تجمع مدرسه كيمبرج الانجليزيه ( المنقف ) 2011/2012

[ماريا 2006]

والله احترت ناس تذم وناس تمدح هالمدرسه مع ان للأسف اللي يسبونها اكثر شسوي مادري

 

[كويتيه عالي سماها]

حبيبتي ولدج من الباكستنيه راح ينقبل وانتي مغمضه لانها اقوى من كمبردج،، انا مجربه الثنتين صحيح الباكستانيه ضغط بس دراسه،، كمبردج مستواهم عادي واغلب المدرسات مو شديدات ع الطلبه ...

راح يعطونه هوك وورك يومي وعندهم امتحانات نص السنه ونهايه السنه بس مو صعبه حيل
بس انشالله يطيح بمدرسه زينه هووحظه فيه مدرسات بثالث مووو زود

اخخخ عورني كلامج
صج والله
يعني تنصحيني اخليه بالباكستانيه
ويا ريت اذا عندج اسماء المدرسات المو كلش تحطينهم
او ع الخاص
ومشكوره ع الرد والنصيحه

 

[ماريا 2006]

علي كثر ما كنت مستأنسة يوم قبول بنتي علي كثر ماني متضايقه الحين بنات احد يطمني برتاح حرام أقط 2000 عالفاضي

 

[شموووخ بدويه]

اخخخ عورني كلامج
صج والله
يعني تنصحيني اخليه بالباكستانيه
ويا ريت اذا عندج اسماء المدرسات المو كلش تحطينهم
او ع الخاص
ومشكوره ع الرد والنصيحه

اي باكستانيه ولدج،، والله اذا شايفتها زينه خليه فيها أحسن
مشكله كمبردج فووووووووووضى،،

 

[ماريا 2006]

هالمدرسه مؤ رخيصه ليش فوضى

 

[كويتيه عالي سماها]

باكستانية السالميه اللي بشارع العازمي

وممكن توضحين شلون فوضى !؟
عطيني السلبيات والايجابيات عشان نكون منصفين ع قولتهم

ومشكوره حبيبتي

 

[شموووخ بدويه]

ترا انا قاعده اتكلم عن كيمبردج المنقف يمكن انتي قصدج حولي،، مادري عنها...

المنقف بصراحه قمه التسيب والفوضي،، تشوفين الطلبه بالرسبشن عااااادي
وحتى لو مر طالب يبي يدق ولا شي تناديه اي وحده من الرسبشن عشان يطلع طالب ثاني اهله يبونه يعني مطراش وعادي هالحركه جدام المديره ماعندهم مشكله والخوات اللي بالرسبشن مستانسين مايبون يقومون،، يجي الولد بكل حماس عشان يفتك من الحصه هذي الحركه بعيوني شايفتها ومتكررررره بشكل...

ابلاتهم يعني من ناحيه المتابعه الولد مايحل الواجب عااادي ويروح ثاني يوم ماعنده مشكله لانه مو خايف من ابله تهاوشه وتعاقبه..
الصبيان شياااااااطين وحتى الولد الهادي يتغير،، أدري الصبيان بشكل عام شياطين بس عندهم بزيااااده

انا اتكلم عن رأي وتجربه شخصيه،، صراحه نقلت ولدي منها،، وكنت ع اعصابي هذي السنه ولاعت جبدي والحمدلله راح يطلع منها مع العلم انه يبي ربعه بس مو ع كيفه،، صغير ومايعرف مصلحه نفسه،، وان شالله يتأقلم بالمدرسه الجديده

 

[كويتيه عالي سماها]

الله المستعان
انا اقربلي كيمبردج حولي بس سجلته بالمنقف ع كثر المدح اللي شفته
بس من كلامج اتضح العكس عاد انا ولدي مسالم
الله يستر لا يطيح عند طلاب ما يرحمون
مشكوره اختي ما قصرتي
باشوف لي حل يا اخليه بالباكستانيه او انقله فرع حولي

 

[ماريا 2006]

شموخ بنتي بتروح ثانيه عندهم وان ما شفت فايده بنقلها بس يلون ملابسهم صايره وفعلا أنا شفت اللي قلتيه بس علي مدح البنات دخلتها ومادري وين انقلهابعد سنه

 

[يـاسمينا]

شموخ ولدي 3 سنين بالمدرسه ولا عمري شفت الكلام اللي قلتي عنه الصراحه
وبالعكس اشوفهم شديدين مع الطلبه وكل ما اروح اي طالب يمر عند الرسبشن
لازم وحدا تمسكه وتسوي معاه تحقيق وين رايح ومن وين ياي وليش طالع ؟؟ وهالكلام جدام عيني الله يشهد

وحتى دراستهم حلوه تأسيسهم صح ولله الحمد ولدي السنه اليايه يير 2 وانجليزيته فوق الممتاز بالنسبه لعمره

لكن موضوع الشطانه هذا يعتمد على الولد مالهم شغل المدرسه والطلبه اللي معاه

 

[كويتيه عالي سماها]

I'm confused
:eh_s(16):

مشكورين بنات ع آرائكم
باستخير واللي الله كاتبه بيصير

 

[ماريا 2006]

ياسميناردي علي محد رد علي
ملابسهم سلون صايره للبنات أنا بنتي تروح يير 2وبنتي جايه من حكومه بس حضانه وروضه كله خاصه وخذيت كتب اولي عشان تدرسها انشاء لله سهالات

 

[يـاسمينا]

ماريا حبيبتي شنو اللي حابه تعرفينا عن ملابسهم ماني فاهمه ؟؟

واذا تقصدين الموديل الصبيان بنطرون وقميص والبنات تنوره او نفنوف مع قميص

وتقدرين تاخذين منهم خام اذا مو عاجبج شغلهم الجاهز ..

 

[ماريا 2006]

ماريا حبيبتي شنو اللي حابه تعرفينا عن ملابسهم ماني فاهمه ؟؟

واذا تقصدين الموديل الصبيان بنطرون وقميص والبنات تنوره او نفنوف مع قميص

وتقدرين تاخذين منهم خام اذا مو عاجبج شغلهم الجاهز ..

ابي الوانهم

 

[شموووخ بدويه]

شموخ ولدي 3 سنين بالمدرسه ولا عمري شفت الكلام اللي قلتي عنه الصراحه
وبالعكس اشوفهم شديدين مع الطلبه وكل ما اروح اي طالب يمر عند الرسبشن
لازم وحدا تمسكه وتسوي معاه تحقيق وين رايح ومن وين ياي وليش طالع ؟؟ وهالكلام جدام عيني الله يشهد

وحتى دراستهم حلوه تأسيسهم صح ولله الحمد ولدي السنه اليايه يير 2 وانجليزيته فوق الممتاز بالنسبه لعمره

لكن موضوع الشطانه هذا يعتمد على الولد مالهم شغل المدرسه والطلبه اللي معاه

اخت ياسمينا يعني انا بتبلا عليهم،،شمصلحتي؟؟
يمكن انتي عشان ولدج روضه واولى للحين ماكتشفتي شئ،،لان اغلب المشاكل والعفسه بالابتدائي والمتوسط

اما لموضوع الرسبشن فوحده من ثنتين يا انج ماترددين ع المدرسه واجد،،او تجين نهايه الدوام وماتشوفين شي..
انا اعرفهم وحده وحده لوعه وفوضى ومس سهى بس صراخ ع الفاضي كل يوم مجمعه شله صبيان وتصرخ عليهم وتهاوشهم ع الفاضي..

شفتي حفلاتهم شلون قمه الفوضى والازعاج
اقسم بالله ان ولدي كان هادي بشكل مو طبيعي صار قليل أدب ولايحل دروسه والمدرس كلش مو قادر يسيطر ع الصف,اقصد مدرس العربي
اما ابلات الانجليزي حدث ولاحرج 3مدرسات غيروهم بسنه وحده عسى ماشر؟؟
مره دشيت عليم بالصف( بعد قولي ممنوع) لان احيانا تبين تاخذين ولدج تقول دشي ومرات مادري شيطري عليها تقول ممنوع المهم صعدت باخذه دشيت ولا الابله مشغله فيديو درس ماث مثل الاشرطه التعليميه اللي ممكن تشترينهم يشوفونهم بالبيت ،، طيب شوظيفتج انتي ليش ماتشرحين؟؟
ولدي كان مضيع دفتر ماله اسبوعين والله مادرت عنه لين انا رحت وقلت لهم،،،للعلم الشي صار مع ابلتين غير يعني المس اللي درسته اول السنه ضيع دفترته ومادرت عنه،، بعدين لما غيروها واستانست جات العن منها اللي تشغل لهم اشرطه
واذا قصدج عن ان ولدج بلبل انجليزي مو مقياس اول شي من يداوم لين يطلع كل اللي حواليه يتكلمون انجليزي فشي طبيعي راح يعرف خاصه الجاهل ذكي وبسرعه يلقط،، بس ممكن يرطن انجليزي بس مايفهم عدل بمعني ضعيف بالماث بالقرامر يعني..
واكبر دليل ان مستواهم يعني يقبلون طلبه من حكومه شلون.. يعني طالب دارس روضه حكومه شلون يروح اولى ابتدائي انجلش،،لا وممكن دارس اولى ابتدائي بعد حكومه واذا على امتحان مستوى كلام بس يعني شي شكلي ولاهم قابلين الطالب عادي،،مدارس ثانيه اذا مو اولى روضه انجلش ماتقبل

على فكره ولدي شاااااااااطر وذكي فحبيت اطلعه قبل مايقضون عليه ووديته مدرسه ممتاازه وقديييييمه ،،وعسى الله يوفقه وعيالكم قولوا امييييين

 

[يـاسمينا]

ابي الوانهم

امممم الوانهم مادري شقول لج يعني تقريباً عنابي بس فاتح حيل


قريب حق هاللون بس افتح شوي

والقميص مخطط عنابي وبيج

 

[ماريا 2006]

امممم الوانهم مادري شقول لج يعني تقريباً عنابي بس فاتح حيل


قريب حق هاللون بس افتح شوي

والقميص مخطط عنابي وبيج

موشيً شعندهم عالهالالوان والله توقعت احلي من جذي بس علي قولتج باخذ منهم الخام وبخيط احسن والله انصدمت باللون مثل صدمني فطريقه دراستهم
مشكووووووووره:eh_s(7):

 

[يـاسمينا]

وييي سوري ترا البنطرون بيج
والقميص مخطط بيج مع العنابي

 

[ماريا 2006]

شرائح تصورينه بليييييز ولبس البنات نفس الصبيان ادري اذيتج والله

 

[يـاسمينا]

ان شاء الله راح اصورا لج اليوم ,
ماطلبتي شي حبيبتي اخذي راحتج ..

والبنات نفس الصبيان بس الفرق ان نفنوف او تنوره ..