حبي القديم تعالو افرح قلبكم و اقولكم شنو صار معاي

[حواري]

حبايبي شلونكم شخباركم ودي المكم كلكم و ابوسكم و اشكركم على النصيحه تذكرون موضوعي هذا
http://www.q8yat.com/t1084473-12.html
راح اسويلكم كوبي و بيست على الموضوع كله عشان الي ماقرته تقراه حتى ردودي عليكم لمن صارت السالفه عشان بقولكم بالضبط شنو صار معاي لان ماقدرت اكمل الموضوع خفت وايد لانه اهل طليقي كانوا قاعدينلي قعده علمن بأن هذا الحساب حساب رفيجتي مو حسابي و انا الي علمتها على هلمنتدى و انا اوردي عضوه قديمه بالمنتدى هذا و صارلي سنين هني و احبكم كلكم و كلكم تحبوني فديتكم لاكن بما ان حسابي القديم طليقي يعرف ماكتبت فيه مشكلتي خصوصا انهم قاعدينلي قعده فرفيجتي مجرد قارئة ماترد وايد ردود على المواضيع فدايمن تخدمنه احنه رفيجاتها اهلها في ان احنه نستعير حسابها و ننزل مواضيعنه الي نحتاج فيها رايكم من حسابها و بموافقتها و كاهي يمي فديتها البعض ممكن يستقرب ليش مقدمتي بهشرح معني شرحت هلكلام من قبل الا اني استغرب ان في ردود دشت شاكه بمصداقيتي لان بنت خالت صاحبة الحساب مره دشت و شرحت مشكلتها فعتقد البعض القليل اني قاعده ائلف قصه من نسيج الخيال و كأنه عندي وقت لتأليف القصص الواحد يالله يالله يحك شعر راسه من مشاكل هدنيا منو عنده وقت يدش يفتعل مشكله لنفسه و يبحث عن حلول لا الحياة اكبر من جذي بوايد و انا ماني مجبوره اني اوضح مصداقيتي لان ربي الوحيد الي يعلم في النوايا فلا تكونوا اربابا في الحكم على الآخرين و انتو لستوا سوى خلق من خلقه
و انا عن نفسي قطعت المنتدى من فتره لاكن كنت اقرى ردودكم في موضوعي الي تصكر مادري ليش هشي بصراحه خلاني استحي من نفسي اني لمن احتجتكم لقيتكم خوات و اكثر و نصحتوني من قلب قلبكم فعيب اني لمن اخذ منم الحلول و النصيحه امشي و ما ابشركم و اطمنكم فمن هذا الباب اليوم نويت اقعد ويمي قلاص القهوه و اكتب لكم الي صار معاي و افرحكم لاني الحمدلله توفقت و بقولكم شنو الي صار معاي بعتباركم خوات و اكثر من خوات يعلم ربي من اقرى ردودكم عيوني تغورق اقول يابختي في هلمنتدى كويتيات وخليجيات و لبنانيات و مصريات و سوريات و وووووو كلكم على عيني و راسي فديت نصايحكم و نيتكم الصافيه
في البدايه بسوي كوبي بيست على كل الموضوع القديم بما انه تصكر عشان الكل يعرف شسالفه و مايكون في تسائلات و هذا الموضوع كتبته في تاريخ 15-8-2012

قوه حبايبي مادري شنو الي خلاني اليوم ابطل المنتدى و افضفض لكم بس احس اني ابي ارتاح يمكن اسمع منكم الكلام الي يريحني
في البدايه اعرفكم عن نفسي انا عضوه منكم وفيكم و من زمان بهالمنتدى الي عزيز على قلبي و انا خذيت عضوية رفيجتي من بعد اذنها عشان اكتب لكم الي في خاطري
عمري 24 منفصله و عندي بنت
اقولكم قصتي من البدايه الي من وجهت نظري مهمه
انا كنت احب واحد من كان عمري 16 سنه و استمريت معاه سنتين حبنه كان نضيف مافي اغلاط و لا في مواعد و لا طلعات و كل من بعيد لي بعيد و هذا الشي خلاه يتعلق فيني وايد و انا تعلقت فيه اكثر لمن شفت خوفه و حرصه علي تفكيري كان على قدي تفكير مراهقه وهو كذلك لاكن هو اكبر مني ب 6 سنين فهو عقله كبير هذا الشي خلاني اكبر بتفكيري معاه كنه نسولف عن الدراسه اكثر شي و كان يدرسني الشغلات الي اتوهق فيها على التلفون و مرات على المسنجر كان متعلق فيني وايد لي درجة ان انام و احنه معلقين الخط ولاكن مع الايام حسيت اني قاعده اسوي الغلط في مكالماتي معاه معنه كل شي كن سليم و لاكن الغلط غلط و لازم مانبررله ففكرة ان البنت تكلم واحد غريب عنه اساسها غلط لحظتها قلت في نفسي دام اني انا اعرف ان هذا غلط ليش استمر فيه لقيت نفسي فجأه انسحب منه قمت من النوم ذاك اليوم لقيت نفسي اشيل الجهاز و لقيت مسج منه مكتوب فيه اعشقج و لا راح اخليج لو شنو يصير انتي حبيبتي و صديقتي و ام علاوي على قولته لانه اسمه حسين و بنتي لاني احس انج تربيتي بطلتي عيونج على هدنيا معاي ولو يي اليوم الي تروحين عني انا راح اموووت من وراج مادري ليش لمن قريت هلمسج حسيت اني انهرت و قمت ابجي و قلت ياربي انا شسويت فعلن مابنيه على غلط فهو غلط النتيجه الريال تعلق فيني و هذا الشي تعذيب نفسي مادري شنو الي صار فيني خصوصا ان هلكلام في وقت الي انا صحيت من غفلتي قمت صليت و قريت قرآن و فجأه خلصت من صلاتي قلت بقلبي أي احبه بس مو اكثر من ربي مشيت باتجاه تلفوني و لا شعوريا بطلت الجهاز طلعت الخط و كسرته و تركت الي احبه و وخرت عنه فجأه من غير مبررات و لا حتى شرحتله الاسباب و حطيت حرتي بدراستي و تخرجت من الثانويه بمعدل وايد حلو الف الحمدلله
كان يي عند باب المدرسه ينطرني اطلع من الامتحان اشوفه يطالعني مستغرب اسوي نفسي ما اشوفه و قلبي ينقمت منه و اركب السياره مع الوالده او الوالد و امشي
يي عند باب البيت ينطرني اطلع و انا احاول انخش ورا امي و ابوي و اركب السياره بسرعه و اظل خايفه و حاطه ايدي على قلبي لا يحسون اهلي
المهم اني تخرجت و ياني نصيبي و اول واحد طق الباب وافقت عليه كنت خايفه وايد و ابي الستر خايفه وايد من غلطتي الي سويتها و هي اني كلمت و تزوجت زواج تقليدي لاني كنت ابي الستر و مابي استمر بالغلط
المهم ان الي كنت احبه شافني مع ريلي كذا مره و درا اني تزوجت حتى من كثر ما انقهر كان قاعد على طاوله بالمطعم مع ربعه خزني لي درجة اني حسيت بقوم يطقني جد خفت من نظراته و ربعه يطالعونه مايدرون شلموضوع ين غورقت عينه و قام هدهم و ربعه حدهم مستغربين و يطالعوني بطريقه غريبه لانهم انتبهوا عليه شلون يخزني و كذا مره صارت صدفه و كانت ردة فعله ان يهد المكان الي انا فيه و يطلع وعيونه كلها شر و قهر لي درجة اني انا من الخرعه اسكت و انزل راسي
ومره شافني بالمرينا لحقني لي الحمام عزكم الله و يقولي وهو يمشي وراي ليش سويتي جذي فيني ليش شنو الي صار فجأه طبعا مارديت عليه ماقدر ارد لاني اعتبر الرد عليه خيانه ومو انا الي اخون
بالنسبه لزواجي كان زواج فاشل بكل ما تحتويه الكلمه من معنى لانه الي خذيته فاشل التربيه و المنشأه للاسف مافي غيره و كله خايني و مبهذلني معاه و اهله كل مشاكل عموما انا ماكنت مرتاحه معاه نهائيا و الاسباب كثيره لاكن مو مهم الحديث عنها لان ربي فكني منه و انفصلت فالحديث عن واحد مثله مضيعه للوقت و ما اقدر اتكلم في الاسباب لان طلاقي جدا غريب فوق ما تتخيلون وشي مايصير بالمجتمع خصوصا مجتمع محافظ مثل مجتمعنه المهم انها فظيحه كبيره له و لاهله بالمختصر المفيد كان يخوني و بعلم اهله و بتشجيع من اهله لا و كانوا ييبوله البنات لي البيت يخوني معاهم مابي استرسل في شرح موضوع طليقي لانها فيها فضيحه له و لا هله و الله يستر عليهم بس سالفتهم الكل عرفها و انفضحوا و اذا تحجيت بتفاصيلها راح يعرفوني الناس عدل مدل

المهم بعد انفصالي شفت حبيبي السابق بالصدفه في مجمع و كان الموقف يفشل نوعا ما لانه شاف واحد وراي لاحقني المهم يه وقف يمي و قالي ليش يايه هني بروحج وين ريلج شلون يخليج تدشين هلاماكن بروحج انا هني انصدمت و سكت ماقدرت اتحجا بس قمت اطالعه مصدومه شلون هلانسان مازال يحبني و يخاف علي بعد 5 سنين وبلحظتها و جدام خلق الله غورقت عيوني ماقدرت اتحمل نزلت دمعتي وهو انصدم من ردة فعلي ماتكلم بس تلني من ايدي و طلعني بره المجمع و لمن وصلنه المسافط وقفنه يم سيارته يقولي شفيج شنو سوه فيج اذبحه و الله اذبحه هني نهرت و ماقدرت اسكت و قلت له اني نفصلت و طبعا ماتوقعت ردة فعله جذي ابتسم يقولي حلفي يعني خلاص انتي الحين حقي رديتيلي انا استغربت وقمت اطالعه مستغربه ان معقوله ليلحين ماتزوج قالي عطيني رقمج و رفضت قتله ماقدر اكلمك انا ماتطلقت عشان ارجعلك و لا عشان اكلمك و لا اكلم غيرك انا انظلمت و فعلن سالفت طلاقي غريبه و تشيب الراس و الكل مذهول منها المهم مشيت و خليته وقلبي يعورني شلون اخليه و امشي عنه للمره الثانيه وهو انصدم من تصرفي المهم قام يلحقني يمشي وراي يحلفني يقولي وقفي انا مابي منج شي بس ابي افهم ليش سويتي فيني جذي انا ادري انتي شنو و ادري انج حبيتيني بس قوليلي شنو الي صار فجأه بين يوم و ليله ورحتي تزوجتي ليش لين وصلت سيارتي و لحقني ليلبيت وراح ومادري ليش سوا جذي خصوصا و ان هو يعرف رقم بيتنه و حافظه حفظ عن غيب فليش تصرف جذي هو لو يبي يوصلي يقدر يوصلي و يعرف كل شي عني اسمي الكامل و يدل بيتنه بس اتوقع ان وصلني لان خايف علي
المهم شلت السالفه من بالي رديت البيت صليت و قريت قرآن و تعاهدت مع ربي اني انسى الي صار و اني ما احط هلصبي في بالي خوفا من ان مشاعري تاخذني تجاها و ارجع اكلمه مثل قبل و انا مابي هشي ابي اعيش حياتي مرتاحه من غير هم و نكد و بتفرغ حق تربية بنتي مكسورة الخاطر الي ابوها مايدري عنها حابه اكون لها الابو و الام و الاخت و الرفيجه و مومفكره نهائيا اني اتزوج مره ثانيه بيني و بينكم الي حاشني اتوقع ان عقدني حتى النخاع ولو أي وحده يصير فيها الي صارلي بتحرم الزواج على نفسها لام جد جد انا انغدر فيني غدر مو طبيعي حسبي الله عليهم مثلوا علي 5 سنين الله يواريهم في بناتهم ياربي 5 سنين و انا في بيئه غذره ة انا على نيتي و ابرر لهم و حطلهم اعذار اثاري الي كان يصير وراي شي كبييييييييير مامر على بالي و انا الي اسمي نفسي ذكيه يمكن لان الي صار معاي مستحيل يصير انا ليلحين مو مصدقه الي صار معاي لو مو شايفته بعيني ماكنت راح اصدقه بس ما اقول الا حسبي الله و نعم الوكيل

المهم نسيت السالفه و مر يومين و انتهى الموضوع بالنسبه لي و نسيته او تناسيته اتفاجئ برقم غريب و رديت و لا اسمع صوت بنت تكلمني قالتلي انتي فلانه قلت لها أي نعم خير امريني قالتلي انا اخت فلان حبيبي القديم و احنه طلعنه رقمج عن طريق رقم سيارتج و اخوي خاطره فيج و يبيج على سنة الله ورسوله بس مايبي يخطي هلخطوه قبل لايسمع منج رايج و اخوي وايد تعبان من شافج يفكر و محتار و ياني البيت و شرحلي الموضوع و اخوي وايد تعب من بعد زواجج و هو الحين مثل الي مهستر مو قادر يصدق ان في فرصه انج تكونين له و حلاله المهم ان هني انصدمت و سكت قالتلي ادري انج مصدومه و مستغربه و بتقولين ليش هو مادق علي و ماكلمني بنفسه لان خاف انج تظنين ان بيلعب عليج قلت لها انا مادري شقولج بس انا وضعي الحين مختلف قالتلي حتى هو وضعه مختلف انا هني استغربت ليش مختلف قالتلي لان مايقدر يصارح امي و يقولها ان ابي يتززوج وحده منفصله و عندها بنت لان امي ماراح اتوافق فاحنه نبي نسمع رايج اذا انتي موافقه نبدي نكلم امي من اليوم و نأثر فيها اما اذا مو موافقه فماله داعي انكلمها و نبطل الموضوع
انا هني من الصدمه ارتبكت لان ماكان هشي على بالي و لا توقعت اني بعد ما مشيت و خليته مصر على موقفه و يبيني المهم قلت لها انا ما اقد راجاوبج الحين خصوصا اني انا توني من نفصلت و توني طالعه من العده انا احتاج اني ارتاح و افكر صح و تالي اعطيكم الاجابه عشان تكون الاجابه فيها مصداقيه اما الحين ماقدر
المهم انها خوش مره و حبوبه وكلامها وايد طيب و استانست عليها حتى انها ظلت تتواصل معاي بالواتساب و تدزلي صور عيالها و انا بصراحه وايد ارتحت منها
المهم بعدها لقيت اتصال من رقم غريب على جهازي لاكن مو غريب على قلبي اذكره عدل اذكره قبل خمس سنوات كنت انام و اصحى على هرقم رديت عليه لاشعوريا ومن قلت الو وهو قال الو مالقينه نفسنه الا دموعنه تنزل لاشعوريا ماقدرت اتحمل و ظلينه 5 دقايق مانتكلم بس نبجي و هو يسألني ليش
هني ماقدرت اسكت و قلت له الكلام كله الي قلت لكم و شرحتله سبب طلاقي و فهمته وهو وايد انكسر قلبه علي يقولي شسوو فيج انتي وين و هلمصايب وين انتي كنتي تشترين دب و تنومينه يمج وينج و وين كل هذا انا هني ضحكت جد كنت وايد بريئه و على نيتي قتلو برائتي و طيبتي بلي سووه فيني حسبي الله و نعم الوكيل

المهم قالي انا ماراح اكلمج وايد دام انج ماتبين هشي بس راح اسئل عنج من فتره لي فتره و راح اعطيج مجال تفكرين عشان تعطيني الجواب و اكلم امي خصوصا ان امه اكيد تبيله بنيه بكر و هو مو ناقصه شي الحمدلله الريال ولد عايله و مزيون و دكتور و كل بنت تتمناه و اكيد امه تبيله الزين و انا ما الومها
انا الحين فيطور التفكير مابي عواطفي تقطني قطه اتحسف عليها
انا حاليا نسبة رفضي 80% بتقولون ليش مينونه ؟؟؟
اسبابي كثيره
اولا الريال ماحصله تجربه من قبل و يبيني لان يحبني و خاطره فيني لاكن شنو ذنبه يتزوج وحده له تجربه من قبل و شنو يظمن لي ان مايعايرني بهتجربه او اني هديته من قبل
ثانيا انا قلت له بنتي مالها بهدنيا غيري ابوها مايبيها فطبيعي بنتي راح تعيش معاي وهو رحب بهشي لاكن شنو الي يظمنلي ما يتملل منها هو على كلامه احطها بعيني و هذي من ريحتج و على قولته دامها تشبهج اكيد بتصير اغلى منج عندي و بتغارين منها بعد لاكن انا خايفه الكلام سهل لاكن الفعل صعب وهو شنو ذنبه يتحمل عيال غيره في الوقت الي ابوها و هو ابوها مايبيها
اخاف ان يتملل مني اخاف اني اكون حرمته من ان يعيش حياة زوجيه طبيعيه هو يستحقها اخاف اني اكون ظلمته للمره الثانيه في زواجي منه و انا مابي هشي يصير
انا ممكن اني اجدد حياتي مع أي واحد منفصل و له تجربه و يفهم بالحياه الزوجيه اما هذا شنو ذنبه يبتلش فيني و في بنتي مادري مادري شقولكم بس انا وايد متخبطه و هو قاعد يحن و اخته قاعده تحن الا يبي يقنعني في الزواج و انا خايفه
مادري اذا كانت اسبابي مقنعه ولا لا
انا الي ابيه منكم تعطوني رايكم بامانه و باخلاص و بعيد عن العاطفه انا طبعي احب اتخذ قرار من عقلي مو من قلبي ففديتكم عطوني رايكم بالعقل مو بالعاطفه و انا جد محتاجه اسمع آرائكم و نصايحكم و يعطيكم الف عافيه ادري اني طولتها عليكم بس حبيت انقل لكم الي صار معاكم
و انشالله اذا قررت اني اقبل بالزواج منه راح اقولكم بالتفصيل شنو راح يصير معاي بانتظار ردودكم يالغاليين


ارجو عدم الرد لاني بكمل كل الي صار معاي بعدها من بعد اتباع نصايحكم بجمع ردودي كلها

 

[حواري]

و بعد قرائتي لنصايحكم رديت عليكم في تاريخ 16-8-2012
و هذا الرد :
فديتكم و فديت كلامكم قسم بالله ان كلامكم وايد رايحني قسم بالله فتحت الموضوع و حسيت ان الردود يمكن ماتريحني بس قسم بالله ارتحت وادي و قمت افكر بكل رد و بكل كلمه لقيت ان كلكم على حق كل وحده فيكم تطالع الموضوع من زاويا
لاكن الي متعب تفكيري هي بنتي اليوم قلت له اني خايفه ياخذ بنتي مني قالي لا تحاتين مايقدر ياخذها وراسي يشم الهوى احط 10 محاميين و لا ياخذونها منه انا ارتحت وايد من كلمت منه حسيت ان حاسبها بنته مثل ماهي بنتي
و من جانب ثاني في عدة اسباب و عيوب بطليقي ما ابي اذكرها اخاف ادخل بتفاصيل و يعرفوني بس بالمختصر المفيد طليقي مو أهل للحضانه
طريقة تفكيري الحين قاعده افكر بالقرارين قرار الرفض و القبول
الرفض ممكن اكون ظلمته فيه و للمره الثانيه
و القبول نفس الشي اخاف ظلمته فيه و للمره الثانيه
و لاحظوا ترى كلام اختي بنت الرحاب وااااايد منطقي يمكن مايريح الجانب العاطفي فينه لاكن كلام منطقي 100 % و اشكرج اختي بنت الرحاب لانج وضحتي بكلامج شلون انا قاعده افكر
انا ادري اني المفروض اوافق من غير تردد وين القا مثله واحد شاريني و شاري بنتي لا كن فكروا بكلام اختي بنت الرحاب احساس متعب قسم بالله وايد متعبني هذا التفكير
و انا اليوم كلمت اخته و قلت لها الي في قلبي حسيتها وايد قريبه مني و قلبها كبير قالتلي ليش متردده خلينه نفرح فيكم وهو يبجي اليوم قبل باجر ليش متردده فهميني و وعدج ان الحجي هذا بيني و بينج و ما يوصل له
قلت لها اني متردهه خايفه اني اكون ظلمته للمره الثانيه هو ليش شنو الي جابره علي انا هو مو ناقصه شي ليش يتحمل غلطتي قرار زواجي السابق انا خذيته بروحي في الوقت الي تخليت فيه عنه ليش هو الحين يبي يتحمل نتيجة قراري الفاشل خيخليني و يروح يعيش حياته مع وحده غيري بنت بكر مالها تجربه سابقه تدرون شنو ردت علي ؟؟؟؟؟؟؟؟؟ و الله اكبرت بعيني واااايد
قالتلي يرضيج ياخذ غيرج من بنات خلق الله و يطلقها و يرجعلج ؟؟؟؟؟؟؟
انا هني سكت قلت لها لا ما ارضى ان يلعب على بنات الناس باسم الزواج حرام ما ارضا الي صار فيني يصير حق اي وحده انشالله لو عدوتي
هني ردت علي و قالت لي عييل شرايج اقولج ان اذا امي ماوافقت على هزواج هو راح يسوي جذي هذا الي حاطه في باله
انا بصراحه هني خنقتني العبره قالتلي ابجي مثل ما تبين انتي تعرفين شنو يعني الريال يحبج يعني لو شرق و غرب راح يرجعلج و كاهو قاعد و صار عمره 30 و ليلحين ماتزوج و لا عيل و ربعه عيالهم طولهم بصراحه جد عور قلبي و حسيتاني مادري شلون اتصرف كلامها حسسني اني انا له له مافيها روح تعال
قالتلي كلام قطع قلبي قالتلي الظلم انج تسلبين منه انسانه حبها و مات فيها و تعلق فيها و خسرها مره و شاء ربج انها ترجعله و تصير في فرصه انها تكون له و حلاله و جدام الله و خلقه و فوق هذا ترفضه قالتلي انتي جذي راح تعذبينه من داخل لمن تحرمينه منج وراح تخلينه يسوي الي براسه
المهم اني فهمت من كلامها ان حاط في باله يتزوج و يطلق عشان يقنع امه و يقنعني لان حزتها بنكون متساويين في الحاله الاجتماعيه
و الله مادري شقول مادري شلون افكر بس من بعد كلامكم و كلام اخته اليوم قسم بالله حسيت ان قناعتي تغيرت
اليوم الصبح اقولكم رافضه 80% و الحين اقولكم انا موافقه 80%
انتو ماتدرون انا شنو قاعد يصير بقلبي لمن افكر بهلموضوع قسم بالله احس قلبي يتقطع لاني صج احبه احبه و مابي اظلمه مابي أئذيه للمره الثانيه خصوصا اني حاسه ان من الوناسه مو قادر يصدق كلامه يعور قلبي
مرات يقوم من النوم يدق علي يقولي انا بحلم و لا علم تهقين احنه صج ردينه ولا يتخايلي و الله حتى اضحك و بنفس الوقت تدمع عيني يقولي قولي اسمج الكامل عشان اصدق و مرات يقولي قولي كلمة السر عشان اصدق ان انتي انتي مو غيرج و اقعد اقوله كلمات سريه بينه قبل كنه نقولها
انا اعترف انا من داخل فيني تعب نفسي مو طبيعي و خوف من المستقبل لاكن ربي العالم شنو الي حاشني و شنو الي صار فيني فعذروني اذا عورتر اسكم و ضيقت خلقكم معاي لاكن بجد انا بحاجه لاني اسمع رايكم و نصايحكم فديتكم بنات ديرتي

al-musk اشكرج حبيبتي على نصيحتج و انا رحت حق دكتور نفسي و شرحتله حالتي حتى الدكتور النفسي استغرب من الي شفته بحياتي و وصلت لي مرحلة اني اخذ حبوب عصاب خصوصا اول ايام كشكلتي حاشتني اعصاب مو طبيعيه لي درجة اني ما اقدر اسمع صوت احد يتكلم يمي ما اقدر اسمع صوت اي شي لو صوت قطرة ماي يمي تقطر تنرفزني لاكن و الله مو مني و بديت اعالج نفسي بالقرآن يا اختي انا وصلت فيني الحاله اني اشوف شي مو موجود مرات اشوف قطاوه تتمشى بغرفتي مرات اشوف قطو يصعد عدري حالتي وايد تعبانه مادري شنو الي قاعد يصير فيني و مضغوطه ذهنين و انا ليلحين مستمره بعالجي القرآن وسورة البقره كل يوم اختمها مابي اتعلم على حبوب الاعصاب و الحمدلله القرآن وايد ريحني و احس اني رجعت اعصابي طبيعيه لاكن مرات الذكريات اتعبني و خوفي من المستقبل و خوفي من اني اظلم بنتي و اظلم حبيبي
تخبط تخبط ماله اول و لا تالي ربي يكون بعوني

و بنفس اليوم كان لي ردود و هذي ردودي :

الي قاعده افكر فيه الحين اني اوافق و اترك المسأله حق امه اذا وافقت فهذا نصيبي و اذا رفضت فهذا نصيبي بعد بستخير و بتوكل على الله
انا اتوقع اذا اخته على هذي الدرجه من التعقل ماشاء الله تبارك الرحمن اكيد الام بتكون انسانه واعيه و متعقله وماراح توقف بطريجنه و لا انتو شرايكم ؟؟
ياخوف اوافق و اتعشم فيه واتعلق اكثر و تالي الام ترفض حزتها راح اموت قهر على نفسي
الله كريم مادري لي وين راح نوصل كثر ما انا متشفقه اني اكون انا و بنتي معاه في بيت واحد كثر ما انا خايفه من المستقبل حسبي الله على طليقي خلاني مريضه نفسيه لي درجة اني انا صايره اخاف من الخوف المبالغ فيه الي فيني
يا جماعه قوليلي هل خوفي منطقي و لا مباغل فيه هل انا لي الحق اني اخاف كل هلخوف و لا لا ؟
احس مرات اني مبالغه حتى هو يقولي انتي مو منج هلحجي انتي من الي شفتيه
تصدقون صح كلامه صج انا وايد تغيرت اليوم صورلي صورت رسماتي كنت ارسمهم و اعطيهم حقه كنت اعشق التلوين الزيتي قاعده اطالع رسماتي و الالوان الي حاطتهم صج كنت اشوف الدنيا حلوه طيور و حمام و الوان تفتح النفس الحين لمن امسك الفرشه و الون سبحان الله تطلع معاي لوحه تلوع الجبد و الوان تضيق الخلق جد جد انا تغيرت مو شويه وايد بس انشالله تر عافيتي مثل قبل و نفسيتي تتعدل انا احس ان نفسيتي وايد احسن احس اني قاعدهاتحسن تدريجيا
حتى صحتي بديت اهتم فيها كنت وايد هامله نفسي وهو خلاني اهتم لصحتي و اصر اني اسوي تحاليل و عطاني مكملات غذائيه و حديد حتى ويهي ردت عافيته كان لوني اصفر جنه راشين بويهي كركم الحين احسن الف الحمدلله
و نصيحتي لكم حبايبي قلبي لا تتركون القرآن قسم بالله اني من اقرى القرآن ارتاح و استغفر و انام على سورة البقره وايد ارتاح احس اني انسى كلشي امنتكم اي وحده عندها مشكله و تبي ترتاح لا تنسى الاستغفار و القرآن

و هذا رد احر في نفس اليوم :

اخييييه قسم بالله كلامكم برد على قلبي و الله يسوى الف روحه لطبيب النفسي و الله اني ارتحت فديتكم و فديت دعاويكم امانه تدعونلي ربي يريح قلبي و ييسرلي امري
ام الشقى كلامج وااااااايد ريحني فديتج يارب يكون هلقرار صح يارب

طالبة انجلش تسلملي عيونج و قلبج يالغاليه

و هذا رد اخر في نفس اليوم :

عمومن حبايبي قلبي انا باجر اخته عازمتني نروح نشرب قهوه انا وياها بعد الفطور و اعتقد ان هو راح يي معانه مادري بس انا افضل ان احنه نكون بروحنه بنات عشان ناخذ راحتنه بالنقاش هي اصرت علعزيمه و انا ما حبيت اردها و اتوقع انها تبي تشوفني و تبي تناقشني بالموضوع و انا بصراحه متشوقه اشوفها و اقعد معاها وايد حبيتها هلمره وايد طيبه
لي درجة انها تقولي اذا صار نصيب لج مع اخوي و لا ما صار بتظلين رفيجتي و اختي و مابي اخسرج و جد و الله اني ابادلها نفس الشعور
يمكن لاني ماتعودت اقعد مع ناي طيبه بطيبتهم و قلوب صافيه و نفوس نظيفه ما عليها شوائب تعودت اقعد مع الانذال الي غدروا فيني يضحكون بويهي و من وراي يطعنوني يمكن الناس الطيبه وايد بس الطقه الي بظهري بعدها جرحه ما طاب مخليتني اشوف الناس بنظره سلبيه بس جد هلانسانه خلتني اشوف ان الدنيا بعدها بخير
حتى انتو ردودكم كلامكم بنسبه لي خلاني اشوف ان فعلن هدنيا فيها ناس طيبه مثلكم و شرواكم تنصحوني من قلبكم قسم بالله حسيتكم اختي لمن تقعد جدامي تنصحني من قلبها و قلبها يحترق علي

و هذا رد اخر في نفس اليوم :


انا نويت اني اقوله بس بعد ماقعد مع اخته اليوم راح اقوله باجر اني موافقه بخاطري اشوفه وهو فرحان و مستانس ماراح اقوله بتلفون بقوله فيس تو فيس ودي اشوفه عيونه و هو مستانس وربي يحنن قلب امه

رد آخر :

عفيه بنات حطوا نفسكم مكاني ابيكم تنصحوني من كل الجوانب مابي اغفل عن شي مابي تجربتي المره تتكرر و لو اني واثقه ان طليقي ما يسوا نعال حبيبي شياب الصين للطين فرق السما عن الارض
هو عنده خفاره الحين و قاعد يدزلي بالواتساب ودي اقوله انا موافقه الحين ودي اشوف شلون تكون ردة فعله احسه راح يستانس بس الي مانعني اني ادزله اني موافقه هو بنتي نايمه يمي و كل ما يي بقوله موافقه اطالعها و ابجي خايفه عليها خايفه
و الله مادري شنو الي مخوفني

و هذا رد اخر في نفس اليوم :

العشق دلعها حبيبتي كلامج يهبل عسل و الله على قلبي ماتدرون انتو شنو غيرتوا فيني جد امس شلون كنت افكر و اليوم شلون تغير تفكيري و فعلن انا كل ماقعد على سيادتي اقول نفس الكلام الي قلتيه مخلصه النيه لربي
و بنسبه للي صار فيني حبيبتي انا بصراحه مادري شنو تعرفين الي اشوف القطو اشوفه بعيوني و من ارمش يختفي بس متأكده اني اشوفهم مره داشه غرفتي و اشوف القطو طالع من الغرفه من شافني لبد ورا الباب و ركضت اطل عليه و لا مختفي ماكو شي و مره و انا نازله من الدري شفت قطو اسود يصعد و فجأه يختفي و مرات اكون نايمه ابطل عيني اشوف كذا واحد يفتر بالغرفه من يشوفوني يختفون مثل السراب بس انا متأكده اني اشوفهم لانه تكرر هشي معاي و هشي مو من الحين من قبل لا اطلق كنت اشوف قطاوه تخطر من الصاله تدش المطبخ او من الصاله تدش الغرفه و مرات و انا نايمه كنت اشوف بعد واحد طويل بالزاويه لي درجة اني صرت ماقدر اقعد بالشقه خلاص كرهتها ماقدر كنت طول اليوم بره البيت ماقدر و اذا دخلت البيت ابي انام و اذا قعدت بالصاله ابجي مثلالقمته الي صارت فيني و الحمدلله افتكيت من هشي و ييت بيت اهلي و خفت معاي الحاله هني تتكرر معاي اي بس بلاسبوع مره مرتين هناك لا بشكل يومي لي درجة اني مرات اكون بالمطبخ اطلع اركض الغرفه بشوف القطوه بتأكد و لا كن دايمن يختفون
و بنسبه للي قلتيه انا اسويه و عشان جذي امنت البنات انهم يسوونه تدرين مرى قريت سورة البقرة على ماي زمزم و سورة آل عمران و شربت الماي و ظليت اشربه 3 ايام و حطيته في البراده عشان كلنه نشرب منه تدرين شصار فيني ثالث يوم عزج الله قمت ارجع خيوط لونهم ابيض و شعر و اظافر قسم بالله من هول الصدمه اقول حق طليقي تعال شوف تعال شوف شنو طلع معاي هومن الخرعه وقف يطالعني يقولي كل هذا في بطنج لان بطني ظلت متفوخه 3 ايام تخيلي انتفخت مثل الحامل و بعد ماي زمزم المقري و الاستمرار على سورة البقرة طلع هشي من بطني بعدها بثلاث ايام و لي الحين ما عندي اي تفسير لهشي و ظنيت ان *** او اعوذ بالله شي من هلقبيل لاني انا مؤمنه ان الانسان طول ماهو يصلي و محافظ على قرائة القرآن مايضره شي الا بإذن ربي و الف الحمدلله انا الحين بحالة تحسن و تحسن كبير الف الحمدلله

و في يوم 17-8-2012 كتبت لكم هرد :
قووووووووه حبايب قلبي يا حلاتكم و يا حلات ردودكم تعالو شوفوا شنو صار معاي

امس رحت مع اخته و قعدنه شربنه قهونه و هي استانست و انا استانست عليها و يحليلها تقولي مالوم اخوي لي من قعد خمس سنين ياحليلها تهبل خلوقه و في البدايه مايابت طاري اخوها كنه قاعدين نسولف سوالف عاديه بعدين دشت هي بالموضوع قالتلي و بعدين معاج على غشمره قلت له على شنو بعدين قلت شفيني قاعده استعبط علمره ماستحي على ويهي جان اقولها لو انتي مكاني شنو رايج قالتلي بوافق سيده من غير ما اتردد شبي اكثر من جذي واحد يحبني و شاريني و اكيد بكون انا و بنتي بأمان و دللين و مدلعين و يحليلها تقولي ترى بنتج بتصير بنتنه وبيصير هو ابوها و انا عمتها بعد لان هلمسكينه مالها ذنب تتعاقب كل ذنبها ان ابوها كان سيء و هي ما تتحمل هذنب انا هني ماقدرت اتحمل و قمت ابجي طيبهم و معدنهم حسسني بأمن و اطمئن قلبي من كلامها و مالقيت نفسي الا غرقانه بدموعي و مسكينه تسكتني و تضحكني و حبيبي كل 10 دقايق يدق عليها ها شقلتوا و كل عشر دقايق ثانيه يدق علي يعني مره انا و مره هي و هيتزفه ضحكوني و الله المهم بعدها بنص ساعه تقريبا دخل علينه الحبيب و قعد معانه وشاف ويهي يسأل اخته يقولها مبجيتها ؟
متنه من الضحك انا وياها يقولها شمسويه في بنت الناس انا موصيج عليها وقمنه نضحك و هو قاعد يتكلم عن دوامه يبيني افهم طريقة دوامه و قاعد يفهمني وين مخطط نسكن بصراحه مر الوقت بسرعه ماكان ودي خليهم سوالفهم و ضحكهم حسيت انهم صج ناس طيبه حسيت اني قاعده مع اهلي بطيبتهم و على نياتهم و باخلاقهم ناس طيبه حتى النخاع و تذكرت كلامكم امس و ماقدرت اطول عليهم اهمه مايستاهلون اطولها عليهم
قلتله انا موافقه و بخلي كل شي على الله مسكين من الفرحه حسيت عيونه دمعت يطالعني و ساكت و يبتسم و اخته تقوله ترى احنه بمكان عام هام لا تفشلنه و تضحك عليه يقولي ليش قلتيلي هني ليش قلتيلي جدام هلعالم جان شلتج و ركضت فيج الملاج هههههههههههههههههههههههههههههههه
بصراحه امس اول مره اضحك جذي من خمس سنين مرت و انا مو عارفه اضحك من قلبي كله كنت مقموته و الله وقسم بالله قبل خمس سنين لمن امشي بأس مكان عام جمعيه سوق و الله ان الناس تطالع ويهي مستغربه يبين اني مخنوقه مقموته امشي جني ميته قسم بالله ماعرفت الراحه الا لمن فارقت الويوه الودره و الناس الرديه اليكنت عندهم و امس اول مره اضحك من قلبي حسيت ان الدنيا كلها تضحك من يديد
المهم اني أمنتهم و قلت لهم ترى اهم شي عندي رضا الوالده اذا مارضت انا ماراح ارضى مهمن صار فموافقتي مقرونه بموافقة الوالده و ابيها موافقه من طيب خاطرها لا اتعبونها و لا تضغطون عليها هي مره عوده و ماتحمل و قالولي لا تحتين احنه مخططين عدل و نعرف شلون نقنعها طلعوا مخططين و خالصين هههههههههههه
و طلعت رديت البيت و هو لحقني لي البيت وصلني و كل شوي يدق علي يسألني اسأله تضحك مره يقولي الاثاث من وين تبينه نشتري ومره يقولي كيكة العرس من اي محل و مره يقولي منو تبينه نعزم عاد ان هني ييوتي في بالي قلت له بعزم بنات المنتدى ههههههههههههههه هني قالي شنو اي منتدى بعد هذا قلت له اني كتبت موضوعي بمنتدايه العزيز و اني انكم اقنعتوني و اثرتوا فيني جان يقولي دخيل الله عزميهم هههههههههههاهمه و اهلهم و جيرانهم و الي يعز عليهم و من امس بدش اكتب لكم الي صار هو موراضي يطخ كل شوي يدق و يسألني اسأله تذبح من الضحك
و انا من الوناسه موعارفه انام كل شوي افز اقول ياربي تحنن قلب امه و على قولته اليوم المهمه العسره بعد الفطور الي هي اقناع الوالده ههههههههالله يستر يقولي ماقدر اكلمها و هي صايمه تعصب لازم تكون ماكله و شبعانه عشان اكلمها و ماتعصب هههههههههههههههههههه
انا قلت له اخذ راحتك باقناعها و لا اتعبها و تعور راسها هي مره كبيره و ماتحمل ضغط و سكر و حلفته ان يقولي الصج قالي انا راح اقولج الصج و تحملي الصج اول الايام امي راح تقسي علي بس شوي شوي انشالله تلين
و بلامانه قبل لا اقرى ردودكم قلت له انا مابي نكثر مكالماتنه نخليها لضروره بس عشان ربك يبارك لنه بهزواج و لا ابي اشوفك و لا تشوفني خل ربي يكتب لنه الشوفه برضاه ابي اشوفك مع اهلك داش بيتنه و غير هلحجي مابي هو استانس من كلامي و قالي انشالله تامرين امر

و بالمناسبه وصاني اسلم عليكم كلكم و اقولكم مشكورين انكم اقنعتوني و يقول حالف يوزع عليكم ككاو الفرح ههههههههه ذبحني من الضحك و قالي شوري عليهم شلون اقنع الوالده دامهم اقنعوا هالراس اليابس اكيد بيعلمونه نقنع الوالده ههههههههههههه
و سلامن قلبكم هذا الي صار معاي

وفي تاريخ 18-2-2012 كتبت لكم هرد :

فديتكم و فديت ردودكم الي تفرح القلب اشوفكم وقفتوا معاه من الحين ترى جذي ازعل انا ههههههههههه

اول شي راح اقولكم شنو الي صار امس
امس على الساعه تسع و نص دق علي
رديت قلت له شصار حسيته مضايق بس يبي يخش علي مادري ليش ما حسيت ان قاعد يقول الصج او خاش جم شغله

يقول عقب الفطور شربنه الجاي و اختي قعدت تقولي جدام امي شفيك سرحان كله ضايق خلقك و تقول حق امها يما مو ملاحظه حسينو كله سرحان و ضايق خلقه المهم الام قالت لا مافي شي اسمله عليه على شنو مضايق جان تقول اخته اخاف تحب ههههههههههه
جان يقوم هو يعفس ويه على قولته سويت نفسي مكسور الخاطر هههههههههه و الله انا يضحكني لمن يسوي هلحركات
المهم قال حق امه يما انا احب وحده و ابيها و صارلي 7 سنين احبها عشان جذي لمن توديني حق بنات ما اوافق على كلامه ان امه موديته حق بنات و هو مايبي ماصار نصيب فمسكها عذر
المهم هني امه قالتله ودامك تحب ليش عورت راسي خليتني افتر من بيت لي بيت جان قلت انا احب و اروح اخذلك الي تبيها و فكني من هلويه ودخلت بيوت الاوادم
قالها اي بس الي احبها منفصله و هشي خلاني اتردد ما اقولج هني اخته طبت على قولته جان تقوله اي و شنو يعني منفصله اهم شي تكون بنت ناس و متربيه و الانفصال مو عيب شوف شنو كان ريلها
هني الام مارضت على كلام البنت قالت لها وشنو يعني ليش هو شنو ناقصه هني قالها يما انا مو ناقصني شي غير الي احبها
قالها شوفي ربعي كلهم خذوا الي يحبونهم و عايشين مرتاحين عندي اثنين من ربعي متزوجين منفصلات و عايشين مستانسين و اهلهم ماعارضوا قالو لهم اخذوا الي تبون انتو الي بتتزوجون و انتو الي بتعيشون مع المره مو احنه شمعنه انا انتو تبون تعارضون
قالتله يا يما بنات الكويت وايد و انا ادورلك احسن وحده قالها مابي انا فتريت معاج جم بيت يرضيج اخذ بنت بس عشان ارضيج و اغربلها معاي قلبي مع وحده ثانيه مو معاها و انا الي مارضا على خواتي مارضا على بنات العالم و انا ريال من البدايه قلت الي ابيها اما اني اروح اخذ بنت الناس و ائذيها معاي و تالي انا ادري راح ارجع حق الي ابيها مو الي انتو تبونها
يقول هني امه صرخت عليه و صارت بينهم مشكله وهو قالها انا عمري 30 سنه انا الي اختار محد يختارلي شنو انتو تختارون و انا ابتلش
يعني انتو تستانسون و انا يضيق خلقي هذي مو حاله
قالت له امه بنت منو قالها بنت العايله الفلانيه و هي طخت لمن سمعت عايلتي يقول هي تمون على عايلتكم تحبكم قلت يالله زين اشوى
يقول من بعد الحجي اسكتت احاجيها ماترد علي يقول قمت بست رايها قلت لها يما اذا تهمج ساعدتي وافقي شوفي جم عمري صار انا متى يمديني اشوف عيالي و ازوجهم و استانس فيهم الا عمري صاك الستين يمكن حتى اكون ميت و ماشوف عيالي و لا عيال عيالي خليني استانس فرحي قلبي انا 7 سنين احاتي هلحظه و ماكنت ابي اطلع من شورج ورحت معاج بيوت بنات خلق الله قلت خاطر امي اولى و اهم من خاطري بس و الله ما هان علي اربط مصير بنت فيني و انا قلبي مع غيرها فكري فيها لو وحده من خواتي بترضين انها تتمرمط مع واحد قلبه و عقله مو معاها عييل ليش خذاها من الاساس مو حرام اضيع مستقبل و فرصة وحده بالززواج عشان ارضيج و بنهايه انا الي بعيش معاها انتو بتصفقون و بتستانسون و توصلونه لي باب شقتنه و بتصكرون الباب علينه و كل واحد بروح بيته و انا وبنت الناس الي بنتغربل و اخرتها طلاق و تعال ادفع مؤخر و فشله جدام الناس و ذيج اساعه برد على الي انا ابيها يعني شرقت و لا غربت برد حق الي ابيها برد حق الي ابيها
و قالها اذا ما وافقتي على الي انا ابيها انا زواج مابي ماني مستعد اتدبس و لا ادبس وحده معاي
يقول هني طالعتني بنظره و سكتت و انا قمت صعدت و غمزت حق اختي
يقول اخته قعدت تقنع بأمه وقالتل ها اني قايلها عنج و قالت لها حتى انها قاعده معاي و سألتها هي عندها عيال قالت لها اي عندها بنت وحده يقول هني امي ينت قالت لو يروح فوق ينزل تحت ما ياخذها
مادري شقولكم ضاق خلقي من ردة فعل امه لاكن هي ردة فعل طبيعيه اي ام تبي الكمال حق ولدها خصوصا ان الولد مافي شي و لا قاصره شي و الله انا مع امه بكل كلمه قالتها وما الومها
عممومن جان هو من نصيبي باخذه و انا قاعده اصلي استخاره و ربي يفرجها علي
امس حلمت حلم وايد حلو حلمت جني مسافره بسياره و جنه السياره كل شوي توقف يم جبل و شلال و خضره و كل ما ننزل من السياره اروح اشرب ماي من الشلال و اشوف احد من اهل طليقي واقف يم الشلال و يسولفون و يضحكون معاي بس انا ما اكلمهم و بعدين وصلت بفندق و قعدت يبت حلاو و قمت الف على الحلاو اوراق مكتوب عليها آية الكرسي و جني خذيت هلحلاو ووزعته على الناس بصراحه حلو غريب بس مريح انا ارتحت حتى الشلالات الي كنت اوقف يمها شلالات غزيره و مايها قوي و السما كانت غيم و الجو وايد حلو
و انشالله خير يارب
انا من بعد هلمكالمه تضايقت بس هديته وقلت له الله كريم قالي لا تضايقين انا راح اقنعها بس مو من اول مره انا قلت له اخذ راحتك عادي انا مو مستعيله اصلا انا ابي ارتب اموري فاخذ راحتك شهر شهرين ثلاث انا اصلا ابي ارتاح من الي صار فيني فتو الناس عادي
قالي لا انا ما تحمل اخليج في بيت اهلج شهر شهرين شدراني مايي واحد غيري يخطبج و تقومين انتي توافقين قالي ترى هلمره ماراح اسامحج اذا سويتيها و انتي يوم سويتيها كان عمرج 18 و انتي الحين مره كبيره و عاقله و عمرج 24 لا تسوينها و تحطيني بموقف مع اهلي وايد عور قلبي لمن قالي هلحجي قلت له تطمن ماراح اسويها انا لك و اذا مو لك مو حق غيرك خلاص تطمن و انسى اني اسويها مره ثانيه حسيته متضايق وصاكه فيه الدنيا حتى لمن قالي مع السلامه حسيت العبره خانقته
دق علي بليل على الساعه 11 ونص بس مارديت مابي اكلمه و ايد و لا ابي يحس بالضغط من كل مكان مني و من اخته و من امه فخليته يرتاح بتفكيره بس دزلي مسج قالي ام علاوي لا تحاتين انتي الي بتيبنلي علاوي و انا قريت المسج ابتسمت و نمت جني مقتوله وتوني قمت قلت ادخل اقولكم الي صار
اخته طول الوقت تكلمني بالواتساب و تطمني لاتحاتين امي راح تقتنع بس يبيلها اكثر من قعده و اشنالله راح توافق قلت لها عادي حبيبتي اخذو راحتكم و لا تضغطون عليها
بس هذا الي صار شرايكم فيه ؟؟؟؟؟؟؟؟
و اذا عندكم اسلوب ثاني في اقناعها ياريت تشورون علي فيه

Perfúme
يبارك فيج حبيبتي و صاجه هذي سعادة ولدها و ربي يحنن قلبها يارب

oum 5ald
حبيبتي و الله كل كلمه قلتيها في محلها فديتج اقري فوق وشوفي شنو صار معاي

فلانة
يا حياتي و الله صاجه انا مقصوصه بنص احس اني ضايعه بذات بعد حجي امه اليوم احس تهت بتفكيري اكثر و ربي يكتب الي فيه اخير فديتج سامحوني حبايبي عورت راسكم معاي وضيقت خلقكم


foshia gir
فديتج و فديت دعوتج الحلوه و اسمله عليج من الانجلاط ادعيلي وقولي يارب الله يحنن قلب امه مو عشاني والله عشان هو احس حيل تحبط الله كريم

BaiTotia
ياحياتي اسمله عليج من البجي ادري ضيقت خلقكم بس تخيلي ان هلهم كنت شايلته بروحي بقلبي و الله لو مو وقفتكم معاي كنت راح اعفس الدنيا يارب ربي يسمع منج

الجوريه الحمراء
هههههههههههههههههه
حبيبتي لا تحاتينه حاتيني انا ههههههههههههههه
ترى قمت ااغار منه فديتج جوريتي الحلوه


mrs_ntfa
فديتج يالغاليه سلامت قلبج حبيبتي انتي اقري الرد الي فوق وشوفي شنو صار معاي و لا تنسيني بدعائج ياقلبي


ورده حمرآ
فديتج و فديت كلامج العسل الي يريح القلب و فديت فرحتج يالغاليه اقري وشوفي شنو صار معاي و ادعيلي

Bloom
فديتج على هلكلام الحلو صاجه الانسان كثر ماكان على نيته ربج يعطيه على قدها

نونه المنكوشه
ههههههههههههه ذبحتيني من الضحك هذي الي بتخليني اروح حق الريل مقرومت الاذن فديتج ربي يسمع منج اقري شنو صار معاي


الزيـــــ^^ـــــن
فديتج يالزين كله معاي من امس يا حياتي ربي لا يحرمني منكم شوفي شنو صار معاي

بخارى
حياتي فعلن هذا الي سويته اقري وشوفي شنو صار معاي

the-angel
يافديت قلبج حبيبتي من امس متابعه الموضوع ربي يخليكم لي فديتكم اقري و شوفي شنو صار معاي


سوري ضيقت خلقكم ربي يفرجها انشاء الله

 

[حواري]

و في تاريخ 19-8-2012

قووووووووووووووووه حبايبي و خواتي فديتكم شلونكم عساكم بخير
اول شي احب اهديلكم هصوره

و عساكم من عواده يارب
ماقدرت ماادش اشوفكم و اسلم عليكم حبايبي انتو
امس ماصار اي شي غير ان دق علي سلم و قالي لا تحاتين ترى الوادله قلبها طيب معني انا ماسئلته لاكن هو ياب الطاري و قالي ان اخته قاعده تقنعها قلت له مو مشكله اخذو راحتكم و لا تضغطون عليها عادي خل المسأله تطول قالي ليش انا ابيها حار بحار قلت له الحريم الكبار مايقتنعون بسرعه يبيلهم طولت بال و تداري خاطرهم المهم قالي ان عنده فكره حلوه بسويها و خذا رايي فيها
قلت له شنو قالي ان راح اشترى حق امه سوار ليرات اذا تعرفونه يقول امي تحبه و كل ما تشتري واحد يضيع منها يقول قلت اشتري لها بمناسبة العيد و اعطيه لها و افاتحها بالموضوع تكون راضيه علي و بقولها ان هلهديه منج قلت لا لا تسوي جذي امك راح تقول اني قاطه نفسي قالي لا بالعكس بتحس انج قدرتيها حتى و انتي مو مرت ولدها قلت له كيفك سو الي بتسويه قالي بس اذا ضبطت السالفه اطالبج قيمته ههههههههههههههههههه عاد انا هني قلت له بسنه فلوس يا حسين بسنه فلوس ههههههههه ذبحني ضحك و قعد طول المده يقلدلي دغيشم لمن يقول اللههههههههههههههههههههههههه ذبحني من الضحك جد جد امس فصلت كل ما اقوله كلمه يقولي اللههههههههههههههههههه عرفتوها مالت دغيشم قلت له لا انت قضيت خلاص ما ظل فيك عقل يقولي نطري علي بعد اذا امي مارضت خلال هلاسبوعين احتمال ايي عند بيتكم اسوي كوكسه هههههههههههههههههه لاجد عمري ماشفته يضحك جذي و لا شفته يفصل جذي و لا انا ضحكت هضحك من قبل
المهم قالي الصبح بعايد عليج قلت له اوكي دز واتساب يقولي بشوفج قلت له احنه شنو اتفقنه قالي بس بسرعه و الله بعطيج شي و بمشي قلت له اوكي انا بمر الجمعيه الصبح تعالي هناك و بسرعه بس عيدج مبارك و فمان الله وافق علحجي
و على قولته هو مجهز خوش حجي حق الغاليه امه علغدا اليوم بقولها متى انا اعيد مع مرتي و عيالي و من هلحجي بيكسر خاطرها و الله عور قلبي لمن قال هلحجي يقولي و انا صاج ابي اتزوج لي متى يعني عور قلبي و الله


بنوته ذربه
الله يسمع منج يارب

فلانة
حبيبتي تسلمين لي على هلدعوه الحلوه ربي يوفقج يالغاليه و انشالله تقتنع يارب

الغـــــزال
كلامج صحيح و فعلن انا فكرت فيها اكثر من مره ربي يسهل و يحنن قلب امه يارب

شادن33
هههههههههههههههههههههههه
فديتج حبيبتي انتي الله يسمع منج يارب و يحنن قلب ام حسينوووووووو
ذكرتيني بموقف مره ناديته بستاربكس قلت له حسينوووو جان ييني ميج يقول و ويعووووووو لا تعلين حسج و قولي حسين ههههههههههه جدام الاوادم جنه عمري 18 سنه هههههههههههه سيده مديت البوز شبرين هههههههههههههههه
يارب يصدق احساسنه و توافق تصدقين عاد انا متقبله الموضوع قاعده اهيئ نفسي للرد سواء بالرفض و لا القبول ما ابي انصدم

شيخة السمر
هلا و الله يالغاليه صاجه اصلن مافي وحه مقارنه بين طليقي و بين هو قسم بالله فكرت بكلامج اكثر من مره و الله طليقي ماكان آدمي كلش كلش مرات كنت احس ان متجرد من الاحساس حتى ايده خفيفه على طول يمد ايده و يطقني على شغلات سخيفه و تافه على قناة بالتلفزيون على تلفوني ليش مو حاطته سايلنت على اتفه الامور حتى لمن اطلع معاه الشباب يطالعوني انا مالي شغل انا ماشيه معاه ليش طالعوج تعرفينهم يركبني السياره و يطيح فيني طق كلش ماله علاقه بالرجوله اما هذا الانسان لا فرق فرق بوايد شغلات فرق بلاسلوب فرق بالشهاده فرق بالثقافه فرق بالعايله فرق بالتربية فرق بالشكل جد جد شياب الصين للطين ياوخيتي رضينه بالبين و البين مارضا فينه قسم بالله اول ايام ملجتي الناس يقولولي شخذيتي قسم بالله الوي و الملامح بنقالي و لا غلطه وفوق هذا يغازل و يتحرش و يخون انا بس ابي اعرف الي طخاني معاها ماطلت بويه ما جيكت انا يوم رضيت فيه قلت ريال و مايعيبه الشكل الرجوله مخابر مو مناظر اثاريه لا منظر و لا جوهر كله ميح ربي يسهل الامور يالغاليه و سامحيني طولت عليج بس جد حبيت افض فض

Perfúme
ربي يسمع منج و صاجه قلب الام مافي احن منه

غنآآآتي
الله يسهل الامور انا وافقت و تركت الامور على امه و بيدها القرار جانها وافقت انا موافقه و جانها رفضت انا رافضه

cup-cacke
هلا و الله حبيبتي صاجه انا الي مطمني ان متقبل بنتي و بالعكس متشفق عليها قبل جم يوم قالي متى ناخذها و نلعيها و نطلعها يعني حسيت من كلامه ان هو شاريني و شاري بنتي و هو وايد حنون على اليهال حتى مره سمعني ازفها صرخ علي و ظل يومين متنرفز مني هو وايد حنووون الله كريم

ورده حمرآ
هلا و الله بوردتي الغاليه اما افكارج جهنميه تفكيرج صحيح 100% اخته قالتلي انها بتسوي مثل ماقلتي بالضبط و يارب يصدق احساسج بس انا مابي اتعشم وايد مخليتها على الله و متقبله القبول و لا الرفض الله كريم

Whisper ~
فديتج حبيبتي انتي كلامج وايد مريح جد جد ارتحت لمن قريت كلامج و سامحيني جان ضيقت خلقكم و بجيتكم بس جد كنت بهم و حاطته بقلبي و مو عارفه اتصرف قسم بالله مارتحت الا لمن فضفضت لكم و لقيت منكم كل خير و كل طيب فديتكم بنات ديرتي و يارب الله يسهل الامور و يلين قلب امه

عاشقة هواك
حبيبتي و الله كلامج منطقي و انا الحين رابطه موافقتي بموافت امه و رفضي برفضها و توكلت على الله و ربي انشاء الله يكتب لي الي فيه الخير و مشكوره حبيبتي فديتج

و في تاريخ 23-8-2012

حبايبي سوري طولت عليكم بس والله مو ناسيتكم ادري انكم ناطرين مني خبر فديتكم و فديت ردودكم و الله ارتاح من ادش اقرا ردودكم
صارتلي سالفه لو اقولكم عنها بطقون على راسكم حبيبي و طليقي تكافخو و وين عند باب بيتنه مو صج الي صار و اخواني طلعوا و عاونوا حبيبي بالطق
والله مادري اضحك و لا ابجي استغفر الله انا زين ما اين
كان له رؤيه ياي ياخذ بنته و هو كل مايي ياخذ بنته يقط حجي و يغلط و انا ماقول حق اخواني ادري دمهم حار و بيتكافخون معاه و هو جنه نثيه يركض يروح يشتكي المهم طلعت بعطي البنيه قاعده تبجي و لامتني ماتبي تروح انا مسكتها عند الباب لميتها قلت لها ميخالف روحي شوي و تعالي هي مو راضيه واقفه ماسكه هدومي ياني جان يقولي كبرتي راس البنيه قلت له هذي يهال ماتعرف تمثل و لاتجذب هي ماتبيك و انت متنازل عنها خلاص توكل على الله لا تكثر حجي جان ياخذ البنيه يتلها من بين ايدي مثل الخروف انا هني ماتحملت بصراحه اشوف بنتي متلوله و تفرفر ماتبيه و خافت
المهم حبيبي متحلف فيه واقف عند اللفه مالت الفريج شاف الموقف داس ويه دعم سيارة طليقي من وره حيل انا مادري مصدومه على برد جبدي على مادري شنو و طليقي خله بنتي وراح حق حبيبي اول مانزل حبيبي زرده و يقوله انت ماتشوف ههههههههه
الحين انت داعمه وتقوله ماتشوف انا هني خذيت بنتي و دشيت و قلت حق اخوي و اخري دق على باجي خواني و طلعو طقو طليقي مع حبيبي قسم بالله مابرد قلبي الا بعد ماشفت هلموقف
وراحوا المخفر و صارت سالفه انا مقروده قسم بالله
اخواني يقولون حق حبيبي انت شلون دعمته يقولهم انا ياي مو منتبه و دعمته هو قام يسب و يغلط جان اطقه يستعبط يقول حق اخواني انتو ايش طقيتوا يقولوله هذا طليق اختنه و كل مره يي يسوي مشاكل وشفناه قاعد يصارخ و يتناجر معاك فشلنه جدام الييران و احنه بروحنه نبيه فصارت زلقه بطيحه
اهم شي ادق على عيال اخوي اقولهم تعالو فاككوهم ييون يزيدونه هههههههه
والله طاش ماطاش صار جدام باب بيتنه ههههههههه
انا اخرتها حسينو بينني و بيقعدني بروحي منتهيه قاضيه

نيي حق المهم الغاليه امه على كلامه ان الخطط لي لحين ناجحه و اخته تقولي امي قلبها لان ادعولي ربي يسهل لاتنسوني و سوري انا قاعده اكتبلكم من الفون و اكيد الحين ترس بدليات انشالله راح ادش المغرب و اقولكم التفاصيل بس حبيت اطمنكم حبايبي انتو


وفي 24-8-2012

هههههه والله قلت له نفس كلامكم قلت له سويت مسلسل جان يعصب علي ويقولي سكتي لا اصير عليج مسلسل شائت الاقدار
الله يا ان حصل مدح من اخواني مو صج و ابوي لمن سمع قال بيعزمه على الديوانيه و الحبيب متشقق كل شوي يدق يسأل شقالو ذبحني اخر شي قلت له قالو عنك رومبو هههههه واحد من اخواني يقول مادري شفي لصبي فيه حره على طليقج اقول بقلبي بلاك ماتدري شنو بقلبه
اخته داقه علي ميته من الضحك تقولي حسينو بدع زارد الريال يقوله ماتشوف و هو الي داعمه يدور مشاكل هههههههههه
طليقي من الصدمه مو عارف شسوي ضاق خلقه عسياره و انطق و مستغرب ههههههه استغفر الله و الله كثر ماخفت ضحكت انا ببدل بنوتي الحين و بييكم اقولكم التفاصيل حبايبي ادري طولت عليكم بس والله هسالفه عفستني
خلاقوم ابدلها و اجهزها حلفت حبيبي مايي يسفط بعد مالنه خلق من الصبح طاش ماطاش



و في تاريخ 25-8-2012
دخلت و بشرتكم و قلت لكم :

بنات البشاره الام شبه راضيه دشيت ببشركم بعدين اقولكم التفاصيل بس موراضيه راضيه بس شبه راضيه

و في تاريخ 29-8-2012

حبايبي فديتكم و فديت وقفتكم معاي ماتدرون شكثر مرتاحه لوجودكم يمي هشي وايد مريحني
الي صار معاي
حبيبي كلم امه وسوى خطط و تفاصيل وايد عشان يقنعها و اخته حاولت فيها بس انا مادري احس اني طرف غير مرغوب فيه
وحتى لو الام رضت فرضاها من ورا قلبها و انا ماودي ادخل عليهم من ورى خاطر امه حرام مابي اكون ثقيله عليها او سبب في ضيقتها قسم بالله معوره قلبي
اخر شي صار انها قالت له انا بشوفها قال لها اوكي حلو روحي شوفيها في بيت اهلها و وافقت و هو استانس و قام باس راسها و عور قلبها قالت له بس ترى مو معناته اني موافقه لا انا مو موافقه بس بشوف على شنو انت مسوي بنفسك جذي
قالها اوكي و الحين صارلها 3 ايام كل شوي لها راي مره اي و مره لا
المهم ان كلم خالته الي قريبه من امه وايد كلمها من ورى امه و قالها كل شي و قالها ابيج تأثرين على امي و ابيج انتي تروحين معاها لمن بيون و هو يقول ان بيي عشان يشوفني يعني
و الله كريم و الله يسهل يارب
ليلحين مادقت بس اليوم خالته متغديه عندهم و بتكلمها بالموضوع و بتحاول تأثر عليها و أول مايدقون بقولكم ادعولي الله يسهل الامور يارب


و بعدها قطعت عنكم و لهيت مع الايام و الي صار و نفسيتي طول هلفتره كانت تعبانه لان اقناع ام حبيبي خذا وقت طويل لاني كنت ابي ييتها و زواجي يكون بطيب خاطرها و الحمدلله وافقت و ملجنه شهر اثنين و الحمدلله انا الحين مع حبيبي و بالحلال و برضا امه و سكنه عندها و انا الحين اعتبرها امي الثانيه و غلاتها صارت من غلات امي فديتها و قعدنه بدور فوق و مرتاحين و مستانسين و سوينه عرس صغيرون و على قولت بو علاوي يقول المفروض نسوي عرس خاص حق كويتيات نعزمهم هههههههههههههه فديتكم
و بنتي الحمدلله حبته وايد و تأقلمت معاه و لا حسيت انه مو ابوها بالعكس حسيته ابوها حنون عليها اكثر مني انا الي انا امها و يزفني بعد اذا عصبت عليها الحمدلله ربي تمم علي فرحتي و سعادتي
هذي الاخبار الحلوه
اما الاخبار الي مو حلوه طليقي بلش مشاكل معاي و قام يهدد و يبي يطالب في بنته من بعد ما تنازل عنها وهشي خايفه ان يدخل التوتر في حياتي ماصدقت ارتاح و يارب ربي يتمم علي راحتي راح اتعب وايد و احس بذنب اذا خذاها مني ريلي قالي لا تحاتين و انا عند كلمتي و راح احط بدال المحامي عشر بس ما ياخذها و بنشوف شنو يصير و بنتي اصلا ماتبيه لانها متضرره منهم وايد نفسيتها تتعب الله يعين ربي يسهل علي هلموضوع يارب ياكريم
و انشالله اكون كفيت و وفيت و ماقصرت معاكم و اعتبرو هلموضوع رد جميل نصايحكم و اشكركم كلكم خصوصا العضوات الي تردد اسمهم بالردود و العضوه انسانه اشكرها وايد لانها سجلت في المنتدى عشان ترد على موضوعي و مشكورين وايد جميعا على حرصكم و طيب قلبكم ربي يوفق الجميع و يسعد الجميع

 

[Perfume]

حبيييييييييييبتي
الف الف الف مبروووووووووووووووووووووووك
الله يسعدكم ويهنيييييكم
لا تحاتييين خلاص اهوا تنازل عن بنته
مو على كيفه يطالب فيها الحين
الحمد لله انج طمنتينا عليج

 

[نـعـومـه]

ماااااشاءالله

قصتج بس قريتها تذكرت اني كنت قاريتها من قبل

اولا مبروك الزواح ماشاءالله قصتج جنها مسلسل تركي وهالحب نادر حافظي عليه ولاتقولين لاي احد عن القصه العين حق

وطليقج الله يعينج لانج تزوجتي فالحضانه مادري تكون له معروف بس اذا تنازل يمكن بهالحاله تكون لج بس اهم شي بالاقوال خيعرفون سوالفهىلان شلون بنتج تتربى عند هالناس ؟؟؟

الله يعينج

 

[الشهد كله]

مبرووووووووووووووووووك :nbvppw::nbvppw::nbvppw:
عسى الله يهنيج ويتمم عليج الرحمن يارب​

ويفرج عنج كربتج مو ورى طليقج​

 

[ناديا المطيري5]

يا الله
تبارك الرحمن ربي يخليكم لبعض
ابي حب جذي
شخباري منو يحب بصدق الحين !

جد مستانسه لج والله يوفقج وييكتبلج السعادة في حياتج مع حبيبج وبنتج

 

[شــــــــــــــوقــــه]

مبرووك حبيبتي صج صبرتي و نلتي لانج فضلتي ربج على حبج

يااا رب يتمم عليج و يفك طليقج منج

 

[التوق]

الله يهنيج حبيبتي ويوفقج ويخليلج بنتج

 

[طريق السعاده]

:nbvppw::nbvppw::nbvppw::nbvppw:

الف مبروووووووووووووووووووووووووووك :eh_s(9):الله يهنيكم يارب ويخليكم لبعض حبيت قصتك كثيييييييييييررررر نهايه سعيده الله يهنيك:yaaaaaarb:

بالنسبه ل طليقك مدام مو اهل للحضانه خليه يولي مايقدر يسوي شيء بس المهم تثبتين انه مو اهل للحضانه وبنته يبي يشوفها يجي يشوفها عندكم بس تعيش معه لا القانون يمنعه :eh_s(15):


بالتوفيق حبيبتي :eh_s(22): حكايتك بتفاصيلها تعطي امل والحب الحقيقي هذا نهايته فقط الحب الحقيقي:eh_s(7):

 

[قوس فرح]

ماشاء الله تبارك الله ، الله يهنيك و يزيدك سعاده تستاهلين . و بنتك ان شاء البه تظل عندك لين تشوفينها عروس

 

[Lo0o0lY]

مبروك حبيبتي والله يتمم عليكم فرحتكم
هذه السوالف التونس والله

 

[$ النيره $]

,

عسى الله يوفقج ويهنيج ي رب
وكل هذآ لآنج فضلتي ربج عن حبج بالبدآيه

 

[بنفسج ..~]

ماشاء الله تبارك الرحمن
قصة ولا أروع
الله يهنيج يارب وحافظي على هالرجال ودلليه يستاهل بو علاوي >>>دخلت جو خخخ
صراحة زوجج ذهبه لا تقصرين معاه وقومي فيه وأنتي أكيد منتي مقصره
وأنتي وحده على نياتج والله رزقج وتستاهلين

وصيتي لج هي " لا تخلين صلاتج وعبادتج وكثري من الحمد والتهليل والشكر على هالنعمة الفضيلة "

الله يدوم عليج السعادة حبيبتي يارب

 

[عـيّــآره]

الله يديم السعاده عليج ويرزقنا باللي نتمناه​

 

[amami al-kuwai]

مبروك حبيبتي والله يهنيج ويفرحج

وطليقج ماله امل ياخذ البنت دام بيئته قذره مثل ماتقولين

 

[amami al-kuwai]

مبروك حبيبتي والله يهنيج ويفرحج

وطليقج ماله امل ياخذ البنت دام بيئته قذره مثل ماتقولين

 

[mischocolat]

مبرووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووك

 

[مدّهره !]

ألف مبرووووك ^^

 

[الـ ج ــوري]

الف مبروك يا عمررري ربي يوفقج ويكفيج شر طليقج