][ تمنيتك لي .. و صرت لغيري

[ضوى العيون]

و رسل لها لآخر مرة ..
بعض الغلا
ياخذ له أيام و يروح
و بعض الغلا
ياخذ له سنين ما راح
و بعض الغلا
متمكن داخل الروح
ما ينمحي لو جاه
نزاع الأرواح
و أنا غلاي ما يبي
شرح و وضوح
غلا حقيقي
دون تمثيل و مزاح ...

شجون .. كانت تكلمه بالتلفون ... و اهو يكلمها .. و أكيد انتوا عرفتوا انها اللي كلمته في البارت اللي قبل ..

ناصر طبعاً الفرحة مب شايلته و المكان مب واسعه ..
و شجون مب مصدقه انه ناصر يحبها ..

في بيت نعيمة .. هذي نعيمة وحدة شراية حجي .. تبين شي ينشر بدقيقة قولي لها ..
أم خالد : و الله شجون ما عليها قصور ..
أم شجون : الحمد لله
أم خالد : و أبو خالد يفكر انها تكون لخالد
أم شجون : هذي الساعة المباركة
نعيمة قلبها مشتعل .. متى يطلعون و تخبر أهل الفريج ..
أم خالد : يلا يا وخيتي انا أستأذن ..
نعيمة : في حفظ الله .. خخ حتى ما قالت لهم قعدوا تو الناس ..
أم شجون : مع السلامة .
نعيمة : الله يسلمك و يحييكم ..
أم خالد : وا قرادة حظنا .. احنا نتكلم عن خالد و شجون و يم من .. نعوم .. ألحين ما بتخلي أحد في الفريج ما بتقول له ..
أم شجون : و قردااه ..

في بيت نعيمة ..
نعيمة : السلام عليكم ..
الياهل : عليكم السلام ..
نعيمة : وين أمك ؟
الياهل : لحظة بناديها
نعيمة : هلا يا أم محمد
أم محمد : يا هلا فيج
نعيمة : ما دريتي ؟!
أم محمد : شنو ؟
نعيمة : شجون بخطبونها لخالد ولد أم خالد جارتنا
أم محمد : صج و الله ..
نعيمة : يلا عن اذنج .. لا تقولين لأحد
أم محمد : أكيد .. سرج في بير ..

و قامت أم محمد .. و قالت لجارتها و جارتها قالت لجارتها .. و من بيت لبيت و انتشرت السالفة .. في الفريج ..

 

[ضوى العيون]

في بيت أم خالد ..
أم شجون : يلا يا وخيتي..
أم خالد : وين ؟ تو الناس الساعة ثمان .. قعدي تعشي معانا ..
أم شجون : خيرج عامر يا وخيتي .. بروح البيت بعشي شجون و بخليها تنام ورانا دوام
أم خالد : في حفظ الله ..
راحت أم شجون و نادت شجون و نزلت ..
ناصر كان عند الباب ..
سلمت شجون على خالتها و طلعت ..
و لما طلعت عند الباب الا ناصر هناك ..
نزلت راسها و مشت ..
لكن ناصر ما يخليها .
رسل لها ..
ارسل حلو .. تستقبل أحلى ..

اهي صدته و مشت ..
راح وراهم
ناصر : خالتي وين رايحة ؟؟ تو الناس ..
أم شجون : يا وليدي ورانا دوام..
ناصر : ااي بعض الناس وراهم مدرسة و ينامون مثل الدياي .. نوم العوافي
أم شجون : و الله بنيتي مو دياية .. حشاها .. انت الدياية .. كاملة و الكامل الله ..
أم ناصر : حشا من قال اهي دياية
أم شجون : عن الهذرة الزايدة اللي ما وراها منفعة .. يلا مع السلامة
ناصر : في أمان الكريم ..

راحوا شجون و امها بيتهم .. تعشت و الساعة تسع و نص نامت ..
الحلقة السادسة عشر من ][ تمنيتك لي و صرت لـ غيري ][

الساعة 5.30 صباحاً
أم شجون : قمتي لو لا ؟؟
شجون : ها .. قمت يا يمة قمت .. عيونها النومة للحين فيها .. ويها الله لا يوريكم اياه .. و لا أزيدكم من الشعر بيت .. فيها انفلونزا .. و هذا اللي زاد الطين بله ..
أم شجون : انا بروح لها .. هذي بتأخرنا ..
صعدت لها فوق ..
أم شجون : يه .. شفيج لونج خاطف ..
شجون : و الله ما أدري .. ما قعدت الا انا بهالحال ..
خذت أم شجون تلفونها و أخذت إذن من المدرسة انها ما بتيي اليوم لأنه بنتها مريضة ..
و أخذت شجون لبستها عباتها و شالها و اخذتها المستشفى ..

 

[ضوى العيون]

راحت دايركت الطوارئ مع انه شي ما يسوى خخخ
لو سمحتي .. يا الشيخة
الممرضة : نعم أختي ..
أم شجون : ممكن تدخليني ألحين ..
الممرضة : أوكي .. تفضلي على غرفة 8
أم شجون : مشكوورة ..
دخلت ام شجون على الدكتورة أثير ..
كان شكل شجون مأساة مب قادرة حتى تشيل عمرها .. و ويها مصفر .. و شاحب .. لونها مخطوف و حيويتها .. رايحة عليها ..
د.أثير : نعم أختي .. شفيها ؟؟
أم شجون : و الله ما أدري .. ما قعدت الصبح عشان تروح المدرسة الا حالها جذي ..
د.أثير : حالتها عادية .. فيروس هاب هالأيام .. بس يعدي .. يعني بنخليها يومين ثلاثة في المستشفى .. و راح نعطيها مضادات .. تقدرين تروحين ألحين .. و راح تكون في غرفة 12 .. لحالها في الغرفة ..
أم شجون : ما أقدر أخلي بنيتي
د.أثير : بس يا الشيخة ما يصير نخليج .. الفيروس ينتشر بسرعة .. و أنصحج تقطين الأشياء اللي لمستهم أمس و اذا يتغسلون حطي فيهم ديتول ..
ام شجون : اهتموا فيها .. أطالع الله ثم أطالعها ..
د.أثير : لا تحاتين .. هذا واجبنا ..
أم شجون : مع السلامة ..
د.أثير : الله يسلمج ..
شجون و صوتها شوي بايح : يمه
أم شجون: عيوني المركبة
شجون : يبي لي أغراض .. و أبي كاكو جالكسي بالكراميل
أم شجون : ههههه .. إن شاء الله .. يلا مع السلامة ..
أخذوا شجون و نقلوها لغرفة 12 .. و ركبو عليها مضاد ..

شجون قاعده لحالها بالغرفه لا حس و لا خبر .. زهقانه حيل ..قامت تدور يمين وشمال تدور شي تتسلى فيه ماكو ..
شجون : أووووووووووووووه ملل ..
شجون الملل ضارب التوب عندها ..
عشان جذي قررت تدز لبراءة مسج عشان ييون يزورونها ..

عند براءة... كانت مو رايحة المدرسة.. خخ ملاانة ..
دق التلفون على انه في مسج ..
Hey man …you have got a massage ..
براءة أخذت التلفون و قرأته ..
برااءة . .. انا في المستشفى ألحين .. بخلوني يومين أو ثلاثة .. تعالي لي .. غرفة 12 ..

راحت تزهب ..

و عند شجون
أوووووووووو .. براءة في المدرسة .. يا ربي .. شسوي .. أوووف..

و لكن عند براءة ..
براءة راحت لـ خالد ... بس ما لقته .. و ناصر في الجامعة ..
شتسوي ..

 

[ضوى العيون]

توها بتصعد الدرج . الا... ناصر في ويها ..
براءة : نوييصر فديتك .. أخوي الغالي شلونك ؟؟
ناصر : الله .. شهالبهارات .. خلصيني شتبين ؟؟
براءة : ههه .. يا حليلك فاهمني ..
ناصر: انا ماشي
كان ناصر لابس بدلة رسمية .. رايح الكافيه لربعه ليما تيي الساعة 2.00 و لكن ألحين الساعة 7.45 ..
براءة : لااااااا .. وين بترووح ؟؟
ناصر : الكافيه ..
براءة : فديتك قطني المستشفى .. بس قطني و بشوف أحد يرجعني
ناصر استغرب : شصاير بعد .. من اللي في المستشفى ؟؟!!
براءة : هاك .. اقرأ المسج ..
ناصر : برااءة . .. انا في المستشفى ألحين .. بخلوني يومين أو ثلاثة .. تعالي لي .. غرفة 12 ..
شجون ..
ناصر : شنووو ؟؟!! شجون في المستشفى ؟!؟
طبعاً الولد طار عقله .. شفيها شجون ..
براءة : بتوديني لو لأ ..
ناصر : لا ..
كان يبيها تترجاه .. آه منه ..
براءة : و اللي يسلمك .. دخيلك ...
ناصر : كسرتي خاطري بوديج ..
و اتصل لربعه و قال لهم مشغول شوي ..
تشققت براءة ...
ناصر : حاسبي بس.. شلوشن "لزاق " ما عندي جان ألصقج ..
ركب ناصر السيارة و براءة أكيد معاه و بسرعة وصلوا المستشفى ....
راح ناصر و طق الباب ..اما شجون تحسبها الممرضة .. قاعدة لا ستر و لا شي خخوو ..
دخل ناصر ..
و بسرعة طلع ..
ناصر : لبسي شي يا شجون .. انا دااخل ..
شجون : أوو ناصر .. شدراك اني هني ..
ناصر : برااءة ..
شجون : شنوو ؟؟!!
ناصر : ما راحت المدرسة العيارة ..
شجون : خخخ .. ادخل ..
و دخلت و راه براءة ..
براءة بصوت خافت لناصر : ما يبنا حتى ورد لها ..
ناصر : أووو .. دقيقة و انا راد ..
شجون : على وين ؟؟
ناصر : دقيقة و انا راد
راح ناصر لـ محل ورد موجود في المستشفى .. و شرى باقة ورد فيها ورد أبيض و أصفر .. و رد لـ شجون ..
طق ناصر الباب و دخل ..
و حط الباقة على الطاولة ..
ناصر : خطاج السوء..
طبعاً شجون ما تدري شتقول .. خخو فاكتفت بابتسامة تجنن ..

شناطر .. ايلس .. هذا رد شجون ..
ناصر : الا ماقلتي .. شيابج المستشفى و ليش لونج مخطوف و ويهج شاحب .. مصفر ..
شجون : و الله ما صحيت من النوم الا انا بهالحال يقولون انفلونزا ..

 

[ضوى العيون]

ناصر : يعني من الجو ؟؟
شجون : الظاهر جذي ..
براءة استأذنت بتشوف أمها .. لانها نست تخبرها ..
طلعت براءة برع .. و اتصلت لبيتهم ..
ميلو : ألوو ..
براءة : وين أمي ؟؟
ميلو : في بيت نعيمة ..
براءة : روحي لها و قولي ان انا و ناصر رحنا نزور شجون في المستشفى ..
و راحت بعد تتصل لخالتها أم شجون ..

ناصر : شجون ..
شجون : نعم ؟؟
ناصر : ليش ما دزيتي لي مسج
الحلقة السابعة عشر من ][ تمنيتك لي و صرت لـ غيري ][

ناصر : شجون ..
شجون : نعم ؟؟
ناصر : ليش ما دزيتي لي مسج
شجون : قلت انت في الجامعة << و أصلاً اهي ما تبي تدز ..
ناصر : اهااا
و دخلت براءة ...
و و راها الممرضة
الممرضة : شتسوون هني ؟؟؟؟؟
ناصر ك مثل ما تشوفين .. زيارة
الممرضة : شنو زيارة ؟ ممنوع أحد يدخل .. المرض معدي
ناصر : شنووو ؟ ؟ شهالمرض بعد
الممرضة : فيروس هاب .. من الجو
شجون : شتنطرون .. يلا مع السلامة .. لكن ما في حل تخلينهم يقعدون معاي الممرضة : خل يلبسون أشياء معقمة .. راح أيبها .. بس لحظة شوي .. بحط لج مضاد يديد ..
شجون : مشكوورة ..
حطت الممرضة المضاد في السيلان .. و راحت تيب لهم ثياب يلبسونها .. عشان لا ينتقل لهم المرض
طبعاً لما عرفوا انه يعدي ماتوا من الخوف ..
و بعد نصف ساعة ردوا بيتهم ..
و لكن ما يوا الا نعيمة و أمهم يتناجرون ..
و سبب هالنجرة ..
انه نعيمو الملقوفة نشرت خبر خطوبة شجون لخالد .. و بعده ما صار شي ..
أم خالد : و أحد قال لج تنشرين هالخبر ؟؟
نعيمة : و الله انتوا اللي قلتوا
و يدخل ناصر ..
نعيمة : انتوا اللي قلتوا بتخطبون شجون لخالد
نزل الخبر مثل الصاعقة على راس ناصر .. و براءة ما صدقت اللي ينقال ..
أم خالد : تدرين انه خالد للحين صغير .. عالأقل يصير عمره 22 .. اهو توه 20 ..
نعيمة : و انا شكو ؟؟!!
أم خالد : حسبي الله عليج و نعم الوكيل .. شنسوي ألحين
ناصر : نعيمو .. طلعي برع و اذا شفتج يم البيت بحش ريلج حش ..

 

[ضوى العيون]

أم خالد : يمه ناصر !! .. من متى و انت هني ؟؟!!
ناصر : سمعت كل شي .. لا تحاتين ما بقول لخالد ..
أم خالد : ااي يا وليدي عفية ..
و لكن ناصر ما قال لخالد .. و براءة بس سمعت الكلام مني .. راحت لخالد و اتصلت فيه و قالت له .. و طبعاً خالد معصب ..
براءة : خالد عفيه لاتقول لهم اني قلت لك ..
خالد : يلا فارجي فاضي لج ..
براءة : بل .. شهذا!!

البيت منقلب فوق تحت .. براءة زادت الطين بلة ..

دخل خالد معصب و باجي شوي يكفخ الأولي و التالي ..
خالد : و من قال لكم اني ابي شجون ؟؟
تقررون على كيفكم .. انا ما ابي شجون ... هذا مستقبلي و مستحيل احد يلعب فيه .. و اذا سمعت أحد يتككلم أو يحاول انه يخليني أتقبل هالوضع .. يا ويله يا سواد ليله ..
ناصر في باله .. شدراه .. أكيد براءة ..
راح لبراءة الحديقة و اخذها من شعرها و وداها غرفتها من الباب الخلفي ..
ناصر : انتيبأي حق تقولين له ..
براءة : و الله لازم يدري باللي يخططون له عايلتنا .. اهم يبون الشي اللي يريحهم و يسعدهم لكن اهو .. قط مرة فكروا في شي يسعدنا و ما وراه مصلحتهم .. و هذا الزواج ما راح يتم الا بموافقة خالد .. و ادري اذا وصل الأمر لأبوي .. مستحيل ما يتم .. و راح يبنون سعادتهم على تعاسة خالد .. و مستحيل الأمر هذا يصير لأخوي ..
ناصر فكر في كلام براءة زين : صح كلامج بس ما كان المفروض تقولين له .. و هذي أول و آخر مرة تصيرين وكالة أنباء .. و أضنج تعرفيني عدل ..
أخذ الباب من القهر و صكاه بقوة و طلع .. و الشرار يطلع من عينه ..
براءة : ما أدري أقول لـ شجون ..
لا يا معودة .. ناوية ناصر يعطيني طراقات عمري ما راح أنساها أقول لها .. مالت علي صج ..


عند شجون .. المكان هادئ ..
و لكن قطع هالهدوء صوت التلفون .. و كانت مخلية نغمتها عصافير مع موسيقى كلاسيكية ..
شجون : ألو ..
شوق : يا هلا .. عاش من سمع هالصوت ..
شجون : عاشت أيامج
شوق : عسى ما شر .. ليش ما يتي المدرسة اليوم ؟؟
شجون : ااي .. انا ألحين في المستشفى .. بنام هني يومين أو ثلاثة ..

شوق : أفااا و لا قلتي .. ليش شفيج ؟؟
شجون : و الله راح عن بالي .. فيني انفلونزا معدية..
شوق : اهاا .. من الجو .. الحين بييج .. يلا باي
شجون : تسلمين و الله ... بس قبل ما تدخلين الغرفة بيعطونج شي تلبسينه .. اخذي من عند الممرضات. .
شوق : أوكي .. فمان الله ..
شجون : فمان الكريم ..

 

[ضوى العيون]

الحلقة الثامنة عشر من ][ تمنيتك لي و صرت لـ غيري ][

مستملة و الملل موصل حده عندها .. ما تدري ان الحال معتفس في بيت خالها " ابو خالد " و بيتهم .. ام شجون من عرفت بـ الخبر .. عصبت بس هم فرحت .. وين بـ تلقى احسن من خالد ..

لكن لـ الحين ما صار شي .. ما يقدرون يربطون اثنين مو قابلين بعض .. حتى لو كان هذا الشي يسعد العايلتين .. لكن يتعس طرفين و يخلي حياتهم أشبه بـ الجحيم ..

طق طق طق .. >> لازم مؤثرات صوتيه ^_^

شجون تلبس شيلتها .. تعدل قعدتها ..

بـ صوت تعبان : تفضل ..

قبل ما تشوف الي يطق الباب .. شافت باقة ورد من كل الألوان .. شرايط حمرة متدلية منها .. مجتمعة بـ تسلسل في يد شوق رفيجة شجون .. تدخل و تخلي الباقة ع السرير .. تحضن شجون و تبوس راسها ..

شوق : ما تشوفين شر الغالية ..
تبتسم : الشر ما اييج ..

بعدها دخلت ام شوق .. ابتسامة خافتة في بوزها .. لبس الوقاية المعقم الاخضر على عباتها .. تتقرب منها تسلم عليها و تبوس راسها..

ام شوق : في العدو و لا فيج ..

اكتفت بـ ابتسامة زادت حلاتها .. قعدت شوق ع السرير يم شجون ..

شوق : أخبارج الحين .. عساج احسن ؟!
شجون : أَي احسن .. زهقانة و امي مدري فيها وين .. ما يات لـ الحين ..
شوق : ما عليه .. خفي شوي على امج .. خليها ترتاح ..
شجون : لا موب هذا الموضوع .. خايفة صاير شي .. حتى خالتي ام خالد ما يات هني ..
شوق : شبلاج يا شجون تحملين الشي فوق طاقته .. موب بـ العادة شكله المرض مأثر عليج ..

ام شوق : يلا يا بنيتي نمشي ..

شجون : شنو تمشون .. ما يلستوا شي ..
ام شوق : لا ما يحتاي .. ابو محمد " زوج ام شوق " في البيت لـ حاله ..
شوق : يلا شجون مع السلامة ..
شجون : الله يسلمج ..
ام شوق : مع السلامة بنيتي ..
شجون : الله يسلمج خالتي ..

طلعوا من عندها .. رمت راسها بـ ثقل ع المخدة .. حضنت اللحاف و نامت ..

 

[ضوى العيون]

بعد 3 أيــام ..

في سيارته عند باب بيتهم .. شعره البني نازل على ويهه .. مرفع ريل و مخليها ع الكرسي .. ميودنها بـ ايده .. و منزل راسه عليها .. فكره موب معااه .. و الدنيا يحسها ظلمة ..

" و الله لو القاج الحين يا نعوم لـ اكسر راسج .. "

رفع راسه .. سنداااه ع الكرسي و تنهد تنهييدة طوييلة .. يا ليتني ما سمعت بكل هذاا .. خوفي موب عليّ .. على اخوي ناصر و وقع الصدمة على راسه .. ادري فيها صدمة ما هي بـ هيينة .. و خصوصا لـ ناصر .. الي اعرفه لما يحب يتوج محبته بـ الوفا و الاخلاص .. و وفا و أخلاص اخوي ماهوب شيٍ سهل يتمسخر عليه .. شيٍ ما تهزه عواصف و لا زلازل ..

بس يا خسارة يا شجون .. تمنيتج لي و صرتين لـ غيري .. عااد لـ من لـ نااصر اخوي .. الشخص الي عمري ما توقعت انه ينجذب اتجااه شجون .. البنت الي ما يواطنها .. و يتجنب المكان الي تصير فيه ..

" الله يوفقهم .. "

طق طق .. احد يطق دريشة سيارة خالد .. نزلها .. يشوف هذا الويه الي ما تمنى يشوفه .. أصفر .. بس تشع منه ابتسامة صغيرة ..

ــــــــ

و عند هني يخلص الجزء ..
انتضرونا في الجزء الياي ,,

 

[ضوى العيون]

و الحلقة الاخيرة من ][ تمنيتك لي و صرت لـ غيري ][
الحلقة الثامنة عشر و الأخيرة من ][ تمنيتك لي و صرت لـ غيري ][

بعد 4 ايام ..

طق طق .. احد يطق دريشة سيارة خالد .. نزلها .. يشوف هذا الويه الي ما تمنى يشوفه .. أصفر .. بس تشع منه ابتسامة صغيرة ..

فج عينه .. يطالعها و كأنه يبي يتأكد ..
شــجــوون ..!!!

شوو تسوين هني و ليش ياية و بـ هذه اللحظة بـ الذات ..

ابتسم رغم غصته ..

خالد : أهلاً شجون ..
تبتسم : شلونك خالد ؟!
خالد : الحمدلله بخير .. انتي شلونج سمعت كنتين في المستشفى ..
شجون : ايه افلونزا ..
خالد : و الحينه عساج طيبة ..
شجون : ايه احسن من قبل .. حتى ما تفكر تنزل تكلمني و انت في السيارة .. شوو الناس بـ يقولون علينا ..

خالد في خاطره .. شو بـ يقولون .. بـ يقولون تكلم خطيبها برع يا شجون .. ما تدرين انتي بـ شي .. ما تدرين بـ العاصفة الي سببتينها و انتي ماتدرين ..

نزل .. صك السيارة و قفلها ..

شجون : شفيك خالد تعبان .. لا تقول افلونزا بعد ..
خالد : لا موب افلونزا .. خلاص شجون امج تناديج .. روحي بيتكم الحين .. اكيد تبيج في موضوع ..
تعقد حواجبها : موضوع شنو ؟؟؟!
يتنهد : اذا رحتين بـ تعرفين ..

تطالعه بـ نضرة .. قبل ما تمشي اكتفت بـ " مع السلامة خالد "

و كأنها فاهمة ان بعد هذا ما بـ يجوز لها تكلمه و هي في ذمة ريال ..

صدق الكل .. ام خالد كلمت ام شجون ..

" ناصر يبي شجون خويتي ..

تبتسم بعدها و هي تترقب الاجابة ..

ام شجون : هذه الساعة المباركة ناصر ريال و النعم فيه .. بس نشاور شجون و نرد عليج خبر بعد يومين "

بدون تفكير شجون تواافق ..

 

[ضوى العيون]

ام شجون : هَـو شبلاج يا بنية .. الريال ما بـ يطير .. الناس يستحون و يقولون نفكر و انتي موافقة ع الطاير ..
تناقز من الفرحة : شوو ع الطاير يمه .. ناصر ريال ما يحتاي افكر ..
تطالعها بـ نص عين : مبروك عيل ..

تحضن امها و تحبها على راسها ..

\
\
\

تصدقين يا شجوون و الله موب مصدق انتي لي .. الي تمنيتها لي صارت ملكي و ما ضاعت .. موب مصدق ..

تبتسم بـ خجل و تنزل راسها .. تسمع كلماته الي اعتادت عليها و السكوت يعم المكان .. تحمد ربها الف مرة ..

ناصر : يلا يا شجون .. قوليها .. قولي انج تحبيني و ابد ما تتخلين عني قولي يا شجون ..

تنزل راسها ..
ترد و خدودها متوردين من الخجل ..

بـ دلع : أووه ناصر .. صار لنا 4 أشهر متزوجين و انا اصبح عليك و امسي بـ هـ الكلمة ..

يمسك ايدها و يعص عليه .. يبتسم و يرفع راس شجون بـ ايده ..

ناصر : لو تعيدينها من اليوم لـ بكرة .. و الله ما مل منها ..
شجون : .....

يقرصها في خدها ..

ناصر : يلا عاد بلا دلع شجون ..
شجون : احبك و الله احبك و احبك و احبك ..
ناصر : اييه بعد ..
شجون : نــــــاصـــر ..
ناصر : بس خلاص سكتنا ..

يسمع طق ع الباب ..

ناصر : هذه اكيد براءة ..
شجون : بـ اقوم اشوفها ..

يقعدها مكانها .. و يبتسم لها ..

ناصر : لا ما تسوين شي .. اخاف ع الياهل ..
تبرطم أونها زعلانة : أفاا تخاف ع الياهل و ما تخاف علي انا ..

يلمها .. و يقول ..

ناصر : فدييتج شجون .. و الله انج راس مالي في هـ الدنيا ..

صوت من ورى الباب ..

" بسكم غزل في بعض و نزلوا الغذى بـ يبرد "

يقوم ناصر بسرعة ..

 

[ضوى العيون]

ناصر : هذه اكيد براءة .. ما تيوز ..

توقف شجون .. و تروح يمه .. تمسكه من ذراعه و تبتسم ابتسامة جنان ..

شجون : يلا عاد .. كم شهر و ياخذها عبد العزيز ..
ناصر : ايه و الله .. الله يخليه بـ يفكنا من شرها ..
شجون : فدييتها و الله ..
ناصر : تصدقين ما توقعت ان ملاك بـ احن عليها هـ الكثر ..
شجون : الله يوفقها ان شاء الله ..

" ملاك .. تزوجت جاسم ( الكل يعرفه ) سافرت معاه لندن .. يكمل دراسته هناك .. "

/
/
/

تركض شجون ورى ولدها " بدر " ..

شجون : و الله العظيم حلفت يا بدر .. ان ما سمعت الكلام ماشي ملاهي اليوم ..

يوقف بسرعة .. و يرمي اللعبة من يده ..

تتقرب شجون و هي تعباانة حييل من هـ الولد .. رفعت اللعبة و هي تنادي ..

شجون : ســـمـــر .. سمر حبيبتي تعالي ..

تطلع سمر بنت خالد من الغرفة .. تركض بسرعة لـ لعبتها .. و تحضنها .. تطالع بدر و تخزر عليه ..

سمر : وع ما احبك انااا ..

و تطلع له لسانها ..

ينفخ ويهه اونه عصب و يركض ورى سمر .. سمر تصييح و تصرخ ..

سمر : مااامااااا .. ثووفيه بـ يطقنيي بدوور ..

تطلع شوق من الغرفة .. تحمل سمر بين ايدها ..

شوق : أووه بدر شو فيك ع بنيتي ..
بدر : بـ اطقها لانها تطقني ..
سمر : تذاااااب .. انا اسلا ما طقيته .. هو بث يطقني ..

تتقرب منهم شجون و هي تضحك ..

شجون : ما عليج منهم شوق ..
شوق : طفرني وليدج ..

تنزل لـ حد مستوى بدر ..

شجون : ماشي ملاهي ..
يصيح : انــــــا ..... ما ....... ثويت ..... ثي .......

يدخل في هذه اللحظة خالد .. يركض له بدر ..

بدر : ثـــوفها ثجون ما بـ توديني الملاهي ..

" عنبووه يا ولد قول ماما "

بدر : ما احبك انا .. ما توديني الملاهي ..

يتقرب ناصر منه .. يحمله و يرفه فوق ..

ناصر : و منو قال ..

بدر يأشر ع شجون ..

بدر : ثجون ..
ناصر : قول ماما ..
بدر : مانيب قايل ..
ناصر : عيل ماشي ملاهي اليوم ..
بدر : انزين .. مــــــــــــامــــــــــــا ..
شجون + شوق : ههههههههههههههههههههههه

 

[ضوى العيون]

شجون : يا عيون ماما انتَ ..
شوق : خالد متى بـ نروح الملاهي ..
يبتسم : اذا يات براءة و ملاك ..
شجون : بـ اييون معانا ..
خالد : ايه بـ اييون ..
شوق : عيل نتزهـب ..
ناصر : ايه تزهبوا ..
خالد : اييييييه .. حرمتي كلمتني انا موب انت ..
ناصر : مثل ما تكلم حرمتي ..

يضحكون كلهم ويا بعض .. تدخل منار بنت براءة .. و بعدها حميدان ولد ملاك .. يدخلون ثنتينهن " ملاك و براءة " .. و وراهم عبد العزيز و جاسم ..

الــــنــــهــــايـــــة

و أجتــمع شــمــل العوائل .. كيف كان الحب في طيات الماضي و هو الان معشعش في أحضان الحاضــر ..

ناصر و شجون .. من كراهية الى حب .. و قد توج حبهم بـ الزواج و عصفور يرفرف في سمائهم ..

خالد .. ذا القلب الابيض .. ابهر الجميع بـ طيبته .. امحى اسم شجون في قائمة قلبه و اسكنها في العائلة .. فـ قد وفق في الاختيار .. " شوق و ابنته سمر" هن من تربعن في عرش قلبه الان ..

ملاك و جاسم .. براءة و عبد العزيز .. جمعهم الوفاق .. الله يوفقهم ..!! \

 

[marioom]

حللللللللللللللللللوة القصه وايد

شكلي قريتها متاخر بس توني دريت عنها لول

يعطييج العافيه عسولة

 

[ضوى العيون]

يالله مو مشكله المهم عجبتج وان شاء الله تعجبج القصص للي بعدها

 

[عشق]

يومين وانا اقرا فيها هههههههههههههه

وايد حلووه يسلموو

 

[ضوى العيون]

الله يسلمج ويخليج ان شاء الله
وان شاء الله القصص الباجيه تعجبج

 

[مـ سهله ـو]

حلوه القصه يعطييييييييييييييييييييييييييييييج العافيه