تعالو اقروا معاي ذكرياتي مع التخرج

[ReMaaas^MLS]

سلام عليكم ورحمة الله وبركاته

حبايبي حبيت اكتب لكم قصتي ويومياتي مع التخرج من اول يوم دخلت فيه الجامعه للتخرج يمكن ماراح اذكر كل شي بتفصيل بس في شغلات محفوره في بالي وانشاء الله تنال اعجابكم واشوف تفاعلكم معاي
يالله نبتدي

بسم الله الرحمن الرحيم

كل انسان له حلم واهذاف وطموحات يحب يحققه بحياته بكل شي بحياة الزوجيه او علميه او العمليه، انا كنت بنت طموحه ما كنت افكر الا بدراستي وكان طموحي اني احقق شي بحياتي يرضيني ويرضي غروري وارفع راسي جدام الكل والحمد الله من ثانويه و انا متفوقه وكنت احصل على شهادات تقدير من المدرسه وخارجها والحمد الله امي وابوي كانوا وايد مفتخرين فيني وتقريبا كنت اشطر وحده بمستوى العايله، المهم عدت الاربع سنين من الثانويه درست فيها بكل جهد وتعب علشان احافظ على معدلي واقدر ادش أي كليه اختارها والحمد الله حققت هالشي ومعدلي كان من المتفوقين واخترت الكليه الي ابيها بقبول فوري وكانت فرحتي ما توصف وحسيت اني نص المشوار خلص وباقي نص الثاني والي انا راح اكون مسؤوله عنه واهو الي راح يبرزني حق المجتمع والي راح اقدم فيه شي ينفع وطني وشعبي ونفسي.

يوم قبل بداية الدوام
في هذا اليوم كان لي وايد صعب وواحس اني مو على بعضي شعور غريب حسيت فيه ماني عارفه شلون اقوله لكم خوف على وناسه على توتر وايد اشياء خرابيط داشه بعضها وهذا الشعور خلاني اتوتر وطول اليوم افكر شلون راح ابلش دراستي وشلون راح يكون دوامي، المهم حاولت اهدي نفسي تعوذت من البليس وقمت اجهز اغراضي حق الجامعه فطلعت لي البدله الي راح البسها وجهزت لي نوته وقلم واحد ورتبت اغراضي داخل الجنطه وحطيت القلم داخل الجنطه قلت فشله عيب اخذ معي مقلمه وانا بالجامعه خخخخخخخ ( كنت صغيره وما افهم  ) المهم تعشيت وقعدت مع الاهل شوي ولا اشوف صارت الساعه 9 ولا اخترع قلت امبيه ما بقى شي لازم اروح اتسبح و واروح انام علشان باجر وراي قعده من الصبح، المهم بعد ما تحممت رحت انام.. ياربي اشفيني مافيني نوم الافكار كله ماخذتني وامخليتني متوتره حدي تدرون شنو كنت افكر وقتها؟؟
كنت اقول حق نفسي امبيه شلون الجامعه وشلون طريقتهم يا ترا شلون راح القى القاعه وشلون راح ادرس المواد كلها بانجيليزي وكل دكاتره ما يتحجون عربي ياويلي اخاف ما اقدر وافشل عمري  وكنت اقول شلوون بعيش بجو الاختلاط يعني اروح المحاضره واشوف شباب معانا واقعد اشرح جدامهم ولا يسالني دكتور واجاوب غلط امبيه اكيد بيضحكون علي والله فشله و لا يصير موقف محرج جدامهم شلون واي حدي مخنوقه
المهم ما قدرت انام وصرت اتقلب اكثر من ساعتين ونص ولا بعد اشوي اقوم وقلت اقعد مع امي شوي يمكن ارتاح وانا قايمه ولا تطلع مرت اخوي بويهي ولا اخترع قالت لي لا تخافين هذي انا حابه اطمن عليج امج قالت لي انج خايفه من باجر قلت أي حدي مخترعه ولا تقعد وتهديني واتقولي ميخالف عادي كلنا رحنا الجامعه بس اول اسبوع بعدين يصير كل شي عادي.. المهم ما قصرت معاي خلتني اهدا شوي والحمد الله تعوذت من بليس ونمت مستعده حق باجر
للحديث بقيه..
اذا شفت تفاعلكم معاي::ggdw:[/SIZE]

 

[eng.mimi]

وناسه انا اول وحده ارد :ggdw:

موضوعج شكله حده مشوق لانج بتتكلمين عن احلى مرحله بالعمر

ان ودي ارجع لو يوم واحد

اخخخخخخييي على ايام الشباب​

:0bee2e8d89:

 

[ReMaaas^MLS]

مشكوره حبيبتي
اشدعوه بنات 15 وحده داشه وماكو الا تعليق واحد !!!!!!!!!!؟؟؟
يبين ما يعجبكم جذي مواضيع يبين تحبون سوالف الحب والخطوبه اكثر

 

[ReMaaas^MLS]

اول يوم بالجامعه

فتحت عيني على المنبه ولا اشوف الساعه 6 ولا افز و اروح تكرمون الحمام اغسل والبس عدساتي، ودهنت عمري بالكريم والحمايه ابويهي من الشمس واقعد البس كان وقتها هابين بموديل البنجابي اذا تذكرونه؟ كان بنطلون والبلوزه طويله للركب كان لونهم ابيض وكان في نقشه بسيطه عالطرف بلون البيج كان وايد ناعم بعدين قمت حطيتلي شويت ميكاب يعني كحل داخل العين وقلوز خفيف ومسكره والبس حجابي كان لونه بيج وكان موديل القط اذا تتذكرونه؟ ولبست الصندل كان بلون البيج والبني وكان يعورني بس قلت ميخالف تحملي شوي علشان هاليوم كنت هبله اذي نفسي وريولي علشان شكلي جدام الناس لووووول

وقتها كنت مو كامله 18 ما كنت اسوق واخوي قال بوصلني ويكون معاي اليوم بعلمني شلون اروح وين المباني الكليه وكنت مرتاحه من هالشي لانه في احد معاي اول ما خلصت ولا اخوي يناديني ويقولي جمااااااانه ( اسمي المستعار) يالله تاخرنا ترا زحمه بطريج

و في هذي لحظه حسيت ان الوقت وقف وقاعده اقول حق نفسي يالله جمانه صار وقتها الي كنتي تنطرينه من 4 سنين كوني قويه واستعدي حق حياة جديده تختلف حق العالم ثانويه وعالم طفوله الحين بدشين حق عالم غامض تنطرين فيه المفاجئات كوني قدها ولا تخافين وفيها مستقبلج الي راح ينطرج يالله جمانه.. يالله جمانه

حسيت هالكلمات دور بالي حتى لما ركبت السياره حسيت انه ترن باذوني وكان اخوي يسولف معاي بس ما اذكر شي لانه بالي مشغول بالعالم الي ناطرني بس بلحضه وحده ولا اخوي يناديني ويمسك ايدي يقول جمانه انتي معاي ؟ ولا ارد اقول نعم ولا يقولي نعم لا شكلج كلش مو معاي اقول جمانه بقولج جم كلمه حطيها بالج ولا تنسينها قلت نعم اخوي ( بالعلم هذا اخوي فواز اعز اخو عندي بين اخواني كلهم احبه وايد وايد واكثر واحد اتهاوش وياه بالبيت بس اهو الوحيد الي يعتبر قريب من عمري واهو اول انسان الجأ حقه واذا صادفتني أي مشكله اروح اقوله وياعمري ماكان يقصر معاي الله يخليه لي ولا يحرمني منه انشاءالله )

ولا يقولي سمعي ديري بالج هناك وحطي بالج عدل ترا الجامعه غير عن الثانويه مو تثقين بأي احد وترا البنت سمعتها قبل كل شي والكويت صغيره ومانبي نسمع عنج الا كل خير واحنا واثقين منج بس حطي بالج من الشباب والبنات مو يقصون عليج بشي وشدي حيلج بدراستي و أي شي بغيتي قوليلي ولا تترددين اوكي ولا ارد واقوله انشاء الله اخوي ما راح تسمع عني الا كل خير

وصلنا الكليه وكانت صدمه لي من المباني توقعت الجامعه كشخه بس لما شفت المبنى صار فيني خيبت امل بعدين رحت المحاضره ولا دكتوره تعتذر منا وتقول ماكو محاضره تعالو عقب باجر راح يبتدي الكلاس واحنا خو ما صدقنا بسرعه طلعنا وعطتنا اوراق فيها طلباتها من الكتب هالكورس فكان عندي وقت للمحاضره ثانيه ولا انروح مكتبة الشويخ ونشتري الكتب وبعدين رحت محاضرتي ثانيه الي بالخالديه ولا اشوه ماكان في دوام ولا ارد البيت وانا مستانسه اقول وناسه عكس ثانويه لوووووووووووول.. مادري انهم بطلعون@@ عيوني بعدين

رديت البيت وريولي حده تعورني بس انا استاهل تغديت وقعدت ويا امي وقلت شنو صار معانا وبعدين طليت عالكتب شوي الصراحه اخترعت منها وقلت الله يستر يارب والحمد الله نمت امبجر تقريبا كانت قبل 9 لانه قبلها ما نمت عدل

للحديث بقيه..

 

[وردة العاشقq8ya]

كملييييييييييييييييييييييييييييييي

 

[وردة العاشقq8ya]

والله يخليلج اخووووووج انشالله

 

[اريام القحطاني]

روعه

اللهـ يعطيكـ العافيهـ

 

[حور العيون]

كملــــــــــــــــــــــــــــــــــــــــــــــــــــي
انتظــــــــــــــــــــــــــــــــــــــــــــــــــــر

 

[ReMaaas^MLS]

والله يخليلج اخووووووج انشالله

مشكوره اختي وانشاء الله راح اكمل

 

[ReMaaas^MLS]

يعطيكم العافيه بنات وانشاء الله راح اكمل

 

[bnt_7waa]

:ggdw:عاشووووو عاااااشووووو

 

[DLO3T AMHA]

يلا كملي ناطريتج

كملييي

 

[ReMaaas^MLS]

انشاء الله حبايبي بس نطرو علي شوي اضبط البارت بعد شوي انزله

 

[ReMaaas^MLS]

ابتدئ الجد بالكلية ونبذه عن الدكاتره

في ثالث يوم لي بالكلية بدت الدراسه والجد مثل ما يقولون يعني بلشت المحاضرات والهوموركات وكان بنسبه لي شي مختلف يعني خاصة بالكلاس انجليزي ماني عارفه شلون أتفاهم مع teacher لان كانت شديده وتخرع وشكلها يضحك اهي متينه وتلبس لج بديات والبطن طالع أنتي اتشوفين كرشتها طل عليج وانتي بالمحاضره وهذا غير اسلوبها الي يهزأج مرات جدام الكل بس بنفس الوقت يضحك انا بنسبه لي بصراحة كانت رعب وحاول ارضيها علشان لا يحوشني منها تعلق جدام الكل حق الفشيله بس تدرون اخر الكورس حبيتها لانها وايد طيبه بس طيبتها على دفاشه و رعب لوووووووووووول

أما دكتور الكيمياء كان حبوب كان مصري و خوش واحد وانا ارتحت له حيل وكنت أي شي ابي أروح اسأله و كان المسكين يجابلين ويجاوب على اسالتي وكان صدره وسيع وحتى بالمحاضره كان يشرح بالعربي ما عدا المصطلحات يقوله لنا بالانجليزي والله كان خوش دكتور بس حسافه فرحه ما تمت غيروه تقريبا بعد اسبوعين وعطتنا دكتوره تخرع صج انها تشرح بس تخوف انا اقعد بالمحاضره وانا مخترعه عيوني امبققه احاول افهم بس ما اقدر كلش مادري من الخرعه ولا انه شديده شوي و ما تعطي ويهه وكانت كله تشرح بالانجليزي حتى اذا سالتيها ترد عليج بالانجليزي وهذا شي كان وهقه لي اول كورس بالجامعة لان شي جديد علي بس بعدين تعودت وصار شي عادي

بس دكتور مادة الرياضيات كان عجيب ما نفهم منه شي لانه روماني وانجليزي عنده شوي ما تنفهم احنا بدون شي بالغصب نفهم والحين واحد لهجته بالانجليزي مو نفس الانجليز ولا أمريكان بس اشوه كان رياضيات كله ماخذينا بثانوية.. اشوه يعني عدا الكورس معاه على خير.

وفي مادة ماخذتها اهي تدريبات لغوية اهي مادة اختياري وكان الي يدرسنا دكتور شكله زلمه أتوقع سوري وكان حبوب بس شديد والحمد الله ما تعبنا بالكورس بس تدرون انا بالعربي لو شنو ادرس ماكو فايده حلمي اشوف A ولو مره بس يبين اهو بطريج و أنا بطريج!!!!؟؟

للحديث بقيه..

 

[سليلة المجد]

بالانتضااار

 

[eng.mimi]

لوووووووول
اهم شي الكرشه اللي تطل :dddds:

ناطرين التكملة​

 

[ReMaaas^MLS]

يوم الفشلة

في اليوم من ايام الدوام وكان كورس الأول وكان بمحاضرة الانجليزي تقريبا صار لنا 3 اسابيع او اكثر شوي ماني ذاكرة بضبط بس كان توه مو كل الكلاس يعرف ثاني المهم كانت محاضرتي صبح تقريبا 8 وانا تقريبا هالوقت محد يدق علي وانا طبيعتي لما ادش محاضراتي اخليه تلفون صامت( Silent) ومرات انسى و اخليه امبطل الصبح وكان محد يدق علي بهالوقت وكان كل يوم جذي تقريبا ماكو احد يدق ولا يدز مسج لي بس هذا اليوم كان حده يلوع الجبد.. كنا قاعدين بالكلاس وكنا مفرقينه مثل امتحانات يعني كل طاوله بعيده عن ثانيه قد الكلاس كله وانا كنت بنص الكلاس المهم واحنا بنص المحاضره قاعده تشرح لنا ال Msولا تن تن تن يرن تلفوني كانت رنة مسج يعني اشوه نغمة وحده وسكتت ولا اشوف @@ Ms قطت القلم من ايدها على ارض حيل ونطت لج نطة هزت المكان انا قلبي طاح بطني قلت امبيه اشفيها ؟ انا للحين ما استوعبت انه من موبايلي ولا تقول منو موبايله هذا (اكيد بالانجليزي) بصوت عالي والله احس الكل اخترع وانا خو انا بققت عيوني @@ مو قادرة ابلع ريجي احس اختنقت و متوهقه حدي ولا ترد وتقول مرة ثانيه منو هذا؟؟ شافت محد رد عليها فهددتنا اذا ما طلع موبايل و محد قال انه موبايله راح انهي الشرح وماراح اشرح واعتبر هذا الدرس مشروح ومشت واطلعت بره الكلاس

وضلينا احنا والكل يسأل منو موبايلة بنات او شباب اعترفوا والكل يطالع ثاني ويقول مادري خو انا اكيد وياهم ما يبــــــــــــــــــــــــــــــــــــــــــــــلة حجي الموقف كان حده خايس ويفشل وما قدرت اتكلم ومتوهقه واحس الوقت طافني علشان اتكلم واقول صج لانه خلاص احس ماعندي سالفه وخربت كل شي وقلت حق نفسي احسن شي تسكتين واتسوين نفسج ما تدرين مدام محد درا أنج انتي

المهم بعد 5 دقايق ماكو احد يعترف ولا يقوم واحد من شباب مع وحده من البنات راحو كلموها واعتذرومنها وانه اتسامحنا هالمرة والحمد الله رضت وردت الكلاس وقالت لنا هذي اخر مرة واذا تكرر الموضوع ماراح اسامكم واعاقب الكلاس كله

خلصت المحاضرة وتدرون خو لازم اتصير مناقشات بعد الكلاس ولا يتلي ارفيجتي واهي تضحك وتقولي ها جمانه هذا تلفونج قلبت علينا الكلاس يالخايسه انا تبلعمت وقلت شنو ومنو قال ؟؟ وأنا مستغربه اقول بقلبي منو درا ما قلت حق احد للحين ما تكلمت!!! ولا اقولها منو مسوي اشاعه علي؟ ولا تقولي أي الي كانت وراج عرفت انج انتي لانه صوت طلع قريب منج بس اهي اسكتت وقالت مدام ما تحجت انا ما راح اتكلم، تدرون شنو صار فيني وقتها كنت اتمنى تنشق الارض وتبلعني امبييه حده فشلة بس شسوي مالي الا ترقيع واقعد انكر نفس العاده واسوي نفسي بريئه وبعدين غيرت الموضوع بسرعه لوووووول بس تدرون احس حقدت عالبنت قلت بقلبي مدام سكتي من بداية كملي جميلج ليش بطلتي حلجج بعد الكلاس وفضحتينا الله يسامحج :eh_s(14):

من يومها وانا ادش أي محاضره الا وانا حاطته Silent و اجيك عليه كذا مره علشان لا انحط بنفس الموقف وضليت على حال للتخرج والحمد الله كان درس لي ماراح انساه

للحديث بقيه..

 

[F.A]

بانتظار التكمله

 

[bnt_7waa]

لووووووووووووووووووووووووول

ضحكتيني


متاابعه :>


عيل ليش الحين اشكره بالكلاس التلفون يرن رن :\

 

[DLO3T AMHA]

كملي ناطره التكمله