تجمع امهات العالمية الامريكية

[caramella]

فوز إنشالله الله يوصلج لي تمامج وتولدين بالسلامه وترضعين طبيعي تجربه حلوه و مفيده و متعبه ومريحه بنفس الوقت
تفكج من التعقيم وقياس كمية الماي والحليب و حرارة الماي مال الممات بس متعبه لأن كسرة ظهر الصراحه
إهي صج الرضاعه الطبيعيه تعطي الياهل صحه و مناعه بس يا ربي اللي بس يرضع من أمه تحسينه ذاوي و ما يزيد وزنه بسرعه
اليوم ولدي رد الأغراض اللي عطيته إياه مستنفر ليش كله أكل آنا أبي لعبه نفسهم أبي octopus
قلت بقلبي إنت تخلينا نشتري ألعاب حيوانات كله سياييير و كور
فوز آنا حطيتهم بعلب محكمة الإغلاق حلوه محكمة الإغلاق لووووووول
عشان ما تطلع الريحه والبرتقاله قصصوها و كلوها بالكلاس
ليش بسكوته ماكو أشياء في وايد أشياء
مثل
زيت
وزيتون
بصل
شوفان
زعتر عدل
إخطبوط
وعل,---->هذي صعبه إشوي
نعامه
بيلا مبروووووووووووووووووووك إسمالله عليها بنيتج الفال حق دلول ترضخ وتسوي لها جم ورقه بدون عناد
مرووو مبروووك بعد شجعيه الحمدلله في تقدم وعليه قاعد يحاول مو مطنش و إنشالله الإمتحان الياي A

 

[caramella]

السلام عليكم شلونكم حبايبي ( ماني قايله مامات بسكوته مونستكم تناديكم بنات )
كارميلا ..مبروك تعريب الكمبيوتر بس والله صار عندنا ثقافه هالجيل يكتب عربي بأحرف إنجليزي وكنت ما أفكر أقرأ شنو يكتبون بس إنتي كنت أقعد على ردودج ولازم أفهم اللي كاتبته يعني علمتينا يعطيج العافيه ..
مروو ...الحمد الله إن شاء الله باجي الإمتحانات يشد حيله وترتفع درجاته
بيلا ...مبروك الa ربي يوفقها يارب والفال لعيالنا كلنا ..

هلا والله بمامات لا لا كلش شي ولا ماماتج
الله يسلمج هبوا بهاللهجه
والله آنا بسرعه تعلمتها و حبيتها وايد لأني أطبع بالإنجليزي أسرع من العربي
الحين إشوي إشوي قاعده اصير سريعه بالعربي عشان رفيقات دربي
اعطي كورسات افا عليج :dddds:
إشلون بنيتج بالخليج إنشالله مرتاحه

 

[ملكة بيتها]

كارميلا سجليني بالدوره عندج ترى صج شي يقهر تقعدين يمهم شنج من العصر الحجري ودي أتفلسف بس أخاف يطلع غلط ههههههه
وشكرا على سؤالج الحمد الله بنتي وايد مرتاحه بالخليج

 

[bella bambina]

صباح الخير أمهات اشلونكم ؟
الله يباركم فيكم والله يوفق عيالنا
فوز آنا مبطلة الفولدر بالسيارة ما كان فيه ورقة حرف o وكان فيه ورقة عمل حق طالب ثاني اسمه عبدالعزيز ولما أمس قلت حق الأبله تقول لأ آنا بنفسي حاطه الأوراق بدال لا تقول سوري وتعطيني غيرها فقلت لها آنا بعد متأكدة لأني مبطله الفولدر بنفسي بالسياره وقلت لها عن الورقة اللي حاطينها بالغلط وما ردت علي
حطيت حق دلول orange &owl

 

[bella bambina]

بنتي الكبيرة تقول أمس ما طلعو دلول وصبيين حق ال big toys فسألت الأبلة ليش قالت لأنها ما كانت راضية تسوي ورقة العمل فخلوهم يسوونها زين يسوون فيها يمكن اتأدب مع اني ما أشك بهالشي

 

[Fouz]

صباح الورد شلونكم أمهات،،، اليوم بالغصب قمت من النوم،، ماكو شمس كلش و الوضع يشجع على التلحف و النوم مرة ثانية

مشكورة كاراميلا على الدعوة الحلوة و صاجة احس الياهل ما يشبع بس ما يمنع تخلطين، اعتقد عادي مثلا اذا انا بالدوام لابد يرضع من الصناعي ما باليد حيلة، انا اقول حتى لو شهرين نعمة انا راضية لان في بنتي ما رضعتها ابد كنت وايد تعبانة و اهي عسرة و الرضاعة يبيلها طولة بال

ملكة شخبارج؟ عسى الله يوفق بنيتج ان شاءالله بس عندي سؤال،، شلونج ويا الطريج؟ بعيد عليج ،، زحمة،،، والا الوضع زين؟

بيلا شلونج، انا الاسبوع اللي فات حطولي ورقة واحد اسمه عبدالمحسن بس لما رديتها لهم مس ميرنا اعتذرت، اتوقع انهم نسوا يحطون الورقة بس ما يبون يطلعون غلطهم، بس ولا يهمج من اليوم و رايح اي ورقة تييني راح اكتبها هني احتياط

مرو و ريمان و بسكوتة شخباركم؟

 

[Fouz]

بنتي الكبيرة تقول أمس ما طلعو دلول وصبيين حق ال big toys فسألت الأبلة ليش قالت لأنها ما كانت راضية تسوي ورقة العمل فخلوهم يسوونها زين يسوون فيها يمكن اتأدب مع اني ما أشك بهالشي

الله يعينج بيلا شكلها دلال صج راسها يابس بس ان شاءالله تتغير خاصة لما تشوف اليهال يروحون يلعبون يمكن تتحسف و تسمع الكلام

 

[mr000]

سلام أمهات اشلونكم! فوز موبس أنتي اللي غصب قمتي آنا كلما طق المنبه مال النقال أرد أحطه بعد 5 دقايق وأنام 3 مرات سويتها وكل مره أنام صج بهال5 دقايق انزين ليش هالعذاب حطي ربع ساعه من أول مره وخلاص!بيلا الله يخليلج دلوي عندنا وعندج خير من العناد بس البنت سبحان الله تحب المنافسه وأنها تكون الأحسن يعني بالدراسه لاتخافين ان شاءالله ماراح اتعبج لما تشوف المس تشجع البنات الشطار راح تقلدهم علشان تصير أحسن منهم آنا بنتي كانت جذي بس الحمدلله بالدراسه شاطره.... بس ... ياربي ... شوفولي حل أشلون أقدر أغير النك مالي بدون ماأسجل من يديد.. أبي أحش ماأقدر....المهم بيلا خليها تطلع عنيده وباسها قوي والله أحسن لما تتزوج ريياييل هالأيام ماينفع فيهم ألا الحريم اللي جذي!!

 

[ملكة بيتها]

صباح الخير مامات عساكم بخير
فوز ... هلا بالغاليه بالنسبه للطريج زوجي يودي بنتي الصبح يقول فيه زحمه بس ماشي الطريج والطلعه أنا أييبها فما تصادفني زحمه اللهم لو تأخرت شوي ما أحصل للسياره موقف عند المدرسه يعني الزحمه بس للمواقف اللي عند المدرسه ..

 

[Fouz]

هلا مرو، والله ما تنلامين الجو ابد ما يشجع، بس انا ما اضبط المنبه كل خمس دقايق لأ شوفي تلفوني تقدرين تحطين 4 منبهات فاذا سكرت الاولي الثاني يرن بعد 10 دقايق مادري شنو هالعذاب
بالنسبة حق النك لازم تدخلين منتدى الشكاوي و الاقتراحات و دزي لهم انج تبين تغيرين الاسم، بس اظن ماكو فايدة اللي يعرف انج تدخلين هالتجمع بيعرفج حتى لو غيرتي الاسم مالج الا الرسايل الخاصة

ملكة الحمدلله ان ما تصادفج زحمة لانها فعلا تغث، تصدقين انا من البيت الى لفة المدرسة ما اخذ 5-6 دقايق بالطريج بس الله لا يوريج مواقف المدرسة هذي يبيلها 10-15 دقيقة طبعا غير قليلين و قليلات الادب اللي يدشون عليج باللفة ما جنج ناطرة صارلج ساعة جنه بس اهم اللي مستعيلين، فصج يرتفع ضغطي :eh_s(14):

 

[mr000]

سلام أمهات اشلونكم! أعتقد في مدارس خاصه عطلت هالأسبوع أو راح تعطل الأسبوع الياي علشان الكريسمس... مو أحنا ياخلاف... فيمكن تخف الزحمه شويه! ملكه أنتوا طريجكم لي الخليج وايد زين الصبح آنا جربته لما فكرت أنقل ولدي هناك قبل لاأنقله العالميه كان الصبح موزحمه بس أكيد الظهر زحمه بس ألحين من العالميه والله زحمه صبح وظهر!!

 

[mr000]

فوز آنا مهما أغير النك أكيد بنعرف من قرقتي!!محد يكتب مواضيع تعبير غيري!!

 

[ملكة بيتها]

فوز صاجه القليلين الأدب وايد عند المدارس شوفي إحنا ساحه كبيره جدام المدرسه مره أنا دشيت وجدامي سياره تدرين شنو سوا وقف ونزل من السياره وطبعا هو لاين واحد الشارع مافيج تروحين يمين أو يسار بس هالخط وأنا وراه وأدق له هرن ما كو عمك أصمخ والسيارات وراي شكثر القليل الأدب الثاني اللي وراي يقوم نفس الحركه هم يوقف وينزل فشنو صار حسيت نفسي فار ماني قادره أتحرك والبوابه اللي آخذ بنتي منها بعيده وايد فطريت وكلي أسف إني أصير قليله أدب مثلهم وأنزل آخذ بنتي وطبعا تسكر الشارع ما في مدخل أبد ...
قرققققه وايد صح بس من القهر
مروو ..صاجه ما في زحمه وايد بطريجنا ولا تغيرين نكج بس الحل بالرسايل الخاصه ...

 

[caramella]

السلام أمهات
حياج الله ملكه أفا عليج أي وقت تبين أعلمج والله وايد سهله هاللغه
بيلا والله حره يهملون و إقولون حطينا آنا ما أحب أحد يجذب يعني بدون تشبيه بس حتى الخدامه أقولها قوليلي تعبانه و ماسويت هالشغله ما راح أزعل ولا تجذبين و تقولين سويتها
فوز ومرووو قومة الصبح عذاب خصوصا لما أتذكر إن في زحمه بالطريج
فوزإي بليز جان زين إذا قدرتي تكتبين لي شنو خذوا كل يوم إذا قدرتي إنتي و بيلا و بسكوته أولياء أمور كي جي 1 بليز ولا عليكم أمر لأني إنشالله ماشيه لندن الخميس 17/12 بآخر يوم دوام لهم و شكلي بطول لي بعد الإجازه إحتمال 3 أسابيع بعد الإجازه فكرت طويلا من ناحية هالموضوع على أساس أرجع بعد إجازة كرسمس على طول بس الكل إقولي ما يسوا تردين كيجي1 سافري إستانسي قبل لا تنحكرين بالتدريس
وبعد المشاورات سألت أبلته قالت لا تحاتين آنا اقولج تقريبا إشيبياخذ بهالفتره و إنتي علميه إهناك

 

[bella bambina]

صباح الخير أمهات اشلونكم واشلون عيالكم ؟
كراميلا زين تسويين سافري غيري جو وعلى ولدج عادي يغيب بس سحبي له أوراق عمل من الانترنت يتسلى فيهم يقص خطوط مستقيمه ومنحنيه و أوراق عن الألوان والأشكال والأرقام والحروف اللي خذوها وان شاء الله تستانسون وتروحون وتردون بالسلامه ان شاء الله

 

[ام الحوراء]

السلام بنات انا يديده يشرفني اني انضم لكملاني وااايد استفدت منكم يعطيكم العافيه بس امانة مو كل الصفحات قريتها ,
انا الحين عندي مشكله رحت بسجل بنتي قالتلي التسجيل شهر واحد بس للاسف بنتي مواليد 1-2007 راح تدش حضانه مو اولى روضه عاد اهي الحين بحضانه اتوقعت على شهر 9 الياي يدخلونها روضه تصير 3 سنوات و8 شهور يعني ما بقى شي على الاربع

شراايكم بنات تتوقعون في حل ؟؟؟

لا وشي ثاني قالتلي راح اتزيد الاسعار 5% هااااا قولولي شرايكم

 

[caramella]

السلام عليكم أمهات
إي والله بيلا إنشالله بسوي اللي قلتي عليه خل أشتريلي printer هاليومين و أقعد أطبع في هالأوراق و آخذها معاي إنشالله
أم الحوراء حياج الله نور التجمع
الله إعافيج والله ريمان ما قصرت فجت لنا هالتجمع منه نفيد و نستفيد بنفس الوقت و كلنا بنات التجمع اكثر من خوات ولا وحده فينا تبخل عالثانيه بأي معلومه أو مساعده تتعلق بالمدرسه
الله يسلمج آنا أشوف وحده عند باب الهده ولها نيرسري وهم نفس مشكلتج ولدها مواليد شهر يناير وحاولت إنها تدخله كيجي 1 ما قدرت
عقب ودته الغانم دخلوه كيجي1 قالولها العالميه ما تقدرين تنقلينه عندنا إلا لما يصير غريد2 ونسويله إختبار ونشوف إذا يقدر يمشي مع طلبتنا في قريد 2 ولا إنزله غريد 1 ثاني شي وتقول يننها ولدها كلش ما حب المكان فا قررت إنها تدخله نيرسري بالعالميه ولا هالبهذله
وصاجه نفس إلعام التسجيل شهر 1 بس ترى ديري بالج النيرسري بسرعه يسكر لأنه كلاسين بس
فإذا إنتي فعلا راغبه بالمدرسه قوليلها بدفع 100 دينار من الحين بحجز لها كرسي عادي يرضون ولما يمتحنونها على شهر 3 إذا نجحت يخصمون فلوس الإختبار جنه 35
أو45 دينار والباجي يكمل فلوس رسوم الدراسه أما إذا ما إنجحت الله لا يقوله ياخذون رسوم الإختبار ويردون لج كاش باجي ال 100 دينار
إنشالله أكون أفدتج
وليييييييين ليش هالزياده بعد إبروحه رسومهم ماشالله لاإله إلا الله

 

[نواري]

حبيبتي mrooo اشلونج بغيت اسالج عن ماده الرياضيات والاجتماعيات ولدي وايد يشكي وخصوصا من الرياضيات انها ماده وايد صعبه ومو قاعد يفهم تتوقعين شنو الحل لاني قريت مره انج تتشكين من صعوبه هالماده ما في معهد او مدرس خصوصى تعرفينه ممكن يساعد ولدي واكون ممنونه لج يا قلبي

 

[mr000]

هلا والله نواري سكتي هالسنه الماث مشكله آنا قمت أشتكي لطوب الأرض من كثر ماآنا قاعده أحاتي ولدي خو هالسنه متخسبق حده صج موكل مدرس يقدر يفهم الرياضيات عدل العام مس أسينبيرج زوجة الناظر كانت ممتازه الله يسلمج هم العام كانوا مقسمينهم مستويين ناس تروح pre algebra وناس تروح math عادي بس قاموا هالسنه وخلوهم كلهم يدرسون algebra فصار صعب عليهم أنا ألحين مسجله ولدي بالتيوترينج بمدرسته يومين بالأسبوع صارله شهرين وشكلي بكمل فيه لي آخر السنه!بس هم والله السوشيال صعب هالسنه مع أنه مدرسهم مستر شيكري وايد زين ويعطيهم plan حق كل أسبوع ويعطيهم أوراق review بس هم والله درجات ولدي مو عاجبتني لوما درجات البروجكتات شويه قاعده تساعده!والساينس كانت المدرسه الهنديه قبل امتحاناتها سهله وياخذ b بس تغيرت ياهم واحد أردني امتحاناته صعبه وألحين ولدي يقولي هم راح يتغير بعد الكريسمس! لو ظالين عالهنديه أرحم!

 

[mr000]

أم الحوراء حياج الله معانا! بعد بيزيدون الرسوم ؟ الله يبشرج بالخير خل أروح أدورلي وظيفه شكلي بشتغل بمدرستهم علشان يسوون لي خصم آنا أشوف اللي بالتسجيل والمحاسبه كلهم عيالهم معاهم اشدعوه يقدرون يدفعون كل هالرسوم لو مو معطينهم خصم عدل!يعني ولدي سنه اليايه ان شاءالله راح يكون 3040 دينار بعد مع زياده 5% كم يصير؟؟ تصدقون تفاجأت مره لما شفت بالأنترنت أنها كثر رسوم جامعات بريطانيا!الله كريم والله اللي جرب مدارس الحكومه مثلي يقول والله اشتري راحتي ولاحرقت الأعصاب هناك!