تجمع امهات العالمية الامريكية

[caramella]

السلام أمهات
عسى ما شر مروو شفيج معصبه
والله آنا توني قاعده من النوم سكتو النومه حدها معفوسه
نمت 3.30 الفجر قمت 6 حق الصلاة نمت 8 قعدت 10.30 نمت 12.30 وقعدت 2.30 إشرايكم بالنومه ؟؟؟

 

[ملكة بيتها]

كارميلا شلونج حبيبتي بصراحه حدها نومه عساره عسى ما شر ؟؟وشلون ولدج ؟

 

[bella bambina]

السلام أمهات اشلونكم ؟
ملكه الله يسلمج من الشر حبيبتي
مرو لا تعصبين صج غاصين بالواجبات توني خلصت من ولدي وبنتي كانت ماخذه لابتوبها مني عشان تحل الواجبات بالانترنت
دلول وديتها المدرسه لأني وعدتها اذا كلت أوديها المدرسه وأمس الحمدلله كلت شويه الدكتور قال انها صارت زينه بس غيبتها عشان سالفة الأكل فزعت أول وحده من الفجر وطول الطريج تصرخ هورييييه سكول بس لما خذيتها من المدرسه كانت مطنقره بنت ماخذه جنطتها بالغلط وافضحتنا الا ترجعها الحين ما ظلت أبلة ما ساحلتها واهيه بس على كلمه وحده my bag والكل يقول ما صارت هالسالفه الا معاها قصدهم بنتج نسره بس أقنعتها نروح مركز سلطان نشتري جنطه يديده واقتنعت شويه فقيرة البنيه اللي ماخذه جنطتها ما أدري اشبتسوي فيها باجر الله يستر

 

[bella bambina]

كراميلا ذكرتيني بنومتي أيام الحمل
فوز وينج من زمان ما شفناج ان شاء الله تكونين بخير
قالت لي مدرسه اليوم ان فيه ولد ومدرسه من كي جي 2 فيهم نفس بنتي آنا شاكه تكون عدوى بالمدرسه بس غريبه انهم مو بنفس الصف !!!!!!!!!

 

[bella bambina]

اليوم بالهده أبلة ولدي نادتني بتقول لي شي قلت رحنا فيها الولد سود الوجه جان تقول لي بغيت أشكرج على تربيتج الحلوه حق ولدج وايد مؤدب ويساعد الكل ويفتح الباب كل يوم حق الصف كله عشان يدخلون توني بستانس كانت فيه مساعده تعرف دلول جان تقول لها بس ما تعرفين اخته عكسه جان دخلت الصف وسكرت الباب على باجي الصف عشان لا يدخلون ما أدري ليش كله فاهمين بنتي غلط :eh_s(10):

 

[ملكة بيتها]

بيلا تصدقين بنتج ظالمينها ترى أكبر سبب للعناد عند الأطفال هو التركيز على سلوكياته الخاطئه ولومه عليها وبنتج يمكن الكل يلومها وما تسمع المدح فردت فعلها طبيعي بتعاند .......

 

[mr000]

السلام أمهات اشلونكم.. لا والله مو معصبه ولاشي بس مو عادتكم ولا وحده فيكم... بيلا الله يعينكم عالواجبات ومجابل العيال صج مرحله صعبه.. آنا والله كنت حتى ماأرد عالتلفونات ولاأبي أحد يفتح علي باب الغرفه لما أقعد أدرس عيالي خاصه هذا أصغر واحد بسرعه يتشتت ذهنه مدرستين ماانتبهوا حق المشكله عنده ألا لما يي العالميه من أول ريبورت كلهم كاتبين لي easily distracted حتى الماث تقولي يحل الصعب ويغلط بالسهل فتدريسه كان مهمه شاقه!!

 

[mr000]

كراميلا.. الظاهر يبيلج تردين على وصفة العام.. لبن خاثر بالليل علشان تصير نومتج وحده..بس ان شاءالله يخف البرد عندكم علشان تقدرين تطلعين.. فوز وريمان اشلونكم اشلون عيالكم! ملكه صاجه كلامج عدل لأنهم جذي يثبتون الفكره السلبيه بالياهل عن نفسه.. علشان جذي دايما يقولون لاتقولين عن الياهل جدامه أنه شيطان أو كسلان أو جدام الناس وهو يسمع لأنه راح تثبت هالفكره بمخه من كثر مايسمعها!!

 

[ملكة بيتها]

هلا مروو صاجه أنا من كثر ما قريت عن تربيه الطفل الكل اتفق على إن الطفل يتربى وتتكون عنده الشخصيه الإيجابيه بتعزيز السلوك الإيجابي وعدم التركيز السلبي عند الطفل ......ووصلت إن التربيه سهله يعني إذا تبين طفلج يكون طفل مطيع دايما كرري عليه إنت مطيع وتسمع الكلام وجذي ....
وكراميلا ما كو إلا اللبن الخاثر مثل ما قالت مروو

 

[caramella]

السلام أمهات
بيلا مبرووك دوام بنتج بس فقيره ما تهنت خذوا جنطتها جنها ولدي لأحد ياخذ أغراضه يا ويلييي عالحنه
وياحلووو الكلام اللي قالته الأبله عن ولدج إسمالله عليه بس شتبي هالملقوفه ناطه ضيقت حلقج على بنتج و أكره ما عندي المقارنه بين الإخوان يا ربي الله خلق و فرق هالشي ما يعتمد عالتربيه هالشي يعتمد على شخصية الياهل نفسه ولا تربيتج وحده لهم كلهم
ولا يضيق خلقج يا وخيتي أهم شي إنج تعززيزين الثقه فيها إنها مطيعه و تسمع الكلام مثل ما قالت ملكه
ملكه والله ما شر يا وخيتج بس من الملل والحمدلله ولدي بخير الله يسلمج بعده ياخذ المضاد لازم يكمل الكورس
مرووو يا ربي اللبن يسحن القلب ما أحب اشرب وايد منه و أحب اشربه بالنهار مو بالليل سكتي إنشالله ما تحوشني سالفة إلعام إستغفر الله تميت إسبوع كامل ما نمت كلش
فوزززز عسى ما شر طمنينا عليج لو بكلمه فقدناج عسى المانع خير
ريمان تغط تغط تالي تطلع لنا إنشالله لاهيه بالعافيه

 

[bella bambina]

صباح الخير أمهات اشلونكم واشلون عيالكم ؟
مشكورين ملكه ومرو وكراميلا على مؤازرتكم جبرتو بخاطري الله يجبر بخاطركم
فوز وريمان فقدناكم عسى ما شر طمنونا عليكم
كراميلا لا تحطين فكرة الملل ببالج حاولي تلهين نفسج بأي شي روحو مكان مسكر تمشو فيه حتى لو ماتتشرون شربو قهوه وطالعو الرايح والراد لأن قعدة البيت تييب المرض والاكتئاب آنا من عطلت وقاعدة بالبيت أوصل اليهال وأقعد أقرا جرايد لما وقت طلعتهم من المدرسة طبعا آنا مو من النوع اللي يحب قعدة البيت بس مجبورة زوجي ما يحب طلعات رفيجات وتمشي أنطر الويك اند عشان يفضى ويطلعنا عشان جذي أكره العطل وعلى ان دوام الدرسات لوعه تحاتين الموجهه والمشرفه والوكيله والناظرة بس هم أعتبره تسليه على الأقل أشوف ناس وأسولف مع أحد ان شاء الله ترجعون بالسلامه وتتطمنين على ولدج

 

[mr000]

سلام أمهات اشلونكم!! فوز طمنينا عليج قمنا نحاتيج مو عادتج!! ريمان عسى ماشر طلي علينا شويه طمنينا!! بيلا أذا هالمره مدرسه تليقفت جذي حقريها.. بصراحه آنا بالتكامل سووا حق ولدي جذي بس مو عن شطانه لا كله سالفة انه ماينتبه بالصف وكنت اخانقه وابوه يخانقه لما صج كره المدرسه تالي عرفت ان مدرسته الهنديه وايد حاطه عليه وايد مو شويه يعني يقولي الصبيان يتكلمون ويضحكون ويقومون من مكانهم وهي تضحك معاهم عادي ولو ولدي بس يبتسم سوت له سالفه.. تخيلي مره كان بغريد 3 ودش الصف بسرعه وهي واقفه عند الباب وحاشها شويه يقول والله قلت سوري بس ماسمعتني تقول لا ماقال وطول الحصص وهي مره توديه حق الناظر ومره توديه حق الوكيل ومره توقفه بره ومره داخل عند الطوفه يعني بهدلت الولد طول اليوم وأقولها ليش تقولي هو ساكت مو مهتم..شنو مو مهتم الولد خايف ومستسلم تسحبه من مكان لي مكان يعني اشتبي يسوي تقول شكله موندمان على غلطته ..يعني ياهل بو8 سنين تبيه يموت من البجي ويشق هدومه علشان تحس انه ندمان!! ومن يومها ليش كلمتها حطت عليه وصار هو الأسوأ بالصف حسره عليه يتنفس!!بس الانجليزوالأمريكان ماعندهم هالأسلوب!!

 

[mr000]

كراميلا آنا لومنج بس أروح كل يوم أتريق والا أشرب قهوه في ويستفيلد مول.. ولاقعدة الشقه.. بس عاد يبيلي خيشة فلوس أذا بروح كل يوم.. لأني ما أمسك نفسي لازم اشتري!!ان شاءالله تردون بالسلامه.... ترى فيه عطله 4 أيام مالت العيد الوطني..يعني لاتحاتين المدرسه!!

 

[bella bambina]

السلام أمهات
مرو آنا أعترف ان دلول عكس اخوها اليوم يبجي يقول خواتي ما يحبوني ( نسر ) اذا فيه أحد بيعلمه الشطانه واللعانه طبعا خواته
وينكم فووووووز و رييييييييييييمان شغلتونا عليكم ؟
كراميلا اشلونج واشلون ولدج ؟ ما قزيتو اليوم ؟

 

[caramella]

السلام أمهات
إشلونكم و شخباركم إنشالله بخير
بيلا الله يعينج على سالفة تقومين من الصبح و إنتي إجازه ما تقدرين تردين تنامين دامج طلعتي من البيت تطير النومه يا ربي
والله مروووو وبيلا اليوم نطرت زوجي لما رد و رحنا وستفيلد وخذيت ولدي معاي وإستانسنا غيرنا جو شوي
شريت لي جم شغله و كليت بمطعم و رديت توه قبل إشوي
والله الحمدلله ولدي بخير الله يسلمج بيلا والحمدلله خلص اليوم المضاد إنشالله يا ربي فيه الشفا إفتكينا من هالمضاد إلوع جبدي كل يوم عشان يشربه يبجي طعمه مو حلووووو
مرووو وايييييييييي عمى بعينها هالمدرسه شنو قلبها أسود ياهل عمى بعينج عاد بالعاده الهنود قلبهم ابيض بس هذي قطيعه تقطعها قلبها إشكبره
جان إشتيكيتي عليها بالإداره إنها قامت تعامله اسوأ لما إشتيكيتي حررررتني هالخايسه الهنديه
فوزز و ريمان بليييززز لا تطولون الغيبه ترى قمنا نحاتي

 

[Fouz]

صباح الخير أمهات شلونكم
عذروني هاليومين ما أقدر أدخل أو أرد عليكم، أبو زوجي تعبان وايد و صار له 3 أيام بالعناية المركزة و لاهين معاه، بليز ادعوله الله يقومه بالسلامة
و من قعدة المستشفى حايشني عوار بظهري عسى الله يستر و ما اولد مبجر
أشوفكم على خير ان شاءالله

 

[bella bambina]

صباح الخير أمهات
اي والله كراميلا أوصل اليهال وأقعد أجابل الجرايد والتلفزيون وأتريق 3 مرات وبعدين أقول مادري ليش متنانه
هلا والله فوز سلامته ما يشوف شر عمج ان شاء الله يقوم بالسلامه لا تروحين كل يوم انتي عذرج معاج أو روحي طلي شويه وردي ريحي أكيد بيعذرونج انتي بروحج تعبانه

 

[bella bambina]

فوز على طول اقرو عليه قرآن و شربوه ماي زمزم تكونون قارين عليه الفاتحه 7 مرات والمعوذات 3 مرات والكرسي مره وادعو له هالدعاء :
أسأل الله العظيم رب العرش العظيم أن يشفيه
أسأل الله العظيم رب العرش العظيم أن يشفيه
أسأل الله العظيم رب العرش العظيم أن يشفيه
أسأل الله العظيم رب العرش العظيم أن يشفيه
أسأل الله العظيم رب العرش العظيم أن يشفيه
أسأل الله العظيم رب العرش العظيم أن يشفيه
أسأل الله العظيم رب العرش العظيم أن يشفيه

 

[mr000]

السلام أمهات اشلونكم شخباركم!! فوز سلامته عمج الله يشافيه ويقومه بالسلامه ومثل ماقالت بيلا أنتي معذوره مولازم تقعدين طول الوقت والقعده وايد موزينه حقج بهالفتره لازم تنسدحين وترفعين ريولج على مخده!! بيلا آنا نفسج لازم قعدة الصبح حق توصيل المدرسه ومع أن ريلي بالبر بس مااستفدت بطلعه ولاشي بس أوصله وأرجع حق الصغيره طول النهار قاعده معاها وتالي أرد أطلع آخذه!! اليوم مودينهم رحله حديقة الشعب بس مودينهم مبجر 8 ونص وصلوا يقول صارلنا ساعه بس جذي نفتر الألعاب ماشغلوها وكل شي مسكر و11 لازم يروحون ياكلون و12 يرجعون.. عاد ولدي بدامه رايح وهو مومشتهي ألحين طول الوقت يتحلطم.. بس آنا حاقرته!! كراميلا زين سويتي طلعتي شويه.. بس لاتنسين تاخذين لج من السنفره اللي بويستفيلد!!

 

[mr000]

سلام أمهات اشلونكم.. فوز اشلونج واشلون عمج ألحين.. بيلا اشلون بنيتج عسى بدت تاكل أحسن من قبل...ريمان وينج شخبارج... كراميلا أشوه وليدج حبيبي خلص الدوا.. وعليه هاليهال جنه تعذيب لهم شرب الدوا.. بنت ولدي كانت جذي وبالآخر ترجعه .. غيرنا قلنا خل نستخدم تحاميل للحراره قامت تخاف حتى من تغيير الحفاظه..مسكينه تكسر الخاطر...! اليوم وزعوا الريبورتات.. يعني زوين الحمدلله.. بس هم الأنجليزي نفس السالفه مو حاطين درجة الشهر لأن المدرس تغير ... ناطرين الاجتماع يوم 14