حبـك حبيبـي مـــا طـرى ع البــال

[ضوى العيون]

انجود: بالمستشفى
خالد: منو تعبان
انجود: محمد عنده فشل كلوي ووايد تعبان ومو محصلين له كليه
خالد: انزين اقولج انا وناصر بني نسوي فحوصات
انجود: مشكور يا خالد
خالد: لاتنسين ان محمد ولد خالي مثل ما هو ولد عمج
انجود: خلاص اوكيه اترياكم ولاتنسى بتون على اساس انكم ربع سعيد
خالد: تامرين امر الغالية .... وسكر عنها وراح قال لناصر السالفة وراحو المستشفى ولقوا ان كلية خالد اطابق كلية محمد وقررو انهم يسون العمليه باجر عشان شي خطر على حياة محمد
غزلان: ياربي انا شو خلاني انام خليفة اتصل شو اسوي الحين .... اوه بتصل
خليفة: الو
غزلان: اكرهك
خليفة: ليش عاد بلاج
غزلان : مو حرام عليك اللي سويته فيني .... وصاحت
خليفة: غزلان حبيبتي لا تصيحين والله ما تهونين علي
غزلان: انزين انت وين كنت
خليفة قال لها اللي صار
خليفة: اقولج بسكر الحين انجود تناديني
غزلان: طمني عليك اوكيه
خليفة: ان شا الله الغاليه
وعلى ثاني يوم
ام محمد : مشكور يا خالد
خالد: على شو هذا واجب
سعيد: خالد تعال ابيك شوي
خالد: آمر
سعيد: حبيت اقولك ان عمرنا ما راح ننسى اللي بتسويه الحين
خالد: سعيد شفيك محمد ولد خالي
سعيد: انزين تعال انجود تبي تسلم عليك
خالد: انا بعد ابي اشوفها قبل لا ادخل غرفة العمليات
خالد قبل لا يسلم على انجود حط ايده بجيبه وطلع ورقة ومن غير ما سعيد يلاحظ عطاها الورقة وتمت تسولف معاه هي وسعيد وعقب خالد راح عند خواته واخوه وتم يسولف معاهم وعقب راح عسب يجهز للعمليه
ودخلو خالد ومحمد وعقب خمس ساعات طلع الدكتور وعلامة الحزن امبينه على ويهه
بومحمد: خير دكتور طمنا
الدكتور: البقية بحياتكم
الكل: شووووووو
ناصر: وخالد شخباره
الكتور: هو أي واحد خالد واي واحد محمد
خليفة: خالد اللي تبرع
الدكتور: خالد هو اللي مات ومحمد زين
حنان:لالالالالالالالالا خالد ما مات انت تقص علينا صح.... ناصر شوفه سوي له شي قاعد يفاول على خالد
ناصر: انت متأكد ان خالد مات
الدتور: آسف بس استواله نزيف وما قدرنا نوقفه وتوفى
فاطمه واحلام طاحو على الأرض وهم يصيحون على اخوهم
انجود وهي مو حاسة بعمرها: خالد ما مات .خالد بعده عايش انتو ليش تصيحون الحين بيطلع من هالغرفة يالله عاد لو شافكم تصيحون يخاف عليكم .... وصاحت زيادة...... سعيد شفت كله مني انا اللي قلت له عن محمد لو ما قلت له ما كان بيي يسوي العملية ليش كلهم يموتون بسبب ليييييييش
الكل استغرب من ردة فعل انجود ومن الكلام اللي تقوله معنى هالكلام انها تعرف خالد من قبل
خليفة: انتي شو تقولين ومن وين تعرفين خالد
انجود: خالد ولد عموتنا يا خليفة ولد عموه
وكانت الصدمة الأكبر ومثل طعنة السكين بقلب بو محمد
حنان: انجود خالد راااااااااح راح لمكان محد يقدر يرجع منه
انجود:آسفة حرمتكم من اخوكم ما كنت ادري انه بيموت
ناصر: لا تقولين هالكلام هذا يومه
احلام: راح الغالي راح
فاطمة: يعني صدج اللي سمعته خلاص خالد م.....
الكل كان يصيح من قلبه خالد غالي على الكل بومحمد طلع من المستشفى من غير ما حد يحس فيه وعقب طلعو خالد وكانو مغطين ويهه
ناصر: خالد خالد قوم كلمني انت ما قلت انك اول ما تطلع من غرفة العمليات تبي تشوفنا كلنا حواليك هذا نحن حواليك افتح عيونك يالله عاد
سعيد ظم ناصر والبنات طايحات على الأرض يصيحون ريلهم مو قادرة تشيلهم وفجأة صرخت الريم: انجود انجود شو صارلج
انجود جسمها كله كان يرتجف وويهه محمر وجسمها كان بارد خليفة ركض وشالها ووداها عند الدكتور
خليفة: خير يا دكتور
الدكتور: خير بس اللي صار لها من الصدمه من وفاة خالد انا الحين عطينها ابرة ونامت ويوم بتقوم انشاءالله بتكون زينه
سعيد: مشكور دكتور
خليفة: ناصر عظم الله اجرك
ناصر ما قدر يرد عليه لانه يحس بعمره بيموت كان م مستوعب اللي صار توه خالد كان قاعد ويسولف معاهم وفجأة رااااااااااااااااااح
تمت انجود بالمستشفى يوم وعقب طلعت
في ماليزيا
علياء : ها حد رد عليك
حمدان : لااكيد شي صاير لهم انا وايد خايف عليهم
عليا: انزين خل نرجع الامارت صراحة انا بعد بالي انشغل عليهم
حمدان: بتصل براشد يروح لهم البيت ويشوف شو صاير عندهم
من صوب ثاني انجود كانت قاعدة بغرفتها وفجأة تذكرت الورقة اللي عطاها لها خالد قبل لايموت وتذكرت وين حاطتنها وفتحتها وقرت
بسم الله الرحمن الرحيم
انجود الغالية
والله ما ادري شو اقولج بس والله انا احــــــــــبـــــــــــــــــــــــــــــــــــــ ـــج من يوم ما شفتج اول مرة يوم الحادث وزعلت وايد اني ما عرفت اوصلج او اكلمج عقبها وما تتخيلين شكثر كنت فرحان ومسنانس يوم شفتج وفي بيتنا بعد عرفت ان الدنيا حلوة وانشاءالله انا ناوي اخطبج عقب ما يصير محمد بخير بس حبيت اعرف رايج بالأول بس والله تأكدي اني احبج واموت عليج تدرين انا بموت من الفرحة اني راح اساعد محمد وان حياته متوقفة علي على فكرة تراني كاتب لج دفتر انشاء الله يوم بطلع من المستشفى بعطيج اياه ومحطنه تحت المخدة عشان يوم ارقد احس انج قريبة مني واذكرج بكل وقت
عاشــــــــــق انجود "خالد"
انجود: خالد حتى انا احبك ليش خليتني بروحي كيف بعيش بدونك اساسا حياتي خلاص ما عاد لها اهمية دامك رحلت كيف بصبر اني ما اشوفك وما اسمع صوتك انت قلت انك تحبني بس تخليت عني وتركتني لان الموت كان وااااايد قريب منك الله يرحمك يالغالي الله يرحمك
وشوي ويرن مبايلها
انجود: الو
ناصر: هلا انجود
انجود: ناصر انا........
ناصر: ما عليج انجود خالد خلاص راح بس المهم ابيج اتين عندنا البيت
انجود: لايا ناصر ما اقدر ادش البيت ما اقدر
ناصر: انزين في دفتر لج من خالد انا دخلت غرفته وشفته وهو كاتب باول صفحة[هذا الدفتر ل انجود فلو سمحتو لو احد فتحه وانا مو موجود يسكره........رجااااااااء]
انجود: بس يا خالد .... وسكتت لانها بدل ما تقول ناصر قالت خالد وهي حاسة بالذنب تحس ان هي السبب بموت خالد
ناصر: خلاص انجود انا بيب الدفتر
انجود: خلاص اوكيه مع السلامه
ناصر: مع السلامة
****
حمدان: ها راشد شوصار معاك
راشد: انا رحت البيت وقالو ان واحد اسمه خالد متوفي
حمدان: خالد منو
راشد: اظن ولد عموتك
حمدان: اوه شالسالفة انا مو فاهم شي
راشد: ترى محمد
حمدان: ومحمد شو دخلة بالسالفة
راشد:انزين خلني اكمل محمد كان عنده فشل كلوي وكان وايد تعبان وهذا خالد هو اللي عطاه كليته وتوفى في العمليه هذا اللي فهمته منهم
حمدان:خلاص خلاص نحن راجعين البلاد باجر
راشد: توصلون بالسلامة يالله بحفظ الرحمن
حمدان:مع السلامة

 

[ضوى العيون]

سعيد: هلا ناصر شخباركم ان شاالله تمام
ناصر: أي تمام وخالد راح .... المهم بغيت انجود شوي
سعيد مستغرب: انجود خير ان شاالله فيه شي
ناصر: ابي اقولها شي وبعد حنان مطرشتلها شي
سعيد: ان شاالله الحين بناديها تفضل داخل
ناصر: لابترياك هنيه
وشوي اتي انجود
انجود: السلام عليكم
ناصر: وعليكم السلام .....خذي
انجود:تعبتك معاي ..... وتمت تطالع عيونه
ناصر: شفيج
انجود: تدري ان عيونك مثل عيون خالد
ناصر: ابي اقولج ان مو انتي السبب بموت خالد هذاك كان يومه لو ما مات بالعمليه يمكن كان يموت بحادث والا وهو راقد الله اللي كاتب كل شي لاتحملين نفسج ذنب انتي مالج ذنب فيه ..... وبعدين قولي لي انتي من متى وانتي مو راقدة
انجود: ماعليك مني شخبار البنات
ناصر: مو احسن عن حالج انجود انا حاس فيج انتي بالفترة الأخيرة كنتي واايد قريبة منا ونحن تعودنا عليج مثل ما انتي تعودتي علينا واكيد انتي غالية على خالد الله يرحمه واكيد انه ما كان بيرضى انه يشوفج بهالحاله ....... تدرين ان يوم أي واحد منا يصيح هو يتعذب بقبره
انجود:بس انا مو متخيله اني ما راح اقدر اشوفه ولا اسمع صوته مو متخيله ان خالد ما راح يكون بيننا يوم نسولف ويوم.........
ناصر قاطعها : حرام عليج اللي تسوينه بنفسج
راشد: السلام عليكم
ناصر+انجود: وعليكم السلام والرحمة
انجود: هلا راشد ..... هذا ناصر ولد عموتي اخو خالد الله يرحمه
راشد: هلا انجود ابي خليفة شوي
انجود: هو بالميلس ادخل له
راشد: يالله انا بروح
ناصر: وانا بعد بروح
انجود:ليش
ناصر: البنات بروحهم بابيت لازم اروح يالله مع السلامة
انجود: مع السلامة
بالميلس
خليفة:هلا راشد
راشد: ياريال انتو ليش ما تردون على حمدان
خليفة: مبايلاتنا دوم مو معانا كله بالغرفة
راشد: المهم هو راد البلاد باجر
خليفة: انت قلته صح
راشد: هيه بس هو ما فهم شي واللي خوفه زيادة انكم ما تردون على اتصالاته......وكملو سوالفهم
غرفة انجود
كانت يايه بتفتح الدفتر بس الريم دخلت عليها وخشت الدفتر تحت المخدة
الريم: نحن رايحين لمحمد بتين
انجود: لا ما اقدر شخباره هو
الريم: بخير كلها جم يوم وبيطلعونه

 

[ضوى العيون]

انجود: ما عليه انا تعبانة سلمي عليه واتحمديله بالسلامه
االريم بطلت الباب بتطلع
انجود: الريم
الريم: امري
انجود: قلتو له عن خالد
الريم: الدكتور قال يمكن يكون خطر على حياته اذاقلنا له ان المتبرع توفى يالله مع السلامة
انجود: مع السلامة
وطلعت الدفتر وتمت تتأمله وفتحت اول صفحة وكان مكتوب" هذا الدفتر ل انجود اذا احد فتحه وانا مو بالبيت يسكره......... رجاء"
الصفحة الثانية: " انا متأكد يوم بيوصلج هالدفتر بتكونين تعرفين شكثر احبج... ابيج تعرفين كل شي عني انا كاتب كل شي ابيج تقرينه عدل اوكيه يالحلوة واخر صفحة لج مفاجئة اتمنى انها تعيبج [انجود يايه بتشوف الورقة اللي بعدها بس لقت ملاحظة: اقري الدفتر بالترتيب عسوله]
"* انا خالديوسف عمري 22 سنه انحرمت من اميه يوم عمري10 سنوات يوم كملت ال18 ابويه ختفى واستويت مسؤول عن اخواني فكنت ادرس واشتغل حاولت اعرف أي شي عن اهلي ولني ما قدرتلاني اساسا ما اعرف اسأل منو... اذكر يوم الحادث كنت واقف مع الشباب اللي كانو واقفين عيبني شكلج بس اللي عيبني فيج زيادة انج ما تعطين حد ويه انتي حتى ما صديتي صوبنا ولوبالغلط المهم اول ما اندعمت السيارة قلبي عورني وحسيت ان فيه شي يربطني باللي داخلها قلبي عورني اكثر يوم شفتج وانتي طالعة من الكفتيريا تميت اراقب نظرات عيونج اللي مو مصدقة اللي يصير جدامها حسيت ان روحج بتطلع منج بعدها حاولت اكثر من مرة انهم يعطوني أي معلومة عنج لكنهم ما رضو وما كانو يدرون ان القدر بيجمعنا مرة ثانيه ...خالد كان كاتب واايد اشياء ومواقف استوتله كاتبنها بالتفصيل اشياء تفرح واشياءتصيح ويوم وصلت انجود الصفحة مو قبل الأخيرة اللي قبلها قرت" ارجوك اذا غلطت عليك بيوم ساحني ترى نهايتي كفن ابيض وقبر صغير يحويني" المفاجأة الأولى كانت بالصفحة قبل الأخيرة واللي هو ظرف فتحته ولقت داخله اوراق قرت اول ورقه وكانت صدج مفاجأة
" انجود ابي اعترف لج بشي والله ان محد يعرفه غيري والحين انتي.... ابوي قبل لايختفي من حياتنا وصاني على ناس ويوم سألته قالي انه عقب وفاة الوالدة تزوج بس ما قال لحد وعنده بنت وولد يعني عندي اخوان غير احلام وفاطمة وحنان وناصر عقب ما اختفى كرهتهم من غير ما اعرفهم صرت اعرف اخبارهم من بعيد لبعيد وفجأة انتقلوا من بيتهم وانا الحين ما اعرف عنهم شي وحاس بالذنب اخاف يوم اموت ابوي يسالني عنهم بليز ساعديني اني اعرف مكانهم بالأوراق اللي بعدها كانت كل اللي اعرفة عنهم اترجاج ساعديني اني اعرفهم
وشافت الأوراق اللي وراا وعقب شافت الورقة الأخيرة كان فيها رسمه لصورتها وصورة خالد وآخر الورقة مكتوب ملاحظة"هذا رسمي"
انجود: انشاء الله ياخالد بدور على اخوانك وبحاول اوصل لهم .... احبك يا خالد احبك
وبعد مرور 4 شهور من وفاة خالد الأوضاع هدت شوي وطبعا محمد درى عن سالفة خالد وتأثربها وايد والريم من وفاة خالد وهي ما ترد على حمد وخليفة وغزلان تعلقوا ابعض زيادة وكانو يرمسون بعض وايد انجود ماردت انجد الي الكل يعرفها عقب وفاة خالد واايد تغيرت قامت ما تطلع من البيت وكله حابسة نفسها بالغرفة حمدان وعلياء حاولو يطلعون انجود من اللي اطة نفسها فيه بس ما قدرو حتى سعيد اللي تسمع كلامة حاول معاها بس من غير فايدة ي حاطة في بالها ان هي السبب بوفاة خالد الوحيد اللي حبته
ناصر وحنان وفاطمة واحلام ما يردون على اتصلات أي حد من عيال خوالهم الا انجود كانت تتصل فيهم وتتطمن عليهم كل يوم
حنان: الله يخليج والله اني محتاجتلج
انجود: ما اقدر ادخل البيت وخالد مو فيه
حنان: يعني خالد هو بس اللي ولد عموتج ونحن لا
انجود: السالفة مو جذه بس....
حنان: بس شو
انجود: خلاص الحين بيكم
حنان : والله
انجود: والله ... وسكرت عنها وطلعت من غرفتها وراحت الصاله وكان الكل موجود هي كانت حاطة في بالها ان عمها هو بعد السبب باللي صار بس كيف ما تعرف وما كانت تبي تشوفه
انجود: السلام عليكم
الكل: وعليكم السلام
انجود: لو سمحتوا اريد احد يوديني بيت عموتي
خليفة: روحي بدلي ملابسج انا بوديج
في السيارة
خليفة: انجود لين متى بتمين على هالحالة
انجود:أي حالة
خليفة: كله حابسة نفسج بالغرفة ليش يا انجود
انجود: ما ابي اعرف حد لاني كل اللي اعرفهم واحبهم يموتون بسببي
خليفة: شو بسببج خلي ايمانج بالله قوي انزين انتي قلتي له يسوي عمليه
انجود: لابس انا لو ما قلت له عن محمد ما كان بيي
خليفة: صدج ناصر ليش ما يرد على اتصالاتنا
انجود:: ما ادري اسألهم
خليفة: هم راضين يردون علي عشان اسألهم
انجود: الحين انت رايح اسألهم
خليفة: انجود ما ادري اذا الوقت يسمح والا لا بس ابيج بسالفة
انجود: الحين وصلنا
خليفة: خلاص عقب بقولج
خليفة:اوكي
****
ام محمد: لين متى بتم خاش عن العيال وتعذب نفسك
بومحمد: ما ادري
ام محمد: انت ما تشوف بنت اخوك شو صار لها من وفاة خالد... انت لازم تقولهم
بومحمد: يصير خير
***

 

[ضوى العيون]

عمر: ما عليك يامحمد يمكن لو قايل لهم من اول ما كان صار اللي صار
محمد: انا حاس بالذنب
عمر: انزين اقولك دام نحن بالمول تعل نروح صوب المطاعم
محمد: انت همك على بطنك
ويمشوووووووووووووووووون
..........: محمد .... محمد
محمد يطالع وراه بس ما لقى حد
محمد: انا
........: هيه انت مو محمد السعدي
محمد: هيه نعم اختي بغيتي شي
....: اول شي انا اسمي الهنوف
محمد: عاشت الأسامي الهنوف
الهنوف: محمد لو سمحت بغيتك بسالفة
محمد: وانتي من ون تعرفيني عشان يكون بينا سوالف
الهنوف :انا اعرفك زين بس انت ما تعرفني
محمد: ازين شو تبين قولي
عمر: حمود بروح وبرجعلك اوكي
محمد: اوكيه .... تفضلي تكلمي
الهنوف:هنيه
محمد: شرايج اعزمج على نسكفيه وقهوة والا تبين اكسبرسو
الهنوف: لاتتمصخر عاد
محمد: يعني شو تبيني اقول قاعد امشي وفجأة اتي وحدة تعرفني وانا ما اعرفها وتقول تعال ابيك بسالفة
الهنوف: والله انك يوم بتعرف السالفة بتعذرني
محمد: تبين تقولين هنيه قولي واذا ما تبين مع السلامة انا ما اطلع مع بنات بروحنا سمعتي
الهنوف: انزين بقول
ومن صوب ثاني انجود من غير ما تحس لقت نفسها بغرفة خالد وتمت تصيح .. تصيح على حبها تصيح على خالد خالد حبيبها تصيح على احلامها وآمالها اللي انهدمت قبل لا تنبني
نرجع لمحمد
محمد: انتي شو تقولين انتي اكيد مخرفة لاهو مستحيل يسوي جذه مستحيل
الهنوف: ليش عاد مستحيل
محمد اخذ نفس: انزين يالله قومي معاي
الهنوف بخوف: وين
محمد: بيتنا ابي اسمعه شو بيقول
النوف:بس
محمد: خلصينا لا
دخل محمد البيت والهنوف معاه والكل استغرب وعقب ما قالهم السالفة الكل عصب وشوي ويدخلون خليفة وانجود
خليفة وانجود: السلام عليكم
بومحمد: شرفت حضرتك
خليفة يطالع انجود ويقول: شالسالفة
انجود شافت الهنوف: منو هذي
حمدان: اسألي اخوج
خليفة: اخوها منو
حمدان: وانا شدراني منو هذي
الهنوف: لا تنكر يا خليفة انا قلت لهم كل شي بينا
خليفة معصب: بين منو
الهنوف: بيني انا وياك
خليفة: اساسا انتي منو انا اول مرة اشوفج
محمد: خلاص يا خليفة الهنوف قالت لنا كل شي وانت الحين لازم تروح تخطبها من اهلها وتتزوجون
خليفة: انتو شو تقولون استخفيتو
الهنوف: انا حامل خليفة
خليفة: وشو اسويلج
حمدان: عن الهبل انزين ليش ما قلت لنا انك تبي هالبنيه وتزوجتها بدل هالفضايح
خليفة: لحظة انتو شو تقصدون
الهنوف: اللي في بطني ولدك
خليفة صرخ: جااااااااااااااااااب.. وعطاها كف طيحها على الأرض........ انتو تستهبلون انا ما اعرفها انا اول مرة اشوفها هذي وحده جذابة
حمدان: كيف جذابه ومن وين تعرفك وتعرف عنا كل شي
انجود: انتو شو تقولون خليفة مستحيل يسوي جذه
سعيد: اساسا هذي وحده جذابة امبين من ويهها اساسا لو عندها دليل خل تقول
خليفة: الحين شو تبون
بومحمد: تتزوج البنيه
خليفة: اتخسي الا هي انا خليفة السعدي اخذ هالأشكال الخايسة
الهنوف: خليفة حرام عليك
خليفة: شو اللي حرام روحي شوفي اللي في بطنج من ولده
الهنوف: خليفة
خليفة: انتي وحدة حقيرة لا يكون تنطقين باسمي على لسانج
بومحمد: اسمع يا خليفة يا تروح الحين وتتزوجها يا تطلع من البيت
خليفة: انام بالشارع ولا اخذ هالأشكال
انجود: لا يا خليفة هذا البيت بيتك ليش تنام بالشارع عمي نحن لنا نصيب ابوي الله يرحمه ومحد له الحق انه يطردنا من بيتنا وانتي نحن شو اللي ياكد لنا انج حامل تعالي بالأول نروح المستشفى ونتأكد وبعد ما تربين هذا اذا كنتي حامل اظن ان فيه تحليل البصمه الوراثية وهواللي بيأكد لنا كل شي
الهنوف انصدمت ويايه بتتكلم بس اندق الجرس وراح حمدان يفتح البب وخلاه مفتوح ورجع داخل ومعاه ريال وحرمة
ام محمد: ليلى حبيبتي متى وصلتي من السفر
ليلى: توني واصلة بس شالسالفة صوتكم واصل اخر الشارع
وسلمو علي بعض
انجود: والحيت بعدج مصرة على كلامج
وتسمع انجود صوت من وراها : لا يا بنيتي الهنوف تجذب عليكم
بومحمد بصدمه: يوسف
يوسف معصب: انا ما قلت لج لا تسوين اللي في بالج
الهنوف طاحة على الأرض وهي تصيح : لايبه ليش قلت لهم خلهم يذوقون من اللي ذقناه سنين خلهم يحسون باللي حسينا فيه سنين ونحن نتعذب وهم ولا على بالهم مستانسين بحياتهم مو هم اللي دمرو حياتك وحياتنا موهم اللي داسوا على كل شي عشان اسم العيله
خليفة: بنيتي انجود وخليفة وحمدان والريم وسعيد و محمد وليلى مالهم دخل باللي صار ليش تبين تأذينهم وحتى خالد وناصر وفاطمة واحلام وحنان مالهم دخل
انجود من يابو طاري خالد راحت بعالم ثاني
بومحمد: يوسف فهمنا شالسالفة
انجود: لاء دام السالفة فيها خالد الله يرحمه و......
يوسف بصدمة: خالد ولدي ماااااات
انجود: ولدك
سعيد: صراحة مو فاهم شي
يوسف عينه دمعن
خليفة: دخيلكم فهموني شالسالفة
انجود تجاهلت كلام يوسف
: ناصر والبنات لازم يكونون موجودين لان مو بس انت(يوسف) اللي نبي نفهم منك السالفة حتى انت يا عمي للحين ما قلت لنا شو اللي خلاكم تتفرقون
وراحت انجود واتصلت بناصر وقالت له ايب البنات وايون بيتهم ضروري وقعد الكل يترياهم بالصاله والكل صاخ ولا نطق اي واحد فيهم بكلمه
[الهدوء اللي يسبق العاصفة] وشوي ويوصلون ويروح محمد ويبطل الباب ودخل ناصر والبنات الصاله وراحت عيونهم كلهم على يوسف
حنان وهي مو مصدقة: ابوية

 

[ضوى العيون]

الجــ التاسع عشر ــــزء والأخييييير
حنان وهي مو مصدقة: ابوية
احلام: انا احلم والا شالسالفة
فاطمة: لا هذه ابوي انا متأكدة والله ابويه وركضوا صوبه ورمو نفسهم بحظنه
يوسف:وانت يا ناصر ما بتي بحظن ابوك
ناصر عيونه دمعن: يبه حرام عليك والله حرام انت عايش ومخلنا ايتام يبه ليش ليش بعدت عنا... وراح لوى على ابوه
احلام وهي تصيح: يبه خالد مات يبه
انجود قلبها عورها من طرو هالإنسان اللي حبته واااااااااايد
حمدان: تعالو اقعدو هنيه خل نفهم شالسالفة
وقعدو الشباب والبنات بجهه وحدة وبومحمد ويوسف(بوخالد) بجهه ومعاهم ام محمد
يوسف: اول شي يا عيالي اريد اقولكم سامحوني
بومحمد يبي يتكلم بس مبايل الهنوف رن
الهنوف: ابوي هذا سيف
فاطمة: ابوي اللي هو ابوج
احلام: شو
بوخالد: ردي عليه وشوفيه وين
الهنوف: هلا
سيف: سويتي الي متفقين عليه والا لا
الهنوف: سيفو وينك
سيف: انا جدام بيتهم
الهنوف: تعال ادخل
سيف: ليش شو صار
الهنوف: ابويه هنيه واخوانك والكل ادخل وبتعرف السالفة
سيف: اوكي الحين بدخل.... ودخل لان الباب كان مفتوح
بوخالد: تعال يبه اقعد
سيف: انشاءالله ابوي
بومحمد: والحين دامكم اكتملتو بقولكم الشي اللي كنت خاشنه عنكم طول هالسنين انا واحمد(بوحمدان) وامل(ام خالد) اخوان من ام وابو في يوم من الأيام يانا يوسف بوخالد وخطب امل وطبعا نحن ما وافقنا لان ولد عمها كان يبيها بس هي اصرت الا تاخذه والكل رفض هالشي لان ولد عمها هو احقبها من الغريب المهم هذيج الفترة استوت وايد مشاكل والمشكله ان ولد عمنا كان يحبها من يوم ما كانو صغار بعدها امل شردت من البيت في يوم ملجتها من ولد عمها وتزوجت بوخالد نحن كان ممكن نسامحها بعد فترة على اللي سوته بس اللي صار عقبها ان ابوي ما قدر يراوي ويهه للناس بسبب الفضيحة اللي صارت والمشكله الأكبر ان ولد العم يوم درى عن اللي صار طلع بسيارته وسرع بها وكان الوقت ليل ودعم سياره ثانيه وكان الحادث وايد قوي ومن دعم السيارة الثانية سيارته تقلبت وعقب دعمت بعمود الكهرباء واحترقت السيارة باللي فيها الناس حاولو يطلعونه من السيارة بس السيارة كانت تحترق وتمينا اسبوع ونحن ندور عليه وما لقيناه وبعدها يانا اتصال من الشرطة قالوا لنا عن الحادث وقالو انهم اضطرو انهم يدفنونه لانهم ما عرفو منو اهله تخيلوا حالة اهلة يوم درو انتو بس تخيلو السالفة المهم الكل اعتبر امل السبب والناس ما قالو امل سوت قالو امل بنت فلان سوت نحن ما قدرنا نسامحها على اللي سوته وخاصة ان ولد عمنا كان شرات اخونا وكنا ويد نحبه عقبها قاطعنا امل بس كنا نعرف اخبارهم من بعيد لبعيد ولا تتحسبون هالشي هين علينا امل كانت اختنا الوحيدة وعشان يصلحون السالفة مع اعمامي كانو يبوني اخذ اخته عشان يردون العلاقة شرات قبل بس انا كنت خاطب ام محمد وكانو يبوني اتركها بس انا رفضت ما كنت اريد اعيد سالفة امل بس بطريقة ثانية فانا تزوجت ام محمد وتركت البلاد وطبعا مصيري كان شرات امل انهم قاطعوني وطبعا بوحمدان كان متزوجهذيج الفترة واللي خلى بوحمدان يقاطعني ان ابويه واميه توفو عقب ما درو اني سافرت وكنت اعرف اخباركم من بعيد لبعيد وفجأة انقطعت اخباركم عني وخفت عليكم وهالشي اللي خلاني ارجع البلاد هذي هي السالفة اللي بغيتو تعرفونها اما اللي صار مع امل فانا ما اعرفه يوسف بيقولكم
يوسف(بوخالد): امل من درت عن اللي صار مع ولد عمها ومعاكم يا بومحمد ياها انهيار عصبي حاد ويوم قررت انها تتركني وترجع لكم اكتشفت انها حامل بخالد فغيرت رايها وعقبها يابت ناصر واحلام وفاطمة وحنان بس بهالفترة كانت غير مو امل اللي كنت اعرفها قبل وهالشي اللي خلاني اتزوج عليها ويبت الهنوف وسيف ويوم درت امل توفت انا كنت ما اروح عندهم الا نادر وعقبها بفترة كبيرة قلت لخالد عن اخوانه وقلتله يسأل عنهم كل فترة بس مثل ما كنت متوقع انه ما بيسال عنهم وبنفس الفترة كنت دوم احلم امل وهي تقول لي اترك عيالي للزمن يربيهم وانت روح للي فضلتهم علينا انا ما ادري شو اللي صار لي وتركتكم ورحت عند عيالي الثانين بس كنت اتعذب باليوم مليون مرة لاني السبب باللي صار بأمل وولد عمها واهلها كلهم وطبعا الهنوف وسيف حبوا ينتقمون منكم باللي سوته الهنوف اليوم كانت تبيكم تحسون باللي حسيت فيه كل اللي كانت تباه انكم تتعذبون وبس[ودمعن عيونه] وانت يا خالد سامحني يبه بس انا كل ما كنت اشوفكم اذكر امكم واللي صار للكل بسببي
الهنوف: آسفة يا خليفة
خليفة: انا بعد اسف على الصفعة
وتمو قاعدين مع بعض لين بليل واخير عرفوا اللي يبونه ...الساعة12 في غرفة خليفة الحبيب كانت قاعد على السرير وطرت على باله حبيبة قلبه غزلان وتذكر اول مرة شافها كان رايح المستشفى لان عند موعد وكان واحد يرقم البنات بالمستشفى وهي منقهرة منه واستوت حركة وهي ما انتبهت لها الولد اللي يرقم راح وخليفة وقف مكانه وما صدقت امها دشت عند الدكتور مع اختها وهي تمت برع مع اختها الثانية وما حست بعمرها الا وهي عند خليفة
غزلان معصبة: انت ما تستحي على ويهك
خليفة: نعم
غزلان: وين تتحسب عمرك بالمول ترقم البنات الناس تعبنين وياين يتعالجون وحظرتك تستهبل عليهم حسبي الله حتى المستشفيات ما سلمت منكم
خليفة: اختي بلاج محتشرة انا غلطت عليج بشي
غزلان: يقهر بعد يقول لي بلاج وانت شو يخصك
خليفة: الظاهر انج غلطانه هالقسم ماا يعالجون فيه الحالات النفسية
غزلان شهقت: انا فيني حالة نفسيه يالسخيف يالغبي
خليفة مستغرب ومعصب: اختيه تراها مقيوله ليس على المجنون حرج
غزلان يايه بتتكلم بس انتبهت لاختها اللي تحاول تكلمها من ساعة
غزلان: بلاج
ناهد: بلاج على الريال مو هو اللي كان يرقم البنات...غزلان ويهها استوى اشارة مرور
ناهد: اسفين اخوي بس كان فيه سوء تفاهم
خليفة: ما عليج الشيخة دام السالفة جذه مسموحين....... وتركهم خليفة وراح
ناهد: الله يغربج فشلتينا مع الريال
غزلان: انا شدراني ان هذاج السبال راح والله فشله
ناهد: ما عليه حصل خير زين ان اميه م معانا والا كنتي صدج بتتفشلين
غزلان: صدقج
قوم غزلان خلصوا من المستشفى وطلعوا برع يتريون اخوهم
ابتسام (اخت غزلان):آآآآه يا فلبي
غزلان: سلامة قلبج حبيبتي ترانا بعدنا بالمستشفى خل نرجع داخل
ابتسام:شوفي هذاج شحلاته عجييييييييب
غزلان: ابتسام اصطلبي
ابتسام:انتي بس شوفيه
غزلان: وينه
ابتسام: هذاج اللي يرمس بالتليفون ما شاءالله عليه الله يخليه لاهله
غزلان يوم شافته ضحكت بصوت عالي لانها تذكرت اللي سوته فيه وسمع ضحكتها ويت عينها بعينه وهي استحت ونزلت راسها
ابتسام: ويلي على النظرة
ويوصل اخوهم ويروحون بس كل واحد فيهم يفكر بالثاني ويسأل نفسه اذا بيشوفون بعض مرة ثانية والقدر والحب جمع بينهم
الكل راقد الا غزلان ويندق الجرس وراحت تفتح الباب
غزلان:..........
خليفة: الس.........
وتمو ساكتين ويطالعون بعض
غزلان: نعم اخوي
خليفة:موجود
غزلان: منو هو اللي موجود
خليفة ضحك على نفسه: هههههه اقصد بطي موجود
غزلان: لايكون انت ربيعه
خليفة: عندج مانع
غزلان: لاما عندي مانع بس دخيلك لا تقول له عن اللي صار بالمستشفى البارحة
خليفة: تامرين امر الشيخة
غزلان تبي تعرف اسمه: انزين شو اقول لبطي منو يبيه
خليفة حس انها تبي تعرف اسمه وحب يقهرها: قولي له ربيعك برع وهو بيعرف منو انا
غزلان: انشاءالله يالمجهول
خليفة: المجهول
غزلان: شو اسوي بك يوم مو راضي تقول اسمك
خليفة: انا خليفة السعدي وانتي
غزلان: انا غزلان اللي لو واحد شافها وهي تسولف معاك بيكون اخر يوم بعمرها
خليفة:انزين ما عليه روحي نادي بطي
وبجذه تكررت زيارات خليفة لبطي وكان دوم يشوف غزلان ويسولف معاها شوي بدون ما احد يشوفهم وعقب خذوا ارقام بعض حبوا بعض [ آخــــــــر زمـــــــن حـــــب مستشفيــــات]
ومن صوب ثاني حمد حارق تليفون الريم وهي ماترد عليه بسبالأخير حن القلب
الريم: الو
حمد: تو الناس لو ما رديتي الريم بلاج علي
الريم: كل اللي صار معاي وما تدري بلاني حمد انت تعرف ان الظروف مو شرات قبل
حمد: وانا شو ذنبي تعذبيني
الريم:..............
حمد: انا باجر ياي بيتكم وابي اشوفج
الريم: شلون
حمد: قبل لاادخل بتصلبج وتطلعين واشوفج
الريم: خلاص اوكي
في غرفة انجود( انجود والريم عقب فترة كل وحدة راحت حجرة بروحها)
الحبيبة مطلعه الدفتر اللي بقالها من خالد وفاتحتنه على اخر صفحة اللي فيها الصورة وكانت تحكيله شو اللي صار معاهم وقالت بخاطرها: ارتاح ياخالد ابوك ظهر واخوانك بعد ظهروا هم كانو مع بعض غناتي خالد اليوم ابوك طلب منك انك تسامحه عشان خاطري سامحة الكل مر بظروف ما يعلم بها الا الله سبحانه العالم بكل شي ادري الظروف قست علينا واايد وفرقتنا عن بعض آآآآآآآآآآآآه ياخالد احس اني بموت والله اني تولهت عليك واااااااااايد كل ما اشوف اخوانك اتذكرك بس الحين خلاص ما بقدر ازورهم شرات قبل لان دام ابوك ظهر يعني راح يعيشون كلهم مع بعض وسيف اخوك ما يقربلي شي حتى اخواني ما بيخلوني .. اقولك بروح عنك الحين لاني تعبانه ابي ارقد وسكرت الدفتر وحطته تحت المخدة مثل ما كان يحطه وهذا حال انجود كل يوم وعلى ثاني يوم الساعة5 العصر حمد اتصل ب الريم وقالها انه برع بس هي صدمته يوم قالت له انها نست السالفة وطلعت مع انجود المول عسب يشترون شويةاغراض وعقب سكرت عنه وطرش لها هو مسج [ جيتك على المعد ولاجيت وش عن لقانا مانعنك كنك عن المعد تخليت ياويل ياللي عاشقنك ياما على شانك تحديت سود الليالي اسهرنك منك انا لاحي ولا ميت لاميت ولا حي منك اموت بامرك طايعنك اهات صدري ما كفنك لو انك تباعدت وتناسيت لك في المحبة عكس ظنك شوفة عيونك طالبنك]

 

[ضوى العيون]

في المول
الريم قرت المسج واضايجة لان صدج هي م نست هي تناست المهم الريم كانت رايحة مع انجود وسعيد وخليفة
خليفة: شرايكم نروح السينما
سعيد: الحين
خليفة: هيه احين
الريم: انا موافقة
خليفة: وانتي انجود
انجود: ما ادري بس انا مالي بارض ادخل سينما اريد اشتري اللي ناقصني وارد البيت
الريم: انجود حرام عليج دخيلج يالله
سعيد: انزين خليفة ادخل انت والريم وانا بتم مع انجود
خليفة يفكر خلاص اوكي
وقبل لايروح قال لسعيد شي بأذنه وضحكو وعق راح كل واحد بطريق
سعيد: ها انجود وين تين تروحين
انجد: المحلات اللي هناك
سعيد: يالله انزين
وعقب ساعة دوارة من حل لمحل
سعيد: حرام عليج والله تعبت
انجود ابتسمت: انزين شو اسويبك يعني
سعيد: تعالي نقعد شوي بالمطعم
انجود: يالله
وتمو يسولفون شوي
انجود: سعيد
سعيد: آمري
انجود: ما بتروح تصلي


سعيد: وكيف اخليج بروحج

انجود: لاتخاف بتم قاعدة هنيه وبعدين ما شاءالله وايد ناس وما بيستوي بي شي انت لاتأخر صلاتك
سعيد: اوكي بس لاتتحركين من مكانج
انجود: روح لاتحاتي
صح انجود كانت خايفة تقعد بروحها بس بعد حرام تخليه يأخر صلاته واللي كان خايف منه سعيد ان حد يتحرش بها صار الظاهر ان مجموعة من الشباب كانو يراقبون انجود وسعيد ومن راح سعيد تقربو من انجود بس هي ما عطتهم سالفة راحو قعدوا بالطاوله اللي مجابلتنها ويسون حركات عسب يلفتون انتباهها بس بعد ما عطتهم سالفة انقهرو منها لانهم متأكدين انها حاسه بهم وقامو ووقفوا جدام طاولتها وهنيه طاح قلبها من الخوف
انجود بخوف: شو تبون
مايد بوقاحة: نبي نتعرف
انجود: لو سمحتو روحو من هنيه احسن لكم
مايد: واذا ما رحنا شو بتسوين
انجود: دخيلكم بلا فضايح وسيروامن هنيه.... وطبعا ما رضوا الا ياخذون رقمها وهي تاخذ رقمهم والله شباب اخر زمن هذا اللي فالحين فيه ( اكيد مو كل الشباب عشان محد يزعل) وهنيه علت اصواتهم انجود تطالع حواليها ادور حد تعرفة بس ما لقت حد بس بالصدفة غزلان وخواتها وبطي كانو موجودين بالمول جريب المطاعم
ناهد : شالسالفة هناك ضرابه والا شو
بطي: وانتي شو تبين
غزلان: غمضتها البنيه عقب ما سمعت شوي من رمستهم وهي ما تدري انها اخت حبيبة القلب
غزلان: بطي حرام الظاهر ان الشباب يتحرشون بها
بطي: وانا شو اسوي بها محد قالها اتي المول بروحها
غزلان: دخيلك بطي ساعدها
ابتسام: هيه والله انته ما تعرف ظروفها
بطي بعد ما فكر: انزين طوفو جدامي
انجود من شافت بطي رايح صوبها خافت زيادة بس عقب تطمنت يوم شافت ان معاه بنات
غزلان غمزت ل انجود: العنود بلاج
انجود بخاطرها أي العنود بس عقب انتبهت انها غمزت لها يعني اكيد تبي تفكها من اللي هي فيه
انجود: هايل مو مخليني بحالي والله مليت وانا اقولهم يروحون بس م راضين
وهنيه ادخل بطي وتم يرمسهم بس ما رضو يفهمون وانجود من خوفها مسكت ايد غزلان وعقب ما خلص سعيد صلاته وشاف الشباب وناس متجمعين صوب انجود ومن خوفه عليها ركض ويوم وصل عندها وقالت له شالسالفة
سعيد: الظاهر ان الكلام ما ايب فايدة مع هالأشكل ... ومسك مايد من رقبته... قسم بالله لو ما خذت ربعك ورحت من هنيه والله لراويك شي ما شفته ودزه ومايد ما صدق انه تركه خذ ربعه وانسحب من المول كله
سعيد معصب: انا ما قلت لج خليني اقعد معاج احسن
انجود: وانا شدراني ان كل هذا بيصير
سعيد: ما عليه عقب نتفاهم اتصلي بخليفة والريم خل نرجع البيت احسن لنا
بطي توه انتبه يوم طروا خليفة: سعيييييييد
سعيد: بطي .... اسمحلي ما عرفتك
بطي: ما عليه حصل خير
سعيد: أي خير وهالأشكال موجودة
بطي: المهم شحالك انت وشحال خليفة هاالقاطع من فتره لا يتصل ولا يسأل
غزلان بخاطرها: معقوله يكونون يتكلمون عن خليفة حبيبي
انجود: سعيد الظاهر مخلينه صامت لان محد يرد
سعيد: انزين ما عليه .. تعال بطي نقعد على هالطاوله وخل اهلك يقعدون هنيه
انجود: مشكورين انقذتوني
ناهد: مشكورين الغاليه
ابتسام: ما عرفنا شو اسمج
انجود: انا انجود السعدي وانتو
ناهد: انا ناهد وهذي ابتسام وهذي غزلان وهذاك بطي اخويه
انجود: يا مرحبا بكم
غزلان تبي تتأكد زيادة : هذا اخوج
انجود: لاولد عمي خليفة اخوي والريم بنت عمي بالسينما
غزلان استانست انها بتشوف خليفة
انجود: يعني صدج صدج مشكورين لولاكم ما ادري شو كان بيصير فيني
غزلان: العفو الغاليه( وبخاطرها يا اخت الغالي)
غزلان كانت وايد مستانسه لانها اخيرا شافت انجود اللي شكثر سمعت عنها سوالف يمكن تتوقعون ان غزلان بتغار من الريم بس اقولكم لالالا لانها ببساطه عارفة العلاقة بين خليفة وعيال عمه كلهم وهي واثقة من حب خليفة لها
يرررررررررررن مبايل الريم
انجود: هلالالالا والله
خليفة: اهلين .... متصله بغيتي شي
انجود: هيه يالله عسب بنرجع البيت
خليفة: بس الفيلم بعده ما خلص
انجود: خليفة يالله عاد
خليفة: انزين الحين بيي انا والريم
انجود : نترياك عند المطاعم
غزلان بخاطرها :آهيا فرحة قلبي بشوفه فديته
وتمت غزلان تترقب شوفة حبيب القلب وشوي وايي خليفة والريم وبدون تفاهم راحت عيونه بعيون غزلان خليفة ما عرف شو يسوي من الصدمه يضحك والا يصرخ راح صوب الطاوله وسلم على بطي وتمو يسولفون وعقبها كل واحد راح في طريقة وطبعا انجود والبنات صارو ربع وبعد تبادل الزيارت والمكالمات قرر خليفة انه يخطبها وبالفعل خطبها وكان اسعد يوم بحياتهم هم الاثنين

 

[ضوى العيون]

بعد مرووووووووووور خـــــــــمـــــــــــــــــس ســـنــــوات



غزلان خليفة تزوجوا وعندهم سلطان وغزلان حامل
حمدان وعلياء يابوا العنود وقمر وراشد
محمد تزوج الهنوف وعندهم يوسف
وطبعا عذبة وعبدالله تزوجو وعندهم خليفة وخلود وخالد
الريم وحمد تزوجوا عقب ما خلته يحس بكل اللي سببه لها وهي حامل


انجود: لحظة ناصر بعده ما وصل
سعيد: انجود دخيلج يالله خل نسحب الأوراق
خليفة: انت ليش مستعيل اتريه شوي
حمد: حتى انا ما فيني صبر
الهنوف: هالأولاد
دخل ناصر: اتأخرت عليكم
محمد: ويسأل بعد
الريم: وين الأوراق
غزلان : بروح ايبها
حمدان: بسرعة
مسكت انجود الأوراق وفرتهم على الأرض وكل واحد خذ ورقه الشباب والبنات مسوين تهادوا وتحابوا ............ صح نسيت اقولكم ترى سلطان يوم حس ان ما شي امل له مع انجود تزوج بنت خاله ... خل نرجع لتهادو وتحابو الحلوين من سحبو الأوراق كل واحد راح غرفته عشان يفكر هو شو بيسوي بالثاني وكانت مدته اسبوعين ويوم الخميس بالأسبوع الثاني كل واحد يقول منو عنده وقرروا انهم في هالأسبوع يقعدون في بيت واحد عشان ما يحتارون كيف يسون المقلب ويوصلون الهديه بعد3 ايام دخل سعيد غرفته الساعة12 بالليل وو تتوقعون شااااااااف؟؟؟؟ غرفته كانت مرتيه والسرير كله ورود طبيعية وصوب السرير طاوله وصوبها كوب عصير بارد ويوم سحب الكرسي عشان يقعد لقى قفص فيه عصفورين ابتسم وحس بفرحة وبنفس الوقت بالفضول انه يعرف منو مسويله جذه لان حجرته كانت روووووووووووووووووووووووووووووووووووووووووووعة وبنفس اليوم بغرفة ناصر الحبيب قالب الدنيا على مبايله بس بدون فايدة يوم فتح الدرج لقى مبايله وشوي ويرن مبايله
ناصر: مرحبا الساع هلا والله عبود
يوسف: اولا مرحبتين ثانيا انا يوسف
ناصر: عبود اعرف حركاتك
يوسف : والل اني يوسف الظاهر انت مو راقد عدل اليوم
ناصر عصب وصك التليفون ناصر يكره ان حد يسوي فيه هالحركات ظهر له بالمبايل عبدالله كيف يقول له ان يوسف ونام وهو معصب وعلى ثاني يوم كان برع البيت واتصل ب انجود
ناصر: الو
خليفة: هلا والله
ناصر: ليش ترد على مبايل انجود
خليفة: أي مبايل انجود هذا مبايلي شكلك متصل بالغلط
ناصراخذ نفس: انزين مع السلامة
خليفة مستغرب: باي
وقام ناصر وطلع اسم خليفة واتصل عليه وترد عله علياء وتقول ان هذا مبايلها ويتصل بالهنوف ترد عليه الريم ويتصل بسعيد ترد عليه انجود
ناصر: لا هذا المبايل اكيد خرف والا شو السالفة وشوي ويوصله مسج من الإتصالات فتحه وكان المكتوب تعيش وتاكل غيرها ...ناصر حس بالقهر يعني واحد من اللي بالبيت ماخذ مبايله ومغير الأسامي والأرقاموعقب راح وطرش له مسج من الإتصالات ويوم رجع البيت لقى مبايلين بغرفته كهدية
الريم دخلت غرفتها ولقت علبه عودة على طاوله بالغرفة مكتوب عليها"الريم" فتحتها لقت علبة اصغر عنها فتحتها لقت مجموعة عطور وميكياج ... في البيت الطباخ كان كل يوم على وحده وفي هذ اليوم كان على عليا يوم فتحت الفرن لقت شي عود مغلف فتحته لقت دبدوب ماسك باقة ورد وورقه مكتوي عليها" عليا".... غزلان داخلة غرفتها وكانت تعبانه بس لقت ورقة على الباب مكتوب عليها اولشي روحي الصاله تحت التلفزيون بتلقين ورقة وتمت غزلان تتبع الأوراق ماشي مكان بالبيت ما راحته واخر شي ورقة مكتوب عليها روحي غرفتج وشوفي تحت السرير يوم راحت حصلت قطوه وصرخت ولمت البيت كله وعلى ثاني يوم لقت هدية على السرير .... الهنوف دخلت المطبخ تسوي العشا خلصته وطلعت وعقب حطو العشا ومحد قدر ياكل لان الأكل كله سكر والماي فيه ملح ويوم شلو الصحون لقوا تحت واحد منهم ورقة مكتوب عليها "Im sorryبتنامون من غير عشا الهنوف هديتج بالمطبخ Im sorryمرة ثانيه ....... حمد توه بيركب سيارته وكان مستعيل بس انتبه ان التواير كلها محد وعصب ووصل حده يتحسبهم انسرقوا وراح اشترى غيرهم وتم على هالحالة 3 ايام كل مل يركب تواير ما يحصلهم مرة كان رايح المول يشتري اغراض وفتح الدبه عسب يحط الأغراض ولقى التواير بالدبه مع ورقة مكتوب عليها ( شو السالفة انت تخزن تواير والا شو)حس بالقهر ويوم رد البيت دخل غرفته ولقى تاير على طاوله وبالوسط هديه اما حمدان ومحمد فلقوا هدايا من غير مقلب..... خليفة كان معزوم وناسي فتصلو ربعه وذكروه وفتح الكبت يطلع له ملابس بس ما لقى شي يوم سأل غزلان قالت ان ملابسه بالكبت وانصدمو يوم شافوا الملابس كلها بالغسيل وتوهق خليفة درى انه مقلب بس مو قته وعقب خذ ملابس من سعيد لانه بنفس جسمه ويوم رجع لقى علبه فيها ملابس يديده وعطور ... اما انجود ما وصلها أي شي لا هديه ولا مقلب اليوم اخر يوم لان باجر الكشف عن الأسامي دخلت غرفتها وانصدت الغرفة كلها هدايا حاولت تعدهم بس وصلت 50 وتعبت وتمت تفتح االهدايا الظاهر عشان جذه تاخروا عليها
يــــــــــــــــــــــــــــوم الـــــــــــــــــخمــــــــــــيس
الهنوف : يالله بسرعة اعترفوا منو اللي خرب الأكل هذاك اليوم
حمد: وانا اموت واعرف بو التواير وام التواير
انجود: اول شي الأولاد يقولون وعقب البنات
ناصر: انا عندي غزلان
خليفة: ما عليه ادوخ حرمتي على قطوه انا اراويك... المهم انا عندي الهنوف
محمد: وانا بوالتواير
حمد: حرام عليك الحين شو اسوي بهم انا عندي علياء
حمدان: انا عندي ناصر
سعيد: انا عندي انجود
علياء: اوكي انا عندي الريم
الريم: وانا عندي خليفة
الهنوف: انا عندي محمد
انجود: انا عندي سعيد
غزلان: اما انا فعدي حمدان
وعقب تمو يسولفون عن المقالب والهدايا وسعيد وانجود يطالعون بعض سعيد طرش مسج ل انجود( مشكووووورة على اللي سويتيه صراحة استانست واااااايد)
انجود طرشت ( العفو وانا بعد استانست من اللي سويته)
خليفة: صراحة انجود اللي ربحت من هالسالفة وصلتها وايد هدايا
سعيد: وانت ليش منقهر
انجود تقلد صوت خليفة: واايد هدايا ههههههههه
الكل:هههههههههه
انجود: اقول انا بروح غرفتي تعبانه
غزلان: شفيج
انجود: ما شي راسي يعورني ودايخة
حمدان: نوديج المستشفى
انجود: لامو لازم
حمد: يالله الريم خل نروح بيتنا
الريم: اتريا شوي بروح ايب ملابسنا
انجود قامت ومشت خطوتين وردت طاحت مرة ثانية (اغمى عليها) الكل اتينن من طاحت قامت غزلان ويابت عبانه وشيلتها ولبستها وخليفة شالها وراح الكل المستشفى
سعيد وشكله متروع: ها دكتور طمنا
حمدان: يالله اتكلم
الدكتور: انتو ليش خايفين هالكثر البنيه ما عندها غير شويه ارهاق وتقدرون تاخذونها معكم الحين
محمد: مشكور دكتور
وراح الكل عند انجود وتحمدولها بالسلامة وبعدها بفترة بطي اخو غزلان خطبها
محمد: انت ليش معصب هالكثر
سعيد: انا م موافق
خليفة: ليش عاد بطي ريال
سعيد: وانا ما قلت عنه شي
خليفة: عيل ليش رافض
سعيد:.............
حمدان: انتو ليش تضاربون وطو صوتكم شوي
دخلت عليهم انجود: ليش تضاربون
خليفة: ما في شي
سعيد: لافيه شي ترى يطي يبي يخطبج شو رايج
انجود ابتسمت: الحين كل هالحشرة عشان هالسالفة اللي ما تسوى
محمد: انزين انتي شرايج
انجود بكل بساطة : م موافقة
سعيد ابتسم:yes
حمدان: وشو اللي خلاج ترفضين
انجود: لاني ما ابيه
خليفة معصب: ومنو تبين حظرتج كل ما خطبج واحد رفضتي
سعيد: انت ليش معصب هليها كيفها
محمد: سعيد
سعيد: انزين اقولكم انا اريد اتزوج انجود
الكل انصدم وبطل عيونه وما قدرو ينطقون باي كلمه
خليفة:ههههههههههههههه انزين قول جذه من الصبح
محمد: هههههه وانا اقول الريال بلاه يحتشر كل ما يه واحد يخطب انجود عصب
حمدان: ها شورايج انجود
انجود بعدها منصدمه وما ردت عليه الكل خلاها وطلع
انجود: معقولة لالالالالا شو اللي توه سمعته معقوله سعيد اللي لاغي فكرة الزواج من باله يفكر فيني وقطع تفكيرها المسج اللي ياها من سعيد[ انجود والله اسف اني صدمتج وخطبتج بهالطريقة بس انتي تشوفين كل يوم واحد يخطبج اخاف تضيعين من ايدي والله اني احبج واااااااايد وساكت بس ما اقدر اصبر زيادة فكري على راحتج اوكي يالحلوة]
انجود: فديتته يحبني
وعقبها باسبوع الكل درى ان سعيد خطب انجود وهي وافقت ومرت الأيام وتزوجوا وانجود يابت خالد ونورة توأم وبجذه انجود وسعيد حبو بعض انجود فقدت حبيب قلبها خالد والله عوضها بسعيد وسعيد فقد حبيبية قلبه نوره والله عوضه ب انجود وبجذه تجمعت العيله مرة ثانيه يفضل الله والحب اللي جمع قلوبهم وخلاهم عيله وحدة..........





الــــــــــــــــــــــــنــــــــــــهــــــــــ ـــــــــــايـــــــــــــــــــــــــــــــــــــ ة

 

[بنوته كيوت]

تسلمين حبيبتي قصه ولا اروع

 

[ضوى العيون]

الله يسلمج ان شالله ويخليج

 

[ورود الجوري]

تسلمين حبيبتي

 

[ضوى العيون]

الله يسلمج يارب وان شاء الله تعجبج القصص الباجيه

 

[أحلى البنات]

يعطيج العافيه ع القصه وايد حلوه