تجمع امهات العالمية الامريكية

[mr000]

أي كراميلا والله آنا ولدي يلبس الجاكيت الكحلي الصبح بس يلبس تحته قميص نص كم بس أشوف اليهال الصبح لابسين قميص كم طويل وكلهم لابسين جاكيت كحلي أو فيست..

 

[mr000]

توه ولدي رجع من المدرسه يقول غيروا مدرسة الماث بعد.. هذي اللي بالأجتماع تقولي آنا راح أدرسهم لي آخر السنه وماراح يصير فيه تغيير بعد..لاتعليق..

 

[Fouz]

السلام عليكم شلونكم أمهات شخباركم

كاراميلا هنااا، أشوف التجمع منور، الحمدلله على السلامة و ما يشوف شر ولدج ما ينلام تغير الجو يذبح، انا اخوي مسكين من وصل و اهو منسدح ذابحته الانفلونزا

ريمان عاش من شافج ولهت على سوالف درايش السيارات ، و الغبار ذبحنا استغفر الله، بس اللي يشوف مصيبة غيره يقول الحمدلله على اللي احنا فيه مساكين ملوت تشيلي اللي حاشهم زلزال و اهما نايمين، يا زين غبارنا و الله يبعد عنا الزلازل و الفيضانات

مرو شلونج ان شاءالله بخير، و صاجة سالفة تغيير المدرسين :nocommint: ما نعلق عليها أيرك لانها ترفع الضغط

بيلا شخبارج و ما يشوفون شر عيالج ان شاءالله عسى ولدج صار أحسن؟

ليالي شخبارج، والله لي الحين صامدة ما ولدت عسى ربي يسهل


مشكورين وايد على دعواتكم و سؤالكم عن عمي، مسكين كمل الشهر بالعناية و كل ما قالوا خلاص بيصعدونه الغرفة تنتكس حالته، عسى الله يشافيه يارب
رحت الطبيب اليوم و قالي عنق الرحم مسكر و الياهل متعلق فوق مو صوب الحوض أبد يعني السالفة مطولة، عسى الله يكتب اللي فيه الخير ان شاءالله

 

[bella bambina]

السلام أمهات
فوز الله كريم الله يسهلها عليج ميخالف لا تستعيلين وبعدين من تيي الولاده الياهل ينزل وكل شي يتغير بس انتي ادعي ربج يسهل لج الولاده
كراميلا ما يشوف شر ولدج الصبح عيالي يلبسون جاكيتات خفيفه وطبعا يفصخونهم بعدين أتوقع أول ما أحرك السيارة
الله يسلمكم ويسلم عيالكم من الشر ولدي رد صخن اليوم ما أظن يقدر يداوم ماشي على المضاد الحيوي فقير طلعناه بالعطله يوم واحد ودخل الغبار بصدره ما ندري شنسوي مع اليهال نحكرهم طول الوقت لا وبعد ما نطلعهم الا أماكن مسكره
بنتي تقول أبلة الموسيقى بعد اتركت المدرسه لأن أمها مريضه no way

 

[caramella]

مرووو مشكوره فدتيني عيل ماكو إلا البسه قميص طويل و فست طويل و متى ما حس بحر بالصف فصخ الفست على الأقل تحته قميص جم طويل
مرووو الله يساعدج بهالسالفه آنا اللي ولدي صغير بالروضه توترت وقعدت احاتي
فوز التجمع منور بوجودكم حبيبتي
والله يسلمج ما قصرتي
ما يشوف شر إخوج مسكين إي والله آنا هذي سالفتي كل سنه مع ولدي من اطلع من المطار تشتغل الحراره و تجلب ما تنزل إلا بعد 5 ايام على الأقل إنشالله يا رب يتحسن ولدي قاعده احاتيه والله
إي والله يا حلو غبار الكويت والله ما نحس بقيمته إلا لما نشوف مصايب غيرنا الله يكافينا الشر ضرره بسيط مسكين إتنق الصدور و حساسيه بالعين مو مساكين اللي تصير عندهم كوارث الديره بكبرها تختفي
الله يحفظ ديرتنا و يحفظنا من كل شر
وعلى عمج عور قلبي مسيكين عسى الله يقومه بالسلامه و يفرحكم برجعته البيت إنشالله
الله يهون عليج إنشالله تولدين بتمامج وايد ناس جذي يكملون لي موعدهم لا تحاتين دام شافج الدكتور إنشالله كل شي زين

 

[Fouz]

بيلا ما يشوف شر ولدج ان شاءالله، و الله يعين هالصدور يبيلنا فلاتر علشان ما يتأذون اليهال، مدرسة الموسيقى بعد!!! هالمدرسة قاطين فيها عزيزو اللهم يا كافي، الله يستر لا تطلع مس مروة بعد علشان تكمل، و مشكورة على الدعوة و كل شي بيد الله سبحانه

كاراميلا مشكورة حبيبتي، والله انا البس بنتي قميص جم طويل و جاكيته الصبح و تفصخها بالصف، و البسها جيجي خفيف يناسب هالجو حرام اخلي عصاقيلها مكشفة اخاف يحوشها هوا، ان شاءالله يتعافى ولدج و يداوم بأقرب وقت


بيلا بسئلج، خذيتي صور دلال؟؟؟ انا رحت بستلمهم قالت لي ما وصلوا مع اني رايحة عقب ما دفعت ب3 أسابيع، و ما يسوى على اروح و اتعنى و ما يكونون خالصين

 

[mr000]

السلام أمهات اشلونكم..فوز الله يهون عليج بالسلامه.. وعادي ترى كل ولاده شكل.. آنا بس في بجري اللي طفت موعدي باسبوع وياني طلق من الله وإلا الباقي كله أدش العاشر ولاطلق ولاهم يحزنون أشيل جنطتي وأروح يولدوني لأنه تقولي الطبيبه خلاص المشيمه انتهى عمرها ولازم تولدين ..يعني مادري ليش ماييني طلق مثل العالم..! كراميلا والله سكتي آنا سالفة هالمدرسين هالسنه وايد موترتني وحاطه حرتي بهالفقير زف فيه وتهديد أنه راح يسقط وبيروح الحكومه يتخسبق..بس أفكر إني أقابل الكاونسلر بنت نوره الغانم..يعني ماصارت هالتغيير وبعدين موذنبنا تالي ولدي يسقط ومتحملين هالتقويه والتوصيل لي العصر وكل شهر 100 دينار زياده علشان التقويه.. وهم موطالعين بنتيجه..!! بيلا مايشوف شر وليدج.. سكتي آنا خايفه على هالصغيره بيروحون الشاليه 3أيام وأحاتيها لاتمرض.. بس تعالوا آنا ماأخذت الصور ولاسألت عنهم بس دفعت..

 

[bella bambina]

السلام أمهات
الشر ما ييكم ان شاء الله ولدي ليلحين حرارته ترتفع بغيبه باجر عطيناه عين الأسبوع اللي طاف عطوه شهادتين تقدير والحين سدحناه
فوز لا تروحين وتردين الصور اذا وصلو يعطونهم حق عيالنا بالصف كل سنه يتأخرون جذي يلحق الياهل يكبر ويتغير شكله بعدين يعطونه الصورة (قبل وبعد )
الحين يا حلو الغبار وبس ايي الصيف الكل ينحاش
مرو هدي على ولدج لا تحطين حرتج فيه الذنب مو ذنبه عسى الله يوفقه

 

[bella bambina]

السلام أمهات
الشر ما ييكم ان شاء الله ولدي ليلحين حرارته ترتفع بغيبه باجر عطيناه عين الأسبوع اللي طاف عطوه شهادتين تقدير والحين سدحناه
فوز لا تروحين وتردين الصور اذا وصلو يعطونهم حق عيالنا بالصف كل سنه يتأخرون جذي يلحق الياهل يكبر ويتغير شكله بعدين يعطونه الصورة (قبل وبعد )
الحين يا حلو الغبار وبس ايي الصيف الكل ينحاش
مرو هدي على ولدج لا تحطين حرتج فيه الذنب مو ذنبه عسى الله يوفقه

 

[ملكة بيتها]

سلام مامات شلونكم عقب الإجازه ...اليوم الجو شحلاته
كارميلا الحمد الله على السلامه حبيبتي
فوز الله يهون عليج ويشافي عمج ويقومه لكم بالسلامه
مروو شلونج حياتي تصدقين أنا انقهرت من سالفه تبديل المدرسين عندكم ليش ما تروحون مجموعه وحده وتطلبون مقابله المديره والله يعني لازم يكونون واضحين ..

 

[Fouz]

صباح الخير أمهات شخباركم
اليوم مس مروة قالت تبي 5 دنانير حق تي شيرت السبورت داي و محد بيروح معاها، ابوها لاهي و انا اخاف اروح افوز بكل مسابقات الجري و الهرولة و يزعلون باجي الاهالي ، بقولها ماني موديتها و خلاص

بيلا عيل اطنش الصور و اهما يعطونا اياهم وايد ابرك من الروحة و الردة عليهم، و ما يشوف شر ولدج و الله يوفقه بدراسته ماشاءالله

مرو صاجة كل ياهل غير و كاني مثال حي، في بنتي من اول ما دخلت شهري ولدت و هالمرة خلص الشهر و ماكو بوادر سبحان الله، بروح بعد شوي اسوي سونار لان أمس ما سويت و هم باخذ نتايج تحاليلي و الله يسهل يارب، و عدل كلام بيلا لا تشدين على ولدج والله مو ذنبه مسكين، و احسن شي تسوينه تقابلين احد مسئول بالمدرسة علشان تفهمون الوضع

ملكة شخبارج و مشكورة حبيبتي على الكلام الطيب

 

[bella bambina]

صباح العسل أمهات
هلا والله ملكه اي والله صاجه لازم نروح نستفسر من الادارة
الشر ما ييج فوز اليوم الصبح هم كان مصخن غيبته آنا دفعت حق اليوم الرياضي حق الكبار اليوم بدفع حق دلول نطرت أتأكد اذا أحد يقدر اييبها 30 :10 فأمس اختي قالت تقدر اتييبهم اهيه وبنتها آنا ولا مرة رحت اليوم الرياضي دايما أهلي يودونهم وأبيهم يعتمدون على نفسهم فما أجابلهم لأن اذا شافوني يتدلعون والصور اهمه يوزعونهم على اليهال بالصفوف بس يستلمونهم

 

[mr000]

السلام أمهات اشلونكم .. فوز لاحرام عطي فرصه لغيرج يفوز بالمسابقات..مو إلا تروحين.. آنا ولدي مايبي يروح السبورت داي قلتله خلاص لاتدفع...اليوم مادشيت المدرسه كلمت أحد بصراحه راسي يعورني ومالي خلق وإلا كنت بدش آخذ موعد أقابل الكاونسلر أو أشوفها إذا موجوده.. بحاول أدق الحين أكلم السكرتيره..والله كلهم شبعوا وهم يسمعون نفس الأسئله ليش تغيير المدرسين, وكل مره نسمع نفس الإجابات عندهم ظروف. سبحان الله هالسنه بالصدفه المدرسين كلهم مرضوا وأهلهم مرضوا وعيالهم مرضوا( على قولة عادل إمام ومات المخرج والمنتج والمصورين والممثلين)!! خلوها على الله آدي احنا قاعدين ونشوف شيصير

 

[mr000]

تلفون المدرسه على طول مشغول لايمكن أحد يرد..4 أرقام عندي قاعده أدق عليهم مايردون!!!

 

[bella bambina]

السلام أمهات
ها مر شصار معاج ردو ولا لأ ؟
فوز يبتي سيرة الصور وزعوهم اليوم الظاهر متابعين المنتدى وذكرناهم عاد الأبله نست تعطي بنتج ومشت وناديتها ذكرتها يمكن اختج كانت يايه تاخذها قلت الحين فوز ناطرة الصور
كراميلا اشلون صار وليدج ؟ داوم اليوم ؟
هاي ريمان من زمان ما شفناج
باجر هاف دي مو تنسون

 

[caramella]

السلام أمهات
باركولي ولدي اليوم داوم الحمدلله
طبعا سوالي مسرحية أول يوم دوام من الصبح من أول ما بطل عينه من النوم آنا ماني رايح و إنتي بتهديني ما احب سكولي
ومحايل و مساحل و اقوله مابي اهدك بقعد معاك
ومن سبل المساحل امس طلبناله كيكه على شخصية ديزني G-force عشتو مكتوب عليها welcome back عل و عسى ينجذب يروووح
و اشوق من الصبح بهالكيكه و يقول ما ابيها خل ياكلونها بروحهم
تخيلوا تروح الكيكه المدرسه وولدي مو رايح لوووول
بس مع المساحل و الشد شوي رحنا
إستانست ابلته لما شافته و تلملم فيه مبرطم ياو ربعه من الساحه بلموا لما شافوه ضحكوني اليهال تعابيرهم بريئه
بس يات مس لينا المساعده بتحضنه إشتغل بجي
و بعدين قلت له آنا بقعد عالكرسي اللي برا و مني مناك سحبت روحي و مشيت قالت لي المس هذا طبيعي لأن أول يوم دوام له
وتالي دقيت اسأل عنه الحمدلله قالت لي زين ما فيه شي العياره والدلع على قلبي بس
تالي يوم خذيته قالت لي المس عقب ما مشيتي صار عادي و إستانس مع اليهال الحمدلله
وإستانست على الوورك شيتس اللي سويتهم معاه و قالت الحمدلله شكله ماشي الله يطنها دنيا و آخره قاعده احاتي لا يصير ضايع بين اليهال
يعطيج العافيه فوووز و الله يسهل عليج مثل ما سهلتيها علي إنشالله
ولج يا بيلا الدعاء بالمثل
و إستلمنا الصور اليوم و دفعت حق السبورتس دي و حق وجبات النقتس ملوت يوم الأربعا اليايين عاد كسر خاطري ولدي يقول اليوم ما عطوني شيكن نقتس
آنا ما ادري إن في اليوم وجبه لو ادري جان دفعت لها من الصبح ولا ينكسر خاطره بين اليهال حبيبي
تالي حطيت لعا العذر الظاهر عالعدد و طالبين من قبل و ما في وجبه زادت

 

[mr000]

السلام أمهات كراميلا مبروك دوام وليدج وحلوه فكرة الكيكه زين سويتوا! بيلا لاوالله ماكلمتهم دقيت كم مره كله مشغول تالي انشغلت بالصغيره لي 2 ونص ومادقيت! إي صح وزعوا الصور

 

[mr000]

باجر فيه دريس داون داي وإلا بس هاف داي؟

 

[caramella]

بيلا ما يشوف شر وليدج مسكين يا حبيبي الله يوفقه
بيلا السبورتس دي عاده من الساعه جم لي جم حق الكيجي؟؟ ووين يكون؟؟
وأوافقج الراي بسالفة الدلع جدام الأمهات و أكبر مثال اللي سواه ولدي اليوم يقهرني يخليني كله احاتيه و هو من امشي يصير عنده الوضع طبيعي و آنا بس أفتفت برووحي
فوز عاد لما تفوزين بكذا مسابقه بليز تبرعي بوحده من الهدايا لي بليزززز
الله يهون عليج إنشالله
مرووو مدام السالفه حاره احسن إنج تدشين المدرسه هاليومين و تقابلينها احسن من إنها تبرد و تالي ما تعطيج رد يبرد القلب
ومسيكين إشعليه هالفقير لا تحطين الحره فيه حطي الحره بالإداره ولا إهو مو بيده لا حول ولا قوه
وصاجه مروو اليوم بدق اسال عن ولدي إنشلع قلبي يالله ردو علي البداله و باجي الخطوط كله مشغول

 

[bella bambina]

السلام أمهات
وديت ولدي المستشفى مرة ثانبة لأن الحرارة مرتفعه فقال ننطر ليما باجر الصبح اذا رد صخن لازم نسوي له أشعه وتحليل دم والله الصراحه خوش دكتور عبدالله شمساه ما قصر
مرو لأ ما قالو باجر درس داون دي بس هاف دي
كراميلا مبروك على دوام ولدج و الشر ما ييج ان شاء الله السبورتس دي يوم الخميس 11 مارس بنادي السالميه حق الروضه من 8 الى 30 :10 للروضه ومن 8 الى 1 حق باجي المراحل