رابطة أمهات رابعة وخامسة....تعالو نآزر بعض بهالفترة لي نهاية الامتحانات

[الذاهبه]

معاكم بالرابطه
بنتى خامسه ابتدائي وحدد كل يوم ساعتين لماده ادرسها بس قلبي يعورنى عليها وينها وين هالنظام وكثافة المنهج
والمصيبه مافي دروس محذفه ولاشىء حتى المدرسات اسالهم يقولون كل شىء داخل حنا مثلكم ومثل الطلبه دايخين؟ ليش هالتازم والتحجر؟
بس يالله ازمه وتعدى

انصحكم درسوهم كل يوم ماده لو ساعتين اقل شىء والله يوفقنا ويوفق الجميع

 

[سولاف]

صبااح الورد
انا عندي اولى وخامسه وسادسه
اقولكم اقتراحي وطريقتي واحب اسمع منكم عشان نفيد ونستفيد من بعض
الله يسلمكم
انا اخلى السادسه ادرس اولى خاصة يكتب واجباته والخامس يسمع له القران حق الاولى وانا لما يي وقتي بس بكون تحصيل حاصل ههههه المشرفه
واذا في اي شي ماعرف انا اكمل والحمدلله اولى ماعندهم وايد كتابه او شغل كله خفيف فعشان جذي اخر شي اسئله تبي تمارين مراجعه اذا رفض مااجبره على راحته واذا قال اي اعطيه يكتب عربي كلمات بس 3 مرات او انجليزي يربط الحروف او يستخرج الحروف المطلوبه بس خمس كلمات يعني مااكثر عشان مايمل
اذا شفت كذا يوم قال ماابي اراجع اقوله بس سؤال واحد حل مراجعه واعطيه صج سؤال واحد وماطول كلش وبجذي انا ماامل ولااهو يمل ودايما يدري لماايب طاري الدراسه ماراح اطول فصاير عادي عنده الموضوع والحمدلله

 

[سولاف]

الحين دور خامس وسادسه هالاثنين يي دورهم بحيث اول شي قسمت موادهم مواد اساسيه(رياضيات-عربي-انجليزي) و مواد العامه والمواد عامه قسمتها لمواد عامه مركبه (مثل علوم وتربية اسلاميه والخ)ومواد عامه بسيطه (الكويت والوطن العربي وحاسوب والخ)هههههه تاليفي

كل يوم لمواد عامه بسيطه او يومين من مواد العامه المركبه اخصص له ساعه يدرسون فيها كل واحد بداره او بمكان او مكتبه المهم يقعدون يدرسون طبعا اخصص الماده واخصص الصفحات من الاخير عشان دايما الاسئله اكثر شي تيي من الاخير وطبعا احاول اخلى صفحات قليله عشان لايملون ويركزون فيها واذا حبووا يلخصون كيفهم وبعدين اللي يخلص يي اسئله -عنده فرصتين يجاوب غلط ان صارت ثالثه واعطيه الكتاب يرد يراجع ومااسئله مهما حاول -لاتيلينون بالقوانين عشان ترتاحون بالمستقبل- المهم وانتو تسئلونهم وهم يجابون عطوهم شرح بسيط وكانكم تسولفون معاهم مع تشبيهات او ضحك وشد شوي المهم لايصير ممل ولاطولون معاهم عالخفيف لانه بيكون عدد الصفحات قليله

يتبع

 

[سولاف]

عقب مايخلصون خليهم يروحون يسوون اي شغله عندهم ياكلون يلعبون يطالعون تلفزيون احرار
وبعدين تيي ساعتي انا للمواد الاساسيه اهني انا اقعد ارتب مادتي اللي بدرسهم فيه مثلا خنقول انجليزي, اذا تلاحظون بتلاقون السادسه اكثر منهجه مكرر من خامس وفي زياده فناخذ من خامسه ونرتب القاعده اللي بندرسهم -حطوا بالكم قاعده وحده مو الف قاعده- المهم في امثله من خامسه وفي امثله بسادسه نجمعهم في صفحه ونرتب افكارنا واهني اناديهم طبها هم عبالهم طواله وصعبه وانتو تفاجئونهم قاعده وحده مع شرح بسيط خفيف مع تكرار اللي ماراح يسمع او يغلط بالحل بيضيع وقته وبيزيد الوقت عليهم لانج بتضيعين وقتج وبتعيدين تشرحين
يتبع

 

[سولاف]

المهم تبتدين تشرحين القاعده للاثنين لانه بوخامسه ماخذه وسادسه عليها وعقب ماتشرحين ببساطه تعطين مثال واحد بس
ومثال ثاني اهم يحاولون يحلونه معاج وثالث مثال بيكون كل واحد فيهم على ورقته يحله بروحه جدامج
اهني اذا حلو الاثنين صح تعطين مثال رابع حقهم طبعا كيفهم اذا رضوا لاتصرين
اما اذا واحد حل صح والثاني لا –تشرحين غلطه وتعطين مثال اخر يحلونه بدون نقاش واهني تشوفين اذا تكرر غلطه اهو يقعد والثاني يروح خلص والاول ابو الغلط يضل ليما يحل صح اذا شفتي مصكر ومقفل خلاص هديه وخلي لباجر تعيدين القاعده كمراجعه سؤال او سؤالين بس وعقبها تبلشين قاعده يديده مع تكرار نفس الخطوات
حطوا بالكم تره الموضوع مايطول وماراح ياخذ وقتكم وتملون ويملون وبتلحقون على كل اشغالكم
يتبع

 

[سولاف]

اهم شي بالموضوع انا عندي الياهل يتخرج وفاهم كم قاعده احسن الف مره من يتخرج وموعارف ومتخبص بالقواعد
نفس الطريقه بالرياضيات
اذا تلاحظون رياضيات كله مكرر بالخامس في منهج سادسه مع تفاصيل اكثر وزياده ونفس الشي العربي النحوو
طبعا اتبع نفس الطريقه
رياضيات 2 مرات بالاسبوع-انجليزي 3 مرات –عربي 2 وطبعا على حسب مستوى الاطفال
وسلامتكم
واسفه عالاطاله

 

[رهوف]

رهوف مشكلة المسائل الحياتية ان كل مسألة لها فكرة غير عن الثانية

يعني كثفي لها التمارين بس هذا حل مشكلة بنتج علشان تكون مارة عليها كل الافكار وعسى الله يسهل عليها يارب

الدلال بعد عمري ولدج كسر خاطري مسيكين ما ينلام الدراسة ضيقة خلق الصراحة خاصة الصبي يبي ينطلق ويلعب وعلية

انتي لا تطولين معاه يعني ساعه تالي خليه 10 دقايق يرتاح وهكذا علشان لا يتعب نفسيا

مشكووووووورة سبائك <<< اهي اسمها المسائل الحياتية ؟؟؟ توني ادري

بالنسبة للافكار دايما اعطيها تمارين وساعات نفس الفكرة بس اغير الارقام تتخسبق ... احسها خلاص برمجت عمرها انها هالشي ما تفهمه ؟؟؟

 

[سبائك]

سولاف الله يعطيج العافيه حبيبتي طريقتج روعة ماشاءالله

يالله بنات شدو الاحزمة بدا العد التنازلي الله المستعان

هذا موقع وزارة التربية اذا تبون امتحانات حق عيالكم صج انها قديمة بس تنفع ترى

http://www.moe.edu.kw/E-learning/exam_library.aspx

 

[سولاف]

انا عندي اقتراح رهوف
شرايح تحطين لها خطوات وتحفظهم
يعني احط لج مثال ناتج قسمة 40 على 5
1-اطلع الارقام 40 المقسوم-5مقسوم عليه
2-نقسمهم على بعض
3-نشوف اول عدد 4 جم 5 فيها =صفر
4-ناخذ العدد الثاني معاه يصير 40 ونشوف جم 5 فيها= 8
5-ضرب=8*5=40تنكتب تحت المقسوم
6-نطرح40-40=صفر
7-الصفر هو اسمه باقي القسمه
طبعا كل مسئله او كل موضوع تقدرين تستنتجين منها قانون او خطوات تقدر تمشي عليه
مع التكرار ينحفظ الخطوات وماراح تنسه
يتبع

 

[سولاف]

اقولج شغله
لما تعليمنها طريقة الخطوات انتى تجربينها بمثال جدامها وعقب تحلين مثال معاها تشاركج بالحل
عقب تعطينها مثال تحل بروحها وشوفي باي خطوه توقف اهني نطري لاتكمل ؟؟؟شتسوين؟؟؟
تيين بالخطوه الي وقفت تشرحين لها الخطوه اللي ناسيتها وتحلينه معاها بس هالخطوه وتردين تعطين لها مثال وشوفيها بتعدي هالخطوه ولا لا
لاتخلينها تروح تكمل خطوات الباقيه الا لما تعيد مره مرتين الخطوه اللي واقفه عندها
عقب خليها تكمل على الامثله السابقه اللي وقفتيها فيهم وخليها تعيده وتكمل عليهم
بس لاتكثرين بالامثله
مثالين خليها تجرب فيهم
يتبع

 

[سولاف]

يعني مثلا
مثال عطيتيها تحله ونست البنت خطوه رقم 4 تشرحين لها خطوه رقم 4 وتحلين هالمثال معاها بس خطوه رقم 4 وعقب تعطينها مثال ثاني وشوفيها تعدي خطوه رقم 4 او لا!!!
عقب ان شفتيها فهمته وحلته ووقفت بخطوه رقم 6 لاتكملين خلي تعيد للمثال 4 وتعيد حله ليما توصل خطوه رقم 6 وبتوقف لانه ناسيته بس اهم شي تكون عدت خطوه رقم 4
عقب تعيدين تشرحين لها الخطوه 6 وتحلينه معاها وتخلينها تعيد الحل للمثال السابق من اول وشوفي توصل للخطوه رابعه وتكمل وتوصل للخطوه 6 وتكمل والخ
وان شاءالله سهالات والله يوفقهم

 

[أمواج البحر]

الله يعين قلبي

ولدي برابعه وحدي احاتيه مع انه اسم الله عليه ممتاز

بس اسم امتحانات فاينل يخرع

لي الحين ما عطوه الجدول

كنت ناويه ابتدي معاه تدريس من امس بس طلع عنده تسميع اليوم و كان قاعد يراجع التسميع 4 سور

وما مدانا

اليوم ان شاء الله ببتدي معاه وطبعت له امتحان العلوم والجتماعيات اللي حاطتهم امع عبود جزاها الينه ان شاء الله

 

[سولاف]

شكرا لج سبائك

اهم شي بنات لاتكثرون بالامثله لاتكثرون بالشرح لاطولون
لانكم تضيعون وقتكم وقت اليهال والنتيجه ماهي بصالح احد

اول شي خلو الموضوع فهم مو كسب درجات -حاولو اول شي انتو تقتنعون بهالموضوع
يعني اهم شي الطالب يطلع من عندج واهو فاهم بالرياضيات موضوع احسن من يتخرج واهو حافظ وغصب معدي الماده
دايما مثال شرح ومثال تأكيد ومثال حق اليهال تجربونهم ومثال اخر مجرد تحصيل حاصل وهذا الاربع امثله هم اللي تعيدونهم لهم ان غلطوا عشان لايصير بالجلسه الوحده الف رقم والف حجي والف شي
وعشان لايملون وتصير دايما عندهم فكره انه الدراسه او المراجعه ماراح يكون طويله فتشوفونهم بسرعه يستجابون لكم
وعشان ترتكز الفكره تعيدون باجر مثال مثالين يحلون وتكملون الموضوع اليديد اللي بدرسونهم فيه
يتبع

 

[سولاف]

اذا لاحظتوا انه الدرس السابق كان ثقيل لاتعطون درس يديد بس اكتفوا بمثالين يحلونه كمراجعه وخلوا الدرس اليديد حق عقب باجر
عشان يكون يومهم اخف شي بس لاتقولون لهم شي خلو كل شي بكيفكم انتو وفاجئوهم

وبالتوفيق

 

[اميرة القلوب]

ربي يسهل ويوفق الجميييييع يارب

 

[الدلال]

انا اليوم بلشت مع ولدي التربيه الوطنيه, معلوومات واايد وفي شغلات مالها لزمه مثل ان بيوت اجدادنا مصنووعه من الطين والجندل والباسجيل!! انزين ليش مايكتفون بس بالطين, ولدي مو عارف ينطق الجندل والباسجيل ينني, كل ساعه ويقوولب بالحرووف, انزين هاليهال شكو بالباسجيل ان مصنوع من اغصان شجر البمبو؟؟؟!!

ياربي شنو هالمناهج اللي ما منها فايده ولا عايده

 

[الريم30]

الله يعافيكم تعتقدون انغيبهم من الاربعة نبيهم يدرسون والله انهلكنا

 

[math2020]

الله يعافيكم تعتقدون انغيبهم من الاربعة نبيهم يدرسون والله انهلكنا

بس هالاسبوع خل ايدامون والاسبوع الياي ابريك للدراسة

 

[سبائك]

لا ريم لا تغيبين عيالج الحين يمكن قاعدين يسوون لهم اختبارات تجريبية

ولدي معطينه ورقة امتحان تجارب العملي علوم يوم الاحد ان شاءالله عسى الله يسهل

 

[سولاف]

انا غيبتهم يقولون انه الابلات قايلين لهم منوووو بيغيب يعني هههههه غيبوااا تكفووون

ويقولون انه مافي دروس كله احتياط ونايمين بلصف
ومافي شي
غيبتهم بروحه الجووو بارد ومايشجع يطلعون من الفراش