دعوة للصراحة والنقاش بين المعلمة وولية الأمر

[الصابرة المحتسبة]

السلام عليكم ورحمة الله وبركاته

شلونكم معلمات الأجيال

عساكم بخير:eh_s(7):



أول شي ألف مبروووك الكادر ويارب

يرزقكم أكثر وأكثر لأن مهنة التعليم

مهنة شاقة ومتعبة


بهالموضوع نحب كوليات أمر ان إحنا نتناقش

معاكم ببعض الأمور اللي تخص عيالنا الطلبة

بجميع مراحلها

وأرجوكم وطالبتكم طلب من كل الطرفين

النقاش الراقي مثل ما تعودنا

والحوار الهادف لمصلحة عيالنا

وجزاكم الله خير

أحبكم في الله​

 

[الصابرة المحتسبة]

الكل يعرف ان الصف الأول الإبتدائي أهم مرحلة بالنسبة للطالب\ة


بعض المعلمات ماعندهم الصبر لما يواجه الطالب\ة مشكلة أو صعوبة في تقبل

المعلومة فيبدأ الصراخ


وهذا الشي ينعكس على الطالب\ة ؟؟؟؟

رايكم ؟؟؟​

 

[PuPa^^SWeeT]

انشالله التزام الطرفين بالاداب الحوارية

 

[بنات حواء2]

موضوع حلو ارجو ان يكون هادف و مرتقي في الحوار

رايي بالموضوع انا اعتقد ان الي يدخل على مرحلة الابتدائية لازم يكون عارف انه راح يتعامل مع فئة عمريه صغيره تتراوح مابين ال 7 سنين الى 10 او 11 سنه
فانا قبل لا ادخل على هلمرحله العمريه المفروض اقرى في سيكيلوجيا النمو التربوي عشان اعرف كيف اتعامل وي هلاطفال
انا اشوف ان التعامل مع هلمرحله جدا مهم و يأثر على باقي المراحل
و هذي المرحله حساسه جدا لانها هي تحدد مهارات الطفل و مواهبه و حبه للتعلم او كرهه

فكل شي بيد المعلمه في هذي المرحله
عمومن الطالب اذا مافهم من حقه تنعاد له المعلومه لو لي اخر الحصه و لي مافهم بعد من باب حرص المعلمه انها تاخذ الطالب او الطالبه في حصص الاحتياط او المواد الغير اساسيه و تشرحله وهني مهم شي اسمه الذمه و الضمير و ان احنه نحب لعيال غيرنه مانحبه لانفسنه و لعيالنه
والله يوفق عيالنه و ربي يعطينه طولت البال ويقدرنه ناخذ بيدهم للامام انشاءالله

 

[manoooram]

رأينا..

كأم أكيد ارفض واستنكر صراخ الأبلة على الطالب بأول أهم مرحلة دراسية تعليمية بحياته ..

وايد يهال يا حرام من تصرخ الأبلة سواء عليه أو على غيره وتعلي صوتها
تتكون عنده ردة فعل خوف شديده من هالأبلة
توصل حتى مشاركة بالصف تكون شبه معدومه ..
يقعد طول الوقت بس يبكي ومايبي يروح المدرسة ..

المُدرسة ما اختارت مجال تدريس المرحلة الابتدائية ..
الا ان عندها خلفية بنفسية الطفل المتقلبه
ومقبلة باللي بتواجهه بالصف وعندها استعداد لأحتواء الوضع
من شطانة يهال ولا بطيء بالكتابة أو السرحان وغيره..

احتمال ويجوز يكون من هالطلبة بطيء تعلم أو عنده صعوبة تعلم .. فما عنده القدرة بالأخذ والعطا مثل الطفل الطبيعي
بالحكمه والتروي أعطي المجال أكثر لاكتشاف من يعاني من مشكلة او من عدمها

على علم في منهم مدرسات أصحاب ضمائر حية ..
يتعبون و مايقصرون مع الطلبة الله يعطيهم العافيه ..

بس الصبر حلو ومطلوب و أتمنى مراعاة أكثر لنفسيتهم .

يهال صغار طالعين من حياة الروضة اللعب والوناسة الى حياة الجد الدراسة والواجبات
وان شالله مأجورة يارب بتفانيج بشغلج

 

[ريانا]

اختي بنات حواء ممكن اعرف شنو تخصصج يالغاليه؟؟

 

[PuPa^^SWeeT]

احب ابشركم بسس انهم بصدد تغيير الاخطاء في كتب الابتدائي للصفوف الثلاث الاولى


وذلك لأنهم عند شراء هذي المناهج من الشركة

عطتهم الشركة شرط الزامي بعدم تغيير اي حرف او رقم في كتب المناهج الا بعد 3 سنوات


والسنوات الثلاث انقضت


والحمدلله


بصدد تغيير المناهج

والسنة اللي وراها رابع و خامس

واللي وراها سادس و سابع

واللي وراها تاسع و ثامن و هكذا



انشالله اغلب المشاكل اللي اتعيق طلاب الاولى ابتدائي بصدد الحل واتخاذ الاجراء اللازم لها

 

[PuPa^^SWeeT]

و عن نفسي انا

افضل اني اتعامل ويا طالبات شوي فاهميين و مسؤولين

على التعامل مع طالبة انا لازم اخذ بايدها بكل خطوة

لأنه lets face it

صعب حييل اني اخذ بايد 20 طالب بنفس الوقت و زمن قياسي ما طال الساعة


للاسف انه سياسة التعليم بالكويت ماتساعد عالابداع


بس هذا بفتح فيه موضوع خااص بعدين اتطرق له


بس بتطرق لشغلة وحدة بس

المفروض التدريس بالروضة و الابتدائي ينحصر بالتعلم باللعب

التعلم التعاوني


مو التعلم بالتلقين


يعني مايصير توقف الابلة بالوسط و تعطي المعلومات

ماتخلي الطالب يكتشفها ويعرفها


وللاسف اني كمعلمة متوسط همن البيئة الصفية لا تساعد على التدريس والابداع


يعني انا داخل صف صغيييييييييييييييييير و الطوفة مبقعة من الطالبات

واللوحة مالها رووح


يعني بالحضيض


وين البيئات الجاذبة

وين الاشكال الحلوة


نتعب انعلق لوحات علشان انغطي وسخ مايتغطى

وهذا المبنى المدرسي يديييد المدرسة توها فتحت من 3 سنين


؟؟؟؟


مو منطقي صحح


انا اايد التدريس الابتدائي بشرط البيئة الجاذبة

مو وسايل ومادري شنو

لاا شكل الصف التنسيق

والالعاب و الابتكارات و الوسايل التعلمية و التوزيعات و المجموعات

كلها اتساعد عالتدريس








بس اهم شي يكوون في كل صف حماام و فراااشة


معرووفة ليش

علشان ماتخسبق الابلة بوسط الدرس

 

[الصابرة المحتسبة]

يعطيكم العافية وقواكم الله

وفعلا محيط الفصل يلعب دور كبير بنفسية المعلم\ة والطالب\ة

أتمنى الالتفاف حول هذا الموضوع سواء من الإدارة او الوزارة.

 

[بنات حواء2]

ريانا انا تخصصي اقتصاد منزلي الي هو الحين علوم اسره و مستهلك مرحلتي متوسطه

 

[ريانا]

عسى الله يوفقج حبيبتي 

 

[مطلقه وأفتخر]

معاكم بكل اللي قلتوه بس اللي قالت المرحله الابتدائيه تبتدئ من سبع سنين لا بعضهم يدخل اولى وهو بعده ماكمل الست سنين


يعني توهم صغااار ومو مستوعبين شنو درس
الغلط بالتعليم المفروض من الروضه يعطونهم كتب بسيطه تعلمهم الألوان والاعداد ومنها تعلمهم اهمية الكتاب واشلون يهتمون فيه ويحافظون عليه.
وبخصوص المناهج احسها مليانه حيل ومافي وقت للشرح والتركيز



وصار المهم يخلص المنهج على حساب فهم هالطلبه





انا مااقول الغلط منكم بس شنو الحل

 

[مطلقه وأفتخر]

اي صج نسيت أسألكم

شنو نصايحكم لنا كأمهات اشلون نقدر نساعدكم بتأسيس هالطلبه بالبيت

والله يعينا واياكم على طاعته

 

[PuPa^^SWeeT]

انا ابلة متوسط


بس بالابتدائي اعتقد المشكلة الاساسية انه المنهج معتمد على انه الطالب عارف الارقام و الاحرف فا يدش على طول قراءة و حلل



اللي تقدرين انتي اتسويينه مو شرط بالبيت وتفتحين الكتاب


يعني وانتو ماشين بالسيارة بتطلعون بقيتو لافتة مكتوب عليها قطعة 4 مثلا

شووف هذا الرقم شنو ؟؟ يجاوبج


وانتي ماشية لقيتي لافتة شكلها مثلث قوولي هذا الشكل شنو يعنني اهم شي انج اتعلمينه انه اللي يدرسه موجود بحياته


انا كثر ما اقدر ادخل الحياة اليومية بالشرح من جذي ساعات اطول بالشرح بس اقل شي يفهمون


وياليت كلهم



وشوفي ياقلبي الفلاش حاولي تنسينها لأنها ماتفيدج


انا شفتها عند بنات تاسع مو واضحة و اتعور العين و بس مصورين الكتاب

يعني مشروع ×


يعني لو انه الفلاش عبارة عن شرح الدرس نفسه و تطبيقات و حل و سؤال و جواب اوكي


بس كتاب مصور

لاا الافضل الكتاب


قولي لبنتج الكورس تطلب الكتب افضل


او انتي رووحي


بس هذا اللي في جعبتي

 

[مطلقه وأفتخر]

اب



معلمات وينكم؟

 

[bsbooosa]

السلام عليكم ورحمة الله وبركاته
في شغلات حابة اضيفها
اولى ابتدائي اقلبهم يبدون اعمارهم من 6 سنوات يعني حيل صغار
اول شي يعطونهم قراءة الكلمات شلون بيقرون الكلمات واهما مايعرفون الاحرف؟؟؟
وثاني شي كمية الكتابه بحصة العربي وااايد واليهال بسرعه يتعبون انا معاكم كمية المنهج كبيره ولازم تخلص بس هم لازم يراعون اليهال هالشي قاعد يأثرعليهم سلبياً ;;; برايكم شنو الحل؟؟



**انا مومدرسه بس ان شاء الله مدرسة المستقبل سوري ع القافه بس شدني الموضوع وحبيت ارد​

 

[manoooram]

انا بنتي دشت الابتدائي وما كملت ال 6 سنين للحين

استغربت من كم الكلمات المطلوب كتابتها بالرغم ان ما علموهم الأحرف من الأساس .. لأن مو من ضمن المنهج

وبمادة العلوم المطلوب منهم رسم طرق حركة الحيوانات عزكم الله !!! شلون ؟؟
الهرم الغذائي وتوزيع المجموعات الغذائية فيه شلون يرسمون المجموعات بداخله ؟؟

يعني الواجب يكون في مراعاة لجانب الرسم خصوصا بهالمرحلة .

 

[مطلقه وأفتخر]

والله كلنا مصدومين من المنهج
خصوصا انهم من الأساس مؤ متأسسين بالروضه
احس هالمنهج يصلح حق ثانيه إبتدائي

 

[Um Ritaj]

موضوع مثل هذا موضوع طويل... والموضوع له عدة جوانب مو جانب واحد .. لازم نتكلم عن الفصول وكثافتها الطلابيه .. الوسائل الموجوده في كل فصل كوسائل مساعده للمعلمه وتكون جاهزه بحيث تدخل الابله حصتها وتركب فلاشها فقط .. ولازم نتكلم عن منهج ومدى ملائمتها لمستوى الطالب ... لو بتكلم من اليوم لاسبوع جدام ماراح اخلص ..

بس بحاول اعطي رؤوس اقلام من واقع تجربتي كمعلمة انجليزي للمرحلة الابتدائيه

اولا انا عندي صفين من سنة ثانيه الصف الواحد فيه 33 طالبه وصف سنة رابعه فيه 30 طالبه!!!! فنظام تكديس الطلبه نظام يهضم حق الطالب قبل حق المعلم فكيف تعطين كل طالب حقه من الوقت والجهد والمراقبه والمتابعه والتصحيح والمساعده ؟؟؟؟

النقطه الثانيه (( الفصل ))

احنا سنة 2011 والفصل حاله حال الفصل علي ايام دراستي في الثمانينات ... للحين اعتمادنا علي البروجكتر الي يظهر الشفافيه بطريق غير واضحه والمسجل الي صوته مو واضح - ليش ما يتوفر داتا لكل صف و سي دي بلاير لكل فصل لنقاوة الصوت والصوره عشان توصل المعلومه للطالب في انقا صورها << هالموضوع يبيله شرح اكثر بس اختصرته لضيق وقتي.

النقطه الثالثه (( المنهج ))

هناك ثغره كبيره في مناهج الانجليزي وخاصه في المراحل الاولي والثانيه والثالثه... فمنهج اولي هضم حق الطلبه الذين دخلو للمدرسه من غير روضه او حضانه .. وحتي لو فرضنا او الطالب كان في الروضه فليس هناك مناهج في الروضه تساعد في تنميه مهارات الطفل ... فالطفل يدخل اولي ابتدائي لا يعرف يمسك القلم ولا يعرف ان الانجليزي يبدأ من اليسار. عكس العربي وهذي يبيلها فتره تدريب ولكن للاسف منهج الانجليزي يبدا هذه الفتره بالاحرف علي طول متجاهلهتلك المشكله

النقطه الرابعه (( اولياء الامور))
بصراحه معاناة في استدعاء امور الطالبات الضعيفات وللاسف من يحضر الاجتماعات هم اوليا امور المتفوقات وليس الضعيفات فهذا ضعف في الوعي الثقافي لدى اولياء الامور .. وعندما توزع الشهادات يأتي ولي الامر لا لكي يسأل الطالب عن اسباب ضعفه وانما كي يكلمه لكي يرفع درجاته سائره سائر اخوانه او اقرابئه.. فروح التعاون ضعيفه لدي اوليا الامور. وارجح سبب تجاهلهم للصفوف الاولي هو الملف الانجازي الي جعل الاولياء الامور لا ياخذونها علي محمل الجد وبالتالي. يؤدي ذلك الي ضعف تراكمي عند انتقاله للصفوف العليا !!!!


كما قلت سابقا التحدث في هذا الموضوع له عدة محاور وجوانب الا ان ضيق الوقت قد بخس حقه في التحدث عن تلك الجوانب وايفائها حقها


ولنا عودة بإذن الله

 

[بنات حواء2]

ريانا حبيبتي سوري عتأخير فديتج اجمعين يارب

مطلقه و افتخر
حبيبتي ائيدج الراي باغلب النقاط الي تكلمتي عنهم فعلن صار هم المعلم يخلص المنهج مو يوصل المعلومه للاسف

PuPa^^SWeeT
ائيدج في الراي
احسن طريقة للتعلم هي التجربه و الحياة كلها تجارب حلو لو تعلمين الياهل من خلال تجربه و الاشكال الي حوله الارقام و الاشكال و اضيف لكلامج يفضل لو تعلمينه كذا لغه يعني بالعربي هذي شنو يقولج دائرة تقوليله و بلانجليش يقولج سيركل و هكذا
انا هذي طريقتي مع بنوتي و الحمدلله صارت تعرف معاني الاشياء بلغتين