احترم وجهة نظرج ام فهد وكل وحده ورايها وكل مدرسه لها ايجابياتها وسلبياتها بس ترا ساعات التذمر يكون من صالحنا مو معناته ان احنا دلوعييين يمكن احنا ماعندنا خلفيه او الحكمه ورا الشي اللي نشوفه سلبي .... فالبنات هنى يقولون اللي يبط جبدهم من المدرسه ومنكم نستفيد في اللي تنبهج وتفيدج بنصايحها وفي اللي توقف معاج بالراي السلبي لان فعلا شي غلط اللي يصير .... وهم لان في امهات توهم بالالف باء يعنى يعنى صارت وليه امر ماعندها خلفيه بالشي ومو كلهم دارسين وفاهمين بالتربيه او علم النفس او او او وانتى اماشالله علييج من اول مادشيتى دشيتى بهجوم علينا وانا اللي مااعرفج ولاتعرفينى قلت انتى اكيد مدرسه اطفال ومتخصصه فيهم او انتى معاهم بادارة المدرسه وترا استانس على مواضيعج وفي اشياء كثيره استفدته منج ومن باجي البنات واتمنى انج تشاركين معانا
ادري صدعت راسكم بس بالاخير اقول سامحينى اذا اختلفت معاج بهالراي واقول لازم الكل يتكلم ويكون صريح حتى لو بالتذمر عشان نعرف مستوى المدرسه وشكرا لكم
السلام عليكم اختي ريمان ... مشكورة على رايج .. وانا مو ضد انك تتقبلين راي أو ترفضينه فكما قلت سابقا
ان لكل واحدة فينا مبدأ وراي ومن شأن كل وحدة فينا توافق عليه أم لا ...وأنا ما قصدت انكم دلوعيين
حشى والله ... بس معروف ان احنا كأمهات كله نبي الراحة حق عيالنا ونبيهم ينجحون بكل بساطة وبدون تعب
وترى أنا في بنتي البجر كنت جذي نفس الشي وهم كنت ما اعرف وبس ابيها تنجح وابي ما يكون عندها واجبات
وأنا كل شي اسويلها ... بس يوم درست علم النفس وجاني ولدي الثاني والثالث التفت حق عمري وقلت أكيد أنا غلطفي هالموضوع لأني لو استمريت بهالشكل عيالي راح يطلعون اعتماديين ... راح يطلعون فارغين وماعندهم معلومات ..
لأن احنا بس المدرسة والواجبات وغيره لأ ...مافي ثقافة مافيه خلفيات مجرد تعليم... وقررت من هالشيء أدرس
علم نفس ورياض أطفال عشان اطور بنفسي وبعلاقتي مع أولادي .... ما اقولج ان حياتهم كلها دراسة وكتابة وواجبات
لا بالعكس لهم أوقات حق كل شي ... حق الدراسة .. حق اللعب ... حق الراحة ... حق القراءة وهم أنا مرتاحة
صج أتعب معاهم بالتأسيس لكن بعدين خلاص كل واحد يعتمد على نفسه..
حبيبتي ريمان .. أنا ماقصدت بهجومي شخصياتكم بحد ذاته وما هاجمتكم شخصيا لكن أنا قلت الصج ومثل ماقلت
في بداية دخولي المنتدى ان أنا صريحة وأقول الحق ولا أخاف لومة لائم لأن الساكت عن الحق شيطان أخرس
أما بالنسبة لكم كأمهات فليس هناك شيء ضدكم .. ومثل ماقلت ان لكل واحدة طريقة وراي بل بالعكس أنا احترمكم جميعكم
واحترم آراءكم ولو اني ما اهتم لما قدمت ما عندي من خبرات ومواضيع لكم ....وانتوا كلكم على راسي يكفي انكم
امهات ....
أما بالنسبة للتذمر اللي أنا قلت عنه فأنا لا أقصد التذمر البناء اللي نقدر نستطيع ان احنا نعدله أو نطرح رأي للمدرسة
أو نسوي حتى مشروع ونقدمه لهم ... لكن وبصراحة منذ دخولي للمدرسة مالقيت أحد يمدح بالمدرسة أو بأي شي
فيها انما كلها شكواي وهذه الشكواي كانت كلها لمصلحة الطالب مثل شكوى استاذ الدين وعن الكتابة .. وعلى الرغم انه ماطلب منهم كتابة حرفيا انما طلب رسم الكلمة .. لكي تتمرن عضلات الأصابع على الكتابة ... تعالي نشوف مدارس الحكومة شتعطيهم من نسخ
تعالي نشوف مدارس خاصة ثانية شلون تكتبهم كلمات كثيرة للواجبات ..أنا قصدت ان لما نتذمر نتذمر لشيء أساسي
لشيء فيه مصلحة الطفل .. وبالعكس انا قلت ان ليش ما نحول هالتذمر لصالحنا يعني نقترح شي مفيد
نسوي مشروع مفيد ندور أشياء تفيد عيالنا وننشرها عن طريق المنتدى من دروس وافكار وبرامج وغيرها
وموشرط ان كل ايام المدرسة تكون مناسبات عيل وين الدراسة ... وبعدين ترى اهم مايدرسونهم بشيء من الملل
بالعكس اسلوبهم في التدريس مرح ويحبب الطفل في التعلم والمنافسة والابتكار ... لأن هالشيء شفته بولدي وكانت
حالته صعبة بالنسبة انه طالب في سنه اولى ابتدائي كان بالحكومة وانتي ادرى بمستوى الحكومة وطريقة التدريس
المملة عندهم وتعالي شوفي ولدي الحين تبارك الرحمن ممتاز جدا وهذا ما صار لو انه ماحب المدرسة مثل ما يقولي يمه انا
احب هالمدرسة ما احب مدرستي اللي قبل حتى لما ادرسه الاحظ الفرق شلون كان بالحكومة مايبي يكتب ولا يدرس وكله
متملل ويبي بس يلعب وبين الحين شلون يبي يكتب الواجب ويشارك ويحب انه يسوي اشياء اضافية بعد فهذا دليل على حب اليهال
لطريقة التدريس بالمدرسة .
وصدقيني يا أختي ريمان احنا لو نعطي فرصة بس حق المدرسة راح نلاقي المستوى اللي احنا نبيه حق عيالنا
المستوى الأكاديمي والتربوي بعد .... لأنني أثق بالدكتور الخليفي ثقة كبيرة جدا جدا ..واهو قاعد يطورها بس يبيلها
وقت وصبر...لأنه انسان فاهم ومتخصص وماحط المرسة الا بهدف بناء طفل واعي مثقف متعلم وكذلك على اسس تربوية سليمة
وهالشي راح تشوفينه مع عيالج شوي شوي ولولحسن..بس قووى قلوبكم شوي بحيث انج لا تظلمين عيالج
ولا تتركينهم الاعتدال ومعرفة قيمة نفسج ومعرفة ان الطفل انسان ذكي جدا جدا جدا
وآسفة جدا على الاطالة لكن احب افيد غيري باللي جربته واتمنى لكم كل الخير والتوفيق مع اولادكم
:gathering:
