تجمع امهات العالمية الامريكية

[bella bambina]

السلام أمهات
فوز الباريد يوم 24 فبراير ما شريت ليلحين حق دلول ما فضيت أطلع بدا دوامنا يومي كله شغل وحالي حال اليهال عندي واجبات عيالي الكبار عندهم ملوت العام بس دلول صغر عليها لأني كنت ماخذته حده حده
هلا والله مرو وكراميلا اشلونكم واشلون عيالكم ؟
رييييييييييمان وينج ؟
ساره الله يعينج على الفراره على المدارس وان شاء الله ينقبل بمدرسه زينه

 

[ReeMaN]

مساء الخير يالغاليات شخباركم عساكم بخير ؟؟

شلون ربعي امهات العالميه مروو وفوز وكاراميلا وبيلا وليالي وملكة مامات وام لولو وباجي الامهات انشالله كلكم بخير ... الله يردج

بالسلامه كاراميلا .... وياحليلها فوز اليوم شفتها الله يسهل عليها الولاده يارب مبين عليها الثقل

انا غيرت الاشتراك وانشالله مايخون فيني نفس الاشتراك الثاني .....

 

[mr000]

سلام أمهات اشلونكم...هلا والله ريمان اشلونج واشلون ولدج..

 

[ملكة بيتها]

شلونكم أمهات العالميه شخباركم عساكم بخير
ريمان شلونج حبيبتي ومبروك الإشتراك الجديد وإن شاء الله ما ينقطع معاج النت

 

[ReeMaN]

احم احم السلام عليكم امهات العالميات

شلونكم شخباركم حبايبي شلونج مروو انشالله بخير ابد لا جديد ناطرين الاجازه نستمتع فيها انشاءالله .....

هلا ملكه مامات الله يبارك فيج بعااااد عوومري والله شلون بنيتج انشالله مرتاحه بالمدرسه ؟؟؟

طبعا احم احم الاخت ريمان تكلمكم من بوابه العالميه هههههههههه .... والله شكلي يضحك حاطه اللاب بحضنى وناطره الباب يفتح

اللي يشوفنى يقول اللله يعينها ويا البورصه

 

[mr000]

السلام أمهات اشلونكم..ريمان لو عندي إيقو جان سويت مثلج وخذت اللاب توب معاي بعد شوي بروح أييب ولدي من المدرسه عنده تيوترينج..بس معاي كتاب ومجله على طول بالسياره حق النطره.. يلا باي نشوفكم على خير...

 

[bella bambina]

السلام أمهات اشلونكم واشلون عيالكم ؟
هلا والله ريمان آنا مرة سويتها وشبكت بالايغو وآنا أنطر اليهال
فوز مو تنسين باجر رحلتهم حق الجزيره الخضرة حطي حق بنتج كبوس

 

[Fouz]

شلونكم أمهات ان شاءالله بخير
بيلا مشكورة على المعلومات، بقول حق اختي تروح تشوف لها نفنوف حلو مالي خلق ادور، و الكبوس الله يسلمج مزهبته من ردت من المدرسة اهو و النظارة الشمسية

ريمان شخبارج، زين تسوين تتسلين وقت النطرة، طافكم امهات امس نسولف كل وحدة من سيارتها انا صفطت يم ريمان و نزلنا الجامات و قمنا نسولف شوي، ريمان ان شاءالله اشتراكج يكون احسن من اللي قبله، و على فكرة ترى المشكلة بالمنتدى لان لو فتحتي اي موقع ثاني تلاقينه يفتح بس الظاهر المنتدى ما يتحمل الضغط اللي عليه

مرو شلونج ان شاءالله كل شي زين

كاراميلا اللندنية شخبارج، باجر ان شاءالله اخوي بيرجع من لندن و اخوي الثاني السبت اذا الله كتب، و ان شاءالله توصلون بالسلامة

ملكة عاش من شافج، شخبارج حبيبتي

 

[ملكة بيتها]

شلونكم مامات عساكم بخير
فوز ..شلونج حبيبتي وشكرا عالسؤال ..أنا الحمد الله بس بقزرها عندكم بالتجمع بقاطع تجمعنا اللي مافيه غيري خلاص تعبت وأنا أسولف بروحي ...
ريمان ..شرايج تستقبيلينا بتجمعكم

 

[mr000]

سلام أمهات اشلونكم!! فوز شخبارج.. الحمدلله كلشي تمام.. آنا شكلي بيي يوم حزت هدت عيالكم علشان أشوفكم..ملكه اشلونج.. حياج الله عندنا العين اوسع لج من التجمع..! اليوم ولدي يقول عندهم يوم الأثنين الياي حفله والدخله بدينار.. عاد مادري شنو حفلتهم!!

 

[mr000]

الحفله بس آخر ساعه من الدوام!!

 

[ملكة بيتها]

مروو تسلملي عيونج حبيبتي ..إحنا عندهم بوك ويك الأسبوع الياي وعندهم باريد داي وفي مسابقه لأحسن لبس إدعو حق بنتي تفوز خخخخ

 

[mr000]

أهلين ملكه.. أحنا اليوم خلص البوك فير..شرى ولدي قصص لي شبع..ان شاءالله بنيتج تفوز بالمسابقه..شنو يعني يلبسون على شي معين وإلا على كيفهم؟؟... كراميلا شخبارج..

 

[sara999]

قوه بنات شاونكم شلون عيالكم ؟؟؟؟
الحمدالله الحين عنده مقابله بثلاث مدارس
1-مدرسه الكويت الوطنيه الانجليزيه الحديثه
2-برتش سكول
3- kes
وانشالله ينقبل بوحده منهم ..... اما بالنسبه حق الاولى الي بحولي الكويت الوطنيه هذي اكتشفت ان عندنا خريجين منها بس قدم يعني آخر واحد متخرج قيل 6 سنين يعني جديره باختلاف المستوى ممكن احسن وممكن اسوأ
بس كلهم يقولون احنا يوم كنا فيها كنا وايد شطار ودراستنا قويه ونحب الدراسه بس الحين ما ندري في ناس ما يمدحونها
بس اهم كلهم مشالله الي مهندس والي دكتور والي طيار يحليلهم الله يهنيهم يعني واعين حق عمرهم وقلوبهم على مستقبلهم حيييل

والثانيه البرتش ذامينها الي عندنا ومنغثين منها وبنفس الوقت ناس يمدحونها لي يعني بجرب حظي يمكن الله كاتبله فيها بعد

والكويت الانجليزيه الي بسلوىkes انا ودي فيها يعني غنيه عن التعريف ..... بس يوم رحت لهم اسأل ليش ما دقو علي !!! قالتلي اي مو انتي ولدج على الويتنق بس لما نخلص بالاول من الطلبه الي لهم الأولويه طلعت عيني قتلها حرااام عليج انا مسجلته من ثاني اسبوع من يناير !!!! خذت رقمي ومن ثاني يوم داقه تحددلي مقابله !!! شنو النظام يعني الي ما يرزون وييهم مالهم نصيب ؟؟؟ اشوه اني قطيت ويهي ههههههههههههههههههههههه

ادعوله حبيبي ربي يوفقه بوحده من هالمدارس

بس شنو ممكن يسألونه وشلون طريقتهم مادري شفيني متوتره

 

[ملكة بيتها]

مشكوره مروو على الدعوه اللي تبرد القلب ..اللبس على شخصيه من القصص اللي راح يقرونها بالبوك ويك وكل مرحله لهم موضوع معين تدور حوله القصص فيير ون يقرون قصص عن الشتاء حول العالم فاللبس عن السنو مان \ الآيس كوين ( بنتي ) \ السنو فلاك \ سكيير \ البولار \ والروبن ....
ولا بنتي أول شي تبي سنو مان عقب افطنت تقولي وييييييييييي أنا جيرل ما يصير وبيني وبينج الحمد الله ولا السنو مان بتوهق بتنفيذه

 

[Fouz]

صباح الخير يا أحلى أمهات، شخباركم

اليوم بيودون اليهال رحلة الجزيرة الخضرا و بنتي مشتطة على بالها شي غريب عاد ما دقرتها قاعدة اقولها الللله ابي اروح وياكم تقولي ما يصير انتي كبيرة!!

مرو شلونج و حياج الله جان زين نشوفج و نتعرف عليج، و ياريت بعد نشوف كاراميلا اهي اللي بقت من امهات الكي جي اللي ما شفتها، ان شاءالله توصل بالسلامة و اشوفكم كلكم قبل لا اولد

ملكة هذي الساعة المباركة، حياج الله عندنا و المكان مكانج و ان شاءالله تفوز بنتج

سارة الله يوفق ولدج و ينقبل بالمدرسة اللي يرتاح فيها

بيلا كاراميلا ريمان شخباركم

 

[sara999]

صباح الخير كلكم
اي والله يا فوز دوعواتكم
مشكوره يا قليبي

 

[mr000]

سلام أمهات اشلونكم..سارا الله يوفق وليدج.. ومدرسة الكويت الأنجليزيه ممتازه.. أقصد اللي بسلوى.. في ناس تقول حتى أحسن من البريطانيه.. ان شاءالله يتوفق بمدرسة زينه.. فوز .بيلا ..كراميلا.. ريمان ..أشلونكم.. ملكه شخبارج..بشرينا عن مسابقة بنتج..!! الحفلة اللي بمدرستنا أعتقد موكلهم بنفس الوقت.. مايكفي المكان يمكن الميدل سكول والهاي سكول مع بعض والألمنتري بروحهم أو بس حق الكبار مايندرى..

 

[sara999]

مشكوره حبيبيتي مرو ماقصرتي
اي جدا ممتازه هالمدرسه عيال بنت خالتي ولدها متخرج مها وبناتها ثنتين فيها ليحين
وبنت خالتي الثانيه عيالها فيها بعد
ونفسهم الطلبه يحبون دراستهم وايد مرتاحين يقولولن

 

[bella bambina]

السلام أمهات اشلونكم واشلون عيالكم ؟
العفو فوز دلول نفس بنتج مشتطه من أمس واهي تقول بنروح بالبرنسس باس حق الغرين آيلند وراح نشوف الهورس ومالي خلق أقول لها لا فيه هورس ولا تسوى أصلا هالآيلند بس سكت عنها بخليها تنصدم بروحها
مرو عيال عمتي اللي بيير 9 كل يوم يلبسون لبس طلعه وياخذون منهم كل يوم دينار عشان يبون الفلوس حق حفلة التخرج