تجمع امهات العالمية الامريكية

[mr000]

سلام أمهات أشلونكم!!كراميلا الله يعينج عالثقل ويهون عليج يارب بعد صبري الياهل الثالث والرابع أثقل وتصدقين حتى النساة أزيد بس الحمدلله الولاده أسهل يعني ماكنت أطول بالطلق من الصبح لي باليل مثل الأول والثاني بس 4 ساعات تقريبا!! فوز ديري بالج على روحج من التعب لي الخامس تقريبا آنا مره أجهضت بنهاية الثالث اسم الله عليج من تعب الدوام وهم بالبيت وشقتي بالدور الثالث بدون أسنسير فحاولي تريحين نفسج والله يتمم عليج ان شاءالله!! باجر الدوام وبنشوف شالأحوال بس يمكن أخلي أبوه يوديه مع أن كان ودي أروح الصبح وأدش أشوف أشكثر الحضور!!

 

[ReeMaN]

هلالالالالالالالالا امهات شخباركم ؟؟؟ يالله تفضلو سحوركم عندي حياكم مع عيالكم على الماجله مرووو وفوز وكاراميلا وقموره وليالي ومامات وينها صج من زمان مابينت ؟؟؟ وباجي الامهات حياج حلومه معانا كل ليله سحوركم عندي الين تفتح المدارس .......

الله يتمم عليج يافوز ويخفف عليج الثقل والتعب وتولدين بالسلامه انتى وكاراميلا ومرت اخوي وكل الامهات يارب ...

 

[mr000]

سلام أمهات اشلونكم! مشكوره ريمان خوش سحور بطاط وكاكاو عاد والله مانقول لأ أحنا نموت على هالأشيا أزيد من اليهال! بس ريمان نصيحه لاتحطين هالشغلات وايد حق ولدج ترى تنسد شهيته عن الأكل يعني تلاقين يهال وايد يهدون الصمونه وياكلون الكاكاو قبل وأكيد راح ينبهونكم حق هالشغله بالمدرسه آنا أذكر بالغانم كانوا يقولون لنا لاتحطون لهم هالشغلات بس السندويش والحليب أو العصير وفاكهه وممكن البسكوت حتى لما أحطله بالجنطه كاكاو أو بطاط يقولي شيليه مايصير آكله فكنا نحطله عنب وخيار نقصصه صغار كلش واليهال يقلدون بعض كان يشوف يهال اييبون روب الفواكه وموز و خيار فقام يطلب نحطله مثلهم فماصدقت بعد قطعت عنه البطاط والكاكاو وقمت أحطله روب بالفواكه وموزه أوخيار مقصص أحطه بعلبه بلاستيك صغيره أو بكيس السندويش!

 

[mr000]

المهم خل أقولكم عن اليوم طبعا غصب شلت عمري قلت خل أوديه علشان أشوف الوضع وآنا دايخه نايمه الساعه 3 المهم وصل 8 ونص وألا النظار كلهم بره يسلمون عالطلبه والأهالي وفي واحد شكله يديد كان أييي عند السيارات ويسلم على الأمهات ويي سلم علينا بالسياره وقال آنا السوبر أنتيندنت اليديد المهم لاحظت أنه ماكان فيه زحمه مثل العام لأن الروضه والحضانه غايبين واللي شفتهم أغلبهم متوسط وثانوي بس هم شفت كم واحد شكلهم بغريد 4 أو 5! بس مادخلت المدرسه كان ودي أدخل الساحه أشوف عددهم بس ولدي مارضى يقول فشله تدخلين جدام الصبيان!!

 

[ملكة بيتها]

السلام عليكم ....شلونكم حبايبي مروو وريمان وكاراميلا وليال وفوز وساره والأمهات الجدد ...شفتوا على آخر النطره والتحسب لإجراء فعال وقوي لأنفلونزا الخنازير بقرار غير مدروس تأجيل الدراسه حق الحضانه والروضه لحد تاريخ 10 \9 يعني شنو يفرق إحنا نبي إجراءات قويه وتطعيمات يعني أستغفر الله ...مو قادرين نتطمن على عيالنا أبد

 

[ملكة بيتها]

كارميلا وفوز ..عسى ربي يهون عليكم حملكم ويرزقكم الذريه الصالحه المتعافيه .....ريمان طافني سحورج حسافه بس غريبه مدرستكم ما منعت هالسوالف إحنا قبل بمدرسة بنتي ممنوع هالسوالف لازم نحط لها وجبه صحيه فيها ساندويش وعصير أو حليب مع فاكهه أو خضار وبنتي مثل ماقلت ريمان قامت تقلد اليهال في أشياء ما تحبها في البيت قامت تطلب مني يعني قبل ما تاكل البييض حبته من المدرسه والجزر قامت تحط لها وحق ربعها تعلمو منها ....وعندي ملاحظه مهمه : ترى اليهال ياكلون ويشربون من بعض فنبهوا على عيالكم إن ما يصير هالشي أنا بنتي العام كانت تقولي كليت اليوم كذا بالمدرسه وأنا موحاطه لها بالجنطه يطلع إنها متبادله مع رفيجتها السانويش مثلا أو العصير ...فلازم نحرص عيالنا على هالأشياء

 

[Fouz]

شلونكم أمهات
ريمان و كاراميلا و مرو و ملكة بيتها مشكورين وااايد على النصيحة و الدعوة الحلوة و ان شاءالله ربي يتمم على كل حامل
قمر و حلم شخباركم
اي والله ريمان مثل ما قالوا ملكة و مروو ،، حضانة بنتي ممنوع الاكل اللي مو صحي ابد و أتوقع العالمية نفس الطريقة ما يندرى يبين اذا داوموا ان شاءالله، لاااااا تخافين الماجلة ما راح تتوهقين فيها عندج ضيوف دائمين على هذا النوع من السحور
مروو والله شي متوقع ان الحضور يكون خفيف خصوصا اللي عيالهم اولى ابتدائي ترى حدهم يهال و ما يستوعبون ووايد ناس خايفة تودي عيالها و ان شاءالله ربي يحفظ عيالنا
ملكة صاجة والله هالاجراء مؤقت و ماكو حل حق المشكلة و الكل يكابر، الله يحفظ هالديرة كل واحد ماشي بكيفه شفتوا تكرمون محطة الصرف الصحي اللي بمشرف قاعدة تطلع غازات سامة و ربعنا يقولون كل شي تحت السيطرة عسى الله يستر من اللي ياي

 

[mr000]

سلام أمهات أشلونكم الله يتقبل صيامكم!! اليوم رحت حق ولدي الساعه 2 ونص الظهر أول شي حبيبي طالع ناشف ريجه وتعبان يقولي مت من العطش والله كسر خاطري آنا بس وديته الصبح ورحت مركزسلطان حولي تالي طلعت آخذه الظهر والله عطشت ولاعت جبدي من الحر المهم يقول فيه غياب واضح وخاصة بالأبتدائي يعني الصبح ماكانت الساحه متروسه مثل العام والصف وايد فيه غياب وبعدين حاطين لهم كميه من المطهر بكل صف وأول مايدخلون كل صف لازم يعقمون أيدهم وعطوهم توجيهات عن المرض والوقايه منه! ويابلنا أشكثر أوراق و تعليمات عن المرض ونعبي بيانات عن الطالب والأسره وأرقام التلفونات!!وألحين بروح أشتريله الطلبات!!وأهم شي أن الأخصائي طنشنا وحطه مع الولد اللي مانبيه والله بط جبدي ومادري شسوي ماودي أختلف معاهم من أولها!!

 

[mr000]

شنو هالخبر وفاة رابع حالة طفله عمرها سنتين!! لاحول ولاقوة ألا بالله يعني لايلومون الناس لما يخافون على عيالهم!!

 

[ReeMaN]

هلا والله امهات شخباركم ؟؟؟

العام بروضه ولدي الحياه كانو يقولون ممنوع بس كان ايي يقول فلان ياب كاكاو معاه وفلان عنده بطاط وحلاو و و و رحت سالتهم قالو وقت الدوام ممنوع بس بالويتنق تايم كيفهم ياكلون اللي يبونه اللى اهو نهايه الدوام بقاعه الانتظار كيفهم ..... بحاول انشالله بحط له اشياء مفيده وانشالله يكونون شديدين من هالناحيه عشان مصلحة اليهال.......

مرووو الله يعينه والله مسيكين هم حر وهم صايم .... والحمدلله اشوي حريصين على الطلبه من ناحيه الوقايه بس مروو انا منج اروح حق الاخصائي اللي قلتى عنه حليو وقولى له المشكله وان مافاد معاه لج الحق تدشين على المديره اتقولين لها المشكله بعد مو يوم والا يومين بيعاشر الشرير .. سنه كامله مو شوي

 

[ReeMaN]

اى الظهر كان خبر عاجل وفاه الياهل عرها سنتين ونص اللله يرحمها ويرحمنا برحمته

 

[QUMAR]

والله انا ما وديت عيالي خفت
و قلت بنطركم تقولون لي شلون الأجواء
ضاق خلقي علي الياهل اللي توفت اليوم عمرها سنتين ونص
أستغفر الله تلاحظون يوميا فيه وفاة بغض النظر عن العمر
لا حول ولا قوة الا بالله الله لا أعتراض علي حكمك

 

[caramella]

السلام أمهات
منا و منج مرووو
الله يرحمها هالحاله اللي توفت ما قالوا ليش توفت ؟؟ لأن إهما لازم يطلعون لهم علثه يا إلتهاب رئوي حاد يا سمنه مفرطه يا ما أدري شنوووو
إنزين ليش ما يلبسون العيال كمام مو أفضل كمام مع مطهر هذا أقل وقايه يقدرون يسونها
مسيكين وليدج مرووو عطشان حبيبي بهالحر وصيام و دوام الله يساعده بس آنا رايي من راي ريمان دام إنه بأول الأيام روحي معاه باجر و كلمي الأخصائي ينقله دام الموضوع حار بحار
و العتب عالسكرتيرات اللي سجلو المعلومه و ما وصلوها للأخصائي أو إن وصولوها و هذاك طنش
قمر الله يحفظ لج عيالج روحي باجر المدرسه شوفي شلون الأجواء بدون عيالج و إذا إرتحتي وديهم ثاني يوم

 

[mr000]

سلام أمهات أشلونكم! ترى في مدارس غيرنا داوموا اليوم منهم المدرسه الأمريكيه مالت السفاره شفتتهم اليوم يشترون الطلبات من مركز سلطان!! الله يعينا على اللويه من مكتبه لي مكتبه اليوم مارجعت البيت ألا الساعه 1رحت كذا مكتبه والمصيبه حتى القفل مال اللوكر معطينهم صورته ولااااازم نفسه يعني شسوي ماحصلت لقيت له نفس الأسم بس شكله غير وحضرته ناطرني لي ال1 مانام بيشوف الأغراض وطبعا ماعجبه القفل يقولي مونفسه مايرضون!! آنا والله محتاره شسوي على سالفة الطالب اللي حطوه معاه أدري فيه بس كم يوم وتبتدي المشاكل مثل العام بس هذي الأخصائي باط جبدي هم من الكورس الثاني تغير مايعطي ويه ويطنش بس ولدي يقول لاهو زين بس مشغول وايد قمت ماأروح له ولا أدق عليه بس أخلي ولدي يروحله يكلمه ! وألحين مادري شسوي مره أقول أسكت خلاص وولدي هم موراضي أكلم الأخصائي يقولي مابي أغير الصف وهم خايفه من المشاكل العام بقى ينفصل ولدي بسبته!! والله محتاره

 

[mr000]

من التعب الحجي كله بدليات عاد أنتوا طوفوا!!شفتتهم=شفتهم / هذي= هذا / هم= هو

 

[حلم الطفولة]

مرووو دايخه !!! ميخالف مسامحينج المهم ماننحرم من طلتج .. شلونكم حبايب ؟؟ ان شالله بخير ؟؟

 

[caramella]

الله يساعدج مرووو والله في صبيان نقمه نقمه ما أدري إشلون جذي أهلهم مبينهم الله يساعدج والله مرووو شوفي الأصلح له
الله يساعدج عالطلبات سألت لج عن محلات القفول في محل مال قفول إسمه النصف بالشويخ يم إيكيا القديم وهم جنه في جم محل بشارع تونس

 

[ReeMaN]

واي مرووو انا احتريت على وليدج والله ... عاد لاتصيرين طيبه مع الاخصائي حتى لو ماينعطى ويه يعنى بتراضينه على حساب اذيه ولدج ؟؟ طيب شرايج بدون علم وليدج تخلين ابوه يكلم الاخصائي ويصير شديد معاه شوي ويقول له السالفه وان ماشاف نتيجه خل يقوله انا بلغتكم قبل لاتوزعون الطلبه على الصفوف وعطيتونى ويه وكتبتو الملاحظه على اساس ان فعلا بتحلون مشكله ولدي وتفصلونه عن الشرير ودام ماسويت شي بدش على المديره اتفاهم معاها وان ماصار شي انتى دشي على المديره وبكل هداوه قولى لها معاناتج من العام الى اليوم انشالله تساعدج ... مروو لازم لازم لاااازم في استثناءات يساعدون فيها الاداره ودام اول الاسبوع ووايد غيابات والروضه ماداومو انشالله بحيل الله في مجال يسوون شي .... بس صج لاتسكتين ووالله حرام ولدج ماتهنى العام هم هالسنه معلل قلبه هالشرير وصار معاه بالصف هفففف حدي احتريت والله

 

[mr000]

سلام أمهات أشلونكم! اليوم شكل الغياب أكثر من أمس! والله ريمان مادري ودي أتصل ألحين على جيهان أو أكلم السكرتيره اللي كلمتها المشكله أنه مانقدر نشيل الولد من الصف لازم يودون ولدي صف ثاني وولدي مو راضي يقولي خلاص لاتكلمينهم خايف الأخصائي يعصب عليه ومره يقولي أنه الهوم روم تيجر وايد ستريكت وقال حق الولد من أول يوم أنهم حطوك بصفي علشان أخلي عيني عليك طول الوقت بس والله هذا العام مانفع فيه شي وكان يقولون لنا بنفصله والعيار يوم شافهم كلش بيفصلونه طخ شويه شهر تالي رد على سوالفه والظاهر والله أعلم أنه أبوه دبلوماسي من السفاره أو مستشار بمكان مهم لأنه الولد موكويتي بس شكله عنده واسطه ومتفرعن والأهل مطنشين! وماأصدق مصري أهله يدفعون له 3000 وهادينه جذيه على كيفه شطانه وكسل وطول الوقت عنده ديتنشن الدروس رايحه عليه بس الله يعافي الحكومه اللي تدفع له الرسوم!!

 

[ReeMaN]

قوه امهات شخباركم؟؟ تقبل الله صيامكم انشالله

مروو ماقول الا الله يهدي هالشرير وقولي حق وليدج يطنش فيه .....