تجمع امهات العالمية الامريكية

[mr000]

السلام أمهات اشلونكم ..آنا ولدي اليوم غايب.. واستمتعت بالنوم لي ال9ونص..يلا إجازه سعيده..بس خربوا علينا بهالإمتحانات والبروجكت اللي حق عقب العطله..

 

[ملكة بيتها]

شلونكم مامات عساكم بخير حبايبي كلكم وإجازه سعيده لكم ..
مروو ..عليج بالعافيه النومه وياحلات نومه الصبح حدها لذيذه ..وما عليه لا تضغطين على وليدج لو يراجع كل يوم ساعه ترى كافي يتراوالي
أنا بنتي أراجع معاها الحين اللأشياء اللي ماكانت متمكنه منهم والله كريم ..

 

[mr000]

هلا والله ملكه حيا الله من زارنا.. والله ملكه آنا مخليته يسوي البروجكت بروحه هو مجله فلما يخلصها بوديها أطبعها وأضبطها بمركز الطالب واصمم لها غلاف..لو عليه هو جان دبس الاوراق وعطاها المدرسه..والامتحانات بسكت عنه هالكم يوم خل يشبع بلي ستيشن وطلعات تالي آخر كم يوم يقعد يدرس..اشلونكم امهاتنا شخباركم,,,

 

[Fouz]

السلام عليكم
مرو كاراميلا بيلا ريمان و ملكة شلونكم أمهات

أم الهيل حياج الله و نفس ما قالت مرو المدرسة كل موادها بالانجليزي ما عدا العربي و التربية الاسلامية و بالتوفيق ان شاءالله

مرو عليج بالعافية النومة، انا ما وديت بنتي بس طنقرت لانها كانت تبي تروح بس ليييييييييييييييييييييش؟؟ بس علشان بتوري وحدة وياها بالصف ان عندها هدوم على برنسس،، عاد راضيتها بروحة جمعية

اليوم قاعدة بروحي كل بيتنا معزومين عى عرس واحد من أهنا عسى الله يوفقهم، قلت فرصة افتح المنتدى شوية دام ريم نايمة و لنا ما فيني نوم الحين

بيلا و كاراميلا عطوا عيالكم اوراق اليوم حق الاجازة؟؟ أمس بنتي يابت الفولدر مالها و فيه اوراق holiay fun book بس مادري يمكن عطوهم شي زيادة، عفية عطوني خبر

 

[caramella]

السلام أمهات
إشلونكم و شخباركم
فوز إي صح ولدي ياب النوته اللي قلتي عنها fun holiday book
وأوراقه مالت الإسبوع اللي فاتاللي مسويها بالصف
وياب اليوم زرعه صغيره إهو زارعها
والإسبوع اللي بعد الإجازه يبون اغراض حرف b

أمبيه غط غط خالد العبدالجليل تالي طلع معابل بعمره مسوي عملية تجميل حق خشمه و مركب لومينير على اسنانه حتى مو قادر يضحك لوووووووووووووووووووول شكله يضحك الله لا يبلانا
إلا على الطاري آنا ييت من السفر ما شفت محمد المنصور ولا ناديه صقر وينهم ؟؟ قاموا يححطون نوف المضيان

 

[mr000]

كراميلا وين شفتي خالد العبدالجليل بأي برنامج؟؟قالوا مسافر يتعالج مريض..مادري شالسالفه..

 

[bella bambina]

السلام أمهات اشلونكم مرو وفوز وريمان وكراميلا ؟
فوز دلول راحت أمس وتقول قعدوها بالساد سبوت تقول متهاوشه مع صبي كنت أبيج تسالين بنتج بس طلعت غايبه أمس ما عطوهم أوراق بس يوم الأربعا عطوهم أوراق العطله وورقه عن الكرنفال واللي يبي يشتري كوبونات سحب واللي يبي يأجر طاوله يبيع يوم الكرنفال وحرف ال p
فوز آنا ما قلت لج الأسبوع اللي طاف مس مروى قالت لي تبيني أمر يوم الخميس اللي طاف تبي تكلمني عن دلول قلت لها ما أقدر عندي دوام ليش جان تقول لأنها أقل وحده بالصبح فرديت عليها لو كانت أول بنت عندي كنت تعقدت وصدقت قبل سويتو لي سالفه عن ولدي لما كنتي مساعده بصفه وآنا صدقت وقمت أمشي وأقول ولدي غبي وبعدين اكتشفت انكم مو عارفين تتعاملون معاه ما راح أيي وبنتي ما فيها شي وكلغه دلول تتكلم انجليزي ممتاز العربي اللي ما تعرفه وهم ما اشتكت منها أبلة العربي ومع انها ماتعرف عربي بس اي حرف تعطيهم اياه الأبله ترد البيت تعرفه من كانت بالحضانه والأرقام والألوان والأشكال تعرفهم قبل لا تدش الحضانه والأحرف الانجليزيه تعرفهم وتعرف أصواتهم حتى اللي ليلحين ما عطوهم اياه وترد البيت تقول لي القصه اللي عطوهم اياها وما شاء الله بحفظ الأغاني perfect بس الكتابه عضلات أصابعها مو قويه وما تعرف تكتب وما أعتبر هذا ضعف لأن هذي قدرات وما راح تظل جذي راح تكبر وتكتب اليهال يختلفون عن بعض بهالشغلات بس باجي الأشياء ما تشكي من شي قلت لها آنا مو مستعده أتكلم بهالموضوع لأني متأكده ان بنتي ذكيه وذكرتها بولدي والحين اشلون صار مستواه بدون مبالغه يوميا لما آخذه من المدرسه أبلته تتشكر على مستواه وذكاءه وليلحي خذى السنه 3 شهادات تميز والعام كانت أبلته تقول لي خلي يعيد كيجي 2 ولما سويت له اختبار رمضان اللي طاف بأكسفورد اللي بالشعب طلع مستواه جنه مخلص أولى ابتدائي وسكرت عليها الموضوع بس متضايقه اني ما قلت لها انتو منو فيكم دارس تربيه أو حتى متخصص بالتدريس والتعامل مع اليهال بس مجرد انها تتكلم انجليزي أو أمريكيه صارت عندكم مدرسه لا شهادات ولا خبرة بدال لا آنا أشتكي ان الصف ما يبو له مدرسه وظل على مساعده لغتي الانجليزيه أحسن منها !!!!!!

 

[bella bambina]

كراميلا آنا ما أدري عن التلفزيون ولا أبطله ما أفضى كلش واذا خلصت شغلي بالليل مبجر أفضل أنام :cxxxp:

 

[caramella]

مرووو بتو الليل حاطينه أمبيه صاير جنه هالمغنيات نانسي و ربعها ياشين التجميل عالريال والله قبل كان شكله احلى الحين خشمه مفقوص وموقادر يفج حلجه من اسنانه ما ادري ليش يعابلون بعمرهم
الحريم لي عابلو بيسنعون بعمرهم اما الرياييل بسنعون بعمرهم حق منوو ؟؟؟؟؟:eh_s(12):

بيلا زين سويتي فيها الصراحه شنو مو من حقهم ينطقون بأي حرف عالبهذله اللي سووها فيكم هالسنه المفرووض إنتوا اللي تشتكون مو إهي
جان قلتيلها حتى لو هالشي فعلا في بنتي من خمالكم هالسنه كل ساعه مدرسه و غير جذي صفينا عالمساعده وين تبين الياهل تركز وعليه
آنا ما اشيشج بس إن ردت تكلمت بالموضوع مره ثانيه رووحي سيده إشتكي وما تقدرين تحاججينهم بأن آنا اعرف مستوى بنتي حاججيهم بأن ما كان في إستقرار بالصف هالسنه وين تبون الياهل يركز وركبيهم الغلط
آنا إحتريت تصدقين فوق شينهم قوات عينهم
وكسري عينهم وحاولي تطبعين من النت حق بنتج سوالف كتابه و كتبيها معاها و طرشيها حق المدرسه اللي تشتكي من الضعف بالكتابه
وقوليلها آنا مو مهمله مع بنتي بس الخمال منكم
واليهال قدرات ما تقارنينهم ببعض في ياهل يكتب بسرعه و في ياهل يتمطمط مو معناته السريع إهو الفالح واللي يتمطمط غبي لا في حريص بيخلص بسرعه و في ياهل قلبه بارد وساعات اللي قلبه بارد اشطر من الحريص وتشوفين نتايجهم بالإختبارات

 

[mr000]

السلام أمهات اشلونكم..آنا هالإجازه شكلي بقضيها بالبيت..بنت ولدي مسكينه مرضت عدل مره ثانيه ولاجنها ماخذه مضاد حيوي اسبوع كامل وباجر بوديها حق دكتور شمساه..بس ان شاءالله أحصله..بيلا لايضيق خلقج.. المدرسين الله يهديهم ساعات يستعيلون بالحكم على الياهل وتقدير مستواه.. ماشاءالله ولد رفيجتي الله يحفظه كاهو توه تخرج دكتور والأول على دفعته بالبحرين.. وأذكره لما كان بالإبتدائي والمتوسط أمه ترد من الأجتماعات ضايق خلقها تقول المدرسين مايمدحونه يقولون موشاطر مثل أخوه وموذكي مثله...ألحين ولدي هذا اللي بالعالميه هم ماكانوا يعتبرونه شاطر بالتكامل مع إنه كان ياخذ درجات أحسن من ألحين يعني قليل ياخذ c بس كله محبطينه.. ولما بقيت أنقله العالميه توقعت مايقبلونه لأنه لغته ضعيفه مومثلهم.. بس بالمقابله والأختبارات اللي سووله.. قالتلي مستواه وايد زين وحتى بالانجليزي يفهم عدل ومستواه بالتعبير زين بس هو يستحي يتكلم ومتردد.. قلتلها البركه بمدرستها الأوليه اللي مسحوا شخصيته.كافي مدرسهم العلوم هالسنه يقولي آنا العام درسته فتره قصيره ومره قلتلهم كتبوا موضوع عن شي خارجي ..يقول لو ولدج موكاتبه عندي بالصف جان قلت أكيد أحد منكم كاتبه عنه..اسلوبه قوي وحصيلته اللغويه زينه.. بعدين الياهل يتغير وخاصه البنات ماشاءالله نبيهين ويلقطون بسرعه وحريصين بالدراسه.. ويحبون التنافس ماتبي أحد أحسن منها مو مثل الصبيان بعضهم مايهتم لو الصف كله أحسن من درجته..يعني كلام المدرسه مودقيق ولايحدد مستوى البنت بالضبط..

 

[mr000]

أفأ ليش موضوعنا بالصفحه الثانيه..وينكم بنات؟؟

 

[bella bambina]

صباح الخير أمهات
اشلونكم مرو وريمان وفوز وكراميلا؟
سلامتها بنيتكم مرو استغفر الله الجو بالكويت صار كله أمراض
كراميلا ومرو آنا أعترف وأدري ان دلول ما تكتب بس كلغه وفهم واستيعاب انجليزيه خلو الجلاح على صوب
بس الكتابه ما راح تظل جذي بما انها مدركه الحروف والأرقام كلهم بس تبقى مسألة الكتابه تاخذ وقت وتلاقين الياهل فجأة يتمكن من الكتابه جنه كبر فجأة والله لو أول ياهل عندي جان تعقدت

 

[mr000]

السلام اشلونكم أمهات.. شخباركم.. اليوم ان شاءالله بنودي الصغيره عند دكتور شمساه عيزنا واحنا نعطيها بهالأدويه ماكو فايده ولا تاكل شي.. والله مشكله هاليهال.. بيلا ولد حماي بالخليج نفس سالفة بنتج.. العام كان بالريسبشن قالوا حق أمه مايكتب ومستواه أقل من اليهال وأمه مدخلته الحضانه الإنجليزيه بجنوب السره من كان عمره سنتين ونص يعني رايح لهم وهو يعرف كل شي..بس شويه فيه حركه زايده.. المهم وايد ضيقوا خلق أمه وقالولها ماراح يمشي بغريد 1 على هالمستوى.. تقولي ألحين بغريد 1 شحليله يكتب وشاطر ماعلامه شي..يعني مثلما قلتي كبر وفهم إن هذي مدرسه مو لعب مثل الحضانه..

 

[ReeMaN]

سلام امهات شخباركم

شلونكم مع الاجازه انشالله مرتاحين فيها لا واجبات ولا توصيل ولا شي

فوز رفيقه الدريشه شلون ريوم هالايام عسى ماكو زام بالليل ........

كااراميلا انا شفت البرنامج بدون صوت واشوفه يسولف ويسولف لما شفت اسمه انصدممممممممممممممممممممممممممممت عليج الصوت الى

الاخر وانصدممممممممممممممت وانصدمتتتتتتتتتتتتتتتتتتتتتتتتت مابقى احد ماطرشت له مسج يشوف البرنامج ماوصلكم مسجي ههههه

امبيه ليش جذي معابل بعمره قبل وااااااااااايد احلى من الحين ...

بيلا ياجبل مايهزج ريح ماشالله عليج قويه واصلا انتى ابخص بعيالج من المدرسه وعارفه مستوياتهم ... على قولتج من تجاربج السابقه

انا قبل كنت مثلج لوعو جبدي ابلاته بمدرسته الحياة سابقا وهالمدرسه ماسلمت منهم كل شوي ولدج وولدج ماعنده استيعاب ومايفهم ومايتكلم وانا

من النوع اللي واااااااااااايد اتاثر وانصدم بولدي لان ادري فيه ان مو نفس اللي يقولونه دخلته تقويه جم مره وثاعده اشوف استيعابه ومستواه

مافيه شي الولد الحين الحييييييين قمت اطنش فيهم اسوي روحي جدامهم انى متاثره وراح يتعدل الولد انشالله

والحين وحده اتصير لي ولدها بصف بنتج وبنت فوز تتحلطم مسكينه كل شوي يطلعون لها كلمه عن ولدها ان شيطان وابليس بالصف واهى

وااااااااااايد متضايقه على ولدها وحالتها حاله اتقارن ولدها بكي جي 1 بولدها العود كان وايد عاجل وغير عنه عطيتها جم كلمه عن

المدرسات وشلون طريقتهم مايبون يتعبون باليهال قامت اتطنش فيهم نفسي سوري قلت لكم قصه حياتى

زبده الموضوع نفس ماقالت مروو لما يكبرون ويفهمون ان هذي مدرسه مو لعب يبين مستواهم

وسلامتها حفيدتج مروو بشرينا عنها شقال عنها الطبيب

 

[caramella]

السلام أمهات
إشلونكم
حق الشماته ريمان لووووووووووول شهرت بالريال ما سوت عليه طلع ذاك اليوم ما بقى أحد ما شهر فيه :016:
مروووو ما تشوف شر بنيتكم إنشالله
اليوم ولدي مسير عند أمي بينام عندها و آنا ضايق خلقي البيت بدونه ضيقة خلق مسوي لنا جو العيار إسمالله عليه :tongue22:
إنشالله باجر بنطلع آنا و أمي و إختي الصبح هم عيالها إجازه بنتريق بره نغير جو
وين تودون عيالكم بالإجازة؟؟؟؟؟

 

[mr000]

السلام أشلونكم..شخباركم.. ريمان من زمان ماطليتي علينا.. كراميلا بيلا شخباركم.. فوز وينج مابينتي هاليومين..قبل شوي تذكرتج كنت بصيدلية مشرف إلا يايه وحده تشتري ادويه حق عيالها سبحان الله من مشيتها وصفار ويهها حسيت إنها توها والده إلا اشوفها تقول حق الصيلي ولدي عمره 19 يوم.. مسكينه كسرت خاطري..والله يمكن والده بعمليه لان كلش موقادره تمشي..الله يعينها.. كراميلا سؤال داش عرض بعيد عن الموضوع.. الكرت اللي يشترونه حق الباص بلندن من وين؟؟ووين سوق شبربوش اللي يقولون فيه شالات ودراريع قطن ومخمل؟؟ رفيج ولدي بيروح مع مرته عقب باجر..وماقط راحوا من قبل..انزين ويستفيلد مول بأي باص أو من أي محطة اندرقراوند؟؟

 

[Fouz]

صباح الخير، شخباركم أمهات
مرو شلونج، سوري بس برد عليج على ما تفيدنا كاراميلا
الله يسلمج الكرت تشترينه من محطات الاندرجراوند و اكيد دام كويتيين أقرب محطة اهي ماربل أرش اللي لازقة بفندق كمبرلاند خل يشترون كرت اسبوعي حق زون 1 و 2 ما اعتقد بيطلعون اكثر من هالمكان تقربا يكلف 26 باوند ركبون يه باص و اندرجراوند، اذا بس يبون الباص يطلع ارخص يمكن 17 باوند ما اذكر، عموما بالمحطة يجددون اللي يبونه
شبرد بوش يروحون له باص 94 من ماربل ارش و ياخذونه من الطريج اللي يودي كوينز واي يعني عكس اكسفورد سيركس، يعني يوقفون ناحية بريمارك مو ناحية سلفردجز علشان ياخون الطريج الصح و هم يتأكدون أول ما يركبون الباص، من يوصلون محطةShepherds Bush Central Ln Stn ينزلون و يمشون خمس دقايق الا اهم بوسط السوق
ويستفيلد الله يسلمج بنفس المنطقة مالت شبردبوش، يعني نفس الباص و ينزلون محطة Shepherds Bush Central Ln Stn و يمشون بو عشر دقايق و يوصلون المول
و اذا بون الاندرجراوند أسهل طريج يروحون محطة اجور رود و ياخذ خط Hammersmith & City Line اللي رايح محطة Wood Lane و ينزل فيها و يمشي شوية الى المول
ان شاءالله تفيدج المعلومات لان توني مدورتها حق رفيجتي رايحة الاسبوع اللي فات

ألحين أقرا مشاركاتكم و ارد علكم، خفت أطول و انا ارد عليكم و مرو محتاجة الرد أخاف ريم ما تعطيني فجة

 

[Fouz]

شلونج كاراميلا، احنا حرفنا p مو b ، و الزرعة يابتها من قبل و اليوم قعدنا نحل بالاوراق اللي عطوها اياهم
اييييييييييييييييييييييي شفته خالد العبدالجليل الله يهديه شكله متغير، بس اهو مو قالوا فيه كانسر الله يكافينا الشر؟؟ الله يشفيه و يهديه
عليكم بالعافية الريوق و يحليله وليدج مسير عند الوالدة الله يحفظها و فعلا اليهال يزهقون من الحنة بس اذا راحوا يصير المكان صخة و بايخ، عسى الله لا يحرمنا شوفتهم يا رب

 

[Fouz]

بيلا شلونج، حبيبتي لا تتضايقين و محد يعرف حق الياهل كثر أمه و دامج راضية عنها مالج شغل فيهم، ما يعجبهم العجب جنهم ملوت الصالونات غصب يطلعون بشعرج علة، انا بلوتي ان شعري دهنييييييييييييييييييييييييييييييييييي يعني اذا وم ما لنغسل تقولين هذي مقطنة، ذاك اليوم بالصالون تقولي شعرج كتيييييييييييييييييير جييييييييييف ( يعني جاف وايد) و بدو تريتمنت جان اقولها انا اصبغه علشان ينشف و انتي تقوليلي جاف، مالت أقول
و ملوت التجميل غصب بشرتج تعبانة و الحمدلله الذي عافانا اللي تنصحج ويهها ما يتطالع، شفيني جني اشتطيت وايد


ريماااااااااااااان شخبارج، شدعوة دازو مسجات و ناسيتني دزي لي اذا اكو شي فيه طماشةة ترى رفيجتج حدها مغلقة
الله وكيلج صار زام كل حزو، الحبيبة اول ما احط راسي على المخدة بدت الحفلة، يعني انا مجابلة الكمبيوتر ما تقوم بس خليني اسكره و اتلحف او اكون يوعانة و توني باكل تبدي تصرخ الله يحفظها


مرو بشري شلون حفيدتج؟؟ حبيبتي والله تعور القلب كله مريضة و عندنا جو رهيب استغفر الله شفتو الغبار أمس بالليل
وعليه علينا يالامهات والدة بعملية و الا تعبانة قلوبنا ما تتحمل ننطر على عيالنا عسى الله ياجرها اللي شفتيها بالصيدلية و عسى ربي ما يضيع تعبنا



يالله يا جماعة بروح أنام دام توها غاطة و ان شاءالله تخلين انام شوية، أشوفكم على خير

 

[bella bambina]

صباح الخير أمهات اشلونكم مع العطله ؟
آنا عطلة اليهال مظيقه خلقي والشغاله مسافرة أرد البيت معفوس والملابس مو مغسوله الشغاله تكون مجابلتهم وبس تسوي لهم ريوق بس ما يقعدون بغرفة وحده عشان لا يتناجرون فعافسين البيت فوق تحت وأرد أشتغل شغل المدرسه
مرو اشصار على بنيتكم وديتيها الطبيب ؟
كراميلا have fun والله يخليلكم ولدكم
فوز الله يعينج على السهر والصالونات اهم أهل النصب لازم يشلخون جود ينفع معاهم ويطلع لهم أحد يصدقهم آنا بالسنه أوالسنتين مرة أدش الصالون وايد مهمله بنفسي وصار لي جم سنه بطلت أصبغ شعري