبة ريووم وبعدين شاليه وناسه
ندى: ريم انخطبت؟؟ يحليلها
فاطمه: ايي
ندى: الفال لج نفتك منج
سعاد: ولج يا رب ...
فاطمه: وعبود يمه
سعاد: والله عبدالله شكله بيسوي نفس خالج يوسف ما يبي... وخلوني مو الحين .. الافطوم متى تطلع النتايج؟
فاطمه: اتوقع بعضهم طلعو بس انا بخليهم كلهم مره وحده على الاسبوع الياي
سعاد: وين الله يوفقج
ندى: صج يمه على طاري خالي يوسف اهو شسالفته مع الزواج؟
فاطمه: ايي صج يمه شفيه ؟
سعاد: مافيه شي بس الرياييل عليهم حركات جذي عادي عادي .. اقوم ادق على حياة اشوفها شسوت على شسمه ... (وقامت وكان مبين عليها تتهرب)
فاطمه: ندوي تهقين خالي يوسف شفيه؟
ندى: مادري بس شرايج توديني محل الكمبيوتر ونفكر بالطريج
فاطمه تطالع ندى بنص عين: عندي امتحان بقوم ادرس .. (وتقوم)
ندى: مالت مامنكم فايده ... ماكو غير بدور وسايق خالتي ليلى خل اقوم ادق عليها ونروح .....

 

[miss 3yara]

موضوع يوسف كان محير الكل مو بس فاطمه وندى تهربه من الزواج كان واضح بس محد عارف السبب غير خواته ومبارك ومرته نوره اللي تعبو واهم يكلمونه بس اهو دايم على كلمه وحده .....


يوسف: مابي ماااااااااااااابي مو غصب الزواج
نوره: انت بس اسمعني والله خوش بنيه ... انزين عرفت من اهي .. من بنته؟
يوسف يسكر اذونه: ماااااااااابي اسمع شي خلاص سكرو هالموضوع
نوره: ايي لييييش؟؟؟ بتم جذي عزوبي طول عمرك
يوسف: ايي زين بظل عزوبي ..عاله عليكم جذي بدون زواج بعنس زين
ساره: ايي انا بعد معاك عمي
نوره: انتي سكتي سكتي لا تزيدين النار حطب
يوسف: والله صاجه بنت اخوي .. شنبي بالهم خلينا جذي مستانسين سينما وطلعات مو صح سويره
ساره: صح
يدخل مبارك عليهم: شنو اللي صح؟؟
الكل سكت ما عدا نوره تطالع يوسف وساره: شفيكم سكتو؟؟؟ .. القطو كلى لسانكم توكم ماكليني بالحجي يلا اشوف ردو الحين والا ابوي ما يقدر الا على امي
يوسف: لا بس اهو كل واحد له وجهة نظر صح ساره؟؟
ساره: أي صح والطعن بالميت حرام
يوسف: واللي ما يطول العنب حامض يقول عنه حامض
ساره: وخلصت وملصت والديايه عرست
يوسف: غبيه انتي احنا ضد هالمبدأ يا متخلفه ... (ويقلدها) والديايه عرست ... مالت عليج حتى مالت عليج مدام ما تعرفين تقولين امثال وغطاوي لا جان تحجيتي مع هالكشه (ويطقها على راسها ويشم ايده) شحاطه بشعرج الله يخسج صابون تايــد مادري دهن بريك اقوم بس اشوف شغلي .. عن اذنك اخوي مبارك
والكل يطالع يوسف واهو رايح ولا تكلم ولا كلمه ..
مبارك: كنتي تكلمينه عن الزواج عدل؟
نوره: عيزت يا بوخالد عييييزت منه
مبارك: مبين عليه اخوي وافهمه
ساره: ايي خلوه على راحته متى ما بغى بيتحجى
نوره: انتي لو ما تتدخلين احنا بخيــر
ساره: زين زين ولا تزعلين ام خالد خلاص سكتنا
مبارك: فيصل وعدني يحاجيه واهو يحب فيصل ويسمع كلامه نشوف يوم الخميس بالشاليه بذكره
ساره: ليش الخميس الياي شاليه؟
نوره: ايي الزواره هناك
ساره: صج وناااسه اقوم انشر الخبر عيل عن اذنكم ..

وتروح تركض تجري الاتصالات مع شوق وفاطمه وهالحجي على الساعه 8 بالليل عالتلفون ...
فاطمه: ايي قالت لي امي
ساره: وليش ما قلتيلي؟؟
فاطمه: والله بالي مو وياي سويره قاعده ادرس (وتسمع احد يطق الباب) .. لحظه سويره .. منوووو؟
ندى: انا شقاعده تسوين؟؟
فاطمه: دخلي .. سويره شوي واكلمج زين ..اوكي باي
ندى: شقاعد تسوين
فاطمه ترفع الكتاب: قاعده ادرس ليش ؟
ندى: قومي لبسي بنطلع
فاطمه: وين بنروح ؟؟
ندى: بيت عمي خليفــه
فاطمه عفست ويها: وليش ان شاء الله
ندى: فواز وصل من الاردن وابوي تحت ينطرنا كلنا بنروح نسلم عليه
فاطمه: ومتى وصل هذا؟
ندى: امس بالليل ابوي يقول
فاطمه: اففففففف وهذا وقته مالي خلق مجاملات ورسميات
ندى: يعني انا اللي ابي .. قومي لبسي بسرعه ابوي ناطرنا يلا .. (وتطلع وتصك الباب)
فاطمه: اففففففف الله يصبرني على سخافة منيره ...
وقامو بيت بو عبدالله كلهم وراحو بيت خليفه بو فواز .. فواز كان يدرس بالاردن يكمل علشان ياخذ البكالريوس في الهندسه والحين خلص وتخرج، وكان معروف عنه ان شري وشيطان ومهمل بدراسته بس لما كبر تحرك شوي مو منه طبعاً من حنة امه نوريه، المهم وصلو بيت بوعبدالله ولا بيت بواحمد (عمهم سعد) هناك فاطمه ارتاحت لما شافت اميره وعاليه موجودين علشان تقضيها سوالف معاهم وتتجنب منيره، لما دخلو سلمو وما كان في غير خليفه قاعد بس نوريه وعيالها مو موجودين وكانو قاعدين في صاله كبير فيها جلستين صارو الرياييل بصوب والحريم بصوب بس البيت كان وايد فخم طبعاً من فلوس نوريه ...



فيصل: قرت عينك يا فواز
خليفه: بوجه نبيك يا بوعبدالله ما بغينا نخلص من هالدراسه
سعد: ايي والله .... بس وينه فواز ما شفناه؟؟
خليفه: ايي الحين ياي بس يبدل .. حيا الله من يانا
الكل: الله يحييك.....
سعاد: انزين وين نوريه والبنات .. طالعين؟
خليفه: لالا ههههه وين طالعين!! ... موجودين بس يبدلون فوق..
شيخه تساسر سعاد: صار لنا ربع ساعه قاعدين ولا بين احد منهم صج ما يستحون
سعاد: اكيد نوريه قاعده تطبخ فوق ليش ما دقينا عليها قبل لا نيي تدرين فيها مع الاتيكيت عشتو ..

الا بنزلة نوريه وكانت لابسه ذيك الدراعه الكشخه ومو مخليه مكياج مو حاطته ومسويه شعرها لانها ما كانت متحجبه ورافعه خشمها فوق واهي تمشي دخلت سلمت على القاعدين وباركو لها على فواز ورجعته بالسلامه، وناحية الحريم ..

نوريه واهي تقعد: الله يبارك فيج ام عبدالله .. ايي تدرين الحين الدبلوم ما يسوي شي .. الرواتب ضعيفه والدنيا مطالبها وايد ..(وكان واضح من كلامها انها تتكلم عن عبدالله)
شيخه: شدعوه عاد ما يسوي شي نوريه الله يهداج والله الريال بخبرته وشطارته يقدر يزيد فلوسه مو شرط شهاده
نوريه: ايي ..(ومبين مو عاجبها الكلام وتلف على اميره) .. اميره شلونج صج تطلقتي؟؟ .(شهالاسلووووب)
اميره اللي حست الدنيا تدور فيها بس مسكت نفسها: أي انا طلبت الطلاق
اميره: ايي بس لو صابره وين هالايام وحده تحصل ريل يلمها ...
شيخه وقلبها عورها على بنتها: يلمها بيت ابوها ويحضنها بعد ولا تتم عند ياهل يأذيها
سعاد تحاول تغير الموضوع: الا وين العيال نوريه ؟؟؟
نوريه مو عاجبها: نازلين.....
فاطمه تكلم عاليه بصوت واطي: ودي اقوم ادوس في بطنها
عاليه: قليلة الادب شفتي شتقول حق اميره .. بروح اميره بالغصب قاعده تنسى الموضوع
فاطمه: خل تولي بس .. (وتلف ناحية الدري على صوت خطوات) ... كا شرفت .. سيده ملعقه
عاليه: خخخخخخخخ الله يقطع ابليسج فطوم .. بس عفيه لاحظي معاي شلون تسلم على احمد اخوي
فاطمه: أي شي لاتقعد بحضنه خخخخخخخخخ
اميره واهي صاكه على اسنانها: بسكم انتو فضحتونا
ويت منيره سلمت صوب الحريم وقعدت صوب البنــات ...
منيره: ها فاطمه خلصتي امتحانات؟؟
فاطمه: لا يوم الاحد اخر امتحان
منيره: شنو امتحانج ؟
فاطمه: ادارة تسويق
منيره: ايي سهل .. انا خلصت امتحانات من يوم الاربعا افتكيت
فاطمه: أي زين ... (وتلف على عاليه وتكلمها بصوت واطي) .. عطيني المزهريه اللي يمج
عاليه: ليش؟؟
فاطمه: بطقها براسها تدوخ ولا تموت أي شي بس المهم ما اسمع صوتها
عاليه: ههههه فطوم بس امبيه والله الحين ينتبهون علينا .......
شوي الا فواز نازل من فوق الكل كان يشوفه على نزلاته الديره في الاجازات مرات، بس البنات خبرهم فيه من سنين، واهو يسلم على الرياييل ...
ندى تساسر فطوم: الحين هذا فواز؟
فاطمه: ايي .. بييه تغير وايد
عاليه: فطوم هذا فواز .. تذكرينه قبل ؟

فاطمه تهز راسها بمعنى ايي وجنها تتذكر شطانته وشره معاهم، ماتغيرت ملامحه الشريه بس كان طويل وايد وعريض وشعره شوي طويل بس مافيه حلاة يعني عادي شكله ، ويي فواز صوب الحريم وسلم عليهم..

فواز: شلونج عمتي شيخه عساج بخير
شيخه: بخير وليدي الحمدلله على السلامه وعالبركه ان شاء الله
فواز: الله يبارك فيج .. عمتي سعاد شلونج
سعاد: هلا يمه فواز شلونك انت .. واخيراً افتكيت من الغربه
فواز وعينه صوب البنات: أي والله ... شلونكم بنات عمي
البنات: الحمدلله بخير ....
نوريه: هههه فواز اكيد مو ذاكر ولا وحده فيهم .. (وتقوم تروح صوبهم) هذي ندى بنت عمك فيصل وهذي عاليه واميره بنات عمك سعد ..(وترجع على فاطمه وتحط ايدها على جتفها) وهذيييييييي فاطمه بنت عمك فيصـل.
فواز: ماشاءالله كبرو . اميره وعاليه اتذكرهم شوي .. بس فاطمه تغيرت وايد
وتنط اخته منيره: واحلوت صح فواز ههههههههه
فاطمه تبتسم وتكلم نفسها: مالت عليج ضحكتي من سرج بلى غبيه ما تعرف تتكلم .. (ويقطع تفكيرها صوت فواز)
فواز يقعد يم منيره اخته: وين تدرسين فاطمه؟
فاطمه: كلية العلوم الاداريه
منيره: معاااااااااي .. بس تخصصها غير انا تمويل اهي ادارة اعمال
فواز: حلو حلو .. موفقه ان شاء الله
فاطمه: مشكور .. (وتلف على امها) يمه خل نمشي وراي امتحان وبروح ادرس
نوريه: وين تو الناس ما قعدنا صبرو شوي ..(مبين مو من قلبج)
سعاد: ما عليه نوريه وقت ثاني ان شاء الله والايام يايه ..(وتأشر حق بوعبدالله )...
فيصل يرد عليها: ان شاء الله ... يلا بوفواز على اتفاقنا
خليفه: وين تو الناس اقعد ياخوي شوي
فيصل: لا والله لازم نمشي فاطمه وراها امتحان وانا بعد وراي اشغال
سعد: يلا اقوم معاك عيل انا بعد يلا احمد ...يلا ام احمد
خليفه: لا كلكم بتقومون شوي عاد
سعد: ما عليه وقت ثاني ...
وبهالوقت احمد وعبدالله يتلكمون مع بعض...
عبدالله: هذا شفيه لزق صوب الحريم
احمد: شدراني ... بس هذا اهو دمه ثقيل ما تغير
عبدالله: اففففففف ثقيل وبس الا غثيث ...(ويقطع عليهم صوت بوعبدالله)
فيصل: يلا يبه عبدالله .. يلا يا جماعه مع السلامه ...


والكل مشى وظلو خليفه ونوريه وعيالهم قاعدين وفجأه صرخت نوريه ......


نوريه بصوت عالي وحاد: مره ثانيه اذا اخوانك وحريمهم بيوون قولهم دقو على نوريه مو عليك انت
خليفه باستسلام: ان شاء الله من عيوني حبيبتي ما عليه ما صار شي
نوريه بحديه اكثر: عندك ما صار شي انا عندي تصير اشياء ... شوف هذي اخر مره وانا نزلت علشان خاطر فوااااز بس ولا انت مو كفو انزل علشانك ومره ثانيه بتشوف شي ما يعجبك ..(قويــه)
خليفه: لا لا حقج علي يالغاليه ولا تزعلين تامرين امر انتي ..يلا انا ماشي تامريني بشي بعد
نوريه: لا بس مو تنسى دوانية اخوي بوسالم نفس ذاك الاسبوع
خليفه: لا حبيبتي مو ناسي انتي بعد دقي عل يذكرني
نوريه: ليـــــــــش مكتوب على جبهتي سكرتيره؟!!!!
خليفه: هههههه دمج خفيف ههههه يا حلاتج يلا مع السلامه ..(وطلع)
مسكين خليفه شخصية ممسوحه يم نوريه كل هذا بس علشان فلوسها لان خليفه مادي وايد وبنفس الوقت مايحب يعتمد على نفسه على طول كان تحت نوريه واخوانها اللي شغلوه عندهم بشركه ويمشونه على كيفهم واهو سمعاً وطاعه بس علشان الفلوس .. صج زمــن

فواز اللي كان سرحان بشي وفجأه سأل: فاطمه جم عمرها يعني ؟؟ .. (ويطالع اخته) ... كبرج منيره؟
منيره: اكبر مني بسنه اقل من سنه بعد
نوريه تبتسم: 10 شهوور ...ها صدقت كلامي .. متى نبتدي؟
فواز بخبث: هههههههههههه ... شوي شوي يا ام فواز لا تستعيلين كل شي بيوصلج حبه .. حبه ....


شيقصد فواز بكلامه؟؟ وشتقصد نوريه بكلامها؟؟ ... معقوله فواز يفكر بفاطمه!!!!.. واهو اللي كان عدوها واهم صغار كان دايم يأذيها باي شكل ويتلذذ لما يشوفها تصيح ويردد عليها جملته المعهوده .. استانس لما اكسر راسج !!! .... على طول كان يقول لها اذا تهاوشو وقامت تصيح، وفاطمه عمرها ما نست هالمواقف، هذا غير سوالف نوريه مع سعاد لما كانو في البيت الكبير كانت دايم تسوي لها مشاكل مع خالتهم ام خليفه ولاسباب تافهه وهذا اللي خلى سعاد تطلع بسرعه من البيت العود وتسكن بشقه بس علشان تبعد عن شر نوريه وعيالها .....


فاطمه عالتلفون: لا لا مو انسانه هذي مادري.. مادري شلون اوصفها حقيره حقيييره
ريم: استغفرالله ليش تسوي جذي
فاطمه: الغرور بس .. ليش عندها خير والغلط من عمي خليفه مخليها على كيفها مو موقفها عند حدها اتوقع زفته لما طلعنا عادي ترى
ريم: بسم الله منها شنو هذي !!!
فاطمه: اقولج مو ادميه، المهم خل تولي ... اقول حرم صلاح
ريم: فطووووووم مو ناقصتج ترى كفايه بنات خالاتي
فاطمه: ههههههههههه لاااا علشان تحسين فيني اذا عصبت
ريم: والله اسفه على كل شي سويته قبل ماكنت افهم
فاطمه: ههههههههههههههه خلاص مسامحتج
ريم: انزين قبل لا تسامحيني بسأل .. للحين ما تكلم؟؟
فاطمه:آآآآآآآه يا ريوم ..لا امس تدرين انا في بيتهم وصادفته وتكلم معاي بس عادي أسأله عاديه
ريم: ويي فطوم هذا كلش مايعرف
فاطمه: لالا ريوم لاتقولين جذي اهو بس يستحي مادري ليش مع ان موظف في بنك ويتعامل مع ناس واجتماعي ويسولف عادي بس معاي يضيع الحجي وينبلع لسانه
ريم: هههههههههههههههههههههه مسكين .. جذي مدوخته فطوم!!
فاطمه استحت: ريوووم يوزي عني .. ترى وحده بوحده
ريم: لا لا خلاص خلاص ... انزين وشسالفة ولد عمج هذا؟
فاطمه: افففففف لاتذكريني فيه حسيت بختنق واهو يكلمني مادري انسان غثييييييث بشكل
ريم: طالع على امه هههههههههههههه
فاطمه: هههههههههه أي والله والاخت خو معاهم
ريم: اشوفها بالجامعه جنها شامه ريحه خايسه واهي تمشي .. ترى محد يشتهيها وكل رفيجاتها مرافجينها بس علشان سمعة امها وفلوسها ومعارفها .. تدرين البنات ينادونها منيره نوريه مو منيره خليفه
فاطمه: مالت عليها ... انزين شلون الدراسه وياج حفظتي؟؟
ريم: ايي والله باقي اخر فصـــل وباجر بس اراجع
فاطمه: انا باقي لي فصلين بس وشكلي بخليهم حق باجر الصبح..الساعه جم؟
ريم: ايي الحين الساعه 1:30
فاطمه: صج امبيه يلا يلا خل انام
ريم: يلا تصبحين على خير حبيبتي
فاطمه: وانتي من اهل الخيــر ...(وسكرته وقعدت تطالع الكتاب) انا ليش انام مافينيي نوم خل اكمل احسن بس اول بنزل اسويلي قهوه واسهر انا والفصلين والقمره خخخخخخ ... (هبله فطوم لا يغركم حياها مع سعود)
فاطمه طلعت من غرفتها تغني " من يصدق الاحساس وين الوفا يا ناس كل شي متغير في عالم يحيـر ... " واهي نازله على الدري شافت الليتات تحت مفتوحه وتسمع صوت تلفزيون سكتت بالأول خافت تنزل بعدين وقفت تفكر...


فاطمه: يعني منو تحت ؟؟ ندوي ماتسهر الا على الكمبيوتر .. ابوي التلفزيون بداره.. منو؟ مو معقوله الشغاله .. ماكو الا اتشجع وانزل ... بسم الله الرحمن الرحيم ..(ونزلت شوي شوي وتطل بالصاله وصرخت ) .. عبدالله!!!!!!!!!!
عبدالله منسدح على الغنفه بس نقز من صرخة فطوم : خرعتينيييي فطوم شمقعدج؟
فاطمه تقعد يمه:هههههههههههه انا نازله اسويلي قهوه .. بس انت شمقعدك ؟.. ما وراك دوام؟
عبدالله يتعدل ويقعد: ما ياني نوم نزلت .. تدرين روحي سويلنا قهوه وتعالي نسولف شوي يمكن تدوخيني وانام
فاطمه تبتسم: من عيوني .. دقايق بس ..(وراحت المطبخ )
عبدالله يكلم نفسه: فرصه اكلمها بالموضوع وافتك
شوي وتدخل فاطمه بايدها كوبين: وهذيييي القهوه تفضل مسيو عبدالله ..
عبدالله يحط الطاوله يمه: دام فضلج كونــــــــتيسه فطوم ..(شد عالكلمه)
فاطمه: هههههههه .. جنه قصدك بدون كونـ
عبدالله: هههههههههه لا والله قصدي كونتيسه ... (ومبين قصده شي ثاني ويشرب قهوه).. فطوم ودي اتكلم معاج بموضوع
فاطمه بقلبها: لا يكون بيتكلم عن سعود؟! .. شكله حاس بشي الله يستر .. ولا سعود كلمه معقوله !!!!
عبدالله يقطع تفكيرها: معاي فطوم ولا نمتي؟
فاطمه: لا معاك معاك قول خير
عبدالله يحط الكوب عالطاوله ويطالع فاطمه: فطوم شرايج بعاليه بنت عمي سعد؟
فاطمه مستغربه: عاليه !! خوش بنيه ... ليش تسأل؟
عبدالله: بصراحه .. ودي اتقدم لها بس خايف
فاطمه طايره من الفرحه : من صججججك احلف احلف عبدالله الله يكثر الاخبار الحلوه ... عاد صج صج اختيارك مضبوط عاليه تهبل ترى ..بس ليش خايف؟
عبدالله: مادري .. احاف اقولج ما تفهميني
فاطمه: ولو عبيدان انا فطوم اختك ولا نسيت
عبدالله: لا ما نسيت بس انا فكرت يعني ... عاليه جامعيه واللي اعرفه من كلام احمد اخوها ان عندها ميول تكمل دراستها .. وانا تدرين دبلوم يعني مـ.....
فاطمه تقاطعه: عبداللله شتقووووووول انت ؟!!! ... عاليه بنت عمي سعد مو عمي خليفه .. يعني عمرها ما تشوف هالسوالف ولاتهتم لها .. حرام عليك عاليه مو جذي ترى
عبدالله: مادري فطوم مادري انا صارلي فتره الموضوع في بالي بس قلت افاتحج قبل لا اكلم ابوي مابي ترفضني واتفشل
فاطمه تفكر شوي وترد: ولو ان كلامك مو عاجبني بس عندي فكره .. شرايك افاتحها بالموضوع واجس النبض وارد لك خبر؟
عبدالله ابتسم: وهذا اللي كنت بطلبه منج .. بس فطوم عليج الله بيني وبينج وبينها وحتى اذا رفضت والله ما بزعل والله العظيم
فاطمه تقوم: خلاص اتفقنا ... يوم الخميس توصلك الاخباااااااار ..
عبدالله: شكو الخميس؟
فاطمه: ماتدري؟ .. بنروح الشاليه يوم الخميس وامي تقول خالي مبارك مكلم ابوي يعزم عمي سعد وعمي خليفه وطبعاً عاليه بتكون موجوده باخذها على جنب واكلمها
عبدالله: خلاص صار بس مثل ما قلت لج محد يدري واذا رفضت ما راح ازعل ابي لها الخير والله
فاطمه: ما عليك لا تحاتي .. خلني اصعد اكمل كتابي تصبح على خير يا روميو ههههههه
عبدالله يحذفها بالكوشيه: وانتي من اهله يا ام السعف والليف ....


عبدالله ارتاح لما فاطمه ووعدته بانها تكلم عاليه لان المسكين صار له فتره الموضوع في باله ويبي يتكلم فيه بس مو عارف ، وظل طول الليل يفكر بالكلام اللي راح يصير بين فاطمه وعاليه.. وان هل راح توافق؟!! وصج كلام فاطمه انها ما تعمل حساب حق مبدأ الشهادات؟؟؟؟؟ الله يصبره لي يوم الخميــس ....



و يوم الاحد خطبــة ريم ....


فاطمه تنزل من الدري وتكلم ريم بالتلفون: يلا كاني طالعه .. باي (امها كانت قاعده بالصاله) صباح الخير
سعاد: صباح النور ..(كانت تطالع التلفزيون)
فاطمه: يمه انا بمر ريم بنروح الجامعه بعدين برجع اقعد عندهم لي الخطبه وارجع
سعاد: الله وياج حبيبتي بس ماخذيتي شي تلبسينه
فاطمه: لا ما يحتاج خذيت لي بجامه وعبايه بقعد فوق ما بنزل انا بس جذي مؤازره ... يلا انا رايحه يمه ادعيلي
سعاد: الله يوفقج ..(وتطالع فاطمه واهي رايحه) .. ويرزقج بولد الحلال يارب ...

فاطمه وصلت بيت ريم خذتها وطول الطريج واهم يطفرون بعض ويضحكون ، وصلو الجامعه ودخلو الامتحان امتحنو وطلعو ..
ريم: اشوه الامتحان سهل
فاطمه: حده انا ضامنه الـa
ريم: هههههههههه عكس الاحصاء .. الا شرايج نروح نشوف يمكن طلعت النتايج
فاطمه: اخاف ريوم مو زينه نتيجتي
ريم: يلا عاد فطوم مو لي هالدرجه .. انا اشوفها واقولج امشي
فاطمه: مابي خليها وقت ثاني الحين ما يمدي على ما نوصل البيت ونقعد ونجهزج
ريم: اهم بيوون عقب الصلاه مو على الغدا !!
فاطمه: ادري بس والله ريوم هالاسبوع حلو مابي اضيق خلقي
ريم: كيفج ... بس ليش هالاسبوع حلو صاير شي ؟
فاطمه: امشي السياره واقولج ...
وطول ما هم يمشون تسالها ريم شصاير وفاطمه تقولها بالسياره اقولج ...
ريم: هذا احنا وصلنا السياره ..(وتسكر الباب وتعدل قعدتها) .. يلا قولي شصاير عاد
فاطمه: اوكي خل اشغلها عاد ..(ومشت ) اول شي حلو خبر خطبتج ..
ريم ابتسمت : وشنو الشي الثاني؟
فاطمه تبتسم : عبدالله اخوي يحب عاليه بنت عمي سعد
ريم: حلفييييييييي .. من متى ؟؟
فاطمه مستانسه: مادري ... بس اهي ماتدري انا بفتح الموضوع معاها يوم الخميس
ريم: وليش الخميس روحي لها وكلميها.. والله عاد عاليه تهبل قعدت معاها مره بس تدخل القلب
فاطمه: ايي بس بنطر لي الخميس لانه بنروح الشاليه واهم بيوون مانبي احد يحس والكلام بيني وبينج ريوووم ما صار شي ترى بس اتمنى توافق
ريم: وليش ما توافق عبدالله اخوج بعد خوش صبي وكفايه ولد عمها مو غريب
فاطمه: ايي بس اهو خايف من سالفة اهي جامعيه واهو دبلوم
ريم: اسمحيلي اخوج ماعنده سالفه .. انزين كا شسمه اللي بيخطبني دبلوم ترى
فاطمه: هههههههههههه صار شسمه! اسمه صلاح صلاح ماتعرفين تقولين صلاااااااااااااااااااااااااااااح
ريم: اووو بس عاد فطوم والله من اسمع اسمه بطني يعورنييي وادوخ
فاطمه: هذي اعراض حمل الله يهداج
فاطمه وريم : ههههههههههههههههههههههههههههههههههههههه



ووصلو بيت ريم قضوها سوالف وضحك وتغدو وريحو شوي وعلى الساعه 5 بدت التجهيزات، ولبست ريم بدلة عيد الاضحى اللي قالت عنها كانت ستايل بنطرون وقميص ماخذته من انسام الخلف كانت وايد حلوه خامتها تفته وموديلها كان غريب وروعه لونها بيج ومدخله معاه اخضر فاتح وذهبي وسوت شعرها استشوار عادي لانه اصلاً مدرج بس حطت لها فطوم كلبس صغير بحيث رفعت شعرها شوي ونزل الباجي وبين طوله وتدرجه وحطت ميك اب خفيف وناعم، ووصلو الحريم اول وقعدو تكلمو بعدين ام ريم نادتها علشان تنزل ويشوفونها وهالوقت كانت فاطمه فوق نص ساعه وتدخل عليها ريم حالتها حاله...


ريم: فطوم عطيني شيلتي ..(وتقعد على السرير وايدها ترجف)
فاطمه بايدها الشيله: هاج بس شفيج ترجفين جذي وحق شنو الشيله؟ بترقصين لهم شرقي!!
ريم تطالع فاطمه: فطوم بيدخل يقعد معاي
فاطمه: من صجج!! انتي قلتي بس حريم بيوون يشوفونج ..
ريم: وماكو حريم بس امه خالتي عواطف يعني يايه تجس النبض..( بعدين سكتت ونزلت راسها)
فاطمه ترفع راس ريم بايدها: ريوم انتي ما تبين؟
ريم وصوتها مخنوق: مادري احس متلخبطه موعارفه الحين اذا يي شنو بقول ماعرف
فاطمه: ريوم اذا تبينه ومرتاحه له الله بيسهل الامور لا تحاتين والله ماعندج سالفه ..
ريم: بس قصو علي ماقالو بيدخل..
فاطمه: ريووم انتي هبله ترى ..اول شي هذي رفيجة امج يعني تعرفكم وانا متأكده اهو قايل يبيج
ريم: مادري فطوم .. خل اقوم البس وانزل ادعيلي
فاطمه: هههههه داخله امتحان انتي .. الله وياج حبيبتي



ونزلت ريم وكان صلاح واصل وقاعد، كانت وايد وايد وايد مستحيه وهذا طبع ريم بس شوي شوي بدت تسولف معاه عادي وارتاحت وبقلبها تذكرت كلام فاطمه، وبعدين سكتو وقطع السكوت صوت ام صلاح تكلم ام ريم ..

ام صلاح: ام عبدالوهاب احنا خوات ومابينا حجي سألو عنا وجذي صح؟
ام ريم: اكيد حبيبتي احنا اكثر من الخوات بعد
ام صلاح: وانتو بعد ما يحتاج نسأل عنكم عشرة عمر بينا بس من حق البنت تفكر وعلى راحتكم متى ما صار عندج رد دقي علي
ام ريم: وانتي بعد خل صلاح يفكر
صلاح: لا عمتي انا مفكر وخالص وموافق وحتى ريم موافقه
ريم ويها صار طماطه من الحيا وما عرفت ترد بس بداخلها ودها تقول ايي كلامه صح
ام صلاح: هههه صلاح اشوفك بسرعه خذيت الجواب
ام ريم: والله وين بنلقى احسن منك يمه
صلاح: عيل خلاص الملجه الاسبوع الياي ..(ويلف على ريم) شرايج ؟
ريم مو عارفه شنو تقول بس كان ويها وابتسامتها رد واضح للكل
ام صلاح: صلاح يمه خل البنت على راحتها تفكر مسكينه.. ولا انتي راضيه يا ريم على كلامه
ريم خلاص مو قادره تتحمل نزلت راسها وما ردت ولاكلمه
صلاح ابتسم ويطالع ام ريم: عمتي ترى انا شاري ريم وابيها زوجه لي .. يعني بصراحه ابيج تساعديني
ام ريم: ما يحتاج اساعدك كافي انك ولد محمد وعواطف ..
ام صلاح: تسلمين حبيبتي عيل ننطر منكم الرد ان شاء الله ..(وتقوم) يلا نستأذن
ام ريم: عطوف اشوف من صجج سويتيها رسميات .. قعدو تعشو عندنا بعد شوي يبتدي المسلسل نشوفه مع بعض
ام صلاح: هههههه لا شفيج يعني خطوبه لازم اعيش الدور
ام ريم: هههههه الله يقطع ابليسج عطووف دقي لي وصلتي خل نحش فيهم ..(مبين مخططين حق الموضوع)
ام صلاح: اكيد ... يلا مع السلامه ..

وتطلع ومعاها ام ريم طبعاً السوالف ماتحلى الا عند الباب، وصلاح بعده صوب ريم ..
صلاح مبتسم: جنهم نسونا
ريم:..(مبتسمه وساكته)
صلاح: تدرين بظل قاعد ما بروح .. شرايج؟
ريم مستحيه: على راحتك
صلاح: هههههه ترى اسويها
ريم مستحيه حدها وما ردت عليه لانها بس خلاص تلخبطت وجسمها قام يرجف
صلاح يطالعها واهي منزله راسها وحس فيها وابتسم: خلاص بروح بروح ... مع السلامه ريم
ريم بحيـا: الله يسلمك ....


اهو طلع من هني اهي ركض لي فوق تقول حق فاطمه اللي صار وقلبها يطق وقالت لها بالتفصيل شنو صار وفاطمه ماتت من الضحك على الموقف ...

ريم: هههههههه امبيه لا صج مادري شلون تحملت وقعدت
فاطمه: ههههههه لانج مرتاحه ... ارتحتي له ريوم؟
ريم تبتسم وتنزل راسها شوي وترفعه: ويد فطوم اكثر من ما تتصورين حسيت جني اعرفه من سنين احساس غريب وحلو
فاطمه: حبيبتي الله يسعدج يا رب يعني نقول موافقه؟
ريم تبتسم: أي موافقه ابيه فطوم ابيه
ام ريم اللي كانت واقفه عند الباب: خلاص عيل خل ادق على عواطف
ريم نزلت راسها وانربط لسانها، كانت فشلانه حيل ان امها سمعتهافاطمه: هههههههههه أي خالتي دقي خلاص العروس موافقه
ام ريم تيي وتحضن ريم: يمه ارتحتي له؟؟
ريم حنقتها العبره: أي
ام ريم نزلت دموعها: يعني بفرح فيج؟
ريم سبقت الدموع ردها: ..... أي
ام ريم وخرت ريم عن حضنها ومسحت دمعتها وابتسمت: والله وبشوفج عروس ريووم الحمدلله رب العالمين .. كنت خايفه ما توافقين
فاطمه تمسح دموعها: لا خالتي غصبا عليها توافق وين بتلقى احسن من صلاح
ريم تمسح عيونها: واهو بعد وين بيلقى احسن مني
فاطمه: ههههههههه بهذي صدقتي ..(وتحضن ريم) الف مبروك الف مبروك ريم


ام ريم ما جذبت خبر ونقلت الموافقه حق ام صلاح يوم ثاني الصبح بعد ما كلمت ابو ريم اللي رحب وايد خصوصاً ان اهل صلاح ربعهم من زمان، واتفقو على الخطبه الرسميه يوم الخميس وبيحدوون يومها المهر وموعد الملجه وهالسوالف...


بنفس اليوم بالليل في بيت بوناصر سلمان وحياة وناصر على العشا ...

ناصر: يمه عطيني خبزه
حياة: ان شاء الله ...(وتعطيه) هاك يمه ..(تلتفت على سلمان) اصب لك جاي بوناصر
سلمان: أي ولا عليج امر
حياة باسلوب هادي: ان شاء الله ...(وتصب الجاي وتعطيه) تفضل
سلمان شوي مستغرب بس مطنش ماله خلق تعيد سالفة يوم الاربعا: دام فضلج
ناصر: يبا عيال عمي خليل بيروحون الشاليه يوم الاربعا ميخالف اروح معاهم
سلمان: متى يعني ؟
ناصر: الصبح بيمشون .. انا قلت يوم الثلاثه ارجع من النادي مع فهد واروح بيتهم انام عندهم علشان اروح معاهم بدل ما تقعد من الصبح توديني .. ميخالف؟
سلمان: أي يبه ما عليه بس ترى الخميس بنروح بعد الشاليه مع خوالك ولازم تكون موجود
ناصر: ما عليه اقول حق ريل عمتي وفاء ينزلني معاه لان ما راح يبات
سلمان: خوش اللي يريحك
ناصر مستانس: مشكور يبا .. (ويقوم) الحمدلله
حياة: ما كليت شي نصور اقعد
ناصر: لا يمه بس شبعت والله .. وبروح اقعد عالكمبيوتر شوي
سلمان: تعال صج وين الوعد اللي بيعلمني على الكمبيوتر صار لك شهر الحين
ناصر: ههههه ما عليه يبه اوعدك والله .. بس صج تبي تتعلم صح عندك ندى وبدور بنات خالاتي صج صج خبره
سلمان: يقولون بس لا انا ابي ولدي يعلمني
ناصر: خلاص يبه بنشوف لنا يوم نرتبها .. عن اذنكم ..(ويصعد فوق ناصر وايد عاقل ومؤدب وحبوب مثل ابوه)
حياة وسلمان في صمت قاتل من بعد اللي مرت على السالفه 3 ايام كانو هاديين حيل وهالشي خوف سلمان لا يكون هذا الهدوء اللي يسبق العاصفه ..
سلمان: الحمدلله ..(ويقوم يروح يغسل ايده ويروح عند التلفزيون مثل كل مره )
حياة: ليكـا .. تعالي شيلي الصينيه


يت الشغاله تشيل وحياة تشيل معاها بس عينها على سلمان واهو يقلب بقنوات الاخبار قامت صعدت فوق، سلمان شافها واهي تصعد ورد حق التلفزيون وبقلبه زين لو تروح تنام اليوم مبجر ويمر بعد هاليوم بدون نجره بعد مادري شفيها حياة شكلها وراها شي .. الله يستر

حياة اللي قاعده بدارها ومثل كل يوم مر من بعد الاربعا تفتح الكبت وتطالع ملابسها وترد تسكره قعدت عالسرير...

حياة: لازم اسوي شي خلاص ناصر كبر وكلها جم سنه تطوف ويتزوج واظل انا وسلمان بروحنا بالبيت، معقوله بنعيش جذي لا كلام ولا تواصل مثل الاغراب .. اغراب (رنت الكلمه باذونها وجنها صحت من نوم عميق) استغفرالله ياربي ...(ترجع تقوم وتبطل الكبت تطالع جان ترد تقعد) .. افففف شفيني انا ..

وترجع تقوم خذت بجامه ناعمه وحطت ميك اب ناعم.. كان شكلها وايد ناعم وهادي بغت تنزل بعدين ترددت فظلت قاعده مكانها ...

صارت الساعه 11:30 صعد سلمان ودخل الدار لقى حياة قاعده مكانها على كرسي التسريحه من بعيد كان شكلها يرد الروح ويشرح الخاطر قرب سلمان لها وكانت منزله راسها ..

سلمان: حياة ... حياة ....
حياة تلف وتمسح عيونها: هلا ..(كانت تصيح)
سلمان بحنان: شفيج حياة .. ليش تصيحين؟؟ ..(مسكين بسرعه يرق قلبه واول مره تقوله هلا كل مره تقوم الدنيا ولا تقعدها )
حياة تطالع سلمان:انا .. انا آسفه (وتنهد صياح)
سلمان: على شنو آسفه حياة شفيج خرعتيني فيج شي صاير شي؟؟
حياة تصيح وتمسح دموعها: انا آسفه لاني مو عارفه شنو اسوي لك .. مو عارفه اسعدك ابي اسوي أي شي بس اشوفك مرتاح بس مادري شفيني ماعرف شنو اقول شنو اسوي مادري ...(وترجع تصيح)
سلمان ابتسم وبصوت حنون: حيـــاة ... من صجج .. تتكلمين من صجج؟؟ ..(مسكين مستغرب)
حياة تصيح وتحاول تسكت روحها: أي من صجي صارلي فتره افكر بهالموضوع وتعبت وانا افكر فيه .. مابي هالعيشه سلمان مابي اعيش جذي .. (وتصيح من قلب لدرجة ان كحلها ساح على خدودها)
سلمان نزل لها ومسح دموعها بايده وابتسم: ماحب اشوفج تصيحين حياة .. وانتي عارفه هالشي ...
حياة تصيح: ادري بس مادري شسوي سلمان ...(وتنزل راسها وتصيح) .. ابي اسعدك سلمان من كل قلبي ابي بس مو عارفه ابتدي مو عارفه مادري شفيني
سلمان مو مصدق اللي قاعد يشوفه ويسمعه: حياة كفايه اني اسمع منج هالحجي يكفي انج حاسه بهالشي .. انا بعد مابي اعيش جذي ...(ويسكت ويطالعها واهي دموعها نازله على خدها) .. حياة انا احبـج انتي تحبيني؟
حياة تحاول تسكت: اي سلمان اي والله العظيم أي أي احبك سلمان احبك واحب كل شي فيك احب اسلوبك وتصرفاتك وحنانك وقلبك الطيب احبك وايد احبك سلمان احبك احبك احبك ..(وتقط روحها بحضنه وتصيح)
سلمان يلمها: بعد عمري حيااااااااة .. كل هذا فيج وساكته ليش تسوين جذي؟؟ ... تدرين من متى ودي اسمع منج هالكلمه ..(ويوخرها عنه وماسك جتفها) قوليلي بعد احبك حياة تكفه
حياة تبتسم والدموع في عيونها: احبك سلمان
سلمان مو مصدق: عيديها
حياة: احبك سلمان
سلمان طاير من الفرح: عليج الله عيديها
حياة ردت تصيح: احبك سلمان
سلمان حضنها بكل قوته: حبيبتي حياتي ياعمري ياقلبي ياروحي انا بعد احبج احبج احبج حياة تدرين اني احبج حياة .. حياة انا احبج من زمان والله من خطبتج .. لا من قبل لا اخطبج كنت احبج تذكرين قبل في بيت خالي العود بالعيد لما كنتو تيوون كنت انطرج بالحوش بس ابي اشوفج حياة تدرين ولا لا
حياة: وليش ما قلت لي من قبل كل هذا ..(وتصيح)
سلمان: لاني ماشفت منج رد حلو ماتشجعت كنتي دايماً صادتني حتى لما تزوجنا كنت احسج بعيده مع ان بينا ولد .. كنت عارف ان خالي بومبارك غاصبج بس انا كنت اموت واتزوجج حياة وكان كلي امل تحسين بحبي لج
حياة تسكت من الصياح: خلنا من اول وخل نبتدي صفحه يديده ..(وتمسك ايده) ابيك تسامحني على كل شي صار
سلمان يحضنها ويبوس راسها: اصلاً ما صار شي علشان اسامحج ما اتذكر شي غير هاللحظه الحلوه واللي ياي بعدها احلى واحلى ..


واخيراً تعدل حال حياة وسلمان بعد مشوار من الهواش والصد والنجره وجنه حياة بس كانت محتاجه هالجم كلمه من خواتها وتصلح كل شي يعني كان عندها استعداد بس محتاجه دزه صغيره ويت بالوقت المناسب، الكريهه بس لوعت جبده على ما نطقت وبيني وبينكم اللي نطقها عقل سلمان وصبره عليها صج كان ناشف معاها مرات ويناجرها بس مو من قلبه ووايد مواقف اهي شدت فيها اهو تحمل وسكت على امل تتعدل والله سمع منه وعطاه على نيته وتعدلت الامور ولا لو جان واحد غيره من زمان مطلقها وماخذ له واحده ثانيه ...



يوم الاثنين عالعصر طبعاً التلفونات ماوقفت بين فاطمه وريم ضايق خلقهم لان فاطمه بتكون وقت الخطبه بالشاليه ما راح تقدر تيي بس ريم قالت لها بتنقل لها كل شي بالتفصيل...

فاطمه يم امها بالصاله وتكلم ريم: خلاص على خير بس كل شي ابي مو تنسين وصوري بعد خل اشوف شكلج .. اوكي .. باي
سعاد: متى خطبتهم؟
فاطمه: يوم الخميس حسافه بنكون بالشاليه
سعاد: ترى بنروح من الاربعا
فاطمه: شنو بنام هناك يعني؟
سعاد: ايي
فاطمه: يمه ما يكفي كلنا!!!
سعاد: بس احنا وبيت خالج مبارك وخالتج ليلى.. خالتج حياة بتيي الخميس
فاطمه: وعمامي ؟؟
سعاد: الخميس بيوون حق الغدا بس
فاطمه: ايي اقول انا مالي خلق ويه منيره اربعا وخميس ويمعه
سعاد: هههههههه الله يقطع ابليسج فطووم




وفي بيت بوسعـــــود، شوق وسعود بغرفته يتكلمون..


شوق قاعده عالسرير: والله صدقني خوش فكره
سعود واقف ومحتار: مادري شوق .. جنها مو عدله؟
شوق: افففففف ليش مو عدله ليش؟؟ عادي اقعد وتكلم معاها بس مو انت تبي تكلمها
سعود: أي ابي بس ... بس يعني الطلعه كلها ما لها معنى
شوق تطالعه وتعصب وتقوم: انا الشرهه علي بساعدك .. لا تيي مره ثانيه تطلب شي(وتطلع بس سعود مسكها)
سعود: صبرييييييي ..
شوق تطالعه: صبرت يلا شقلت؟
سعود يطالعها: افففف سوسه سوسه .. يلا خلصيني
شوق ابتسمت: ادق؟؟
سعود: دقي خلصيني
شوق: هياااااااااا دقايق بس

وتدق شوق على فاطمه تنفذ خطتها، ويرن تلفون فاطمه ...
فاطمه: هلا هلا
شوق: ياشقوول من يوم اليمعه محد يدري عنج دقي سألي !!
فاطمه: والله ادري حقج علي بس تدرين لهيت مع خطبة ريم
شوق: اييييييي صح يحليلها خلصو؟
فاطمه: ايي يوم الخميس خطبه رسميه واقولج التفاصيل بالشاليه
شوق: أي أي يقولون من الاربعا
فاطمه: ايي توه امي تقول وناسه
شوق: حدده ، شبغيت اقولج فطوم بيي بيتكم بتسلف منج بدله معزومين على عرس يوم السبت وماعندي شي وماكو وقت اروح السوق
فاطمه: أي حياج قاعده انا
شوق: يلا دقايق بس انطر سعود
فاطمه تبتسم: قصدج مو شريف بس ما برد عليج .. ناطرتج يلا باي
شوق: هههههه اوكي باي ..(وتسكر وسعود يمها تطالعه) اول مره اجذب على فطوم الله يقطع ابليسك
سعود: وانا شكو مو انتي اللي مخططه
شوق: شسوي كسرت خاطري وباط جبدي على سكتتك والله لو انا مكان فطوم اذبحك
سعود يقوم: انتي قومي الحين خلصينا

ويطلعون يروحون بيت خالتهم سعاد حسب الاتفاق ، وفي غرفة فاطمــه ..
شوق تطالع كبت فاطمه وتبي تمشي الموضوع: جنه باخذ السوده
فاطمه قاعده على السرير كيفج .... عرس منو بتروحون؟
شوق تألف: عرس اخت وحده معانا بالجامعه
فاطمه: اييييي .. بس مو عوايدج تروحين اعراس يعني!
شوق: بعد شسوي قلت لازم اطلع الناس تشوفني علشان يخطبوني ههههه
فاطمه: هههههههه الله يقطع ابليسج
شوق: انزين انا ماعندي صندل حلو عندج؟
فاطمه: عندي اسود البسه معاها لحظه اييبه ..(وتروح عند كبت الجواتي تييبه) هذا
شوق تتحجج: بيه وايد رفيع ماقدر انا البس هالرفع بعدين مبين شكله صغير علي لا لا بخلي سعود يوديني السوق اشتري ... تعالي معاي (بدت تنفذ خطتها)
فاطمه تطالعها: شكو اروح ؟
شوق: علشان تساعديني اشتري يلا عاد فطوم ومنها نتسوق شوي قومي شنو عندج يعني
فاطمه: ماعندي شي .. عاد تصدقين ودي اطلع
شوق: يلا عيل بدلي وانطرج تحت
فاطمه: وقولي حق امي
شوق واهي طالعه وتسكر باب الغرفه: اوكي ..

وتنزل وكان سعود قاعد مع خالته سعاد اهي تسولف واهو بعالم ثاني قلبه معلق فوق ويحاتي شنو بيقول والله ان شوق وهقته عدل ...
شوق تدخل الصاله مبتسمـه: كل شي تمام ... قصدي سعود يلا
سعاد: قعدووو عاد يلا وين بتروحون؟
شوق: السوق خالتي وباخذ فطوم معاي زين
سعاد: بروحكم لا الحين عطله وزحمه وشباب
سعود: لا خالتي انا بوديهم ..(يكمل التنفيذ)
سعاد: أي اذا مع سعود روحو
وتنزل فاطمه : السلام عليكم
الكل: عليكم السلام
سعود طاير من الفرحه : هلا ... شلونج فاطمه ..(والله مادري شلون بيتكلم)
فاطمه: الحمدلله بخير
سعود: يلا جاهزه نروح
فاطمه: ايي يلا
شوق تطالعهم: ترى انا معاكم لا تنسوني
سعود: مو ناسينج يلا ... يلا خالتي مع السلامه
سعاد: الله وياكم يمه ديرو بالكم ...

وطلعو سعود كان متوتر وايد وبقلبه بيزهب الحجي اللي بيقوله حق فطوم وهذا اقتراح شوق ولان سعود قال لها يبي يكلمها بس حده توهق... وبالطريج قرروا يروحون مجمع الكوت واقترحته شوق علشان الطريج طويل على قولتها وتبي تسمع سي دي نوال اليديد ...

شوق تغني مع نوال: انت طيب هذا هو اللي يهم انت طيب .. وغير هذا ما يهم ما يهمممم ..
سعود يقاطعها: نشاز خلاص شوق لوعتي جبدنا ترى
شوق: لا والله ...
فاطمه تضحك عليهم
شوق: تدري عاد سعود .. فطوم صوتها حلو
فاطمه بعصبيه بس تحاول تهدي نفسها: جذابه
شوق: لا مو جذابه صج .. لا تخافين حتى سعود صوته حلو ترى بس يخاف من العين
سعود: شوق ياتقولين شي عدل يا سكتي ..(بروحه متوتر وهذي زياده عليه)
شوق: يعني غنيت تسكتوني تكلمت تسكتوني، تكلمو انتو عيل يلا اشوف
اثنينهم سكتو محد رد عليها ...
شوق بصوت واطي: مالت عليكم .. (وتطلع سي دي نوال وتحط سي دي مكس فيه اغنية عبدالمجيد اهتم فيني لانه فاطمه تحبها وايد)
فاطمه لفت ويها على الدريشه وقعدت تدندن مع الاغنية ونست نفسها
شوق تنغز سعود علشان يسمع وابتسم، وتعمدت تقصر على الصوت علشان يوضح صوت فاطمه اللي كانت ولا حاسه بشي وصج صوتها وايد حلو...

وصلو مجمع الكوت ونزلو دخلو المحلات يعني شوق تدور صندل مثل ما اتفقو المهم شرت وبعدين قالت خل نقعد بالكافيه وطبعاً هذا من ضمن الخطه وقعدو ..

شوق تطلع الصندل من الجيس: شرايكم مو اللي فيه سترس أحلى؟
فاطمه: مادري كيفج اثنينهم حلوين بس انتي ما تبين رفيع وهذاك ارفع
شوق توهقت: مادري بس هذاك احلى جني بروح ابدله ..(وتقوم)
سعود: انزين صبري نروح مع بعض ..(حركات تمويــه)
شوق: لا لا خلكم انتو طلبو لكم أي شي على ما ايي خو كاهو المحل يمنا قريب دقيقه
فاطمه: تقوم ايي معاج صبري
شوق: لا ما بتاخر قعدي انتي .. (وتروح بسرعه قبل لا فاطمه تيي وتخترب الخطه)

قعدت فاطمه وبداخلها تسب شوق وسعود ساكت ومايدري شيقول و بقلبه يقول تكلم تكلم تكلم لما فجأه سعود وبصوت عالي بدون لا يحس: شنو تبين اطلب لج؟
فاطمه اخترعت بس ابتسمت وايدها تحت الطاوله ترجف: أي شي عادي
سعودافتشل بس حاول يعدل الوضع: لا ما يصير أي شي .. شوفي المنيو واختاري
فاطمه تمسك المنيو ومن الحيا مو قادره تقرا: أي شي عادي والله
سعود: تحبين تشربين قهوه؟؟ ...(خل المنيو وتكلم يا ولد الحلال)
فاطمه: عادي كيفك

سعود ظل يطالع المنيو ويطالع فاطمه اللي كانت مستحيه جان يقول بداخله بس خلاص يلا يت اللحظه المناسبه خل اتكلم ..
سعود: اقول ..... فاطمه
فاطمه ترفع راسها: هلا ...
سعود: فاطمه .. ابـ...
ويقطع عليه صوت واحد من وراه : فطوم شلونج ....


فاطمه رفعت راسها مره وحده وسعود التفت يطالعه ورد يطالع فاطمه ورد يطالعه مايدري شيقول وفي عيونه اسأله وااااايد تنطر جواب من فاطمه، وفاطمه ساكته مو متوقعه هالموقف ولا راضيه ترد على السلام وبنفس الوقت خايفه ... هذا شيابه هني وهالوقت وهاللحظه بالذات...




ها شتتوقعوون ؟؟؟ ردددددودددكم تكفوووون

بنات نزلت لكم باااااااااااارت حييييييييييييييييل طويل ابي شوف توقعات بليييييييييز