تجمع امهات العالمية الامريكية

[Fouz]

السلام عليكم
ريمان شخبارج ،، انا مع الشرع ،، وايد أسهل هههه كاراميلا ولدها جايد ما ينقدر عليه،، عسى الله يخلي لكم عيالكم،

كاراميلا شخبارج، عسى الله يكتب لج روحة لندن و تستانسون فيها يارب، و انا اقول فكري بالموضوع عدل بورش ماكو

كاراميلا و ريمان اذا انتو تعانون من مص الصبع انا بنتي مو راضية تقط المصاصة و اقولها بصورج و اوري الصورة حق مس ميرنا بسرررررررررعة تحذفها و تقول مابي بعدين يعيبون يعني تدري انه شي يفشل و مصرة تستمر فيه

مرو عظم الله أجركم، و عسى الله يرحم ميتكم و موتى المسلمين أجمعين و الله يعينج على العزا يالله يمدي الحين لان اذان المغرب ماشاءالله مبجر فيادوب تلحقين عسى الله ياجركم

 

[بسكوتة]

اشلونكم امهات ولهت عليكم

 

[bella bambina]

هاي أمهات
أهلين كراميلا ودي أسوي فيج نفس الشي وأكتب بلغه ثانية وأخليج تمسكين قاموس عشان تقرين مارة بنتي تكلمني عصبت عليها عشان بركز شوفي عندج هالأسبوع بس واذا طافت المدة كتبي لنا بالانجليزي وايد أسهل :eh_s(6):
مروو الله يعظم أجركم الحمدلله على كل حال
فوز اشلون بنتج مع أوراق العمل بنتي بعضهم معاندة والأبله مو قادرة عليها وما رضت تسويهم بالصف ويوم الخميس كانت طايحة بالصف ومتعوره جبهتها شويه

 

[bella bambina]

هلا والله بسكوته توله عليج العافيه

 

[mr000]

سلام أمهات اشلونكم شخباركم!بسكوته شخبارج!بيلا والله آنا أقعد ربع ساعه علشان أقرا اللي كاتبته كراميلا وساعات أطوف كم كلمه ماأفهمها بس كسرت خاطري كراميلا قلت خل أسكت مابي أتحلطم!!

 

[بسكوتة]

هلا فيكم - يوم الخميس غيبت ولدي ما ادري عطوهم شي طلبات ولا لا الكي جي 1

 

[bella bambina]

لا بسكوته ما عطوهم شي
لا عادي مروو كراميلا تدري ان احنا نحب نطفرها ونتغشمر معاها

 

[caramella]

سلالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالام
عاش العربي عاش عاش
هيا هيا هيا عرباويه
تعرب تعرب خلاص غشتغل العربي
يببو لي ما أدري ريلي إشسوا فيه و لأن من ينا من لندن وداه شارع بن خلدون حطاله عربي بس ما يشتغل ما أدري إشفيه وعيزت أقوله وده و مشغول ما يقدر إوديه لما اليوم تخصرت له بالصاله قلت له ما يصير جذي ربعي تعبوا ما يقدرون يقرون كلامي قال يا معوده أهو يبي أشوف
ما أدري إشطقطق فيه لما طلع العربي
أعتذر لتضيع وقتكم و يبت لكم دسلكسيا إب لهجة القزيزه
مرووو الله يرحمنا برحمته عظم الله أجركم إستغفر الله ما حبيت 2009 متى تخلص بالنسبه لي كئيبه إستغفر الله
إنشالله يارب السنه اليايه تكون سعيده خاليه من الأحزان
ما تشوفين شر ريمان حبيبتي
فوز تصدقين آنا كله أحس إن ولدي الوحيد اللي عنده هالمشكله أثر مو بس إهوا
فوز قطع المصاصه وايد أسهل من الإصبع على الأقل المصاصه تقيطينها بالزباله و إنتي بكرامه بس الإصبع وين تودينه
حطيت له مره على صبعه ولا فاد قمت من الصبح إمصمص فيه ولا همه
أقوله تمص صبعك بالمدرسه إقولي لأ أخاف إعيبون علي لووول
وخل نطلع وإشوف ياهل إمص صبعه حده يفرح ويا الويه
بيلا فرجت فرجت لا تعصبين عليها حرام
بدعت دلووووول أمبيه ساحليها لازم تسوي الأوراق ولا ما تستفيد إهما حتى التلوين يبونهم يلونون عشان تتقوى إيدهم
بسكوته الله يسلمج ولدي ياب الفولدر اللي فيه الأوراق اللي غشتغل فيها الاسبوع اللي فات مع قصه يقراها ويردها الخميس الياي و وورقه يبون فيها أغراض من البيت تبتدي بحرف O
آنا حطيت
onion
oil
olives
orange
وفي بعد
octopus
ostrich
oven
oat
owl
oyster
oregano
oryx

 

[Fouz]

صباحكم ورد، شخباركم أمهات ان شاءالله كلكم بخير

بسكوتة توله عليج العافية بس لا تقاطعين

بيلا سلامتها دلال انا قالت لي بنتي ان دلال تعورت و حطولها كريم يحليل اليهال يقولون كل شي، و الله انا بنتي كاتبة مع المدرسات بس أمس يننتني ابيها تكتب حرف س مو عارفة كله تكتبه من اليسار فتطلع مقلوبة و تعصب

مرو شخبارج و الحمدلله كاراميلا حلت الأزمة و ردت تكتب بالعربي

كاراميلا شلونج، و بالمبارك العربي مادري شلون يكتبون اليباب جان يببي لج المشكلة انهم يدرون ان شي يفشل و يسوونه و صاجة اذا شافوا احد مثلهم يتشققون، بنتي الله يسلمج لازم 3 مصاصات و الا ما تنام،،،، وحدة بالحلج و كل ايد ماسكة وحدة و كل وحدة لون وحدة تسميها ماما ووحدة بابا و اللي باسمها تحطها بالحلج، تصدقين لازم احط لها شي مر يمكن تكرههم و تفكني مع انها تعشق المصاصات و تدخل بعالم ثاني اذا امسكتهم
مشكورة على الكلمات و اليوم وديت لها 3 العاب صغيرة تبدي بحرف o

ريمان شخبارج ان شاءالله زينة


يا جماعة منو فيكم خبيرة بمصر؟؟ اللي تعرف لها تبلغني ومشكورين

 

[mr000]

سلام أمهات أشلونكم! والله سالفة المصاصه والأصبع هذي مشكله أشوه ماعطينا بنت ولدي ولاتعرفها لأن صج صعب تقطعها تالي أذكر كان عندي يهال بالروضه أييبون المصاصه بجنطة الأكل تشوفينه يروح ينخش يمصها شويه ويردها جنه واحد يطلع يدخن ويرجع مساكين والله لاتلومونهم ريياييل مايقدرون يقطعون الزقاره سنين

 

[bella bambina]

صباح الخير أمهات اشلونكم ؟
الله يسلمج من الشر فوز دلول ما عطوها ورقة حرف o ما عطيتها شي
كراميلا مبروك علينا العربي الحمدلله
مروو ولا آنا عطيت حق عيالي مصاصة ولا حتى عطيتهم حليب قواطي رضعتهم على سنتين وسنه ونص ويقولون يطلعون حنونين والله اللي يشوف دلول ما يصدق هالحجي

 

[mr000]

أي والله بيلا كلامج عدل آنا علشان الدوام حدي أرضعهم 5 أو 6أشهر بالأضافه لحليب القواطي يكملون عليه لي السنتين بس بنتي الوحيده اللي رضعتها 9 أشهر علشان كان الغزو وماعندي دوام وماشاء الله صج وقايه من الأمراض ومشت بسرعه 9أشهر وذكيه بس من ناحية حنونه no comments الأخت عضوه بالمنتدى وتجيك على مشاركاتي!! أفهموها بأه!!

 

[Fouz]

شلونكم أمهات
ماشاءالله عليكم فعلا الرضاعة الطبيعية ماكو مثلها بس للأسف انا ما رضعت بنتي كلش ان شاءالله ربي يكتب لي و ارضع البيبي اليديد

 

[mr000]

سلام أمهات اشلونكم!فوز ان شاءالله تولدين بالسلامه وصج حاولي ترضعين البيبي لو 6أشهر وايد زين حق صحته وتصدقين بال9 أشهر هذي اللي رضعت فيها بنتي نزل وزني 15 كيلو بدون رياضه ولاريجيم بس ماكان عندي خدامه فما أقعد طول اليوم!! اليوم مدرس الماث دزلي أيميل أنه الحمدلله نتيجته أحسن من قبل يعني مو ممتاز بس c وباقيله امتحانين ان شاءالله مايخوره فيهم وترتفع درجته!

 

[Fouz]

الحمدلله مرو و عسى الله يوفقه و تتحسن درجاته كل مرة

و الله يسمع منج و ان شاءالله اقوم بالسلامة و ربي يقدرني ارضع لان فعلا فوايد الرضاعة حق الام و الياهل

 

[bella bambina]

هاي أمهات الحمدلله بنتي خذت A بال science
الحمدلله مروو زين الله يوفقه بباقي الامتحانات ومادام بنتج تجيك على مشاركاتج فأكيد حنوووووووونه :dddds:
فوز ان شاء الله تولدين بالسلامه وترضعينه صج الرضاعة وايد مفيدة

 

[بسكوتة]

هلا بنوتات ( ادلعكم شوي ) ارفع معنوياتكم كرميلا احنا اليوم عطوهم اورقة طلبات حرف ال o بحط اورنج احس ماكو اشياء بمتناول اليد (ى درر يا بسكوته )

 

[mr000]

سلام أمهات اشلونكم!بيلا مبروك الدرجه الحلوه وتستاهل تشجعينها! ياحلو أيام الأبتدائي والله لي غريد 6 والAوالB مسطرين بالشهاده بس غريد 8 حتى السوشيال صعب لو تشوفين كتابهم عن تاريخ أمريكا أشكبره وكله حروب وتواريخ والأسئله لازم يجاوب بشرح ويذكر الأسباب والنتائج يعني مو يختار الأجابات!بيلا سوي مثل كراميلا وحطي لها بصل onion بعد لاتقولين مو في متناول اليد هذا ترس المطبخ!

 

[Fouz]

بيلا مبروك على درجة بنتج ماشاءالله، بس غريبة ما عطوا دلال ورقة حرف o يمكن انشغلوا باصابتها ذاك الخميس و نسوا، و ان شاءالله الله يقدرني و أرضع طبيعي اذا الله قومني بالسلامة ان شاءالله


بسكوتة انا شاريتلها العاب على جميع انواع الفواكه و الخضرة فحطيت لها برتقالة و بصلة بس بدون ريحة هههه و حطيت لها اخطبوط

مرو دايما جذي الدراسة تصعب مع تقدم المراحل الدراسية، تعالي شوفي الحكومة كله امتياز و اذا راحوا المتوسط اسقطوا

 

[ملكة بيتها]

السلام عليكم شلونكم حبايبي ( ماني قايله مامات بسكوته مونستكم تناديكم بنات )
كارميلا ..مبروك تعريب الكمبيوتر بس والله صار عندنا ثقافه هالجيل يكتب عربي بأحرف إنجليزي وكنت ما أفكر أقرأ شنو يكتبون بس إنتي كنت أقعد على ردودج ولازم أفهم اللي كاتبته يعني علمتينا يعطيج العافيه ..
مروو ...الحمد الله إن شاء الله باجي الإمتحانات يشد حيله وترتفع درجاته
بيلا ...مبروك الa ربي يوفقها يارب والفال لعيالنا كلنا ..