حدي مليقه و ما عندي سالفه

[مسافات]

السلام عليكم و رحمة الله و بركاته

مشكلتي باختصااار شديد

إني مليقه و ما عندي سالفه

و ما أدري ليش لما أسولف محد يتفاعل معاي بالسالفه؟؟؟؟

هل الاسلوب و الصوت له تأثير بالسالفه؟؟

ابي أصير لما أسولف كل الموجودين يطالعوني و ما يملون من سوالفي

بنات سالفتي حلوه بس ما ألقى تفاعل بالمره

ليش؟؟؟

انا ممله

و فوق هذا غذا وحده غلطت علي ما اعرف ارد عليها ابلع لساني و اذا تجرأت و رديت عليها جني قاعده أغلط على نفسي الحمدلله و الشكر

شالحل يا بنات كويتيات ابي اغير اسلوب كلامي

 

[مسافات]

غذا=اذا

 

[Maltesers]

قبل جم يوم شفت بمكتبة جرير كتب شدتني بصراحه وبشتريها ان شالله

واحد منهم عن الخجل والخوف والثاني كيف تتحدث بانطلاقة والثالث كيف تكون اجتماعيا

روحي شوفيهم يمكن يفيدونج .. وترى هذا شي عادي طبع بس ان شالله تقدرين تغيرينه واهم شي انج تكونين اجتماعيه يعني تروحين زوارات مني مناك

 

[رووز q8]

الله يعينج حبيبتـي انا مثلج

بس اسولف رفيجتي المليقه تلف ويها عني لدرجه كرهت نفسي وكرهت الحجي معاها

واذا بغيت اتحجى ويطالعوني اتخرع واقعد اقط بدليات !! مادري ليش مع اني بالبيت عادي طبيعيه واسلوبي يهبل

والله حيل متـأزمه من هالموضوع

 

[*أم*خالد*]

مو بس انا ؟

لووول

مادري مشكلتنا مستعصيه ..

واحلل عقدة من لساني يفقهوا قولي
يارب العالمين

 

[مسافات]

مشكورين على الردود

صدقوني صرت أخاف اسولف جدام الناس خاصة الحريم الكبار و اخاف الجمعات

و غذا شفت بنت لها شعبيه اقط خيط و خيط


شالحل يا بنات يا حلوات؟

 

[مسافات]

اللهم اشرح لي صدري و يسر لي أمري
واحلل عقدة من لساني يفقهوا قولي
آميــــــن
يارب العالمين

 

[دلـــع_الكويــت]

حبيبتي هذي سالفة تعود حاولي وعودي روحج ان الوضع يكون طبيعي والي يصد عنج وانتي تتكلمين لا تعبرينه او تلقينه او ((تلقينها))ويه..

شوفي انا عندي نظرية دام انج لما تسولفين لا تغلطين على احد ولا تسبين احد ولا تييبين طاري احد بشي موزين والناس مايعجبهم....مايشوفون شر..

مو لازم انا اقول شغلة تعجب الكل..والله اذا بتفكرين بهالشغلة انج اشلون تراضين الي حواليج ترا بتتعبين..واللي يعجبه يعجبه والي لا مايشوف شر..

 

[حناينq8]

انتي اوحيتي حق نفسج بهالشي

والحين علاجج هم بالايحاء

اوحي حق نفسج بالعكس بانج متحدثه وسوالفج حلوه
ومع مرور الايام تروح عنج هالحاله

 

[أميرة الحور]

لا تشيلين هم هالشغلة وراح ترتاحين

شنو يعني ما تعرفين تسولفين ؟ انتي ارتكبتي حرام ولا مصيبة ؟
وايد بنات مثلج وكل وحدة على بالها انها الوحيدة في الدنيا
وترى حتى المتكلمات واللي تشوفينهم يسولفون يجيهم احساس جذي او يركزون على أشياء فيهم انتي ما تعرفينها
المتكلمات يحسون انهم قرقة ويغلطون بالحجي ويطالعون الساكتة ويقولون بقلبهم على الأقل حافظة هيبتها
الساكتة بقلبها تقول ياليتني مثلهم اجتماعيات ويسولفون
وكل واحد بس يشوف عيب نفسه
لكن لو بطالعين بطريقة أرقى راح تهتمين برضا الله وتقولين اذا ماسويت شي غلط مو مهم الناس يعجبون فيني او لا

تصدقين مرة عندنا زميلة في الشغل كله تتكلم وماتخلي شي ما تقوله واغلب الموجودين مستمعات ومرة والله تكلمت وطلعت اشياء ما ودها تقولها وكانت تحاسبنا على مشاعرنا وتقول الظاهر ناقدين وساكتين قلنا انتي اللي تتكلمين احنا ماقلنا شي وفيه وحدة قالت لها اكيد فيه اللي ناقد وساكت وفيه اللي عادي كل واحد واللي بقلبه و
والله شفت الدمعة بعينها وطول اليوم كانت متكدرة مع ان فيه بنات يعتبرونها اجتماعية وجريئة بس هي مو راضية عن نفسها
وبان عليها من مواقف ثانية لما سألنا البنات أسئلة صريحة وقلنا كل وحدة تقول شنو مايعجبها في نفسها
قالت ما احب اني اتكلم وايد ولما ارجع البيت اندم واتضايق من نفسي
مع ان كل البنات مستانسين منها ويقولون ليتنا جذي

 

[mimi_el3so0ola]

آنا برايي أحسن حل لمشكلتج قلب .. انج تشيلين أي فكره سلبيه اخذتيها عن نفسج ،
لاتقولين انا ليش جذي .. وماعرف اسولف .. وحدي مليقه ...
بالعكس غلاتي ^___^ كلنا نبدأ من الصفر ،
محد انولد متحدث ناجح .. الكل يسعى حتى يوصل للشخصيه اللي يرسمها في باله
لهالسبب حطي في بالج شخصية وحده تعرف تتحجى بأسلوب حلوو ولبق << مو ثرثاره عااد p;
والمواقف اللي مرت عليج وتركت أثر في نفسج .. او ماعرفتي تردين فيها
فكري بالرد المناسب لها .. وجابلي المنظره وتكلمي
<<< يعني تخيلي الموقف مره ثانيه .. وتخيلي نفسج قام تردين بأسلوب راقي وجذاب ^^
ومع التدريب ان شاءالله راح تتعودين وتصيرين متحدثه ناجحه قلب
بس بالاول حطي في بالج انج قدها وتقدرين تكونين الشخص اللي تبينها حبي ،

& تقبلي مروري

 

[اعييز]

أول سؤال آنا أسئلج إياه : من قال انج مليقه ؟
الجواب بيكون يا إنتي أو الناس

فلو كان انتي

--> نصيحتي : حبي نفسج وتأكد إن وضعج طبيعي .. فقط تحتاجين تدريب .. وحتى لو غلطتي شفيها يعني ؟ .. ليش تدورين النواقص ليش ماتشوفين انج قاعده تسولفين وغيرج يتمنى يبطل حلجه ومايقدر !!!



ولو كانو الناس

--> نصيحتي : رضا الناس غاية لا تدرك .. شتبين بالناس ؟ وشتبين بكلامهم ؟ أصلا ليش تسمعينهم ؟ عبالج كل شي يقولونه صح ؟





--
الموضوع بس يحتاج تمرين .. إنما الحلم بالتحلم
أي صفة تبينها لازم تتمرنين عليها عشان تصير صفة ملازمه لج


لاتحاتين لانتي مليقة ولاهم يحزنون، وناطره الرد على سؤالي ليلحين : من يقول انج مليقه ؟:dddds:

​

 

[0(مـــســـ(مطير)ــــــك)0]

ماقصروا البنات كفو ووفو

 

[أجاثا^كريستي]

حبيبتي هذي سالفة تعود حاولي وعودي روحج ان الوضع يكون طبيعي والي يصد عنج وانتي تتكلمين لا تعبرينه او تلقينه او ((تلقينها))ويه..

شوفي انا عندي نظرية دام انج لما تسولفين لا تغلطين على احد ولا تسبين احد ولا تييبين طاري احد بشي موزين والناس مايعجبهم....مايشوفون شر..

مو لازم انا اقول شغلة تعجب الكل..والله اذا بتفكرين بهالشغلة انج اشلون تراضين الي حواليج ترا بتتعبين..واللي يعجبه يعجبه والي لا مايشوف شر..

هذا الصح اضم صوتى لصوت اختى دلع

وتقبلى مروري

 

['Basma']

لما تحبيين نفسج.. ثقتج بنفسج راح تزييييد بدون ما تحسيين
وكل ما زادت ثقتج في نفسج.. راح تتغير علاقاتج الاجتماعية احسن واحسن
وتلاقين الناس يسمعون سالفتج لاااخر كلمة تقولينها

واذا بتظلين تقولين عن نفسج (انا مملة مليقة ما عندي سالفة محد يسمعني........) صدقيني ماراح تحلين هالمشكلة

 

[NoWay2know]

اذا سالفتج حلوه ، خليها مختصرة ، اخاف تعطين انتي بالتفصيل ، عشان جذي يصير معاج هالشي ، او مثل ما قالوا البنات مجرد ايحاء منج وصدقتي هالشي ...

 

[هنـــد]

الله يعينج حبيبتي

شوف انتي رددي هالشي داخلج ان سالفتج حلوه وانج واثقه من نفسج

واهم شي تراضيين نفسج قبل غيرج ولاتيبيين سوالف تغث لا سولفي سوالف حلوه وممتعه

انا الحين قاعده اعود نفسي ما اتكلم

لان طبعي وايد اتكلم

مره تعرفنا على بنات بالعمره وزرناهم وكانو موجودين اهلهم الكل واحنا اول مره انشوف الباجي والكل كان مرتبك وانا كنت مرتبكه اشوي

بس طول القعده انا اليل اتكلم من سالفه لي سالفه ومن موضوع لي موضوع لما تعشينا وبعدها كملت السوالف ولما طلعنا بالسياره حصلت لي زفه محترمه من اختي قالت ناس اول مره اتشوفينهم ماخليتي كلمه ولا موضوع ماقلتيه قلت ياربي شسوي اهما مستانسين

بعدها قمت اخفف وايد عن اول

 

[كوَاليسْ]

أقولج حبيبتي حطي لنا موضوع عشان نشوف مليقه ولا لأ....
وخلي ثقتج بنفسج كبيره

 

[زبــــــــدة]

لوووووووول نفسي والله
احاول اني ماسولف كثر ماقدر
وانا من طبعي ماسولف وايد اصلا

جذي اريح هههههههههه

يبيلنا حل والله

 

[مسافات]

تسلمون على الرد الحلو و الظاهر انه يبيله إيحاء

اخت اعييز إجابتي أنا و الناس نقول عني مليقة

اخت noway2know مشكلتي ماعرف اختصر الكلام بالمرررررررررررررررررررره
لازم اقول القصة كاملة