تجمع امهات العالمية الامريكية

[ملكة بيتها]

شلونكم مامات عساكم بخير
كراميلا .....صح لسانج نفس اللي كنت بقوله بالضبط

 

[sara999]

بس على فكره مديره حضانه سليمان مسجله ولدها هناك وتمدحها وتقول انها قويه ف الي اقوله انها هال مره تربويه وماشالله عليها حدها ثقه فمعقوله بتقط ولدها مدرسه عاديه دامها اهيا اصلا تربويه !!!
وبعد بقولكم ترى اول مره اسمع جذي انتقاد بس في وحده بسألها بعد اهيا عندها 3 صبيان وكانت حايسه بشوف وين ودتهم وبشوف اذا سألت عن العالميه

 

[lyale]

بس بنات ترااا مو شرط كل مدرسه فيها الزين والشين واذا عالطبقيه هذا من مساوئ بعض المدارس بس اذا كل المدارس ويتنغ الواحد يضطر يدخل عياله شيسوي بعد نتقبل بعض العيوب ولا يضيع مستقبل عيالنا
المشكله ام كل وحده تي تكلمج عن عيوب مدرسه بدون ذكر ايجابيات وتشوف المدرسه من سلبيه او جانب واحد يريت تذكرون الايجابيات سواء العالميه او الابداع او ال abs

 

[sara999]

صح كلامج ليالي
واهيا ترى على
ول دشت علي بالسلبي .... بس اهيا كانت تبي تدخله ال ais
وانتو ادرى بهالمدرسه صح؟؟؟
تعالو وين فووووز جنه متمرده

 

[mr000]

سلام بنات اشلونكم شخباركم! ألحين رادتلكم وأدلي بدلوي بموضوع العالميه! هذا دلو ثاني غير دلو أمس!! فوز وينج إن شاء الله بنتج بخير طمنينا عليج!

 

[sara999]

الله يقوم بينت فوز بالسلامه بيبتي جد فقدتها
مروووووو وين دلوج ؟؟؟

 

[mr000]

سلام أمهات أشلونكم! الله يسلمكم آنا حبيت أعطيكم فكره عن المدارس بشكل عام مو بس العالميه وتحملوني ميخالف أذا طولت عليكم! بما أن أغلبكم بتمرون بتجربة المدارس لأول مره خل أفيدكم بشغله أنه ماكو مدرسه بيرفكت 100% سواء خاص أو حكومه يعني حتى بعيالي الكبار مرينا بهالمعاناة وكنا نضطر نغير بطاقاتنا المدنيه ونحط واسطات علشان نغير مدارسهم ونفس المدرسه ناس تمدحها وناس تذمها بس بمدارس الحكومه ماكو مشكله لو نقلتيه لأن نفس المناهج ونفس النظام بس بالمدارس الخاصه وعن تجربه أحسن للطفل وللأم أنه الطفل يستقر بمدرسه وحده من الأبتدائي لي الثانويه علشان يمشي على نظام معين ويتعود على طريقة امتحاناتهم ويكون صداقات والمدرسين يعرفونه ويحب مدرسته فأذا أنتي جربتي المدرسه وارتحتي لها خلاص لاتخلين أحد يشوش تفكيرج ويدخلج بمتاهات وكل سنه تلفين واتدورين بالياهل! ومن ناحية السلبيات والأيجابيات كل مدرسه لازم تشوفين فيها شي مايعجبج سواء من تصرف مدرسه أو قانون من قوانينهم أو فئه معينه من الطلبه بس شنسوي خو مانقدر نفتح مدارس في بيوتنا حق عيالنا نسويها مثاليه بالشكل اللي نبيه ولانقدر نمشي المدارس على كيفنا بس اللي علينا أنه نحاول نختار الأفضل من ناحية المبنى والأمكانيات ومستوى المدرسين وجنسياتهم ومستوى اللغه عندهم وندعي لعيالنا أنه الله يسهل أمورهم ويوفقهم!والناس اللي تذم بالعالميه أحنا ندري أنها مو مثاليه 100% بس أتحدى أنه في أحد يقولي المدرسه الفلانيه كل طلبتها خلوقين ومحترمين ومأدبين ويمشون وعينهم بالأرض وكلهم أمتياز ولا حتى المدرسين يعني أذا المدرسه صبغت شعرها أحمر والا هاي لايت صارت منحرفه؟ الله يخليكم خلوني ساكته لاأتكلم شنو شفت مدرسات بالحكومه الصبغ أشكال وألوان واللبس جنها رايحه استقبال والمكياج المبالغ فيه تقولي بنتي بالثانويه نص الحصه درس والباجي نسولف مع المدرسه عن صبغ الشعر والمكياج والصالونات!!أذا رجعنا حق العالميه آنا في بداية السنه مثل ماقلتلكم مره في صبيان ضايقوا ولدي لأنه يديد عليهم وماعنده ربع والمدرسين مايعرفونه ولا الأخصائي فكانوا يصدقونهم ومايصدقون ولدي بس الحق ينقال لما رحت المدرسه علشان نحل المشكله بصراحه تعاملهم ممتاز آنا قعدت مع الناظر وتكلمت معاه يمكن ساعه كامله وهو بس يسمع ويقولي آنا قاعد أستفيد من كلامج لأنه أحنا مشغولين بأمور وايد وأكيد في شغلات صغيره تفوت علينا ومانقدر نقول عن نفسنا أن أحنا بيرفكت بس نحاول نكون الأفضل وبعدين لاتتوقعين أنه الطلبه كلهم مأدبين بس سياسة المدرسة وسياسة نوره الغانم أنه اللي مايبي يحترم النظام يمشي من المدرسه ماعندنا أي مشكله أنه نفصل بالسنه 30 ألى 40 طالب علشان نوفر جو دراسي مستقر داخل المدرسه!! فآنا مقارنة بالمدارس اللي كان ولدي فيها من قبل شفت أنها أحسن منهم مو مثل مدرسه أروح حق الناظره أقولها اشمعنى ولدي يتعاقب وغيره لأ تقولي والله هذي أوامر من الشركة اللي تملك المدرسه شالت عنهم العقاب!! هذا كلام بالله ! وأروح حق الناظره الثانيه أقولها في طلبه متسلطين على غيرهم بالصف محد يكلمهم وولدي ياخذ ديتينشن بسبتهم تقولي آنا ماعندي كلام خلاص آنا مستقيله وبروح مدرسه ثانيه لأني مومستعده أتعرض للأهانه من أولياء أمور علشان هذا ولد فلان أو أبوه بالمركز الفلاني وأذا بتنقلين ولدج فهذا أحسن قرار راح تلاقين مدارس ثانيه أحسن!! أو مدرسه تسمعين أنه الطلبه يدفعون فلوس أو تتكفل الأم بحفلة المدرسه وينجحونهم وهذي موجوده بمدارس وشفتها بعيني والأم الثوله تقولها لي بكل فخر استغلت كونها ناظره ويايبه مدرسات الفنيه والألعاب اموزعه جدولهم عالمدرسات وامفضيتهم حق مدرسة ولدها وايون صبح وعصر كارفتهم سووا معرض كامل للمدرسه وطبعا بالمقابل ولدها نجح وهو مايعرف الألف من كوز الذره مثل مايقولون والمدرسات تقولهم أحطلكم امتياز بالتقرير هالسنه!! ها اشرايكم بهالنوعيات من المدارس لا والأم هذي نفسها تقولي حق الثانويه بودي ولدي العالميه قلت لها أيه وديه أحسن!! علشان يشوتونها هي وولدها من الباب أصلا ودته العالميه وموبس ماأنقبل الا قالولها علشان نقبله بنزله صف لأنه مستواه ضعيف كلش وهي تقول قبلوه بس آنا مابقيتهم خواره وموزينين والولد مفصول من البريطانيه!! آنا مو قصدي أتطنز أو أتشمت حرام كلنا عندنا عيال بس القصد لاتسمعون كلام أي أحد في ناس ماعندهم مصداقيه اذا ماانقبل الولد قالتلج موزينه المدرسه ولو مقبول جان وصلتها لي السما!! الله يعينكم مادختوا وانتوا تقرون!!

 

[mr000]

الله الله توني أشوف الرد اشطوله! قسموه على أجزاء الظهر اشويه والمغرب شويه وباجر أقروا الباجي!!خخخخخخ!! ليالي أنتي لاتقرين لأنه عندج بيبي حرام ماعندج وقت وخلي أحد يقولج الموجز!!

 

[mr000]

سارونه هذا مو دلو هذا تانكي مثل اللي يحطونه فوق السطح! بس وانتوا تقرون حطوا اصبعكم عالسطر علشان اتبعون والا راح اتضيعون!!

 

[ملكة بيتها]

مرووو.....خوش تانكي قصدي خوش رد وكلام صاجه بكل كلمه كتبتيها ....أنا عن نفسي عندي دلو وهو إني أنا أشتغل فيي مكان بعيد عن المدارس بس يمرون علي الرحلات اللي طالعه من المدارس فكل يوم يمر علي جميع مراحل الدراسه من حضانه لحد الجامعه من الحكومه والخاص ...يعني أشوف بعيني السوالف و ترى لأن الطلبه والمدرسين مو تحت أنظار المسؤولين فيكونون على راحتهم شوي من واقع اللي أشوفه وهذا الطبيعي هو ما يلي :
1.الطلبه فيهم العاجل وفيهم البطال ( كل واحد من بيئه وأسره وتربيه غير عن الثاني )
2. المدرسين فيهم اللي مخلص وله خلق يشرح ويعطي من قلبه وفيه اللي ماله شغل بالطلبه
3. المدارس الحكوميه فيها اللي تبرد جبدج وتحسينها جنها مدرسه خاصه وفي الله المستعان ( المدرسه شايله خيزرانه على يهال الروضه )
4. المدارس الخاصه فيها اللي تحسين نظام وتعليم ( ومنهم العالميه ) وفيهم تحسين خرطي ومن أفضل المدارس اللي مرت علي ( المدرسه الفرنسيه يمكن لأن عدد الطلبه قليل )
بس هذا كله مجرد أشياء شفتها بعيني شخصيا يعني ما تكلمت عن منهج ونظام داخل المدرسه بس أعتقد يعكس شنو داخل المدرسه

 

[ReeMaN]

بعاااد عمري والله بردت جبدي بالرد الله يبرد جبدج دنيا واخره حبيبتي مع انى احوليت وانا اقرا هالبحث يعطيج الف الف عافيه حبوبه

 

[sara999]

وي ويوي !!!! الله يا مرووو خلص المنتدى
بس زين خوش كلام ومقنع
صحح انا قاعده افكر انا اعرف شخصيه هالوحده اهيا تحب جذي اصلا ولو راده عليها ما ودته الابداع وقاعده اقولج اذكر كان خاطرها توديه الامريكيه مالت السفاره جنه يعني تقولي تبي تخلي ولدي نفس ولدها
نوعها وامي قالتلي لا تصدقين كلامها اهيا ما تبي اي احد يصير احسن منها
الله يسامحها .... عاد ساره عاد كل شي انا اصدقه ترى
مشكوره مرو ريحتينا ..... انزين الاعالميه عندهم سمر كورس ودي ادخل سلوم ؟؟؟؟؟؟؟؟؟؟

 

[mr000]

سلام أمهات اشلونكم!انقطع قلبي من عقب الرد نمت من ال3 لي 6 فيلم هندي!! سارونه والله ماسألت عن السمر كامب لأنه أعرف ولدي مايحب يدخل نادي بنفس المدرسه! بس أمس أخوي قالي شغله حلوه عن نادي المدرسه البريطانيه بسلوى أنه يدفع أسبوعيا مو شهر كامل أو شهرين يعني يجدد الأشتراك أسبوعيا على أساس متى ماقرروا يسافرون مايكون دافع حق شهر أو شهرين!! ويقول أنه بنته وايد مستانسه وأنه من 3 سنين بدى يسجلها فيها لأنه أول كان يسجلها بمدرستها اللي هي الكويت الأنجليزيه وناديهم زين مافيه شي بس المشكله أنه يدفع حق شهر ونص بعدين يسافرون بنص المده فماتكمل النادي ويروح عليهم الأشتراك بس البريطانيه طريقتهم أحسن!

 

[sara999]

مادري والله ودي اسجله بنادي يتعلم ويستانس ماعنده احد ومابي يحتك في الي بالبيت عندنا كلش مو نفس مودي مابي ولدي يصير مثلهم
ياريت الي تستخبر عن نادي حلو وصج يتعلم منهم الياهل ويستااااانس تقولي

 

[lyale]

مروووو يا بعد جبدي والله من التجارب صار عندج خبره صرتي كتاب كامل متكامل
المهم انا بصراحه سمعت في عيوب بكل المدارس وكل ما اودي عيالي مكان مثلا مدرسة ask قبلو بنتي وولدي قالو لي ماكو مكان له ودقيت عليهم مره ثانيه قلت لهم اذا مافي مكان له ليش امتحنتيه ولا تقولي اهو مستوا ضعيف وبنتج مقبوله حولي ولدج لنا بعدين فا ما قدرت ادخلهم
العالميه حاطين عيالي ويتنغ
الابداع مادقو علي مع ان من اول الناس الي مسجله عيالي عندهم
اخر شي وديتهم abs وارتحت بصراحه للمبني والستف الي بالمدرسه من مدرسين واداره واستخرت والحمد الله قبلو عيالي عندهم فا سجلتهم لان غالبية المدارس فيها عيوب واذا علي الطبقيه بنتحمل بس غير هذا ما سمعت وغير هذا هم سمعت ناس يمدحون فيها وما اقدر انطر اكثر ويتنغ واختبارات ولي شرايكم

 

[mr000]

سلام أمهات اشلونكم !! ليالي ألحين خلاص سجلي عيالج بالمكان اللي انقبلوا فيه لأنه العالميه عطلوا خلاص من يوم الخميس! أنتي متأكده مادقوا عليج لأنه قالت لما نفتح صف بآخر أسبوع راح ندق على اللي ناطرين عالويتنج وناخذ العدد المطلوب!! مومشكله الله يوفقهم وين ماكانوا واشدراج يمكن ترتاحين على مدرستهم اليديده وماتنقلينهم بعد!! باقي المامات وينهم!! عاد اتصدقون آنا أحاتي السنه الدراسيه اليايه من ألحين أحس الأجازه قصيره وبتطير بسرعه وبنرد عالشقى والحنه عالدراسه والبروجيكتات والوسائل وامتحانات أسبوعيه!الله يعينا هذا بكل المدارس كلما تتقدم المرحله يزيد الضغط!!

 

[mr000]

سلام أمهات أشلونكم! وينكم محد بين من أمس!!

 

[sara999]

شنو هذا وينكم متمردين حدكم واذا ششت عاد منو يطخخني ؟؟؟؟؟
سوووووووووووووووووووووووووووسوووووووووووووووووو والاجر على الله
وشن مشاركاتكم
خو كاراميلا ياعوينتي مه هالحمال وفوز يا عوينتي مع هالبينه مريضه وحالتها حاله
الباجي ؟؟؟ وين ؟؟؟؟؟ باح؟؟؟

 

[lyale]

السلام مروووو انتي وبس الي ترد وتبرد الجبد الحين وينهم باجي البنات اعصب يعني اطلع عيوني لا واسئلهم شرايكم محد رد علي سؤالي كان انطر بعد علي الويتنغ ولا زين سويت اني سجلتهم ب abs والسنه القادمه يصير خير يمكن يصير لنا نصيب بالعالميه وشكلي خلاص بطلع من التجمع زعلانه من المدرسه

 

[ReeMaN]

سلااااااااااااام صويحباتي شخباركم ياحلوين ؟؟؟

ليالي قلبونش ليش ماتخلين ابوكم يراجع المدرسه احسن ... الاداره ذاك اليوم قالو احتمال كبير راح يفتحون صف الكي جي 1 روحي راجعيهم احسن من التلفون ....

واي وين باجي البنات ؟؟؟ فوز وين مايندرا اشصار مع بنيتها اسم الله عليها ... وباجي البنات ؟؟؟