حبيب الحب : خالد ونوره ( أول قصه لي بالمنتدى )

[أميرة الحلا]

اكثر من روعه ماشاءالله
لا يوقف

 

[منيرة خالد]

البارت ( 19 )
==========​

خالد بالطيارة قلبه حاير نوره اللي عشقها أهيا نفسها نوره بنت عمه وزوجته يتذكر لما كانت تقوله شوف بنت عمك عطها فرصه ليش ما حاول ، آآآهـــــ يا نوره تحبيني وإلا خلاص انا بالنسبة لج تجربه وانتهت او مجرد انتقام لكلام سمعتيه مني عن بنت عمي إللي إهي انتي ، ليش يا نوره ما قلتي لي الحقيقة . وأنتي تعرفين مشاعري ، وإلا تظنين اذا عرفت انتي منو بكرهج لي هالدرجه شكيتي بمشاعري .

مستشفى كرومويل لندن : كان موعد ام راشد مع دكتور القلب بعد ما ادخلوا عليه ام راشد ونوره وطلال قابلهم دكتور القلب اللبناني

الدكتور : كيفك ام راشد

ام راشد : الحمدلله

الدكتور : ام راشد ، هلا لنا سنه من سوينا العملية حاسه بشي مضايقك

ام راشد : لا والله ، الحمد لله

الدكتور : ان شاء الله نعمل لها فحوصات مشان نتأكد من سلامة الشرايين وكل شي ونتطمن عا صحتك ، طلال أنا راح اكتبلها الفحوصات وانت عليك تأخذ المواعيد وبعد ما تطلع النتيجة تسجل لها موعد

طلال : يعطيك العافية دكتور ..... >> وأخذ الأوراق وراح يحط المواعيد

طلعوا من المستشفى وعلى طول خذوا تاكسي واتجهوا لمحل هارودز وطلال قعد بستار بكس . أما نوره وأم راشد راحوا يفترون بأدوار المحل

( طيارة خالد طارت من الكويت الساعه ثمان الصبح - طيران الخليج >> مودعايه لهم - ووصل لندن حول الساعه 2.30 الظهر ) وصل خالد لفندق ماريوت وراح لغرفته ورتب ملابسه واخذ شور ونزل على طول يتمشى بالهايد بارك واتصل على طلال ولقى خطه مفتوح >> خالد يتصل بك

طلال : السلام عليكم

خالد : وعليكم السلام ، طلال أنا توني واصل لندن عندي شغل للشركة .

طلال : حمدلله على السلامه ، انت بأي فندق ؟؟

خالد : والله نزلت بمريديان .

طلال : خالد أنا اللحين بمحل هارودز ، اذا خلصوا أهلي من التشري مريتك

خالد : اوكي انتظر اتصالك

طلال : اوكي صار ، مع السلامه

خالد : مع السلامه .

خالد كان يتمشى بحديقة الهايد بارك ، بسااااااااط اخضر والجو منعش والسماء منثر عليها قطع الغيوم مثل الديباج الابيض ، وقرب من البحيرة وشاف فيه وجه نوره ، وتذكر اغنية عبدالمجيد عبدالله ندندن يغنيها

احب الزين مهما كان غالي ....... ولو هو صعب انا احب الصعايب
ولا يهدى ولا يرتاح بالي .......الين ارواحنا تصبح حبايب

احب الزين يسهر لي لحالي ....... يذوب العشق وهو في العشق ذايب
اشوف الكون لو تغيب خالي .......وانا ظني مع المحبوب صايب

انا ماني ابد واحد خيالي ....... انا تعودت واشقتني الركايب
اجود بمهجتي للي في بالي ....... حبيبي اللي جمع كل الغرايب

ويستاهل وراس اليوم عالي ....... مدام انه يعدي باللهايب
بروحي بالهوى وبكل مالي ....... هويته والهوى لاغلى الحبايب​

وأخذ طريجه لى محل هارودز أول ما وصل وقف قريب من المحل يشوف اللي يدخل ويطلع تمنى يشوفها ، كان متردد يتصل على طلال أو انه يشوفهم من ابعيد مع هالزحمه اشلووووووووووووون ............. انتبه لمحطة التاكسي وأول تاكسي هااااااااااااا نوره هاذييييييييييييي نوره وطلال وأمهم

آآآآآآهـــــــــ يا نوره ما خاب ظني تأكدت إنج نوره ............ليش ؟؟ بعرف ليش ما تبيني ؟ والا شنو بالضبط اللي صار ؟ أبي اعرف القصة .................... بعرفها بس هالمره بطريقتي مو بطريقتج ................ اذا انتي اوهمتيني بحبج أنا حبي صادق ولا يمكن اتخلي عنج وما اصدق انج ما تبيني بس اشلون اعرف وأتأكد من مشاعرج ..............؟؟؟

ركب الباص اسرع له بالرده للفندق وانتظر اتصال من طلال

عند طلال

طلال : نوره انزلي انتي وأمي أنا رايح اشوف واحد من ربعي توه واصل لندن >> ما حب يقولها إن خالد موجود علشان ما يحرجها .

نوره : زين أنا وأمي بنروح مطعم فتوش علشان نتغدى وبعدين بودي امي الفندق ، وعقب بورح محل دبنهامز بس شوي

طلال : توج متسوقه من هارودز

نوره : طلال اشفيك أنا اجهز لسنة كامله علشان بالديره ما اروح السوق

طلال : لا والله ما تروحين السوق .

ام راشد : خلها تروح أنا بقعد ارتاح ، وانتي لا تتأخرين

طلع طلال من الفندق واتصل على خالد وواعده يمره بريسبشن الفندق

خالد >>>قام اول ما شاف طلال : هلا والله بولد عمي ونسيبي

طلال >> جنه سمع شي غلط : هلا والله حمدلله على السلامه شلونك أمس لما كلمتني ما قلت إنك بتجي لندن

خالد : أبد اول ما صكرت التلفون منك أتصلوا الشركة اللي نتعامل معاها وقالوا لازم أي أوقع اوراق مهمه ............ اشوه بسرعه حصلت حجز بقعد اسبوع .... بشر عن عمتي اشلونها

طلال : الحمد لله طيبه اليوم كنا عند الدكتور وكتب لها تحاليل وسونار ، موعدهم عقب يومين . >> نوره يتصل بك

طلال : هلا نوره خير

نوره : أنا وصلت أمي الغرفه وبطلع بروح دبنهامز

طلال : اللحين بتروحين دبنهامز زين خلاص لا تأخرين

خالد >> سمع نوره بدبنهامز : طلال أنا اللحين استأذن حدي دايخ من أمس ما نمت .

طلال : إي والله ارتاح وباجر أشوفك اذا خلصت شغلك ، بروح عند الوالده قاعده بروحها

خالد : مع السلامة >>>>>>>>> وحط نفسه بيروح يصعد

طلال مشى وخالد من ابعيد يتبعه ..................أول ما شافه دخل بوابة فندق كمبرلاند بسرعه رككككككككككككض جنه أحد لاحقه وأول محل دبنهامز بشارع اكسفورد وأقرب واحد للفندق ............. وقف عند البوابه ويدعي { يآجـآمع الناس في يوم لا ريب فيه اجمعني مع ضآلتـي } ............. تذكر نوره والعطور ...........وسيييييييده لركن العطور هاااااااااااااذي نوره

خالد : نووووووووووره

نوره : ................................. >> العيون بسرعه بدت تلمع تجمعت فيها الدموع

خالد : نوره >> ما عرف شنو يقول

نوره : هلا خالد ، أنت بلندن

خالد : هلا نوره ............ أنا ياي لندن عندي شغل ، وأنتي طمنيني عليج ليش يايه لندن>> ومسك ايدها يسلم

نوره : أنا ..........أنا يايه مع أمي وأبوي تدري مريض

خالد >> يا جذابه بعد للحين بتجذبين بنشوف يا نوره اش طول حبل جذبج : ما يشوف شر ... صكرتي التلفون بسرعه بويهي حتى ما خليتني ابارك لج ؟

نوره : هااااااااااا على شنو ؟

خالد : ملجتج مو تقولين بتأخذين ولد عمج غصب ؟

نوره : إي.............>>>>> ببجي ودي ألمه وأبجي ما هدت ايده أبيييييييييييييييه

خالد : حتى أنا يا نوره غيرت رأي ما أبي اطلق بنت عمي .......... مثل ما أنت بتأخذين ولد عمج غصب أنا بعد بغصب نفسي على بنت عمي .

نوره >>>> افتحت عيونها جنه احد معطيها طراااااااااااق : نـــــــــــعـــــــــــم

خالد : إي وأنا أول ما أرد من السفر ، بخلي أمي تروح تطيب خاطر نوره وتقنعها تغير رأيها عن الطلاق

نوره : بس أنت قلت إن نوره إهي اللي طالبه الطلاق يمكن ما ترضي

خالد : لا بترضى ............... وبقنعها واذا ما رضت بأخذها غصب ، علشان احس نفس احساسج لما تكونين مع ولد عمج وأنتي ما تبينه وأنت تبيني وأنا أبيج ...........صح يا نوره انتي للحين تحبيني

نوره : .................

خالد : نوره ........... تحبيني ........ وإلا خلاص ضاع حبي بقلبج مسحتيه وإنتيهت من حياتج ............. ابيج تقولين الصج تحبيني

نوره >> دمعت عينها وانزلت دمعتها خوف من اللي جاي أمبييييييه خالد غير رأيه ويبي يتزوجني اشلووووووووووون اواجه اشراااح يسوي فيني : ...................

خالد >> مسح دمعتها : نوووووووره تحجي تحبيني

نوره : اي احبك والله احبك

خالد : نوره انا قاعد جم يوم بلندن وأبي اشوفج كل يوم خلينا نودع بعض قبل فراقنا ..... مو تقولين كل حبيبين نهايتهم فراق او زواج ................ دام نهايتنا فراق .....خلينا نفترق بذكرى حلوه بدال لا نذكرها بدموع نذكرها بإبتسامه

نوره : بس أنا معاي أخوي وامي آآآآآآآآآآآ وأبوي طبعا المريض

خالد : وين تلفونج ؟

نوره : كاهوا >>>>>>>> تله من ايدها ودق على تلفونه رنه

خالد : أتصل عليج ونتفاهم ..........زين

نوره : زين

خالد : أمشي خلينا نشوف شنو تبين تشترين من دبنهامز

نوره : لا خلاص ما لقيت اللي أبيه >> طلال يتصل بك

نوره : أمبيييييييييييه خالد مع السلامه آآآآآآآآهذا أبوي يتصل لازم ارد الفندق

خالد : ابوج زين ردي عليه ، و خليني اوصلج لي الفندق وين ساكنه

نوره : أنا ................ فندق ماربل ارش ........ ما يحتاج توصلني أنا اروح بروحي يالله حبيبي باي

خالد : بااااااااااااااي يا قلبي ترا بتصل عليييييييييييج

نوره >>>> راحت تركككككككككككككض بره المحل والشارع اليوووووووووم الجو مو طبيعي ............. قلبها ضايع بين الفرحه بشوفة خااااااااااااالد ومرعووووووب من المشكله الجديده بحياتها .................... خالد غير رأيه ويأخذ بنت عمههههههههههههه أمبي اشلون الدبره .
======================= ​

 

[منيرة خالد]

البــــارت ( 20 )
---------------------- ​

أول ما أوصلت نوره الفندق >>> كان خالد يتبعها من بعيد يبي يتطمن إنها اوصلت سالمه ..........

طلال : اشفيج جايه تركضين ، اشوف ما بيدج شي

نوره : هااااااا مالقيت الكريمات اللي كنت أبيها خالصه >>> وحطت تلفونها على الصامت

ام راشد : نوره ............ توها اتصلت على ام جابر أخت جارتنا إهي إهنيه بلندن جايه علاج ولزمت نمرها بشقتها ساكنه بعمارة البارك وست ، قومي خلينا نروحلها ، ترا المره ما تقدر تطلع إلا للمستشفى حدها تعبانه ، وبنروح نوسع صدرها صارلها ثمان تشهر واهي بهالديره عسى الله يفك عوقها ................ نوره يالله قومي

طلال : نوره .................اشفيج قومي بوصلج انتي وأمي

نوره : زين ...........

البوابه رقم ( 8 ) ضغط طلال على رقم الشقه ( 821 )

جابر : yes

طلال : هلا جابر ............ افتح لنا الباب أنا طلال ومعاي الاهل

جابر : يا هلا ومرحبا ............ ادخلوا >> نزل جابر وطلال وراحوا ستاربكس اللي بشارع اجورد رود ..............

ام جابر : حيا الله اهل الديره ، يا زين هالريحه ريحة اهل الديرة ، شوفتج يا ام راشد تفرح قلبي جني رديت للديره وانا بمكاني

ام راشد : الله يحيج ، اثر الشوق ذابحج

ام جابر : اي والله يا ام راشد ، ضاقت فيني الدنيا ، واشتقت لأهل الديره ، صبر جميل والله المستعان.

نوره : ان شاء الله خالتي تردين بالسلامه وبصحه وعافيه

ام راشد و ام جابر : آمين

تمت ام راشد وام جابر يسولفون على الديره واهلها والعلاج والامراض ما خلو شي ............... ونوره لاهيه بتلفونها ................>>> 00965990 كان رقم خالد يتصل عليها وإهي تشوفه وخايفه ترد ....................... اشلون راح تتصرف معاه حست إنها تهورت لما كلمته بمحل دبنهامز ............... واشلون خلته يأخذ رقم تلفونها وواعدته تشوفه كل يوم ..................
.مسج { ردي علي نوره لا تجننيني ......... اذا ما رديتي بروح لأبوج وأقوله عن علاقتنا ، وبخرب عليج حياتج }

بسم الله هذا اشفيه ...............دزتله مسج { انا طالعه ما اقدر ارد عليك اذا رديت الفندق اكلمك }

ردت نوره الفندق مع امها واحتارت اشلون تكلمه >> دزتله رساله { خالد أنا معاي امي بالغرفة وما اقدر اكلمك ....... أرجوك احلفك بحبنا ابتعد عني }

رد لها الرساله { نوره أنا حلفت لج لا يمكن اتخلي عنج ...... وصدقيني أنا عند وعدي }

بجت نوره وإهي كاتمه صوتها ما تبي امها تنتبه لها ....................... يعني ما راح اخلص منك يا خااااااااااااااااااالد

ثالث يوم لهم ب لندن : انزلت نوره وأمها وطلال يتفطرون بمطعم الفندق >>> جابر يتصل بك

طلال : السلام عليكم

جابر : وعليكم السلام ، هلا طلال اشلونك

طلال : بخير الله يسلمك

جابر : طلال ، الله يعافيك أبيك تروح معاي المكتب الصحي اذا ما عندك شغل

طلال : لا والله ما عندي شي ، اخلص من الريوق وأمرك

جابر : صار سلم

طلال : يمه هذا جابر يبيني اروح معاه المكتب الصحي

نوره : لا والله وأنا بروح السوق اشلون يعني

طلال : انطري لما ارد

نوره : نعم اللحين الساعه 9.30 وأنت بتروح المكتب الصحي وأنا اعرفهم ما يخلصونكم مبجر بيروح علي الوقت والسوق يصكر الساعه 5.30 العصر ما يمدي الوقت

ام راشد : والله انا ماني رايحه معاج بروح عند ام جابر وانتي كيفج روحي بروحج تدلين لندن عدل مو اول مره تجين

طلال : اي نوره ، خطوتين بينج وبين شارع اكسفورد روحي بروحج

نوره : خلاص اروح بروحي

شارع اكسفورد : محل سيلفريدج

خالد >>>>>> اتصل اكثر من 10 مرات على نوره ولا راده عليه

تضايق وقال اروح سيلفريدج اشتري لأمي العطر اللي تبيه من الصبح دازتلي مسج .... دخل من البوابه .............. الفحته ريحت العطور وتذكر نوره وعطرها ............ ليش ساحبه علي اتصل ولا تردين .............. ليش العناد وأنتي امس تحلفين انج تحبيني.......... كيفها اهي اللي حطت نفسها بهالموقف اول ما ارد بتصل على طلال واعلمه بسالفتها وشنو سوت فيني نوره ........................ والله خايف اذا سويت جذي افقد نوره للأبد ............. احترت معاج يا نوره ......................فتح تلفونه نسى اسم العطر ......... توه بيقول اسم العطر ............... آآآآآآآآآآهـــــــــــ نووووووووووووووووره

خالد : نوووووووووره

نوره >> تيبست بمكانها : ...............

خالد : هلا وغلا بنوره تتهربين مني >>>> ومسكها مع زندها وجرها معاه لي بره المحل ويمشي ويمشي يبتعد عن زحمة الناس ودخل بسكه ضيجه بعيده عن الزحمه وبنهاية هالسكه كافي بركن بعيد وهادي ما فيه احد .

نوره : خااااااااااالد خاااااااااااااااالد

خالد : ولا كلمه ............. بس نوره حرقتي قلبي .......... امس شنو قلت لج مو أبيها وداعيه ............. ومو قلتي انج تحبيني .............. حطي عينج بعيني وقولي غير هالكلام

نوره : ....................

خالد : تعالي نقعد اهنيه ونتفاهم

نوره : خاااالد ، أنااااااااااااااااااااا ..........افهم موقفي ما اقدر اشوفك لازم ابتعد لازم اتعود على فراقك ................خاااااالد حبيبي والله بينا سور عالي ما اقدر اتجاوزه

خالد : نوره شوفيني ............. هالسور اللي تقولين عنه أنا بهدمه ولا تسأليني اشلون .... بس ابي اعرف قلبج منو فيه ، اصدقيني القول لا تخدعيني

نوره >>> ما تحملت واعيونها تنزل منها الدموع واهي تتذكر انه السور امه واهي تبي خالد ما يخسر امه ...............: أحبك ولا ملك قلبي غيرك .............. بس الفراق مكتوب علينا لا تعاند ولا تدور وراي خااااااااااااالد ارجوك

خالد : لي هالدرجه يا نوره حاسه اني ما اقدر ادافع عن حبنا

نوره : ..................

خالد : شوفيني نوره لا تتهربين ............ انتي شايفه انه حبج بقلبي ضعيف واقدر انساج بسرعه .......................... أنا راد للديره وبنشوف يا نوره سورج اللي بنيته والا حبي اقوي

نوره >>>>>>> قامت تبجي

خالد >>> وقفها وحظنها ومسح دموعها : بس نوره ...........اهدي ابيج تثقين فيني ...... وصدقيني اتركي كل شي علي ولا تحاتين شي

نوره : يعني شنو ، انت تدري انا بأخذ ولد عمي

خالد : لا تفكرين بأي شي اللحين ........ ابي اعيش معاج اليوم احلى رحله سياحيه ، وباجر يصير خير

نوره >>> ابتسمت ظنت ان خالد يسوي جذي لأنه صادفها ب لندن وبيستغل هالشي للعب والوناسه واذا رد الديره بينسى : خلاص اوكي ............ ترا بس اليوم بقعد معاك لأنه باجر عندنا مواعيد بالمستشفى

خالد : خلي باجر لباجر ................ هالكافي عندهم ايس كريم عجيب خلينا نأخذ منه وبعدين نبدي المغامره

نوره : هههههههههه اي مغامره

خالد : اكلي اللحين وبعدين بتعرفين

بعد ما خلصوا الأكل قام خالد ومسك ايدها .............وطلع كرت الباصات وقالها : الله نوره بنبدي المغامره

نوره : اي زين فهمني شنهي المغامره

خالد : انا من كنت صغير اذا يت لندن امسك كرت المواصلات واركب اول باص واول محطه يوقف عندها انزل واركب الثاني وجذي الف لندن واتعرف على اماكن يمكن السواح ما يشوفونها

نوره : بتلف فيني لندن لالالالالالالالالالالالالالا ههههههههههه

خالد >>> جرها من ايدها وصعدها معاه الباص >>>>>> كان متعمد علشان يتم لاصق فيها ولا يهد ايدها وبنفس الوقت يبيها تضحك لأنه الياي بالديره الله يعينه عليه .

صعدوا من اول محطة اقبال سيلفريدج وانزلوا بميدان البيكاديلي ومنه الى ريجينت ستريت ولفوا شوارع وايده كثر ما كانت نوره تروح لندن لكن حست بأنها أول مره تشوفها ، وآخر شي تغدوا بمطعم Billa Atalia ، كانت الساعه تقريبا ثلاث بعد الظهر

نوره : خالد أنا لازم ارد محل سيلفريدج اخذ لي لو بدله وحده على طلعتي جذي من الصبح وارد ما معاي شي بيذبحني اخوي .

خالد : لا ما يقدر يقولج شي اتصل عليه واقوله نوره معاي

نوره : لا والله تستخف دمك حضرتك ............. يالله خلص ما ابي اتأخر

خالد : يالله انا بعد بمر المحل .......... الله يهداج طلعتيني منه وانا ناوي اشتري منه عطر للوالده موصيتني عليه

نوره : انااااااااااااااا اي الحق علي صار اللحين
======================= ​

 

[منيرة خالد]

البارت ( 21 )
-----------------------------​

رابع يوم : خالد قعد من الصبح راح للشركه اللي يتعاملون معاها وقال انه يبي نسخه من العقد اللي وقعوا قبل سنتين .

نوره وأمها وطلال من الصبح بالمستشفى لعمل التحاليل والسونار والاشعه لأم راشد

المساء بعد ما ردوا للفندق >>> خالد يتصل بك

طلال : السلام عليكم

خالد : وعليكم السلام ، هلا والله بطلال

طلال : هلا الله يحيك اشلون شغلك عسى خلصته

خالد : اي والله الحمد لله ، أنا بكافي moon light بشارع اجورد رود تقدر تمرني

طلال : اي والله خلك اللحين نازل

خالد : يالله ناطرك

طلال : يمه انا نازل بروح عند واحد من الربع

نوره >>> كانت تلعب بتلفونها وتتذكر خااااااااااالد ومتردده ترسل له رساله والا اللي صار امس مغامره مثل ما قالها وبس .

بكافي moon light :

خالد : هلا طلال

طلال : هلا خالد ، هاا بشر خلصت شغلك

خالد : اي الحمدلله وانت بشر عن عمتي اشلونها ؟

طلال : الحمد لله سوينا اليوم التحاليل والسونار والاشعه وبعد ثلاث ايام موعدها مع الدكتور اذا ان شاء الله زينه ردينا الديره ........مليت زهقت وانا ما صار لي اربع ايام الله يعين اللي يقعد بالشهور ومع مريض

خالد : الله يتمم عليها الصحه والعافيه ويشفي كل مريض ............... طلال ابيك تسمعني عدل بسالفه

طلال : خير خالد في شي

خالد : نوره

طلال : اشفيها

خالد : اممممممم أنا غيرت رأي وماني مطلقها ، صراحه بنت عمي وما راح القى احسن منها زوجه لي .

طلال : والله يا خالد فاجأتني ، بس هالموضوع خلصنا منه ، واذا بتكلم فيه عندك أبوي اهو اللي بيده الشور

خالد : هذا رأيك

طلال : خالد ، إحنا سمعنا ان امك اهي اللي معارضه هالزواج وانت بعد ما تبي نوره شاللي غير رأيك

خالد : أناااااااااااا في البدايه ما كنت ابيها بس اللحين غيرت رأي وفكرت أنا ما تصلحلي إلا بنت عمي ، وأمي بحاول اقنعها واغير رأيها

طلال : يعني أمك للحين معارضه .

خالد : طلال امي مقدور عليها ، بس انا ابي منك طلب ، ابيك تغير رأي نوره بطلب الطلاق اقنعها اني أبيها ومقتنع فيها وان محد جبرني اني اغير رأي . هذا قراري بروحي

طلال : والله يا خالد اذا كلمت ابوي ، واهو شاور نوره انا بقولها هالكلام ، بس انت تقدر تغير رأي امك ............. ترا نوره اللي خلاها تصمم على الطلاق اهو رأي امك ........ يعني اذا امك للحين معارضه نوره بعد بتصمم على الطلاق

خالد : خل امي علي وانت اقنع نوره

طلال : ان شاء الله ، والله يقدرني اني اغير رأيها والله أنا مابي لنوره الطلاق وانت يا خالد عزيز وغالي

خالد : تسلم يا ولد عمي ، ولا تقول لنوره اني شفتك ب لندن اخاف تظن اني مستحي وقلت هالكلام ................. خله لما نرد الديره

طلال : صار ولا يهمك

وكملوا سهرتهم بالكافي

===============

خامس يوم : قعد خالد من الصبح واتصل على السفريات وقدم حجزه لنفس اليوم للسفر بطيارة الساعه 12.00 بالليل .........................>> { حبيبتي أنا مسافر للديرة ديري بالج على نفسج .......... وصدقيني لقانا قريب }

نوره : انتبهت لرنة المسج وافتحتها >> وردت عليها { توصل بالسلامه يالغالي ........... احبك .............. وهذا فراقنا كل واحد منا له طريقه }

واتصلت على أماني تعلمها بآخر التطورات

أماني : هلا وغلا

نوره : الله يحيج ، اشلونج يا عروس

أماني : واي اي عروس أنا من سافرتي وأنا افتر على محلات الاثاث أجهز الشقه

نوره : الله يعينج ، أماني أنا شفت خالد بلندن >>>>> وقالت لها السالفه كلها

أماني : والله يا نوره أنتي وخالد قصه كل ما ابتعدت عنه الصدف تجمعكم ، الظاهر ما عرفتي تصكرين ستارة المسرحيه عدل .................... سمعي انا ما راح اسوي عرس بس تخلص الشقه بسافر مع أحمد شهر عسل وبعد ما ارد بسوي استقبال ........... عاد بحط بحسابج فلوس وابيج تتسوقين علشاني

نوره : تأمرين أمر يا قلبي ................ دام الحمد لله الوالده صحتها زينه لج مني بفتر بطلال وبخليه يدعي عليج ..........

أماني : ههههههههههه ........... يالبايخه لا تقولين له انه لي

نوره : لا حبيبتي بقول انه لج علشان يستحي ويفتر معاي بالمحلات

اماني : جان قلتي لخالد يطول المده بلندن وافتري معاه

نوره : اماني ، قلبي طعنتيه أييييييي ، انا شفته مرتين وأحس انولدت من جديد اشلون لو اشوفه كل يوم شنو بصير فيني

أماني : أبد بهداج الله وبتعترفيله انج زوجته

نوره : اقوووووووووووول عطيتج ويه يالله باي ......... ودزيلي مسج بطلباتج والقياسات .

اماني : مع السلامه يا حبي

=====================

الكويت : بعد وصول خالد بيوم ، اتصل خالد على عمته ام بدر وقال انه بزورها يبي يعرف اهي ليش بنفسها جت بيتهم وكلمته عن الطلاق واطلبت منهم بتصميم انه يطلق نوره

ام بدر : حيا الله من زارنا

خالد : الله يحيج عمه اشلونج

ام بدر : بخير الله يسلمك ، مو من عوايدك تمرني ، وابيج ضروري خير

خالد : الخير بويهج عمتي .

ام بدر : قول خاااااااالد خير

خالد : عمه ، تذكرين لما ييتينا برمضان وطلبتي مني اطلق نوره ، عمه ابي اعرف السالفه عدل

ام بدر : اي سالفه يا خالد وانت تدري عن كل شي

خالد : لا ما اعرف شي ................ ابي اعرف انتي شنو سمعتي وشنو تعرفين يمكن ظالمتني

ام بدر : لا والله ما ظلمتك ، امك تمشي وتسولف تقول انك مغصوب على بنت عمك واهي بعد ما تبيك تأخذها وحالفه انها تطلقها عقب ما تعلقها جم شهر .......... خالد مو هذا الاتفاق اللي بينك وبين امك ؟

خالد : عمه ............ أنا غيرت رأي اللحين وابي نوره زوجه لي وابيج تقنعينها اني شاريها ، وخليها تهون عن فكرة الطلاق .

ام بدر : وشاللي غير رأيك ، أبوك رد ضغط عليك مره ثانيه

خالد : لا ابد ، بس انا استخرت ، وشفت ما كو احسن من بنت عمي زوجه لي

ام بدر : وامك يا خالد ،

خالد : بكلم امي واقنعها تروح لنوره وتقولها انها تبيها زوجه لي

ام بدر : خالد والله انت ونوره حسبت عيالي ولكم معزه بقلبي من محبت اخواني وابي لكم الخير وما ودي يكون بينكم طلاق اذا انت صادق بنيتك لك مني اوقف معاك .

خالد >> قام وحب رأس عمته : وهذا اللي ابيه منج ................ مع السلامه

ام بدر : الله يحفظك ويهداك

ببيت ابو خالد

خالد : يمه ، عمتي ام راشد بترد الديره بعد جم يوم وانا ابيج تروحين لهم وتكلمين بالموضوع

ام خالد : ما راح اروح لهم ، والبنت اهي اللي عايفتك ليش متمسك فيها

خالد : يمه بنت عمي وابيها ، واهي مو عايفتني ، اهي طالبه الطلاق لأنه انت ما تبينها زوجه لي

ام خالد : دام قلتها بنفسك اي انا ما ابيها

خالد : يمه أنا أبيها وخلاص

ام خالد : نعم وليش متمسك فيها جذي ، وبعدين انت كنت ما تبيها ليش غيرت رأيك

خالد : يمه أبيها وبس ، وبتمسك فيها مثل ما تمسك ابوي فيج......تكفين يمه روحي لهم

ام خالد : شوف تبيها كيفك تزوجها ................. روح مع ابوك وكلم عمك بس انا طلعني من السالفه

خالد : يمه هذا رأيج

ام خالد : اي ،

خالد راح لأبوه بالمكتب

خالد : السلام عليكم

ابو خالد : هلا خالد حياك تعال ، انا شفت العقد اللي جايبه من لندن نفس اللي موجود عندنا

خالد >> اش هالوهقه : اي يبه ما غيروا شي كانوا بس يبون يتأكدون انها نفس النسخه اللي عندنا

ابو خالد : الله يهداهم وعنوك تسافر وكانوا يقدرون يدزونه بالفاكس

خالد : يبه ، ابيك بموضوع ثاني

ابو خالد : خير

خالد : يبه ابيك تروح معاي عند عمي فهد ونكلمه بخصوص نوره .......... أنا أبيها وما بي اطلقها

ابو خالد : والله يا خالد اللي شفته انه نوره حالتها تعبانه ومدري اشفيها تصيح وتبجي وتقول ما تبيك وجايتها حاله ما يعلم فيها الا الله

خالد : بس أنا ابيها ومابي اطلقها

ابو خالد : وتبي تضر بنت عمك تراهي تعبانه ومصممه على الطلاق

خالد : يبه انت بس امش معاي وانا اللي اتكلم

ابو خالد : والله كيفك تبينه نكلمه حاضر ، بس انت ليش ما تكلمت يوم اطلبت الطلاق توك تحجي

خالد : هااااااااااااا المهم اللحين احنا نكلم عمي .

===============

ثاني يوم بديوانية ابو راشد ................. خااالد كان يفرك ايدينه مو عارف اشلون يفتح الموضوع .............

ابو خالد : ابو راشد خالد جاي ويبي يكلمك بموضوع نوره

ابو راشد : خير

خالد : عمي ، أناااااااا ما ابي اطلق نوره ، واهي بنت عمي واذا تعبانه اصبر عليها

ابو راشد >>> طالع اخوه ما وده يقول عن السبب الحقيقي علشان ما يحرجه : بس يا خالد احنا خلصنا من
هالموضوع ............ ونوره ما تبيك ، ومصممه على الطلاق

خالد : اسألها مره ثانيه يمكن هدت وغيرت رأيها وانا مستعد انطرها لين ما تحس انها صارت زينه وبعدها نحدد العرس

ابو راشد : خااااااالد ، اظن طلال فهمك السبب اللي خلا نوره تطلب الطلاق واحنا معاها ، طلقها يا خالد ، واذا احد جابرك تقول هالكلام ترا أنا مستعد اوقف بوجه

خالد : لا لا يا عمي ................ محد جبرني ارد عن طلاقها ، انا شاريها وأبيها زوجه لي

ابو خالد >> حاس انه ضايع بالموضوع وخاصه انه ابو راشد قال لخالد طلال فهمك !!! شنو يقصد !!!

ابو راشد : على العموم نوره مسافره مع امها وطلال لندن واذا ردوا ان شاء الله نشاور البنت مره ثانيه

خالد >> قام حب رأس عمه : طلبتك عمي تقنع نوره ترد برأيها ، أنا شاريها وأبيها .

ابو راشد >> مستغرب من التغير وخاصه انه خالد كان اهو اللي رافض الزواج من نوره مو العكس شاللي غير رأيه ؟؟؟ : يصير خير خل نوره ترد بالسلامه

وأبو راشد بسرعه غير السالفه بسرعه يبي ينطر طلال لأنه يمون على خالد ويقدر يأخذ منه السبب الحقيقي ليش خالد غير رأيه .


========================== ​

 

[زهور الجمان]

صج طيبة

ناااطرين التكمله يا قلبي
وسفرة سعيدة ان شاء الله

 

[yooyoo]

كملي منور

 

[منيرة خالد]

البارت ( 22 )
==================​

يوم ردت نوره من السفر : كانت طيارتهم توصل الديره الساعه 7.30 المساء والبيت متروس من الأهل هند وتهاني وأمهاتهم والعمات والخالات ينتظرون وصولهم بالسلامه .

نوره : هلا عمتي

ام بدر : حمد لله على السلامه ، تعالي ابيج بكلمة رأس

نوره >> وراحوا بالصاله الداخليه : خير عمه

ام بدر : شوفي يا نوره ، انا جاني خالد وطلب مني اقنعج تغيرين رأيج بالطلاق اهو شاريج ويبيج زوجه له

نوره : شنو ؟؟؟؟؟؟؟؟؟؟؟ عمه أنا اللحين ما أبيه ، انا ماني لعبه بيده اليوم ما يبيني وباجر يبيني

ام بدر : ليه يا نوره ، خالد غير رأيه ومتمسك فيج ، وبعدين لا تنسين اهو ما طلق انتي اللي طلبتي من كلام سمعتيه ، لو كنت ناطره جان غير رأيه من غير ما تدرين

نوره : وانا تبيني انطر لي متى ؟؟ كل يوم اقول اليوم يبيني واليوم الثاني لا ما يبيني وانطر واشوف حضرته شنو يقرر

ام بدر : لا ترديني يا نوره ، انا جايتج ومتوسطه لخالد ، مالي خاطر عندج ، والله يا نوره انه معزتج عندي مثل عيالي وابيج ترتاحين بحياتج ، وما تصدقين اشكثر فرحت يوم قالوا خالد بيأخذ نوره ................... فرحت جنه مأخذ وحده من بناتي

نوره : عمه

ام بدر : تكفين يا نوره لا تردين خالد دام ولد عمج شاريج لا تبيعينه

نوره : بس يا عمه اذا امه للحين ما تبيني انا لا يمكن اخذه هالشي وصليه له

ام بدر : لا اهو وعدني انه يقنع امه ، وان شاء الله بتقنتع واهي بنفسها بتزوركم وتحدد معاكم العرس

نوره >>>>>>>>> سهت نوره بين خاااالد وموقفه منها اذا عرف اهي منو وبين معاند امه .............. وهذا الشي اللي راح تتمسك فيه اذا امه ما رضت فيها لا يمكن تتنازل عن الطلاق . حتى لو عرفها خاااااااااااااالد ، ما انتبهت للأتصال اللي يمها

ام بدر : هلا خالد ........... شوف انا كلمت نوره اهي وافقت بشرط ان امك ترضي فيها وتوافق عليها .............وإلا يا خالد تراهي مهي متنازله عن الطلاق .

خالد : قوليلها ما يصير خاطرج الا طيب ، بخلي امي توافق وتقولها بنفسها .

====================

ثاني : يوم بيت ابو خالد

خالد : يمه الله يخليج ..........علشاني روحي لهم وقوليلهم انج موافقه على زواجي

ام خالد : خلاص يا خالد ............ انا قلت ما راح اروح ، وانت اذا تبيها تمم الزواج وطلعني من هالسالفه .

ريم : السلام عليكم

خالد : هلا ريم ، تعالي اقنعي امي خليها تغير رأيها وتقول لنوره انها موافقه على زواجنا

ريم : ليش ، انت غيرت رأيك

خالد : اي ابيها ، ونوره شارطه ما تنازل عن الطلاق إلا اذا امي رضت

ريم : صج والله ، خلاص يمه وافقي ليش معانده

ام خالد : رييييييييييييييييم ، موشغلج ، خالد يبيها خل يأخذها بس انا طلعوني من الموضوع انت اللي تبي تتزوج مو أنا

خالد >>> تضايق وطلع من البيت بسرعه ضاع بين امه وزوجته كل وحده معانده من صوب >>> 990 يتصل بك

نوره : هاااااااااااا خالد >>>>>>يوه نسيت كان ماخذ رقمي لما كنت بلندن : آلووووو

خالد : نوره حياتي تعبان ........ قولي لي شسوي

نوره : خالد ............ اشفيك يا عمري

خالد : بنت عمي ... مو قلت بتمم زواجي منها ...........أنا اقنعت عمتي اني ابيها بس المشكله بالوالده ............. شوري علي نوره شسوي .

نوره : هااااااا خاااالد ما ادري هاذي حياتك ............حاول بأمك

خالد : وان ما رضت ......... تهقين بنت عمي بترضى واهي شارطه على ما تهون عن الطلاق الا برضى امي ............. نوره تهقين ليش بنت عمي شارطه هالشي

نوره : ما ادري ......... بس اللي اعرفه رضى رب العالمين من رضى الوالدين ......... وبنت عمك ما تبيك تخسر رضى امك ووووووووو يمكن بنت عمك هالشي ما ترضاه على امها اشلون بترضاه على امك

خالد : هذااااااااااا السبب

نوره : هااااااااااااا ما ادري انا اقول يمكن

خالد : بشوووووووف وبحاول مره ومرتين لين ترضى امي .......... والله يا نوره ضعت بين امي وبنت عمي ...........أناااااااااا اللي قلبي محترق

نوره : حياتي ........... ونور عيني ........ الله يوفقك بحياتك ويسعدك

خالد : ويسعدج يا نوره مع ولد عمج ............ مع السلامه

نوره : مع السلامه

===================

بنفس اليوم المساء ببيت ابو خالد

كانت ريم قاعده بغرفة المكتب وتتصفح بكتاب مقلوب ............ ناطره ابوها .

ابو خالد : السلام عليكم

ريم : وعليكم السلام ، يبه اشلونك

ابو خالد : بخير الله يسلمج ، اشوفج تقرين الكتاب بالمقلوب

ريم : هااااااا >> وقامت صكرت الباب : يبه ابيك موضوع مهم بس حلفتك ما تقول اني انا اللي قايله

ابو خالد : خير ريم عسى ما شر ، عسى مو زعل بينج وبين اسامه

ريم : لا يبه الحمد لله ، ما بينا الا الخير .

ابو خالد : اي يا بوج خليج عاقله كلها اسبوعين وتروحين بيت رجلج ، والله يسعدج ويوفقج ويرزقج بالعيال الصالحين

ريم >> استحت : يبه ، بس انا ابيك بموضوع ثاني ، بس احلف ما تعلم امي اني انا اللي قايله

ابو خالد : اي قولي

ريم : يبه مو خالد غير رأيه ويبي يتمم زواجه من نوره بنت عمي

ابو خالد : ايه

ريم : بس في شي معطل هالزواج

ابو خالد : شنهو ؟

ريم >> تبلع ريجها وايدينها تنفض : يبه امي مو راضيه توافق على الزواج ونوره معانده تقول اذا امي مو راضيه اهي ما تبي خالد وبتصمم على الطلاق .

ابو خالد : شنو ؟ ومن متى هالحجي ؟

ريم : يبه ما ادري ، بس هذا اللي فهمته . يبه الله يخليك لا تقول اني انا اللي قلت هالكلام

ابو خالد : خلالالالاص روحي >>> اتصل على خالد

خالد : السلام عليكم

ابو خالد : وعليكم السلام ،خالد وينك ابيك ضروري اللحين بالبيت

خالد : يبه أنا عند الباب اصفط السياره وانزل .

اتصل على ام خالد >> آلوووو

ابو خالد : نواااااااااااال انزلي تحت عندي بالمكتب ابيج ضروري

بالمكتب عند ابو خالد :

خالد : السلام عليكم

ام خالد : هلا حمد ، خير ليش مناديني

ابو خالد : شنو قاعد يصير من وراي وانا آخر من يدري

ام خالد >>> انصدمت وطالعت خالد

خالد >>>>>>> نزل رأسه ما كان يبي امه وابوه يتهاوشون بسبته

ابو خالد : تحجوا ، ليش ساكتين

ام خالد : انت عن شنو تتكلم

ابو خالد : عن رفضج زواج خالد من بنت اخوي نوره .................... ليش تطالعيني منصدمه ............ نوال أنا اللي وقفت ضد امي علشان اخذج واقنعتها علشان اطلع من بيتها واعيش معاج بالمكان اللي انتي تبينه ................تجين عقب ثلاثين سنه وتسوين نفس الشي ......... توقفين بين اثنين وتبينهم يتطلقون ............ ليش نوال تحجي يا نوال

ام خالد : حمد ........... خالد من قبل الملجه ما كان يبي بنت عمه .........بس ما ادري اشفيه عقب ما قالت ما ابيك رد بكلامه وقال انه يبيها

ابو خالد : هااااااااا يا خالد شنو ردك

خالد : يبه أنا صج بالأول ما كنت أبيها ............... بس اللحين ابيها بنت عمي وماني لاقي احسن منها زوجه لي .......... بس امي مهي راضيه تغير رأيها

ابو خالد : هااااااااااا يا نوال اشرايج بالكلام اللي يقوله خالد

ام خالد : اي ما أبيها هالبدويه زوجه لخالد

ابو خالد : ما هقيتج يا نوال تطعنيني عقب هالعمر ، انا اللي تخليت عن اهلي علشانج ، وصلت رسالتج .................. أنا اللي اللحين اقولج اللي ما يبي اهلي أنا بعد ما أبيه

ام خالد >>> والصدمه على وجهها : حمد مو قصدي انت فهمتني غلط

ابو خالد >> قام بسرعه وطلع لغرفته وقفل الباب

ام خالد : أنت ليش قلت لأبوك

خالد : يمه انا ما تحجيت ، وبعدين اول وتالي أبوي يبي يعرف >> خلاها وراح لغرفته

تمت ام خالد بالمكتب ................. وشوي وتسمع صوت احد ينزل من الدرج ........ قامت تشوف ..........وإلا ابو خالد معاه جنطه وبيطلع من البيت

ام خالد : حمممممممممممد حمممممممممد وين بتروح ؟

ابو خالد : مو مهم يا نوال ، انتي هدمتي كل شي خلي عنادج ينفعج وتكبرج اللحين فهمت اسبابه انا ما اشرفج أنا البدوي ............ اللي اخذتيه من اهله ، أهو اتبعج لأنه يحبج وانت أخذته وتبريتي من اهله وما تبين تتذكرين اصله ..............

ام خالد : حلفت ما تطلع من البيت واللي تبيه اسويه ، والله حياتي ما تسوي من دونك ، أنت سندي بهالدنيا ان طلعت والله اموت ، تكفى يا حمد ............... سامحني غلطت اعترف بس لا تخليني والله اموت ............. انت حياتي وروحي بهالدنيا >>>>> وبجت حست انه اذا طلع حمد روحها بتطلع معاه .

ابو خالد : جان تبين رضاي باجر ، تروحين بيت اخوي فهد ، وتقنعين نوره بأنج موافقه على هالزواج وما تطلعين من بيتهم إلا وأنت محدده الزواج

ام خالد : ان شاء الله ، بس رد >> وتلت منه الجنطة وراحوا لغرفتهم

===================

ثاني يوم بعد الظهر : خالد توه كان راد من الشركة ويسمع امه تتكلم بالتلفون

ام خالد : حمد لله على السلامه يا ام راشد ، وان شاء الله بمركم اليوم بعد المغرب

ام راشد : الله يسلمج ، وحياج الله

شافت خالد واقف يطالعها

ام خالد : اشفيك ، اي هاذي مرت عمك اللي اكلمها بزورهم اليوم وبكلم نوره وعساها توافق وترضى وتشيل فكرة الطلاق من بالها

خالد >> من سمع كلام امه قام يحب رأسها وايدينها : الله يخليج لي يا يمه الله يطول بعمرج

ام خالد : زين خالد ، انت عمرك ما شفتها اشرايك تشوفها اليوم دام ملجت كل هالاشهر ولا هي شافتك ولا انت شفتها ، يمكن بعد تغير رأيها ولا تعجبها

خالد : لا ما يحتاج اشوفها ، انا راضي فيها من غير ما اشوفها ، بس ابيج تحددين بسرعه الزواج

ام خالد : حتى انت امس ابوك يقولي لا تطلعين الا وانتي محدده الزواج

خالد : خلاص تدرين انتي روحي لهم وانا بتصل على الصالات وبشوف اقرب موعد

ام خالد : عشتوا على شنو العجله ، هذا وأنت ما شفتها اشلون لو شايفها شنو بتسوي؟

============

بعد المغرب :ببيت ابو راشد

ام راشد قالت لنوره انه ام خالد بتزورهم مع بنتها ريم ومصممه الا تشوفها ، كانت نوره قاعده بغرفتها وفاتحه الكبت تشوف شنو تلبس ؟ تذكرت كلمة ام خالد لما قالت ما ابي البدويه تصير جنتي ........... شافت دراعه حرير مغربيه لونها ليموني ومطرزه باللون الذهبي ومشغوله بالدانتيل الفرنسي وحزامها عريض ........... قررت تلبسها ....... واستشورت شعرها وزينته بشريطة مطرزه بنفس تطريز ولون الدراعه ..........واكتفت بكحل اسود عربي عطى عيونها وسع على وسعهم ........ وانزلت تحت عند امها :

وصلت ام خالد وريــــــم لبيت ابو راشد لقوا من الترحيب اللي ما حسسهم بالاحراج .

ام خالد : والله يا أم راشد أنا اليوم يايه مو بس أتحمدلج بالسلامه ، أنا أبي نوره تغير رأيها وتشيل فكرة الطلاق من رأسها

ام راشد >> تفاجأت ، لأنه محد قالها : والله يا أم خالد ، ما جانا من حجي يكفينا ، وبنتنا عندنا وولدكم عندكم ، وان شاء الله ما بينا زعل ، بس هذا طلب نوره

نوره >> نزلت رأسها وأغرقت عيونها بالدموع كثر ما هي مشتاقه لخالد وتبيه كثر ما هي خايفه لا يدري انها نوره حبيبته ............

ام خالد : أدري يا أم راشد ، انه نوره ما طلبت الطلاق إلا من كلام وصلكم ، >> وقامت وحبت رأس ام راشد : وهذا رأسج وأحبه وتأسف على كلام سمعتوه ضايقكم >> وألتفت على نوره وكانت تبي تحب رأسها

نوره >> وقفت ومنعت ام خالد انها تحب رأسها ، وأهي حبت رأسها : خالتي دام جيتي بنفسج وتعذرتي أنا خلاص غيرت رأي وبشيل فكرة الطلاق من رأسي

ام راشد : نوره اصبري احنا للحين ما شاورنا أبوج

ام خالد : ابو خالد بالديوانيه مع ابو راشد ويأخذ رأيه ، طلبتج يا ام راشد لا تعسرين زواج خالد ونوره ، والله انه خالد طالع من العصر يدور حجز للعرس . >> ام خالد يتصل بك

ابو خالد : هلا ام خالد

ام خالد : حمد كلمت ابو راشد

ابو خالد : يقول اذا رضت نوره اهو ما عنده مانع

ام خالد : طلبتك خل يتصل على ام راشد ويقول لها انه موافق

ريم >>> خالد يتصل بك

ريم : هلا خالد

خالد : بشري شنو صار

ريم : مبروك ، ان شاء الله بنرقص بعرسك قريب

خالد : خلاص قوليلها العرس بتاريخ 15 / 11 / حجزت صالة الرايه

ريم : شنو بعد شهر وعقب عرسي باسبوعين ما يمدي .

خالد : لا يمدي وانا مستعجل

ريم : زين ما تبي تشوف نوره ، ترا انت ولا مره شفتها

خالد : لا ما يحتاج اشوفها بالعرس ، وسلمي عليها ، مع السلامه

ريم : نوره .... الله يعينج ترا العرس عقب شهر بالضبط 15 / 11 خالد يسلم عليج ، اقوله ما تبي تشوف نوره يقول لا خليها بالعرس ،

نوره : ما يبي يشوفني ؟؟

ريم : خليه يولي اهو لا يشوفج بس انتي تقدرين تشوفينه >> وافتحت بوكها وطلعت صوره وعطتها نوره . : تراه مو احلى منج انتي قمر عنده ، خالد امه داعيتله اللي خذاج .
=========================== ​

 

[منيرة خالد]

البارت الأخير ( 23 )
==================


​

صالون حنان دشتي بغرفه خاصه حاجزتها نوره عن ازعاج الصالون .

اماني : الف مبروك يا نوره

نوره : خايفه يا أماني ، خالد رافض انه يشوفني الا بليلة العرس مدري خايفه لا يتفاجأ فيني ويسويلي سالفه بالصاله والله فضيحه

أماني : حبيبتي لا تخافين بتصيرين احلى مفاجأه له .

نوره : بس اهو يظن اني تزوجت ولد عمي واهو أخذ بنت عمه اللي عمره ما شفاها

أماني : بس بالحقيقه اهو يحبج انتي

نوره : تصدقين البارحه دازلي مسج شوفيه { باجر عرسي ...... بأخذ بنت عمي .... بس اللي تملك القلب أنتي يا نوره ...........انا بروحلها روح بلا قلب ...... وأنت الله يسعدج مع ولد عمج }

أماني : واي نوره اخاف يغمى عليه بالصاله اذا شافج .......... صح يا رب سترك

نوره : اماني تكفين خليج يمي اخاف يصير شي انتي تنقذيني

اماني : واي أنا بقعد اقرى وادعي طول ما هو موجود تعمي عينه ما يشوفج لين تطلعين معاه من الصاله وذيج الساعه يسوي اللي يبي

نوره : آمييييييييييييييييين

صالة الرايه : زينت بديكور ملكي بأرضيه باللون العنابي وكراسي باللون العنابي والذهبي ........ اعلنوا عن دخول العروس ، كانت نوره لابسه بدله من تصميم ريتشارد الطويل كوكتيل مشغوله بالدانتيل والاشوارفسكي ومسكة ايدها بالورد العنابي والنمنم الابيض ومزين بالاكريستالات بداية دخلتها اغنية ماجد المهندس​

يا بنفسج هالوجود وياسمينة هالبشر
يا خزام الكون كله فل ونرجس الحياه
تلتقي بوجهج يا نوره كل اطياف الكري
وبحروف اسمك يغني كل طير في سماه
​

وبعدها شعر كان خالد مختاره ​

اعتزلت الشعر من حبيت"نوره"
حالفٍ ماأكتب بعد نوره قصيد
لاتناقشني ولاتبدي المشوره
والكلام اللي سمعته ذا أكيد

ذا قراري وكلٍ أدرى في أموره
لاتدخل وأبتعد عني بعيد

لاتزيد القلب لاتدمي شعوره
لاتخلي الناس فيني تستزيد

حبها اللي ذوب القلب في بحوره
وإنصهر في داخل أعماقه الجليد

لجلها ياما تحمل كل خطوره
مايهم مهما حصل قلبي عنيد

ليتها تدرك فرح قلبي وسروره
لاإحتواني صوتها والله عيد!!

تذبل ورود الغلا وتفقد عطوره
لاتلاشى صوتها وأقفى بعيد

حبها مثل النسم وأكثر ضروره
حبها خلاني إنسانٍ جديد

ياهني اللي سكن في قلب "نوره"​

وبعدها أغنية عبدالمجيد عبدالله + راشد الماجد : ​

سموا بأسم الله على اللي ما لروعتها حدود
ملهمة كل الزهور فاتنة كل الورود
عطرت نور الليالي واذهلت قلب الوجود
واتركت كل البرايا تنظر بصمت وسكون
وافيه سمت ومعاني عاليه قدر ومقام
والوفا والطيب كمل حسنها بنت الكرام
هاذي احلى بنت في الدنيا وفي كل الانام
للمكارم نبض قلب وللغلا قرت عيون​

أرقصوا حواليها صديقاتها وبنات عمانها وعماتها وخوالها ، لين اوصلت الكوشه وبعد ساعه من الرقص والتصوير

اعلن عن زفة المعرس : خالد ببشته الاسود وطوله ووجه اللي ينور من فوزه بحبه بالأخير معاه يمشي للكوشه ابوه وعمه ابو راشد وأخوان نوره طلال وراشد ( فايز دين ما يدخل الصالات ).

ويا معيريس عين الله تراك .......... القمر والنجوم تمشي وراك

وقف سلم على امه وخواته وحب رأس عماته وعمة الجديده ام راشد ، كانت نوره منزله رأسها وتنفض ، قربت منها ريم ومسك ايدها ووقفتها وقالت لها ابوي وعمي يبون يسلمون عليج >>> كانت خايفه ولا التفت لخالد وسلمت على ابوها وعمها واخوانه طلال وراشد .......و ما حست الا باللي يمسك ايدها ويقرب منها وهمس بإذنها

خالد : ليش تنفضين اهدي ، انا ادري انج نوره من كنا بلندن .

نوره >> ارفعت عيونها وطالعته وأول ما حطت عينها بعينه نزلتهم وبسرعه اقعدت

وقعد يمها خالد ، قربت منهم ريم واقعدت يم خالد وداليا يم نوره والزقوا فيهم علشان يصورون وريم : خااااااالد ها اشرايك بنوره حلوه

داليا >> تصيح من الصوب الثاني : خااالد نوره اشرايكم ببعض ، عاد هاذي اول مره تشوفون بعض

خالد > ضحك : هههههههههههههههه أما نوره >>>>> وجها قلب أحمر ​

{{ تذكروا القصة يا بنات عدل اذا حضرتوا عرس وقالوا الناس هالأثنين اول مره يشوفون بعض ........... ترا احتمال كبير تكون قصتهم مثل ............. خـــــــــــالـــــــــد ونــــــــــــــوره }}

تــــــــــــــــمـــــــــــــــت​

 

[زهور الجمان]

مشكووووووووووووووووووووووووووورة يا قلبي
على القصة الحلوة

وناااطرينج في رواااية ثانية

بصرااااحة منورة انتي اكثر من مبدعة

 

[سعاد الكويتيه]

مشكـــــــــــــــورة منــور حبيبـتي ...

قصــــــــــــه عجيــــــبه ..

والــى الامـــام ...

 

[yooyoo]

مشكوره حبيبتي قصتج عجيبه و لا تحرمينا

 

[أميرة الحلا]

يسلمووو اكثر من روعــــــه

 

[ريـ’ـآنـهـ‘]

وناااسه خلصت الروايه


اقراها واقولج رااييي

 

[أميرة الحلا]

يسلمووو
روعــــه
ناطرين يديدج

 

[q8ya36]

مشكوره ع القصه الي اكثر من الروعه

 

[أم ورود الحلوه]

نهاية سعيييييييده و حلوه ,,,,,,,,,,,,,,
تسلمين ,,,, وننتظر جديدج ,,,,,

 

[ريـ’ـآنـهـ‘]

كلولوللولولووووش

ونااااسه تزوجوو

يعطيييييج ألف ألف ألف عافيه منووور القصه عجييييبه وتونس

وناطرينج بقصه ثانيه

 

[MISS ZOZO]

خالد : خلاص قوليلها العرس بتاريخ 15 / 11 / حجزت صالة الرايه

أحم أحم >>> 15 / 11 >> عيد ميلادي



خخخخخخخ


الله يوفقهم ان شاء الله


والقصه رووووووووووووووووووووووووووووووووووووووووعه



تسلمين حياتي انتي والله

 

[MeeMeeYoo_2]

يعطيج الف الف الف الف عافيه

مشكووووره

 

[white**angel]

القصــــــــــــــــــــــــــــــــــــــــــــــــــــــه اتييييييييييييييننننننننننننن شووييي عليهااا
يعطيييج العااافيه