تجمع اولياء امور مدرسة الخليج الانجليزية في السالمية

[ملكة بيتها]

باونتي ..حبيبتي لا تحاتين إن شاء الله ينقبل بس ظلي تتصلين عليهم عشان يعرفون إنج مصره على المدرسه ..الله كريم

 

[زوزو الحلوه]

شلونكم امهات ...
الله يوفق عيالنا ونشوفهم دكاتره ومهندسين ومحامين وتفرحون بشاهدتهم الكبيره يارب....
انا من ولدي دش المدرسه كنت اقوله شنو تبي تصير من تكبر انشالله يقولي ابي اسوي بيوت..انا وابوه على طول نقوله انت مهندسنا ..اهو يتشجع يقول ابي ادرس وادش الجامعه مابي اصير( وانتوا بكرامه) زبال ابي اصير مهندس اسوي بيوت ..انشالله اشوفه مهندس كبيييييير يارب
الي ابي اوصله اهو صح المدرسه ونظامها وطريقتها بالتدريس يأثر بس مو مثل اهتمامج وتشجيعج حقه تخيله انج ماتدرين عنه هاملته وكل الي بالبيت ماعندهم اهتمام بالشهاده بس تخرج وبس!! شنو يبي يطلع ماراح حتى يفكر انه يسافر يدرس بره وييب شهاده عووده يفكر بس بوظيفه عاديه..ويمكن حتى يتخرج بدون نسبه لانه في ناس تحط عيالها مو لانه المدرسه تبي تطلع ولدي شي ..لا بس جدام الناس مدرسه خاصه..حمدالله والشكر على هالعقليه..(لانه وحده عندي بالدوام كانت تقولي ليش انتي حاطه ولدج بخاصه علشان يقولون شوفوا فلانه حاطه ولدها بمدارس خاصه ).. لاوالله انا ابي الاحسن حق ولدي ولا وحده ماتبي الافضل حق عيالها..قرقكت عليكم صح..بس انتو شرايكم بكلامي؟؟؟
:balo:

 

[ملكة بيتها]

زوزو الحلوه ..كلامج عين العقل وصاجه ترى في فرق بين الذكي اللي يهتمون أهله فيه ويشجعونه وبين الذكي وبس ...أنا أعرف ناس عيالهم أذكياء ولما تخرجو من الثانويه افرقوا يعني عيالهم يابو نسب زينه بس اللي أهله مهتمين كان مخطط عدل وعنده هدف يحققه والثاني مو عارف يدخل أي كليه بعد تخيلوا ...ويارب يازوز تشوفينه مهندس ويترس الكويت والدير اللي حوالينا بالمباني اللي تحمل اسمه إن شاء الله

 

[mr000]

السلام ..وينكم أمهات الخليج الفاتنات... اليوم الكرنفال مالنا تكنسل علشان الجو..مادري متى بيسوونه..أساسا ولدي ماكان بيروح..ماله خلق وبيدرس حق أمتحان ماث..يالله خيره..ملكه وينها مالها حس

 

[باونتى]

أمهات شلونكم وشلون عيالكم ان شاء الله يكونون بألف خير ويارب تفرحنه فيهم .. زوزو الحلوه .. كلامج صح الاهل لهم تأثير كبير .. عندنا واحد من جماعتنا كله يقول لعياله درستوا سقطتوا شى يرجع لكم الشهاده مو حقى .. ولمن ولده صار بالمرحلة الثانوية ما كان يشد حيله يقول ابوى مو مهتم يقول عادى أتييب نسبه أو ما تييب كيفك هذا مستقبلك !! فالتشجيع وااايد مهم شوفى أخوانا الوافدين يغرسون من صغرهم فى ذهن عيالهم انكم دكاتره ولا مهندسين عندنا أبله مصريه تقول من يوم ما كان ولدى صغير وانا وأبوه ننادى بالدكتور وفعلا ما شاء الله اهو الحين دكتور شفتى شلون التشجيع له دور مهم ..:ggdw:

 

[ملكة بيتها]

سلام أمهات شلونكم
مروو ..يا عمري ما تفقدين غالي بس المنتدى صاير مزعج وايد يعلق ..الجو اليوم كان زين عاد مو مثل أمس بس الظاهر إحتياط ما يبون يجازفون

 

[mr000]

السلام اشلونكم ..باونتي شخبارج..ملكه اشلونج..لا ملكه الكرنفال كان السبت والجو تعدل على الظهر بس هم الظاهر شافوا الجو انعفس الصبح فكنسلوا..حتى في طلبه راحوا المدرسه لأنه كان راح يبتدي الساعه 11 ووقتها الجو زين بس قالولهم أجلناه..عسى ماعنكم ناس مسافرين أوربا ومتوهقين عالرده..آنا ولدي بلندن والمطارات مسكره وناطر..هذا حلاته جان آنا رايحه ومسكرين المطار..وناسه أقعد شهر وإلا شهرين خخخخخ تلاقوني أشتغل بهارودز وإلا سيلفريجز..عاد لما أدش المحلات ماأحب أشوف ملابس مقططه..والله لاشعوريا أقعد أصفط الهدوم..وبنتي تسحبني..تقولي يمه فشله هدي الهدوم..

 

[mr000]

up لعيونكم..

 

[mr000]

ثاني up... الثالث راح آخذ دينار من كل وحده..

 

[زوزو الحلوه]

حبيبتي ملكه بيتها مشكووووره على الدعوه الحلوه (انشالله يارب اشوفه مهندس كبير)... الله يوفقهم انشالله
باونتي بشرينا شصار معاج ..على مقابله ولدج..
انا رحتلهم قتلهم مادقيتو علي علشان مقابله حق ولدي قالتلي ولدج kg قلتلها لا بيروح pre-kg قالت ..دفعتي 110 قلتلها اي دفعت ويبت الملف الصحي بعد>> قالت لا لا pr-kg مالهم مقابله (واهم الي قالولي نطري ندق عليج علشان المقابله )..يالله يعطيج العافيه ومشيت.. انتي روحي شوفي سأليهم لي متى انشالله علشان ترتاحين تعرفين شلي لج ولي عليج..

 

[ملكة بيتها]

شلونكم أمهات ..واي صارلي جم يوم المنتدى معند وياي ..
مروو ..ياعمري رفع الله مقامج دنيا وآخره ..أشوه ردينا قبل لا تسوين رفع ثالث وتبدأ الحسابه تحسب علينا ..عسى ما ننحرم من مرورج ورفعج الموضوع بس المنتدى صاير شي مستحيل ..
زوزو ..ألف مبروك على قبول ولدج وترى ساعات الرسبشن اللي حاطينهم ما يدرون وين الله قاطهم ما يدرون عن شي ...
باجر بنتي عندها رحله بيودونهم ال plant shop

 

[mr000]

ملكه حاضرين للطيبين..عاد حسافه توني قاعده احسب كم وحده في التجمع علشان أيي آخذ منكم الفلوس..ان شاءالله تستانس بنتج بالرحله.. وين صاير هالمكان اللي بيودونهم..زوزو مبروك قبول ولدج.. والفال حق ولد باونتي..

 

[ملكة بيتها]

مروو ..إي والله هاليهال دام رحله وبره المدرسه بيستانسون الله يسلمج مودينهم المشاتل ههه ويوم خذيتها شايله معاها نبته ورده ومستانسه فيها

 

[زوزو الحلوه]

شلونكم امهات حبايبي ...مروو ...ملكه بيتها
اي والله صاجه ..ملكه بيتها ..الريسبشن مايدرون وين الله قاطهم اليوم دقت علي وحده تقولي موعد المقابله حق ولدي..........
انا انصدمت ؟؟؟؟؟قتلها انا قبل يومين يمكن كنت عندكم في اخت بالريسبشن قالتلي لاااا pre-kg مالهم مقابله قالت هااا منو هذي الي قالت !!!قتلها والله اهي نفسها تكون داخل حق التسجيل اخت غاده قالت لااااا اهي مو الي تحدد المواعيد ملوت المفابلااات وبعدين اهي قصدها انه حتى لو سوينه مقابله اهو مقبول عندنا لانه الحضانه مو وااايد مهم مثل الkg والي اكبر هذي بس علشان ينحط بالملف حقه ...
انااا اقووول حق اختي باونتي روحييي شيكيي لانهم صج دايخييين كل وحده تقوول شي الله يهداهم....

 

[ملكة بيتها]

سلام أمهات عساكم بخير
شلونج زوزو ها بشري شصار على مقابله الكتكوت إن شاء الله كل شي تمام ؟؟؟
باونتي ..شصار عليج راجعتيهم ؟؟بشري عنج يالغاليه

 

[زوزو الحلوه]

سلااام امهات
حبيبتي ملكه بيتها للحين مارحت مقابلته 10 مايو انشالله؟؟
...مشكوووره على سؤالج....
واختي باونتي شصار عليج بشرينا عنج ناطرين.....

 

[Love \ Hate]

مرحبا بنات شخباركم ؟؟

سوري ادري اني داشه عرض .. بس حبيت استفسر ؟؟ مدرسة الخليج الانجليزيه اسوون فيها سمر كامب ؟؟ صح ؟؟

في انجليزي وفرنسي وكمبيوتر ؟؟ جني العام بالصيف شفت اعلاناتهم ..

بليز اذا عندكم خبر بلغوني

 

[باونتى]

هلا بنااات شلونكم شخباركم مشكوورييين وااااااايد على السؤال ما قصرتوا .. أنا عيزت وأنا أدق على المدرسة يا ما يشيلونه او كله مشغول وذاك اليوم تنرفزت وقلت حق اللى شالت التلفون قلت لها شسالفتكم انتوا تداومون ؟؟؟ قالت اى ليش تقولين جذى ؟؟ قلت لها صار لى اسبوع وجم يوم عيزت وأدق ما تشيلووونه أو تحولونى على شئون الطلبه هم ما يردون قالت مشغوليين والحين بحولج عليهم وحولتنى ومحد رد .. قلت بشوف اذا قدرت هالاسبوع بروح لهم وبشوف شسالفه .. اللى سألت عن السمر كامب اى الخليج عندهم العام كنت بسجل عيالى بس ما صار وعلى فكره أسعارهم وااااااايد حلوه

 

[mr000]

السلام أمهات الخليج اشلونكم..شخباركم ..باونتي عطيني إسم ولدج وشكلي آنا اللي بروح أزفهم..والله كسرتي خاطري وايد حاسه بمعاناتج..طولوا ... بس آنا أقولج ترى هم عادي طريقتهم جذي آنا ولدي بالمتوسطه وسووا فيني جذي بالخليج لما خلوني رحت سجلته بمدرسه ثانيه..لأن خفت أفوت المدارس اللي قبلوه وتالي الخليج مايقبلونه..بس ان شاءالله ينقبل لاتحاتين..

 

[باونتى]

السلام أمهات الخليج اشلونكم..شخباركم ..باونتي عطيني إسم ولدج وشكلي آنا اللي بروح أزفهم..والله كسرتي خاطري وايد حاسه بمعاناتج..طولوا ... بس آنا أقولج ترى هم عادي طريقتهم جذي آنا ولدي بالمتوسطه وسووا فيني جذي بالخليج لما خلوني رحت سجلته بمدرسه ثانيه..لأن خفت أفوت المدارس اللي قبلوه وتالي الخليج مايقبلونه..بس ان شاءالله ينقبل لاتحاتين..

هلا حبيبتى .. تصدقين الكل يقول ان مدرسة الخليج وااايد يتأخرون بالمقابله .. تذكرين المدرسة اللى قلت لج عنها تقول العام لمن سجلت بنتها بالخليج متى دقوا ؟؟ دقوا شهر 6 !!