حامل ودوام وما عندي خدامه .. أترك الدوام ؟؟

[حبيبة عز]

السلام عليكم ورحمة الله وبركاته ..

بنات عفيه نصحوني أنا مو عارفه شسوي ..

أقولكم قصتي بالضبط ..

أنا متزوجه صارلي سنتين وبعد تعب الحمد لله الله رزقني وحملت ..

أنا موظفة وبيتي بعيد عن الدوام .. ودوامي يتأخر لي 3 وأرد البيت 3 ونص ..

زوجي الحمد لله موظف بالبترول ومقتدر .. ودوامه شفتات .. وساكنه بشقه بروحي ..

مشكلتي يا بنات ..

1- أني ارد من الدوام والله حتى الصلاة مالي خلق أقوم أصليها ..

2- واهتمامي بنفسي وريلي صفر % ..

3- مالي خلق أطبخ لأني أرد تعبانه .. وصعبه كل يوم أكل من المطاعم ..

4- بيت أهلي بوادي وأنا بيتي بوادي يعني ماقدر أروحلهم بسيارتي ..

5- البيبي ناطرته من أول ما تزوجت .. ومابي يصير فيه شي لاسمح الله من هالتعب ..

6- بيتي يحتاج تنظيف وحتى لو أجيب خدامة بالساعات هم البيت يحتاج تنظيف يومي خفيف ..

7- مسؤولي يعصب إذا خذيت مرضيه أو تأخير ويسويلي سالفه .. ونفسيته خايسه

وأنا تعبت منه والله .. غثيث وعصبي .. ومايقدر أني حامل وتعبانه رغم أنه متزوج ويدري

شنو يعني المرا لما تحمل .. وأنا بلغته أني حامل .. :eh_s(14):

8- شهادتي دبلوم .. يعني الراتب مو ذاك الزود ولا المسمى ..

9- الطريج زحمه ويخوف من هالأوادم اللي تبتون والله صرت أخاف حيل من الحوداث ..


الاستشاره ..

ينات أنا ودي أستقيل من دوامي ليما أولد بالسلامه إن شاء الله ..

وأكبر البيبي شوي .. تالي أتوظف إن شاء الله ..

أدري أن الدوام مميزات من ناحية الراتب والاستقلالية .. بس بيتي وزوجي ونفسي والبيبي

كلهم علي حق ..

ريلي مسكين من زمان ما أكل طبخ بيت من ايدي .. ولا ملابسه زاهبه من غسيل وأوتي ..

وأنا بعد من أول ما حملت تقريباً قاعده عند أمي تجابلني وتهتم فيني ..

بس مو معقول تاركه بيتي جذي وريلي بروحه .. أحس هالشي غلط والله ..

لا طبخ ولا تنظيف ولا غسيل ولا ما يحزنون ؟؟


علماً بأن ريلي واعدني بمصروف يكون استقطاع بنك ..

وواعدني بخدامه بعد الولاده ..

وواعدني أني وقت أبي أرد أتوظف ماراح يكون عنده مانع .. لأني شايله مصروفي

ومساعدته بهالشي ..

وبس ..
​

 

[Dark SouL]

حياتي ..، روحي عند دكتورتج وسويلج تقرير طبي وودية الدوام

يعطونج شهرين بهالشهرين ارتاحي فيهم الصبح وجزئي شغلج خليه على دفعات يعني مثلا الغسيل مرة بالاسبوع و تنظيف دامكم للحين 2 يبيلج شغاله امج او تنظيف بالساعات خليهم ينظفون لج البيت وعطيهم المقسوم وخلهم يتوكلون على الله وبنفس الوقت جابلي ريلج ودلعيه

 

[ياغفور اغفر لي]

قدمي ع خادمة احسن لج

 

[ياغفور اغفر لي]

ع فكرة انتي نفس حالتي انا ادرس وحامل وماعندي خادمة والله يعين افكر اوقف قيدي

 

[! بــدويه وآآيــد !]

*



حبيبتي اهم شي صحتج والوظيفه سلاح الحين واغلب الي يحملون على طول يجيبون خدامه
انا اقول طلعي لج دمعتين جدام زوجج ان نفسيتج تعبت من الضغوطات الي عليج وخايفه على البيبي وخايفه من تقصيرج لايطول واوصلي معاه لحل يريحكم اثنينكم

الله يهون عليج

 

[اشكي]

يعني الحين الخدامه شي اساسي انا دوامي من 8الي 5ونص ومتزوجة وماافكر احط خدامه

اعتمدوا علي انفوسكم شوي الخدامه جايه من ديرتها ماتعرف حتى النظافه شوفوا الاجانب موظفين ومتزوجين وعيال وماعندهم خدم منسقين حياتهم ..

 

[Om_Ksha]

استقيلي ،، انا نفسج استقلت ومجابله بيتي وعيالي

بس انا عندي معاش وشايله نفسي ،، فعشان جذي مافرقت معاي وقت الاستقاله لانه لو بستقيل وانحرم من المعاش ماراح استقيل صج ريلي مايقصر بس لمن يكون بيدج المعاس غير ،، بس اذا ريلج راهي وقد كلمته يسويلج استقطاع شهري استقيلي ارتاحي شوي متا ماستقرت امورج ردي



وقبل كل هذا استخيري

 

[سفيره الكويت]

1- أني ارد من الدوام والله حتى الصلاة مالي خلق أقوم أصليها ..


_صليها ولو على كرسي لا تتركين صلاتج

2- واهتمامي بنفسي وريلي صفر % ..

_حاولي تبتسمين وماتبينين تعبج باسوء الظروف

3- مالي خلق أطبخ لأني أرد تعبانه .. وصعبه كل يوم أكل من المطاعم ..

_اشتري من الجمعيه الاشياء لي تتسخن بسرعه

4- بيت أهلي بوادي وأنا بيتي بوادي يعني ماقدر أروحلهم بسيارتي ..

اذا لهم سايق خل يوصلج الاكل

5- البيبي ناطرته من أول ما تزوجت .. ومابي يصير فيه شي لاسمح الله من هالتعب ..


اذا عندج اجازه قدمي عليها

6- بيتي يحتاج تنظيف وحتى لو أجيب خدامة بالساعات هم البيت يحتاج تنظيف يومي خفيف ..


_بلليل اشتغلي على البيت ونظفي

7- مسؤولي يعصب إذا خذيت مرضيه أو تأخير ويسويلي سالفه .. ونفسيته خايسه


_مرضيه مايقدر يتكلم من حقج وقولي له حامل وبيتنا بعيد عن الدوام شسوي يعني

وأنا تعبت منه والله .. غثيث وعصبي .. ومايقدر أني حامل وتعبانه رغم أنه متزوج ويدري

شنو يعني المرا لما تحمل .. وأنا بلغته أني حامل ..

8- شهادتي دبلوم .. يعني الراتب مو ذاك الزود ولا المسمى ..

_الدبلوم على الخامسه حلو والراتب متوسط

9- الطريج زحمه ويخوف من هالأوادم اللي تبتون والله صرت أخاف حيل من الحوداث ..

_ماعليه هذا رزقج باجر ببتقاعدين وبتتمنين انج للحين تداومين لول

 

[نشيج الروح]

من رأيي تركي الدوام حاليا ولاحقة عليه إن شات الله
وصلي استخارة بعد ؛))))

 

[shak!shoka]

استقيلي و اعتبريها راحه و فترة نقاهه

عقب الولاده انشالله حسني وضعج و حاولي تكملين ع شهادتج و توظفي بمكان احسن


استخيري


موفقه

 

[رحيل المرافيء]

قدمي اجازة بدون راتب حتى ولا استقيلي لين تولدين ويصير البيبي سنتين عمره ردي توظفي
ترى ريلجح اليوم ساكت باجر بيتحلطم
هاملته وهاملة البيت ولا طباخ ولاشي

 

[*peace*]

انسي تستقلين شيلي هالشي من مخج

الحمال تعب بس فتره وتعدي

تأقلمي حطيلج جدول ولاازم لاااااازم تجيبين لج خدامه الحين على الأقل تردين البيت تلاقين البيت يلق

الهدوم مغسوله ومكويه وحتى مقصصه لج مثلا الخضرا والبصل انتي بس تكملين الطبخه للغدا

ديري بالج تستقيلين اكبر غلط

يعني انتي الحين تزوجتي خلاص مو كل ماصارت لج مشكله قلتي بستقيل غلط

 

[" ام حمود "]

طلبي الحين ع الخدامه واهتمي بروحج وبيتج وريلج لاتهملين روحج ..
ولاا تستقيلين من دوامج

 

[Queenleo]

لو راده عالخدم في خدامات نص دوام
ايوولج البيت يساعدوونج

والاهتمام بنفسج خليلج يوم بالاسبووع خل نقول يكون ريلج طالع فيه للدوانيه استناسي فيه برووحج

غير جذي قدمي على اجازه من غير راتب
عدلي وضبطي امورج وشووفي طريقه ريلج هل تقدرين تعتمدين عليه وويشيل مصاريفج او لا


وبعدين قرري

 

[أم ميميتو]

حبيبتي انتي مبين عليج حابه تتركين الوظيفه بس تبين احد يشجعج على هالشي حبيبتي انتي عارفه ظروفج و انتي الي تعبانه و محتاسه المفروض انتي تقررين و تشوفين الي يريحج

 

[جوري 2007]

معقوله من تردين 3 ونص ماعندج وقت لي اليوم الثاني !! حبوبة نظمي وقتج

طبخي من الليل ،، اول ماتردين ناموا ساعه عقب تغدوا ،، استخدمي صحون وقفاش قراطيس عشان لا تغسلين وايد ،، دشي سبحي

وتزقرتي وعالسبع الا انتي على سنقة عشره شربوا شاي وقهوة وعقب قومي سويلج اي شغله ، غساله ، اوتي جم هدمه مو شرط

كل الهدوم ،، انتي ليلحين ماعندج بيبي وماعندج وقت اشلون لي صار عندج ياهل !!

اذا هالبرنامج مااعجبج ييبي خدامة وريحي روحج

 

[A_M_A]

حرآم تستقيلين ترى غيرج مو لآقي وظيفة

آنآ آقولج آخذي مجلس طبي لين مآتولدين بآلسلآمة

وغيري شقتج آذآ تقدرين آخذي شقة قريبة من بيت آهلج

عشآن بآجر لي ولدتي آن شآءآلله تحطين آلبيبي عند آمج وآذآ رديتي من دوآمج تآخذين غدآكم من آمج

عرفتي ترى آكثر آلحريم جذي وتقزر آن شآءآلله

وآلله يسهل عليج
..

 

[* Snow White *]

غريبه مايعطونج اجازه ولاده؟
الله يعينج، صلي استخاره وتوكلي باللي مرتاحه فيه

 

[NODA 2]

ممممممممممممممم ما ادري شكلج مو حابه الدوام
عالعموم فكري عدل اليوم ريلج راهي باجر عندكم الف مصرف يالله راح تلحقون اليهال ولا الخدامه ولا مصرف الببت ولا مصرفج انتي
عادي اخذي اجازه بدون راتب و ريحي لي اخر شهر واذا تبين تحسين بقيمة معاشج اخذي اجازه بدون راتب وشوفي شلون راح تتاقلمين كل جم يوم قاطه ويهج عند الريل عطني و عطني اذا تقبلتي كان بها بس اذا تحسستي خلج علي وظيفتج

وعالفكره ترا الدنيا جهاد مو كل شي تبينه بصير سهالات يعني كلها جم شهر حمال و خلاص

 

[@ DLOO3TAH@]

أنـا بصراحه أقول أهم شي راحتج ..