تجمع اولياء امور مدرسة الخليج الانجليزية في السالمية

[mr000]

هلا والله ليمونه! بالعافيه الريوق! كلامج عدل وهي كلش موحابه وظيفة الحكومه وسأليني آنا أقولج اشلون مشغلينهم بشكل عشوائي آنا كانت سكرتيرتي خريجة علم نفس وحنيت عليها أنها تشوف لها وظيفه تناسب شهادتها وتحصل معاش أحسن وقدمت عالتدريس مع أن كانوا مخوفينها منه بس والله استانست بالدوام وزاد معاشها وشرت بيت هي وريلها! وكان عندنا شباب بقسم المخازن يسجلون عدد الكراسي والطاولات وطلعوا خريجين علوم اداريه والله حرام جذيه !وأخصائي ثانوية ولدي شاب كويتي توه متخرج كبر ولدي العود قلتله شوف آنا أخصائيه ومشتغله 20 سنه وأنصحك تشيل قشك وتروح قطاع خاص أو بنك أحسن لك قبل لاتروح عليك السنين أو كمل دراستك واشتغل بالجامعه والله حطله واسطه وراح البنك وشفته تالي قالي مستانس ونفسيته مرتاحه!!!بس قولي ان شاءالله أبوها يرضى لأنه شوي من العصر الحجري!!

 

[الفرسان الثلاثة]

أي والله فرق احسن له الواحد يشتغل بالخاص .. عن تجربة خواني واحد منهم يشتغل في بنك و ماشاء الله عليه يشتغل و نشيط و مستانس والثاني في وزارة الكحه ... عفوا الصحة و حده محبط و ضايق خلقه المسكين حاطينه في وظيفة مالها علاقه بتخصصه بيطلع مو قادر قاعد يحاول يطلع تخيلو ماكو شغل و فاضي وبعد نظام بصمه يعني حده حكره عالفاضي
حلانه الواحد يستانس في شغله مو يسير مثل الهم عالقلب لا فايده ولا عايده

 

[mr000]

سلام أمهات الخليج عسى ماشر محد فيكم دش من أمس؟؟؟روحي تحب فاقدتها من زمان من غير شر!!

 

[ملكة بيتها]

هلا مروو شلونج ما شر يالغاليه وأنا بعد فاقده روحي تحب ...عزيزتي ...أم مشعل ...وباقي أمهات الخليج

 

[om mishaal]

ملكة بيتها عساك حبيبتي ما تفقدين غالي قولي آمين
حبيبتي والله أنا موجودة بالمنتدى
وأتابعكم كل فترة

المدة الماضية ولدي طلع عيوني طبعا هو في صف 12
وكان يقص علي انه ماخذ المادتين الكمبيوتر والفيزياء A level
وطلع ما يحضر الحصص نهائيا وكله قاعد في common room
وهالكلام لمدة شهرين ونص والله من عرفت فجأة عنه انه ما يحضر وأساسا مادة الكمبيوتر مو ماخذها
رحت مرات كثيرة للناظرة وهي ما قصرت تفاهمت معاي وتعاونت لأقصى درجة
وخلقت له صف بروحه بالكمبيوتر لانه من الاساس ما يعطون الكمبيوتر لصف 12 a level
والحين سوت له جدول حضور لازم كل ما يدخل حصة يوقع أستاذه عليها وأنا عقبه اوقع
عشان يقدر يعوض هالمدة خصوصا خذا بعد عربي لصف 12 وهو سهل جدا بس عشان يرفع معدله ويعوض

الله يوفق عيالكم يا رب العالمين
انتم شلون العيال بالمدرسة الحين؟ إن شاء الله أموركم تمام

 

[om mishaal]

بسألكم متى إجازتهم؟ ولدي ما يقولي خير شر الله يهديه بس
من متى ليمتى الاجازة؟ الله يعافيكم
ويسلم عيالكم

 

[ملكة بيتها]

هلا أم مشعل شلونج يالغاليه ما عليه حبيبتي الأولاد في هالمرحله الله يهديهم ما يعرفون مصلحتهم عدل بس يعطيج العافيه إنج متابعته والحمد الله تلاحقتي عليه ربي يوفقه ..بالنسبه للإجازه إن شاء الله بتكون من 17 ديسمبر إلى 4 يناير أعتقد جذي
وبطلب طلب صغير منج لا تقاطعينا يالغاليه

 

[om mishaal]

بعد عمري فديتك والله تسلمين حبيبتي
إن شاء الله أنا معاكم أكيد ما اقدر أبعد عن هالناس الطيبة والله

ترى ولدي كان يمي وقرا الكلام اللي كاتبته عنه وقام ميت ضحك علي يقولي تحشين فيني جدامهم يا فشلتي خخخخخخ

الله يهدي عيالنا ويوفقهم يا رب العالمين

 

[ملكة بيتها]

أم مشعل قولي حق ولدج لولا هالتجمع نفضفض فيه ونطلع الكبت اللي فينا من تدريسكم ومحاتاتنا عليكم ولا بتطلع عصبيتنا عليكم ...

 

[الفرسان الثلاثة]

هلا أم مشعل نورتي التجمع بعد طوول غياب
روحي تحب و عزيزتي وينكم طولتوا لبغيبة
مرووو شخبارج مع خدامتج اليديده الله يعينج

 

[الفرسان الثلاثة]

أم مشعل قولي حق ولدج لولا هالتجمع نفضفض فيه ونطلع الكبت اللي فينا من تدريسكم ومحاتاتنا عليكم ولا بتطلع عصبيتنا عليكم ...

اييه والله صاجه .. اتحسين هالاسبوع ثقيل ؟ يمكن عشان بعده اجازه

 

[ملكة بيتها]

هلا الفرسان الثلاثه تصدقين أنا بنتي لما أدرسها وعشان ما أوترها دايما أحاول أكون هاديه ولا أبين لها إني متعصبه منها وخاصه لما مخها يقفل عاد لما تقفل تعالي شوفي الخط الله لا يوريج وسمعي أنواع التنهوص والأعذاااااااااااااااار علشان ما تقعد وتجابل الهوم وورك كل شوي ناطه أبي أروح الحمام .....أبي ماي..........أبي أشوف شغله بداري .....تو منتس بريك ....وهلما جرا وأنا أدخن على نار حاميه الله يعينا الحين أنا أكثر منها مستانسه بالإجازه أبي أرتاح

 

[mr000]

السلام أمهات اشلونكم! أم مشعل الله يوفق وليدج وميخالف الصبيان أغلبهم جذيه آنا عندي ولدي العود كان متفوق وكلش ماتعبنا معاه بس أخوه خلانا نشتكي لطوب الأرض من كثر مايننا عالدراسه وألحين هذا اللي بالعالميه لازم آنا على راسه مثل منكر ونكير يالله يشد حيله بالدراسه ياربي لي متى جذيه الله يهديهم ويصلحهم!هلا والله الفرسان عاد تصدقين صارلها شهرين موتوها واصله الخدامه ومشتغله من قبل بس شسوي بعد لازم نتحملهم!! ملكه والله زين تسوين تصدقين آنا بنتي اللي هديتها على 3ابتدائي ماكنت أدرسها لأني مشغوله مع أخوها وتعودت تدرس بروحها وآنا بس أراجع لها لما تخلص أو أسمع لها طلعت أشطر من أخوها اللي كنت أجابله وأدرسه كلمه كلمه لأني كنت وايد أتوتر وأعصب عليه فكان يتدوده ويخاف وينسى بسرعه فأحسن شي أنج تحافظين على هدوئج وتمسكين أعصابج وانتي تدرسينها علشان تستوعب اللي تدرسينها و ماتكره الدراسه!

 

[الفرسان الثلاثة]

ملكة بيتها ... انا ملاحظه هالشي الام اكثر وحده تستانس بعطلة المدارس ومع ان عيالي صغار بس هم احس حكره بايام المدارس لازم ينامون مبجر ماقدر اطلع لي وقت متأخر ولازم حنه على ما يسوون اجراءات ما قبل النوم .. الله يعيننا

مرووو ... ابيه هالخدم ترا ما يتعدلون إلا لم بتخلص مدتهم يعني انا خدامتي لما قربت اتخلص سنتين اتشوفينها تعدلت و قامت اتعرف كل شي من غير قول ... شنسوي شر لابد منه

وعلى طاري التدريس ومنكم نستفيد بحاول ان ما اعصب لما ادرس بالمستقبل و الله يصبرنا كلنا و يهدي عيالنا يارب

 

[ملكة بيتها]

هلا مروو شلونج يالغاليه ..صاجه العصبيه تتدوده الطالب وتخليه يكره الدراسه أنا الحين همي أخليها تحب الدراسه وقاعده أغرس فيها حب المعرفه يعني أفهما إن الدراسه وناسه وإن بيعلمها أشياء جديده ..
وعلى طاري الخدم شوفي الخدامه اللي عندي الحين هي من عمر عندنا يعني فوق ال19 سنه يعني من يوم كنت بنت ومومتزوجه فتعرفني عدل مدل وأنا أعرفها زين مازين وهم لحد الحين تدوده وتتخصبق لما يصير عندها لود شغل وهم مثل ما قلتي تآمرينها بشي طبعا تسوي شي ثاني بس اللي مصبرني عليها إنها قديمه وأمينه ..
الفرسان الثلاثه ..تصدقين أنا من زمان موطالعه طلعه لي حق نفسي ولا مواجيبي مواجيب سنعه كلش أنا وحده بس اسمله عليها كل شي أنا أسوي لها لحد ما تنام وعاد خلاص أنا أكون مالي خلق أسوي شي بس أبي أرتاح عقب ..

 

[شرطيه حلوه]

اشلونكم
بسأل عن رسوم الروضه بالمدرسه جم؟

 

[mr000]

سلام أمهات اشلونكم!ملكه والله هذا الوضع كلنا مرينا فيه يعني آنا ترى شوي توني لقيت عمري لما عيالي كبروا وتقاعدت وليلحين مشغوله وماأروح كل المناسبات بس قبل لما كانوا 4 بالمدارس وعندي دوام وبدرسهم وبشوف طلباتهم واللي بوديه الطبيب واللي بسويله وسيله وطباخ بصراحه كان انتحار آنا أنصح اللي قلبها حار على عيالها وبتسوي كل صغيره وكبيره بروحها وتبيهم متفوقين وهم بتهتم في بيتها ونفسها وريلها مو من النوع اللي يساعد لاتييب عيال وايد آنا ألحين أقول حق ولدي نصيحه حدك 2!!

 

[الفرسان الثلاثة]

ملكة الله يخليلج بنيتج زان شاء الله اتشوفينها متخرجه ومتفوقه وانا نفس الشي اذا بطلع لازم عيالي معاي من زمان ما اطلع بروحي شنسوي الله يعوضنا ان شاء الله لما يكبرون
مرووو صاجه هالزمن مايبيله عيال وايد الدنيا صارت مو سهله و المتطلبات زادت العيال صاروا ما ينهدون نفس قبل كل شي صار اصعب الله يعينا
باجر مسووين حفله في الكلاسات حق الكي جي والريسيبشن مادري حتى المراحل الكبيرة عندهم؟؟ قايلين لهم لبسوا على كيفكم ولا اتيبون الفولدرات وموزعين كل واحد اييب شي احنا سوينا سلطة فواكه

 

[ملكة بيتها]

الظاهر كل المراحل أنا بنتي طالبين منها تودي سمبوسه ..بس بالنسبه للكتب والفولدرات ما بلغونا شي و اليوم استلمنا الريبورتس

 

[mr000]

هلا ملكه اشلونج! بشري عسى الريبورت زين؟؟ آنا ناطره باجر قاعده أحاتي!! بس وناسة عطلللللللللله